२ नं. प्रदेशमा कांग्रेसले उम्मेदवारको नाम टुंगो लगायो
काठमाडौं, भदौं १५। प्रमुख सत्तारुढ दल नेपाली कांग्रेसले असोज २ गते हुने स्थानीय तहको तेस्रो चरणको निर्वाचनका लागि पार्टीका तर्फबाट सबै उम्मेदवारको टुंगो लगाएको छ । प्रदेश नम्बर–२ का १३६ वटै तहमा पार्टीको उम्मेदवार टुंगो लगाइएको कांग्रेसले बताएको छ । प्रधानमन्त्री एवं पार्टी सभापति राजधानीबाहिर रहेकाले उम्मेदवारको अन्तिम नामवली शुक्रबार मात्रै सार्वजनिक गरिने बताइएको छ । तेस्रो चरणको निर्वाचनमा २६ लाख ६४ हजार ९५० मतदाताका लागि स्वयंसेवकसहित ३१ हजार भन्दा बढी कर्मचारी खटिने आयोगले जनाएको छ । प्रदेश नम्बर–२ मा एक महानगरपालिका, तीन उपमहानगरपालिका, ७३ नगरपालिका र ५९ गाउँपालिका छन् ।
