नेप्से परिसूचक भारी अंकले घट्दा लगानीकर्ताले एकै दिन ६० अर्ब ७९ करोड गुमाएका छन् । अघिल्लो कारोबार दिन १४ खर्ब २९ अर्ब रहेको लगानीकर्ताको सम्पत्ति यस दिन घटेर १३ खर्ब ६८ अर्ब पुगेको छ । यो दुई वर्षयताकै कम बजार पुँजीकरण हो । २०७२ फागुन ५ गते लगानीकर्ताको सम्पत्ति १३ अर्ब ६३ अर्ब रहेको थियो । सर्वसाधारण सेयरधनीको स्वामित्वमा रहेको सेयर बजार पुँजीकरण (फ्लोट बजार पुँजीकरण) अघिल्लो दिनको तुलनामा रू. २० अर्ब ६९ करोड घटेको छ । सोमबार नेप्सेमा सूचीकृत कम्पनीहरूको सेयर मूल्य अधिक सस्तिएको छ । यस दिनको अन्तिम बजार मूल्यका आधारमा ४४ कम्पनीको सेयर मूल्य १ सयदेखि २ सयको बीचमा रहेको छ । त्यसैगरी, २४ कम्पनीको सेयर मूल्य २ सयदेखि ३ सयको बीचमा रहेको छ । नेसनल हाइड्रोपावर कम्पनीको सेयर मूल्य भने घटेर ८७ मा अन्तिम कारोबार भएको छ । यसदिन कारोबारमा आएका एक सय ५७ कम्पनीमध्ये प्रोग्रेसिभ फाइनान्स र स्वदेशी लघुवित्त वित्तीय संस्थाको मात्र सेयर मूल्य बढेको छ । प्रोग्रेसिभ फाइनान्सका सेयरधनीहरूले यस दिन करिब १० प्रतिशत कमाएका छन् । यस दिन एक सय ४४ कम्पनीका सेयर मूल्य घटेको छ भने बाँकी ११ कम्पनीको सेयर मूल्य स्थिर रहेको छ । एनएलजी इन्स्योरेन्सको सेयर मूल्य यस दिन १० प्रतिशत घटेको छ भने अन्य १२ कम्पनीको सेयर मूल्य नौ प्रतिशतभन्दा बढी घटेको छ । सोमबार कारोबार सुरु भएको पहिलो ४० मिनेटमा नै ३ प्रतिशतले घटेपछि सर्किट ब्रेक लागेको बजार अधिकतम ५६ अंकले घटेको थियो । तर, अन्त्यमा झिनो अंकले सुधारिएपछि ५१ दशमलव ८९ अंकले घटेर १ हजार १ सय ६८ बिन्दुमा बजार बन्द भएको छ । यो २०७२ पुस २७ गतेयताकै न्यून बिन्दु हो । सोमबार इन्भेष्टर्स फोरमले पत्रकार सम्मेलन गरी आन्दोलनमा जाने बताएका छन् । बजारको दर्दनाक अवस्थामा पनि सरकार मौन रहनु र सम्बन्धित व्यक्तिले गैरजिम्मेवारपूर्ण अभिव्यक्ति दिएकोप्रति फोरमले आपत्ति जनाएको छ । सरकारले जतिसक्दो छिटो सम्झौता गरिएको अवधिभित्रै पूर्ण अनलाइन कारोबार प्रणाली लागू गर्न, ब्रोकरको संख्या तथा क्षेत्राधिकार विस्तार गरी वाणिज्य बैंकहरूलाई समेत ब्रोकर लाइसेन्स दिनुपर्ने, गैरआवासीय नेपालीलाई पुँजी बजारमा प्रवेश गराउन आवश्यक कानुन निर्माण गर्न, धितोपत्र बोर्ड, नेप्से, सिडिएससीलगायतका निकायको क्षमता अभिवृद्धि गर्नुपर्नेलगायतका माग फोरमले राखेको छ । त्यस्तै, सेयर लगानीकर्ता संघले पनि प्रेस विज्ञप्ति जारी गर्दै परिसूचकले नकरात्मक प्रवृत्ति देखाइरहँदा पनि सरकारमा रहेका पुँजी बजारसँग सम्बन्धित निकायहरू मूकदर्शक बनेको आरोप लगाएको छ । नयाँ पत्रिकामा प्रकाशित समाचार

काठमाडौं, चैत १२ । धितोपत्र बजार आज करिब ५२ अंकले ओरालो लागेको छ । बजार खुलेलगत्तै तीन प्रतिशतको दरले बजार ओरालो लागेपछि नेपाल स्टक एक्स्चेन्जले ‘सर्किट ब्रेक’ नै लगाउनु परेको थियो । बजार नराम्ररी आरालो लागेपछि लगानीकर्तामा मनोवैज्ञानिक प्रभाव परेको छ । नेप्से परिसूचक ओरालो लागे पनि कारोबार रकम भने आज रु ४७ करोड ३३ लाख ९५ हजार ४११ को भएको छ । आज कूल १५७ कम्पनीको १५ लाख ५८ हजार ८०४ कित्ता शेयर खरिद बिक्री भएको स्टकले जनाएको छ । कूल ५२ बिन्दुले बजार ओरालो लाग्दा नेप्से परिसूचक एक हजार १६८ बिन्दुमा आइपुगेको छ । यो पछिल्लो दुई वर्षकै सबैभन्दा न्यून बिन्दु हो । आज ‘क’ वर्गका कम्पनीको शेयर मापन गर्ने सेन्सेटिभ परिसूचकसमेत १०.७६ बिन्दुले आरोलो लागेर २४९.६५ बिन्दुमा पुगेको छ । आज बैंकिङ ४१.९८, होटल ८१.३४, विकास बैंक ५१।२७, जलविद्युत् ६९.४९, फाइनान्स ४.७२, बीमा ३८३.९२ उत्पादन समूह ६०.९५, अन्य २१.९४ र माइक्रोफाइनान्स ७५.५२ बिन्दुले ओरालो लागेको छ । नेपाल इन्भेष्टर्स फोरमका उपाध्यक्ष छोटेलाल रौनियारले सरकारको तर्फबाट बजारको बारेमा सकारात्मक पहल आवश्यक भएको बताउनुभयो । धितोपत्र बजारमा आएको कमीका बारेमा जानकारी दिँदै उहाँले शेयर बजारका लगानीकर्ता ठूलो मारमा परेको भन्दै सरकारको तर्फबाट सकारात्मक पहल जरुरी रहेको बताउनुभयो । जिम्मेवार निकायमा रहेका व्यक्तिले जिम्मेवार भएर प्रस्तुत हुनुपर्ने भन्दै उहाँले अनावश्यक हल्ला र बजार प्रभावित पार्ने काम कोही कसैले पनि गर्न नहुने स्पष्ट पार्नुभयो । रौनियारले अनलाइन कारोबार, वाणिज्य बैंकहरुलाई ब्रोकर लाइसेन्स दिएर ७७ वटै जिल्लाबाट कारोबार गर्न पाउने व्यवस्था गरिए कारोबार बढ्ने र लगानीकर्तामा समेत विश्वास पैदा हुने सुझाव दिनुभयो । इन्भेष्टर्स फोरमका अर्का सदस्य केशव भण्डारीले लगानीकर्ता नराम्ररी प्रभावित भएको बताउनुभयो । सरकारले लगानीकर्ताको भावना सम्बोधन गर्नुपर्ने उल्लेख गर्दै उहाँले विद्यार्थी, गृहिणी, सरकारी तथा निजी क्षेत्रमा कार्यरत कर्मचारीले गरेको सानो सानो लगानीको पनि सुरक्षा जरुरी रहेको बताउनुभयो । बजारमा करीव १५ लाख लगानीकर्ता रहेको इन्भेष्टर्स फोरमले दाबी गरेको छ । बजार परिपक्व नभएका कारण सानोतिनो हल्ला र प्रभावले बजार प्रभावित हुने भएकाले त्यसतर्फ ध्यान दिन लगानीकर्ताले आग्रह गरेका छन् । बजारमा बैंक तथा वित्तीय क्षेत्रको चाप परेको छ, ब्याजदरमा परिवर्तन भएको, हकप्रद, बोनस शेयरको समेत चाप परेका कारण बजार प्रभावित भएको छ । बजार निरन्तर ओरालो लाग्दा साना लगानीकर्ता मारमा परेको उनीहरुको टिप्पणी छ । आज प्रोग्रेसिभ फाइनान्स लिमिटेडका लगानीकर्ताले मुनाफा गरेका छन् भने राष्ट्रिय बीमा कम्पनी र एनएलजी इन्स्योरेन्स कम्पनीका लगानीकर्ताले बढी गुमाएका छन् ।

काठमाडौं,  चैत १० । धितोपत्र बजारमा यस साता रु एक अर्ब ७२ करोड पाँच लाख २८ हजार बराबरको शेयर कारोबार भएको छ । नेपाल स्टक एक्चेन्जका अनुसार कूल १७३ कम्पनीको ४६ लाख दुई हजार ६३० कित्ता शेयर कारोबार भएको थियो । कारोबार रकम गत साताको भन्दा ३२.९९ प्रतिशत बढी हो । गत साता १७४ कम्पनीको ३३ लाख ३९ हजार १६० कित्ता शेयर रु एक अर्ब २९ करोड ३६ लाख ९८ हजारमा कारोबार भएको थियो । साताको नेप्से परिसूचक पहिलो दिनको तुलनामा ५८.५२ अंकले घटेर अन्तिम दिन एक हजार २२०.४४ अंकमा पुगेको छ । ‘क’ वर्गका कम्पनीको कारोबार मापन गर्ने सेन्सेटिभ परिसूचक पहिलो दिनको तुलनामा १२.०६ अंकले घटेर २६०.४१ अंकमा आइपुगेको छ । यस साता कारोबार रकमका आधारमा नेपाल लाइफ इन्सुरेन्स कम्पनी लिमिटेड अग्रस्थानमा रहेको छ सो कम्पनीको रु १६ करोड ५८ लाख २० हजार बराबरको शेयर कारोबार भएको थियो । यस्तै कारोबार भएको सेयर संख्याका आधारमा नेपाल क्रेडिट एण्ड कमर्श बैंक लिमिटेड अग्रस्थानमा रहेको छ । सो बैंकको दुई लाख १४ हजार कित्ता शेयर कारोबार भएको स्टकले जनाएको छ । यस साता राधी हाइड्रो पावरको ४१ लाख कित्ता साधारण शेयर, मुक्तिनाथ विकास बैंकको ४३ लाख १९ हजार ६०५ कित्ता बोनस, रिडी हाइड्रो पावर कम्पनीको दुई लाख ८४ हजार ५९८ कित्ता बोनस, बोमी माइक्रोफाइनान्सको एक लाख २९ हजार ६०० कित्ता बोनस र नेपाल कम्युनिटी डेभलपमेन्ट बैंकको २६ लाख ४३ हजार ५३८ कित्ता हकप्रद शेयर स्टककमा सूचीकृत भएका छन् । यस्तै आरम्भ माइक्रोफाइनान्सको ६ लाख कित्ता साधारण शेयर, जनता बैंकको एक करोड ७० हजार ९१९ कित्ता बोनस, नेपाल फाइनान्सको दुई लाख ४४ हजार २१९ कित्ता बोनस, गरिमा विकास बैंकको ३३ लाख ६ हजार ३६५ कित्ता बोनस, आरएसडिसी लघुवित्त वित्तीय संस्थाको एक लाख ४९ हजार ५०० कित्ता कोनस र प्रिमियर इस्सुरेन्स कम्पनीको ६ लाख ५९ हजार ५६५ कित्ता थप निष्कासनसमेत स्टकमा सूचीकृत भएका छन् । रासस

काठमाडौं, चैत ७। बुधवार नेप्सेमा पाँच कम्पनीको शेयर सूचीकृत भएका छन् । तीन कम्पनीको बोनस शेयर र दुई कम्पनीको हकप्रद र आईपीओ गरी एकैदिन ७९ लाख ७७ हजार कित्ताभन्दा बढी शेयर सूचीकृत भएको हो । शेयर सूचीकृत हुनेमा रिडी हाइड्रोपावर कम्पनीको २ लाख ८४ हजार ५ सय ९८ कित्ता बानेस शेयर, मुक्तिनाथ विकास बैंकका ४३ लाख १९ हजार ६ सय ५ दशमलव ५३ कित्ता बोनस शेयर र बोमी माईक्रोफाइनान्सको १ लाख २९ हजार ६ सय बोनस शेयर सूचीकृत भएको हो । त्यसैगरी नेपाल कम्यूनिटी डेभलपमेण्ट बैंकको २६ लाख ४३ हजार ५ सय ३८ दशमलव ८० कित्ता हकप्रद शेयर र आरम्भ माइक्रोफाइनान्सको ६ लाख कित्ता आईपीओ सूचिकृत भएको छ ।

काठमाडौं । बुधवार नेप्से परिसूचक २ दशमलव ३९ प्रतिशत घटेको छ । ३ घण्टाको व्यापारमा परिसूचक २९ दशमलव ९६ अंकले घटेर १ हजार २ सय २५ दशमलव ५१ विन्दुमा पुगेको छ । यस व्यापार अवधिमा १ सय ४४ कम्पनीको ३ हजार ७ सय ८७ पटकको व्यापारमा रू.२४ करोड ३४ लाख बराबरको शेयर कारोबार भएको हो । यस समयमा नेपाल इन्स्योरेन्सको सबैभन्दा बढी मूल्य घटेको छ । यस बीमा कम्पनीको शेयर मूल्य ७ दशमलव ५२ प्रतिशतले घटेर रू. ८ सय ७२ पुगेको छ। लघुवित्त समूहको परिसूचक ३ दशमलव ६६ प्रतिशत, बीमाको ३ दशमलव ४५ प्रतिशत, ‘अन्य’ समूहको २ दशमलव ५४ प्रतिशत, जलविद्युतको २ दशमलव ३८ प्रतिशत र बैङ्किङको २ दशमलव २ प्रतिशत घटेको छ । साथै, होटल समूहको परिसूचक १ दशमलव ९२ प्रतिशत, विकास बैङ्कको १ दशमलव १७ प्रतिशत, वित्त कम्पनीको शून्य दशमलव ७३ प्रतिशत र उत्पादन तथा प्रशोधनको शून्य दशमलव ५५ प्रतिशत घटेको हो ।

काठमाडौं । बुधवार नेप्से परिसूचक ० दशमलव ८१ प्रतिशत घटेको छ । कारोबार खुलेदेखि निरन्तर ओरालो लागेको बजार १ घण्टाको व्यापारमा १० दशमलव १४ अंक घटेर १ हजार २ सय ४५ दशमलव ३३ विन्दुमा पुगेको हो । यस व्यापार अवधिमा ९७ कम्पनीको ६ सय ५५ पटकको व्यापारमा रू। ३ करोड ८६ लाख बराबरको शेयर कारोबार भएको छ । कारोबारमा आएका सबै समूहको परिसूचक घटेपछि शेयर बजार ओरालो लागेको हो । बीमा समूहको परिसूचक १ दशमलव १६ प्रतिशत र लघुवित्तको १ दशमलव शून्य ६ प्रतिशत घटेको छ । साथै, बैङ्किङ समूहको परिसूचक शून्य दशमलव ८७ प्रतिशत, जलविद्युतको ० दशमलव ७६, विकास बैङ्कको ० दशमलव ५३, वित्त कम्पनीको ० दशमलव ५१, होटलको शून्य दशमलव ४२, उत्पादन तथा प्रशोधनको शून्य दशमलव ३९ र अन्य’ समूहको शून्य दशमलव २ प्रतिशत घटेको हो ।

म्याग्दी । म्याग्दीको सदरमुकाम बेनीबजारमा ‘मिटर ब्याज’को अवैधधन्दा मौलाउँदै गएको छ । छोटो समयमा धेरै कमाउने लोभले मिटर ब्याजमा लगानी गर्ने धन्दा मौलाउँदा सामाजिक र आर्थिक अपराधको जोखिम बढाएको छ । गैरकानूनी मानिएको मिटर ब्याजमा गरिएको ठूलो लगानी अशुल हुन नसकेपछि लगानीकर्ताको भागाभाग भएको छ । मिटर ब्याजमा भएको लगानीका कारण बेनीमा केहीको घर र जग्गा नै सखाप भएको छ । मासिक चर्को ब्याज रकम रहेको यो प्रथाबाट लगानी उठ्न नसकेपछि कतिपय घर छोडेर सम्पर्कविहीन भएका छन् । एकै जनाले रु एक करोडदेखि चार करोडसम्म डुबाएर भागेको पीडितले बताएका छन् । “मिटर ब्याजको धन्दाले आफन्तजन, साथीभाइ, परिवारमा विलाप निम्त्याएको छ,” पीडित निरु खत्रीले भन्नुभयो – “भएको घरजग्गा सखाप मात्र भएको छैन कतिको परिवार नै विखण्डनको अवस्था पुगेको छ।” कारोबारमा ठगिएका र ठगी गर्ने दुवै पक्ष जनप्रतिनिधि, सामुदायिक प्रहरी र प्रहरीमा धाउने क्रम बढेको छ । दैनिक एकदुई जना मानिस आर्थिक कारोबारसँग सम्बन्धित गुनासो लिएर आउने गरेको सामुदायिक प्रहरी शाखा बेनीका अध्यक्ष श्यामलाल न्यौपानेले बताउनुभयो । “सापटी लगेको पैसा फिर्ता भएन, छलफल गराई दिनुप¥यो भनेर रुँदै आउँछन्,” न्यौपानेले भन्नुभयो, “छलफल गर्दै जाँदा मिटर ब्याजमा जोडिन्छ । लेनदेनको मुद्दामा हामीले केही गर्न नमिल्ने भएकाले अदालत जान सुझाउँछौँ ।” मिटर ब्याजको कारोबारमा यहाँ तीन वटा समूहको संलग्नता देखिएको छ । पहिलो समूहले बढी ब्याजको लोभमा आफूसँग भएको पैसा दोस्रो समूहमा पर्ने मध्यस्थकर्ताको काम गर्नेलाई दिन्छन् । दोस्रो पक्षले पहिलो पक्षबाट लिएको भन्दा बढी ब्याजदरमा तेस्रो पक्षलाई ऋण दिन्छन् । मध्यस्थकर्ताको भूमिका खेल्ने व्यक्ति सीमित छन् । पहिलो पक्ष लगानी डुबेर र तेस्रो पक्ष बढी ब्याजदरको ऋण लिँदा ठगिएर पीडित भएका छन् । मासिक दुईदेखि पाँच प्रतिशत ब्याजदरमा सापटीका रुपमा पहिलो पक्षबाट ऋण लिने मध्यस्थकर्ताको भूमिका खेल्नेले तेस्रो व्यक्तिलाई ऋण दिँदा अग्रिम बीस प्रतिशत रकम कटौती गरिदिने र हरेक महिना पूरै साँवा रकमको दशदेखि २३ प्रतिशतसम्म ब्याज अशुली गर्ने गर्छन् । बैंक, वित्तीय संस्था र सहकारी संस्थाले भन्दा बढी ब्याज दिने तथा पाउने प्रलोभनमा विशेष गरेर पैसा भएका तर आर्थिक कारोबारसम्बन्धी ज्ञान नभएका मानिस पर्ने गरेका छन् । सामान्य मजदूरदेखि बजारका सम्पन्न व्यक्ति यस्तो कारोबारमा संलग्न छन् । विदेशबाट आएको विप्रेषण, ढुकुटी बुझेर, बैंकमा घरजग्गा धितो राखेर मिटर ब्याजमा लगाउने भेटिएका अध्यक्ष न्यौपानेले बताउनुभयो । यस्तो अवैध कारोबारको नेतृत्व गर्ने र ठगिनेमा पुरुषभन्दा बढी महिला छन् । वैदेशिक रोजगारीमा जाने, जुवातास खेल्ने, जडीबुटी व्यापारी र घरजग्गा कारोबारी व्यापारीले मिटर ब्याजको ऋण लिने गरेको पाइएको छ । मासिक रुपमा ब्याज र भनेको समयमा ऋण तिर्न नसकेपछि विवाद बढेर ठगीको मुद्दाका रुपमा प्रहरी तथा अदालत पुग्ने गरेका छन् । सहमतिमा ऋण लेनदेन गरेर समयमै फिर्ता नभएपछि ठगी ग¥यो भनेर गुनासो गर्न आउने गरेको जिल्ला प्रहरी कार्यालयका प्रहरी निरीक्षक लोकबहादुर गुरुङले बताउनुभयो । “ठगीको मुद्दाका रुपमा प्रहरीमा आउँछन्, बुझ्दै जाँदा मिटर ब्याजमा लगानी भएको देखिन्छ,” गुरुङले भन्नुभयो । लेनदेनको मुद्दा हेर्ने अधिकार अदालतलाई मात्र छ । स्थानीय तह र प्रहरीले लेनदेनको मुद्दा आएमा अदालत जान सुझाउने गरेका छन् । चेक र रेमिटमार्फत कारोबार गर्नेले त्यसैलाई आधार बनाएर मुद्दा हाल्ने गरेका छन् । जिल्ला अदालत म्याग्दीमा आव २०७३७४ मा ४२ वटा लेनदेनसम्बन्धी मुद्दा परेकामा २८ वटाको फैसला भएको थियो भने १४ वटाको यो वर्षका लागि जिम्मेवारी सरेको थियो । चालु आवको साउनदेखि हालसम्म लेनदेन सम्बन्धी २२ वटा मुद्दा दर्ता भएकामा एउटा मात्र फैसला भएको अदालतले जनाएको छ । सदरमुकाम बेनीबजारभित्र मिटर ब्याजको धन्दा चलाउने सक्रिय रहेको र यसबाट धेरै महिला पीडित भएको बेनी नगरपालिकाका उपप्रमुख सञ्जु बरुवालले बताउनुभयो । “तमसुक, भरपाई बिनै लाखौँको लेनदेन गरेका छन्,” उपप्रमुख बरुवालले भन्नुभयो, “आधार प्रमाण नहुँदा पीडित कानूनी प्रक्रियामा जान सकेका छैनन् ।” नगरपालिकाले प्रहरी, वडा कार्यालय, आमा समूह र टोल सुधार समितिमार्फत बैंकिङ शिक्षासम्बन्धी सचेतना कार्यक्रम सञ्चालन गर्ने तयारी गरेको उपप्रमुख बरुवालले जानकारी दिनुभयो । मिटर ब्याजको अवैध धन्दाले आपसी विश्वासका आधारमा परम्परागत रुपमा गरिँदै आएको ढुकुटी पनि संकटमा परेको छ । मानिस बढी ब्याज पाउने लोभमा मिटर ब्याजमा लगानी गर्दा बैंक, वित्तीय र सहकारी संस्थाको निक्षेप संकलनलाई असर पर्ने गरेको छ । यसैगरी, कर्जा लिएर मिटर ब्याजमा लगाउनेले समयमै ब्याज र किस्ता तिर्न नसक्दा पनि बैंकिङ क्षेत्रको कारोबारलाई असर पुगेको छ । मिटर ब्याजमा लगानी गरेको पैसा फिर्ता नआएपछि श्रीमान्–श्रीमतीबीच विवाद भई उत्पन्न पारिवारिक विवादले सम्बन्ध विच्छेदसम्मको रुप लिएको देखिएको छ । परिवारमा एउटाले गरेको लगानी फसेपछि ऋण तिर्न र मुद्दाबाट जोगिनका लागि व्यवहारमा सँगै बसे पनि कानूनी हिसाबले सम्बन्ध विच्छेद गर्नेहरु पनि भेटिएका छन् । रासस

काठमाडौं, चैत ४ । दैनिक उपभोग्य र विलासिताका सामग्रीको उच्च आयातसँगै निराशाजनक निर्यातले वर्षको सात महिनामै व्यापार घाटा ६ खर्ब १० अर्ब पुगेको छ । भन्सार विभागका अनुसार गत साउनदेखि माघसम्म १ सय ४२ मुलुकबाट ६ खर्ब ५७ अर्ब ६१ करोड ८५ लाख ५१ हजार रुपैयाँका सामग्री आयात गरियो । निर्यात भने ४७ अर्ब ६२ करोड २१ लाख ७८ हजार रुपैयाँको मात्रै भएको छ । निर्यात १३ प्रतिशतले वृद्धि भएको छ भने आयात १८ प्रतिशतले बढेको छ । तथ्यांकअनुसार सरकारका निर्यात वृद्धिका प्रयासले सार्थकता पाउन सकेका छैनन्, मुलुक आयातमुखी बन्दै गइरहेको छ । स्वदेशी उत्पादन वृद्धि तथा प्रवद्र्धनात्मक कार्यक्रम नगरिनु, उत्पादन भएका सामग्री निर्यात हुन नसक्नु र आयातित सामग्रीमा परनिर्भरता बढिरहनुले बर्सेनि व्यापार घाटा चुलिँदै गएको हो । सात महिनामा सबैभन्दा बढी ९७ अर्ब ७० करोड रुपैयाँ बराबरको इन्धन आयात भएको छ । दोस्रो बढी आयात हुने सामग्री मेसिनरी उपकरणका पार्टपुर्जा हुन् । ७० अर्ब ७ करोड रुपैयाँ बराबरका मेसिनरी उपकरणसँग सम्बन्धित भित्रिएका छन् । ६२ अर्ब ९ करोड रुपैयाँ बराबरका फलाम तथा स्टिल सामग्री आयात भएका छन् । करिब ५० अर्ब रुपैयाँ बराबरका सवारी साधन ल्याइएको छ । त्यस्तै विद्युतीय सामग्री ४५ अर्ब २६ करोड रुपैयाँको भित्रिएको छ ।,आजको कान्तिपुरमा यो खबर छ ।

काठमाडौं, चैत ३ । शेयर बजारमा यस साता रु एक अर्ब २९ करोड ३६ लाख ९८ हजार बराबरको कारोबार भएको छ । नेपाल स्टक एक्चेन्जका अनुसार यस साता कूल १७४ कम्पनीको ३३ लाख ३९ हजार १६० कित्ता शेयर खरिद बिक्री भएका छन् । कारोबार रकम गत साताको भन्दा २७ दशमलव ९२ प्रतिशत कम हो । गत साता १७१ कम्पनीको ४७ लाख ९३ हजार १२० कित्ता सेयर रु एक अर्ब ७९ करोड ४७ लाख ९८ हजारमा कारोबार भएको थियो । साताको नेप्से परिसूचक पहिलो दिनको तुलनामा ४ दशमलव २७ अंकले बढेर अन्तिम दिन १२८८ दशमलव ३६ अंकमा पुगेको छ । ‘क’ वर्गका कम्पनीको कारोबार मापन गर्ने सेन्सेटिभ परिसूचक पहिलो दिनको तुलनामा एक दशमलव ३२ अंकले बढेर २७४ दशमलव ३८ अंकमा आइपुगेको छ । यस साता कारोबार रकमका आधारमा नेपाल लाइफ इन्स्योरेन्स कम्पनी लिमिटेड अग्रस्थानमा छ । सो कम्पनीको रु आठ करोड २० लाख ६० हजार बराबरको शेयर कारोबार भएको थियो । त्यसैगरी कारोबार भएको शेयर संख्याका आधारमा जनता बैंक लिमिटेड अग्रस्थानमा छ । सो बैंकको एक लाख ६७ हजार कित्ता शेयर कारोबार भएको स्टकले जनाएको छ । यस साता नेपाल स्टक एक्सचेन्जको कारोबार कक्ष नियमित कारोबारका लागि पाँच दिन खुला रह्यो । यस साता पनि ऋणपत्रतर्फ संस्थागत तथा सरकारी ऋणपत्रको कुनै पनि कारोबार भएन । यस साता ग्लोबल आइएमइ लघुवित्त वित्तीय संस्थाको एक लाख १३ हजार बोनस, लक्ष्मी लघुवित्त वित्तीय संस्थाको दुई लाख २० हजार, एक्सेल डेभलपमेन्ट बैंकको ११ लाख ५८ हजार ३०२, बरुण हाइड्रो पावर कम्पनीको एक लाख २१ हजार ५००, गृहेश्वरी मर्चेन्ट बैंकिङ एन्ड फाइनान्सको १० लाख ९१ हजार २४९, स्वरोजगार लघुवित्त वित्तीय संस्थाको एक लाख ७४ हजार ९९६, चिलिमे जलविद्युत् कम्पनीको ५१ लाख ७१ हजार ८८६ बोनस शेयर सूचीकृत भएका छन् । कैलाश विकास बैंकको २२ लाख ९१ हजार ४८८ र प्रसडेन्डियल इस्योरेन्स कम्पनीको आठ लाख ५५ हजार ३६० कित्ता बोनस शेयर स्टकमा सूचीकृत भएका छन् । यस्तै माउन्ट मकालु डेभलपमेन्ट बैंकको तीन लाख ४५ हजार ८०० कित्ता हकप्रद शेयर सूचीकृत भएका छन् ।

काठमाडौँ । पारदर्शिता, कर अभिवृद्धि र सुशासनका लागि विद्युतीय भुक्तानी (डिजिटल पेमेन्ट)लाई प्रभावकारी रुपमा कार्यान्वयन गर्नुपर्ने खाँचो औँल्याइएको छ । पछिल्लो समय विश्वको बैंकिङ बजारमा आएको प्रविधिलाई नेपाली बैंकहरुले पनि अनुशरण गर्दा विद्युतीय भुक्तानीलाई जोड दिनुपर्ने आज यहाँ आयोजित सम्मेलनमा जानकारी गराइयो । नेशनल बैंकिङ इन्स्टिच्युटद्वारा विद्युतीय भुक्तानी सम्मेलनका वक्ताहरुले सो कुरामा जोड दिँदै निजी क्षेत्रका बैंकहरुले आफूलाई समय अनुकूल अद्यावधिक गर्दै विद्युतीय कारोवारमा अगाडि बढिरहेको बताउनुभयो । विश्व बैंकिङ बजारमा आएका पछिल्ला विद्युतीय प्रविधिका बारेमा जानकारी एवं प्रशिक्षण दिने ध्येयले आयोजित सो सम्मेलनमा सरकारी तथा निजी क्षेत्रका बैंकका उच्चस्तरका व्यवस्थापकहरुको सहभागिता रहेको छ । साथै सम्मेलनमा विद्युतीय भुक्तानी प्रविधिका विज्ञ राहुल जोशी, राजेश लोहारी, दीपक शर्माले प्रशिक्षण दिनुहुनेछ । सम्मेलनको उद्घाटनसत्रमा आयोजक संस्थाका अध्यक्ष लक्ष्मीप्रपन्न निरौलाले बैंकले पारदर्शिता, कर अभिवृद्धि र सुशासनका लागि विद्युतीय भुक्तानीलाई प्रभावकारी रुपमा कार्यान्वयन गर्नुपर्छ भन्नुभयो । उहाँले विद्युतीय भुक्तानीमैत्री बनाउन प्रशिक्षण कार्यक्रम आयोजना गरिएको चर्चा गर्नुभयो । आयोजक संस्थाका कार्यकारी व्यवस्थापक सञ्जिव सुब्बाले विद्युतीय भुक्तानीले बैंकको क्षमता वृद्धि हुने बताउनुभयो । रासस

काठमाडौं । सान्जेन र रसुवागढी हाइड्रोपावर कम्पनीले निष्काशन गरेको आइपीओमा ३ लाख ८३ हजार २३५ जनाले सेयर भरेका छन् । सान्जेन जलविद्युत कम्पनीमा १ लाख ८३ हजार २३५ जनाले आवेदन दिएका छन् भने रसुवागढी हाइड्रोपावरको आइपीओमा २ लाख जनाले आवेदन दिएको बिक्री प्रबन्धकहरुले जानकारी गराएका छन् । बिक्री प्रबन्धकहरुका अनुसार अझै अन्तिम विवरण आइनसकेकाले आवेदकको संख्या र रकम दुवै बढ्नसक्ने देखिन्छ । सान्जेनमा आवेदनको अन्तिम दिन बुधबारसम्म १ लाख ८३ हजार २३५ जना आवेदकबाट ४ अर्ब १७ करोड २२ लाख ५३ हजार रुपैयाँको आवेदन परेको बिक्री प्रबन्धक नागरिक लगानी कोषले जनाएको छ । नागरिक लागानी कोषका सूचना अधिकारी उद्धव सिलवालका अनुसार आवेदन संकलन गरेका केही बैंक तथा वित्तीय संस्थाबाट तथ्यांक आउने क्रममा रहेका कारण आवेदनको संख्या केही बढ्ने छ । सान्जेनले कर्मचारी सञ्चय कोषका सञ्चयकर्ताका लागि ७१ करोड १७ लाख ५० हजार रुपैयाँको ७१ लाख १७ हजार ५ सय कित्ता आइपीओ खुला गरेको हो । सान्जेनले पहिलो चरणमा कर्मचारी सञ्चय कोषका सञ्चय कर्ताका लागि आइपीओ बिक्री खुला गरेको हो । यस कम्पनीले फागुन ११ गतेदेखि ३० गतेसम्म सेयर बिक्री खुला गरेको थियो । सञ्चयकर्ताले न्यूनतम ५० देखि बढीमा ३०० कित्तासम्म आवेदन दिनसक्ने व्यवस्था गरेको थियो । यता, रसुवागढीमा पनि २ लाख आवेदकले ६ अर्ब ७५ करोड रुपैयाँ बढीको सेयर भरेको बिक्री प्रबन्धक सिद्धार्थ क्यापिटलका मर्चेन्ट बैंकिङ प्रमुख सुजनबाबु अधिकारीले जानकारी दिए । उनले पनि केही संस्थाबाट विवरण आइनसकेका कारण आवेदकको संख्या केही बढ्ने बताए । रसुवागढीले कर्मचारी सञ्चय कोषका सञ्चयकर्ताका लागि १ अर्ब ३३ करोड ४२ लाख ९ हजार ५ सय रुपैयाँ बराबरको १ करोड ३३ लाख ४२ हजार ९५ कित्ता आइपीओ खुला गरेको थियो । यस कम्पनीले फागुन ११ गतेदेखि ३० गतेसम्म सेयर बिक्री खुला गरेको थियो । सञ्चयकर्ताले न्यूनतम ५० देखि बढीमा ५०० कित्तासम्म आवेदन दिनसक्ने व्यवस्था गरेको थियो । नेपालीपैसाबाट साभार

काठमाडौं । साताको अन्तिम दिनको सेयर कारोबारमा ८.५७ अंकको सुधार आएको छ । बिहीबार १ बजेर ३ मिनेट जाँदासम्म बजार नाम्ने नेप्से सूचक ८।५७ अंकले बढेर १२९४.५३ विन्दुमा पुगेको छ । विगत केही दिनदेखि नेप्से सूचक र कारोबार रकम निकै सुस्त देखिएको छ । अहिलेसम्म बजेसम्म ११० कम्पनीको ७ करोड ९४ लाख रुपैयाँभन्दा बढीको कारोबार किनबेच भएको छ । बैंक तथा बित्तीय संस्थामा लगानी योग्य पुँजी अभाव भएकाले शेयरबजार त्यसबाट प्रत्यक्ष प्रभावित बनेको हो । शेयर कर्जा दिने वित्तीय संस्थाले पनि १५ प्रतिशत हाराहारीमा ब्याज लिइरहेका छन् । यसबाट शेयर किन्न सर्वसाधारण उत्सुक नबनेको अनुमान गरिंदैछ । बजारमा भने दिन प्रतिदिन शेयर भाउ सस्तो हुँदै गएको छ । भाउ सस्तो भएका बेला राम्रा कम्पनीहरुको शेयर छानीरोजी किन्ने लगानीकर्तालाई मौका आएको छ । लामो समय होल्ड गर्न सक्नेका लागि बजारबाट भविष्यमा राम्रै प्रतिफल मिल्न सक्ने विश्लेषकहरुको भनाई रहँदै आएको छ । नेपालीपैसाबाट साभार

काठमाडौं । नेपाल सरकारले चालु आवका लागि छुट्याइएको रकममध्ये तेस्रो तथा अन्तिम किस्ताको ७५ अर्ब रुपैयाँ बिहीबार स्थानीय तहको सञ्चित कोषमा पठाउने भएको छ । सबै स्थानीय तहको सञ्चित खाता वाणिज्य बैंकहरुमा रहेकाले यो रकम निकासा भएपछि वाणिज्य बैंकहरुले समेत राहत महसुस गर्ने भएका छन् । चालू आर्थिक वर्ष २०७४–७५ को बजेटमार्फत स्थानीय तहका लागि छुट्याइएको समानीकरण अनुदान र शसर्त अनुदानमध्ये उक्त रकम पठाउन लागेको अर्थ मन्त्रालयका प्रवक्ता अर्जून प्रसाद पोखरलले जानकारी दिए । तेस्रो किस्ता बापतको ७५ अर्ब रुपैयाँ स्थानीय तहमा हस्तान्तरण गर्न महालेखा नियन्त्रकको कार्यालयलाई अख्तियारी दिइसकेको पोखरलले बताए । सरकारले ७ सय ५३ वटा स्थानीय तहका लागि २ खर्ब २५ अर्ब रुपैयाँ बजेट विनियोजन गरेको छ । बजेटमा समानीकरण अनुदान अन्तर्गत एक खर्ब ४८ अर्ब ६३ करोड र सशर्त अनुदान ७६ अर्ब ४१ करोड रुपैयाँ गरि दुई खर्ब २५ अर्ब रुपैयाँ छुट्याइएको छ । ७५ अर्ब रुपैयाँका दरले यसअघि दुई किस्तामा गरेर एक खर्ब ५० अर्ब रकम निकासा भईसकेको छ । बिहीबार नेपाल सरकारले तेस्रो तथा अन्तिम किस्ताको रकम निकासा गर्न लागेको हो । स्थानीय तहलाई प्राप्त हुने सबै प्रकारको आम्दानी सञ्चित खातामा जम्मा गर्नुपर्ने व्यवस्था छ । उक्त खाता नेपाल राष्ट्र बैंकबाट इजाजत प्राप्त ‘क’ वर्गको वाणिज्य बैंकमा रहेका छन् । जसले गर्दा तरलताको अभाव खेपिरहेको वाणिज्य बैंकहरुलाई केही राहात मिल्ने भएको छ । यसले बैंकहरुको निक्षेपमा समेत टेवा पुर्याउने छ । स्थानीय तहले केन्द्रबाट प्राप्त गर्ने बजेट खर्च गर्न नसकेपनि त्यो बजेट फेरि केन्द्र सरकारको खातामा फर्काउन नमिल्ने र बैंककै खातामा रहने हुँदा निक्षेप बढाउन प्रयासरत बैंकहरुलाई भने केही राहात मिल्ने देखिएको छ । सरकारले यसअघि दुई पटक गरेर स्थानीय तहमा पठाएको एक खर्ब ५० अर्ब रकममध्ये पचास प्रतिशत भन्दा बढी रकम बैंक खातामा नै थुप्रिएको अवस्था छ। मेरोलगानीबाट साभार

काठमाडौं, चैत १ । रोजगारीका लागि विदेशीने होड चलिरहेका बेला नवलपरासीका एक व्यक्ति भने स्वदेशमै टर्की फार्म सञ्चालन गरेर मनग्य आम्दानी गर्न सफल भएका छन् । कावासोती–१२ का सुनिल गुरुङले टर्की फार्म सञ्चालन गरेर राम्रो आम्दानी गरेका हुन् । जोस र जाँगरका साथ मेहनत गर्ने हो भने स्वदेशमै प्रशस्त पैसा आर्जन गर्न सकिन्छ भन्ने उदाहरण उनले दिएका छन् । २०६८ सालमा आफ्ना बुबाले टर्कीबाट ल्याएका २० वटा कुखुराबाट गुरुङले अहिले फार्म नै सञ्चालन गरेका हुन् । अहिले गुरुङसँग ३ सय वटा कुखुरा छन् । उनले नवलपरासीको कावासोती हाटबजारमा रहेको पसलबाट टर्की कुखुराको मासु बेच्दै आएका छन् । हाल गुरुङ मासिक ८० देखि १ लाख रुपैयाँसम्म आम्दानी गर्न सफल भएका छन् ।

काठमाडौं । तरलता अभावको मारमा शेयरबजार परेको छ । बैंकहरुसँग लगानी योग्य पुँजी अभाव हुन थालेपछि त्यसको प्रत्यक्ष असर दैनिक शेयर कारोबार रकममा देखिन थालेको हो । बैंक तथा वित्तीय संस्थाले सजिलै सेयर कर्जा उपलब्ध गराउन नसक्दा कारोबार रकम २० करोड हाराहारीमै सीमित भएको हो । लगानी योग्य पुँजी अभाव हुँदा कर्जाको ब्याजदर पनि चुलिएको छ । बैंकहरुले १५ प्रतिशत हाराहारीमा सेयर कर्जाको ब्याज लिइरहेका छन् । ब्याजदर महँगो भएकाले पनि लगानीकर्ता बजारप्रति खासै उत्साहित हुन नसकेका हुन् । ब्याजदरको प्रत्यक्ष प्रभाव बुधबारको शेयरबजारमा पनि देखिएको छ । बजार नाप्ने नेप्से सूचक हरियो भए पनि कारोबार रकम भने निकै सुस्त देखिएको छ । बजारको दिगो विकास हुन सूचकसँगै कारोबार रकममा पनि तेजी आउन जरुरी हुन्छ । यतिबेला पुँजी बजारलाई नयाँ गति दिन सरकारी प्रयास अत्यावश्यक देखिएको छ । बजार सुधारका लागि सरकारले गतिलो कदम नचालेसम्म लगानीकर्तामा नयाँ जोश आउने देखिंदैन । सरकारले शेयरबजार सुधारका लागि गैरआवासीय नेपालीलाई लगानी खुला गरिदिनुपर्छ । यस्तै, अनलाइन प्रणाली भित्रिन सके बजारले नयाँ गति लिने अपेक्षा गर्न सकिन्छ । बढ्दो आपूर्ति व्यवस्थापन गर्न बजार निर्माता पनि आवश्यक छ । यसैगरी, सेयर शिक्षा दिएर गाउँगाउँमा चेतना विस्तार गरिनुपर्छ । ब्रोकरको क्षमता विस्तार गरी गाउँगाउँमा पुर्याउने, बैंकलाई ब्रोकर लाइसेन्स जस्ता विधि अपनाएर पनि सेयर बजारको विकासमा सहयोग पुर्याउन सकिने अवस्था छ । नेप्से सूचक बुधबार ४.०६ अंकले बढेर १२८५.९६ विन्दुमा अडिएको छ । समग्रमा बजार ०.३२ प्रतिशतले बढेको हो । कुल १५६ कम्पनीको १८ करोड ४५ लाख रुपैयाँभन्दा धेरैको कारोबार भएको छ । कुल ६ लाख २३ हजार ८८५ कित्ता शेयर किनबेच भएको छ । नेप्सेमा ९ वटा समूहको कारोबार भएकामा ६ वटा समूहको सूचकमाथि लागेका छन् भने ३ समूहका सूचक राता देखिएका छन् । बिमा समूहको सूचक सबैभन्दा धेरै २९.२१ अंकले बढेको छ । माइक्रो फाइनान्स समूहको सूचक पनि ८.५७ अंकले माथि लागेको छ । वाणिज्य बैंक समूह ३.७३ अंकले बढ्दा उत्पादनमूलक समूह भने ६.८२ अंकले घटेको छ । कारोबार रकमका आधारमा नेपाल लाइफ इन्सुरेन्सले अग्रता लिएको छ । नेपाल लाइफको १ करोड रुपैयाँभन्दा धेरैको सेयर किनबेच भएको हो । कारोबार रकमकै आधारमा दोस्रो र तेस्रो स्थानमा क्रमशः नबिल बैंक र एभरेष्ट बैंक परेका छन् । कारोबार रकमका आधारमा प्रमुख १० कम्पनी नेपालीपैसाबाट साभार