काठमाडौं, माघ २३ । केकी अधिकारी ब्राण्ड एम्बेसडरमा बनेकी छिन । उच्च शिक्षा अध्ययनको परामर्श दिदैँ आएको राइट एण्ड एसोसिएटले नायिका अधिकारीलाई एम्बेसडरमा नियुक्त गरेको हो । राइट एण्ड एसोसिएटले सेवा सुरु गरेको १६ औं वर्ष पुगेको अवसरमा शनिबार काठमाण्डौमा आयोजित कार्यक्रममा केकीलाई कम्पनीको ब्राण्ड एम्बेसडर घोषणा गरिएको हो । ‘विदेशमा अध्ययन गरेर सीप र ज्ञान हाँसिल गरी देशलाई केही गर्न खोज्ने युवाहरुलाई राइटले सही बाटो देखाइदिएको छ’ केकीले भनिन– पुरानो र बिश्वसनीय कम्पनीसँग अनुबन्धित हुन पाउँदा मलाई खुसी लागेको छ ।’ वनमन्त्री शंकर भण्डारीसमेत उपस्थीत सो कार्यक्रममा कम्पनीका निर्देशकद्वय परशुराम अधिकारी र निर्देशक बालचन्द्र भट्टराइले कम्पनीको स्थापना र १६ वर्षे यात्राका बारेमा जानकारी गराएका थिए । अष्ट्रेलियामा अध्ययन गर्न जाने विद्यार्थीलाई परामर्श सेवा उपलब्ध गराउने राइट्सले काठमाण्डौको पुतलीसडक र सिड्नीमा आफ्नो कार्यालय स्थापना गरेको छ ।

जुम्ला, माघ २२ । जुम्लाको चन्दननाथ नगरपालिका–१ दानसाँघुस्थित जवा नदीमा पक्की पुल निर्माण भइसकेको भएपनि त्यसमा हिँड्न भने पाइएको छैन । जग्गा मुआब्जा विवादका कारण सो पुल सञ्चालनमा आउन नसकेको हो । पुल नजिकका जग्गाधनीले मुआब्जा नपाएको भन्दै बार हालेर सो पुल संचालनमा ल्याउन दिइएको छैन । स्थानीय विकास अधिकारी हरिनारायण बेल्बासेले प्रभावित व्यक्तिको जग्गाको क्षति मूल्याङ्कन गर्न तत्कालीन प्रमुख जिल्ला अधिकारी रुद्रप्रसाद पण्डितको संयोजकत्वमा जिल्ला मालपोत, नापी र प्राविधिक कार्यालय रहने गरी गठित समितिको मूल्याङ्कनका आधारमा घरभएकालाई रु. पाँच लाख २३ हजार र जग्गा भएकालाई रु १८ लाख क्षतिपूर्ति दिन बाँकी रहेको बताए । “यो समस्या समधानका लागि सम्बन्धीत निकायले स्थानीय सडक निर्माणमा मुआब्जा दिने प्रावधान छैन भन्ने जवाफ दियो र जिविसबाट दिनलाई पनि स्रोत छैन,” स्थानीय विकास अधिकारी बेल्बासेले भने । केही समयपछि मन्त्रालयको टोली आउने देखिएकाले त्यत्तिबेला नै समस्या समाधान गरेर पुल सञ्चालनमा ल्याउने उनले बताए । चालिस मिटर स्पान भएको पुल निर्माणको जिम्मा ओएसिस पृथ्वी जेभी काठमाडौँले लिएको थियो । २०६९ साल असार १५ गते निर्माण सम्झौता भई कार्य सम्पन्न भएर यही पुसमा जिविसलाई चिठी लेखेर पुल हस्तान्तरण गरिसकेकोे जेभीका प्रतिनिधि तारासिंह कठायतले जानकारी दिए । जिल्ला प्राविधिक कार्यालय जुम्लाका सब–इन्जिनियर चुडामणि भट्टले भ्याटसहित रु चार करोड १९ लाखमा निर्माण कार्य सम्पन्न भएको पुलको पूर्ण भुक्तानी भइसकेको बताए । जग्गाधनीको अवरोधका कारण सञ्चालन प्रक्रियामा जटिलता आएको उनको भनाई छ । सुरुमा क्षतिपूर्ति दिनेसम्मको कुरा गरिए पनि अहिले आलटाल गर्न खोजेपछि बार लगाउन बाध्य भएको पीडितहरुले बताएका छन् । रासस

काठमाडौं, माघ २१ । अवैध सुन लैजान खोज्दा एकजनालाई प्रहरीले त्रिभुवन अन्तर्राष्ट्रिय विमानस्थलबाट पक्राउ गरेको छ । विमानस्थलको पार्किङ एरियामा विदेशबाट आगमन भएका नेपाली यात्रु तेह्रथुमका ३३ वर्षका यादवप्रसाद दाहाललाई प्रहरीले पक्राउ गरेको हो । भन्सार छलेर लैजान लागेको सुनसहितको उनको साथबाट सुनको बेरुवा औंठीहरु ४ थान (९९ ग्राम) अन्दाजी ४ लाख ६७ हजार ६ सय ७६ रुपैयाँ बराबरको संकलन गरी भन्सार छली लैजान लागेको अवस्थामा दाहालललाई प्रहरीले फेला पारेको जनाएको छ । उनलाई प्रहरीले आवश्यक कारबाहीको लागि त्रिभुवन विमानस्थल भन्सार गौचर काठमाडौंमा बुझाएको छ । File Photo

रोल्पा, माघ २१  । रोल्पाका सहकारी संस्थामध्ये ७८ प्रतिशत सक्रिय देखिएका छन् । जिल्लामा कुल दर्ता भएका एकसय ३९ सहकारीमध्ये एकसय सात सहकारी सक्रिय रहेका छन् भने ३२ वटा सहकारी निष्क्रिय रहेको जिल्ला बचत तथा ऋण सहकारी सङ्घ रोल्पाले जनाएको छ । जिल्लामा दर्ता भएका सहकारीमध्ये ४३ बचत तथा ऋण, ६ बहुउद्देश्यीय, स्वास्थ्य, सामाजिक उद्यमी, मौरीपालन, जडीबुटी र उपभोक्ता गरी एक÷एक सहकारी छन् भने ८५ वटा कृषि सहकारी रहेका छन् । जिल्लामा महिलाले व्यवस्थापन गरेका सहकारी सङ्ख्या २० रहेको छ । निष्क्रिय सहकारीमध्ये अधिकांश कृषि सहकारी रहेको बताइएको छ । गाउँगाउँमा सहकारी, घरघरमा रोजगारीको नाराअनुरुप सहकारी संस्थालाई रु एक लाख अनुदान दिने गरी सरकारले कार्यक्रम ल्याएको समयमा दर्ता भएका र खासै कारोबार नगरेका सहकारी निष्क्रिय रहेको सहकारी अभियन्ता एनार्जन घर्तिमगरले बताउनुभयो । सहकारी संस्थाको छाता सङ्गठनका रुपमा जिल्लामा जिल्ला सहकारी सङ्घ, जिल्ला कृषि सहकारी सङ्घ र जिल्ला बचत तथा ऋण सहकारी सङ्घ पनि क्रियाशील रहेका छन् । रासस

दमौली, माघ २०  तनहुँको व्यास नगरपालिका–८ सिर्दी नजिकै आज एक यात्रुबाहक बस सडकमै पल्टिँदा एक जनाको मृत्यु भएको छ भने २४ जना घाइते भएका छन् । घाइतेमध्ये छ जना गम्भीर छन् । दुर्घटनामा परी मृत्यु हुनेमा व्यास नगरपालिका–९ अधेरी भञ्ज्याङका ३४ वर्षीय हर्कसुर कामी रहेको तनहुँ जिल्ला प्रहरी कार्यालयका प्रमुख प्रहरी उपरीक्षक उमेशराज जोशीले बताए । दुर्घटनामा परी गम्भीर घाइते भएका कामीको उपचारका लागि दमौलीतर्फ ल्याउँदै गर्दा बाटोमै मृत्यु भएको र दुर्घटनामा परी गम्भीर घाइते हुने जामुने–१ बस्ने ३० वर्षीया चिजामाया थापालाई काठमाडौँको ग्रान्डी अस्पतालमा र जामुनेकै मनिषा थापा, लालमाया राना,सुकमाया श्रेष्ठ, मनपाङ–१की अस्मिता श्रेष्ठ र जामुनकै सविता थापालाई पोखरास्थित क्षेत्रीय अस्पताल पठाइएको प्रहरी उपरीक्षक जोशीले जानकारी दिए । पोखराबाट दमौली आउँदै गरेको ग१ख ३२८८ नंको बस अनियन्त्रित भई पल्टेको थियो । अन्य सामान्य घाइतेको दमौलीको रत्नहरि, व्यास सिटी, नेसनल एपोलो र जिल्ला अस्पतालमा उपचार भइरहेको प्रहरीले जनाएको छ । बस चालक मनपाङ–१ बस्ने भीमसेन नारायण श्रेष्ठसमेत सामान्य घाइते रहेको र उपचारपछि उनलाई नियन्त्रणमा लिई अनुसन्धान भइरहेको प्रहरी उपरीक्षक जोशीले बताए । रासस

काठमाडौं, माघ २० । सुशिल श्रेष्ठ र वर्षा शिवाकोटी स्टारर फिल्म ‘कारखाना’ को अफिसियल प्रदर्शन मिति तय भएको छ । यसअघि माघे संक्रान्तिको छेकोमा प्रदर्शन गर्ने हल्लाका बीच फिल्मको रिलिज पोष्टपोण्ड भएको थियो । अब फिल्म अर्को वर्षको जेठ ५ मा रिलिज हुनेछ । फिल्मको पोस्टर सार्वजनिक गर्दै निर्माण टिमले प्रदर्शन मिति लक गरेको हो । शान थापाले तयार गरेको सार्वजनिक पोस्टरमा लिड कलाकार सुशिल र बर्षाको प्रेमभाव झल्किन्छ । फिल्मको यसअघि सार्वजनिक ‘मायाले बोले’ को बोलको गीत दर्शक श्रोतामा लोकप्रिय भइसकेको छ । फिल्मलाइ अमरदिप सापकोटाले निर्देशन गरेका हुन् । गोविन्द शाहीले फिल्मको वितरण जिम्मा लिएका छन् । फिल्मलाइ सुदिप खड्का र अमर बज्राचार्यले संयुक्त लगानीमा निर्माण गरेका हुन् ।

काठमाडौं, माघ १९ ।   बजेटमार्फत छुट्याइएका कार्यक्रमको रकम खर्च नभइरहेका वेला मन्त्रालयहरूले बजेटबाहिरका कार्यक्रमका लागि २ खर्ब १५ अर्ब रुपैयाँ माग गरेका छन् । १६ विभिन्न निकायले अर्थ मन्त्रालयसँग थप बजेट मागेका हुन् । उनीहरूले माग गरेको रकम चालू आर्थिक वर्षमा विनियोजित कुल पुँजीगत बजेट ३ खर्ब ११ अर्ब ९४ करोडको ६९.२३ प्रतिशत हो । प्रभावशाली नेता र मन्त्रीको दबाबमा निर्वाचन क्षेत्रमा खर्च गर्न यसरी रकम माग गर्ने गरिएको छ । आवको पहिलो ६ महिनामा ११.३ प्रतिशत पुँजीगत खर्च भएको थियो । खर्च गर्न नसकेर सरकारी ढुकुटीमा करिब २ खर्ब ३० अर्ब रुपैयाँ थुप्रिएको छ । गाडी किन्न १ अर्ब माग विभिन्न सरकारी निकायहरूले गाडी किन्न मात्रै एक अर्ब रुपैयाँ माग गरेको अर्थ मन्त्रालयका सचिव डा. शान्तराज सुवेदीले बताए । ‘थप बजेट माग भएको देख्दा त सरकारी निकायसँग गाडी नै नभएजस्तो देखिन्छ,’ सुवेदीले भने, ‘गाडी किन्न मात्रै एक अर्ब रुपैयाँ थप माग भएको देख्दा अचम्म लागेको छ ।’ बजेट खर्च गर्नेलाई स्रोतको अभाव नहुने भन्दै उनले फागुनसम्म पनि काम नगर्नेको बजेट कडाइका साथ तान्ने (सरेन्डर) गर्ने बताए । पुनर्निर्माण प्राधिकरणले माग्यो ७५ अर्ब भूकम्पपछिको पुनर्निर्माणको नेतृत्व गरिरहेको राष्ट्रिय पुनर्निर्माण प्राधिकरणले ७५ अर्ब रुपैयाँ थप बजेट माग गरेको छ । यसअघि बजेटमार्फत उपलब्ध ३४ अर्ब २२ करोड रुपैयाँ पुँजीगत बजेटमध्ये १ अर्ब ५२ करोड रुपैयाँ अर्थात् ४.४४ प्रतिशत खर्च गरेको प्राधिकरणले थप ७५ अर्ब रुपैयाँ मागेको हो । पुनर्निर्माण प्राधिकरणले अघि बढाउनुपर्ने सडक, सार्वजनिकस्थल, स्वास्थ्य चौकी, विद्यालयलगायतको पुँजीगत खर्च हुन सकेको छैन । विकास बजेट खर्च गर्ने ठूलो निकाय भौतिक पूर्वाधार तथा यातायात मन्त्रालयले ६० अर्ब थप बजेट मागेको छ । ऊर्जा मन्त्रालयले बुढीगण्डकी जलविद्युत् आयोजनाको मुआब्जा वितरणका लागि भन्दै ४२ अर्ब ७ करोड रुपैयाँ थप बजेट मागेको छ । बक्स पैसाको सिरानी हालेर सुत्ने अवस्था कहिलेसम्म ?  ‘अहिलेकै अवस्था कायमै रहने हो भने असार मसान्तसम्मा २–३ खर्ब रुपैयाँ बचत हुन्छ । पैसा सिरानी हालेर सुत्ने अवस्था आउनुहुँदैन । जनता टहरोमा रहने, विकासको माग हुने, तर पूरा नहुने अनि ढुकुटीमा पैसा थुप्रिरहने अवस्थाको अन्त्य हुनुपर्छ ।’ -डा. मीनबहादुर श्रेष्ठ, उपाध्यक्ष, राष्ट्रिय योजना आयोग ब्रेक थ्रु गर्नुस्  ‘अर्थ मन्त्रालयले सम्पूर्ण निकायसँग छलफल अघि बढाएको छ । अब हरेक मन्त्रालयले आफूमातहतका निकाय र विभागसँग छलफल गर्नुपर्छ । अहिलेसम्म भएको कामबाट सन्तोष मान्ने ठाउँ छैन । यसमा ब्रेक थ्रु हुनु आवश्यक छ ।’ – कृष्णबहादुर महरा, उपप्रधानमन्त्री तथा अर्थमन्त्री अनियमित काम हो  सिद्धान्ततः बजेटमा समावेश भएका योजनाबाहेक आकस्मिक कामका लागि मात्रै यसरी बजेट दिने हो । आकस्मिकबाहेकको अवस्थामा बजेट दिनु भनेको बिल्कुलै गलत हो । हरेक कुराको विधि र प्रक्रिया हुन्छ । पैसा दिने भनेर मात्रै हुँदैन । त्यसको अध्ययन हुनुप¥यो । – डा. रामशरण महत पूर्वअर्थमन्त्री राष्ट्रिय गौरवका आयोजनाको प्रगति निराशाजनक चालू आवमा सरकारले धेरै प्राथमिकता दिएर अघि बढाएका राष्ट्रिय गौरवका आयोजनाको खर्चको अवस्था निराशाजनक छ । वर्षको पहिलो ६ महिनामा उनीहरूको औसत खर्च १३ प्रतिशत मात्रै छ । पोखरा विमानस्थल, दक्षिण एसिया पर्यटन पूर्वाधार विकास आयोजना र दोस्रो अन्तर्राष्ट्रिय विमानस्थलको खर्च शून्य छ । बुढीगण्डकी जलविद्युत् आयोजनाको ०.४७ प्रतिशत, काठमाडौं–तराई मधेस फास्ट ट्र्याकको ०.०५ प्रतिशत र भेरी–बबई डाइभर्सनको २.७४ प्रतिशत मात्रै खर्च भएको छ । पुष्पलाल लोकमार्ग, उत्तर–दक्षिण लोकमार्ग, सिक्टा सिँचाइ आयोजना, बबई सिँचाइ आयोजना, रानी–जमरा–कुलरिया सिँचाइ आयोजना, रेलवे तथा मोनोरेल विकास आयोजना, मेलम्ची खानेपानी र माथिल्लो तामाकोसी जलविद्युत् आयोजनाको प्रगति ३० प्रतिशतभन्दा धेरै छ । यो खबर आजको नयाँ पत्रिकामा छ ।

चितवन, माघ १७ । पश्चिम चितवनको विजयनगरबाट नारायणगढतर्फ आउँदै गरेको यात्रुबाहक बस आज बिहान भरतपुरको शिवघाटमा दुर्घटना हुँदा १० यात्रु घाइते भएका छन् । जिल्ला प्रहरी कार्यालय, चितवनले दिएको जानकारी अनुसार ना५ख ११२१ नंको बस भरतपुर उपमहानगरपालिका–५ शिवघाटमा ब्रेकफेल भई दुर्घटना भएको हो । दुर्घटनाका घाइतेको कलेज अफ मेडिकल साइन्सेस शिक्षण अस्पताल भरतपुरमा उपचार भइरहेको प्रहरीले जनाएको छ । घाइतेमध्ये एकजनाको अवस्था गम्भीर रहेको प्रहरीले जनाएको छ । बसमा २८ जना सवार रहेको बुझिएको छ ।

काठमाडौं, माघ १६ । राष्ट्रिय परीक्षा बोर्ड, परीक्षा नियन्त्रण कार्यालय भक्तपुरले यस वर्षको कक्षा ११ र १२को वार्षिक परीक्षाको समयतालिका सार्वजनिक गरेको छ । आइतबार सार्वजनिक उक्त गरेको उक्त समय तालिका अनुसार आगामी वैशाख १० गतेदेखि वैशाख २२ गतेसम्म कक्षा १२ को परीक्षा हुनेछ । त्यस्तै वैशाख २४ गतेदेखि जेठ ३ सम्म कक्षा ११ को परीक्षा हुनेछ। २०७४ सालको वार्षिक परीक्षामा सहभागी हुने परीक्षार्थीहरुले आगामी माघ मसान्तभित्र परीक्षा आवेदन फाराम भरिसक्नुपर्ने सूचनामा जनाइएको छ। उक्त समयसम्ममा छुटेका परीक्षार्थीले थप शुल्कसहित फागुन १५ गतेसम्म आवेदन फारम बुझाउन पाउनेछन्।

बझाङ, माघ १५ – बझाङको काप्डेमा शनिबार बिहान जीप दुर्घटना हुँदा एक जनाको ज्यान गएको छ । सदरमुकाम चैनपुरबाट तल्कोटका लागि छुटेको से १ ज ५६२ नम्बरको जीप जयपृथ्वी नगरपालिका–६ काप्डेको पुल नजिकै दुर्घटना हुँदा रिलु–८ का ४५ का लालबहादुर बोहराको घटना स्थलमा नै ज्यान गएकोे जिल्ला प्रहरी कार्यलयले जनाएको छ । दुर्घटनामा अन्य पाँच जना घाइते भएका छन् । उनीहरुको जिल्ला अस्पताल सिमखेतमा उपचार भइरहेको छ । जीपको ब्रेक फेल भएर दुर्घटना भएको हुन सक्ने अनुमान छ । घटना बारे थप अनुसन्धान भइरहेको प्रहरी नायब उपरीक्षक नरेन्द्र चन्दले बताउनुभयो ।

काठमाडौ, माघ १४ ।  सरकारले चीन जोड्ने १३ वटा नाकाका लागि वार्षिक बजेट विनियोजन गरे पनि त्यस अनुसार चीनले पहुँच दिने या नदिने अनिश्चित छ । प्राथमिकताका चार नाका बाहेक अन्यमा चीनले ग्रिन सिग्नलसमेत नदिएका कारण यो अवस्था आएको हो । सडक विभागका महानिर्देशक देवेन्द्र कार्कीले चीनले पहुँच दिने वा नदिने भन्ने विषयमा कुनै निश्चितता नभएको जानकारी दिए । सरकारले प्राथमिकता बिना नै चिनियाँ नाका जोड्ने धेरैवटा सडकको योजना ल्याएको उनको भनाइ छ । सडक निर्माण गर्ने प्रक्रिया अगाडि सारिएको भए पनि चीनसँगको पहुँच भने अनिश्चित छ । भौतिक योजना तथा निर्माण मन्त्री रमेश लेखकले बिहीबार राजधानी आयोजना गरेको पत्रकार सम्मेलनमा कार्कीले नेपालले निर्माण अगाडि सारेका सबै सडकलाई चीनले पहुँच दिने वा नदिने कुनै निश्चित आधार नभएको बताए । सरकारले चीनसँगको पहुँच नबनाइ योजनामा मात्रै सडक निर्माणलाई अगाडि सारेको उनको भनाइ छ । सरकारले वार्षिक बजेट तय गरेरै अगाडि सारेका तथा सडक विभागको सूचीमा रहेका विभिन्न १३ वटा नाकामध्ये जम्मा चारवटालाई मात्रै प्राथमिकतामा राखिएको छ । चीन जोड्ने गल्छी-रसुवागढी, सिमिकोट-हिल्सा, जोमसोम-कोराला र खाँदबारी-किमाथांका सडकमात्रै प्राथमिकतामा छन् । यी चार नाकालाई सरकारले प्राथमकिता दिएकाले यसबाट सडकमार्फत चीनसम्मको पहुँच विस्तार हुने भएको छ । बाँकी सडक निर्माणमा भने चीनले कुनै ग्रिन सिग्नल दिएको छैन । विभागका अनुसार पनि धेरैवटा नाकाको नाममा बजेट छर्नुभन्दा सीमित नाकानै राम्रोसँग बनाएर त्यसपछि आवश्यकता अनुसार निर्माण गर्नुपर्ने हुन्छ । भारतले सबै नाकामा सहज पहुँच नदिएको अवस्था भने चीनले दिन्छ भन्ने कुनै ग्यारेन्टी छैन । स्थानीय आवश्यकता, राष्ट्रिय महत्व, व्यापरिक दृष्टि, तथा राजनीतिक दबाबलगायत कारणले उत्तरतर्फको सडकका योजना अगाडि आउने गरेका छन् । प्राथमिकतामा रहेका चार सडक आगामी दुई वर्षदेखि पाँच वर्ष भित्रमै चीनसँग जोडिन्छन् भने नौ वटाकै भविष्य अन्योल छ । आवश्यकता भएका र प्राथमकिताका सडकसँगको पहुँच विस्तारमा भने वाणिज्य, अर्थ, गृह, परराष्ट्रलगायतका मन्त्रालयले कूटनीतिक पहल गर्नुपर्ने उल्लेख छ । कुन नाकालाई भन्सार पहुँच दिने, कुनलाई नदिने भन्ने विषयको टुंगो सरकारले नै तय गरेर निर्णय दिनुपर्छ । उत्तरी नाकाबाट चीनसम्मको पहुँच विस्तार गर्ने योजनालाई आर्थिक वर्ष २०६६/६७ देखि सुरु गरिएको भए पनि अहिलेसम्म करिब ४० प्रतिशत सडकको मात्रै ट्र्याक खोल्ने काम सकिएको उल्लेख छ । चीनसँग जोड्ने भने अगाडि सारिएको तथा प्राथमकिताको कुनै सूची पनि तय नभएका नाकामध्ये ९५ किलोमिटरको ताप्लेजुङ-ओलाङचुङगोलामा ३५ मिटर ट्र्याक खोलिएको छ । २५ किलोमिटरको लामाबगर-लाप्चिरोड पाँच किलोमिटर, १६२ किलोमिटरको वेनीघाट-लार्केभन्ज्याङ ५८ किलोमिटर, ११५ किलोमिटरको गुम्दा चुम्चेट-सिर्दिबासको २५ किलोमिटर ट्र्याक खोलिएको छ । १३५ किलोमिटरको मिर्मा-तिन्ने-धो दुनै सडकमा १५ किलोमिटर, ११० किलोमिटरको गम्गढी-न्याक्चे-लग्ना सडकको १५ किलोमिटर, ११५ किलोमिटरको चैनपुर-उराईको ३५ किलोमिटर र ११२ किलोमिटरको दार्चुला—तिन्का सडकको ४० किलोमिटर ट्र्याक खोलिएको छ । विभागका अनुसार यी सडक निर्माणको गति ढिलो छिटो हुनेमा सरकारी प्राथमिकतामा नपर्नु र चीनले सहज पहुँच दिने वा नदिने भन्ने कुनै निश्चित आधार नहुनु उल्लेख छ । यस्ताे छ उत्तर  जोड्ने सडकको अवस्था सडकको नाम दूरी ट्र्याक खोल्न बाँकी खन्ड गल्छी-रसुवागढी ८५ किमि ३४ किमी सिमिकोट-हिल्सा ९५ किमी १५ किमी जोमसोम-कोराला ११० किमि ट्र्याक पूरा खाँदबारी-किमाथांका १६२ किमि ७७ किमी ताप्लेजुङ-ओलाङचुङगोला ९५ किमि ६० किमी लामाबगर-लाप्चिरोड २५किमि २० किमी वेनीघाट-लार्केभन्ज्याङ १६२ किमि १०४ किमि गुम्दा-चुम्चेट-सिर्दिबास ११५ किमि ९० किमि मिर्मा-तिन्ने-धोदुनै १३५ किमि ४० किमि गम्गढी-न्याक्चे-लग्ना ११० किमि ९५ किमि चैनपुर-उराई ११५ किमि ८० किमि दार्चुला—तिन्का रोड ११२ किमि ७२ किमि तातोपानी नाका अहिले बन्द यो खबर आजको अन्नपूर्ण पोष्टमा छ ।

सोलुखुम्बु, माघ १२। विश्वको सर्वोच्च शिखर सगरमाथा जाने मुख्य पदमार्गमा पर्ने इम्जा खोलामाथिको पुल निर्माण कार्य अझै हुन सकेकाे छैन । उपभोक्ता समिति बनेको १८ महिना बितिसक्दा समेत पुल निर्माण कार्य भने अलपत्र बनेको छ । दिबुचेबाट पाङबोचेतर्फ जाने बाटोमा पर्ने सो स्थानमा झोलुङ्गे पुल निर्माणका लागि जिल्ला विकास समिति र इम्जा खोला झोलुङगे पुल निर्माण उपभोक्ता समितिबीच २०७२ जेष्ठ १० गते सम्झौता भएको थियो । २०७३ असार २० गते सम्पन्न गर्ने गरी सम्झौता भएको उक्त योजनाको अहिलेसम्म कुनै काम हुनसकेको छैन । सो पुल सम्पन्न गरिसक्ने अन्तिम मिति समेत गुज्रिएको सात महिना बितिसकेको छ । योजनाका लागि पहिलो किस्ताको रकम जिविसिबाट लगेपछि अहिलेसम्म उपभोक्ता समितिका पदाधिकारी जिविसको सम्पर्कमा आएका छैनन् । पहिलेको झोलुङ्गे पुल पहिरोमा परी भाँच्चिएपछि नयाँ पुल निर्माणका लागि योजना निर्माण गरिएको थियो । उपभोक्ता समितिसँग रु ५० लाख ४२ हजारमा सो योजना सम्झौता भएको थियो । ६८ मिटर लामो सो पुल निर्माण नहुँदा खुम्बु भ्रमणमा जाने पर्यटक जोखिमपूर्ण यात्रा गर्न बाध्य छन् । गएको वर्षात्मा सोही स्थानबाट खोलामा खसेर एकजना विदेशी पर्यटक बेपत्ता भएका थिए । सँगै सम्झौता गरिएको चौरीखर्कको पुल निर्माण भएर प्रयोगमा आइसक्दा पनि उक्त पुल निर्माणको सुरसार नहुँदा स्थानीय वासिन्दा र पदमार्गमा हिँड्ने पदयात्री खिन्न भएका छन् । यता जिल्ला प्राविधिक कार्यालय सोलुुखम्बुका प्रमुख इन्जिनियर पुष्करप्रसाद पोख्रेलले भौगोलिक कठिनाइकै कारण अनुगमनमा जान नसकिएको बताए ।

काठमाडौँ, माघ ९ । नेपाल प्रहरीले विभिन्न बैङ्कको एटिएमबाट रकम निकालेर ठगी गर्ने दुई भारतीयलाई अाइतबार पक्राउ गरेकाे छ । उनीहरुले एक महिनादेखि काठमाण्डौंका एक दर्जन एटिएम बुथबाट पैसा निकाल्ने कार्यमा लागेका दुईजना पक्राउ गरेको प्रहरीले जानकारी दिएको छ । उनीहरुले कमलादी, माछापोखरी, भोटाहीटी, महाराजगञ्ज, अनामनगर लगायतका करिब १ दर्जन ATM बुथहरुबाट करीब २५/३० जना ग्राहकहरुको रकम ठगी गरेको खुल्न आएको प्रहरीको अनुसन्धानबाट खुलेको छ । यसरी समातिए अभियुक्त प्रहरीले सम्बन्धीत बैंकहरुसँग समन्वय गरी CCTV (सिसिटिभि) फूटेजको दृष्यमा देखिएको हुलियासँग मिल्दोजुल्दो हुलिया भएका मानिसहरुको निरन्तर गोप्य निग्रानी गर्दै विभिन्न बैंकका ATM बुथहरु समेतमा निगरानी गर्दै जाँदा CCTV Footage मा देखिएका मानिसहरुको हुलियासँग मिल्ने दुई जना शंकास्पद व्यक्तिहरुलाई मिति २०७३।०९।२८ गते जिल्ला काठमाण्डौ का.म.न.पा. २९ स्थित विभिन्न एटिएम बुथहरु रहेको स्थानमा शंकास्पद गतिविधी देखाएकोले निजहरुको पिछा गर्दै जाँदा ठमेल स्थित होटल ECO 2000 मा प्रवेश गरेकोले कानुन बमोजिम उक्त होटलको खान तलासी लिदा भारत चण्डीगढ सेक्टर ४७ डी. घर नं. ३२१० ठेगाना भएका भारतिय पासपोर्ट नंबर L2968436 भएका बर्ष २३ का ईक्तेदार खान र भारत , FF 22 A मंगलबजार, लक्ष्मीनगर दिल्ली बस्ने बर्ष ३३ को निरन्जन मेहतालाई पक्राउ गर्न सफल भएको र निजहरुको कोठाबाट बिभिन्न बैकका ATM कार्ड, नगद तथा विभिन्न क्यासिनोमा प्रवेश गरेको टिकट समेत बरामद भएकोले थप अनुसन्धानको लागी निजहरु दुवै जनालाई बैंकिङ कसुर तथा सजाय ऐन, २०६४ बमोजिम थप अनुसन्धान भैरहेको प्रहरीले बताएको छ । कसरी निकाल्थे रकम ATM बाट अभियुक्तहरुले ? पक्राउ भएका दुबै जना ATM Booth मा बिहानै बाट चाहार्थे । ईक्तेदार खान ATM Booth बाहिर निग्रानी गर्थे भने निरन्जन मेहता आफ्नो कार्ड हातमा लिई रकम निकाल्ने बहानामा ATM card बाट पैसा निस्केन तपाईको पैसा निस्कियो कि निस्केन भनेर हिन्दीमा सोध्दथे । ग्राहकलाई ATM बाट रकम निकालेर मलाई सिकाईदिनुहोस भनि अनुरोध गर्थे । सोझा ग्राहकहरुले थोरै रकम निकाली ATM बाट रकम निकाल्ने तरिका सिकाई दिन्थे त्यस पछी ग्राहक निक्लना साथ “Do you need more time ? ” भन्ने Option (Button) दबाई OK गरी रकम निकाल्थे भने कतिपय अवस्थामा Internet Slow भएको बेलामा रकम प्राप्त नभई Do you want to continue ? भन्ने Option आएको अवस्थामा Yes bottom दबाई अघि Dial गरेको रकम निकाल्ने गर्दथे । कसरी दुरुपयोग गर्थे ATM बाट निकालिएको रकम ? त्यसरी निकालिएको रकम काठमाण्डौंका बिभिन्न Casino तथा होटलहरुमा खर्च गर्ने र बिभिन्न सरसमानहरु खरिद गर्ने गर्दथे । तलासीको क्रममा खटिएका कर्मचारीले तत्काल सोधपुछ गर्दा विगत एक महिनादेखि दैनिक रुपमा यस्तै बहानामा कुनै न कुनै सोझा ग्राहकहरुलाई विश्वास दिलाई रकम निकाल्ने गरी ईच्छा अनुसार खर्च गर्न पाएकोले ATM लाई आफूहरुको “MY GOOD FATHER” हो भनेका थिए । विगत एक महिनाको अवधीमा करिब २० स्थानमा भएका ATM बाट करिब ६ लाख भन्दा बढी रकम ठगी गरी हिनामिना गरेको ।  

काठमाडौं उपत्यकामा लोडसेडिङको अन्त्य गरेर उर्जा मन्त्री जनार्दन शर्मा निकै चर्चामा छन । माओवादीको राजनीतिलाई मन नपराउनेहरुले समेत उर्जामन्त्रीको यो कदमलाई निकै प्रशंसा गरेका छन् । हिउँदको कठ्यांग्रिदो चिसोमा मैनबत्ती बाल्न विवश राजधानीवासीले तिहारयता बिजुली नआएको दुख झेल्नु परेको छैन । मन्त्री जनार्दन शर्मासँग कान्तिपुर टेलिभिजनका लागि भुषण दाहालले “फायर साइड” कार्यक्रममा लिनुभएको अन्तर्वार्ता यहाँ साभार गरिएको छ ।

विभिन्न कारणले आकस्मिक र अनिच्छित गर्भ रहन सक्ने अवस्था आउन सक्छ । यसको एउटा कारण असुरक्षित शारीरिक सम्पर्क हुनसक्छ । नचाहिँदो गर्भ रह्यो भने महिलाले विभिन्न समस्या भोग्नुपर्छ । गर्भपतनका जोखिम, बच्चा जन्माएपछिका आर्थिक संकट आदिले महिलाको जिन्दगी तनावग्रस्त हुनसक्छ । अनिच्छित र अनावश्यक गर्भबाट बच्ने सबैभन्दा राम्रो उपाय आकस्मिक गर्भ निरोध नै हो । महिला र पुरुषको सहमतिमा हुने शारीरिक सम्पर्कमा परिवार नियोजनको साधन प्रयोग नगरिएको हुनसक्छ । गरिएपनि कहिलेकाहीँ साधन असफल हुन सक्छ । जस्तो, कन्डम च्यातिएर, या नियमित परिवार नियोजनको चक्की प्रयोग नगरेर या गर्न बिर्सेर या परिवार नियोजनका अस्थायी साधन उपलब्ध नभएर अनावश्यक गर्भ रहनसक्छ । दम्पत्तिबीचको सहवासमा पनि यस्ता त्रुटी हुन सक्छन् । यस्ता अवस्थामा आकस्मिक गर्भ रहन सक्ने सम्भावना हुन्छ । यी बाहेक बलात्कारको शिकार बनेका महिलाले पनि पेट बोक्न सक्छन् । अनावश्यक र अनिच्छित गर्भ रोक्ने कसरी त ? असुरक्षित शारीरिक सम्पर्कका कारण अनिच्छित र अनावश्यक गर्भ रहने अवस्था आउन सक्छ । आकस्मिक गर्भ निरोधक चक्कीले अनावश्यक गर्भ रहन दिँदैन । आकस्मिक गर्भनिरोधक चक्की यस चक्कीको प्रयोग असुरक्षित सम्पर्क हुँदा वा परिवार नियोजनको अस्थायी साधनको असफलतापछि अनावश्यक गर्भ रोक्ने सुरक्षित र सरल तरिका हो । यसले कसरी काम गर्छ ? यसले अनावश्यक गर्भ रोक्न तीन तरिकाले काम गर्नसक्छ ः १) यसले डिम्बाशयबाट निस्कने डिम्बलाई रोक्नसक्छ २) डिम्बलाई शुक्रकिटसँग मिलेर भ्रुण बनाउनबाट रोक्नसक्छ ३) बनिसकेको भु्रणलाई पाठेघरमा टाँसिन र भु्रणलाई बढ्नबाट रोक्नसक्छ तर, के जान्न एकदमै जरुरी छ भने डिम्ब गर्भाशयमा जोडिसकेको छ भने आकस्मिक गर्भनिरोधक चक्कीले काम गर्दैन । यो गर्भ तुहाउने चक्की होइन । त्यसैले शरीरिक सम्पर्क भएको कति घण्टाभित्र यसलाई प्रयोग गरे, यो प्रभावकारी हुन्छ, थाहा पाउनु आवश्यक छ । चक्की कहिले प्रयोग गर्ने ? तपाईँको असुरक्षित सम्पर्क भएको छ र तपाईँ गर्भवती हुन चाहनुहुन्न भने तपाईँले चाँडोभन्दा चाँडो आकस्मिक गर्भनिरोधक चक्की प्रयोग गर्नुपर्छ । सम्पर्क भएको ७२ घन्टा (तीन दिन) भित्र यो चक्की खाइसक्नुपर्छ । यी अवस्थामा महिलाले यो चक्की प्रयोग गर्न सकिन्छ १। अरू परिवार नियोजनका अस्थायी विधि र साधन असफल भएमा २। असुरक्षित सम्पर्क भएमा ३। अस्थायी साधन प्रयोग गर्न बिर्सेमा ४। बलात्कारजस्ता दुर्घटनामा परेमा चक्कीका बेफाइदाहरू यस चक्कीको प्रयोगले महिलाको स्वास्थ्यमा खासै प्रतिकूल प्रभाव पार्दैन । यो सबै महिलाले खान सक्छन् । यो खाएपछि महिलालाई वाक वाक लाग्ने, बान्ता हुने, टाउको, सानो पेट र स्तन दुख्नेजस्ता केही समस्या आएपनि ती दुईतीन दिनपछि आफैँ हराएर जान्छन् । कहिलेकाहीँ योनीबाट रगत जाने पनि हुनसक्छ । यसमा डर मान्नुपर्दैन । तर, रगत धेरै बग्यो भनेचाहिँ तुरुन्त अस्पताल गइहाल्नुपर्छ । यो चक्की खाएपछि महिनावारी अगाडि आउनसक्छ वा पछाडि जानसक्छ । आकस्मिक गर्भ निरोधक चक्की तीनदिन पछि या गर्भ रहिसकेको अवस्थामा खानुभयो भने यसले काम गर्दैन । यसलाई गर्भ निरोधका लागि नियमित प्रयोग गर्न सकिन्न र यसले यसले एचआइभी, एड्स तथा योनरोगबाट बचाउँदैन । कसैलाई यसको एलर्जी छ भने यो प्रयोग गर्नुहुँदैन । कति अवधिसम्म यो चक्की असरदायी हुन्छ ? कुनै छोटो अवधिमा धेरैपटक सम्पर्क गरेपछि पनि यो चक्कीले काम गर्छ तर चक्की लिनुभन्दा अघि सबै सम्पर्क ७२ घण्टा भित्र नै भएको हुनुपर्छ । यो चक्की खाएपछि महिनावारी नभएसम्म अरू परिवार नियोजनका अस्थायी विधि प्रयोग गर्नुपर्छ । चक्की प्रयोग गर्नुअघि स्वास्थ्य जाँच गर्नुपर्छ ? साधारणतया यो चक्की खानुअघि डाक्टरसँग जचाउनु जरुरी छैन । तर, तपाईँ कुनै गम्भीर रोगले पीडित हुनु हुन्छ, या कुनै औषधि नियमित खाइरहनुभएको छ भने गर्भनिरोधक चक्की खानुअघि डाक्टरको सल्लाह लिनु राम्रो हुन्छ । चक्कीमा के हुन्छ ? आकस्मिक गर्भ निरोधक चक्कीमा लेभोनोर्जेस्स्ट्रेल भन्ने हार्मोन हुन्छ । सम्पर्क भएको ७२ घण्टा भित्र एक चक्की खाए पुग्छ । बान्ता हुनबाट बच्न खाली पेटमा चक्की खानुहुँदैन । खाना खाएपछि खानुपर्छ या बान्ता नहुने औषधि खाएपछि खानुपर्छ । चक्की खाएको तीन घण्टाभित्र बान्ता भए अर्को एउटा चक्की खानुपर्ने हुन्छ । स्वास्थ्यखबरपत्रिकामा डा. एन्जल मगरको आलेख