गृहमन्त्री शर्माले भने, ‘बाढी पीडितलाई उद्धारका लागि राज्यको स्रोतले धान्न सकेन’
काठमाडौं, भदौ ९ । गृहमन्त्री जनार्दन शर्माले बाढी पहिरो र डुबान पीडितकोका लागि सरकार अहोरात्र खटिरहेको बताएका छन् । ठूलो प्राकृतिक विपत्ति आईपरेकाले त्यसलाई समयमै व्यवस्थापन गर्न राज्यको स्रोत र साधनले धान्न नसकेको पनि उनले बताए । व्यवस्थापिका संसदको सामाजिक न्याय तथा मानव अधिकार समितिको शुक्रबारको बैठकमा बोल्दै गृहमन्त्री शमाले भने, ‘पीडितहरुका लागि राहत, उद्धार र पुनर्वासको उचित व्यवस्थापनका लागि सरकारले निभाउने भुमिकामा कुनै कमी आउने छैन, सरकार अहोरात्र खटिरहेको छ ।’ बाढी, पहिरो र डुबान पीडितको उचित व्यवस्थापन गर्न सरकारले आफ्नो क्षमता अनुसार सक्दो प्रयास गरिरहेको भन्दै सबै साधन र स्रोतलाई परिचालन गरेको बताए । उनले बाढी र डुबान पीडितको उचित व्यवस्थापन गर्न सरकारले व्यापक सुरक्षाकर्मी परिचालन गरेको पनि दावी गरे । गृहमन्त्री शर्माले विपद् व्यवस्थापन गर्न सरकारले दीर्घकालीन योजना बनाउन लागेको पनि जानकारी गराए । बाढि, पहिरो र डुवान पीडितलाई राहत उपलब्ध गराउन नसकेकोभन्दै सरकारको सर्वत्र आलोचना भइरहेका छन् ।
