क्रान्तिकारीकाे केन्द्रीय समिति विघटन : अब समाजवादी शिक्षाको रणनीति अंगाल्ने
काठमाडौं, भदौ ९ । अखिल (क्रान्तिकारी) को २१औँ एकताको राष्ट्रिय सम्मेलनको बन्द सत्र राजधानीको त्रिभुवन विश्वविद्यालयस्थित स्मृति भवनमा बन्द सत्र सुरु भएको हो । बन्दसत्रको सुरुवातसँगै अध्यक्ष नरेन्द्र न्यौपानेले ९ सय ९९ सदस्यीय जम्वो केन्द्रीय समिति भङ्ग गरेको प्रवक्ता सुरेन्द्र वस्नेतले जानकारी दिए । उक्त समिति भङ्ग भएसँगै राष्ट्रिय सम्मेलनको बन्द सत्र सञ्चालन गर्नका लागि नरेन्द्र न्यौपाने, उत्तम अधिकारी, रविकिरण यादव, राजेश्वरी सुवेदी, इन्द्र भुषाल, कविता ढुङ्गाना, राधेश्याम यादव, सपना प्रधान र धनसरा ढकालसहितको ९ सदस्यीय अध्यक्ष मण्डल गठन गरिएको पनि उनले जानकारी दिए । न्यौपानेले राखेको अध्यक्ष मण्डलको प्रस्तावलाई हलले सर्वसम्मतिले पारित गरेको पनि बस्नेतले जानकारी दिए । ‘विद्यार्थी आन्दोलनको आगामी कार्यभार’ शिर्षकमा ६० पृष्ठको प्रतिवेदन पेश गरेका न्यौपानेको प्रतिवेदनले माओवादी जनयुद्धको बेला उठाएको ‘जनवादी शिक्षाको रणनीति’ लाई वदलेर ‘समाजवादी शिक्षाको रणनीति’ लाई अंगाल्ने भएको छ । उनको प्रतिवेदनमा विद्यार्थी आन्दोलनले शिक्षा, स्वास्थ्य र रोजगार लगायतका अधिकारलाई संविधानमै मौलिक हक वनाउन सफल भएकाले अबका दिनमा त्यसलाई कार्यान्वयन गर्न सम्पूर्ण रुपमा लाग्ने कार्यभार पनि प्रस्तावको रुपमा अघि सारिएको छ । छलफलका लागि विभिन्न जिल्ला मिलाएर २१ वटा समुह वनाइएको र अलग अलग समुहगत छलफल पछि टोली नेताले हलमा साझा निष्कर्ष राख्ने कार्यक्रम रहेको पनि प्रवक्ता बस्नेतले जानकारी दिए । क्रान्तिकारीको प्रस्तावित विधान संशोधनमा ३३ सदस्यीय पदाधिकारी सहित २४३ सदस्यीय केन्द्रीय समिति रहने प्रस्ताव गरिएको छ । नयाँ विधानमा पदाधिकारीहरु हलवाट र केन्द्रीय सदस्य प्रदेशगत रुपमा निर्वाचित हुनेछन् । प्रस्तावित मस्यौदा अनुसार एक अध्यक्ष, ४ खुल्ला, ४ समावेशी र १ मनोनित सहित ९ उपाध्यक्ष , एक महासचिव ,५ उपमहासचिव १६ सचिव र एक कोषाध्यक्ष रहनेछन् । प्रस्तावित प्रतिवेदन र विधान माथि भोलि समुहगत छलफल हुने र उक्त विधान र प्रतिवेदन पारित भएपछि नेतृत्वका लागि निर्वाचन प्रकृया अघि वढ्नेछ ।
