पार्टी नेतृत्वप्रति बलियो साथ छ : प्रवक्ता सापकोटा
काठमाडौं । नेकपा (माओवादी केन्द्र)का उपाध्यक्ष अग्नि सापकोटाले पार्टीको स्थायी कमिटी बैठकमा अधिकांश सदस्यले अध्यक्ष पुष्पकमल दाहाल 'प्रचण्ड' को नेतृत्वप्रति सबैको बलियो साथ रहेको बताएका छन् । स्थायी समिति बैठकपछि पत्रकारहरुसँग कुराकानी गर्दै सापकोटाले नेतृत्वको बहस नै नभएको विषय चर्चामा ल्याइएको बताए । उनले भने, 'पार्टी अध्यक्षप्रति सबैको बलियो साथ छ । प्रभाकरजीले समेत अध्यक्षको प्रस्तावमा विरोध गर्नु भएको छैन ।' सापकोटाले भने, 'हिजो र आजको बैठकमा अधिकांश सदस्यले नेतृत्वको विकल्प नरहेको प्रष्ट पारेका छन्। नेतृत्वलाई थप सुदृढ र सबल बनाउनुपर्नेमा जोड दिइएको छ।' उनले बाहिरी मञ्चमा नेतृत्व परिवर्तनको कुरा उठाउँदै आएका उपमहासचिव जनार्दन शर्मा प्रभाकर ले बैठकमा भने त्यसबारे नबोलेको बताए। उनका अनुसार, शर्माले आफ्ना अभिव्यक्तिप्रति आत्मालोचना गर्नुपर्ने भनी केही स्थायी कमिटी सदस्यले आवाज उठाए पनि उनले त्यसलाई स्वीकार गरेनन्। शुक्रबारदेखि सुरु भएको माओवादी केन्द्रको स्थायी कमिटी बैठक सोमबार पनि जारी रहनेछ। शनिबार र आइतबार धेरैजसो सदस्यले आफ्ना धारणा राखिसकेका छन्। सापकोटाका अनुसार, सोमबार वरिष्ठ उपाध्यक्ष, महासचिव र अध्यक्षले आफ्ना धारणा राख्नेछन्।
