विपक्षी दलहरुको निष्कर्ष : प्रधानमन्त्री ओलीले तत्काल राजीनामा दिनुपर्छ
काठमाडौं । नेकपा माओवादी केन्द्रका अध्यक्ष पुष्पकमल दाहाल प्रचण्डले आव्हान गरेको विपक्षी दलहरुको बैठकले जेनजी आन्दोलनमा सरकारले गरेको बर्बरतापूर्ण दमनको विरोध गर्दै तत्काल प्रधानमन्त्री केपी शर्मा ओलीले राजीनामा दिनुपर्ने निष्कर्ष निकालेको छ । विपक्षी दलहरूले प्रधानमन्त्री केपी शर्मा ओली नेतृत्वको सरकारले नागरिकमाथि बर्बर दमन गरेको भन्दै त्यस्तो रवैया अस्वीकार्य भएको बताएका छन्। साथै, प्रधानमन्त्री ओलीले राजीनामा दिनुपर्ने विपक्षी दलहरूको संयुक्त बैठकले ठहर गरेको छ। मंगलबार बिहान नेकपा माओवादी केन्द्रका अध्यक्ष पुष्पकमल दाहाल ‘प्रचण्ड’ले आह्वान गरेको उक्त बैठकले सो निर्णय गरेको हो। माओवादी केन्द्रका उपमहासचिव वर्षमान पुनले बैठकका निर्णयबारे जानकारी दिँदै भने, “यो घटनाको जिम्मेवारी लिँदै प्रधानमन्त्री ओलीले राजीनामा दिनुपर्छ।” विपक्षी दलहरूले सोमबारको प्रहरी दमनलाई इतिहासकै सर्वाधिक बर्बर ठहर गरेका छन्। बैठकले सरकारलाई युवाहरूको माग तत्काल सम्बोधन गर्न आग्रह गरेको छ। साथै, पुनले जेन-जी युवाहरूको आन्दोलनलाई कुनै पनि दलले निहित स्वार्थका लागि प्रयोग गर्न नहुने बताए।
