बारामा दुई मोटरसाइकल ठोकिँदा दुई युवकको मृत्यु
बारा । बारामा तीव्र गतिका दुई मोटरसाइकल एकआपसमा ठोकिँदा दुई युवकको ज्यान गएको छ । मृत्यु हुनेमा रौतहटको गुजरा नगरपालिका–७ का २५ वर्षीय रोशन चौधरी र सप्तरीको बसवलपुर नगरपालिका–७ का २८ वर्षीय महेश पण्डित रहेका जिल्ला प्रहरी कार्यालय बाराका प्रहरी नायब उपरीक्षक एवं प्रवक्ता विजयराज पण्डितले जानकारी दिए । दुर्घटनामा गम्भीर घाइते भएका पण्डितको परवानिपुरस्थित एलएस न्यूरो अस्पतालमा र चौधरीको कलैयास्थित प्रादेशिक अस्पतालमा उपचारका क्रममा मृत्यु भएको प्रहरीले जनाएको छ । गएकाे राती जितपुरसिमरा उपमहानगरपालिका–२ मा बा९०प ६७९४ नम्बरको मोटरसाइकल र विपरीत दिशाबाट आउँदै गरेको बा प्र०६–००३ प१७५३ नम्बरको मोटरसाइकल ठोक्किँदा दुर्घटना भएको हो । बा९०प ६७९४ नम्बरको मोटरसाइकलमा चालक रोशन चौधरीसहित रौतहट परासवाका ३४ वर्षीय भूपेन्द्र चौधरी सवार थिए । घाइते भएका भूपेन्द्रको स्थानीय अस्पतालमा उपचार भइरहेको प्रहरीले जनाएको छ । प्रारम्भिक अनुसन्धान अनुसार तीव्र गति नै दुर्घटनाको कारण बनेको प्रहरीले बताएको छ ।
