काठमाडौं । चितवनमा एक व्यक्तिमाथि निर्घात कुटपिट गर्ने प्रहरी सहायक निरीक्षक (असई) बुद्धिबहादुर घर्ती भुजेल निलम्बनमा परेका छन् ।  भरतपुर महानगरपालिका–११ स्थित बसेली अस्थायी प्रहरी बिटका प्रमुखसमेत रहेका असई भुलेजले  एक व्यक्तिमाथि निर्घात कुटपिट गरेको भिडियो भाइरल भएपछि उनी निलम्बनमा परेका हुन् । गएको १५ पुसमा प्रहरी चेकिङका क्रममा एक युवकमाथि निर्घाट कुटपिट भएको थियो । सो भिडियो सामाजिक सञ्जालमा भाइरल भएपछि चितवन प्रहरीले डीएसपी ज्ञानकुमार महतोको नेतृत्वमा छानबिन समिति बनाएको थियो ।

गोरखा । गोरखामा विभिन्न पार्टी परित्याग गरी नेकपा (माओवादी केन्द्र)मा प्रवेश प्रवेश गरेका छन् । गोरखा नगरपालिकाको आहाले स्थित सरस्वती मा.वि.र डण्डी डाँडाको नव ज्योति मा.वि.को स्वर्ण जयन्ती कार्यक्रममा सहभागी हुन गोरखा आउनु भएका अध्यक्ष प्रचण्डले कार्यक्रममा सहभागी हुनुपूर्व गोरखा नगरपालिका वडा नम्बर ८ आमडाँडा गाउँमा विभिन्न पार्टी परित्याग गरी नेकपा माओवादी केन्द्रमा प्रवेश गर्ने मुस्लिम अगुवासहित विभिन्न व्यक्तिलाई स्वागत गर्नुभएको हो । अध्यक्ष प्रचण्डले विश्राम कुवँर,धनबहादुर कुवँर, अब्दुर करिम मियाँ,नासिर मियाँ,रिवल बहादुर सुनुवार लगायत दजनौं सामाजिक व्यक्तित्वलाई खादा,माला र अबिर लगाएर पार्टीमा स्वागत गर्नुभएको हो । अध्यक्ष प्रचण्ड गोरखाको कार्यक्रम सकेर आजै काठमाडौं फर्किने कार्यक्रम रहेको छ 

गोरखा । नेकपा (माओवादी केन्द्र)का अध्यक्ष पुष्पकमल दाहाल प्रचण्ड गोरखा आउनुभएको छ ।  उहालेँ गोरखा नगरपालिकाको आहाले स्थित सरस्वती मा.वि र डण्डी डाँडाको नव ज्योति मा.वि को स्वर्ण जयन्ती कार्यक्रममा सहभागी हुन भई सम्बोधन गर्ने कार्यक्रम रहेको छ । अध्यक्ष प्रचण्ड गोरखाको कार्यक्रम सकेर आजै काठमाडौं फर्किने कार्यक्रम रहेको छ 

काठमाडौं । गाजामा युद्धविराम सम्झौता लागू भएसँगै इजरायलले ९० जना प्यालेस्टिनी कैदीको रिहा गरेको छ ।हमासले तीनजना इजरायली महिलालाई रिहा गरेसँगै इजरायलले पनि ९० जना प्यालेस्टाइनी बन्दीको रिहाइ गरेको हो  इजरायलले सम्झौताको पहिलो चरणअन्तर्गत ती बन्दीको रिहाइ गरेको बीबीसीले उल्लेख गरेको छ ।हमासले ९० जनाको रिहाइको पुष्टि गर्दै तीमध्ये ६९ महिला र २१ किशोरकिशोरी तथा बालबालिका रहेको बताएको छ । रोयटर्सका अनुसार यीमध्ये अधिकांशलाई हालै पक्राउ गरिएको थियो । तर उनीहरूलाई कुनै पनि मुद्दामा कारबाही वा सजाय दिइएन ।युद्धविराम लागू भएको केही घण्टापछि हमासले तीन इजरायली बन्धकलाई रिहा गरेको थियो । सम्झौताको पहिलो चरणमा इजरायलले १ हजार ९०० प्यालेस्टिनी बन्दीलाई रिहा गर्नुपर्ने छ । उही समयमा हमासले बदलामा ३३ इजरायली बन्धकलाई रिहा गर्नेछ । इजरायल र हमासबीचको यो युद्धविराम सम्झौता तीन चरणमा लागू हुने छ । पहिलो चरणमा इजरायली जेलमा रहेका प्यालेस्टिनी बन्दीहरूको सट्टामा हमासले बन्धकहरूलाई रिहा गर्नुपर्ने छ । त्यसपछि इजरायली सेना बिस्तारै गाजाबाट हट्नेछ र अन्तिम चरणमा गाजाको पुनर्निर्माणको काम हुनेछ ।

काठमाडौं । प्रहरीले एक युवकलाई कुटपिट गरेको भिडिओ हिजोआज सामाजिक सञ्जाल फेसबुकलगायतमा भाइरल भैरहेको छ । पावर देखाएको भन्दै प्रहरीले युवकलाई निर्घात कुटपिट गरेको भिडिओमा देखिन्छ ।उक्त भिडियो सामाजिक सञ्जालमा आएपछि चितवन प्रहरीले घटनाबारे छानबिन सुरू गरेको छ। सामाजिक सञ्जालमा भाइरल बनेको भिडिओबारे सत्यतथ्य बुझ्न चितवन प्रहरीलाई प्रहरी प्रधान कार्यालयले निर्देशन दिएको प्रहरी प्रवक्ता एवं डिआइजी दिनेशकुमार आचार्यले जानकारी दिए। घटना केही समय अगाडि भएको उनले बताए।अहिले भाइरल बनेको भिडिओ पुस १४/१५ गते चितवनमा भएको बताइएको छ ।

काठमाडौं । आज सार्वजनिक नीति तथा प्रत्यायोजित विधायन समितिको बैठक बस्दैछ । बैठक सोमबार बिहान साढे ११ बजे बस्दैछ । बैठकमा राष्ट्रिय निकुञ्ज कार्यालयका प्रमुखहरुसँग छलफल हुने जनाइएको छ ।

काठमाडौं । कोशी प्रदेशको हिउँदे अधिवेशन आजबाट शुरु हुँदैछ । दिउँसो २ बजेबाट प्रदेशसभाको छैंटौं तथा हिउँदे अधिवेशन शुरु हुन लागेको हो । गत असोज ४ गते कोशी प्रदेशको पाँचौं अधिवेशन अन्त्य भएको थियो । यसको चार महिनापछि शुरु भएको अधिवेशनका लागि विजनेश पर्याप्त रहेको सरकारले जनाएको छ । आज बस्ने बैठकका लागि तय गरिएको कार्यसूचीमा पाँचवटा विषयहरु रहेको प्रदेशसभा सचिवालयले जनाएको छ । सभामुखले प्रदेश प्रमुखको कार्यालयबाट प्राप्त पत्र वाचन गर्ने कार्यसूची पनि रहेको छ । केही प्रदेश ऐनलाई संशोधन गर्न बनेको अध्यादेश २०८१ पेश हुनेछ । यस्तै सभामुखबाट जारी भएको बाधा अड्काउ फुकाउने आदेश अनुमोदनका लागि पेश गर्ने पनि कार्यसूचीमा छ । यसैगरि मुख्य न्यायाधीवक्ताको काम कर्तव्य अधिकार र सेवाको शर्त सम्बन्धी ऐन २०७५ लाई संशोधन गर्न बनेको विधेयक टेबल गर्ने कार्यसूची रहेको छ । अधिवेशन शुरु हुने पहिलो दिन आज प्रदेशसभामा प्रतिनिधित्व गर्ने दलका शीर्ष नेताहरुले आफ्नो मन्तव्य राख्ने कार्यसूची पनि रहेको प्रदेशसभा सचिवालयले जनाएको छ ।

काठमाडौं । बुटवलस्थित सुप्रिम सहकारी संस्थाको अर्बौँ बचत ठगी प्रकरणमा जिल्ला सरकारी वकिल कार्यालय रुपन्देहीले राष्ट्रिय स्वतन्त्र पार्टीका सभापति रवि लामिछानेसहित १४ जनाविरुद्ध आइतबार मुद्दा दायर गरेको छ । पूर्व उपप्रधान एवम् गृहमन्त्री लामिछाने र गोर्खा मिडिया नेट्वर्कमा उनका साझेदार एवम् पूर्वडीआईजी छविलाल जोशीसहित १४ जनालाई प्रतिवादी बनाएर सरकारी वकिलले मुद्दा दर्ता गराएको हो। रवि र छविसहितविरुद्ध सहकारी ठगी र संगठित अपराधको कसुरमा मुद्दा दायर गरिएको जिल्ला सरकारी वकिलको कार्यालयले जनाएको छ । सरकारी वकिलको कार्यालयले यसअघि २८ जनालाई प्रतिवादी बनाउँदै मुद्दा दायर गरिसकेको थियो । यससँगै सुप्रिम सहकारी ठगी प्रकरणमा प्रतिवादीको संख्या पनि ४२ पुगेको छ । सरकारी वकिलको कार्यालयले रास्वपा सभापति लामिछानेविरुद्ध चार करोड रुपैयाँभन्दा बढी बिगो माग दाबी गर्दै अदालतमा मुद्दा लगेको हो । शुक्रबार नै मुद्दा लैजाने तयारी गरिए पनि सर्वोच्च अदालतमा पठाइएको सक्कल फाइल आउन ढिलाइ भएपछि सरकारी वकिल कार्यालयले आइतबार १४ जनाविरुद्ध पूरक मुद्दा दर्ता गराएको हो। सुप्रिम सहकारी ठगी प्रकरणमा पूरक अनुसन्धान गरेर प्रहरीले लामिछाने, पूर्वडीआईजी छविलाल जोशीसहित १४ जनाको अनुसन्धान प्रतिवेदन प्रहरीले जिल्ला सरकारी वकिल कार्यालय रुपन्देहीमा बुझाएको थियो । जिल्ला सरकारी वकिल कार्यालय रूपन्देहीले जीबी राई, सुप्रिमका अध्यक्ष ओमप्रकाश गुरुङ, सहकारीका व्यवस्थापक सागर केसी, कुमार रम्तेलसहित २८ जनालाई सहकारी ठगीसम्बन्धी मात्रै कसुर लगाई २०८१ वैशाख ३ मा सुरु मुद्दा दर्ता गरेको थियो। प्रहरीले थप १४ गरी ४२ जनाविरुद्ध मुद्दा चलाउने राय दिइएको इलाका प्रहरी कार्यालय बुटवलले जनाएको थियो । यसअघि रवि जिल्ला अदालत कास्कीमा ६५ लाख र जिल्ला अदालत काठमाडौंमा ६० लाख धरौटी बुझाएर छुटिसकेका छन् । उता कास्कीमा ८८ लाख धरौटी तिरेर छुटेका छविलालको भने जिल्ला अदालत काठमाडौंमा थुनछेक बहस चल्दैछ ।

सत्य नेपाली स्वदेशमा कामको अवसरको कमीले गर्दा लाखौं युवा विदेश जाने बाटो रोज्छन्। उनीहरूले आफ्ना घर परिवारलाई राम्रो जीवन दिने सपना बोकेर लामो यात्रामा निस्कन्छन्। तर, ती सपनाहरू विदेशको कठोर वास्तविकतामा पुगेपछि धेरैजसो खण्डित हुन्छन्। विशेष गरी, मध्यपूर्व र मलेसियाका देशहरूमा पुगेका नेपाली श्रमिकहरूले भोग्नुपरेका संघर्ष र पीडाले हरेक नेपालीको मन छोएको छ। विदेश जानुअघि नै उनीहरूको संघर्ष सुरु हुन्छ। धनकुटाका रमेश थापाले विदेश जाने तयारी गर्नका लागि आफ्नो घरको सानो जमिन बेच्नुपर्‍यो र छिमेकबाट ऋण लिनुपर्‍यो। उनलाई एक स्थानीय म्यानपावर एजेन्टले राम्रो तलब र सुविधाको सपना देखाएको थियो। तर, रमेशले एकमुष्ट चार लाख रुपैयाँ बुझाएपछि जागिरको विवरण अस्पष्ट पाइयो। जब उनी मध्यपूर्व पुगे, उनले दिनको १२ घण्टा भीषण गर्मीमा काम गरे पनि सम्झौतामा उल्लेख भएको भन्दा निकै कम तलब पाउन थाले। उनले घरमा ऋण चुक्ता गर्न सक्ने आशामा आफूलाई सम्हाले, तर एक वर्षपछि पनि उनको पारिश्रमिक ठगिएको खबर आयो। रमेशको कथा त्यस्ता हजारौं नेपालीको प्रतिनिधित्व गर्दछ, जसले विदेशमा मात्र होइन, आफ्नो घरको भूमिमा पनि अनगिन्ती दुःख सहनुपर्छ। दाङकी माया चौधरीको कथा झन् पीडादायक छ। उनी साउदी अरेबियामा घरेलु कामदारका रूपमा गएकी थिइन्। विदेश जानुअघि उनले घरमा रहेको थोरै खेत बेचिन् र छोरीको शिक्षा रोक्दै ऋणको व्यवस्था गरिन्। म्यानपावर एजेन्टले मायालाई सुरक्षित र सम्मानजनक जागिर हुने आश्वासन दिएको थियो। तर, साउदी पुगेपछि उनको वास्तविकता अर्कै भयो। उनलाई दिनरात काम गर्न लगाइयो, खानपिनको कमी भयो, र शारीरिक तथा मानसिक यातनाको शिकार बनाइयो। आफ्नो पीडा बयान गर्न र सहयोग माग्न पनि उनलाई अनुमति थिएन। माया जस्ता थुप्रै महिलाहरूले यस्ता यन्त्रणा सहँदै आफ्नो भविष्यको लागि लडिरहेका छन्। नेपालका कूटनीतिक नियोगहरू पनि यस विषयमा धेरैपटक असफल देखिएका छन्। श्रमिकहरू संकटमा परेको बेला राजदूतावास वा अन्य कूटनीतिक निकायहरूले समयमै सहयोग पुर्‍याउन नसक्ने धेरै घटनाहरू बाहिर आएका छन्। श्रमिकहरूले आफ्नो समस्या लिएर राजदूतावासमा जाँदा धेरैजसो समय उनीहरूको कुरा नसुन्ने वा सहायता नगर्ने गुनासो गरिरहेका छन्। कतिपय अवस्थामा कूटनीतिक नियोगका अधिकारीहरूले नै गम्भीर लापरवाही देखाउने गरेका छन्। कामदारहरूले उत्पीडनमा परेका बेला सहयोगको लागि आग्रह गर्दा, कूटनीतिक नियोगको उदासीनताले उनीहरूको समस्या झन् जटिल बनेको छ। विदेश जाने प्रक्रियामा नै म्यानपावर एजेन्टहरूको शोषण अत्यधिक देखिन्छ। धेरैजसो एजेन्टहरूले श्रमिकहरूलाई आकर्षक जागिरको सपना देखाएर ठूलो रकम असुल्ने गर्छन्। सम्झौतामा उल्लेख भएजस्तै काम र तलब उपलब्ध गराइँदैन। झनै, श्रमिकहरू विदेश पुगेपछि पासपोर्ट जफत गरिन्छ, जसले गर्दा उनीहरू बन्धक जस्तै जीवन बिताउन बाध्य हुन्छन्। नेपाल सरकारले म्यानपावर कम्पनीहरूको अनुगमनका लागि केहि कदम चाले पनि ठगीका घटना रोक्न अझै प्रभावकारी हुन सकेको छैन। विदेशमा श्रमिकहरूले भोग्नुपरेका कठिनाइहरूको सबैभन्दा ठूलो असर उनीहरूका परिवारहरूमा देखिन्छ। धेरैजसो परिवारहरूले ऋण तिर्नको लागि खेत-जग्गा बेच्नुका साथै, घरको आर्थिक अवस्था सुधार्ने आशामा रहेका हुन्छन्। तर, श्रमिकले विदेशमा पठाएको पैसा अधिकांश समय ऋण चुक्ता गर्नमै खर्च हुने गर्छ। घरमा रहेका बालबालिका र वृद्धवृद्धाहरू पनि यस आर्थिक अन्यायको प्रत्यक्ष शिकार बन्छन्। यसको समाधानका लागि प्रभावकारी नीति र कदमहरू आवश्यक छ। सरकारले म्यानपावर कम्पनीहरूको कडाइका साथ अनुगमन गर्नुपर्छ। साथै, कूटनीतिक नियोगहरूको भूमिकालाई प्रभावकारी बनाउन आवश्यक छ। संकटमा परेका श्रमिकहरूलाई तुरुन्त सहायता उपलब्ध गराउन र उनीहरूको अधिकारको सुरक्षा गर्नका लागि ठोस रणनीति बनाउनुपर्छ। श्रमिकहरूको तालिम र शिक्षामा लगानी गर्नाले उनीहरूलाई जागिरको राम्रो अवसर मिल्न सक्छ। साथै, वैदेशिक रोजगारीलाई वैकल्पिक बनाउँदै देशभित्रै रोजगारीका अवसर सिर्जना गर्नेतर्फ पनि सरकारको ध्यान जानुपर्छ। नेपाली युवाहरूको पसिना र संघर्षले सिंगो देशको अर्थतन्त्रलाई बलियो बनाएको छ। अब उनीहरूका लागि सम्मानजनक आप्रवासन सुनिश्चित गर्नु सरकार र सम्पूर्ण समाजको कर्तव्य हो। यी सबै कठिनाइहरूको बाबजुद, नेपाली श्रमिकहरूले आफ्नो सपना र परिवारको लागि दिएको बलिदान प्रेरणादायी छ। उनीहरूको दुःख र संघर्षको कथा हामी सबैका लागि गहिरो चिन्तनको विषय हुनुपर्छ। सम्मानजनक आप्रवासन सुनिश्चित गर्ने काम अब टार्न मिल्ने छैन।  

मुम्बई: बलिउड अभिनेता सैफ अली खानको घरमा चोरी प्रयास र आक्रमणमा संलग्न रहेको आरोपमा एकजना पक्राउ परेका छन् । आरोपीलाई मुम्बइको ठाणेबाट शनिबार राति पक्राउ गरिएको हो। आइतबार बिहान मुम्बई प्रहरीले पत्रकार सम्मेलन गर्दै घटनाबारे विस्तृत जानकारी दिएको छ। प्रहरीका अनुसार आरोपी चोरीको उद्देश्यले सैफको घरमा प्रवेश गरेको थियो। पक्राउ परेका आरोपीको वास्तविक नाम मोहम्मद शरीफुल इस्लाम शहजाद हो, जसको उमेर ३० वर्ष छ। प्रहरीले अनुसन्धानका क्रममा पत्ता लगाएको छ कि उनले भारतमा गैरकानूनी रूपमा प्रवेश गरेपछि आफ्नो नाम परिवर्तन गरी विजय दास राखेका थिए। आरोपीसँग भारतको कुनै वैध कागजात नभएको प्रहरीले जनाएको छ। प्रारम्भिक अनुसन्धानका आधारमा उनलाई बंगलादेशी नागरिक भएको शंका गरिएको छ। पृष्ठभूमि: शरीफुल इस्लाम पाँच–छ महिनाअघि मुम्बई आएका थिए। यहाँ आएपछि उनी एक हाउसकीपिंग एजेन्सीमा काम गर्दै आएका थिए।   प्रहरीका अनुसार आरोपी पहिलो पटक सैफ अली खानको अपार्टमेन्टमा प्रवेश गरेका थिए। चोरी गर्ने योजना बनाएर उनी अपार्टमेन्टमा प्रवेश गरेको बताइएको छ। प्रहरीले घटनास्थलमा भेटिएका सामग्रीहरूको अनुसन्धान गर्दै आरोपीको परिचय र योजनाबारे थप विवरण पत्ता लगाएको छ।   आरोपीलाई पक्राउ गर्न ३५ वटा प्रहरी टोली परिचालित थिए। प्रहरीले यस मामिलामा ५० भन्दा बढी व्यक्तिसँग सोधपुछ गरिसकेको छ। यसअघि शनिबार छत्तीसगढको दुर्ग जिल्लाबाट एकजना संदिग्धलाई हिरासतमा लिइएको थियो।   आरोपीलाई आइतबार अदालतमा पेश गरिनेछ। मुम्बई प्रहरीले आरोपीलाई हिरासतमा लिएर थप अनुसन्धानका लागि कस्टडी माग गर्ने तयारी गरेको छ।

 जेरुसेलम ।  गाजा क्षेत्रमा १५ महिना लामो रक्तपातपूर्ण संघर्षको नयाँ अध्याय खुल्ने अपेक्षा गरिएको युद्धविराम र बन्धक मुक्तिसम्बन्धी सम्झौता आइतबार बिहानबाट लागू हुने भएको छ। मुख्य बुँदाहरू: इजरायली प्रधानमन्त्री बेन्जामिन नेतन्याहुले सम्झौतालाई स्वागत गरे पनि यसलाई कार्यान्वयन गर्न हमासले रिहा गरिने बन्धकहरूको सूची उपलब्ध गराउनुपर्ने बताए। सम्झौता असफल भएमा इजरायलले पुनः हमला गर्न पाउने अधिकार सुरक्षित राखेको उल्लेख गर्दै उनले त्यसमा अमेरिकाको समर्थन रहने दाबी गरेका छन्। पहिलो चरणमा ३३ जना इजरायली बन्धकहरूलाई सयौं प्यालेस्टिनी कैदीहरूको विनिमयमा रिहा गरिने छ। अमेरिकी अधिकारीहरूका अनुसार आइतबार तीनजना इजरायली महिलाहरूलाई रिहा गरिने अपेक्षा छ। नेपालका विपिन जोशीका बारेमा भने अझैसम्म कुनै आधिकारिक सूचना जारी गरिएको छैन । विपिनसँगै थाइल्याण्डका ८ जना बन्धक समेत रिहा हुने जनाइएको छ। तर पहिलो चरणमा भने अमेरिकी नागरिक र इजरायली नागरिकलाई प्राथमिकता दिइने समाचारहरुमा उल्लेख छ।  सम्झौता घोषणा भएयता इजरायलले गाजामा बमबारी जारी राख्दा कम्तीमा १२२ जनाको मृत्यु भएको छ भने २७० जना घाइते भएका छन्, गाजाको नागरिक रक्षा विभागले जनाएको छ। युद्धविरामअघि नै गाजामा मानवीय सहायता पुर्‍याउनका लागि राफाह सीमामा सहयोग सामग्री बोकेका ट्रकहरू लाइनमा बसेका छन्। इजिप्टको सरकारी सम्बद्ध अल काहेरा न्यूज का अनुसार गाजामा दैनिक ६०० ट्रक सहायता पठाइने योजना छ। तर, संयुक्त राष्ट्रसंघका अनुसार यो मात्र सुरुवात हुनेछ र गाजाको मानवीय संकट समाधान गर्न अझ ठूलो प्रयास आवश्यक छ। गाजा क्षेत्रमा लामो समयदेखि चलिरहेको यस संघर्षले क्षेत्रीय अशान्ति बढाउँदै गम्भीर मानवीय संकट सिर्जना गरेको छ। यो सम्झौताले अस्थायी राहत दिन सक्ने अपेक्षा गरिए पनि यसले स्थायी समाधान दिन सक्ला कि नसक्ला भन्ने विषयमा शंका कायमै छ।

काठमाडौं: लोकप्रिय सामाजिक सञ्जाल प्लेटफर्म टिकटक  अमेरिकामा पूर्ण रूपमा बन्द भएको छ। अमेरिकी प्रयोगकर्ताहरूले एपमा प्रवेश गर्न खोज्दा "तपाईं अहिलेका लागि टिकटक  प्रयोग गर्न सक्नुहुन्न" भन्ने सन्देश देखिएका छन्। यो कदम राष्ट्रपति जो बाइडेन प्रशासनले TikTok बन्द गर्ने कानूनी निर्णय कार्यान्वयन गरेपछि आएको हो। अमेरिकी सर्वोच्च अदालतले शुक्रबार TikTok माथिको प्रतिबन्धलाई अनुमोदन गरेको थियो। उक्त कानूनी निर्णय अनुसार चीनमा आधारित कम्पनी ByteDance ले जनवरी १९ भित्र टिकटकको अमेरिकी संस्करण कुनै तटस्थ पार्टीलाई बेच्नुपर्ने प्रावधान थियो। तर ByteDance ले यो निर्णय कार्यान्वयन गर्न असफल भएपछि प्रतिबन्ध लागु भएको हो। टिकटक  ले यस कदमलाई "अमेरिकी प्रयोगकर्ताको स्वतन्त्र अभिव्यक्ति अधिकारको उल्लङ्घन" भएको बताउँदै अदालतमा चुनौती दिएको थियो। हाल TikTok का अमेरिकामा १७ करोड प्रयोगकर्ता छन्। राष्ट्रपति-निर्वाचित डोनाल्ड ट्रम्पले सोमबार पदभार ग्रहण गरेपछि टिकटक लाई ९० दिनको समय दिने सम्भावना रहेको बताएका छन्। ट्रम्पले भनेका छन्, "टिकटक  प्रतिबन्ध फुकुवा गर्न मैले समाधान खोज्नेछु।" यो घटनाले सामाजिक सञ्जालको स्वतन्त्रता र राष्ट्रिय सुरक्षा सम्बन्धी बहसलाई फेरि एकपटक सतहमा ल्याएको छ। प्रतिबन्धपछि अमेरिकी Google Play Store र Apple App Store बाट TikTok एप हटाइएको छ भने TikTok.com ले पनि कुनै भिडियो देखाइरहेको छैन। TikTok ले यसअघि चेतावनी दिएको थियो कि यदि प्रतिबन्ध फुकुवा गर्ने कुनै आश्वासन प्राप्त नभएमा प्लेटफर्म आइतबारदेखि "अन्धकारमा जानेछ।" अब, टिकटक  प्रयोगकर्ताहरूले यो संकटको समाधानको प्रतीक्षा गरिरहेका छन्।

ग्रामथान (मोरङ) । नेकपा (माओवादी केन्द्र)का अध्यक्ष पुष्पकमल दाहाल ‘प्रचण्ड’ले आगामी स्थानीय तहको निर्वाचनमा कम्तीमा २५० पालिका जितेर माओवादी केन्द्रलाई पहिलो पार्टी बनाउने बताउनुभएको छ । नेकपा माओवादी केन्द्रले मोरङको ग्रामथान गाउँपालिका ५ तेतेरियामा गरेको धन्यवाद ज्ञापन कार्यक्रम तथा खबरदारी सभालाई सम्बोधन गर्दै उहाँले यस्तो उद्घोष गर्नुभएको हो । २०७९ को स्थानीय तह निर्वाचनमा तेस्रो बनेको माओवादीलाई यस पटक ग्रामथानवासीले पहिलो बनाएर पालिका अध्यक्षमा जिताउनु रणनैतिक महत्वको विषय भएको उल्लेख गर्दै अध्यक्ष प्रचण्डले भन्नुभयो– ‘हामीले २०७९ को निर्वाचनमा १२२ पालिकामा प्रमुख तथा अध्यक्ष जितेका थियौं, अब ग्रामथान थपिएपछि यो संख्या १२३ पुगेको छ । आगामी स्थानीय तह निर्वाचनमा २५० भन्दा बढी पालिकामा जीत हात पारेर माओवादी पहिलो पार्टी बन्छ, यो हामीलाई उपनिर्वाचनले दिएको महत्वपूर्ण सन्देश हो ।’ गत मंसिर १६ गतेको स्थानीय तहको निर्वाचनबाट पूर्वले माओवादी केन्द्रलाई नयाँ उचाइँमा उठाउने सन्देश दिएको उल्लेख गर्दै उहाँले मोरङको ग्रामथान गाउँपालिका र उदयपुरका दुई वटा जिताउनुका साथै अन्य वडामा पनि मत संख्या बढाएर पूर्वले बिरोधीहरुलाई ठूलै जवाफ दिएको बताउनुभयो । ‘बिरोधीहरुले अब माओवादी कमजोर भयो, एक्लै चुनाव लड्न सक्दैन भनेर अफवाह फैलाइरहेको बेला पूर्वले माओवादीलाई संख्या र लोकप्रिय मत दुबैमा पहिलो पार्टी बनाएको छ’– ‘उहाँले भन्नुभयो– ‘यो एउटा पालिकाको मात्रै विजय होइन, यो देशैभरि विशेष सन्देश दिने रणनैतिक महत्वको जीत हो ।’ उहाँले ग्रामथानबासीले माओवादीलाई ठूलो गुण लगाएको उल्लेख गर्दै यहाँका जनताका लागि आफ्नो निवास खुला रहने र जनताको समस्या समाधानका लागि प्रतिबद्ध भएर लाग्ने बताउनुभयो । केन्द्रीय समिति बैठकको दस्तावेजमा आफूले ग्रामथानको नामै उल्लेख गरेर देशभरि विजयको सन्देश प्रवाह गरिएको जानकारी पनि उहाँले गराउनुभयो । उहाँले आफ्नो पार्टी ओरालो यात्रामा लागेका बेला कहिले कांग्रेस र कहिले एमालेसँग सहकार्य गर्दै केही कमजोरी पनि गरेको उल्लेख गर्दै अब आफ्नै बलबुतामा अघि बढ्ने बताउनुभयो । देशमा माओवादी केन्द्रकै कारण आम उत्पीडित जनताले अधिकार पाएको उल्लेख गर्दै अध्यक्ष प्रचण्डले अब यसलाई कार्यान्वयन गर्दै देशबाट भ्रष्टाचारको जरा उखेलेर भ्रष्टाचारीलाई लखेट्नका लागि फेरि एक माओवादी केन्द्रलाई बहुमत दिन आग्रह गर्नुभयो । ‘हामीले २०६४ मा जनताको मत पाएर पनि पार्टीलाई एकताबद्ध राख्न सकेनौं, जनताको विश्वास कायम राख्न नसकेकै हौं’– उहाँले भन्नुभयो– ‘त्यतिबेलाको जनमत र आजको जस्तो हाम्रो सुझबुझपूर्ण चेतना र शैली मिल्यो भने अब हामी नेपाललाई राजनीतिक परिवर्तनको पूर्ण अनुभूति गराउने छौं, हामी धेरै कुरा सम्झेर तपाइँहरुसमक्ष आएका छौं, तपाईहरुलाई पनि २०६४ साल सम्झिदिन अपिल गर्दछु ।  आफूले गणतन्त्र नेपालको पहिलो सरकारको नेतृत्व गर्दा मध्यपहाडी लोकमार्गलगायतका केही पूर्वाधार विकासको क्षेत्रमा महत्वपूर्ण थालनी र गरिब किसानको पक्षमा ऋण मोचनजस्ता काम गरिएको उल्लेख गर्दैे– ‘दोस्रोपटक सरकारको नेतृत्व गर्दा हामीले राष्ट्रिय एकता कायम गर्दै संविधान कार्यान्वयन गर्न सक्यौं भने नेपाललाई लोडसेडिङमुक्त बनाउने अभियानको नेतृत्व पनि ग¥यौं ।’ आफूले कुलमान घिसिङलाई विद्युत प्राधिकरणको प्रमुख बनाएपछि नेपाल लोडसेडिङमुक्त भएको उल्लेख गर्दै अहिले ‘चोरलाई चौतारो, साधुलाई सुली’ भनेजस्तै सरकारले उनै कुलमानलाई निकाल्न खोजेको भन्दै आपत्ति व्यक्त गर्नुभयो । उहाँले सुशासन, सामाजिक न्याय र समृद्धिको अभियानमार्फत सरकारको तेस्रो कार्यकाललाई नयाँ ढंगले बढाउँदा पार्टी र आन्दोलनमा नै पुनर्जागरण सुरु भएको स्पष्ट गर्नुभयो । आफ्नो नेतृत्वको सरकारले विभिन्न क्षेत्रमा सुधारको थालनी गरेको उल्लेख गर्दै अध्यक्ष प्रचण्डले विश्वविद्यालयमा योग्यताका आधारमा जिम्मेवारी दिने मेरिटोक्रेसीको थालनी, कर्मचारीतन्त्रमा हाम्रो होइन राम्रो मान्छेलाई जिम्मेवारी दिने र बेथिति गर्नेमाथि दण्डित गर्ने प्रक्रियाको सुरुवात, वर्षौदेखि रोकिएका शिक्षा ऐन, निजामति ऐन जस्ता कानुन निर्माणलाई अगाडि बढाउने लगायतका महत्वपूपूर्ण काम अघि बढाइएको बताउनुभयो । ‘सुशासनलाई उच्च प्राथमिकता दिएर भ्रष्टाचारमा संलग्न जोकोही भए पनि कारवाही गर्ने प्रक्रियाको थालनी गरियो, यो नै आम जनताका लागि आशाको दियो बन्न पुग्यो’– उहाँले भन्नुभयो– ‘माथिल्लो तहका नेताहरु, कर्मचारी र बिचौलियामाथिको कारवाहीले सुशासनको जग कायम गर्न मात्रै सहयोग गरेन्, जनतामा पुनः आशा र विश्वास पनि पलाउन थाल्यो । यसले नै पार्टी र आन्दोलनलाई नयाँ शिराबाट अघि बढाउन पनि आधार तयार गरेको छ।’ सुशासन, सामाजिक न्याय र समृद्धिको अभियान कदम कदममा अगाडि बढ्न थालेपछि बिचौलियाहरु तर्सेर रातारात षड्यन्त्र गरेर सरकार ढाल्न थालेको उल्लेख गर्दै अध्यक्ष प्रचण्डले अहिलेको सरकार सत्तारुढ दलहरुले होइन बिचौलियाले चलाइरहेको र सरकारमा रहेकाहरु उनीहरुका मुखौटा मात्रै भएको टिप्पणी गर्नुभयो । सरकारबाट बाहिरिएपछि आफूहरुले थालेका राम्रा काम लिएर जनताको बीचमा जाने प्रक्रिया सुरु गरेको जानकारी दिंदै उहाँले जनताको तागतबाट नै समाजवाद निर्माणको अभियान अघि बढाउने प्रण गरेको बताउनुभयो । ‘अहिले यहाँसम्म आउँदा पार्टीमा अभूतपूर्वक एकता कायम भएको छ । परामर्श बैठकपछि देशभरिका नेता कार्यकर्ताले विचार र नेतृत्वको केन्द्रिकरणमा जोड दिएका छन्’– अध्यक्ष प्रचण्डले भन्नुभयो– ‘जनताले पनि हामीले गरेका र गर्न खोजेका राम्रा काम तथा अहिलेको एमालेले गरेको नराम्रा कामलाई हेरेर जनताको आशा र भरोसा हामीतिर बढेको छ । भर्खरैको उपनिर्वाचनले प्रष्टरुपमा यो नतिजा दिइ पनि सकेको छ ।’ उहाँले माओवादीनिकटका कर्मचारीहरुलाई माओवादीपन देखाउन आग्रह गर्दै भन्नुभयो– ‘अन्यायमा नझुक्ने, अन्याय नगर्ने, आफूले भ्रष्टाचार नगर्ने र भ्रष्टाचारका विरुद्ध कठोर रुपमा प्रस्तुत हुने, पार्टीले अघि सारेको सुशासन, सामाजिक न्याय र समृद्धिको एजेण्डालाई बल पुर्याउँदै समाजवादको भ्रुण रोप्ने फौजको रुपमा तपाइँहरु अघि बढ्नुपर्छ । यसमा दृढतापूर्वक अघि बढ्नुहोला ।’ गत मंसिर १६ गते भएको स्थानीय तह उपनिर्वाचनमा यो पालिकाको अध्यक्ष माओवादी केन्द्रले जितेको थियो । गत भदौ २९ गते अध्यक्ष प्रचण्डले नै ग्रामथान पुगेर पहिलो चुनावी सभालाई सम्बोधन गर्नुभएको थियो । उपनिर्वाचनमा माओवादी केन्द्रले पालिका अध्यक्ष जितेपछि मतदातालाई धन्यवाद ज्ञापन गर्न अध्यक्ष प्रचण्ड दोस्रो पटक यो पालिकामा आउनुभएको हो ।

बेइजिङ चीनका राष्ट्रपति सी चिनफिङ र संयुक्त राज्य अमेरिकाका नवनिर्वाचित राष्ट्रपति डोनाल्ड ट्रम्पबीच टेलिफोन वार्ता भएको छ । समसामियक मुद्दाहरुमा निकै विस्तृत वार्तापछि दुबै पक्षबाट सकारात्मक प्रतिक्रिया व्यक्त भएको छ। चाइना डेलीका अनुसार शीले ट्रम्पलाई दोस्रो पटक अमेरिकी राष्ट्रपति निर्वाचित भएकोमा बधाई दिएको र प्रत्युत्तरमा ट्रम्पले सीसँगको आफ्नो उत्कृष्ट सम्बन्धलाई माया गर्ने बताए। साथै, दुवै राष्ट्रप्रमुखहरूले युक्रेन संकट र प्यालेस्टाइन-इजरायल संघर्षजस्ता समान चासोका प्रमुख अन्तर्राष्ट्रिय र क्षेत्रीय विषयहरूमा विचार-विमर्श गरे। "दुवै राष्ट्रप्रमुखहरू प्रमुख चासोका मुद्दाहरूमा रणनीतिक सञ्चार च्यानल स्थापना गर्ने र नियमित सम्पर्क कायम राख्नेमा सहमत भए," परराष्ट्र मन्त्रालयबाट समाचार विज्ञप्तिमा जनाएको छ। वार्ताको क्रममा, सीले दुवै नेताहरूले आपसी अन्तर्क्रियालाई ठूलो महत्व दिने बताएका थिए । दुबै पक्षले नयाँ अमेरिकी राष्ट्रपतिको कार्यकालमा चीन-अमेरिका सम्बन्धमा राम्रो सुरुवात हुने आशा व्यक्त गरे। थप प्रगति हासिल गर्न नयाँ सुरुवातबाट चीन-अमेरिका सम्बन्धलाई अघि बढाउन इच्छुक रहेको बताए। "चीन र अमेरिका जस्ता दुई महान देशहरू आफ्ना सपना पछ्याउँदैछन्" र आफ्ना जनताहरूलाई राम्रो जीवन बिताउन सक्षम बनाउने प्रतिवद्धतामा छन्।" शीको भनाइ उल्लेख गर्दै चाइना डेलीले लेखेको छ- "दुवै देशका बीच साझा चासोका क्षेत्रहरू प्रशस्त छन् र सहकार्यका लागि ठूलो ठाउँ छ। यी दुई देशहरू साझेदार र मित्र बन्न सक्छन्, एक-अर्काको सफलतालाई सहयोग गर्न सक्छन्, साझा समृद्धि हासिल गर्न सक्छन् र दुवै देश र विश्वलाई लाभ पुर्‍याउन सक्छन्।" फरक राष्ट्रिय अवस्थाका कारण चीन र अमेरिकाबीच केही मतभेद हुनु स्वाभाविक भएपनि  शीले आपसी सम्मान र चासोको समाधानमा ध्यान दिनुपर्नेमा जोड दिए, "मुख्य कुरा भनेको एक-अर्काको मूल चासो र प्रमुख मुद्दाहरूको सम्मान गर्नु र समस्याहरूको उपयुक्त समाधान खोज्नु हो," उनले भने। ट्रम्पले नियमित संवाद र सञ्चार कायम राख्न चाहेको र छिट्टै सीसँग भेट्न उत्सुक रहेको बताए। अमेरिकी नवनिर्वाचित राष्ट्रपतिले अमेरिका र चीन आजको संसारका सबैभन्दा महत्वपूर्ण देशहरू भएको र दीर्घकालिन मित्रता कायम राख्दै विश्व शान्तिको रक्षा गर्न सँगै काम गर्नुपर्नेमा जोड दिएका थिए। वार्ताका क्रममा सीले ताइवान सम्बन्धी विषय चीनको सार्वभौमसत्ता र भौगोलिक अखण्डताको लागि महत्वपूर्ण रहेको उल्लेख गरे र अमेरिकी पक्षलाई यसलाई सावधानीपूर्वक समाधान गर्न आग्रह गरे। "चीन-अमेरिका आर्थिक र व्यापार सम्बन्धको सार आपसी लाभ र जीत-जीत सहयोगमा आधारित रहेको छ, र टकराव र द्वन्द्व दुवै देशहरूको विकल्प हुनु हुँदैन", उनले भने। दुवै पक्षले आपसी सम्मान, शान्तिपूर्ण सहअस्तित्व र जीत-जीत सहकार्यको सिद्धान्तमा आधारित भएर सहकार्यलाई बलियो बनाउनु पर्छ र दुवै देश र विश्वलाई लाभ पुर्‍याउन प्रमुख, ठोस र सकारात्मक कामहरू थप गर्नुपर्छ, सीले थपे। दुवै पक्षले "चीन र अमेरिका — दुई विशाल जहाजहरू जस्तै — स्थिर, स्वस्थ र दिगो विकासको मार्गमा अघि बढिरहनु पर्छ" भन्ने सुनिश्चित गर्नु पर्छ, उनले भने। शुक्रबार नै, परराष्ट्र मन्त्रालयले विज्ञप्ति जारी गर्दै वाशिङ्टन डीसीमा सोमबार आयोजना हुने ट्रम्पको पदग्रहण समारोहमा राष्ट्रपति सीका विशेष प्रतिनिधि, उपराष्ट्रपति हान झेङ, सहभागी हुने जनाएको छ। "हामी नयाँ अमेरिकी सरकारसँग संवाद र सञ्चारलाई बढावा दिन, मतभेदहरूलाई उचित रूपमा व्यवस्थापन गर्न, पारस्परिक रूपमा लाभदायक सहकार्यलाई विस्तार गर्न, र दुवै देशको स्थिर, स्वस्थ र दिगो सम्बन्धको खोजी गर्न तयार छौं," विज्ञप्तिमा थपिएको छ। सी-ट्रम्प फोन वार्ता र हानको यात्राको घोषणाले दुइ देशबीचको सम्बन्धको भविष्यलाई सक्रिय रूपमा आकार दिने बेइजिङको प्रयासको रुपमा विश्लेषकहरुले टिप्पणी गरेका छन् । "अमेरिका पनि त्यही लक्ष्यतर्फ काम गरोस्", चीन अन्तर्राष्ट्रिय अध्ययन संस्थानको अमेरिकी अध्ययन विभागका उपनिर्देशक सु सियाओहुईले भनेको चाइनाडेलीले जनाएको छ। "बेइजिङको सन्देश स्पष्ट छ: दुवै पक्षले स्पष्ट सिद्धान्तहरूमा काम गर्नुपर्छ र साझा लक्ष्यहरू पछ्याउनुपर्छ यदि उनीहरूले दुईपक्षीय सम्बन्धलाई थप स्थिर बनाउन चाहन्छन् भने," उनले भने। "एक-अर्कालाई उपदेश नदिईकन, आपसी सम्मानले मात्र दुवै पक्षलाई एक-अर्कालाई राम्रोसँग बुझ्न मद्दत गर्न सक्छ... हामीले वाशिङ्टनको चिन्ता देखेका छौं कि सम्बन्धहरू नियन्त्रण बाहिर जाने सम्भावना छ, र अन्य प्रमुख देशहरूसँगको अमेरिकाको ठूलो द्वन्द्वले निश्चित रूपमा विनाशकारी परिणाम ल्याउनेछ," उनले थपे। यदि वा)शिङ्टनले सधैं चीनलाई रणनीतिक प्रतिस्पर्धामा प्रतिद्वन्द्वीको रूपमा परिभाषित गर्दछ भने सम्बन्धहरू राम्रो अवस्थामा रहने सम्भावना छैन, सुले भने। चाइना डेली (https://www.chinadaily.com.cn/) बाट

ग्रामथान (मोरङ), ५ माघ । मोरङको ग्रामथान गाउँपालिका ५ तेतेरियामा वृहत जनसभा सुरु भएको छ ।  नेकपा माओवादी केन्द्र ग्रामथान गाउँपालिका समितिको आयोजनामा धन्यवाद ज्ञापन कार्यक्रम तथा खबरदारी सभामा सुरु भएको हो ।  सभालाई नेकपा माओवादी केन्द्रका अध्यक्ष पुष्पकमल दाहाल ‘प्रचण्ड’ले सम्बोधन गर्ने कार्यक्रम छ । गत मंसिर १६ गते भएको स्थानीय तह उपनिर्वाचनमा यो पालिकाको अध्यक्ष माओवादी केन्द्रले जितेको थियो । गत भदौ २९ गते अध्यक्ष प्रचण्डले नै ग्रामथान पुगेर पहिलो चुनावी सभालाई सम्बोधन गर्नुभएको थियो ।  २०७९ को स्थानीय तह निर्वाचनमा तेस्रो बनेको माओवादीलाई यसपटक ग्रामथानबासीले पहिलो बनाएपछि मतदातालाई धन्यवाद ज्ञापन गर्न अध्यक्ष प्रचण्ड दोस्रोपटक यो पालिकामा आउनुभएको हो ।