नेपाली कम्युनिस्ट पार्टीकाे घोषणा कार्यक्रममा झलनाथ खनाल पनि उपस्थित
काठमाडौं । नेकपा एकीकृत समाजवादीका सम्मानित नेता झलनाथ खनाल पनि नेकपा माओवादी केन्द्रसहितको एकता घोषणा सभामा सहभागी भएका छन् । काठमाडौंको भृकुटीमण्डपमा केहीबेरअघि विभिन्न कम्युनिष्ट घटकबीच एकताको प्रक्रिया सुरु भएको थियो । यसै कार्यक्रममा खनाल पनि उपस्थित भएका हुन् । खानालले पार्टीले माओवादी केन्द्रसहितका कम्युनिष्ट घटकबीच गर्ने भनिएको एकताको निर्णयप्रति पहिले आपत्ति जनाएका थिए । उनले नयाँ दल दर्ता गर्ने संकेतसमेत दिएका थिए । तर अन्ततः उनले प्रचण्ड–माधवसहितको एकतामा सहभागी हुने निर्णय गरेका छन् । साथै, यसअघि हिजो मात्र खनाल नेकपा एमालेका अध्यक्ष केपी शर्मा ओलीलाई भेट्न पनि पुगेका थिए ।
