लोकतान्त्रिक समाजबाद सहितको सम्वृद्धि बामपन्थीहरुको गन्तब्य : अधिकारि

पोखरा, कात्तिक १८ । नेकपा एमालेका युवा नेता तथा कास्की क्षेत्र नम्बर २ का प्रतिनीधि सभाका उम्मेद्वार रविन्द्र अधिकारीले लोकतान्त्रिक समाजबाद सहितको सम्वृद्धि बामपन्थी हरुको गन्तब्य भएको बताएका छन् । नेपाली कांग्रेस र उसको नेतृत्वमा बनेको लोकतान्त्रिक गठबन्धन राजनीतिक उपलब्धीबाट पछि हट्न खोजेको उनको आरोप छ ।

कास्की क्षेत्र नम्बर २ को बाम गठबन्धनको शनिबार पोखरामा आयोजित भेलालाई सम्बोधन गर्दै अधिकारीले पुँजीवादी मान्ने कांग्रेस र उसको नेतृत्वमा रहेको लोकतान्त्रिक गठबन्धन देशमा प्राप्त उपलब्धी जोगाउनु भन्दा त्यसलाई ध्वस्त पार्न लागिपरेको आरोप लगाएका हुन् । काग्रेस र उसको नेतृत्वको लोकतान्त्रिक गठबन्धन दक्षिणपन्थी भएको आरोप लगाउँदै उनले भने,‘पुँजीवादी मान्ने कांग्रेस र उसको नेतृत्वको लोकतान्त्रिक गठबन्धन गणतन्त्र हैन राजतन्त्र ब्यूँताउन खोज्दैछ, धर्म निरपेक्ष हैन हिन्दु राज्य फर्काउन खोज्दैछ अनि अग्रगामी बन्ने हैन पश्चगामीतर्फ फर्कदै दक्षिणपन्थी तिर फर्कदैछ ।’

नेता अधिकारीले नेपालमा बाम गठबन्धन बनेपछि कम्युनिष्टहरुको समाजवादी लोकतन्त्र र कांग्रेससहितको पुँजीवादी प्रजातन्त्रबीच स्पष्ट रुपमा ध्रुविकरण भएको बताए । समाजवाद भन्ने वित्तिकै कांग्रेस आत्तिएको टिप्पणी गर्दै उनले समाजवादी लोकतन्त्र र पुँजीवादी प्रजातन्त्र बिच स्वच्छ प्रतिष्पर्धा गर्नुपर्ने भन्दै त्यसबाट नआत्तिन कांग्रेसलाई आग्रह गरे । उनले लोकतन्त्रसहितको समाजवाद बनाउन चाहेकाले जनतामा भ्रम नपारिदिन कांग्रेसलाई उनले आग्रहसमेत गरे । कुनैपनि दलको स्पष्ट बहुमत नहुँदा सरकारमा गएपछि कम्युनिष्टले समृद्ध नेपाल बनाउने नीति, योजना र काम गर्न खोज्दा कांग्रेसले भाँजो हाल्ने र सरकार गिराईहाल्ने गरेकाले स्थिरता ल्याउँदै समृद्धी र समाजवादमा पुग्न बाम गठबन्धन गरिएको उल्लेख गरे ।

अधिकारीले बाम गठबन्धन हुँदै कम्युनिष्ट केन्द्र बनाएर जनताको मतबाट दशकौंसम्म सरकारमा रहने, समृद्धी ल्याउने र समाजवादमा पुग्ने उद्घोष गरे । समाजवादमा पनि लोकतन्त्र र बहुदलीय प्रतिष्पर्धा रहने बताउँदै उनले भने,‘जनताको मतबाटै समाजवादमा जान्छौं, देशलाई समृद्ध बनाउँछौं, यसमा कोहि बाधक बन्न आउँछ भने त्यो बाधा भत्काएर भएपनि यस चुनावबाट दुई तिहाई ल्याएर समाजवादमा पुग्छौं, पुग्छौं ।’ नेपालमा बाम गठबन्धन बनेपछि संसारका सबै बुर्जुवाहरु आश्चर्यचकित भएको र अब समाजवाद हुँदै देश समृद्ध बन्दा छक्क पर्ने बताए ।

अधिकारीले बाम गठबन्धनको बलमा कांग्रेस हेन अस्थिरतालाई फाल्न खोजेको बताउँदै भने,‘हामीले राजालाई जसरी कांग्रेसलाई फाल्न खोजेका हैनौं, बरु अस्थिरता फाल्न खोजेका हौं ।’ उनले प्रतिष्पर्धाको शुरुवातमै कांग्रेसले वाकओभर दिन खोजेजस्तो गरेर बाम गठबन्धनलाई अधिनायकवादी भन्ने आरोप लगाउँदै रोइकराई र छटपटाहट देखाएको टिप्पणी गरे ।

अधिकारीले कांग्रेसले शिक्षामा ब्यापारीकरण गरिरहेको तर दोष भने अरुलाई लगाउने गरेको बताउँदै उनले भने,‘कांग्रेसले शिक्षालाई ब्यापारीकरण गरिरहेको छ, तर चिकित्सा क्षेत्रको शैक्षिक माफिया बिरुद्ध डा.गोविन्द केसीले आवाज उठाउँदा कांग्रेसले झण्डा उठाउँछ, यो हास्यास्पद लाग्छ ।’ उनले बाम गठबन्धनले बहुमत ल्याएर स्थिर सरकारमार्फत समाजवाद ल्याएपछि देशबाट गरिबी अन्त्य हुने दाबी गरे ।

कास्की–२ को प्रदेश क्षेत्र नम्बर २ का उम्मेद्वार राजकाजी गुरुङ ‘करण’ले कांग्रेसले भनेजस्तो जनतालाई रुवाउन नभई गरिबी हटाउन, विकास र समद्धी ल्याएर जनतालाई खुशी र सुखी पार्न समाजवाद ल्याउन लागेको बताए । समृद्धी र विकासकै लागि समाजवाद भन्दै उनले भने,‘हामी जनतामा गरिबी निम्त्याउन हैन, युवालाई विदेश पठाउन हैन, उनीहरुलाई रुवाउन हैन, बरु विकास र समृद्धी ल्याएर स्वरोजगार बनाउन, आत्मनिर्भर बनाउन, सुखी र खुशी बनाउन समाजवाद ल्याउन चाहन्छौं ।’ उनले आफ्नै पालामा समाजवाद ल्याउन सकिने र ल्याएरै छाड्ने उद्घोष गरे ।

नेकपा माओवादी केन्द्रका पोलिट्ब्यूरो सदस्य तथा कास्की ईञ्चार्जसमेत रहेका करणले अस्थिरताका कारण देश र नेपाली जनता बर्बाद भएकाले स्थिरता, सुशासन, समृद्धी र विकासका लागि बाम गठबन्धन बनाएको स्पष्ट पारे । उनले कास्कीको २ नम्बर क्षेत्रको प्रदेश नम्बर २ कम्युनिष्ट कमजोर भएको ठाउँ भएकाले अहिलेपनि कांग्रेस म्याऊ म्याऊ गरेर बिरालोजस्तो कुर्लनेगरेको टिप्पणी गर्दै अब बाम गठबन्धनको बलमा त्यो कांग्रेसको आधार भत्काईदिने घोषणा गरे । उनले कांग्रेसलाई जनता भ्रमित गर्ने अधिनायकवाद र तानाशाही भनेर रोइकराई गर्नुभन्दा आफ्नो सकारात्मक कुरा जनतामा राख्न आग्रह गर्दै आफूहरुपनि सकारात्मक कुरा र एजेण्डा बोकेर जनतामा जाने बताए । उनले बाम गठबन्धनको जितका लागि आफू चौबिसै घण्टा खट्न तयार रहेको बताए ।

कास्की–२ को प्रदेश नम्बर १ का उम्मेद्वार कृष्ण थापाले दाजुभाई मिलेर पाण्डवले कौरवलाई हराएजस्तै बाम गठबन्धनले कांग्रेसलाई हराउने उद्घोष गरे । उनले बाम एकताको पक्षमा जनता उत्साही भएर उर्लिएको बताउँदै अब त्यसलाई भोटमा रुपान्तरण गर्न मात्र बाँकी रहेको बताए । समाजवादसम्म पुग्नको लागि बाम एकता भएको बताउँदै यसलाई सफल बनाउन आगामी निर्वाचन २ तिहाईले जित्नैपर्ने बताए ।

नेकपा एमालेका निर्वाचन कमिटीका केन्द्रीय अध्यक्ष सोमनाथ अधिकारी ‘प्यासी’ले कास्कीका ९ वटै क्षेत्र बाम गठबन्धनले जित्ने दाबी गरे । कम्युनिष्ट फुटाएर शासन गर्न कांग्रेस पल्केको बताउँदै उनले अब कांग्रेसले फुटको राजनीति गर्न नपाउने गरी बाम एकता भएको बताए । समाजवादलाई कांग्रेसले भ्रमित गर्न खोजेको बताउँदै उनले भने,‘हामीले ल्याउने समाजवाद भनेको मौलिक समाजवाद हो, यो समाजवादमा आफ्नै मौलिक लोकतन्त्र हुन्छ, यो समाजवादमा ९० वर्ष भन्दा माथिका बुबाआमाहरुसमेत सम्मानित हुन्छन्, केटाकेटी खुशीले खेल्दै, रमाउँदै शिक्षा लिन पाउँछन्, युवाहरु आफूले रोजेको विषय अध्ययन गर्न पाउँछन् अनि बयस्कहरु गुणात्मक शिक्षा लिएर कमाउन र रमाउन पाउँछन् ।’ उनले माओवादी र एमाले मिल्दा अधिनायकवाद देख्ने कांग्रेसमा चेतनाको अभाव रहेको टिप्पणी गरे ।

कार्यक्रमकी अध्यक्षता गरेकी एमाले कास्कीकी उपसचिव प्रभा कोइरालाले बाम गठबन्धन नदी भएको बताउँदै योसँग पौठेजोरी खोज्न आउने आफै बगेर सिद्धिने चेतावनी दिईन् ।

कार्यक्रम सञ्चालक कृष्ण गिरी ‘विज्ञान’ले बाम एकतालाई जिताएमात्र जनताले जित्ने र देशले स्थिरता, शान्ति, समृद्धी प्राप्त गर्दै समाजवादमा पुगिने बताए ।