काठमाडौं, भदौं ८ । नेकपा माओवादी केन्द्रको भातृ संगठन योङ कम्युनिष्ट लिग (वाइसीएल) नेपाल २–४ गते काठमाडौंमा सम्पन्न ‘एकताको राष्टिय सम्मेलन’का निर्णयहरु सार्वजनिक गरेको छ । बिहिवार एक विज्ञप्ति जारी गर्दै निर्णयहरु सार्वजनिक गरेको हो । वाइसीएलका अध्यक्ष रामप्रसाद सापकोटा ‘दीपशिखा’ र महासचिव सुवोधराज शेर्पालीद्वारा हस्ताक्षरित विज्ञप्तिमा भनिएको छ ‘सरकारी निकायमा हुने व्याप्त्त भ्रष्टाचार निर्मुल गर्नका लागि भ्रष्टाचारीहरुको प्रमाण संकलन गर्ने, सुचि तयार गर्ने र राज्यको सम्बन्धित निकायमा बुझाउने कामको अभियान नै छेडिनेछ । यसअघिजस्तै राज्य भ्रष्टाचारप्रति उदाशिन रहन गए या राज्यका उपल्ला निकायहरुले ढाकछोप गर्न खोजे त्यसको सशक्त प्रतिवाद गर्नुको साथै भ्रष्टाचारीहरुको सुचि समेत सार्वजनिक गरिनेछ ।’ यस्ता छन् वाईसीएलका निर्णहरु राष्टिय सम्मेलनबारे यहि भदौं २–४ सम्म काठमाडौंको जडिबुटीस्थित कोटेश्वर पार्टी प्यालेसमा सम्पन्न दोस्रो एकताको राष्ट्रिय सम्मेलनले १९९ सदस्यिय केन्द्रिय समिति निर्बाचित गर्नुको साथै २९ सदस्यिय पदाधिकारी निर्बाचित गरेको छ । सम्मेलनमा प्रस्तुत संगठनको विधान परिमार्जन तथा संगठनको नीति तथा कार्यक्रमसमेत सोही सम्मेलनले पारित गरेको आधारमा संगठनको पहिलो तथा दोस्रो बैठक तथा पदाधिकारी बैठकले गरेका निर्णयहरुको सार संक्षेप निम्न छन् । अभियानबारे संगठनले ‘संगठन सूदृढिकरण, युवा जागरण तथा परिचालन अभियान’ नामक ३ महिने अभियान संचालन गर्नेछ । यस अभियान अन्तर्गत ३ लाख भन्दा बढी सक्रिय सदस्यता नविकरण गर्ने उदेश्य राखिएको छ । साथै स्थानिय तह कमिटीदेखि प्रदेश कमिटीसम्मको भेला, सम्मेलन तथा बैठक एंव प्रशिक्षणमार्फत गठन÷पूनर्गठन लगायतका कार्यक्रम रहने छन् । साथै आउँदो स्थानीय तह, प्रादेशिक तथा केन्द्रीय चुनावका लागि ‘जसको एजेण्डा, उसैलाई भोट’ नारा अन्र्तगत चुनावी परिचालनको पूरक अभियान संचालन गरिनेछ । यस अभियानको नेतृत्व नवनिर्बाचित केन्द्रिय समितिले गर्नेछ । वाइसीएलले  निम्न सघर्षका कार्यक्रमहरु संचालन गर्ने  – सरकारी निकायमा हुने व्याप्त्त भ्रष्टाचार निर्मुल गर्नका लागि भ्रष्टाचारीहरुको प्रमाण संकलन गर्ने, सूची तयार गर्ने र राज्यको सम्बन्धित निकायमा बुझाउने कामको अभियान नै छेडिनेछ । यस अघिजस्तै राज्य भ्रष्टाचारप्रति उदाशिन रहन गए या राज्यका उपल्ला निकायहरुले ढाकछोप गर्न खोजे त्यसको सशक्त प्रतिवाद गर्नुको साथै भ्रष्टाचारीहरुको सुचि समेत सार्वजनिक गरिनेछ । – समाजमा हुने विभिन्न विकृति, विसंगति तथा समाजविरोधी गतिविधिको हाम्रो संगठनले डटेर प्रतिवाद एंव प्रतिरोध गर्नेछ । – हाम्रो संगठन जनयुद्धकालिन मुद्धाहरुलाई सत्य निरुपण आयोगमार्फत हल गरिनुपर्ने बृहत शान्ति सम्झौताको मर्मप्रति आज पनि प्रतिबद्ध छ । राजनीतिक युद्धमा भएका दूर्घटनाजन्य घटनाहरुलाई हत्या तथा अपराधसँग दाजेर दोषी ठहर्याउने रबैयाप्रति घोर आपक्ति व्यक्त गर्नुका यसो गर्दा सामाजिक बनोविज्ञानमा आउने द्वेसप्रति सचेत गराउँदछ । – युवाहरुलाई विदेश पठाउने भन्दै ठगी गर्ने केही मेनपावर कम्पनीका ठगी प्रकरण, विदेश पठाईसकेपछि गरिने श्रम शोषण तथा एउटा काम र पारिश्रमिक भन्दै अर्को गर्ने रबैया निन्दनिय मात्रै होइन अत्यन्तै गम्भिर प्रकृतिका छन् । यसबारे हाम्रो संगठनले निर्णायक कदम चाल्ने छ । सामाजिक उत्तरदायित्वबारे – हाम्रो संगठनले राजनीतिक दायित्वसँगै सामाजिक सेवा तथा उत्तरदायित्वलाई उत्तिकै महत्वका साथ हेर्नेछ । – साउनको अन्तिमतिर परेको अविरल वर्षाका कारण देशभर भएको जनधनको क्षतिलाई मध्यनजर गर्दै यसअघि नै केन्द्रिय समितिले घोषणा गरेको राहत कोषमार्फत तत्कालका लागि २ नं। प्रदेशका विभिन्न जिल्लामा राहत वितरण गर्न समेत लागिरहेको छ । – सामाजिक अभियान अन्तर्गत ७ वटै प्रदेशहरुमा स्वस्थ्य शिविर, ७५ वटै जिल्लाका अस्पतालहरु, जिल्ला प्रशासन कार्यालय, जिल्ला विकास समिति, मालपोत कार्यालयलगायतका सार्वजनिक सहकार्यका कार्यालयहरुमा स्वंयमसेवकिय भूमिका निर्वाहा गर्नेछ । – राष्टिय तथा स्थानिय पर्वहरु, उत्सव तथा महोत्सवहरु, दुर्घटना तथा प्राकृतिक विपक्तिहरुमा समेत स्वंयमसेवकहरु परिचालन गर्नका लागि टिमबद्धता, तालिम तथा प्रशिक्षणहरुको व्यवस्था गरिनेछ । युवा स्वरोजगार तथा विदेश पलायनबारे – युवाहरुको विदेश पलायनबारे हाम्रो संगठन गम्भीर छ । अत विदेश पलायन रोक्न र स्वदेशमा रोजगारीको अवस्था सृजना गर्नका लागि राष्ट्रिय उद्योगहरु संचालन गर्न हाम्रो संगठन सरकार तथा राष्टिय      पूँजिपतिहरुसँग अनुरोध गर्दछ । साथै आफैबाट सुरु गर्ने उदेश्यका साथ स्वदेशी उत्पादनको क्षेत्रमा संगठन तथा यूवा व्यवसायीको साझेदारीमा ६ महिनाभित्र १ हजारभन्दा बढी युवाहरुलाई रोजगार बनाउने घोषणा समेत गर्दछ । – स्वदेशमै रोजगारीको प्रशस्त सम्भावनालाई मध्यनजर गर्दै युवाहरुलाई विभिन्न सिपमुलक स्वदेशी तथा विदेशी तालिम र सिपविकास कार्यक्रमहरुमा संगठनले ध्यान दिनेछ । संरक्षण कोषबारे – संगठनले एकताको दोस्रो राष्ट्रिय सम्मेलनबाट १ लाख जम्मा गरी कार्यकर्ता संरक्षण कोष खडा गरेको छ भने यो कोषलाई बृद्धि गर्दै लगिने छ । यो कोषको रकमबाट आपतकालिन उद्धार, नेता कार्यकर्ताहरु दूर्घटनामा पर्दा औषधी उपचार लगायतका विषयमामात्रै खर्च गरिनेछ ।