विश्वकप विशेषः कसको सपना पूरा होला ? क्वाटरफाइनलमा भिड्ने ८ टिम यी हुन्, सूचिसहित

काठमाडौं, असार २० । रसियामा जारी विश्वकप फुटबलमा अन्तिम ८ मा पुग्ने टिमको छिनोफानो भइसकेको छ । अब सबैको चाँसो अन्तिम ४ मा को-को टिम प्रवेश गर्न सक्लान् ? यो पटक अन्तिम ८ को यात्रामा अनुमान कम गरिएका टिमले पनि प्रवेश पाएका छन् । यसले गर्दा आगामी खेल निकै रोमाञ्चक हुने अपेक्षा छ ।

यो संस्करणमा उपाधीका दाबेदार मानिएका अर्जेन्टिना, जर्मनी, प्रोर्चुगल, स्पेनलगायतका टिम अन्तिम आठमा छैनन् । पटकपटकका विश्वकप विजेता टिम अन्तिम आठमा नहुँदा यो पटक नयाँ टिमले उपाधी जित्ने सम्भावना अत्यधिक छ ।

अन्तिम आठमा पुग्न सफल टिमध्ये ब्राजिल, उरुग्वे, फ्रान्स, इंग्ल्याण्डले मात्रै विश्वकपको उपाधी प्राप्त गर्न सफल भएका छन् । बाँकि चार टिम स्वीडेन, बेल्जियम, रुस र क्रोएसियाले उपाधी जित्न सकेका छैनन् । के यी ४ टिमले यो पटक उपाधी जितेर नयाँ इतिहास कोलार्न ? यो प्रश्नको जवाफ पर्खन अब धेरै दिन छैन ।

विश्कप जित्न ठूलै सपना देख्नुपर्छ । त्यहि सपना बोकेर रुसमा प्रवेश गरेका ३२ मिट मध्ये अहिलेसम्म ८ टिम मात्रै बाँकि छन् । बाँकि टिम जन्मभूमिको यात्रा गरिसकेका छन् ।
क्वाटर फाइनलमा पुग्न यी ८ टिमको संघर्षपूर्ण यात्र खूब रोचक छ । रोचक हुनुको प्रमुख कारण अहिलेका स्टार खेलाडीको टिमलाई हराउनु ।

क्वाटरफाइनलमा प्रवेश गर्ने टिम मध्ये उरुग्वे एक हो । उसले अन्तिम आठमा पुग्नका लागि रोनाल्डोको पोर्चुगललाई हराएको हो । महान् खेलाडी रोनाल्डोको सपना ध्वस्त पार्न सकेकोमा उरुग्वे विश्वकप जित्ने ठूलो विश्वास पालेर बसेको छ ।

यस्तै, फ्रान्सले अर्का महान् खेलाडी मेसीको टिम अर्जेन्टिलाई हराउँदै अन्तिम ८ को स्थान सुरक्षित गरेको हो । अर्का स्टार खेलाडी नेइमारको टिम भने अघि बढ्न सफल भयो । ब्राजिलले मेक्सिकोलाई अन्तिम १६ मा २-० ले पन्छाउँदै क्वाटरफाइनलमा स्थान पक्का गर्न सफल भयो । यो जितले यो समयका स्टार खेलाडी मध्ये एक नेइमार रुस विश्वकपमा बाँकी रहे ।
यस्तै, एसियाली देश जापानको क्वाटरफाइनल सपना चकनाचुर पार्दै युरोपेली देश र यो विश्वकपमा राम्रो गरिरहेको बेल्जियम अन्तिम ८ मा आएको छ । बेल्जियमले जापानलाई ३–२ ले पाखा लगाएको हो । 
यता विश्वकप खेल्ने ३२ देश मध्ये बरियतामा सबैभन्दा पुछारमा रहेको आयोजक रुसले जारी विश्वकपमा सबैलाई चकित पार्दै आएको छ । अन्तिम १६ मा उसले ८ वर्षअघिको विश्व विजेता स्पेनलाई पाखा लगायो । निर्धारित र अतिरिक्त समयको खेल १-१ को बराबरी भएपछि टाइब्रेकरमा रुसले स्पेनलाई ४-३ ले हराउँदै क्वाटरफाइनल यात्रा तय गरेको हो ।

यसैगरी क्रोएसिया र डेनमार्कबिचको खेलमा पनि टाइब्रेकरबाटै निर्णय लिनु पर्‍यो । निर्धारित र अतिरिक्त समयको खेलमा १-१ को बराबरी भएपछि पेनाल्टी सुटआउट भयो । त्यसमा क्रोएसियाले डेनमार्कको चुनौती ३-२ ले पार गर्‍यो । स्वीट्जरल्याण्डलाई १-० ले स्तब्ध पार्दै स्वीडेनले पनि अन्तिम ८ मा स्थान बनाएको छ । यसैगरी दक्षिण अमेरिकी देश कोलम्बियाको सपना युरोपेली देश इंग्ल्याण्डले चकनाचुर पारेको छ । निर्धारित र थप गरिएको समयमा १-१ को बराबरी भएपछि खेलको निर्णय टाइब्रेकरबाट लिइयो ।

त्यसमा ग्यारेथ साउथ गेटको टिमले चार वर्षअघिका सर्वाधिक गोलकर्ता जेम्स रोड्रिग्वेज रहेको टिम कोलम्बियालाई ४-३ ले हरायो । चोटका कारण रोड्रिग्वेज मंगलबार राति भएको इंग्ल्याण्डसँगको खेलमा मैदानमा थिएनन् ।

क्वाटरफाइनलमा कसको भिडन्त कोसँग ?
उरुग्वे भर्सेस फ्रान्स असार २२- गते, बेलुका पौने ८ बजे
ब्राजिल भर्सेस बेल्जियम असार- २२ गते, राति पौने १२ बजे

स्वीडेन भर्सेस इंग्ल्याण्ड असार- २३ गते, बेलुका पौने ८ बजे 
रुस भर्सेस क्रोएसिया असार- २३ गते, राति पौने १२ बजे

-एजेन्सी