माओवादीद्वारा नर्सहरूको आन्दोलनप्रति समर्थन, माग सम्बोधन गर्न सरकारलाई प्रचण्डकाे अनुराेध
काठमाडौं । पूर्वप्रधानमन्त्री तथा नेकपा (माओवादी केन्द्र) का संयाेजक पुष्पकमल दाहाल ‘प्रचण्ड’ले देशभरका नर्सहरूको मागप्रति ऐक्यबद्धता जनाउँदै सरकारलाई तत्काल सम्बोधन गर्न आग्रह गर्नु भएकाे छ । सामाजिक सञ्जाल फेसबुकमार्फत एक सानाे वक्तव्य जारी गर्दै अध्यक्ष प्रचण्डले नर्सहरूले भोगिरहेका तलब–पारिश्रमिकको असमानता, अस्थायी रोजगारी, सामाजिक सुरक्षाको अभाव र कार्यस्थलमा असुरक्षाजस्ता समस्याहरूलाई गम्भीर विषयका रूपमा औंल्याउनु भएकाे छ । प्रचण्डले तोकिएको तलबमानभन्दा कम पारिश्रमिकमा काम गर्नुपर्ने बाध्यता र स्टाफको अभावका कारण बढेको कार्यदबाबले नर्सहरू निराश भइरहेका बेला सरकारले जिम्मेवार ढंगले पहल गर्नुपर्ने बताउनु भएकाे छ । “नर्सहरूको सम्मान, सुरक्षाको ग्यारेन्टी र पेशागत अधिकार सुनिश्चितता नभई नेपालको जनस्वास्थ्य सेवा प्रणाली बलियो बन्न सक्दैन,” प्रचण्डले भन्नुभएकाे छ । प्रचण्डले स्वास्थ्य सेवा प्रणालीको मेरुदण्डका रूपमा रहेका नर्सहरूको पेशागत अधिकार र न्यायोचित माग पूरा गर्न सरकारलाई आग्रह गर्दै सबै पक्षले संवाद र सहकार्यको बाटोबाट समाधान खोज्नुपर्नेमा जोड दिनुभएकाे छ । प्रचण्डको भनाइअनुसार, नर्सहरूको सशक्तिकरण र सुरक्षाको प्रत्याभूति हुन सके मात्र जनताको स्वास्थ्य अधिकार प्रभावकारी रूपमा कार्यान्वयन हुन सक्छ ।
