बागलुङ। शिक्षा, विज्ञान तथा प्रविधिमन्त्री देवेन्द्र पौडेलले संविधानमा उल्लेख भएका प्रत्येक शब्दमा जनताको बलिदान भएको बताएका छन्। बडिगाड गाउँपालिकामा चुनावी सम्पर्क कार्यालय उद्घाटन गर्दै उनले संघीय लोकतान्त्रिक गणतन्त्र स्थापना गर्न र जनताको बलिदान भएको बताएका हुन्। केपी ओली आफ्नै दल भित्र अल्पमत परेपछि दुई दुई पटक संसद विघटन गरी संविधानले दिएको अधिकार भन्दा विपरीत गएर काम गरेकाले गठबन्धन बनाएको बताए। ‘शान्ति प्रक्रियामा होस् या, शान्ति पक्रिया पछि ल्याएको प्रणालीलाई संरक्षण गर्न लोकतान्त्रिक पक्षधर एक ढिक्का भएका हौं,’ उनले भने, ‘यो गठबन्धनलाई टुटाउन षड्यन्त्रकारी लागि परिरहेको छन्।’ यस अघिको सरकारले विदेशी कूटनीतिक क्षेत्र बिगारेको भन्दै गठबन्धनको सरकारले त्यसलाई सुधार गर्दै अर्थ प्रणालीलाई थप मजबुत बनाउने काममा लागि परेको जानकारी दिए। ‘प्रतिगमन र आर्थिक उन्नतिका लागि गठबन्धनलाई सँगै लैजानुपर्नेछ,’ उनले भने, ‘सरकार बनाउन भन्दा प्रणाली बचाउन गठबन्धन भएको हो।’ निर्वाचन क्षेत्र रणनीतिक सडकको निर्णय भई अघि बढेको बताउँदै मध्य पहाडी लोक मार्गको विकल्पको मल्म पाण्डवखानी भीमगिठे दर्लिङ, निसी हुँदै प्युठान जोड्ने सडक हुने बताए। ‘संघीय लोकतान्त्रिक व्यवस्थालाई जोगाउन बाम लोकतान्त्रिक शक्तिहरूको एक ठाउँमा उभिएका छौं,’ उनले भने, ‘देशी विदेशी शक्तिहरू गठबन्धनलाई भत्काउन विभिन्न तरिकाले लागे तर विफल भएको छ।’ जनताको मतसँगै विकाश र समृद्धि जोडिएको भन्दै बागलुङको विकाशका लागि जीवनरहेसम्म लागिरहने प्रतिबद्धता व्यक्त गरे। बागलुङ जिल्ला सुरुङ मार्गको युगमा प्रवेश गरेको बताउँदै अहिले नै सम्भाव्यता अध्ययनका लागि सरकारले बजेट छुटाएको बताए। प्रदेशसभा सदस्यका उम्मेदवार जीतबहादुर शेरचनले तत्कालीन प्रधानमन्त्री केपी ओलीले दुई दुई पटक संविधानलाई च्यात्ने काम गरेकाले त्यसको रक्षाका लागि गठबन्धन भएको बताए।

काठमाडौं । स्वास्थ्यमा समस्या देखिएपछि राष्ट्रपति विद्यादेवी भण्डारी त्रिवि शिक्षण अस्पताल, महाराजगञ्जमा भर्ना भएकी छन् । शुक्रबारदेखि स्वास्थ्यमा समस्या आएपछि अस्पताल भर्ना भएको उनका स्वकीय सचिव भेषराज अधिकारीले जानकारी दिए । ‘रुघा खोकी र ज्वरो आएपछि अस्पताल भर्ना हुनु भएको हो,’ उनले भने ।

लखनउ, भारतकाे उत्तर प्रदेश भदाेहीमा आइतबार साँझ भएकाे भीषण दुर्घटनामा साठी जना भन्दा बढी पाेलीएका छन् । नवरात्रीका अवसरमा आयाेजना गरिएकाे दुर्गा पंडालमा आगलागी भएपछि दुर्घटनामा दुई जनाकाे निधन समेत भएकाे छ । मृतकहरुमा एकजना महिला र बालक रहेका छन् । घाइतेहरुमध्ये ३३ जनाकाे अवस्था गम्भीर रहेकाे छ । दुर्घटनाका समयमा करिब डेढ सय जना पंडालमा रहेकाे बताइन्छ। प्रहरिका अनुसार, आरतीकाे क्रममा आगलागी भएकाे थियाे ।

काठमाडौं । जन उभोक्ता मन्च नेपालले चार्ड पर्वहरूको अवसर पारेर हुने कालो बजारी, ठगी देखि लिएर यातायातमा मनपरी भाडा असुली, खाध्य वस्तुमा मिसावट लगायतका कार्यहरु गर्न नदिन संबन्धित पक्षलाई आग्रह गरेको छ । साथै, मंचले एक विज्ञप्ति जारी गर्दै आम उपभोक्ताहरुलाई पनि चनाखो र सचेत हुन आग्रह गर्नुकासाथै नेपालीहरूको महान चार्ड (२०७९)वडा दशै, दिपावली, छट लोसार , नेपाल संवत लगायतका पर्वहरुको शुभकामना व्यक्त गरेको छ ।

काठमाडौं । एसिया रग्बीको आयोजनामा हुन गई रहेको एसिया रग्बी सेभेन्स ट्रफी २०२२ (एआरएसडी)मा सहभागी नेपाली टोलीको दोस्रो चरणको छनोट सकिएको छ । नेपालको यो चौथो पटकको सहभागिता हो । दोस्रो चरणमा छनोट हुने खेलाडीमा एलिसा थापा, सृजना राई, सावित्री पुर्जा, मनीषा थापा मगर, सबिना महर्जन, मञ्चमाया श्रेष्ठ, नानी तामाङ र सुजिना गुरुङ छन् । यसैगरी, अपना पौडेल, सञ्चिता बमजन, प्रतीक्षा वाग्ले, पुनम भुजेल, अप्सरा कार्की, विशाखा राई र सुषमा थापा पनि छनोट भए । यसैगरी, शर्मिला राई, विनीता शाही र अस्मिता बस्नेत पनि छनोट भएका छन् । इन्डोनेसियाको जकार्तामा ६ र ७ अगस्टमा हुने प्रतियोगितामा सहभागी जनाउने टोलीको बन्द प्रशिक्षण अहिले काठमाडौँमा भई रहेको छ । नेपालले महिला स्पर्धामा मात्र सहभागिता जनाउँदै छ । बन्द प्रशिक्षणमा रहेका ३५ खेलाडीबाट दोस्रो चरणमा १८ खेलाडीको छनोट भएको हो । नेपाली पुरुष रग्बी टोलीले भने भर्खरै बङ्गलादेशमा भएको वङ्गबन्धु बङ्गलादेश नेपाल अन्तर्राष्ट्रिय रग्बी सिरिजमा सहभागिता जनाएको थियो । उक्त बन्द प्रशिक्षणमा टङ्क राज गिरि र विनोद तामाङले प्रशिक्षण दिई रहेका छन् ।  

काठमाडौं । नेकपा माओवादी केन्द्रका अध्यक्ष प्रचण्डले सबै राजनीतिक दलका नेताहरु सबै पार्टी र नेताहरु उस्तै हुन भन्ने न्यारेटिभ बनाउँन खोज्नु गलत भएको बताएका छन्।परिर्वतन चाहाने र नचाहनेबीचको संर्घष भैरहने बताउँदै आफुहरु परिर्वतन र विज्ञानको पक्षधर रहेको बताए । अहिले पनि गणतन्त्र, संघीयता, धर्मनिरपेक्षता जस्ता परिवर्तनका संवाहकहरुलाई मन नपराउने शक्ति समाजमा रहेको बताए । जनतालाई अधिकार दिन खोज्दा भाउतो ल्याएको भनेर केहि नेताले भनेको स्मरण समेत गरे । अध्यक्ष ओलीले आवश्यकता परेमा संघीयताबारे समेत पुनर्विचार गर्न सकिने धारणा राखेका थिए । त्यसको जवाफमा अध्यक्ष प्रचण्डले ओलीको उक्त धारणा अन्ततः निरंकुश राजतन्त्रमा फर्कन चाहना सोचबाट आएको बताएका हुन् । बिहीबार ललितपुरमा आयोजित विज्ञान प्रविधिसँग सम्बन्धीत एक कार्यक्रममा बोल्दै प्रचण्डले त्यस्तो शक्तिलाई परिवर्तनकारी शक्तिले परास्त गर्ने दावी गरे । उनले लेनिले सोभियत सत्ताकै विरोध किन गर्नुपर्यौ होला भन्ने कुरा निकै मार्मिक भएको बताए । उनले आफुलाई कहिलेकाही लेनिनले आफै लडेर ल्याएको व्यवस्थाको विरोध किन गरे भन्ने महशुस भएको बताए । उनले माओवादी केन्द्रको महाधिवेसनले विज्ञान र प्रविधि र वैज्ञानिक चेतनालाई आधार बनाएर बैज्ञानिक नीति तय गरेका बताए । विज्ञान र प्रविधिको दृष्टिकोणबाट हेर्दा स्वतन्त्र भन्ने कोही पनि नहुने टिप्पणी गरेका अध्यक्ष प्रचण्डले समाजमा एउटा शक्ति अघि जाने र अर्को शक्ति पछि फर्कने हुने विश्लेषण गरे । व्यक्ति भने पनि दलहरु भने पनि यीनै दुई प्रबृतिबाट निर्देशित हुने उनको भनाई थियो । समाजमा जबरजस्ती सबै नेता उस्तै हुन् भन्ने भाष्य बनाउन खोजिएकोमा असन्तुष्टि जनाउँदै उनले भने, ‘जो जनतालाई वास्तविक रुपमा मालिक बनाउनु पर्छ भन्ने एउटा विचार र कार्यशैली भएको नेतृत्व छ, अर्को भएका परिवर्तन उल्ट्याएर अहिले पनि राजतन्त्रको पक्षमा फर्काउन खोज्ने प्रबृति छ । जो तत्व जसले जनताको अधिकार खोस्ने कुरा गर्ने तत्व छ त्यसलाई परास्त गर्न विज्ञान प्रविधिको क्षेत्रमा काम गर्नेहरुले समेत मिलेर एउटा आन्दोलन सृष्टी गर्नु जरुरी छ ।’ अध्यक्ष प्रचण्डले स्वतन्त्र भन्ने कोहि नहुँने हुँदा अगाडि बढ्ने हो कि पछाडि जाने हो भन्ने छुट्टयाउनुपर्ने बताए । समाज परिर्वतनका लागि प्रगतिशिल बिचार राख्नेहरु एक हुनुपर्नेमा जोड दिए ।

काबुल । अफगानिस्तानको राजधानी काबुलमा गएराती भएका श्रृंखलाबद्ध विष्फोटमा १६ जनाको मृत्यु भएको छ । हजरत जकारिया मस्जिद क्षेत्रमा भएको विष्फोटमा ७ जना मारिनुका साथै २२ जना घाइते भएका छन् । काबुल प्रहरीका कमाण्डरलाई उल्लेख गर्दै भास्करले जनाए अनुसार, श्रद्द्दालुहरु मस्जिदभित्र भएको बेला विष्फोट भएको थियो । लगत्तै मस्जिदको केही टाढा एएटा मिनी भ्यानमा तीनवटा विष्फोट हुँदा नौ जना यात्रुको मृत्यु भएको छ ।

काठमाडौँ । उपल्लो डोल्पामा लेक लागेर एक जना म्यादी प्रहरीको मृत्यु भएको छ । मृत्यु हुनेमा ठूलीभेरी नगरपालिका–७ का २४ वर्षीय सुनिल विक रहेको डोल्पाका प्रमुख जिल्ला अधिकारी वेदनिधि अधिकारीले जानकारी दिनुभयो । उपल्लो डोल्पाको शे–फोक्सुण्डो गाउँपालिकाको शे गाउँमा लेक लागेर उनको मृत्यु भएको अधिकारीले बताउनुभयो । उहाँका अनुसार विकको लेक लागेर मृत्यु भएको हो । मृतकको शव हेलिकप्टरबाट सदरमुकाम दुनै ल्याउने तयारी भइरहेको छ ।

दैलेख । नेकपा (माओवादी केन्द्र) दैलेख महाबु गाउँपालिकाले वडा नम्बर–४ को अध्यक्षको उम्मेदबारको रुपमा विद्यार्थी नेता सुरेन्द्र शाहीलाई एकल रुपमा सिफारिस गरेको छ । अखिल(क्रान्तिकारी) आरआर क्याम्पस कमिटीको सचिवको रुपमा विद्यार्थी राजनीतिमा सक्रिय शाही त्यस वडाका युवा विद्यार्थीबीच लोकप्रिय छन् । उनी विगत ६ वर्ष देखि आर.आर. क्याम्पसमा सकृय रुपमा विद्यार्थी राजनीति गर्दै आएका छन्। उनको पार्टी संगठनमा लगाव, आन्दोलन प्रतिको आस्था एवं कृयाशिलता अनुकरणीय भएको उनका सहकर्मीहरु बताउछन् । “उहाँ जत्तिको युवालाई वार्ड पार्टीले विश्वास गरेर उम्मेबार बनाएछ । यस्तो कदम विद्यार्थी राजनीतिमा लाग्ने युवा विद्यार्थीको लागि गर्वको कुरा हुन्छ। पार्टीले उहाँलाई चिनेको छ, हामीलाई विस्वास छ जनताले पनि उहाँ लाई अनुमोदित गर्ने छन्। हामी उहाँलाई शुभकामना व्यक्त गर्न चाहान्छौं । ” शाहीका समकक्षी एवं अखिल (क्रान्तिकारी), आर.आर. क्याम्पस कमिटी अध्यक्ष शिशिर वश्यालले भने । सुरेन्द्र बहादुर शाही कालिका युवा एकता क्लब, महाबु–४, काप्रिखोला दैलेखका अध्यक्ष पनि हुन्। उनकै नेतृत्वमा गत वर्ष असोज ३१ देखि कार्तिक ३ गते सम्म प्रथम कालिका भलिबल तथा संस्कृतिक कार्यक्रम–२०७८ गरेका थिए । राजनीति र समाजसेवा मार्फत स्थानीय क्षेत्रको विकासमा लागेको भन्दै शाहीले चुनावमा पार्टीले आफुलाई अगाडि सारे पनि गठबन्धनको निर्णयले जसलाई उम्मेदबार बनाउछ त्यसलाई सबै सहयो गरेर प्रतिगमन विरुद्ध एकजुट हुनुपर्ने बताए । उनले आफ्नो उम्मेदबारी सिफारिससँगै चुनावी प्रतिबद्धता जनाएका छन् । यस्ता छन् शाहीका चुनावी प्रतिबद्धता १.प्रदेश स्तरिय खेल संचालन गर्ने र राष्ट्रिय स्तरको खेलाडी उत्पादन मा जोड दिने। २. वडा नम्बर ४ मा पर्ने गैदाबाज मा.बिमा न्युनतम एउटा प्राविधिक शिक्षा ल्याउने। ३.भ्रष्टाचार मुक्त प्रशासन सहितको सुशासन कायम गर्ने। ४.निशुल्क शिक्षा र स्वास्थ सुविधायुक्त वडा निर्माण गर्ने। ५. आन्तरिक उत्पादनमा जोड दिदै स्थानीय युवाका लागि रोजगारी सिर्जना गर्ने। ६. कृषिको आधुनिकिकरण गर्दै कृषकको आयमा वृद्धि गर्ने। ७. महिला तथा अन्य उत्पीडित समुदायको लागि विशेष आर्थिक कार्यक्रम ल्याउने, उनीहरुको सशक्तीकरणमा विशेष जोड दिने।

काठमाडौं । एएफसी फुटसल एसियन कप छनोटको अन्तिम खेलमा नेपालले आज मंगलबार अफगानिस्तानको सामना गर्दैछ । यसअघिका दुई खेलमा पराजित भएको नेपाल आजको खेलमा सहज जित निकाल्ने योजनामा छ । किर्गिस्तानको बिश्केकस्थित गाज्पोर्म स्पोर्ट्स कप्लेक्समा नेपालले आफ्नो अन्तिम खेलमा अफगानिस्तानको सामना गर्न लागेको हो । खेल नेपाली समय अनुसार १ः४५ बजे सुरु हुनेछ । अफगानिस्तान र नेपाल एकै स्तरका टोली हुन् । तर, पछिल्लो समय अफगानिस्तानले प्रदर्शनलाई बलियो बनाएको छ । त्यसैले अफगानिस्तानलाई हराउन नेपाललाई सहज भने छैन । पहिलो खेलमा नेपाल उज्वेकिस्तानसँग ५–१ गोल अन्तरले पराजित भएको थियो । दोस्रो खेलमा नेपाल ताजिकिस्तानसँग ११–१ ले स्तब्ध भएको थियो । छनोटको सेन्ट्रल र साउथ जोन अन्तर्गत समूह ‘बी’ मा रहेको नेपाल बाहिरिसकेको छ । अफगानिस्तानलाई हराउँदै नेपाल सुखद अन्त्य गर्ने योजनामा छ ।

जनकपुरधाम । सप्तरीमा पोखरीमा डुबेर आठ वर्षीय बालकको मृत्यु भएको छ । राजगढ गाउँपालिका–४ मा रहेको सार्वजनिक पोखरीमा नुहाउने क्रममा बालकको डुबेर मृत्यु भएको जिल्ला प्रहरी कार्यालय सप्तरीले जनाएको छ । बिष्णुपुर गाउँपालिका–२२ सिमराहाका ईन्द्र देव यादवका छोरा देव राज यादव मामाघर राजगढ–४ गएका बेला नुहाउने क्रममा डुबेर घाइते भएका थिए । उनको उपचारका लागि अस्पताल लैजाने क्रममा बाटोमै मृत्यु भएको प्रहरीले जनाएको छ । बालकको शवको पोस्टमार्टम गरी परिवारलाई जिम्मा लगाइएको र घटना सम्बन्धमा थप अनुसन्धान भइरहेको जिल्ला प्रहरी कार्यालय सप्तरीले जनाएको छ ।

काठमाडौं। अर्थमन्त्री जर्नादन शर्मा प्रभाकरले नेपालको अर्थतन्त्र श्रीलंकाको जस्तो धरासयी नहुने प्रस्ट पारेका छन्। शुक्रबार नेपाल राष्ट्र बैंकले राजधानीमा आयोजना गरेको कार्यक्रममा बोल्दै अर्थमन्त्री शर्माले नेपालको अर्थतन्त्र तुलनात्मक रुपले आन्तरिक रूपमा बलियो, उत्पादन र राजस्व प्रणालीमा सुदृढ तथा ऋणको ठूलो चाप नरहेकाले श्रीलंका जस्तो नेपालको अर्थतन्त्र हुने कुरामा कुनै सत्यता नरहेको बताए। ‘अहिलेको अर्थतन्त्रमा समस्या आउला की भनेर चिन्ता गर्नेहरूलाई धेरै धन्यवाद दिनुपर्छ। किनभने यस्तो चिन्ता र सुझावले सरकारसँगै सबै सरोकारवालाई सतर्क बनाइरहेको छ’ उनले भने, ‘कतिपयलाई भने नेपालको अर्थतन्त्र श्रीलंका जस्तो बनाउने रहर छ, तिनको सपना पुरा हुँदैन।’ नेपाल र श्रीलंकाबीच तुलनै नहुने भएकाले अर्थतन्त्र श्रीलंका जस्तो नहुने उनको भनाई थियो। ‘हाम्रो ऋण र उत्पादनको अवस्था, विदेशी लगानी, ऋण सहायता लगायतका तथ्याङ्क हेर्यौँ भने श्रीलंकासँग तुलना नै हुन सक्दैन। तुलना हुनै नसक्ने विषयलाई लिएर एक थरीले जनतालाई जुन हिसाबले आतंकित बनाउने काम गरिरहेका छन्। त्यसको तपाई हामी सबै मिलेर खण्डन गर्नुपर्छ’ उनले भने। श्रीलंकासँग तुलना गर्दै नेपालको अर्थतन्त्र पनि धरासयी हुन्छ भन्दै बहस गर्नेहरूलाई सकारात्मक भई दबाबमा रहेको नेपालको अर्थतन्त्र सुधारका विषयमा चिन्तन गर्न उनले अपिल गरेका हुन्। ‘हाम्रा प्राथमिकता, लिनुपर्ने नीति, आवश्यकतालगायतका विषयमा बहस गरेर दबाबमा रहेको हाम्रो अर्थतन्त्रलाई माथि उठाउनका लागि बहस गरौँ’ उनले भने। क्रिप्टोकरेन्सी, हाइपर फण्डलगाायतका कारण नेपालबाट ‘क्यापिटल फ्लाई’ भइरहेको सूचना आफूले ५ महिनाअघि नै थाहा पाएर राष्ट्र बैंकलाई जानकारी गराएको पनि उनले बताए। तर, यो समस्या समाधान गर्न उचित कदम चाल्न नसक्दा अहिले अवैध रूपमा पैसा बाहिरिन थालेको उनको भनाई थियो। ‘प्रविधिको विकासबाट आउने चुनौतीबाट त्रसित हुने होइन। यसको दुरुपयोग हुन नदिने गरी हामीले कदम चाल्नुपर्नेमा ध्यान दिनुपर्छ’ उनले भने। अर्थतन्त्र यति बेला दबाबमा रहेको बताउँदै उनले सबै क्षेत्रबाट सहयोग लिएर सुधार गर्नुपर्ने खाँचो रहेको बताए। काम गर्ने परम्परागत शैली लाई परिवर्तन गरेर मात्रै अर्थतन्त्रमा सुधार ल्याउन सक्ने उनको भनाइ थियो। मुलुक भित्र भएका स्रोत साधनको अधिकतम उपयोग गर्नुपर्ने, मुलुक भित्रै उत्पादनजन्य गतिविधि तथा ठूला पूर्वाधारको निर्माण थालेर रोजगारी सृजना गर्नुपर्ने र निर्यात वृद्धिको पहल गर्नुपर्ने चुनौती रहेको बताए। वैदेशिक रोजगारीमा जाने नेपालीबाट रेमिट्यान्स प्राप्त गरेपछि उनीहरूलाई पनि विभिन्न सहुलियत दिनुपर्ने विषयमा सरकारले आवश्यक गृहकार्य अघि बढाएको उनले जानकारी दिएका थिए। कोभिड(१९ का कारण सुस्ताएको पर्यटन क्षेत्रलाई वृद्धि गर्न सरकारले विशेष पहल थालेको उनको भनाइ छ।

काठमाडौं । नेकपा (क्रान्तिकारी माओवादी)बाट विद्रोह गरी बनेको संयुक्त समाजवादी मोर्चा नेकपा एकीकृत समाजवादी (एस)मा समाहित भएको छ । नेकपा(क्रान्तिकारी माओवादी)परित्याग गरी सो पार्टी निकट विद्यार्थी संगठन अखिल (क्रान्तिकारी) का पूर्व केन्द्रीय अध्यक्ष तथा देशभक्त जनगणतान्त्रिक मोर्चाका केन्द्रीय सदस्य सेवन्तराज भण्डारीको नेतृत्वमा गठन भएको संयुक्त समाजवादी मोर्चा नेकपा (एस) मा समाहित भएको हो । आज नेकपा (एस)को केन्द्रीय कार्यालयमा आयोजित पार्टी प्रवेश कार्यक्रममा महासचिव बेदुराम भुसालले मोर्चाका अध्यक्ष भण्डारीसहित दर्जनौलाई एकीकृत समाजवादीमा प्रवेश गराएका हुन् । मोर्चाका अध्यक्ष भण्डारीले आफूहरुको तत्कालित पार्टीले निर्वाचनलाई बहिष्कार, उपयोग र फेरि बहिष्कारको नीति लिएर यथास्थिति गोलचक्करमा फसेकाले सो पार्टी परित्याग गरी संयुक्त समाजवादी मोर्चा गठन गरिएकोमा एकीकृत समाजवादीसँग आफूहरु सिद्धान्त मिलेकाले प्रवेश गरेको बताए ।

काठमाडौं । नेकपा एकीकृत समाजवादीका अध्यक्ष माधव नेपालले प्रधानमन्त्री ओलीले प्रतिगमनलाई संस्थागत गर्न गम्भीर षडयन्त्र गरेको खुलासा गरेका छन् । नेपालले बालुवाटारस्थित प्रधानमन्त्री निवासमा बनाईएको बंकरभित्र बसेर तत्कालिन प्रधानमन्त्री केपी ओलीले राष्ट्रपति र प्रधानसेनापतिसँग गोप्य वार्ता गरेको आरोप लगाएका हुन । बालुवाटारमा तत्कालीन प्रधानन्यायाधीश चोलेन्द्रशम्शेर राणासँग पनि भेटेर सेटिङमा संसद विघटन गरिएको नेपालको भनाई थियो । पार्टी निकट पत्रकारहरुलाई काठमाडौंमा सम्बोधन गर्दै नेपालले प्रधानसेनापति र राष्ट्रपतिसँग धेरै गोप्य बैठक गर्दै ओलीले मुलुकलाई बंगलादेश मोडलमा लैजान चाहेको आरोप समेत लगाए । तत्कालीन प्रधानन्यायाधीश राणासँग स्थानीय चुनावमा कुन न्यायाधीश र कुन प्रहरीलाई कहाँ खटाउने भन्नेसम्मको गृहकार्य गरेको नेपालले खुलासा गरे ।

काठमाडौं । यातायात व्यवस्था विभाग, काठमाडौंले चालक अनुमति पत्र (लाइसेन्स) परीक्षाका लागि आवेदन दिएको एक हप्ताभित्र परीक्षा हुने व्यवस्था गर्ने तयारी गरेको बताएको छ । अहिले परेको आवेदनको परीक्षा लिइसकेपछि यस्तो व्यवस्था सुरु गरिने विभागको भनाई छ । आवेदन दिनेको चाप अत्यधिक भएको भन्दै विभागले केही दिनअघि सूचना प्रकाशित गरेर अनिश्चितकालका लागि आवेदन प्रणाली बन्द गरेको थियो । विभागका अनुसार हाल लाइसेन्सका लागि पाँच लाख ७२ हजारको आवेदन परेको छ। परेको आवेदन आगामी जेठ १६ गतेभित्र सक्ने गरी लागेको विभागले जनाएको छ । परीक्षा कोटा बढाउने तीन सिफ्टमा परीक्षा सञ्चालन गर्ने तयारी विभागको छ। विभागको सूचना प्रविधि शाखाले बिहान, दिउँसो बेलुका गरी तीन सिफ्ट गरेर देशैभरका यातायात कार्यालयहरूबाट परीक्षा लिइने कार्यतालिका तयार गरिरहेको विभाग बताउछ ।   अबको लाइसेन्स आवेदन प्रणाली खुला भएपछि आवेदन दिएकै हप्ताभित्र परीक्षा दिन पाउने गरी व्यवस्था गरिने भएको हो ।   हाल आवेदन दिएर परीक्षाका लागि वर्षौं कुर्नुपर्ने बाध्यता छ। कोभिड महामारीका कारण लामो समय परीक्षा रोकिँदा पछिल्लो समय अत्यधिक चाँप देखिएको छ। विभिन्न कार्यालयमार्फत यसअघि फारम भरेकाहरूको पालो आउन झन्डै दुई वर्ष कुर्नुपर्ने अवस्था देखिएपछि विभागले यस्तो व्यवस्था गर्न लागेको हो । यो जम्मा भएको चाँप सकेर थोरै–थोरै आवेदन लिने र परीक्षा पनि लिइहाल्ने व्यवस्था मिलाउने विभागको योजना छ। देशभर २३ यातायात कार्यालय छन्। यी कार्यालयमध्ये पनि अध्यधिक चाप काठमाडौं उपत्यकाका कार्यालयहरूमा छ। उपत्यकाका यातायात कार्यालयले दैनिक पाँच सयदेखि एक हजारसम्मको परीक्षा सञ्चालन गर्दै आएको बताएका छन्। परीक्षा उत्तीर्ण गरेकाले पनि लामो समयदेखि स्मार्ट लाइसेन्स पाउन सकेका छैनन्। नवीकरण गर्नेहरू पनि पर्खाइमा छन्। विभागले दैनिक ६ हजार यस्तो कार्ड छापिरहेको जानकारी दिएको छ। गत मंसिरमा आएको १४ लाख नयाँ कार्डमा अब साढे दुई लाख छाप्न बाँकी रहेको विभागले बताएको छ। यसअघि स्मार्ट कार्ड अभावमा विभागले कारण छपाइ र वितरण पनि लामो समय बन्द गरेको थियो। गत मंसिरमा फ्रान्सको सेल्प कम्पनीले ठेक्का सम्झौताअनुसार १४ लाख स्मार्ट कार्ड उपलब्ध गराएसँगै २०७७ फागुनदेखि ठप्प लाइसेन्सको छपाइ पुसदेखि सुरू भएको हो। त्योभन्दा अगाडिको समयमा विदेश जानुपर्ने तथा अत्यावश्यक सेवाग्राहीलाई मात्रै लाइसेन्स उपलब्ध गराउँदै आएको थियो। कार्ड आपूर्तिमा लापरबाही र ढिलाइ हुँदा लाइसेन्स परीक्षा नै हुन सकेको थिएन। निषेधाज्ञा समयमा लाइसेन्स छपाइ पनि रोकिएको थियो। लामो समयसम्म स्मार्ट लाइसेन्स छपाइ बन्द हुँदा अहिले लाखौं चालकहरू स्मार्ट लाइसेन्सबाट बञ्चित छन्। नवीकरण गर्नेहरूले पनि वर्ष दिनभन्दा बढी कुर्नु परेको छ। उनीहरू राजस्व तिरेको रसिदलाई लाइसेन्सका रूपमा प्रयोग गरिहेका छन् । तर पछिल्लो समय ट्रायल उत्तीर्ण भएकाहरूलाई परीक्षणकालीन लाइसेन्स दिन थालेपछि केही सहज भने भएको विभागको भनाई छ। स्मार्ट लाइसेन्स छपाइमा भएको ढिलाइका कारण लाइसेन्स लिन सेवाग्राही वर्ष दिन कुर्नुपर्ने बाध्यताको विकल्पमा विभागले अस्थायी रूपमा एक वर्ष अवधिको परीक्षणकालीन लाइसेन्स दिन सुरू गरेको हो। यस्तो लाइसेन्स ट्रायल पास भएर राजश्व बुझाएकै दिन एक वर्षको म्याद राखेर वितरण भइरहेको छ। अस्थायी कार्ड वितरण सुरू भएसँगै पछिल्लो समय खरिद गरेको १४ लाख कार्डले अझै केही समय थेग्ने विश्वास विभागको छ। अस्थायी कार्डलाई विभागले एक वर्षको मान्यता दिएको छ। एक वर्षसम्म पाँच पटकसम्म ट्राफिक नियम उल्लंघन गरी कारबाहीमा परे यो कार्ड खारेज हुनेछ। पाँच पटकसम्म कारबाहीमा नपरे मात्रै चालकले एक वर्षपछि स्मार्ट लाइसेन्स पाउने छन्। यस्तो कार्ड प्रतिगोटा छपाइमा पचास रूपैयाँ मात्र खर्च लाग्ने विभागका महानिर्देशक नमराज घिमिरेको भनाइ छ। उनका अनुसार विभागले यस्तो कार्ड हाल निःशुल्क दिएको छ।