विवादास्पद गिरिबन्धु जग्गा मुद्दाको पेशी १६औं पटक सर्यो
काठमाडौं । सर्वोच्च अदालतको संवैधानिक इजलासमा पेशी तोकिएका मुद्दाहरूको चाप र संख्याका कारण देखाउँदै गिरिबन्धु चियाबगानको मुद्दा १६ औं पटकलाई सरेको छ । यो मुद्दाको अर्को पेशी माघ ३ गतेलाई तोकिएको छ । पूर्व–पश्चिम (महेन्द्र) राजमार्गको बिर्तामोड–चारआली खण्ड वारपार देखिने ३ सय ४० बिघा गिरिबन्धु चियाबगानको जग्गा सट्टाभर्ना गर्न र बगानको जग्गा बिक्री गर्न सकिने प्रबन्ध केपी शर्मा ओली प्रधानमन्त्री र पद्मा अर्याल भूमि मन्त्री हुँदा राज्य तहबाट तय भएपछि यो प्रकरण बाहिर आएको हो । २०७८ भदौयता यो मुद्दामा १५ पटक पेशी तोकिएको र अन्तिमपटक असोज १७ को सुनुवाइलाई निर्णायक देखाएर र यो फैसला आफ्ना पक्षमा आउने भन्दै भूमाफिया तथा विक्रेताको सञ्जालले मुद्दा संवैधानिक इजलासमा रहेकै बेला जग्गा बिक्रीको करोडौं बैना रकम उठाइसकेको बताइन्छ । गिरीबन्धु बगानको ३४० बिघामाथि ‘चलखेल’ भएको भन्दै अधिवक्ता ओमप्रकाश अर्यालले २०७८ भदौ २ मा सर्वोच्च अदालतमा रिट दायर गरेका हुन्।
