अध्यक्ष प्रचण्डद्वारा हिमताल बाढीपीडितको तत्काल उद्धार र सुरक्षित बसोबास गर्न सरकारको ध्यानाकर्षण
नेकपा (माओवादी केन्द्र)का अध्यक्ष पुष्पकमल दाहाल ‘प्रचण्ड’लेदैलेख, हुम्लामा हिमताल फुटेर आएको बाढीपछि विस्थापित नागरिकको उद्धार र सुरक्षित बसोबासको व्यवस्था तत्काल गर्न सरकारको ध्यानाकर्षण गराएका छन्। पार्टी अभियानका क्रममा दैलेखको कोतगढी पुग्नुभएका अध्यक्ष प्रचण्डले सोमबार बिहान सामाजिक सञ्जालमार्फत हुम्लाको नाम्खा गाउँपालिका–६, लिमी उपत्यकाको तील गाउँमाथिका दुई हिमताल फुटेर जेठ १ गते आएको बाढीबाट करिब ५० घरधुरी प्रभावित भएको समाचार सुनेको बताउँदै उद्धारका लागि आग्रह गरेका हुन। हाल तील गाउँमा १८ घरमा ३३ जना मात्र बसोबास गरिरहेका छन्, जो पहिरोको उच्च जोखिममा रहेका छन्। पहिरोका कारण खानेपानीको संरचना, बाटो र पुलमा पनि क्षति पुगेको छ। ‘३३ जना स्थानीय नागरिक उद्धार र राहतको पर्खाइमा छन्, तर अहिलेसम्म सरकारको उपस्थिति देखिएको छैन, तत्काल उद्धार र सुरक्षित बसोबासको व्यवस्था मिलाउन सरकारको गम्भीर ध्यानाकर्षण गराउँछु।’ उनले भने। प्रचण्डले सम्भावित जनधनको क्षति रोक्न आवश्यक सतर्कता अपनाउन तथा उद्धारमा जुट्न आफ्ना पार्टीपंक्तिलाई निर्देशनसमेत दिएका छन्। साथै, जलवायु परिवर्तनका कारण हिमताल फुट्ने जोखिम बढिरहेकाले राजधानीमा मात्र बहस सीमित नराखी वैज्ञानिक अध्ययन र पूर्वतयारीमा पनि सरकार गम्भीर हुनुपर्नेमा उनले जोड दिए।
