काठमाडौं, पौष २९ । नयाँ शक्ति नेपालका संयोजक तथा पूर्व प्रधानमन्त्री बाबुराम भट्टराईले नेपालमा ‘ओलीवाद’को खतराप्रति युवाहरुलाई सचेत तुल्याएका छन् । माघे संक्रान्तिको पूर्वसन्ध्यामा शुभकामना दिने क्रममा डा. भट्टराईले अमेरिकामा ट्रम्पवादको खतराजस्तै नेपालमा पनि ओलीवादको हावा बग्ने खतरा बढेको भन्दै युवाहरुलाई मानव समाजको अध्ययन गर्न सुझाव समेत दिएका छन् । “विश्व यतिबेला ट्रम्पिज्म’काृ खतरनाक हावामा बग्दैछ भने नेपालमा पनि ओलिज्मको हावा बग्ने खतरा देखिएको छ” डा. भट्टराईले आफ्नो फेसबुक भित्तामा लेखेका छन, “यसको मुख्य कारण २१ औं शताब्दीसम्म आइपुग्दा ज्ञान र विज्ञानका क्षेत्रा जुन ठूला आविस्कारहरु भएका छन्, तीबारे हाम्रो युवा पुस्ता राम्ररी परिचित नहुनु र केही निहिति स्वार्थी व्यक्तिहरुको हौवापछाडि दौडिन पुग्नु हो । उनको तर्क छ । डा. भट्टराईले तीनवटा पुस्तक पढ्न सुझाव दिँदै अगाडि भनेका छन् ः हामीले यतिवेला बुझ्नुपर्ने मुख्य कुरा भनेको – हामी मानव जाति को हौं? हामी कहिले, कहाँबाट, कसरी विकसित हुँदै आयौं ? हामी विभिन्न जाति, राष्ट्र, समुदायमा कसरी विभाजित भयौं? हामी बीचको साझापन र भिन्नता के हो? मान्छेमा निजीपन र सामुहिकता कसरी उत्पति भयो र ती दुइ वीचको अन्तर्सम्बन्ध के हो? मानव जाति र मानव सभ्यता भविष्यमा कुन दिशातिर उन्मुख हुँदैछ? हामी सचेत मान्छेहरूले हाम्रो मानव जातिलाई सुखसमृद्धि सहित सुरक्षित राख्ने हो भने के गर्नुपर्ला? आदि इत्यादि! यी सबैको उत्तर म जस्तो एउटा विपन्न ठाउँमा बस्ने मान्छेसंग हुने कुरो भएन! तर आजको सूचनासंचारको विकसित युगमा तपाइँहरूले खोज्न र पाउन सक्नुहुन्छ! त्यो दिशामा अघि बढ्न तपाईंहरूलाई यी निम्न पुस्तकहरू राम्रो रिफरेन्स बन्न सक्छन् कि? : 1. Edward O. Wilson (2012 ) The Social Conquest of Earth 2. Yuval Noah Harari ( 2014 ) Sapiens: A Brief History of Humankind 3. – do – Homo Deus: A Brief History of Tomorrow माघे संक्रान्ति २०७३ को हार्दिक शुभकामना !

काठमाडौं, पुस २९ । सरकारले राजधानीमा लामा र स्तरीय ठूला बस सञ्चालन गर्ने भएको छ । बस सञ्चालनका लागि काठमाडौं महानगरपालिकाको संयोजकत्वमा विभिन्न नगरपालिका सम्मिलित मुनाफारहित ‘उपत्यका नगर यातायात लिमिटेड’ नामको कम्पनी दर्ता हुँदैछ । काठमाडौं महानगरपालिका, ललितपुर उपमहानगरपालिका र भक्तपुर नगरपालिकासहित उपत्यकाका सबै नगरपालिकाले सेयरका रुपमा गरेको लगानी र सरकारबाट प्राप्त अनुदानबाट कम्पनी स्थापना गर्ने प्रक्रिया अघि बढाइएको स्थानीय विकासमन्त्री हितराज पाण्डेले जानकारी दिए । प्रधानमन्त्रीले गत भदौ २३ गते व्यवस्थापिका–संसद्मार्फत जनताका नाममा सम्बोधन गर्दै छ महिनाभित्र सय लामा र स्तरीय ठूला बस खरिद गरेर काठमाडौँ, विराटनगर, जनकपुर, वीरगन्ज, भरतपुर, बुटवल, नेपालगन्ज, धनगढी, पोखरा, सुर्खेत र घोराहीलगायत सहरमा नगरपालिकामार्फत सञ्चालन गरिने घोषणा गरेका थिए । कम्पनी दर्ता अन्तिम चरणमा बस सञ्चालनका लागि मुनाफारहित ‘उपत्यका नगर यातायात लिमिटेड’ नामको कम्पनी दर्ता हुँदैछ । मन्त्रालयले पुसको दोस्रो साता कामपाका अधिकृत राज्यप्रकाश प्रधानाङ्गसहितको समिति गठन गरेर १५ दिनभित्र कम्पनी दर्ता गर्न निर्देशन दिएको थियो । यो कमिटीलाई कम्पनीको कार्यालय सञ्चालन र जनशक्तिको व्यवस्थापन गर्ने जिम्मेवारी पनि दिइएको छ । सोही कम्पनीमार्फत स्तरीय बस चलाएर व्यवस्थापनको जिम्मा पनि उसैलाई दिने मन्त्रालयको योजना छ । सस्तो, सुलभ, स्तरीय र भरपर्दो नगर यातायात सेवा उपलब्ध गराइने, विमानस्थलमा सार्वजनिक यातायातको सुलभ पहुँच पुर्याइने र विभिन्न पर्यटकीय गन्तव्यमा सेवा पु¥याई पर्यटन प्रवद्र्धनमा सहयोग गरिने कम्पनीको उद्देश्य रहेको मन्त्रालयको पूर्वाधार विकास महाशाखाका प्रमुख जीवनकुमार श्रेष्ठले बताए । मन्त्रालयले कामपाका मेकानिकल इन्जिनियर पुरुषोत्तम शाक्यको संयोजकत्वमा ‘स्फेसिफिकेसन र बोलपत्र पुस्तिका’ बनाउन अर्को प्राविधिक समिति पनि गठन गरेको छ । कामपाले कम्पनीको बहुमत हिस्सा लिने बस सञ्चालनका लागि नेपाल सरकारबाट प्राप्त अनुदान २५ करोड र चालु पुँजी २० प्रतिशत तथा नगरपालिकाले आआफ्नो सेयरबापत जम्मा गरेको १० करोडबाट कोष बनाइनेछ । मन्त्रालयले कामपालाई रु दुई करोड सञ्चालन खर्च व्यहोर्न प्रस्ताव गरे पनि महानगरपालिकाले कम्पनीको बहुमत हिस्सा लिने इच्छा व्यक्त गरेको छ । त्यस्तै काठमाडौँमा रहेका कीर्तिपुर, गोकर्णेश्वर, बूढानीलकण्ठ, टोखा र नागर्जुन नगरपालिकाले रु ३५–३५ लाख तथा चन्द्रागिरि, दक्षिणकाली, शङ्खरापुर, कागेश्वरी मनहरा र तारकेश्वर नगरपालिकाले रु १०–१० लाख सेयर राख्ने प्रतिबद्धता व्यक्त गरिसकेका छन् । यस्तै कम्पनीमा ललितपुरको रु एक करोड तथा कार्यविनायक, गोदावरी, महालक्ष्मी र वज्रवाराही नगरपालिकाका रु १०–१० लाख सेयर हुनेछ । त्यसैगरी भक्तपुरले रु ६० लाख, मध्यपुरथिमिले रु ३५ लाख तथा अनन्तलिङ्गेश्वर, सूर्यविनायक, चाँगुनारायण र महामञ्जुश्री नगरकोट नगरपालिकाले रु १० –१० लाख सेयर राख्नेछन् । बीस बस माग काठमाडौँ उपत्यका बाहिरका नगरपालिकाले पनि स्थानीयस्तरमा नगरस्तरीय बस सञ्चालन गर्न प्रस्ताव गरेका छन् । मन्त्रालयले विराटनगर, बुटवल, वीरगन्ज, नेपालगन्ज र पोखरा उपमहानगरपालिका र दाङ नगरपालिकासँग नगर बस सञ्चालन गर्न प्रस्ताव आह्वान गरेको थियो । नेपालगन्ज उपमहानगरपालिकाले कोहलपुर नगरपालिकासँग सहकार्य गर्दै दश मार्गमा बस चलाउन २० बस माग गरेको छ । खास गरी चिसापानी–कोहलपुर–नेपालगन्ज–जमुनाहा, धम्बोजी–गणेशमान चोक–परसपुर–गौघाट, नेपालगन्ज ९सल्यानी बङ्गला०, –फुल्टेक्रा–पुरौनी ९खलवा० र वनकटवा–मदनचोक–कोहलपुर–चिसापानी मार्गमा नगर बस सञ्चालन गर्न प्रस्ताव गरिएको नेपालगन्ज उपमहानगपालिकाका कार्यकारी प्रमुख गिरिराज ज्ञवालीले बताउनुभयो । त्यस्तै विराटनगर उपमहानगरपालिका पनि नगर बस सञ्चालनका लागि कम्पनी दर्ता गर्ने चरणमा पुगेको छ । अपाङ्गतामैत्री ‘मेट्रो बस’ सरकारले उपलब्ध गराउने सबै बस अपाङ्गमैत्री हुनेछन् । त्यस्तै अपाङ्गता भएका यात्रुलाई सहज होस् भनेर ‘अडियो नोटिस बोर्ड’ र स्थान जनाउने ‘डिस्प्ले बोर्ड’का व्यवस्था हुने छ । चालिस सिट क्षमता भएका ती बस १०।६ मि लम्बाइ, २।६ मि चौडाइ र ३।८ मि उचाइका हुनेछन् । बसलाई सूचना प्रविधिमैत्री बनाउन निःशुल्क वाइफाइको व्यवस्था हुनेछ । त्यस्तै मोबाइल चार्ज गर्ने सुविधासमेत रहनेछ । मन्त्रालयले प्रधानमन्त्रीको घोषणालाई साकार बनाउनका लागि सय बस किन्न अर्थ मन्त्रालयसँग रु ६८ करोड बजेट विनियोजन गर्न पत्राचार गरिसकेको छ । उक्त रकमबाट बस किनेर नगरपालिकालाई चलाउन दिइने छ । मन्त्रालयले काठमाडौँ उपत्यकाका २२ वटै नगरपालिकाबाट रत्नपार्कलाई केन्द्र मानेर बस चलाउने योजना बनाएको छ । ती बस रत्नपार्कबाट आआफ्नो गन्तव्यमा जानेछन् र सोही रुट हुँदै फर्कनेछन् ।

काठमाडौं, पुष २९ । प्रधानमन्त्री तथा ने.क.पा. (माओवादी केन्द्र) का अध्यक्ष पुष्पकमल दाहाल ‘प्रचण्ड’ले लामो समयदेखि स्वतन्त्र विद्यार्थी यूनियनको निर्वाचन नहुँदा विद्यार्थी राजनीतिमा गतिरोध पैदा भएको बताएका छन् । अनेरास्ववियू (क्रान्तिकारी) को पदाधिकारी बैठकमा बोल्दै प्रचण्डले गतिरोधको अन्त्य गर्न र विद्यार्थी राजनीतिमा नयाँ पुस्ता र सोंचको विकासका लागि पनि स्ववियू निर्वाचन गर्न आवश्यक भएको बताउनुभयाे । उनले भने, ‘हामी स्थानीय निर्वाचनको दिशामा जाँदैछौं, स्थानीय निर्वाचनपूर्व हुने स्ववियू निर्वाचन दलहरुका लागि जनमत नाप्ने ब्यारोमिटर हो, त्यही सोंच र जिम्मेवारीबोध सहित निर्वाचनको तयारी गर्नुस् ।’ स्ववियू निर्वाचनमा क्रान्तिकारीको एजेण्डाले जितेको स्मरण गराउँदै प्रधानमन्त्रीले भने, ‘स्ववियू निर्वाचनमा २८ वर्षे उमेर हद तपाईहरुको एजेण्डा हो, त्यही उमेर हदको व्यवस्थासहित निर्वाचन हुँदैछ । एजेण्डामा तपाईहरुले जित्नुभएको छ । अब जनमतमा जित्न अझै मेहेनत गर्नुस्, तपाईहरुको मेहेनतको प्रतिफल सुखद् नै हुन्छ भन्ने मलाई विश्वास छ ।’ बैठकमा क्रान्तिकारीका नेताहरु नरेन्द्र न्यौपाने, अनिल शर्मा, रामचन्द्र अधिकारी, मदन अर्याल, रञ्जित तामाङ, बीरेन्द्र बस्नेत लगायतका नेताहरुले विद्यार्थी राजनीतिको अवस्था र स्ववियू निर्वाचनबारे रिपोर्ट राखेका थिए ।

काठमाडौं, पुष २९ । सरकारले व्यवस्थापिका–संसदमा दर्ता गरेको संविधान संशोधन प्रस्तावमा आदिबासी जनजाति महासङ्घले समर्थन जनाएको छ । बिहीबार नेपाल जादिबासी जनजाति महसङ्घले प्रधानमन्त्री पुष्पकमल दाहाल ‘प्रचण्ड’सँग भेट गरी संशोधन प्रस्तावमा आफूहरुको समर्थन रहेको जानकारी गराएका हुन् । भेटमा महासङ्घका अगुवाहरुले संविधान संशोधनले आदिबासी जनजातिहरुको भावनाको प्रतिनिधित्व गरेको बताउँदै संसदबाट पारित हुने व्यवस्थाका लागि पहल गर्न प्रधानमन्त्रीको ध्यानाकर्षण गराएको हो । भेटमा जनजाति अगुवाहरुले विगतमा भएका सहमतिको कार्यान्वयन गर्न, स्थानीय तह पूनर्संरचना आयोगबाट विशेष, स्वायत्त र संरक्षित क्षेत्रको निर्धारण गर्न प्रधानमन्त्रीलाई ध्यानाकर्षण गराएका थिए । भेटमा प्रधानमन्त्रीले राजनीतिक शक्ति सन्तुलनले भ्याएसम्म जनजातिका मुद्दाहरुको सम्बोधन गर्ने प्रयास गरिएको जानकारी गराउँदै प्रस्ताव पारित गर्न सबैको सहयोगको अपेक्षा गरे । साथै प्रधानमन्त्रीले संघीय आयोगमार्फत् सम्बोधन गर्न बाँकी जनजातिका मुद्दाहरुको अधिकतम् सम्बोधनका लागि प्रयास गरिने जानकारी दिए।

काठमाडौं, पुस २८ । प्रधानमन्त्री पुष्पकमल दाहाल प्रचण्डका प्रमुख राजनीतिक सल्लाहकार चक्रपाणि खनाल ‘बलदेब’ले जेठको दोस्रो हप्ताभित्रै चुनाव गर्नेगरि सरकारले दश दिनभित्र चुनावको मिति घोषणा गर्ने खुलासा गरेका छन्। बिहीबार रिपोट्र्स क्लब नेपालले आयोजना गरेको साक्षात्कारमा बोल्दै उनले चुनावको मिति घोषणा गरेर संशोधन प्रस्ताव पारित गराउने बताए । उनले भने–‘आजको दश दिनभित्र हामी चुनावको मिति घोषणा गर्छौं, त्यसपछि संशोधन विद्येयकलाई पारित गरेर अघि बढ्छौं, राजनीतिक जटिलता संसदमा टेबुल भएको विद्येयक पारित भएपछिमात्रै हल हुन्छ।’ सकेसम्म जेठको पहिलो हप्ताभित्रै चुनाव गर्ने सरकारको तयारी रहेको जानकारी दिए । खनालले जेठसम्म स्थानीय तहको चुनाव गर्ने र मंसिरसम्म दुई वटा निकायको चुनाव एकचौटि गर्ने गरी सरकारले तयारी गरेको बताए । उनले भने–‘सरकारले संशोधन विद्येयक पारित गराएर मात्रै चुनावी प्रक्रियामा जान्छौं, सरकार अब छिट्टै निर्वाचनको मिति घोषणा गर्ने तयारीमा छ, अब सबै चुनावमा केन्द्रित हुनुपर्छ।’ उनले स्थानीय तह पूर्नसंरचना आयोगको प्रतिवेदन सरकारले बुझिसकेको उल्लेख गर्दै प्रतिवेदनलाई लिएर केही झिनामसिना मतभेद भएपनि त्यसलाई दलीय सहमतिमा टुँगो लगाएर नयाँ पूर्नसंरचनासहित चुनावमा जानुपर्नेमा जोड दिए। संविधान कार्यान्वयन गर्ने सरकारको प्रमुख दायित्व रहेकोले त्यसको लागिपनि निर्धारित मितिभित्रै तीन वटै निकायको चुनाव गर्ने कुरामा सरकार लागिपरिरहेको उनले बताए। उनले भने-‘आगामी ०७४ माघ ७ गतेभित्रै तीनवटै निकायको चुनाव गरेर मुलुकलाई अब आर्थिक समृद्धिको बाटोमा लैजानुपर्छ, सरकार अहिले त्यतातिर गम्भिर भएर लागिपरिरहेको छ।’

काठमाडौं, पुस २८ । माओवादी केन्द्र निकट विद्यार्थी संगठन अखिल(क्रान्तिकारी) स्ववियु चुनावमा होमिएको छ । स्ववियु चुनाव आगामी फागुन १४ गतेका लागि तोकिएको छ । उक्त निर्वाचनका लागि क्रान्तिकारीले स्ववियु निर्वाचन हुने देशभरका सवै कलेजमा चुनावी कमाण्डर तोक्ने भएको छ । डेढ महिने विद्यार्थी जागरण अभियानको समीक्षा र स्ववियु निर्वाचनको तयारीका लागि काठमाडौंमा पौष २७ गतेवाट क्रान्तिकारी पदाधिकारीको वैठक शुरु भएको छ। वैठकमा अध्यक्ष नरेन्द्र न्यौपानेले देशभरका सम्पुर्ण कलेजका कमाण्डर तोकेर सम्पुर्ण रुपमा स्ववियुमा होमिने वताएका छन्। आज वुधबार अध्यक्षद्वारा वैठकमा ऐजेण्डा प्रस्तुत र देशभरको रिपोर्टिङ भएको छ।भोलि विहिवार वैठकलाई माओवादी केन्द्रका अध्यक्ष तथा प्रधानमन्त्री प्रचण्ड,नेता नारायणकाजी श्रेष्ठ र रामवहादुर थापा वादलले प्रशिक्षण दिने कार्यक्रम रहेको क्रान्तिकारीका प्रवक्ता सुरेन्द्र बस्नेतले वताए ।भोलि नै कलेज कमाण्डर टुंगो लागेपछि वैठक समापन हुनेछ।

काठमाडौं, पुस, २८ । सरकारले अनलाईनबाट हाइड्रोमा लगानी गर्ने आवेदन खोलेपछि पौने दुई अर्व लगानी प्रतिवद्धता आएको मन्त्रालयले जानकारी दिएको छ । सोमबारदेखि खुलेको अनलाईनमा बिहिबार साँझसम्म एक अर्व ६० करोड लगानी प्रतिवद्धता प्राप्त भएको मन्त्रालयले उपलब्ध गराएको विवरणमा उल्लेख छ । बिहिबार मात्रै पन्ध्रसय ५२ जनाले २३ करोड ५६ लाख ६७ हजार ६५५ रुपैयाँ लगानीको प्रतिबद्धता जनाएका छन् । सोमबार साँझदेखि खुलेको अनलाईन आवेदनमा हालसम्म अठार हजार दुईसय सात जनाले एक अर्व ५१ करोड ७० लाख रुपैयाँको लगानी गर्ने उल्लेख गरेका छन् । लगानी गर्नका लागि कम्पनीहरुले पनि चासो जनाएका छन् । अनलाईन खुलेको दिनदेखि आजसम्म सोह्र वटा कम्पनीले ५२ करोड अठार लाख रुपैयाँको लगानी गर्ने जनाएका छन् । नेपालको पानी जनताको लगानी भन्ने नाराका साथ ऊर्जा मन्त्री जनार्दन शर्माले सुरु गराएको लगानी प्रतिवद्धताले थुप्रै हाइड्रो बनाउन सक्ने बताइएको छ । ‘सर्वसाधारण जनता जलस्रोतमा लगानी गर्न खोजिरहेका छन्, हामीले लगानी सुनिश्चित गराउन पर्छ थुप्रै हाइड्रोमा लगानी जुट्छ’ मन्त्री शर्माले भने ।

रोल्पा, पुस २८ । विप्लव नेतृत्वको नेकपा माओवादीले पार्टीको नाम फेर्ने तयारी गरेको छ । मोहन बैद्य नेतृत्वको माअोवादीबाट फुटेको उसले धेरै माअोवादी भएकोले पार्टीको नाम नै फेर्ने तयारी गरेको रोल्पा जिल्ला सेक्रेटरी दलबहादुर खत्रीले बताए । माओवादी भन्दा प्रचण्डले नेतृत्व गरेको पार्टीलाई बुझ्ने र नाम पनि पुरानो भएकाले पार्टीभित्र नाम परिवर्तन गर्ने बहस सुरु भएको उनले बताए । नाम फेर्ने बारे पार्टीभित्र बहस सुरु भएको उनले स्वीकारे । तर, यसको टुङ्गो भने आगामी फागुन १ गते बस्ने महाधिवेशनले टुङ्ग्याउने उनले बताए । विप्लव माओवादीको फागुन १ गतेदेखि आठौं महाधिवेशन काठमाडौं र रोल्पामा हुँदैछ । उनले भने– ‘अहिले पनि हाम्रो पार्टीको नामभन्दा पछिबाट विप्लव समूहको माओवादी भन्ने गरिन्छ ।’ पार्टीको पछाडि व्यक्तिको नाम जोड्नु राम्रो होइन, तर नेपालमा जोड्ने परम्परा बसेकोमा आफ्नो पार्टीले नयाँ थालनी गर्न खोजेको उनले जानकारी दिए । ‘हाम्रा पार्टीका महासचिव विप्लवले कम्युनिष्ट पार्टी भनेको साझा हुनुपर्छ अहिले हाम्रो पार्टीमा व्यक्तिको नाम झुण्डाउने गरिएकोले पार्टीको नाम फेर्नुपर्छ भन्नुभएको छ,’ उनले भने । विप्लवले मार्क्स विचारमा केही थप गरी नयाँ जनवादी क्रान्ति सुरु गर्ने तयारी गरेको छ । यो विषयमा थप निर्णय आगामी ८ औं महाधिवेशनको बन्द सत्रले गर्ने उनले बताए ।

भक्तपुर, पुस २८ । राष्ट्रिय पुनर्निर्माण प्राधिकरणको प्रमुख कार्यकारी अधिकृत सुशील ज्ञवालीलाई बर्खास्त गरेकोमा राष्ट्रिय प्रजातन्त्र पार्टीले आपत्ति जनाएको छ । भक्तपुरमा आयोजित साक्षात्कार कार्यक्रममा बोल्दै राप्रपा अध्यक्ष पशुपति शम्सेर रााणाले सरकारले आफनो लाभका निम्ति ज्ञवालीलाई प्राधिकरणको नेतृत्वबाट हटाउने निर्णय गरेकोमा आपत्ति जनाए । भूकम्प पिडितलाई राहत दिन छोडेर सरकार सिइओ र्फर्न लागेको आरोप लगाए । अध्यक्ष राणाले राष्ट्रियता बलियो बनाउन राप्रपा नेपाल र राप्रपाबीच पार्टी एकीकरण भएको पनि बताए । मुलुकको राष्ट्रियता बलियो बनाउने शक्ति आवश्यक भएकाले दुई पार्टी एकीकरण गरेको उनले खुलाए । उनले मधेशी मोर्चालाई साथमा नलिई निर्वाचनमा जानै नसकिने बताए । सरकारले चुनावको तयारी गरिरहेका बेला उनले मधेसी मोर्चालाई साथमा लिनुपर्ने बताए । राणाले यथास्थितिमा संविधान संशोधन प्रक्रिया अघि बढाउन नहुने पनि स्पष्ट पारे। सत्ता साझेदार राप्रपाले सरकारले संसदमा पेश गरेको संविधान संशोधन प्रस्तावका केही बुँदा संशोधन गर्नुपर्ने अडान जारी राखेको छ ।

ललितपुर, पुष २८ । सङ्घीय मामिला तथा स्थानीय विकासमन्त्री हितराज पाण्डेले छिट्टै स्थानीय निकायको निर्वाचन हुने बताएका छन्। स्थानीय विकास मन्त्रालयद्वारा आज गोदावरीमा आयोजित सुनौला हजार दिन आयोजना कार्यान्वयन तथा प्रगति समीक्षा गोष्ठीलाई सम्बोधन गर्दै उनले सङ्क्रमणकालीन अवस्थालाई तोडेर हुने निर्वाचन सफल बनाउन तयारी अवस्थामा रहन स्थानीय विकास अधिकारीहरुलाई आग्रह गरेका हुन्। “स्थानीय निकायको संरचनाले हालको स्थानीय निकायको अवधारणा पनि छिटै आउने भएकाले त्यसतर्फ चनाखो भएर स्थानीय निकायले काम गर्नुपर्छ” , मन्त्री पाण्डेले भने। स्थानीय विकास अधिकारीलगायतका कर्मचारीले उचित कार्ययोजना बनाएर कार्यान्वयनतर्फ लाग्न पनि उनले निर्देशन दिए। ‘पोषणका लागि समुदायको क्रियाशीलता आयोजना स् सुनौला हजार दिन’ नारासहित सुरु भएको आयोजना चैत महिनासम्म सम्पन्न गराउनुपर्ने भएकाले त्यसतर्फ उत्सुकतापूर्वक काम गर्नुपर्नेमा जोड दिँदै उनले विश्वबैंकको सहयोगमा सञ्चालन भइरहेको यो आयोजना समयभित्रै सम्पन्न गराउन जरुरी रहेको बताए। मन्त्रालयका सहसचिव रेश्मीराज पाण्डेले आयोजनामार्फत स्थानीय समुदायमा बालबालिका तथा मातृ कुपोषणलाई न्यूनीकरण गर्न आवश्यक वस्तु तथा सेवाका लागि वित्तीय तथा प्राविधिक सहयोग उपलब्ध भइरहेको बताए। प्रजनन उमेर पुगेका महिला तथा दुई वर्षमुनिका बालबालिकाको पोषणमा सुधार गर्न सामाजिक धारणा, व्यवहार र परम्परामा सुधार ल्याउनु आयोजनाको मुख्य लक्ष्य रहेको छ । समुदायमा बाल कुपोषणको जोखिम कम गर्ने र पहिलो गर्भवती कम्तीमा २० वर्ष उमेरमा हुने देखिएकाले बच्चा जन्मान्तरको समयावधि बढाउन जनचेतना अभिवृद्धिलगातका कार्य गर्ने आयोजनाको उद्देश्य रहेको बताइएको छ । उक्त आयोजना हाल ओखलढुङ्गा, खोटाङ, उदयपुर, सप्तरी, सुनसरी, सिरहा, सिन्धुली, रोमछाप, धनुषा, महोत्तरी, मकवानपुर, बारा, पर्सा, रौतहट र सर्लाही जिल्लामा सञ्चालन भइरहेको मन्त्रालयले जनाएको छ ।

काठमाडौं, पुष २७ । व्यवस्थापिका संसद अन्तर्गत सार्वजनिक लेखा समितिका सभापतिको निर्वाचन कार्यक्रम स्थगित भएको छ । नेकपा एमालेका सांसदहरुले सभापति चयन प्रक्रिया पारदर्शी नभएको आरोप लगाएपछि विवाद सिर्जना भएको हो । विवादका कारण आज बुधबार चयन हुने भनिएको प्रक्रिया अवरुद्ध भएको छ । एमालेले निर्वाचन कार्यक्रम तय भएपछि सभामुख ओनसरी घर्तीले सदस्य थप गरेको भन्दै आपत्ती जनाएपछि आजको कार्यक्रम स्थगित गरिएको हो । समितिमा नेपाली कांग्रेसका तर्फबाट धु्रव वाग्ले थपिएका थिए । यद्यपी संख्यात्मक आधारमा हेर्दा सदस्य थपिएपनि त्यसले निर्वाचनको परिणामलाई भने कुनै असर पर्ने देखिन्न । समितिमा एमाले सांसदको संख्या एक तिहाई समेत छैन । कूल ५१ ५१ सदस्य मध्ये एमालेका १५ जना छन् । कतिपयले एमालेको यो आपत्री सभापतिमा आफ्नो दावीका लागि बार्गेनिङ गर्नुका अर्थमा समेत लिएका छन् ।

चितवन, पौष २६ । प्रधानमन्त्री पुष्पकमल दाहाल ‘प्रचण्ड’ले सामन्ती र केन्द्रीकृत राज्य बिस्तारमा पृथ्वीनारायण शाहको योगदान रहेको बताउनु भएको छ । चितवनको भरतपुरमा रहेको भरतपुर उपमहानगरपालिकाको तेस्रो नगर परिषद्को उद्घाटन गर्दै प्रधानमन्त्री प्रचण्डले उक्त कुरा बताउनु भएको छ । नगर परिषद्को उद्घाटन गर्दै प्रधानमन्त्रीले भन्नुभयो, ‘नेपालको केन्द्रीकृत राज्य निर्माणमा पृथ्वीनारायणको योगदान छ । तर, उनले बनाएको राज्य एकात्मक र सामन्ती राज्य नै हो । पृथ्वीनारायणले भुरेटाकुरे राज्यहरुलाई केन्द्रीकृत गरेर बलियो राज्य बनाए, उसको अधिमूल्यन र अवमूल्यन दुवै गलत हुन्छ । पृथ्वीनारायण शाहले राज्य बिस्तार मात्रै गरे वा राष्ट्रिय एकताको पनि नेतृत्व गरे रु यो नेपाली राजनीतिमा अहिले पनि बहसकै विषय छ । यो बहसको निरुपणले मात्रै पृथ्वीनारायणबारे सही निष्कर्षमा पुग्न सकिन्छ ।’ चितवनको विकासबारे बोल्दै प्रधानमन्त्रीले भन्नुभयो, “मैले केही दिन पहिल्यै मात्रै स्थानीय तह पूनर्संरचनाको रिपोर्ट बुझेको छु । चितवन अब महानगरपालिका बन्दैछ । हामी सबै महानगरपालिकाका बासिन्दा हुँदैछौं । मैले प्रतिवेदन बुझिसकेको छु, अब कार्यान्वयनको प्रक्रियातिर अघि बढिसकेको छ । महानगरपालिकाको मापदण्डमा पनि हाम्रो आफ्नै सीमा छ, विकासको गति र जनघनत्वका आधारमा हामीले महानगरपालिका मौलिक रुपमै बनाउँदै आएका छौं । चितवन विकासको बहुआयमिक सम्भावना बोकेको जिल्ला हो । चितवनको विकास र समृद्धिबारे मैले हिजै आफ्नो दृष्टिकोण राखिसकेको छु ।’ नगर परिषद् उद्घाटन कार्यक्रममा पूर्व उपप्रधानमन्त्री अमिक शेरचन, पूर्वमन्त्री एवं सांसद सुरेन्द्र पाण्डे, प्रधानमन्त्रीका प्रशासनिक सल्लाहकार नारायण दाहाल, प्रमूख स्वकीय सचिव जोखबहादुर महरा, सांसदहरु गीता वाग्ले, कृष्णभक्त पोखरेल, रामकृष्ण घिमिरे, शेषनाथ अधिकारी, सन्तकुमार दराई लगायतको उपस्थिति थियो । तेस्रो नगर परिषद्ले आर्थिक वर्ष २०७४÷०७५ का लागि ८९ करोड ५० लाख ९९ हजार ४ सय रुपैयाँ बजेट प्रस्तावित गरेको कार्यकारी अधिकृत महेश बरालले बताउनु भयो ।

काठमाडौं, पुस २६ । अबदेखि सांसदले प्रधानमन्त्री र मन्त्रीसँग प्रश्नोत्तर गर्न पाउने भएका छन् । यसअघि सांसदहरुले प्रत्यक्ष रुपमा प्रधानमन्त्रीसँग संवाद गर्ने व्यवस्था थिएन । झन्डै डेढ महिना लामो अवरुद्ध संसद सोमबार शुरु भएपछि प्रत्यक्ष प्रश्नोत्तर सम्बन्धी आन्तरिक कार्यविधि २०७३ पारित भएको छ। पारित कार्याविधि अनुसार प्रश्न सोध्न चाहने सांसदले आफ्नो प्रश्न संसद सचिवालयमा दर्ता गर्नुपर्नेछ। बढीमा २० वटा प्रश्न र एउटा बैठकमा दुई जना मन्त्रीसंग मात्र प्रश्न सोधिने व्यवस्था गरिएको बताइएको छ। प्रधानमन्त्री, मन्त्री र सांसदलाई जनताप्रति प्रत्यक्ष जिम्मेवार बनाउने ठानिएको संसदको उक्त प्रश्नोत्तरको कार्यक्रम टेलिभिजनमा प्रत्यक्ष प्रसारण हुने संसद सचिवालयले जनाएको छ। प्रश्नोत्तरका लागि प्रधानमन्त्रीलाई प्रत्येक महिनाको दोस्रो आइतबार तथा अन्य मन्त्रीहरुलाई प्रत्येक महिनाको दोस्रो र चौथो बुधबार दुई घण्टाको समय निर्धारण गरिएको जनाइएको छ। सोमबार संसदमा कार्याविधि अनुमोदन भएपछि त्यसको शुरुवात प्रधानमन्त्रीबाट गरिने सभामुख ओनसरी घर्तीले बताइन्। उनले भनिन्, ‘संसदमा कस्तो प्रकारका प्रश्न आँउछन् र कुन विषयमा आँउछन् अनि ती कुन मन्त्रालय अन्तर्गत पर्दछन् भन्ने कुराले मन्त्रीहरुको प्रश्नोत्तर निर्धारण गर्दछ। हामीले यसको शुरुवात प्रधामन्त्रीबाट गर्ने भनी उहाँसंग कुराकानी गरिसकेका छौं।’ संसदमा यसअघि सांसदहरुले शून्य समय वा विशेष समय लिएर प्रश्नहरु राख्ने गरेपनि प्रत्यक्ष संवा गर्ने व्यवस्था थिएन । सरकारका प्रवक्ता एवम् सूचना तथा संचार मन्त्री सुरेन्द्र कार्कीले भने, ‘जनताले उनीहरुको प्रतिनिधिले प्रधानमन्त्री वा मन्त्रीसंग उनीहरुको सरोकारको विषयमा प्रश्न गरेको वा नगरेको वा उदासीन रहेको भन्ने देख्न पाउने भए। यसले गर्दा उनीहरुमा नैतिक जबाफदेहीता बढ्छ।’

चितवन, पुस २६ । प्रधानमन्त्री पुष्पकमल दाहाल ‘प्रचण्ड’ले चितवनको समग्र विकासको प्याकेज छिट्टै ल्याउने बताएका छन् । मंगलबार मेघौलीमा रहेको साना शहरी खानेपानी आयोजनाको उद्घाटन गर्दै प्रधानमन्त्रीले जिल्लाको समग्र विकासमा सरकारबाट अर्बाै लगानी गर्ने प्रतिवद्धता जनाए । प्रधानमन्त्रीले भने ‘बन्यजन्तुको आक्रमणबाट संरक्षणका लागि तारजालीको व्यवस्था गरिनेछ । मेघौली एयरपोर्ट पूनः सञ्चालनको व्यवस्था गरिनेछ । नारायणगढ—गोलाघाट मोटरबाटो र गोलाघाट पुल निर्माणमा मेरो गम्भीर ध्यान गएको छ । ठोरीदेखि केरुङसम्म जोड्ने बाटो निर्माणका लागि सरकारको तर्फबाट पहल भइरहेको छ । चितवनको विकासका निम्ति सधैं साथमा छु, छिट्टै चितवनको विकासको प्याकेज ल्याउनेछु ।’ खानेपानीको हक जनताको मौलिक हक भएको उनले बताए । ‘खानेपानीको समस्या नेपालको आधारभूत समस्या हो । यसमा पछिल्लो समयमा सुधार आएको छ । संविधानमा खानेपानीलाई जनताको मौलिक हकको रुपमा व्यवस्था गरिएको छ । यसको व्यवहारिक कार्यान्वयन अहिलेको मूख्य दायित्व हो । यस्ता आयोजनाहरुले त्यस्तो व्यवस्थाको कार्यान्वयनमा महत्वपूर्ण भूमिका खेलेका छन् ।’ प्रधानमन्त्री प्रचण्डले भने । कार्यक्रममा शिक्षामन्त्री धनीराम पौडेल, भूमिसुधार तथा व्यवस्था मन्त्री बिक्रम पाण्डे, सांसद रुक्मिनी चौधरी, पूर्व उपप्रधानमन्त्री अमिक शेरचन लगायतको उपस्थिति रहेको थियो । मेघौली खानेपानीको उद्घाटनपूर्व प्रधानमन्त्रीले गोलाघाटमा रहेको निर्माणाधीन गोलाघाट पुलको स्थलगत निरीक्षण गरे । स्थलगत निरीक्षणपछि बोल्दै प्रधानमन्त्रीले भने- ‘गोलाघाट पुल सरकारको प्राथमिकतामा छ । निकुञ्जको प्राविधिक कारणले पुल निर्माणमा ढिलाई भएको सूचना पाएको छ । म यहाँबाट फर्केलगत्तै सम्बन्धित मन्त्रालय र विभागका अधिकारीहरुलाई बोलाएर छिटै पुल निर्माणमा तिब्रता दिनेछु । पुल निर्माण छिटै सम्पन्न हुन्छ ।’

विराटनगर, २५ पुस । नेकपा (एमाले)का अध्यक्ष केपी शर्मा ओलीले सार्वभौंमसत्ता, भौंगोलिक अखण्डता, गणतन्त्र र सामाजिक सद्भावप्रति एमाले पूर्ण प्रतिबद्ध रहेको बताएका छन् । नेकपा (एमाले) मोरङको आठौं जिल्ला अधिवेशनको सोमबार उद्घाटन गर्दै उनले भने – “स्थापनाकालदेखि नै एमालेले न्यायोचित वितरण प्रणाली र समानताको सिद्धान्तलाई अङ्गिकार गरेर मुलुकलाई विकासको मार्गमा डो¥याउने उद्देश्यका साथ अगाडि बढिरहेको छ ।” अध्यक्ष ओलीले जनताको बलिदानबाट प्राप्त गणतन्त्रलाई संस्थागत गर्नका लागि संविधानको कार्यान्वयन गरी मुलुकलाई निर्वाचनतर्फ अग्रसर गराउनुपर्ने अहिलेको आवश्यकता हो भन्दै  उनले भने—“यतिबेला स्वार्थहरु टकराएका छन्, त्यसैले गणतन्त्रको स्थायित्वका लागि नेपाली जनता सजग हुनुपर्दछ ।” देशलाई पछाडि धकेल्नका लागि क्षेत्र, भाषा र जातीय एकताबीच वैमन्स्यता फैलाउने काम अहिले भइरहेको छ, उनले भने– देशको विकास र समृद्धिका लागि सबै नेपालीबीच सबल एकता हुनुपर्दछ । अध्यक्ष ओलीले द्वन्द्व यतिखेर उद्योगको रुपमा फस्टाएर व्यवसाय गर्न खोजिँदै छ, यस्ता षड्यन्त्रबाट नेपाली जनता सजग र सचेत हुनुपर्दछ भन्दै संविधान संशोधन प्रस्ताव संविधानविपरीत रहेकाले संसद्बाट पारित हुन नसक्ने बताए । तीन दिने सो अधिवेशनको सफलताको कामना गर्दै उनले पार्टीे सङ्गठनलाई अझ सशक्त र बलियो बनाउन कार्यकर्तालाई सक्रिय भएर लाग्न निर्देशन दिए । रासस