विश्वविद्यालय कार्यालय दाङमा, काम काठमाडौंबाट

विश्वविद्यालय कार्यालय दाङमा, काम काठमाडौंबाट
काठमाडौं, असोज २ । बेलझुन्डीस्थित नेपाल संस्कृत विश्वविद्यालय केन्द्रीय कार्यालय प्रायः सुनसान हुन्छ । विश्वविद्यालयका महत्वपूर्ण शाखा राजधानीस्थित सम्पर्क कार्यालयबाटै सञ्चालन हुन्छन् । केन्द्रीय कार्यालयमा पदाधिकारी र उच्च पदस्थ कर्मचारी भेट्न मुस्किल हुन्छ ।

केही दिनअघि विश्वविद्यालयको काठमाडौंमा सम्पन्न सभाले कर्मचारी सञ्चय कोषलाई उतैबाट सञ्चालन गर्ने निर्णय गरेको छ । विश्वविद्यालय कर्मचारी कोषको रकम काठमाडौंबाटै नागरिक लगानी कोषमा जम्मा गर्ने विषयलाई विश्वविद्यालय सभाले नै पारित गरेको छ ।

यसअघि अन्तर्राष्ट्रिय सम्बन्ध महाशाखा, अनुसन्धान शाखा, सांस्कृतिक अध्ययन केन्द्रसमेत काठमाडौं सारिएको थियो ।

यद्यपि कर्मचारी सञ्चय कोष राजधानीमा सारिएको विषयलाई विश्वविद्यालयका शिक्षाध्यक्ष प्रा. रमेशकुमार ढकालले अस्विकार गरे ।

‘हामीले पहल गरिरहेका छौँ, सकभर दाङबाट नै विश्वविद्यालयको कर्मचारी सञ्चय कोष सञ्चालनमा आउनेछ,’ उनले भने । यसअघि पनि विश्वविद्यालयका पदाधिकारीले अन्य शाखा कार्यालय सार्दा स्विकार्न आनाकानी गर्थे ।

दाङका भवन खाली, राजधानीमा भाडा
विश्वविद्यालय स्थापनाका लागि दाताहरूले दाङमा १६ सय बिघा जग्गा दान गरेका थिए । अहिले विश्वविद्यालयका लागि पर्याप्त भवन निर्माण भएका छन् । उता विश्वविद्यालयको काठमाडांै वसन्तपुरमा रहेको भवनसमेत ०७२ सालमा आएको भूकम्पका कारण काम गर्न नमिल्ने अवस्थामा छ ।

दाङमा रहेका भवनका कोठा रित्तै छन् । शाखाहरू काठमाडाैँ सारिएपछि कर्मचारी भेटिनसमेत मुस्किल पर्न थालेको छ । काठमाडौंमा भने मासिक रूपमा एक लाख भाडा तिरेर महाशाखाका कार्यालय सञ्चालन भइरहेका छन् ।

तुलसीपुर उपमहानगरपालिकाका मेयर घनश्याम पाण्डेले केन्द्रीय कार्यालय दाङमै रहेको अवस्थामा महत्वपूर्ण शाखा पनि दाङमै राखिनुपर्ने बताए । ‘विश्वविद्यालय सञ्चालनका लागि सहयोग गर्न हामी तत्पर छौँ,’ उनले भने ‘आफ्नो स्वार्थपूर्तिका लागि विश्विद्यालयको केन्द्रीय कार्यालयलाई नै कमजोर बनाउन कसैले पाउँदैन ।’

तीन क्याम्पस थपिए
नेपाल संस्कृत विश्वविद्यालयमा तीनवटा आंगिक क्याम्पस थपिने भएका छन् । विश्वविद्यालय सभाले तीनवटा क्याम्पसलाई आंगिक क्याम्पसका रूपमा सञ्चालन गर्ने निर्णय गरेको हो ।

हाल संस्कृत विश्वविद्यालयले १४ वटा आंगिक क्याम्पस सञ्चालन गरिरहेको छ । अब कैलालीघाट तनहुँ, मणिग्राम रूपन्देही र परशुराम विद्यापीठलाई आंगिक क्याम्पसका रूपमा सञ्चालन गर्ने निर्णय भएको छ । तीनवटा क्याम्पस सञ्चालनका लागि वार्षिक सात करोड ५० लाख खर्च लाग्ने बताइएको छ ।

स्नातकलाई चारवर्षे बनाइयो
आर्थिक वर्ष ०७५/७६ बाट शास्त्री (स्नातक) तह चारवर्षे हुने भएको छ । चार वर्षका लागि पाठ्यपुस्तक तयार गर्न थालिएको शिक्षाध्यक्ष रमेश ढकालले बताए । त्यसैगरी, उत्तरमध्यमा तह र शास्त्री तह भर्नाका लागि भाषा प्रशिक्षण गर्नु नपर्ने भएको छ ।

त्यस्ता विद्यार्थीलाई वेद, व्याकरण, न्याय र सिद्वान्त ज्योतिष पढ्नका लागि अतिरिक्त तीन सय पुर्णांक थप पाठ्यभार रहनेछ । तीबाहेक अन्य विषय पढ्नका लागि दुई सय पूर्णांकको पाठ्यभार कायम गरिएको छ । अब विदेशी विद्यार्थीहरूले समेत प्लट टु अध्ययनपछि सीधै शास्त्री अर्थात् स्नातक तहमा अध्ययन गर्न पाउनेछन् ।

विश्वविद्यालयमा रहेको आइएलाई हटाउने तयारी पनि थालिएको छ । देशभरका संस्कृत विद्यापीठलाई नौदेखि १२ सम्ममा संस्कृत विषयको शिक्षक दरबन्दीका लागि अर्थमन्त्रालय, शिक्षा मन्त्रालय र विश्वविद्यालय अनुदान आयोगसँग सहकार्य गरेर अघि बढिने भएको छ ।

विद्यार्थीको संख्या कम भए नेपालभर रहेका ४० बढी गुरुकुलमा समेत शिक्षक दरबन्दीको व्यवस्थाका लागि प्रक्रिया अघि बढाउन लागेको शिक्षाध्यक्ष ढकालले बताए । आयुर्वेद स्नातक तह कक्षा सञ्चालन गरिरहेको संस्कृत विश्वविद्यालयले अब प्राकृतिक चिकित्सा कार्यक्रमसमेत सञ्चालन गर्ने विश्वविद्यालय सभाले निर्णय गरेको छ ।

अखिल क्रान्तिकारीको बन्दसत्र सुरु

काठमाडौं । नेकपा माओवादी केन्द्रको विद्यार्थी संगठन अखिल क्रान्तिकारीको बन्दसत्र सुरु भएको छ ।  विहान ८ बजेदेखि बन्दसत्र सुरु गर्ने कार्यतालिका निर्धारण गरेको भए पनि प्रतिनिधि टुंगो लाग्न समय लागेको र झरीका कारण साँझ पौने ५ बजे मात्रै बन्दसत्र सुरु भएको हो । बन्दसत्रले अध्यक्ष पञ्चा सिंह नेतृत्वको कार्यसमिति भंग गरी अध्यक्षता मण्डल गठन गरेको छ । बन्दसत्रमा राजनीतिक र सांगठनिक प्रतिवेदन प्रस्तुत गरिएको छ। अब बन्दसत्रको सबै काम बीरबहादुर थापाको अध्यक्षतामा रहेको ७ सदस्यीय अध्यक्ष मण्डलले गर्नेछ भने विधान र प्रतिवेदन पारित भएपछि निर्वाचन समितिले नेतृत्व चयनको प्रक्रिया सुरु गर्ने छ । नेतृत्व सहमतिबाट चयन गर्न पार्टी नेताहरुले प्रयास जारी राखेका छन्, सहमति नभएको खण्डमा प्रत्यक्ष निर्वाचनबाट नै सम्पूर्ण पदाधिकारी र केन्द्रीय सदस्यहरु निर्वाचित हुनेछन् ।   नेतृत्व चयनका लागि पार्टीको केन्द्रीय निर्वाचन आयोगले अधिवक्ता मुक्ति प्रधानको संयोजकत्वमा निर्वाचन समिति खटाएको छ । सम्मेलनमा दुई हजार तीन सय २३ प्रतिनिधिले मतदान गर्नेछन् । प्रतिनिधिहरुले ३३ सदस्यीय पदाधिकारी र २४३ सदस्यीय केन्द्रीय समिति चयन गर्नेछन् । पदाधिकारीमा खुल्लाबाट एक अध्यक्ष, खुल्ला ४, समावेशी ५ सहित ९ जना उपाध्यक्ष, खुल्लाबाट १ महासचिव, ९ उपमहासचिव, १२ सचिव र १ कोषाध्यक्ष रहनेछन् । एकता प्रक्रिया, राष्ट्रिय सम्मेलन आयोजक समिति वा अन्य कुनै विशेष अवस्थामा केन्द्रीय समितिको संख्या थपघट गर्न सकिने प्रस्ताव गरिएको छ । केन्द्रीय कमिटीको एक तिहाइ नबढ्ने गरी ४८ सदस्यीय केन्द्रीय सचिवालयको प्रस्ताव विधानमा गरिएको छ ।

पर्यटन आर्थिक रुपान्तरणको महत्वपूर्ण क्षेत्रः प्रचण्ड

काठमाडौं । पूर्वप्रधानमन्त्री एवं नेकपा माओवादी केन्द्रका अध्यक्ष पुष्पकमल दाहाल ‘प्रचण्ड’ले नेपालमा आर्थिक रुपान्तरणका लागि पर्यटन महत्वपूर्ण क्षेत्र भएको बताउनुभएको छ । आज परेको ४५औं विश्व पर्यटन दिवसको अवसरमा शुभकामना दिंदै उहाँले यस्तो बताउनुभएको हो । ‘नेपाल प्राकृतिक, सांस्कृतिक र साहसिक सबैखाले पर्यटनका दृष्टिले आकर्षक गन्तव्य हो। पछिल्ला वर्षहरुमा बाह्य पर्यटकको संख्या बढिरहेको छ भने आन्तरिक रुपमा पनि पर्यटन संस्कृति वृद्धि भएको छ’– उहाँले भन्नुभयो– ‘मेरो नेतृत्वको सरकारले पर्यटन क्षेत्रको पुरुत्थानका लागि लिएको नीति, कार्यक्रम र प्रयासको परिणामस्वरुप गत वर्ष सन् २०२३ मा लक्ष्यभन्दा बढी १० लाख १४ हजार पर्यटन भित्रिएका थिए र सन् २०२४ को आठ महिनामै ७ लाख २२ हजार पर्यटक भित्रिएको सुन्दा खुशी लागेको छ।’ चालु आर्थिक वर्षको बजेटका पाँच प्राथमिकताभित्र पर्यटन प्रवर्धनलाई महत्वपूर्ण क्षेत्रको रुपमा राखिएको उल्लेख गर्दै उहाँले यसको कार्यान्वयनमार्फत पर्यटन प्रवर्धनमा उल्लेख्य सुधार आउने र अर्थतन्त्रलाई सबल बनाउन थप योगदान पुग्ने विश्वास व्यक्त गर्नुभएको छ ।

शान्ति प्रक्रियासम्बन्धी बाँकी काम चाँडो पूरा गर्न नेपाल प्रतिबद्ध: प्रधानमन्त्री

काठमाडौं । प्रधानमन्त्री केपी शर्मा आलीले शान्ति प्रक्रियासँग सम्बन्धित बाँकी काम चाँडोभन्दा चाँडो पूरा गर्न नेपाल प्रतिबद्ध रहेको बताउनुभएको छ । संयुक्त राष्ट्रसङ्घको ७९औँ महासभालाई सम्बोधन गर्दै उहाँले विसं २०६३ मा बृहत् शान्ति सम्झौतामा हस्ताक्षर भएदेखि नेपाल शान्ति प्रक्रियालाई चाँडो पूरा गर्न दृढ रहेको बताउनुभयो । सङ्घर्षबाट उदाएको राष्ट्रको रूपमा नेपालले शान्ति र राजनीतिक स्थायित्वको महत्व बुझेको बताउँदै उहाँले आफ्नो नेतृत्वमा वर्तमान सरकार गठन भएपछि संसद्ले सङ्क्रमणकालीन न्यायसम्बन्धी विधेयक पारित गरिसकेको जानकारी दिनुभयो । सङ्क्रमणकालीन न्यायसम्बन्धी सबै मुद्दालाई सधैँका लागि समाधान गर्न आफू प्रतिबद्ध रहेको स्पष्ट गर्दै प्रधानमन्त्री ओलीले भन्नुभयो– ‘हामी कानुन कार्यान्वयन गर्दा सत्य र न्यायसहित पीडितहरूको अधिकारको रक्षालाई प्राथमिकता दिनेछौँ। द्वन्द्वकालका पीडामा मल्हम लगाउने प्रयासस्वरुप क्षतिपूर्ति उपलब्ध गराउनका साथै मेलमिलापमा जोड दिनेछौँ।’ उहाँले नेपालको शान्ति प्रक्रियालाई निष्कर्षमा पुर्याउन संयुक्त राष्ट्रसङ्घसहित अन्तर्राष्ट्रिय समुदायले गरेको सहयोगको प्रशंसा गर्नुभयो ।

देशब्यापी भारी वर्षा सुरु, आज र भोलि रात्री बस नचल्ने

काठमाडौं । पूर्वीकेन्द्रित वर्षा देशभर फैलिएको छ । मौसम पूर्वानुमान महाशाखाका अनुसार आइतबारसम्म देशभर सिमसिमदेखि भीषण वर्षाको सम्भावना छ । केही ठाउँमा त अत्यधिक वर्षाको चेतावनी दिइएको छ । मनसुनी वायु कायमै रहेका वेला बंगालको खाडीमा विकसित न्यून चापीय प्रणालीले देशभर वर्षा हुन थालेपछि सरकारले पहिरोको जोखिम रहेका क्षेत्रमा रात्रिबस चलाउन रोक लगाएको छ । गृह मन्त्रालयको मनसुन पूर्वतयारी तथा प्रतिकार्य कमाण्डले भीषण वर्षाको आकलन भइ रेडअलर्ट (उच्च जोखिम) जारी भएकामध्ये ४२ पहाडी र हिमाली जिल्लामा शुक्रबार र शनिबार रात्रिबस चलाउन रोक लगाएको हो । कोशीका धनकुटा, तेह्रथुम, खोटाङ, ओखलढुंगा, उदयपुर, भोजपुर, इलाम र पाँचथर तथा बागमतीका मकवानपुर, धादिङ, नुवाकोट, रसुवा, काठमाडौं, भक्तपुर, ललितपुर, काभ्रे, सिन्धुपाल्चोक, सिन्धुली र रामेछापमा दुई दिन रात्रिबस चल्न पाउने छैनन् । त्यस्तै, गण्डकीका म्याग्दी, बागलुङ, तनहुँ, स्याङ्जा, कास्की, पर्वत, लमजुङ, गोरखा र मनाङ तथा लुम्बिनीका रुकुम पूर्व, रोल्पा, गुल्मी, प्युठान, अर्घाखाँची, पाल्पा र दाङमा रात्रिबस गुडाउन रोक लगाइएको छ । कर्णालीका जाजरकोट, रुकुम पश्चिम, दैलेख, सुर्खेत र सल्यान तथा सुुदूरपश्चिमका डोटी र अछाममा पनि रात्रीबस चलाउन रोक लगाइएको छ । कोशीदेखि लुम्बिनीसम्मका धेरै स्थानमा वर्षा हुने, राति पश्चिममा पनि मौसम पूर्वानुमान महाशाखाका अनुसार आज शुक्रबार कोशीदेखि पश्चिममा लुम्बिनी प्रदेशका धेरै स्थानमा वर्षा हुनेछ । त्यहाँदेखि पश्चिमी क्षेत्रमा भने केही स्थानमा वर्षाको सम्भावना छ । कोशी, मधेश, बागमती, गण्डकी र लुम्बिनीका केही तथा सुदूरपश्चिम र  कर्णालीका थोरै स्थानमा भने भीषण वर्षाको चेतावनी दिइएको छ । कोशी, बागमती, गण्डकी र लुम्बिनी प्रदेशका एक–दुई स्थानमा भने अत्यधिक वर्षाको आकलन छ । तराई हावाहुरी चल्नेछ ।  शुक्रबार राति भने  बागमती, गण्डकी, लुम्बिनी र सुदूरपश्चिमका धेरै स्थानमा वर्षाको सम्भावना छ । बाँकी प्रदेशका केही स्थान पानी पर्ने देखिएको छ । बागमती, गण्डकी, लुम्बिनी प्रदेशका केही तथा बाँकी प्रदेशका थोरै स्थानमा भीषण तथा बागमती, गण्डकी, र लुम्बिनी प्रदेशका एक–दुई स्थानमा  अत्यधिक वर्षाको पनि सम्भावना छ । शनिबार भने बागमतीदेखि पश्चिममा लुम्बिनी (मधेशबाहेक) का धेरै क्षेत्रमा वर्षाको सम्भावना  छ । तर, बाँकी प्रदेशका भने केही स्थानमा वर्षा हुनेछ । बागमती, गण्डकी र लुम्बिनीका केही तथा बाँकी प्रदेशका एक–दुई स्थानमा भीषण तथा  गण्डकी र लुम्बिनीका एक–दुई स्थानमा अत्यधिक वर्षाको पनि चेतावनी दिइएको छ । राति गण्डकी र लुम्बिनीका धेरै स्थानमा पानी पर्ने देखिन्छ ।  

लोकप्रिय