बादलले भने, ‘कांग्रेस–एमालेको उदेश्य नै चुनाव जित्ने र सत्तामा जाने बाहेक केही छैन’
धनगढी, भदौ १० । माओवादी केन्द्रका नेता रामबहादुर थापा बादलले नेपाली कांग्रेस र एमालेसँग कुनै पनि एजेण्डा नभएको भन्दै चुनाव जित्ने र सत्तामा जाने उद्देश्य मात्रै उनीहरुसित भएको बताएका छन् । माओवादी केन्द्र सात नम्वर प्रदेशको प्रशिक्षण कार्यक्रममा बोल्दै नेता बादलले भने, ‘स्थानीय चुनावमा बढी सिट त कांग्रेस एमालेले जिते। तर, उनीहरुलाई गर्नु केही पनि छैन। उनीहरुसँग नयाँ सोच र एजेण्डा केही पनि छैन, खाली चुनाव जित्ने र सत्तामा जाने मात्रै उद्देश्य राख्ने पार्टीबाट देशको परिवर्तन सम्भव छैन। नेता बादलले माओवादी केन्द्र तेस्रो दल हुनुमा संगठन कमजोर हुनु भएकाले त्यसलाई सच्चाउनुपर्ने बताए । उनले भने, ‘हाम्रो जनसम्बन्ध कमजोर भयो, हामी राजधानी र सदरमुकामहरुमा केन्द्रित भयौ, जनतामा झाङ्गिन सकेनौ, अब हामीले सच्चाउनुपर्छ । जनता बिना कुनै पनि लडाई जित्न सकिँदैन ।’
