निशानामा ‘बादल’: यसरी हुँदैछ सुनियोजित दुष्प्रचार
एभरेष्ट टिप्पणी, ‘बादल’ अर्थात् नेपालको ‘माओवादी स्कूल अफ थाउट’भित्र एउटा विशिष्ट पहिचान बोकेका व्यक्तित्व । जनयुद्दकालदेखि संविधान सभामार्फत संविधान निर्माण, माओवादीको फूट र जुटका बिभिन्न कालखण्डमा क्रान्तिकारी माक्र्सवादका पक्षमा उभिएका नेता । अझ स्वभावका हिसाबले चर्चा नखोज्ने, मिडियाबाजी नरुचाउने र आफ्नो अडानमा हिँडने भनेर चिनिएका मान्छे ।
अहिले यिनै बादल अर्थात् राम बहादुर थापा नेपाल कम्युनिष्ट पार्टी (नेकपा)को सरकारमा गृहमन्त्री छन् । नेकपाको सचिवालयमा छन् र पार्टीभित्र प्रचण्डको निकट सहयोगीका रुपमा चिनिदै आएका पनि छन् ।
र, नेकपाको सरकार गठन भएपछि र अहिले दोश्रो बजेट ल्याएको अवस्थासम्म यिनै बादलमाथि बिभिन्न समयमा बिभिन्न किसिमले प्रहार हुँदै आएको देखिन्छ । सरकारमा सहभागी हुँदा सिण्डिकेटलगायतका विषयमा अडान लिएदेखि निर्मला हत्याकाण्ड र अन्य कतिपय निर्णयमा उनको उछित्तो नै काढियो । मिडियादेखि एउटा तप्का नै उनको बिरोधमा लाग्यो । क्रियाको तत्काल प्रतिक्रिया दिने उनको बानी नभएर होला, यी सबै आलोचनामा उनी प्रत्यालोचनामा उत्रिएनन् । उनलाई चिन्ने भन्छन– समयलाई पर्खिने र परिणामले तथ्य पुष्टि गर्ने स्वभाव छ बादलको । त्यसैले हत्तपत्ति उनी प्रतिक्रिया दिँदैनन आफूमाथि चुलिने आलोचनाको ।
पछिल्लो चरणमा भने बादलका बारेमा देशव्यापीरुपमा एउटा नयाँ प्रचार शुरु भएको छ । यो प्रचार गृह मन्त्रालयको काम कारवाही या कामको प्रभावकारिताका बारेमा छैन । अहिले निर्मला पन्तदेखि सिण्डिकेटका मुद्दा या प्रहरी प्रशासनको संरचना लगायतका विषय जोडेर उनको आलोचना भएको छैन । बरु, आलोचनाको केन्द्र नेकपाभित्र बादलको स्थानबारे छ । मिडियादेखि सामाजिक सञ्जालमा बादलले ‘क्याम्प परिवर्तन गरेको’ एउटा हल्ला फैलाइएको छ । यो हल्लामा नेकपाका कार्यकर्ता समेत रुमल्लिएका छन् । राजनीतिलाई माथिल्लो आवरणमा बुझ्नेहरुका लागि ‘बादल कमरेडले कित्ता परिवर्तन गरेछन् नि’ या ‘प्रचण्डको साथ छोडेछन नि’ भन्ने किसिमका चर्चाहरु महत्वका बनेका छन् ।
कित्ता परिवर्तनको वैचारिक आयाम के हो त ?
राम बहादुर थापा अहिले गृहमन्त्री हुन । नेपालको संसदीय व्यवस्थाको विशेषता अनुसार, हरेक मन्त्री प्रधानमन्त्रीप्रति उत्तरदायी हुन्छन् । यो हिसाबले उनी प्रधानमन्त्री केपी ओलीको निर्देशन मान्नुपर्ने प्रणालीमा आबद्ध छन् । यो प्रणालीमा मन्त्रीको भूमिका गौण हुन्छ, क्याबिनेटमा प्रधानमन्त्री प्रमुख हुन्छन् । नीति कार्यक्रमदेखि मन्त्रालयका कतिपय आन्तरिक विषयहरुमा समेत प्रधानमन्त्रीले सोझै नियन्त्रण या नियमन, निर्देशन दिन सक्छन् । त्यसैले संसदीय प्रणालीगत हिसाबले गृहमन्त्री प्रधानमन्त्रीप्रति उत्तरदायी हुनुपर्ने हुन्छ । र, यो उनका लागि मात्रै नभएर हरेक मन्त्रीका लागि सत्य हो । विगतमा नेपाली कांग्रेससँग माओवादीको सरकार हुँदासमेत नेपाली कांग्रेसका मन्त्रीहरु प्रचण्डप्रति उत्तरदायी हुन्थे । त्यो आधारमा कुनै मन्त्रीले कित्ता या क्याम्प परिवर्तन गरेको मान्नु केटाकेटी बहस मात्रै हो ।
कित्ताले वैचारिक ध्रुवलाई परिभाषित गर्दछ । कार्यगत हिसाबले सरकारबाहिर गृहमन्त्री नेकपाका सचिवालय सदस्य हुन । नेपाल कम्युनिष्ट पार्टी (नेकपा) वैचारिक हिसाबले दुई फरक राजनीतिक विचारधाराको सम्मिश्रण हो । विश्व कम्युनिष्ट आन्दोलनमा पचासको दशकदेखि नै विकास हुँदै आएका दुई फरक स्कूल अफ थाउटमा गृहमन्त्री माओवादी स्कूलबाट विकास भएर आएका हुन । माओवादीको फूट हुँदा तत्कालिन प्रचण्डले नेतृत्वको गरेको माओवादीलाई समेत संशोधनवादी भन्दै विरोध गर्ने बादल अहिले प्रचण्डसँग एकतापछि एमालेसँग एकीकरणपछिको नेकपाभित्रका प्रभावशाली व्यक्ति हुन । त्यसअर्थमा हेर्दा, गृहमन्त्रीका बारेमा क्याम्प परिवर्तन गरेको या कित्ता चेन्ज गरेको भन्नुको अर्थ उनले यही वैचारिक ध्रुव परिवर्तन गरेको मान्नुपर्ने हुन्छ ।
नेकपाभित्र कार्यदिशा या विचारको बहस सुरु भएको छैन । अहिले पार्टीले विगतमा दुबै पार्टीका तत्कालिन कार्यक्रमलाई महाधिवेशनमा बहसका लागि लगेर संश्लेषणसहित नयाँ कार्यदिशा निर्माण गर्ने तर तत्कालका लागि नेकपाको कार्यक्रम जनताको जनवाद हुनेकुरामा सहमति गरेको छ । यो हिसाबले त्यो प्रकारको बहस सुरु नभईकन अनुमान र कोरा तर्कका आधारमा बादलले क्याम्प परिवर्तनको हल्ला गर्नु उनीमाथिको सुनियोजित षडयन्त्र बाहेक अरु केही हुन सक्दैन ।
इतिहासमा क्रान्तिकारीहरु विचारका आधारमा अरुलाई कन्भिन्स गर्ने र बिरोधीबीच खेल्ने गर्दछन् भने अवसरवादीहरुले गैर राजनीतिक प्रोपोगाण्डा या हत्कण्डा अपनाउने गर्दछन् । त्यसको शिकार राम बहादुर थापा बनेको देखिन्छ ।
नेकपाभित्र अहिले यथास्थितिवादी या अर्कोअर्थमा पूँजिवादी र अग्रगामी अर्थात् समाजवादी कित्ताको ध्रुवीकरणको प्रक्रिया आरम्भ भएको संकेत देखा परेका छन् । पछिल्लो चरणमा विगतमा भएको सहमतिविपरित जनताको जनवादको पक्षमा उभिनुको साटो केही नेताहरुले इतिहासतर्फ मुख फेरेका छन् । इतिहासतर्फ फर्किनु भनेको नयाँ गतिको निषेध हो । नयाँ प्रक्रियाको बिरोध हो । यथास्थितिवादको पक्षधरता हो । र, यो कोशिसमा उनीहरुले अग्रगामी या समाजवादी क्रान्तिको रणनीतिक कार्यदिशाको पक्षमा रहेकाहरुबीच फूट, वैमनस्य र अविश्वास सिर्जना गर्ने कोशिस गर्नु नौलो परिघटना होइन । स्पष्टरुपमा हेर्दा, अहिले पूर्व एमालेभित्र ठूलो समूह समाजवादतर्फ सचेत धक्का दिँदै अघि बढनुपर्ने कार्यक्रमको पक्षमा छ । यो ठूलो प्रभावशाली समूहले विगतका कार्यक्रमहरुको समीक्षासहित नयाँ परिस्थितिमा समाजवादी कार्यक्रमको पक्षपोषण गर्दछ । यता माओवादी स्कूलबाट आएकाहरुका लागि त समाजवाद न्यूनतम र अनिवार्य कार्यक्रम नै हो । त्यसैले जो जे र जसले यथास्थितिवादी या सम्झौतावादी या पूँजिवादी कार्यक्रमको पक्षपोषण गर्दछन्, वर्तमान संसदीय व्यवस्थालाई नै साध्य मान्ने गर्दछन्, उनीहरुले निश्चय पनि समाजवादी धारभित्र खेल्न खोज्छन् । इतिहासमा क्रान्तिकारीहरु विचारका आधारमा अरुलाई कन्भिन्स गर्ने र बिरोधीबीच खेल्ने गर्दछन् भने अवसरवादीहरुले गैर राजनीतिक प्रोपोगाण्डा या हत्कण्डा अपनाउने गर्दछन् । त्यसको शिकार राम बहादुर थापा बनेको देखिन्छ ।
इतिहासले उनी प्रचार गरेजस्तो पूँजिवादी कित्तामा उभिन सक्ने कुनै आधार देखिन्न । बादलको प्रकृति गर्जिनु र बर्सिनु हो, पखाई मात्र सही मौसमको हो
एउटा यथार्थ र सत्य के हो भने, कार्यनीतिकरुपमा कतिपय एजेण्डाहरुमा निश्चित चरण या कालखण्डमा एउटै वैचारिक ध्रुवभित्र समेत बिभिन्न उप समूहहरु हुनु स्वभाविक हो । अझ कतिपय अवस्थामा केही निश्चित मुद्दामा फक विचारका व्यक्तिसँग समेत विचार मिल्नु पनि स्वभाविकै हुन्छ । तर रणनीतिक अर्थमा र निर्णायक वैचारिक सन्दर्भममा यी सबै कुरा स्पष्टतः ध्रुविकरण हुन्छन् । हाँस हाँसतिर र बकुल्लो बकुल्लोतिर हुनु प्रकृतिको नियम नै हो । प्रचण्ड, बादलदेखि अन्य माओवादी स्कूलबाट आएका नेताहरुको एउटा वैचारिक धुरी छ । उनीहरु कार्यक्रमगत मुद्दाहरुमा एकअर्कासँग अन्तरविरोधी विचार राख्न सक्छन्, तर निर्णायक अवस्थामा, विचारको प्रश्नमा त्यहाँ अन्तरविरोध हुँदैन । यो कुरा विश्व कम्युनिष्ट आन्दोलन र अन्य वैचारिक आन्दोलनले पुष्टि गरेको कुरा हो । त्यसअर्थमा अहिले राम बहादुर थापाका बारेमा फैलाइएका कुराहरु कोरा भ्रम र षडयन्त्रबाहेक अरु केही नभएको स्पष्ट हुन्छ ।
समस्या के हो भने रामबहादुर थापा आफै धेरै बोल्दैनन् । उनले हरेक क्रियाका तत्काल प्रतिक्रिया दिँदैनन । त्यसैले उनका बारेमा मानिसहरुलाई आँकलन गर्न र खेल्न सजिलो हुन्छ । तर समयक्रमले यस्ता तथ्यहरुका बारेमा स्वतः स्पष्टता गर्छ । यसरी हेर्दा, पार्टीभित्र विचारको बहस शुरु नहुँदासम्म गरिने यसप्रकारका हल्लाहरुमा कुनै सत्यता मान्न सकिन्न । र, यो हल्लाको गृहमन्त्रीको सचिवालयले खण्डन समेत गरेको छ ।
अर्कोतर्फ गृहमन्त्रीको इतिहास हेर्ने हो भने विगतमा जनयुद्द शुरुगर्दादेखि नेकपाको घोषणासम्म उनले क्रान्तिकारी रुपान्तरणका पक्षमा नै आफूलाई उभ्याएका छन् । पद, प्रतिष्ठा र व्यक्तिगत लाभभन्दा माथि उठेर राजनीतिलाई आफ्नो निष्ठा बनाएका छन् । उनको यही इतिहासले उनी प्रचार गरेजस्तो पूँजिवादी कित्तामा उभिन सक्ने कुनै आधार देखिन्न । बादलको प्रकृति गर्जिनु र बर्सिनु हो, पखाई मात्र सही मौसमको हो भन्ने सबैले बुझ्नु जरुरी देखिन्छ ।
प्रधानमन्त्रीको अभिव्यक्ति गम्भीर राष्ट्रघात भएको नेकपाको ठहर
काठमाडौँ । नेपाल–भारत सीमा विवादका विषयमा प्रधानमन्त्री बालेन्द्र शाहले प्रतिनिधिसभामा व्यक्त गरेको अभिव्यक्तिप्रति नेपाली कम्युनिस्ट पार्टी (नेकपा) ले कडा आपत्ति जनाएको छ। नेकपाले सोमबार जारी गरेको प्रेस विज्ञप्तिमार्फत प्रधानमन्त्रीको भनाइलाई “गैरजिम्मेवारपूर्ण, राष्ट्रिय सार्वभौमसत्ता र भौगोलिक अखण्डतामाथिको प्रहार” भन्दै त्यसलाई गम्भीर राष्ट्रघातको संज्ञा दिएको छ। पार्टीले नेपालको ऐतिहासिक भूमि कालापानी, लिपुलेक र लिम्पियाधुराबारे राज्यको आधिकारिक अडान, ऐतिहासिक प्रमाण तथा जनभावनाविपरीत प्रधानमन्त्रीबाट आएको अभिव्यक्तिले राष्ट्रिय स्वाभिमानमाथि चोट पुर्याएको जनाएको छ। नेकपाले सीमा विवादजस्तो संवेदनशील विषयमा राज्यका कार्यकारी प्रमुखबाट तथ्य र इतिहासलाई तोडमोड गरी अभिव्यक्ति आउनु अत्यन्तै दुर्भाग्यपूर्ण भएको टिप्पणी गरेको छ। विज्ञप्तिमा भनिएको छ, “अन्तर्राष्ट्रिय सीमामा हुने जमिन अतिक्रमण र सीमा क्षेत्रमा हुने जग्गाको भोगचलन वा अदलबदल दुई फरक विषय हुन्। कुनै पनि देशले अर्को देशको स्वामित्वमा रहेको भू–भागमा आपसी सहमति वा कानुनी अधिकारबिना अनधिकृत रूपमा भौतिक कब्जा जमाउने, संरचना निर्माण गर्ने वा सीमा विस्तार गर्ने कार्यलाई अतिक्रमण भनिन्छ। भारतले नेपालको कालापानी, लिपुलेक र लिम्पियाधुरा लगायतका क्षेत्रमा एकतर्फी रूपमा गर्दै आएको अतिक्रमणको ऐतिहासिक तथ्यलाई तोडमोड गरी नेपालले समेत भारतको जमिन कब्जा गरेको भन्नु गम्भीर राष्ट्रघात हो।” ‘सीमा विवाद होइन, अतिक्रमणको विषय’ नेकपाले भारतसँगको सम्बन्धलाई मित्रतापूर्ण र कूटनीतिक मर्यादामा आधारित बनाउनुपर्नेमा जोड दिँदै त्यसका नाममा नेपालको भूमि सम्बन्धी ऐतिहासिक सत्यलाई कमजोर पार्न नहुने बताएको छ। पार्टीका अनुसार कालापानी, लिपुलेक र लिम्पियाधुरा केवल सीमा विवादका विषय होइनन्, ती नेपालको सार्वभौमसत्ता, राष्ट्रिय अस्मिता र स्वाभिमानसँग प्रत्यक्ष जोडिएका विषय हुन्। नेकपाले सन् १८१६ को सुगौली सन्धि, त्यसपछिका नक्सा तथा विभिन्न ऐतिहासिक दस्तावेजले उक्त भूभाग नेपालकै भएको पुष्टि गर्ने दाबी गरेको छ। यस्ता प्रमाणका आधारमा नेपालका सबै राजनीतिक शक्ति, नागरिक समाज र देशभक्त जनसमुदाय एकमत हुँदै आएको अवस्थामा प्रधानमन्त्रीको अभिव्यक्ति राष्ट्रिय सहमतिविपरीत देखिएको पार्टीको भनाइ छ। राष्ट्रिय एकतामाथि आघात पुगेको दाबी नेकपाले सीमा र सार्वभौमसत्ताका विषयमा नेपाली जनताबीच विगतदेखि नै बलियो राष्ट्रिय एकता कायम रहेको उल्लेख गर्दै प्रधानमन्त्रीको भनाइले त्यो एकतालाई कमजोर बनाउने खतरा पैदा गरेको जनाएको छ। पार्टीले राष्ट्रिय हितका सवालमा सरकारको नेतृत्व गर्ने व्यक्तिबाट तथ्यपरक, जिम्मेवार र राष्ट्रहितअनुकूल अभिव्यक्ति आउनुपर्नेमा जोड दिएको छ। “नेपालको भूमि नेपालको हो भन्ने विषय कुनै दल विशेषको मुद्दा होइन, यो समग्र राष्ट्रको साझा अडान हो,” विज्ञप्तिमा उल्लेख छ, “यस्तो संवेदनशील विषयमा प्रधानमन्त्रीले दिएको अभिव्यक्तिले नेपाली जनताको भावना आहत बनाएको छ।” प्रधानमन्त्रीसँग सार्वजनिक स्पष्टिकरणको माग नेकपाले प्रधानमन्त्री शाहसँग आफ्नो अभिव्यक्तिबारे सार्वजनिक रूपमा स्पष्टिकरण दिन माग गरेको छ। पार्टीले राष्ट्रिय हितविपरीत देखिने भनाइ फिर्ता लिन तथा सीमा समस्यामा नेपालको आधिकारिक अडानलाई सम्मान गर्न आग्रह गरेको छ। पार्टीका नेताहरूले सीमा सम्बन्धी विषयमा राजनीतिक दलहरूबीच मतभेद हुन सक्ने भए पनि राष्ट्रिय भूगोल र सार्वभौमसत्ताको प्रश्नमा कुनै प्रकारको सम्झौता स्वीकार्य नहुने बताएका छन्। उनीहरूले सरकारलाई कूटनीतिक माध्यमबाट भारतसँग संवाद बढाउन, तर नेपालको भूमि र राष्ट्रिय हितका विषयमा दृढतापूर्वक उभिन सुझाव दिएका छन्। ‘देशभक्त शक्तिहरू एकजुट हुनुपर्छ’ विज्ञप्तिमार्फत नेकपाले सम्पूर्ण देशभक्त, राष्ट्रवादी र प्रगतिशील शक्तिहरूलाई राष्ट्रिय स्वाभिमान र भौगोलिक अखण्डताको रक्षाका लागि एकजुट हुन पनि आह्वान गरेको छ। पार्टीले सीमा अतिक्रमणको विषयलाई सामान्य राजनीतिक बहसका रूपमा नभई राष्ट्रिय अस्तित्वसँग जोडिएको विषयका रूपमा हेर्नुपर्ने धारणा राखेको छ। नेकपाको भनाइमा नेपालको स्वतन्त्रता, सार्वभौमसत्ता र राष्ट्रिय अखण्डताको रक्षा गर्नु प्रत्येक नागरिक, राजनीतिक दल र राज्य संयन्त्रको साझा दायित्व हो। त्यसैले राष्ट्रिय हितविपरीत देखिने कुनै पनि अभिव्यक्ति वा गतिविधिप्रति खबरदारी गर्नुपर्ने आवश्यकता अझ बढेको पार्टीले जनाएको छ। राष्ट्रिय स्वाभिमानको बहस फेरि केन्द्रमा प्रधानमन्त्री शाहको अभिव्यक्तिपछि नेपालको सीमा, राष्ट्रिय स्वाभिमान र विदेश नीतिसम्बन्धी बहस पुनः राजनीतिक वृत्तमा केन्द्रित भएको छ। विशेष गरी कालापानी, लिपुलेक र लिम्पियाधुरा क्षेत्रलाई लिएर विगतदेखि कायम रहेको राष्ट्रिय सहमति र संवेदनशीलताका कारण यस विषयले व्यापक चर्चा पाएको छ। यसै सन्दर्भमा नेकपाले आफ्नो विज्ञप्तिमार्फत राष्ट्रिय स्वाभिमान, भौगोलिक अखण्डता र सार्वभौम अधिकारको पक्षमा दृढतापूर्वक उभिने प्रतिबद्धता दोहोर्याएको छ। पार्टीले नेपालको भूमि, राष्ट्रिय हित र जनभावनामाथि कुनै प्रकारको सम्झौता स्वीकार्य नहुने स्पष्ट गर्दै सरकारलाई राष्ट्रहितअनुकूल भूमिका निर्वाह गर्न आग्रह गरेको छ।
एभरेष्ट दैनिक
१८ जेठ, २०८३
निमोनियाको आशंकापछि नेपाली कम्युनिष्ट पार्टीका संयोजक प्रचण्ड अस्पताल भर्ना
काठमाडौं । पूर्वप्रधानमन्त्री तथा नेपाल कम्युनिस्ट पार्टी (नेकपा)का संयोजक पुष्पकमल दाहाल ‘प्रचण्ड’ स्वास्थ्यमा समस्या देखिएपछि अस्पताल भर्ना हुनुभएको छ। प्रचण्डको सचिवालयका अनुसार स्वास्थ्यमा असहजता महसुस भएपछि उहाँलाई आज बिहान मेडिसिटी अस्पताल लगिएको थियो। अस्पतालमा गरिएको स्वास्थ्य परीक्षणका क्रममा चिकित्सकहरूले निमोनियाको शङ्का गरेका छन्। मुख्य स्वकीय सचिव गोविन्द आचार्यले चिकित्सकहरूको सल्लाहअनुसार निमोनियाको आशङ्कामा प्रचण्डलाई मेडिसिटी अस्पतालमै भर्ना गरिएको जानकारी दिनुभयो। स्वास्थ्य अवस्था कमजोर भएका कारण प्रचण्ड शुक्रबार आयोजित गणतन्त्र दिवस समारोहमा समेत सहभागी हुनुभएको थिएन। उहाँको थप स्वास्थ्य परीक्षण तथा उपचार भइरहेको सचिवालयले जनाएको छ।
एभरेष्ट दैनिक
१६ जेठ, २०८३
गणतन्त्रको विकल्प थप समृद्ध गणतन्त्र नै हो: राष्ट्रिय सभा अध्यक्ष दाहाल
काठमाडौं । राष्ट्रिय सभाका अध्यक्ष नारायणप्रसाद दाहालले गणतन्त्र दिवस २०८३ का अवसरमा शुभकामना सन्देश जारी गर्दै सङ्घीय लोकतान्त्रिक गणतन्त्र नेपालको सुदृढीकरण, संविधानको प्रभावकारी कार्यान्वयन तथा समृद्ध समाज निर्माणमा एकताबद्ध हुन आह्वान गर्नुभएको छ। अध्यक्ष दाहालले नेपाली जनताको ऐतिहासिक सङ्घर्ष, बलिदान र त्यागबाट स्थापित सङ्घीय लोकतान्त्रिक गणतन्त्र नेपालको औपचारिक घोषणा भएको दिनलाई ऐतिहासिक उपलब्धिका रूपमा स्मरण गर्दै स्वदेश तथा विदेशमा रहेका सम्पूर्ण नेपालीमा हार्दिक शुभकामना व्यक्त गर्नुभएको हो। वि.सं. २०६५ जेठ १५ गते संविधान सभाबाट निरङ्कुश राजतन्त्रको अन्त्य गरी सङ्घीय लोकतान्त्रिक गणतन्त्र नेपालको घोषणा हुनु नेपाली जनताको सार्वभौम अधिकार, लोकतान्त्रिक आकाङ्क्षा र राजनीतिक चेतनाको महत्वपूर्ण उपलब्धि भएको उहाँले उल्लेख गर्नुभएको छ। शुभकामना सन्देशमा अध्यक्ष दाहालले विभिन्न कालखण्डका जनआन्दोलन, लोकतान्त्रिक सङ्घर्ष तथा परिवर्तनका अभियानमा जीवन उत्सर्ग गर्ने सहिदहरूप्रति श्रद्धाञ्जली व्यक्त गर्दै आन्दोलनका क्रममा घाइते, अपाङ्ग तथा पीडित भएकाहरूप्रति सम्मान प्रकट गर्नुभएको छ। उहाँले गणतन्त्र केवल शासन प्रणालीको परिवर्तन मात्र नभई नागरिक अधिकार, समावेशिता, सामाजिक न्याय, समान अवसर तथा जनसहभागितामा आधारित लोकतान्त्रिक राज्य व्यवस्थाको आधार भएको उल्लेख गर्नुभएको छ। नेपालको संविधानले परिकल्पना गरेको समृद्ध, समुन्नत र न्यायपूर्ण समाज निर्माणका लागि संविधानको प्रभावकारी कार्यान्वयन, सुशासन, पारदर्शिता तथा दिगो विकासप्रति सबै पक्षको प्रतिबद्धता आवश्यक रहेको अध्यक्ष दाहालको भनाइ छ। अध्यक्ष दाहालले गणतन्त्रको विकल्प पश्चगामी वंशीय शासन प्रणाली हुन नसक्ने उल्लेख गर्दै अझ उन्नत, समृद्ध र जनमुखी गणतन्त्रको निर्माणतर्फ अघि बढ्नुपर्नेमा जोड दिनुभएको छ। संविधानले निर्देशित गरेअनुसार समाजवादउन्मुख आत्मनिर्भर अर्थतन्त्र निर्माण तथा सुशासनसहितको राज्य सञ्चालन अहिलेको प्रमुख आवश्यकता भएको उहाँले बताउनुभएको छ। गणतन्त्र दिवसले सम्पूर्ण नेपालीबीच राष्ट्रिय एकता, आपसी सद्भाव, लोकतान्त्रिक संस्कार तथा संविधानप्रतिको विश्वासलाई थप मजबुत बनाउँदै राष्ट्र निर्माणको साझा अभियानमा प्रेरणा प्रदान गर्ने विश्वास व्यक्त गर्दै अध्यक्ष दाहालले गणतन्त्र दिवस २०८३ को शुभकामना व्यक्त गर्नुभएको छ।
एभरेष्ट दैनिक
१५ जेठ, २०८३
गणतन्त्र दिवस–२०८३: गणतन्त्रको रक्षा, सामाजिक न्याय र समृद्धिका लागि प्रचण्डद्वारा एकतामा जोड
काठमाडौं । नेपाली कम्युनिस्ट पार्टीका संयोजक पुष्पकमल दाहाल ‘प्रचण्ड’ले गणतन्त्र दिवस–२०८३ का अवसरमा शुभकामना सन्देश जारी गर्दै संघीय लोकतान्त्रिक गणतन्त्रको रक्षा, संविधानको प्रभावकारी कार्यान्वयन र सामाजिक न्यायसहितको समृद्ध नेपाल निर्माणका लागि सबै राजनीतिक शक्ति तथा नागरिकबीच एकता आवश्यक रहेको बताउनु भएकाे छ । गणतन्त्र दिवसको अवसरमा जारी शुभकामना सन्देशमा प्रचण्डले न्याय, समानता र स्वतन्त्रताका पक्षधर सम्पूर्ण नेपाली दिदीबहिनी तथा दाजुभाइहरूमा हार्दिक शुभकामना व्यक्त गर्दै नेपालको संघीय लोकतान्त्रिक गणतन्त्र नेपाली जनताको लामो संघर्ष, हजारौं सहिदहरूको बलिदान, त्याग र समर्पणबाट प्राप्त ऐतिहासिक उपलब्धि भएको उल्लेख गर्नुभएकाे छ । उहाँले संविधानले सुनिश्चित गरेको गणतान्त्रिक व्यवस्था कुनै व्यक्ति वा राजनीतिक दलको मात्र नभई परिवर्तनका आकांक्षी सम्पूर्ण नेपाली जनताको साझा उपलब्धि भएको स्पष्ट गर्दै संविधानका मूल्य, मान्यता र उपलब्धिमाथि सम्झौता गर्न नहुने बताउनु भएकाे छ । संविधानको मूल मर्मबाट पछि हट्ने वा लोकतान्त्रिक उपलब्धिलाई कमजोर पार्ने प्रयासप्रति सचेत रहन आग्रह गर्दै उहाँले परिवर्तनका उपलब्धिको रक्षा सबैको साझा जिम्मेवारी भएको उल्लेख गर्नुभएकाे छ । प्रचण्डले संविधान कार्यान्वयनका क्रममा देखिएका कमजोरी सुधार गर्दै राज्य सञ्चालन प्रक्रियामा विद्यमान परम्परागत परिपाटी तथा स्वेच्छाचारिताको अन्त्य गर्नुपर्ने आवश्यकता औँल्याउनु भएकाेएकाे छ । जनताको अधिकार, लोकतान्त्रिक मूल्य र समावेशितालाई अझ सुदृढ बनाउँदै अघि बढ्नु नै गणतन्त्रप्रतिको वास्तविक सम्मान हुने उहाँको भनाइ छ। सन्देशमा उहाँले “गणतन्त्रको विकल्प अझ समुन्नत गणतन्त्र हो” भन्ने धारणा दोहोर्याउँदै समावेशी र पूर्ण समानुपातिक व्यवस्था सुनिश्चित गर्नुपर्नेमा जोड दिनुभएकाे छ । उपेक्षित, उत्पीडित वर्ग, समुदाय तथा क्षेत्रका अधिकारलाई थप मजबुत बनाउनु आजको आवश्यकता भएको उहाँको भनाइ छ। देशलाई राजनीतिक स्थायित्व, सुशासन, सामाजिक न्याय तथा आर्थिक समृद्धितर्फ अग्रसर गराउन सबै राजनीतिक शक्ति र आम नागरिकबीच सहकार्य अपरिहार्य रहेको उल्लेख गर्दै उहाँले सामाजिक न्यायसहितको समृद्धिमार्फत समाजवादी नेपाल निर्माणलाई साझा राष्ट्रिय संकल्पका रूपमा अघि बढाउनुपर्ने बताउनु भएकाे छ। राजनीतिक मतभेद र संसदीय अंकगणित फरक भए पनि राष्ट्रिय सरोकारका विषयमा संवाद र सहकार्यको संस्कार विकास गर्नुपर्नेमा जोड दिँदै प्रचण्डले संविधान, लोकतन्त्र र गणतन्त्रको रक्षा सबैको पहिलो जिम्मेवारी भएको बताउनु भएकाे छ। उहाँले नेपाली जनताको संघर्षबाट प्राप्त उपलब्धिको संरक्षण गर्दै समृद्ध, न्यायपूर्ण र आत्मनिर्भर नेपाल निर्माणमा सबैलाई एकजुट हुन आह्वान गर्नुभएकाे छ। गणतन्त्र दिवस–२०८३ को अवसरमा जारी शुभकामना सन्देशको अन्त्यमा प्रचण्डले सम्पूर्ण नेपाली जनतामा पुनः हार्दिक शुभकामना व्यक्त गर्नुभएकाे छ।
एभरेष्ट दैनिक
१५ जेठ, २०८३
