लहान,  फागुन ११ । सिरहाका छुट्टाछुटै स्थानमा गएराति भएका ट्याक्टर दुर्घटनामा चार जनाको मृत्यु भएको छ । सिरहाको पिप्रा प्र.पि.–५ स्थित भित्री सडकखण्डमा राति ८ बजे अनटेस्ट लेखिएको ट्याक्टर पल्टिँदा ट्याक्टरमा सवार पिप्रा प्र.पि.–५ निवासी रुपेश यादव, सोही ठाउँका हरेराम यादव र नितेश यादवको मृत्यु भएको छ । रुपेश र हरेरामको घटनास्थलमै तथा नितेशको उपचारका क्रममा सिरहा अस्पतालमा मृत्यु भएको जिल्ला प्रहरी कार्यालय सिरहाले जनाएको छ । यसैगरी, पूर्वपश्चिम राजमार्गअन्तर्गत सिरहाको गोलबजार नगरपालिका–८ स्थित सडकमा पश्चिमबाट पूर्वतर्फ आउँदै गरेको स १ त ३२४८ नम्वरको ट्याक्टर अनियन्त्रित भई दुर्घटना हुँदा सिरहाको धनगढीमाई नगरपालिका–१० निवासी मोहनती यादवको मृत्यु भएको छ । राजमार्गमा अनियन्त्रित भई दुर्घटना हुँदा गम्भीर घाइते भएका मोहनतीको लहानस्थित रामप्रसाद उमादेवी स्मारक अस्पतालमा उपचारका क्रममा मृत्यु भएको इलाका प्रहरी कार्यालय गोलबजारले जनाएको छ । रासस

बैतडी, ८ फागुन । चोरीको आरोपमा पक्राउ परेका एक थुनुवा दार्चुला प्रहरीको हिरासतबाटै शनिबार फरार भएका छन् । फरार हुने दार्चुला सुनसेरा–३ का २९ वर्षीय धनसिंह विष्ट रहेका जिल्ला प्रहरी कार्यालय दार्चुलाका प्रहरी नायब उपरीक्षक केदार खनालले राससलाई जानकारी दिनुभयो । दार्चुलाको सुनसेरामा माघ २३ गते चोरी गरी फरार रहेका विष्टलाई प्रहरीले माघ २४ गते सदरमबुकाम खलङ्गाबाट पक्राउ गरी अनुसन्धान गरिरहेको थियो । जिल्ला प्रहरी कार्यालयमा अनुसन्धानकै क्रममा रहेका विष्ट शनिबार बिहान १ बजेदेखि ४ बजेको समयमा फरार भएका हुन् प्रहरी नायब उपरीक्षक खनालले भन्नुभयो “थुनुवा कक्षको नटबोल्ड तोडेर फरार भएको देखिएको छ ।” फरार विष्टको खोजी कार्य भइरहेको उहाँले बताउनुभयो । यसका साथै थुनुवा भागेको समयमा ड्युटी गरिरहेका पाँच जना प्रहरीलाई समेत कारबाही गरिएको बताइएको छ । प्रहरी घेराबाटै थुनुवा भाग्नुको रहस्य भने खुल्न सकेको छैन । फरार विष्टलाई भाग्नमा कसैको पनि संलग्नता भएको थाहा पाइएका कडा कारबाही गरीने प्रहरी नायब उपरीक्षक खनालले जानकारी दिनुभयो । विष्ट यसअघि पनि चरेस मुद्दामा संलग्न रहेको प्रमाणित भएर तीन महिना जेल बसेका व्यक्ति हुन् । रासस

माओवादी केन्द्रले  मधेसी मोर्चालाई मनाउने तीन उपाय अघि सारेको छ । १.स्थानीय तहको संख्या बढाउने मधेसी मोर्चालाई निर्वाचनमा सहभागी गराउनका लागि स्थानीय तह पुनर्संरचना आयोगले निर्धारण गरेको संख्यालाई परिमार्जन गर्ने माओवादी केन्द्रले निर्णय गरेको छ । आयोगले सात सय १९ स्थानीय तह बनाउने टुंगो लगाएको थियो । आयोगले प्रस्ताव गरेको प्रदेश नम्बर २ को संख्यामा केही संख्या थप गरेरै भए पनि मधेसी मोर्चालाई विश्वासमा लिन पहल गर्ने निष्कर्ष माओवादी केन्द्रको छ । २. राष्ट्रिय सभासम्बन्धी माग सम्बोधन गर्ने मधेसी मोर्चालाई विश्वासमा लिन दोस्रो प्रयत्न पनि माओवादी केन्द्रले गर्छ । संविधानमा राष्ट्रिय सभा निर्वाचनमा गाउँपालिका र नगरपालिकाका प्रमुख, उपप्रमुखहरूलाई दिइएको मतदानको अधिकार कटौती गर्न माओवादीले पहल गर्नेछ । मोर्चाले यो माग उठाउँदै पनि आएको छ । मोर्चा निर्वाचनमा सकारात्मक देखिए माओवादी गाउँपालिका र नगरपालिकाका प्रमुख–उपप्रमुखको मतदान अधिकार कटौती गर्ने गरी संविधान संशोधन गर्न सहमत हुनेछ । ३. संशोधन विधेयक अगाडि बढाउने निष्कर्ष सरकारले संसद्मा दर्ता गराएको संविधान संशोधन विधेयकलाई छलफलमा लैजाने निष्कर्ष माओवादी केन्द्रको छ । निर्वाचनको मिति घोषणा गरेपछि विधेयक अगाडि बढाउन एमालेले लचिलो बन्ने प्रतिबद्धता जनाइसकेको छ । यस्तो अवस्थामा संशोधन विधेयक पास वा फेल जे भए पनि छलफल गरी निर्णयार्थ प्रस्तुत गर्न प्रक्रिया अघि बढाउने निष्कर्षमा माओवादी पुगेको हो । यो खबर आजको नयाँ पत्रिकामा  छ ।

काठमाडौं, फागुन १ । फागुन १४ गतेका लागि भनिएको स्वतन्त्र विद्यार्थी युनियनको निर्वाचन प्रक्रिया आजबाट सुरु भएको छ । पहिलो दिन आज मतदाता नामावली प्रकाशन गरिँदैछ । नयाँ सेमेस्टर वा शैक्षिक वर्षका लागि माघ १५ गतेसम्म र पुराना वर्ष र सेमेस्टरमा शुक्रबारसम्म भर्ना भएका विद्यार्थीको नाम मतदाता सूचिमा प्रकाशित गरिने त्रिभुवन विश्वविद्यालयले दिएको जानकारी दिएको छ । काठमाडौंका त्रिचन्द्र, अमृत साइन्स, नेपाल कमर्स, सानोठिमी क्याम्पसलगायतका क्याम्पसमा विद्यार्थीको संख्याबारे विवाद भएपछि छानबिन गर्न समिति बनाइएको छ । यी क्याम्पसहरुमा आफ्नो प्रभुत्व देखाउन मूख्य विद्यार्थी संगठनहरुबीचमा चुनावको मिति तोकिएदेखि नै तनाव देखिन थालेको हो। आज प्रकाशित हुने मतदाता नामावलीमा मंगलबार दाबी विरोध गर्न सकिने र त्यसमाथि छानबिन गरी फागुन ४ गते अन्तिम नामावली प्रकाशन गरिने त्रिविले जनाएको छ । फागुन ५ मा मनोनयन दाखिला र प्रत्यक्षतर्फको नामावली प्रकाशन गरिने छ भने फागुन ८ गते उम्मेदवारको नामावली प्रकाशन गरिनेछ । मिश्रित प्रणालीबाट हुन लागेको मतदानमा सभापति कोषाध्यक्ष र सचिव प्रत्यक्ष चुनिने छन् भने बाँकी पद समानुपातिक पद्धतीबाट चुनिने छन् । २८ वर्ष उमेर हदको विरुद्धमा केही विद्यार्थी संगठनहरु लागेपनि दश विद्यार्थी संगठनको बैठकले त्रिविको निर्णयलाई मान्ने घोषणा गरेको हो ।

पाल्पा, माघ २७ । सुन्न र बोल्न नसक्ने रामपुर नगरपालिका–८ सानीअमराइका शशीराज डोटेल जिल्लामा यतिबेला अगुवा कृषकका रुपमा चिनिन्छ । विगत एक दशकदेखि पाँच रोपनी जग्गामा व्यावसायिक रुपमा तरकारीखेती गर्दै आएका डोटेल वार्षिक रु तीन लाखभन्दा बढी आम्दानी गर्न सफल हुनुभएको छ । उहाँलाई जिल्ला कृषि विकास कार्यालयले युवा लक्षित कार्यक्रमअन्तर्गत तरकारीमा रु ४० हजार अनुदान रकम उपलब्ध गराएको छ । इसाराका भरमा आफ्ना कुरा अभिव्यक्ति गर्ने डोटेलले तरकारीखेतीसँगै पाँच वर्षयता कुखुरा फार्म र भैँसी फार्म समेत सञ्चालन गरेको छ । उनले कुखुराबाट वार्षिक रु तीन लाख आम्दानी गरेको छ । हाल उनको फार्ममा ५०० वटा कुखुरा रहेका छन् । यस्तै पाँच वटा भैँसीबाट डोटेलले दैनिकरुपमा २५ लिटर दूध बिक्री गरी मासिक रु ३० हजारदेखि रु ४० हजारसम्म आम्दानी गरेको छ । दूध बिक्रीबाट उनले वार्षिक रु ६ लाखदेखि रु सात लाखसम्म आम्दानी लिँदै आएको छ । सानैमा मेनेन्जाइटिस रोग लागेपछि उहाँ जीवनभर सुन्ने र बोल्न नसक्ने भयो। पाल्पा मिसन अस्पताल, बुटवल, भरतपुर, धरानलगायत ठाउँमा उपचार गराए पनि निको नभएपछि अपाङ्ग भएर बस्नुपरेको उनका आमा भगवती देवकाटाले बताए । डोटेल उनको एक्लो छोरा छ । शशीराज तरकारीको बिरुवा उमार्न, बेर्ना लगाउन, गोडमेल, रेखदेख, उत्पादनदेखि बिक्री गर्ने कार्य आफैँले गरे । घरायसी प्रयोजनका लागि आवश्यक सामग्री, छोराछोरीको पढाइ खर्च, व्यवसायको आम्दानी लगायतका हरहिसाब, बैंकिङ कारोबार सबै डोटेलले नै गर्दै आएको छ । कक्षा ८ सम्म पढेका डोटेलले रामपुरमै सञ्चालन भएको सामुदायिक कृषि सहायक तीन महिने तालिम समेत उत्तीर्ण गरेको छ । तालिमले उहाँलाई कृषि व्यवसायमा प्राविधिक ज्ञान सिप प्रदान गरेपछि सामान्य समस्याको पनि आफैँ समाधान गर्नसक्ने भएको छ । शशीराजको व्यवसायले अरु युवालाई समेत कृषि पेशामा लाग्न प्रेरणा दिएको स्थानीय माधव ढुङ्गानाले बताए ।

काबुल , माघ २७ ।  कट्टर धार्मिक अतिवादि समुह इस्लामिक स्टेट आईएस ले अफगानिस्तानको जौजाङ प्रान्तमा बुधबार अन्तराष्ट्रिय रेडक्रसका ६ जना कर्मचारीको हत्या गरेको  छ । आईएस लडाकूले स्थानिय समयअनुसार बिहान १० बजेतिर कर्मचारीमाथि आक्रमण गरेको अन्तराष्ट्रिय रेडक्रसका काबुलस्थित प्रवक्ता रमिन अहमदले जानकारी दिए । ६ जनाको शव भेटिएको छ भने दुईको अवस्था अज्ञात रहेको बताइएको छ । आक्रमणमा मारिएका सबै अफगानिस्तानका नागरिक हुन् । घटनास्थल राजधानी काबुलदेखि ३ सय ९० किलोमिटर उत्तरमा पर्दछ । यो खबर आजको अन्नपूर्ण पोष्टमा छ ।

काठमाडौं, माघ २५। नयाँ दिल्लीमा प्रख्यात सलुन ‘हेयर एन शान्ति युनिसेक्स सलुन’ को शाखा नेपालमा पनि सुरु भएको छ । दिल्लीमा १२ वटा सन्चालनमा आएको र नेपालको पहिलो साखाको यो सलुनको उद्धघाटन मिस नेपाल अस्मि श्रेष्ठले गरिन् । सलुनको उद्घाटन गर्दै मिस नेपाल अस्मी श्रेष्ठले अबदेखि नियमित यही सलुनमा आउने बताइन् । उद्धघाटन कार्यक्रममा व्यवसायी, समाजसेवी, कलाकार तथा पत्रकारहरुको उपस्थिति थियो । सलुन संचालकले यो सलुनमा ग्राहकले विशेष एवं अत्याधुनिक सुविधाहरुको अनुभव गर्न पाउने बताएका छन् । दिल्लीमा सन् २००१ देखि यो सलुन सन्चालनमा आएको थियो ।

काठमाडौं, माघ २० । सुशिल श्रेष्ठ र वर्षा शिवाकोटी स्टारर फिल्म ‘कारखाना’ को अफिसियल प्रदर्शन मिति तय भएको छ । यसअघि माघे संक्रान्तिको छेकोमा प्रदर्शन गर्ने हल्लाका बीच फिल्मको रिलिज पोष्टपोण्ड भएको थियो । अब फिल्म अर्को वर्षको जेठ ५ मा रिलिज हुनेछ । फिल्मको पोस्टर सार्वजनिक गर्दै निर्माण टिमले प्रदर्शन मिति लक गरेको हो । शान थापाले तयार गरेको सार्वजनिक पोस्टरमा लिड कलाकार सुशिल र बर्षाको प्रेमभाव झल्किन्छ । फिल्मको यसअघि सार्वजनिक ‘मायाले बोले’ को बोलको गीत दर्शक श्रोतामा लोकप्रिय भइसकेको छ । फिल्मलाइ अमरदिप सापकोटाले निर्देशन गरेका हुन् । गोविन्द शाहीले फिल्मको वितरण जिम्मा लिएका छन् । फिल्मलाइ सुदिप खड्का र अमर बज्राचार्यले संयुक्त लगानीमा निर्माण गरेका हुन् ।

काठमाडौं, माघ २० । सन् २०१५ मा मात्र तयार भएको साउथ इण्डियन चलचित्र ‘बाहुबली २’ को रिलिज हुन केही महिनामात्र बाँकी रहेको छ । तर, यस चलचित्रले प्रदर्शन हुनुअघि करोडौं कमाउन सफल भएको छ । राष्ट्रिय पुरस्कार विजेता निर्देशक एसएस राजमौलीको यो चलचित्रको सिक्वेलले प्रदर्शन अगावै लोभलाग्दो कमाई गरेको छ । भारतीय मिडियाको रिपोर्ट मान्ने हो भने चलचित्रले प्रदर्शन अगावै ५ सय करोड कमाई गरिसकेको छ । यस चलचित्रको मुख्य भूमिकामा रहेको प्रवासको यो चलचित्रको सिक्वेल यतिबेला विश्वभरका फ्यानले प्रतिक्षा गरिरहेका छन् । विशेषगरि, कटप्पाले बाहुवलीलाई किन मारे भन्ने प्रश्नकै कारण यसको सिक्वेल प्रतिक्षामा रहेको हो । यस चलचित्रको प्रदर्शन अधिकार बेचेरै ५ सय करोड कमाई यसको निर्माण पक्षले गरेको मिडिया रिपोर्टमा उल्लेख छ । यो चलचित्र ३ भाषामा रिलिज हुँदैछ । यो चलचित्रको हिन्दी भर्सनको अधिकार धर्म प्रोडक्शनले किनेको हो । धर्म प्रोडक्शनले हिन्दी भर्सनका लागि महंगो रकम तिरेको भारतीय मिडियाले जनाएका छन् ।

काठमाडौं, माघ १९ ।   बजेटमार्फत छुट्याइएका कार्यक्रमको रकम खर्च नभइरहेका वेला मन्त्रालयहरूले बजेटबाहिरका कार्यक्रमका लागि २ खर्ब १५ अर्ब रुपैयाँ माग गरेका छन् । १६ विभिन्न निकायले अर्थ मन्त्रालयसँग थप बजेट मागेका हुन् । उनीहरूले माग गरेको रकम चालू आर्थिक वर्षमा विनियोजित कुल पुँजीगत बजेट ३ खर्ब ११ अर्ब ९४ करोडको ६९.२३ प्रतिशत हो । प्रभावशाली नेता र मन्त्रीको दबाबमा निर्वाचन क्षेत्रमा खर्च गर्न यसरी रकम माग गर्ने गरिएको छ । आवको पहिलो ६ महिनामा ११.३ प्रतिशत पुँजीगत खर्च भएको थियो । खर्च गर्न नसकेर सरकारी ढुकुटीमा करिब २ खर्ब ३० अर्ब रुपैयाँ थुप्रिएको छ । गाडी किन्न १ अर्ब माग विभिन्न सरकारी निकायहरूले गाडी किन्न मात्रै एक अर्ब रुपैयाँ माग गरेको अर्थ मन्त्रालयका सचिव डा. शान्तराज सुवेदीले बताए । ‘थप बजेट माग भएको देख्दा त सरकारी निकायसँग गाडी नै नभएजस्तो देखिन्छ,’ सुवेदीले भने, ‘गाडी किन्न मात्रै एक अर्ब रुपैयाँ थप माग भएको देख्दा अचम्म लागेको छ ।’ बजेट खर्च गर्नेलाई स्रोतको अभाव नहुने भन्दै उनले फागुनसम्म पनि काम नगर्नेको बजेट कडाइका साथ तान्ने (सरेन्डर) गर्ने बताए । पुनर्निर्माण प्राधिकरणले माग्यो ७५ अर्ब भूकम्पपछिको पुनर्निर्माणको नेतृत्व गरिरहेको राष्ट्रिय पुनर्निर्माण प्राधिकरणले ७५ अर्ब रुपैयाँ थप बजेट माग गरेको छ । यसअघि बजेटमार्फत उपलब्ध ३४ अर्ब २२ करोड रुपैयाँ पुँजीगत बजेटमध्ये १ अर्ब ५२ करोड रुपैयाँ अर्थात् ४.४४ प्रतिशत खर्च गरेको प्राधिकरणले थप ७५ अर्ब रुपैयाँ मागेको हो । पुनर्निर्माण प्राधिकरणले अघि बढाउनुपर्ने सडक, सार्वजनिकस्थल, स्वास्थ्य चौकी, विद्यालयलगायतको पुँजीगत खर्च हुन सकेको छैन । विकास बजेट खर्च गर्ने ठूलो निकाय भौतिक पूर्वाधार तथा यातायात मन्त्रालयले ६० अर्ब थप बजेट मागेको छ । ऊर्जा मन्त्रालयले बुढीगण्डकी जलविद्युत् आयोजनाको मुआब्जा वितरणका लागि भन्दै ४२ अर्ब ७ करोड रुपैयाँ थप बजेट मागेको छ । बक्स पैसाको सिरानी हालेर सुत्ने अवस्था कहिलेसम्म ?  ‘अहिलेकै अवस्था कायमै रहने हो भने असार मसान्तसम्मा २–३ खर्ब रुपैयाँ बचत हुन्छ । पैसा सिरानी हालेर सुत्ने अवस्था आउनुहुँदैन । जनता टहरोमा रहने, विकासको माग हुने, तर पूरा नहुने अनि ढुकुटीमा पैसा थुप्रिरहने अवस्थाको अन्त्य हुनुपर्छ ।’ -डा. मीनबहादुर श्रेष्ठ, उपाध्यक्ष, राष्ट्रिय योजना आयोग ब्रेक थ्रु गर्नुस्  ‘अर्थ मन्त्रालयले सम्पूर्ण निकायसँग छलफल अघि बढाएको छ । अब हरेक मन्त्रालयले आफूमातहतका निकाय र विभागसँग छलफल गर्नुपर्छ । अहिलेसम्म भएको कामबाट सन्तोष मान्ने ठाउँ छैन । यसमा ब्रेक थ्रु हुनु आवश्यक छ ।’ – कृष्णबहादुर महरा, उपप्रधानमन्त्री तथा अर्थमन्त्री अनियमित काम हो  सिद्धान्ततः बजेटमा समावेश भएका योजनाबाहेक आकस्मिक कामका लागि मात्रै यसरी बजेट दिने हो । आकस्मिकबाहेकको अवस्थामा बजेट दिनु भनेको बिल्कुलै गलत हो । हरेक कुराको विधि र प्रक्रिया हुन्छ । पैसा दिने भनेर मात्रै हुँदैन । त्यसको अध्ययन हुनुप¥यो । – डा. रामशरण महत पूर्वअर्थमन्त्री राष्ट्रिय गौरवका आयोजनाको प्रगति निराशाजनक चालू आवमा सरकारले धेरै प्राथमिकता दिएर अघि बढाएका राष्ट्रिय गौरवका आयोजनाको खर्चको अवस्था निराशाजनक छ । वर्षको पहिलो ६ महिनामा उनीहरूको औसत खर्च १३ प्रतिशत मात्रै छ । पोखरा विमानस्थल, दक्षिण एसिया पर्यटन पूर्वाधार विकास आयोजना र दोस्रो अन्तर्राष्ट्रिय विमानस्थलको खर्च शून्य छ । बुढीगण्डकी जलविद्युत् आयोजनाको ०.४७ प्रतिशत, काठमाडौं–तराई मधेस फास्ट ट्र्याकको ०.०५ प्रतिशत र भेरी–बबई डाइभर्सनको २.७४ प्रतिशत मात्रै खर्च भएको छ । पुष्पलाल लोकमार्ग, उत्तर–दक्षिण लोकमार्ग, सिक्टा सिँचाइ आयोजना, बबई सिँचाइ आयोजना, रानी–जमरा–कुलरिया सिँचाइ आयोजना, रेलवे तथा मोनोरेल विकास आयोजना, मेलम्ची खानेपानी र माथिल्लो तामाकोसी जलविद्युत् आयोजनाको प्रगति ३० प्रतिशतभन्दा धेरै छ । यो खबर आजको नयाँ पत्रिकामा छ ।

चितवन, माघ १७ । पश्चिम चितवनको विजयनगरबाट नारायणगढतर्फ आउँदै गरेको यात्रुबाहक बस आज बिहान भरतपुरको शिवघाटमा दुर्घटना हुँदा १० यात्रु घाइते भएका छन् । जिल्ला प्रहरी कार्यालय, चितवनले दिएको जानकारी अनुसार ना५ख ११२१ नंको बस भरतपुर उपमहानगरपालिका–५ शिवघाटमा ब्रेकफेल भई दुर्घटना भएको हो । दुर्घटनाका घाइतेको कलेज अफ मेडिकल साइन्सेस शिक्षण अस्पताल भरतपुरमा उपचार भइरहेको प्रहरीले जनाएको छ । घाइतेमध्ये एकजनाको अवस्था गम्भीर रहेको प्रहरीले जनाएको छ । बसमा २८ जना सवार रहेको बुझिएको छ ।

माघ १६ । बलिउड क्षेत्रका चर्चित अभिनेत्री दीपिका पादुकोण हलिउड फिल्म एक्सएक्सएक्सः रिटर्न अफ जेन्डर केजको प्रमोशनमा व्यस्त रहेकी छिन् । उनी लोकप्रिय अमेरिकी टक शो एलेन इजेनेरेस शो तथा थे लेट लेट शो विथ जेम्स कार्डनमा पनि देखिइन् । फिल्मको प्रमोशन सकेपछि दीपिका भारत फर्केकी छिन् । स्वदेश फर्किदा उनी ब्ल्याक लुकमा एयरपोर्टबाट निस्केकी थिइन् । उनले ब्ल्याक सिल्क जम्पसुट लगाएकी थिइन् भने पहिरनसाग मिल्ने गरे कालो चश्मा पनि लगाएकी थिइन् । उनको अनुहारमा खुशी छचल्किएको थियो । एयरपोर्टमा उनले मिडियासाग कुरा पनि गरिन् । दीपिका अब बलिउड फिल्म पद्मावतीमा देखिदैं छिन् । यस फिल्ममा दीपिकासँगै शाहिद कपुर र रणवीर सिंहले पनि अभिनय गरेका छन् ।

पश्चिम चितवनको पटिहानीमा बस पल्टिँदा १९ यात्रु घाइते भएका छन् । बुधबार मध्यान्ह  बस पल्टिँदा घाइते भएकामध्ये दुई जनाको अवस्था गम्भिर रहेका छन् । घाइतेहरुको भरतपुर अस्पताल, चितवन मेडिकल कलेज र कलेज अफ मेडिकल साइन्सेज भरतपुरमा उपचार भइरहेको जिल्ला प्रहरी कार्यालय चितवनले जनाएको छ । जितपुरबाट नारायणगढतर्फ आउँदै गरेको ना २ ख ६८२३ नं को बस भरतपुर उपमहानगरपालिका– २७ जगतपुर टाउनमा अनियन्त्रित भई पल्टिँदा सो दुर्घटना भएको हो । बसका चालक भने फरार रहेको प्रहरीले जनाएको छ । रासस

काठमाडौं, माघ ११ । संसदको सार्वजनिक लेखा समितिले कर नतिरेसम्म टेलिफोन सेवा प्रदायक कम्पनी एनसेललाई कुनै सुविधा नदिन निर्देशन दिएको छ । एनसेलले फोर जी सेवाका लागि पहल गरेपछि लेखा समितिले पुँजीगत लाभकर चुक्ता नगरेसम्म ‘फोर जी’लगायत अरु कुनै पनि सुविधा थप गर्ने अनुमति नदिन सरकारलाई निर्देशन दिएको हो । समितिको मंगलबारको बैठकले एनसेलले पुँजीगत लाभकरबापतको झण्डै ४१ अर्ब रुपैयाँभन्दा बढी कर चुक्ता गर्न वाँकी रहेको छ । उक्त रकम नतिरेसम्म कुनै सुविधा नदिन संचार मन्त्रालयलाई निर्देशन दिएको हो । अर्थ मन्त्रालयले मंसिर २ गते लेखा समितिलाई ३ महिनाभित्र एनसेलबाट सबै कर उठाइसक्ने प्रतिबद्धता जनाएको थियो । बैठकमा सांसदहरुले तीन महिनाभित्र पनि पुँजिगत लाभकर चुक्ता नगरे एनसेलको इजाजत नै खारेज गर्न तयार हुनुपर्ने बताए । समितीका सदस्य कांग्रेसका धनराज गुरुङ, एमालेका आनन्द पोखरेल तथा माओवादी केन्द्रका टेकबहादुर बस्नेतले एनसेलले कर नतिरे उसको इजाजत नै रद्ध गर्नुपर्ने बताए । यस्तै एनसेलबाट कर असुल्न आनाकानी गर्ने जिम्मेवार निकायहरु कर कार्यालय र अर्थमन्त्रालयका कर्मचारीलाई पनि कारबाही गर्नुपर्ने सांसदहरुले माग गरेका छन्।

काठमाडौं, माघ ११। माघ ५ गते काठमाडौं चपलीकी डिल्ली श्रेष्ठलाई उपचारका लागि महाराजगंजस्थित शिक्षण अस्पताल पुर्‍याइयो । तीन बजे अस्पताल पुर्‍याइएकी उनलाई राति नौ बजेमात्रै चिकित्सकले सोधपुछ गरे । अनि रोगको परीक्षण नै नगरी नेपाल मेडिकल कलेज अत्तरखेल रिफर गरे । यो त एक उदाहरण मात्रै हो । शिक्षण अस्पताल महाराजगंजले दैनिक पाँचदेखि सात जना बिरामीलाई निजी अस्पतालमा रिफर गर्ने गरेको छ । बिरामीलाई निजी मेडिकल कलेजमा जान सुझाव मात्रै होइन, दबाव नै दिने गरेको पाइएको छ । स्वास्थ्य मन्त्रालय अनुगमन तथा मूल्यांकन महाशाखाका प्रमुख डाक्टर दिपेन्द्ररमण श्रेष्ठले अस्पतालले भन्दा पनि केही व्यक्तिले बिरामीलाई निजी पाठाउने गरेको हुन सक्ने भन्दै अनुगमन गर्ने बताए । मन्त्रालयको अनुगमन शाखामा दुई जना मात्रै कर्मचारी भएकाले कठिनाई भएको उनको भनाई छ । यो खबर आजको नयाँ पत्रिका दैनिकमा  छ ।