काठमाडौं, माघ २१ । निर्वाचनका लागि आवश्यक कानुन निर्माण भइसकेकोले तयारीमा जुटन निर्वाचन आयोगलाई औपचारिक अनुरोध गर्ने मन्त्रीपरिषदको निर्णयपछि राजनीति समीकरण नयाँ मोडमा पुगेको छ । चुनावको सोझै मिति घोषणा नगरी निर्वाचन आयोगलाई तयारीका लागि अनुरोध गरेर घुमाउरो पाराले चुनावको घोषणा गरेको सरकारले यस विषयमा थप स्पष्ट पार्न मधेसी मोर्चालाई छलफलमा बोलाएको छ । प्रधानमन्त्रीको निमन्त्रणमा व्यवस्थापिका संसदमा दर्ता भएको संविधान संशोधन प्रस्ताव र स्थानीय निकायको चुनावका बारेमा साझा धारणा बनाउन मधेसी मोर्चाका नेताहरु बालुवाटार पुगेका छन् । मधेसी मोर्चाका नेताहरुले पुनःसंरचना आयोगको प्रतिवेदन परिमार्जन गर्नुपर्ने, संविधान संशोधन गरेर मात्रै स्थानीय निर्वाचन गर्नुपर्ने बताउँदै आएको छ । यद्यपी एमालेले लिएको अडानको भने मोर्चाले समेत कडा बिरोध गर्दै आएको छ । आजको छलफलमा संविधान संशोधन प्रस्तावलाई प्रक्रिया अनुसार अगाडि बढाउने र दुई तिहाई पुर्याउने विषयमा कुरा हुने बताइन्छ । प्रधानमन्त्री प्रचण्डले एमालेले बिरोध जारी राखेपनि संशोधन प्रस्तावलाई प्रक्रिया अन्तर्गत टुंगोमा पुर्याउन संसद सचिवालयसँग छलफल गरिसकेको यसअघि नै जनाई सकेका छन् । यसैगरी पुनःसंरचना आयोगको प्रतिवेदनमाथि २ नं. प्रदेशका बारेमा सरकारले समिति गठन गरिसकेको छ । मधेसी मोर्चाको आपत्तीलाई यो समितिले अध्ययन गरेर प्रतिवेदनलाई अन्तिम रुप दिने तयारीमा सरकार जुटेको छ । आजको छलफलले संविधान संशोधन र निर्वाचनका लागि एमालेलगायतका प्रतिपक्षी दलहरुले जारी राखेको बिरोधलाई एकीकृत ढंगले कसरी सामना गर्ने भन्ने विषयमा छलफल गरेर साझा रणनीति बनाउने देखिन्छ ।

काठमाडौं, माघ २१ । कुलमान घिसिङ यतिखेर चौतर्फी चर्चामा छन् । नेपाल विद्युत प्राधिकरण भित्र एकथरी उनको विरुद्धमा आन्दोलित छन् । यता जनताको तहमा भने कुलमानका पक्षमा सार्वजनिक प्रदर्शन नै गरिएका छन् । कुलमान घिसिङलाई प्राधिकरणको कार्यकारी निर्देशक बनाउन निकै ठूलो संघर्ष गर्नुपरेको प्रधानमन्त्री प्रचण्डले सार्वजनिक रुपमा नै बताएका छन् । उज्यालो नेपालको सपना साकार पार्न कुलमान घिसिङ जस्तो व्यक्ति टीममा आवश्यक भएकोले संघर्ष गरेर भएपनि कार्यकारी निर्देशकको जिम्मेवारी दिएको प्रधानमन्त्रीको भनाई छ । नेपाल विद्युत प्राधिकरणका कार्यकारी निर्देशक कुलमान घिसिङलाई उर्जामन्त्री जनार्दन शर्मा ‘प्रभाकर’ले भने राती ११ बजे फोन गर्ने गरेको खुलासा एक कार्यक्रममा गरे । खिम्तीमा आयोजित ‘खिम्ती–ढल्केबार २२० केभी प्रसारण लाइन’ को उदघाटन कार्यक्रममा उर्जामन्त्रीले यो खुलासा गरेका हुन । उर्जाका माध्यमबाट समृद्ध नेपालको परिकल्पना गरेको बताउँदै उर्जामन्त्रीले विद्युतको उत्पादनलाई बत्ती बाल्ने कुरासँग मात्रै जोड्नु परम्परागत सोचाई भएको समेत टिप्पणी गरे । नेपालमा पर्याप्त बिजुली उत्पादन गरेर देशमा कलकारखाना, उद्योग स्थापना गरी रोजगारी सिर्जन ागर्ने, आयातमा निर्भर देशलाई निर्यातमुखी अर्थतन्त्रतर्फ डोर्याउने उनको भनाई थियो । यसका लागि विद्युत प्राधिकरणको व्यवस्थापन मुख्य रहेको भन्दै उर्जामन्त्रीले कुलमान घिसिङको प्रसङ्ग अगाडि सारेका थिए । “म कुलमानजीलाई राती ११ बजे फोन गर्छु ।” उर्जामन्त्रीले भने, “त्यतिखेर पनि वहाँ काममा व्यस्त भएको पाउँछु, कहिले कुनै सब स्टेशन त कहिले कुनै रिडिङ्ग प्वाइन्टमा” उर्जामन्त्रीले यसो भन्दा दर्शकदीर्घाले भने कुलमानको सम्मानमा ताली नै बजायो । नेपालका सरकारी कार्यालय साँझ ५ बजे बन्द हुने गर्छन । कुलमान घिसिङले राती ११ बजेसम्म कार्यालयको काम गरेको कुरा दर्शकका लागि समेत अनौठो थियो । राती ११ बजे पनि कुलमानजीले उज्यालो नेपालको सपना पुरा गर्न प्रधानमन्त्री र उर्जामन्त्रालयको निर्देशनको पालना गरेको उनले बताए । “यो टीम स्पिरिटले हामी उज्यालो नेपालको सपना साकार पार्न सक्छौं ।” उनको भनाई थियो । उर्जामन्त्रीले प्रधानमन्त्री प्रचण्डको निर्देशनमा सिंगो उर्जा मन्त्रालय, कुलमान घिसिङ, उर्जा सचिवलगायत मन्त्रालय अन्तर्गतका दशौं हजार कर्मचारीले यो अभियानमा सहयोग गरेकोमा धन्यवाद समेत दिए ।

काठमाडौं, माघ २१। प्रमुख निर्वाचन आयुक्त डा। अयोधीप्रसाद यादवले सरकारले गरेको निर्णयबाट आयोगका लागि निर्वाचनको तयारी गर्ने बाटो खुलेको स्पष्ट पारेका छन्। शुक्रबार रिपोर्टर्स क्लब नेपालले आयोजना गरेको साक्षात्कारमा प्रमुख आयुक्त डा। यादवले सरकारको हिजोको निर्णयले निर्वाचन आयोगलाई तयारीको लागि बाटो खुलेको बताएका हुन्। उनले भने, ‘सरकारको हिजो बसेको मन्त्रिपरिषदको निर्णयले हामीलाई निर्वाचनको लागि तयारी गर्न बाटो खुलेको छ, हामी अब तयारीमा जुट्छौं।’ क्लबका सभापति ऋषि धमलाको सभापतित्वमा आयोजित साक्षात्कारमा बोल्दै प्रमुख आयुक्त यादवले सरकारले पठाएको पत्र हेरेपछि मात्रै थप कुरा भन्न सकिने स्पष्ट पारे। यादवले प्रतिवेदन नपाएसम्म मतदान केन्द्र कहाँ राख्ने, मतदान अधिकृत कसरी खटाउने, मतपत्र कस्तो हुने र कसरी छाप्ने लगायतका कुरा टुङ्गो लगाउन नसकिने बताए। सरकारले मिति नतोकी चुनावको तयारी गर्न पठाएको पत्रले चुनाव हुनेमा आशा जगाए पनि त्यतिले पर्याप्त नहुने उनको भनाई थियो। यादवले भने “सरकारले पठाएको पत्रले टुकी बाल्ने काम भएको छ । तर उज्यालो दिने गरी बल्न पाएको छैन ।’ आयोग जेठ भरमा चुनाव गराउन प्रतिबद्ध रहेको भन्दै प्रमुख आयुक्त यादवले चुनाव सम्बन्धी बाँकी काम तत्काल गर्न दलहरु र सरकारलाई आग्रह पनि गर्नुभएको छ । स्थानीय तह पूर्नसंरचना आयोगको प्रतिवेदन पाएपछि मात्रै आयोगलाई काम गर्न थप सजिलो हुने उनले बताए।’ निर्वाचन आयोग चुनावको तयारीमा जुटिसकेको र सरकारले भनेकै मितिमा चुनाव गर्न सकिने उनले विश्वास व्यक्त गरे। आयोगको प्रतिवेदन पाए मतदान स्थल कहाँ राख्ने लगायतका प्राविधिक तयारी गर्न सजिलो हुने उनको भनाई थियो। यादवले प्रतिवेदन सार्वजनिक नभएपनि आफूहरुले प्रत्यक्ष तथा अप्रत्यक्ष रुपमा जानकारी लिएर त्यही अनुसारको कामहरु भित्री रुपमा थालिरहेको समेत जनाए। उनले भने,‘सरकार निर्वाचनको मिति घोषणा गर्न उन्मुख छ्, हामीले पनि निर्वाचनको मिति चाँडै घोषणा गर्नुपर्छ भनेर सहजकर्ताको भूमिका निर्वाह गरिरहेका छौं।’ उनले निर्वाचनको लागि दलहरुवीच समझदारी बन्नुपर्ने आवश्यकत्ता औंल्याउँदै अब जेठभन्दा अर्को विकल्प नहुने समेत बताए। ‘स्थानीय निर्वाचनको लागि सूरु सूरुमा चैत्रमा चुनाव गर्ने भनियो, त्यसपछि बैशाख भनियो, अब जेठभन्दा अर्को विकल्प छैन्।’ यादवले स्थानीय निर्वाचन एकैदिनमा सम्भव नभएकोले दुई वा तीन चरणमा प्रत्यक्ष चुनाव गर्ने समेत बताए।

काठमाडौँ, माघ २१ । नेपाली काँग्रेसका शीर्षनेताहरुले संविधान कार्यान्वयन गर्न निर्वाचन अपरिहार्य भएको हुँदा स्थानीय निकायको निर्वाचनमा जुट्न आफ्ना कार्यकर्तालाई निर्देशन दिएका छन् । उनीहरुले एकै स्वरमा भने – “तत्कालीन पार्टी सभापति सुशील कोइरालाको कुशल नेतृत्वमा जारी भएको संविधान कार्यान्वयन गर्ने प्रमुख जिम्मेवारी नेकाको नै हो, निर्वाचनबाट नै संविधान कार्यान्वयनको सुरुवात हुन्छ ।” नेकाको भ्रातृ सङ्गठन नेपाल ट्रेड युनियन काँग्रेसको दुई दिने राष्ट्रिय परिषद् बैठकलाई आज यहाँ सम्बोधन गर्ने क्रममा शीर्षनेताहरुले जनताले दोस्रो संविधानसभाको निर्वाचनमा मत दिए जस्तै स्थानीय निर्वाचनमा पनि नेकालाई मत दिने विश्वास समेत व्यक्त गरे । उनीहरुले व्यवस्थापिका–संसदबाट स्थानीय निर्वाचनका लागि आवश्यक विधेयक पारित भइसकेको र निर्वाचन आयोगले पूर्णता पाएको सन्दर्भमा स्थानीय निर्वाचनको मिति जुनसुकै समयमा घोषणा हुनसक्ने बताए । नेकाका सभापति एवम् पूर्वप्रधानमन्त्री शेरबहादुर देउवाले संविधान कार्यान्वयनका लागि निर्वाचनमा जानुको विकल्प नरहेको बरु, एक वर्षभित्र तीनवटा निर्वाचन सम्पन्न गर्नुपर्ने चुनौती रहेको बताए । “निर्वाचनमा जान काँग्रेस अवस्थामा छ, संविधान कार्यान्वयनका लागि काँग्रेस जुनसुकै मूल्य चुकाउन तयार छ,” उनले भने । स्थानीय निकायको निर्वाचनमा जित्ने व्यक्तिलाई मात्र टिकट दिइने पनि उहाँले खुलासा गर्नुभयो । श्रम आयोग श्रम ऐन संशोधन गरी पनि गठन गर्न सकिने उनको भनाइ थियो । वरिष्ठ नेता रामचन्द्र पौडेलले संविधान सबै राजनीतिक दलको सम्झौताबाट आएको हुँदा मजदुरले उठान गरेका सबै माग समेट्न नसकिएको स्पष्ट पार्दै श्रम ऐन संशोधनबाट श्रमिकका माग पूरा गर्न सकिने बताए । “उद्योग स्थापना नभई मजदुरले काम पाउँदैनन्, मजदुर नभई उद्योग पनि चल्न सक्दैनन्, यस्तो अवस्थामा उद्योग र मजदुरका आपसी समन्वयबाट मात्र श्रमिक हक स्थापित हुन्छ,” उनले भने । महामन्त्री डा शशाङ्क कोइरालाले संविधान कार्यान्वयन गर्न एक वर्षभित्रमा तीनवटा निर्वाचन सम्पन्न गर्नुपर्ने जिम्मेवारीलाई पूरा गर्न कांग्रेस तयार रहेको बताए । उनले तत्कालीन पार्टी सभापति विश्वेश्वरप्रसाद कोइराला र गिरिजाप्रसाद कोइरालाको समयमा पूर्वाधार विकासले तीव्रता पाई देशले कोल्टे फेरेको दाबी गरे । कोषाध्यक्ष सीतादेवी यादवले सरकारले स्थानीय निकायको निर्वाचनको मिति घोषणा गर्न आन्तरिक तयारी गरिरहेको हुँदा निर्वाचनमा तयारी जुट्न निर्देशन दिए । नेपाल ट्रेड युनियन काँग्रेसका अध्यक्ष खिलानाथ दाहालले दुईदिने बैठकमा श्रमिकका हकअधिकारका बारेमा छलफल हुने जानकारी दिए ।

काठमाडौँ, माघ २१ । नेकपा एमालेले चुनावको लागि पुष्पकमल दाहाल‘प्रचण्ड’ नेतृत्वको सरकारलाई सहयोग गर्ने बताएको छ । बिहिबार बसेको मन्त्रीपरिषद्को बैठकले स्थानीय तहको चुनाव घोषणा गर्ने तयारी गरेको सरकारलाई एमालेले कुनै हालतमा पनि सहयोग गर्ने एमालेको बरिष्ठ नेता झलनाथ खनालले जानकारी दिए । शुक्रबार एक रेडियोलाई अन्तर्वार्ता दिदैँ पूर्वप्रधानमन्त्री खनालले सरकारले ढिलै भएपनि एउटा राम्रो काम गरेको र चुनावका लागि वातावरण बनाएको बताए । यतिबेला राष्ट्रको मुल एजेण्डा चुनाव र संविधान कार्यान्वयन भएको उनले बताए । एमालेले चुनावका विषयमा सरकारलाई सहयोग गर्न तयार रहेको उनको भनाई थियो । खनालले संविधान संशोधन भने अहिले हुन नसक्ने दोहार्याए । अहिले संसोधन भन्दा भन्दा पनि कार्यन्वयनमा जोड दिनुपर्ने उनको तर्क छ । “अहिले संविधानको कार्यन्वयन गर्ने समय हो” नेता खनालले भने “सविधान कार्यन्वयन गर्न छोडेर अरू काममा लाग्नु हुँदैन ।” सरकारले पेश गरेको सविधान संशोधन प्रस्तावले राष्ट्रलाई हिंसा, झगडा र अशान्ततिर धकेकलेको उनले बताए । ‘पहिले चुनाव सकौं त्यसपछि संविधान संशोधनतिर लाग्नुपर्छ । जुनपायो त्यही बेला जे विषयमा पनि संशोधन गर्न खोजेर हुन्न’ खनालले भने, ‘समय आएपछि संविधान संसोधन हुन्छ।’

काठमाडौँ,  माघ २१ । सत्यनिरुपण तथा मेलमिलाप र बेपत्ता छानबिन आयोगले द्वन्द्वपीडितको माग सम्बोधन गर्न नसकेकामा चिन्ता व्यक्त गरिएको छ । द्वन्द्वपीडित साझा चौतारीले बिहीबार आयोजना गरेको अन्तरक्रियामा पीडित परिवार तथा अधिकारकर्मीले उच्चस्तरीय मानव अधिकार आयोगले पीडित पक्षलाई सामाजिक न्याय उपलब्ध गराउन नसकेकोमा दुःख व्यक्त गर्नुभयो । मानवअधिकारकर्मी चरण प्रसाईंले अन्यायमा परेका समुदायलाई न्याय उपलब्ध गराउने जिम्मेवारी आयोगको भए पनि आयोग गठन भएको लामो समय हुँदा पनि पीडितले न्याय प्राप्त गर्न नसकेको औँल्याउनुभयो । अधिवक्ता दिनेश त्रिपाठीले द्वन्द्वका घाउलाई मेटाउन पीडितलाई सामाजिक न्याय दिनुपर्नेमा जोड दिँदै त्यसो हुन नसके अन्तर्राष्ट्रिय अदालतमा सो विषयलाई केन्द्रित गर्ने बताउनुभयो । एमनेस्टी इन्टरनेसनल नेपालका अध्यक्ष राजन कुइँकेलले द्वन्द्वकालीन घटनाका पीडितलाई न्याय र पीडकलाई कारबाही गर्नसक्ने गरी सशक्त आयोग बनाउनुपर्ने बताउँदै यी घटनाको समाधान देशभित्रै खोज्नुपर्ने र त्यसो हुन नसके अन्तर्राष्ट्रिय अदालतमा जानुपर्ने सुझाव दिनुभयो । द्वन्द्वपीडित साझा चौतारीका अध्यक्ष सुमन अधिकारीले बेपत्ता पारिएका व्यक्तिको छानबिन, सत्य निरुपण तथा मेलमिलाप आयोगका दुई वर्षका उपलब्धि उजुरी दिने कार्यमा मात्र सीमित रहेको बताउनुभयो । रासस

खिम्ती, माघ २० । प्रधानमन्त्री पुष्पकमल दाहाल प्रचण्डले ‘भारतले बिजुली किन्दैन’ भन्ने बहाना बनाएर विद्युत उत्पादनमा अवरोध सिर्जना गरिएको बताएका छन् । खिम्ती–ढल्केबार २२० केभी प्रसारण लाइनको उद्घाटन गर्दै प्रचण्डले विद्युत उत्पादन बिजुली बाल्नका लागि मात्रै नभएर समग्र आर्थिक समृद्धिका लागि अत्यावश्यक रहेको बताए । जलविद्युत र उर्जा क्षेत्रमा नेपाल संसारमा नै उत्तम भएको बताउँदै प्रधानमन्त्रीले प्रसारण लाइनको अभावमा थुप्रै आयोजना रोकिएका वा सम्भाव्यता अध्ययन नै नभएको टिप्पणी गरे । विद्युतीकरण नै नेपालको आर्थिक विकास, औद्योगिकरण र आर्थिक समृद्धिको आधार भएकोले नेपालको भविष्य कायापलट ल्याउन सक्ने उनको जिकिर थियो । नेपालमा जलविद्युत उत्पादन गर्न नचाहने तत्वहरुले गर्दा विद्युत उत्पादन हुन नपाएको बताउँदै प्रचण्डले भारतको निहुँ बनाएर किन उत्पादन गर्ने भन्ने तर्क दिने गरेको बताए । “भारतले विजुली किन्दैन, अनि किन बिजुली उत्पादन गरिाख्ने भन्ने सोचाई छ” प्रचण्डले भने, “यो विद्युत उत्पादनबारेको परम्परागत र गलत सोचाईं हो ।” हामीले बिजुलीको उत्पादन बत्ती बाल्नका लागि मात्रै हो भन्ने सोचाई नै गलत भएको उनको टिप्पणी थियो । नेपालमा उत्पादन भएको बिजुली आर्थिक समृद्धिका लागि उपयोग गर्ने हो भने नेपालमा नै यसको खपत हुने उनको भनाई थियो । “उद्योग, कलकारखाना, शिक्षा, पर्यटन, कृषिमा आधुनिकीकरण गर्नमा हामीले उत्पादन गरेको बिजुली खपत हुन्छ ।” उनले भने, “यसबाट हजारौंलाई रोजगारी दिन सकिने र देशलाई नै आर्थिक समृद्धिको दिशामा लैजान सकिन्छ” । हजारौं मेघावट विद्युत् नेपालमै खपत हुन सक्छ ।” उर्जा मन्त्रीमा जनार्दन शर्माको क्षमता बुझेर जिम्मेवारी दिएको प्रचण्डले बताए । “क्षमता देखेर नै उर्जा मन्त्रालयको जिम्मा दिएको हुँ । कुलमानजीलाई कार्यकारी निर्देशक बनाउँदा मैले ठूलो संघर्ष गर्नुपर्यो । सही मान्छेलाई सही जिम्मा दिँदा ठूलो उपलब्धि हुन सक्दो रहेछ । व्यवस्थापनमा सुधार गर्यो भने मेहेनत र इमान्दारिता देखायो भने ठूलै काम हुँदो रहेछ ।” नेपाल विद्युत प्राधिकरणका कार्यकारी निर्देशक कुलमान घिसिङलाई ल्याउन समेत ठूलो संघर्ष गर्नुपरेको प्रधानमन्त्रीको भनाई थियो ।

काठमाडौं, माघ २० । व्यवस्थापिका संसदले निर्वाचनसम्बन्धी थप एउटा विधेयक पारित गरेको छ । बिहिबार बसेको संसदको बैठकले स्थानीय तह निर्वाचनसम्बन्धी विधेयक पारित गरेको हो । यसले सरकारलाइ स्थानीय तह निर्वाचन गर्ने बाटो खुलेको छ । योसँगै निर्वाचनसँग सम्बन्धित ४ वटा बिधेयक संसदबाट पारित भएका छन । मस्यौदा भएका मध्ये एउटा बिधेयक समितिमा छलफलको क्रममा छ । राजनीतिक दलसम्बन्धी विधेयकबारे राज्यब्यवस्था समितिमा छलफल भएपनि थ्रेसहोल्ड राख्ने कि नराख्ने भन्नेमा दलहरुबीच बिबाद भएका कारण सहमति हुन सकेको छैन । बुधबार राज्यव्यवस्था समितिले हिजोको बैठकमा प्रतिवेदन सहित प्रस्तुत गरेको उक्त विधेयक आज बहुमतले पारित भएको हो । संसदले यसअघि निर्वाचन कसुर तथा सजाय, मतदाता नामावली र निर्वाचन आयोगको काम, कर्तब्य र अधिकारसम्बन्धी विधेयक पारित गरिसकेको थियो ।

काठमाडौँ, माघ २०। नेकपा (एमाले)का अध्यक्ष तथा पूर्व प्रधानमन्त्री केपी शर्मा ओलीले नेपालको कृषि प्रणालीलाई आधुनिकीकरण गरेर आत्मनिर्भर बनाउनुपर्ने बताएका छन् । अखिल नेपाल किसान महासङ्घले आज यहाँ आयोजना गरेको दक्षिण एसियाली किसान सम्मेलन शुभारम्भ गर्दै अध्यक्ष ओलीले कृषिलाई व्यावसायिक बनाएर देशलाई कृषिमा नै आत्मनिर्भर बनाउनु पर्ने बताए । “किसानमा अझै पनि पुरानो पद्धतिअनुसार खेती गर्ने बानी छ”, उनले भने –“नयाँ प्रविधि प्रयोग गरी कृषिलाई आधुनिकीकरण गरेर उत्पादन बढाउनुपर्दछ ।” भूमिमा असमान वितरणले वास्तविक कृषकसँग भूमिको पहुँच नभएकाले भूमिको समान वितरण गरेर राज्यले कृषकलाई भूमि उपलब्ध गराउनु पर्ने धारणा व्यक्त गर्दै अध्यक्ष ओलीले केही वर्षयता हाउजिङ र प्लटिङका नाममा उर्वर भूमिलाई नष्ट गरेकाले त्यसलाई रोक्नुपर्नेमा जोड दिए । उहाँले आगामी माघ ७ गतेभित्र तीन तहको निर्वाचन गरेर देशलाई राजनीतिक सङ्क्रमणकालबाट टुङ्ग्याउनुपर्ने पनि बताए । एमाले उपाध्यक्ष तथा अखिल नेपाल किसान महासङ्घका अध्यक्ष वामदेव गौतमले सबै दलको सहयोग भए १० वर्षभित्रमा नेपालमा समाजवाद आउने दाबी गरे । सम्मेलनले नवउदारवाद र यसले किसानलाई पारेको नकारात्मक प्रभावका विषयमा छलफल गरी किसानको हक अधिकार, खाद्य सम्प्रभुता, जलवायु परिवर्तन, भूमि अधिकारका क्षेत्रमा नयाँ नीति तर्जुमा गर्दै नयाँ रणनीतिक योजनासमेत बनाउने महासङ्घका महासचिव बलराम बास्कोटाले जानकारी गराए । दुई दिनसम्म चल्ने सम्मेलनमा नेपालसहित भारत, पाकिस्तान, बङ्गलादेश र श्रीलङ्काका १५ किसान सङ्गठनका अगुवाको सहभागिता छ । रासस

जनकपुर, माघ २० । पछिल्लो समय जनकपुर केन्द्र बनाएर तराईका जिल्लामा खुलेआम विखण्डनकारी गतिविधि सञ्चालन गर्दै आएका सीके राउतलाई प्रहरीले प्रक्राउ गरेको छ । बिहीबार दिउँसो जनकपुर माछाबजार नजिकै कोठामा छापा मारेर प्रहरीले राउतलाई पक्राउ गरेको हो । प्रधानमन्त्री पुष्पकमल दाहाल‘प्रचण्ड’ले देशलाई विखण्डन गर्न खोज्ने कसैलाई नछोड्ने बताइरहेका बेला उनी प्रकाउ परेका हुन् । जिल्ला प्रहरी कार्यालयले सिराहाले पक्राउका लागि जिप्रका धनुषालाई पत्र पठाएपछि धनुषा प्रहरीले राउतलाई पक्राउ गरेको जनाएको छ । दिउँसो तीन बजे प्रहरी टोली राउत पक्राउ गर्न जनकपुरको पुरानो बसपार्क नजिकै रहेको राउतको डेरामा पुगेको थियो। जनकपुरको पुरानो बसपार्क नजिकैको डेराबाट उनलाई प्रहरीले पक्राउ गरेको हो। सिराहा स्थायी घर भएका उनी जनकपुरमा कोठा भाडामा लिएर उनी त्यहाँ बस्दै आएका थिए। करिब ३ बजेतिर उनलाई पक्राउ गरिएको हो। सप्तरी स्थायी घर भएका राउत पछिल्लो समय जनकपुरमा डेरा लिएर बस्दै आएका थिए । माघ ५ गते राउतले सिराहाको लाहानमा सभा गरेका थिए र, देश टुक्राउने अभिव्यक्ति दिएका थिए । यो घटनापछि जिल्ला प्रहरी कार्यालय सिराहाले उनको नाममा पक्राउ पूर्जी जारी गरेको छ । र, उनलाई सिराहा नै पठाइने जिल्ला प्रहरी कार्यालय धनुषाले जनाएको छ ।

काठमाडौँ, माघ २०। नेपाली काँग्रेसका सभापति शेरबहादुर देउवाले मुलुकमा तीन तहको निर्वाचन गराइए मात्र प्रजातन्त्र बलियो हुने बताएका छन् । प्रजातान्त्रिक विचार समाजद्वारा प्रकाशित पुस्तक ‘चिन्तन’को बिहिबार लोकार्पण गर्दै सभापति देउवाले सबै दललाई मिलाएर तीन तहको निर्वाचन गराइए मात्र प्रजातन्त्र बलियो हुने बताए । उनले भने “सम्पूर्ण देशलाई मिलाउने जिम्मेवारी काँग्रेसको काँधमा रहेको छ ।” पूर्व प्रधानमन्त्री देउवाले मधेसी दलकोे भावनालाई समेट्नका लागि संशोधन प्रस्ताव दर्ता भएको र यसलाई पारित गर्न नेकपा ९एमाले०ले समेत सहयोग गर्नुपर्ने बताउनुभयो । उहाँले संविधान कार्यान्वयन भएमात्र मुलुक आर्थिक रुपमा अगाडि बढ्ने भएकाले संविधान कार्यान्वयनका लागि सबै दल एकजुट हुनुपर्नेमा जोड दिए । मुलुकका सबै दल प्रजातान्त्रिक पद्धतिमा आइसके पनि पूर्ण प्रजातान्त्रिक हुन नसकेको उहाँको भनाइ थियो । उनले नेपालमा भएका प्रजातान्त्रिक उपलब्धिलाई जनतामाझ चिनाउन प्रजातान्त्रिक विचार समाजको ठूलो योगदान रहेको उल्लेख गरे । सहरी विकासमन्त्री अर्जुननरसिंह केसीले केही दिनमै स्थानीय निकायको निर्वाचन गर्ने तयारीका साथ सरकार लागिपरेको बताए । उनले भने– “संविधान कार्यान्वयनका लागि संविधान निर्माण गरेका शक्तिहरु एक हुनुपर्छ ।” मन्त्री केसीले भारतमा संविधान निर्माण भएपछि अहिलेसम्म १३१ पटक संशोधन भइसकेको उदाहरण दिँदै नेपालको संविधान संशोधन गर्नु हुँदैन भन्ने हठ त्याग्न प्रमुख प्रतिपक्षी दल एमालेलाई आग्रह गरे । पुस्तकका टिप्पणीकार एवम् काँग्रेसका नेता शोभाकर पराजुलीले नेपाली काँग्रेसले पछ्याएको बाटोलाई पुस्तकले समेटेको बताउँदै उक्त पुस्तक नेपाली काँग्रेस पार्टीकै दस्तावेज बन्नसक्ने विश्वास व्यक्त गर्नुभयो । उनले भने– “काँग्रेसले पार्टीभित्र निष्ठा राख्ने र पार्टीलाई योगदान गरेका व्यक्तिलाई पाखा लगाउने प्रवृत्ति बढेको छ त्यो गलत हो ।” टिप्पणीकार एवम् नेपाल पत्रकार महासङ्घका पूर्व अध्यक्ष धर्मेन्द्र झाले पुस्तकले पुरानो पुस्तादेखि नयाँ पुस्ताका लेखकको विचार समेटेकाले पठनीय रहेको बताउनुभयो । उहाँले पार्टीभित्र देखिएको गुटउपगुटको राजनीतिलाई पुस्तकले राम्रोसँग केलाएको उल्लेख गरे । समाजका अध्यक्ष डा केदारनरसिंह केसीले काँग्रेसले पटकपटक गरेका आन्दोलन स्थायी हुन नसक्नु काँग्रेसको कमजोरी भएको बताए । समाजले नेपालको प्रजातान्त्रिक आन्दोलनमा महत्वपूर्ण भूमिका खेल्नुभएका विश्वेश्वरप्रसाद कोइराला, कृष्णप्रसाद भट्टराई, गणेशमान सिंहको स्मृतिमा विशेषाङ्क निकालिसकेको छ । समाजका महासचिव गोकर्ण अर्यालका अनुसार समाजले ४० भन्दा बढी जिल्लामा सङ्गठन विस्तार गरिसकेको छ ।

  काठमाँडौँ, माघ २० । सरकारले आज स्थानीय तहको चुनाव मिति घोषणा गर्ने भएको छ । बिहिबार प्रधानमन्त्री तथा मन्त्रीपरिषद्को कार्यालयमा बस्ने मन्त्रिपरिषद बैठकले निर्वाचन घोषणा गर्ने तयारी गरेको हो । चुनाव मिति घोषणा गर्ने भएकोले प्रधानमन्त्री पुष्पकमल दाहाल प्रचण्डले खिम्ती-ढल्केबर प्रशारण लाईन उद्घाटन सकेर राजधानी फर्किसकेका छन् । आज ४ बजे बस्ने मन्त्रिपरिषदको बैठकले निर्वाचनको घोषणा गर्ने प्रधानमन्त्री प्रचण्डले खिम्तीमा आयोजित एक कार्यक्रममा जानकारी दिए । “यता इतिहासमैं पहिलोपटक २२० केभी प्रसारण लाइनको उदघाटन गरे, एकैछिनपछि संविधान कार्यान्वयनका लागि आवश्यक निर्वाचनबारे निर्वाचन आयोगलाई निर्देशित गर्ने निर्णय हूँदैछ” प्रचण्डले भने संबिधान संशोधनको प्रस्तावलाई समेत प्रक्रियामार्फ़त सदनमा अघि बढाउन संसद सचिवालयसँग छलफल भाएको प्रचण्डले बताए केही तत्वहरू यथास्थितिमैं बस्न खोजेको र एतिहासिक उपलब्धि खोस्न लागेकोमा प्रचण्डले आपत्ति जनाए नेपाल र नेपालीको एकता ख़तरामा पारने, देशलाई बिखण्डन गर्न खोज्ने तत्वहरुलाई कडडा कारवाही गर्ने समेत प्रचण्डले बताए नेपाल र नेपालीको एकत्वलाई कसैले चुनौती दिन नसक्ने प्रचण्डको भनाइ थियो

दोलखा, खिम्ती, माघ २० । खिम्ती-ढल्केबर प्रशारण लाईन अौपचारिक रुपमा जोडिएपछि उपत्यका लगायत देशका धेरै जिल्लामा लोडसेडङ अन्त्य गराउन महत्वपूर्ण सफलता मिलेको छ । प्रशारण लाईनको प्रधामन्त्री पुष्पकमल दाहाल प्रचण्डले बिहिबार एक कार्यक्रमबीच उद्घाटन गरे । २०६२ ०६३ मा सुरु भएको खिम्ती-ढल्केवर प्रशारण लाइनको निर्माण छिटो सकाउन प्रधानमन्त्री प्रचण्ड र ऊर्जामन्त्री जनार्दन शर्माले पटक पटक निरीक्षण र ताकेता गरेका कारण समयमै सम्पन्न हुन सकेको हो । विद्युत प्राधिकरणका प्रमुख कार्यकारी कुलमान घिसिङ सक्रिए भए । ३ वटा निर्माणकम्पनी संलग्न यो प्रसारण लाइनमा ७२० केभीसम्म बिध्युत चार्ज गर्न सकिंने कार्यकारी प्रमुख घिसिङले बताए । तर अहिले भने २२० केभी प्रसारण गरिएको उनले जानकारी दिए । परियोजना निर्माणका क्रममा २ हजार रोपनी जग्गा अधिग्रहण गरिएको थियो । प्रशारण लाईनबाट के फ़ाइदा हुन्छ ?  प्राधिकरणका प्रमुख घिसिङका अनुसार यो प्रशारण लाईन सम्पन्न भएपछि राजधानीमा बिजुली ल्याउँदा अन्य ठाउँलाई भार हुँदैन । यसअघि काठमाडौं उपत्यकामा बिजुली ल्याउँदा पोखराको बिजली प्रयोग गरेर पोखरालाई भार पर्ने गरेको थियो तर अहिले यो प्रसारण लाईनलाई काठमाडौंसँग जोड़ेको कारण खसम्तीको बिजुली सिधै उपत्यका पुर्याउन सजिलो भएको उनले बताए ।   यसले पोखराको लोडशेडिंग अन्त्य गर्न समेत ठुलो सहयोग गरेको उनले जानकारी दिए । अब पोखरामा हामीले निर्धक्क भएर लोडसेडिङ अन्त्य भएको छ । ढल्केबर या खिम्तीमा समस्या आए पनि वैकल्पिक रूपमा  एउटामा समस्या देखिए अर्कों बाट पठाउन सकिने भएको छ । बिरगंज लगायत् का क्षेत्रमा पावर भोल्टेज कम भएर उद्योग चल्न नसकने समस्या अन्त्य भएको छ । यो नेपाल र पहाड़ जोड़ने महत्वपूर्ण प्रसारण लाइन बनेको छ । यसबाट भारतलाई बिजली बेच्न या ख़रीद गर्न महत्वपूर्ण सहयोग पुग्ने घिसिङले जानकारी दिए । खिम्ती-ढल्केबर प्रसारण लाइन निर्माण भएपछि तामकोशी करिडोर लगायतका क्षेत्रमा निर्माणाधीन बिध्युत परियोजनाहरूबाट उत्पादन हुने बिजुली निर्यात गर्न सकिने भएको छ । यसैगरी रामेछाप दोलखा र ओखलढुङ्गाका परियोजनाको बिध्युतमा पनि यसले महत्वपूर्ण भूमिका खेल्नेछ । यो परियोजनाबाट प्रभावित ३ ज़िल्लाका ५५ गाविसमा १ अरबको बिध्युतिकरण कार्यक्रम शुरू भएकों छ ।  नेपाल सरकार, विश्व बैङ्क लगायतको सहयोगमा कुल दुई अरवको लगानीमा यस योजना बनेको हो ।

खिम्ती, माघ २० । प्रधानमन्त्री रामेछापको खिम्ती २२० केभी प्रशारण लाईनको उद्घाटन गर्न दोलखा पुगेका छन् । यसअघि १३२ केभी प्रशारण लाइन रहेको खिम्ती आजैदेखि २२० प्रशारण लाइनमा जोडिएको हो । बिहिबार विहान पुगेका प्रधानमन्त्रीको साथमा उर्जामन्त्री जनार्दन शर्मा, नेपाल विद्युत प्राधिकरणका प्रमुख कार्यकारी अधिकृत कुलमान घिसिङ रहेका छन् । प्रधानमन्त्रीलाई खिम्तीमा भव्य स्वागत गरिएको छ । स्वागतमा नेपाली कांग्रेस, माले, नयाँ शक्ति, विप्लव नेतृत्वको माओवादी र बैद्य माओवादीले स्वागत गरेका हाम्रा सहकर्मी गोकर्ण भट्टले जनाएका छन् । खिम्तीमा रहेको खिम्ती–ढल्केबर प्रशारण लाइनको प्रधानमन्त्रीले उद्घाटन गरेका हुन् । विगत ११ वर्षदेखि विभिन्न बहानामा रोकिँदै आएको उक्त प्रशारण लाइनको उर्जामन्त्री जनार्दन शर्माको कडा निर्देशनले तीव्र रुपमा निर्माण भएको हो । खिम्ती–ढल्केबर प्रशारण लाइन माघ १ गतेदेखि परीक्षण प्रसारण शुरु गरिएको थियो । उक्त आयोजनाले पाँच जिल्लाका १६ गाविस र एक नगरपालिका लाभान्वित भएका छन् । विश्व बैंकको सहयोगमा निर्माण सुरु भएको सो आयोजना सन् २००९ मा सम्पन्न हुनुपर्ने भनिए पनि जग्गा प्राप्ति, मुआब्जा वितरण तथा विभिन्न स्थानीय समस्याका कारण निर्माणमा ढिलाइ भएको थियो । prachanda-khimti 1 prachanda-khimti 2 prachanda-khimti 3 prachanda-khimti 5 prachanda-khimti 7 prachanda-khimti कार्यक्रमको अध्यक्षयता कुलमान घिसिङले गरेका छन् । प्रमुख अतिथि प्रधानमन्त्री प्रचण्ड रहेका छन् । विशेष अतिथि उर्जामन्त्री जनार्दश शर्मा प्रभाकर रहेका छन् । एमाले कांग्रेस, माओवादी, माले नयाँ शक्ति विप्लव बैद्य माओवादी राप्रपा सबै दल उपस्थित रहेका छन् ।

काठमाडौं, माघ २० । नेपाली कांग्रेसले भातृ संगठन नेपाल विद्यार्थी संघ (नेविसंघ)लाई स्वतन्त्र विद्यार्थी युनियन (स्ववियु) चुनावमा होमिन निर्देशन दिएको छ । नेविसंघले त्रिभुवन विश्व विद्यालयले तोकेको उमेर हद अनुसार चुनावमा नजाने घोषणा गरेर आन्दोलनमा उत्रिएपछि माउ पार्टीले चुनावमा लाग्न निर्देशन दिएको हो । बिहिबार सिंहदरबारमा बसेको कांग्रेस पदाधिकारी बैठकले २८ वर्षे उमेर हद स्वीकार्दै स्ववियु निर्वाचनमा होमिन नेविसंघलाई निर्देशन दिएको हो। बैठकमा पार्टी सभापति शेरबहादुर देउवा, वरिष्ठ नेता रामचन्द्र पौडेल, महामन्त्री शशांक कोइराला, प्रकाशमान सिंह लगायतका नेताहरु र नेविसंघका वर्तमान पदाधिकारीसमेत सहभागी थिए । बैठकमा सभापति देउवाले नेविसंघका नेताहरुलाई सबै असन्तुष्टि त्यागेर स्ववियु निर्वाचनमा होमिन निर्देशन दिएका हुन् । ‘यो निर्देशनसँगै नेविसंघमा जुन समस्या थियो त्यो सबै अन्त्य भएको नेविसंघका सभापति नैनसिंह महरले जानकारी दिए । ‘अब हामी एक भएर स्ववियु निर्वाचनमा जानेछौं,’ उनले भने, ‘म नेविसंघका सबै साथीहरुलाई निर्वाचनमा होमिन र आजैदेखि निर्वाचनको प्रचार प्रसारमा जुट्न निर्देशन दिन्छु,’ उनले भने । नेविसंघको असन्तुष्ट पक्षले उमेर हदको विरोधमा क्याम्पसमा तालाबन्दी लगायत विरोधका कार्यक्रम गरिरहेका थिए। त्रिभुवन विश्वविद्यालयले आगामी फागुन १४ गते स्ववियु निर्वाचनको मिति तोकेको छ। उक्त चुनावमा पहिलोपटक २८ वर्षे उमेर हद र मिश्रित चुनाव प्रणाली लागू गर्ने बताएको छ।