धुलिखेल, साउन ४ । महानगरपालिका र नगरपालिकालाई स्मार्ट सिटी कसरी बनाउन सकिन्छ भन्ने विषयमा महानगर र नगरपालिकाका प्रमुख÷उपप्रमुख गरी नौवटा नगरको प्रमुख, उपप्रमुखको भेला भई मङ्गलबार छलफल गरेका छन् । काठमाडौँ विश्वविद्यालय स्कूल अफ इन्जिनियरिङ, कम्प्युटर साइन्स एण्ड इन्जिनियरिङ विभागले आयोजना गरेको उक्त छलफलमा सहभागी हुन प्रमुख उपप्रमुख काभ्रेपलाञ्चोक जिल्लाको पनौती नगरपालिकास्थित सूचना–प्रविधि पार्कमा भेला भएका थिए । स्थानीय तह निर्वाचनका बेलामा सबै राजनीतिक दल र त्यसका प्रतिनिधिले आफ्नो घोषणा पत्रमा स्मार्ट सिटी बनाउने भन्ने विषयमा उल्लेख गरिएको भएपनि वास्तवमा स्मार्ट सिटी के हो र कसरी कार्यान्वयनमा ल्याउन सकिन्छ भन्ने विषयमा सहज बनाउने उद्देश्यले गोष्ठी आयोजना गरिएको काठमाडौँ विश्वविद्यालय स्कूल अफ इन्जिनियरिङ, कम्प्युटर साइन्स एण्ड इन्जिनियरिङ विभागका प्रमुख डा मनिष पोखरेलले बताए । सूचना प्रविधि पार्कमा आयोजित गोष्ठीमा बोल्दै पूर्व सूचना तथा वातावरण प्रविधि मन्त्री गणेश शाहले नेपालमा बढी सहरीकरण भइरहेको भन्दै त्यसमा व्यवस्थित गर्न नसकेमा समस्या उत्पन्न हुने बताए । “शहरीकरणको नाममा तीव्रगतिमा विकास भइरहेको छ, जसले गर्दा अव्यवस्थित छ ।” शाहले भन्नुभयो, “स्मार्ट सिटी बनाउने हो भने कुल बजेटको एक प्रतिशत बजेट विज्ञान प्रविधिको विकासमा छुट्याउनुहो्स् ।” “सडक बनाउने, पेटी फुटिरहने, तार टाँग्ने पोल बाङ्गो हुने, यस्तो अवस्थाले स्मार्ट सिटी बन्दैन ।” पूर्वमन्त्री शाहले भन्नुभयो, “जनप्रतिनिधिले विद्युतीय शासन पद्धति प्रयोगमा ल्याउनुस् ।” उनले जनप्रतिनिधिलाई कार्यपालिका, न्यायपालिका र व्यवस्थापिकालाई आइसिटी मैत्री बनाउँदै लैजानसमेत सुझाव दिनुभयो । त्यसका लागि जीवन्त पद्धतिको विकास गर्दै हरेक शहरमा सार्वजनिक पुस्तकालयको स्थापना गर्न आग्रह गरे । काठमाडौँ विश्वविद्यालयका उपकुलपति प्रा डा राकमण्ठ माकजु श्रेष्ठले संरचनाले मात्रै आइटी सिटी नबन्ने उल्लेख गर्दै त्यसका लागि काम गर्ने जनशक्ति र बौद्धिकतालाई परिचालन गर्न आवश्यक रहेको बताए । “ज्ञानको सृष्टि गर्नुपर्छ र भावी पुस्तालाई सशक्तीकरण गर्नुपर्छ ।” श्रेष्ठले भन्नुभयो, “जहाँ गर्दागर्दै सिक्न सक्छ र सिक्दासिक्दै गर्न सक्छ ।” त्यसका लागि जनप्रतिनिधि र विश्वविद्यालयबीचको सहकार्य आवश्यक रहेको उनले बताए । श्रेष्ठले काठमाडौँजस्तो शहरमा स्मार्ट सिटी बनाउन नसकिने समेत बताए । “काठमाडौँमा १०÷१५ मिनेटमा हिँडेर जाने ठाउँमा खानेपानीको धारा छैन, आधा घण्टा हिँडेर आराम गर्ने पार्क छैन, केही समय हिँडेर पुग्ने खोलाको छेउ छैन, अनि किसानलाई काम गर्दागर्दै एक कुनामा गएर पिसाब फेर्ने ठाउँ नभएको ठाउँमा स्मार्ट सिटीको कुरा गरेर हुन्छ ?” उनले प्रश्न गरे । कार्यक्रममा नेपाल दूरसञ्चार प्राधिकरणका महानिर्देशक आनन्दराज ढुंगानाले भने स्मार्ट सिटी नारा मात्रै नभई ‘कमिटमेन्ट’ हो भने स्मार्ट सिटी बनाउन गाह्रो नहुने बताए । के हो स्मार्ट सिटी ?  कार्यक्रमको पहिलो सत्रमा काठमाडौँ विश्वविद्यालय कम्प्युटर साइन्स एण्ड इन्जिनियरिङ विभागका प्रमुख डा मनिष पोखरेल र इञ्जिनियर किशोर थापाले स्मार्ट सिटी र त्यसको उपयोग र प्रयोग कसरी गर्न सकिन्छ भन्ने विषयमा आ–आफ्नो प्रस्तुति राखे । आफ्नो प्रस्तुति राख्दै इञ्जिनियर किशोर थापाले भने “सूचनाको अधिकतम प्रयोग गरी सेवा सुविधालाई सहज र सरल बनाइएको शहर नै स्मार्ट सिटी हो ।” उनले नागरिक–नागरिक र नागरिक सरकारबीचको सञ्चार र संवादलाई सहज र सर्वसुलभ बनाइने शहर नै स्मार्ट सिटी भएको उल्लेख गर्दै स्मार्ट सिटी बन्नका लागि विभिन्न सेवा सुविधा, इन्टरनेटमार्फत अटोमेशन प्रणालीमा आबद्ध शहर हुनुपर्ने बताए । अवसरमा उनले स्मार्ट सिटी बन्न फुर्तिला, स्वस्थ, लगनशील र उत्पादनशील नागरिक बस्ने शहर हुनुपर्ने उल्लेख गर्दै ऊर्जाको कम खपत हुने र वातावरणमैत्री पूर्वाधारको व्यवस्था भएको हुनुपर्ने बताए  । त्यसका लागि व्यवस्थित र योजनाबद्ध बस्ती, ब्रोडब्याण्डसहितको इन्टरनेट सुविधा, नियमित विद्युत् आपूर्ति र आवश्यक हार्डवेयर र सफ्टवेयरको व्यवस्था, नागरिकलाई सूचना प्रविधिसम्बन्धी आधारभूत तालिम र विभिन्न सेवा र सूचना आदान÷प्रदान गर्ने मोबाइल एप्सको प्रयोगलगायतका आवश्यक पूर्वाधार हुनुपर्ने बताए । डा पोखरेलले पानी व्यवस्थापन, कृषि व्यवस्थापन र फोहर व्यवस्थापन गर्नसकेमा स्मार्ट सिटी बन्ने बताए । “त्यसको लागि आफ्नो–आफ्नो नगरको सम्भावना आफैँले पहिल्याएर गर्ने कामको थालनी गरेमा स्मार्ट सिटी बनाउन सकिन्छ ।” पोखरेलले भने, “हाम्रो नगरमा ताल र नदी भएपनि धारामा पानी थाप्न घण्टौँ लाइन बस्नुपर्छ, तल कोशी बगिरहेको भएपनि माथि खेतबारी बाँझै हुने समस्याले कसरी स्मार्ट सिटी बनाउन मद्दत गर्छ ?” गोष्ठीमा काभ्रेपलाञ्चोकका बनेपा, पनौती, धुलिखेल, पाँचखाल, नमोबुद्ध र मण्डन देउपुर नगरपालिका, काठमाडौँको कागेश्वरी नगरपालिका, ललितपुर महानगरपालिका, कास्कीको पोखरा लेखनाथ महानगरपालिकाका प्रमुख र उपप्रमुखको उपस्थिति रहेको थियो । के भने नगरका प्रमुखले ?  धुलिखेल नगरपालिकाका प्रमुख अशोक ब्याञ्जुले जनताको सेवा लिने प्रणालीलाई व्यवस्थित बनाउँदै शासनलाई बलियो बनाउने र विद्युतीय शासनको विकास गर्न आवश्यक रहेको बताए  । ब्याञ्जुले धुलिखेलमा धुलिखेल सामुदायिक अस्पताल र नेपालकै नमूना खानेपानी उपभोक्ता समितिलगायतको काम भएका कारण पनि स्मार्ट सिटी बनाउन आवश्यक रहेको बताए  । त्यससँगै काभ्रे एकीकृत खानेपानीलाई व्यवस्थित बनाउनका लागि पनि स्मार्ट सिटीको आवश्यकता रहेको उनको भनाइ थियो । पोखरा लेखनाथ महानगरपालिकाका प्रमुख मानबहादुर जिसीले स्थानीय तहको सरकार स्थापना भइसकेको अवस्थामा सेवा सुविधाको जानकारी नागरिकसम्म छिटो पुर्याउनका लागि पनि स्मार्ट सिटीको आवश्यकता रहेको बताए । ललितपुर महानगरपालिकाका प्रमुख चिरीबाबु महर्जनले नगरमा इलेक्ट्रोनिक नक्सापास गर्ने प्रविधि द्रुतगतिमा भइरहेकाले हिजोकै पद्धतिमा टिप्पणी उठाएर कार्यान्वयन गर्ने हो भने अहिलेको जनप्रतिनिधिको औचित्य नभएको भन्दै गरेका कामको अवस्थालाई इलेक्ट्रोनिक पद्धतिमा लानको लागि पनि इसिस्टमको आवश्यक भएको बताए । “अबको वडाप्रमुखले नागरिकको काम गर्न निवेदन लेख्ने होइन, फोन गर्ने, म्यासेज लेख्ने वा फोटो खिचेर समस्या के हो पठाउने, अनि काम गर्न कति दिन कति समय लाग्छ, त्यसको जानकारी सेवाग्राहीलाई छिटो दिने भनेर निर्देशनसमेत दिइसकेको अवस्थामा इसिस्टम आफ्नो नगरको लागि अत्यन्तै आवश्यक भएको बताए । कागेश्वरी मनहरा नगरपालिकाका प्रमुख कृष्णहरि थापाले सेवाग्राहीलाई जनप्रतिनिधले गरेको कामको जानकारी दिनको लागि आइटीको माध्यमबाट छिटो हुने भएकाले स्मार्ट सिटी बनाउन आवश्यक रहेको बताए ।   । नगरपालिकाको जनसांख्यिक तथ्याँक लिनको लागि पनि आइटीको प्रयोग गर्नुपर्ने भएकाले इसिस्टम आवश्यक भइसकेको बताए । । पाँचखाल नगरपालिकाका प्रमुख महेश खरेलले आफ्नो नगरको कृषकलाई कृषिबाट नै धनी बनाउन पहिलो प्राथमिकता रहेको उल्लेख गर्दै त्यसको लागि स्मार्ट सिटी बनाउन आवश्यक रहेको बताए । खरेलले भने “अब नगरको कामलाई स्मार्ट एग्रीकल्चरबाट शुरु गर्नुपर्छ ।” कृषकको आयस्तर बढाउनका लागि र बस्ती व्यवस्थापनको लागि पनि स्मार्ट सिटीको अवधारणाबाट मात्रै विकास गर्न लागेको बताए । त्यसरी काम गर्नका लागि दक्ष जनशक्तिको अभाव रहेको भन्दै काठमाडौँ विश्वविद्यालयले जनशक्तिको व्यवस्थापन गर्नमा आवश्यक सहयोग गर्न पनि गोष्ठीमा सहभागी जनप्रतिनिधिले आग्रह गरे । विश्वविद्यालयले आवश्यक सहयोग र जनशक्तिको उपलब्धताको लागि सधैँ तयार रहेको बताउँदै त्यसका लागि नगरपालिका र विश्वविद्यालयबीचको समन्वय जरुरी रहेको जनाएको छ ।

धनगढी, साउन ४ । कैलालीको धनगढी उप–महानगरपालिकामा जनप्रतिनिधि आएसंगै उपमहानगरले ठेला व्यवसायको कर दोब्बरले बढाइएको छ । आर्थिक वर्ष वर्ष २०७४÷०७५ का लागि नगरक्षेत्र भित्र रहेका ठेला व्यवसाय संचालन गरेवाफतको कर १ सय प्रतिशतले बढाइएको हो । यसअघि प्रतिठेलाबाट दैनिक १० रुपैया उठाउँदै आएको उपमहानगरपालिकाले चालु अर्थिक वर्षमा बढाएर २० रुपैया पु¥याएको छ । दैनिक गुजाराका लागि सडकमा घुलो खाएर व्यापार गर्दै आईरहेका साना व्यवसायीहरुको कर दोब्बर बनाईरहँदा ठूला व्यवसायीलाई पनि उपमहानगरपालिकाले करको दायरामासम्म ल्याउन सकेको छैन । कर दोब्बरले बढाउँदा व्यापार व्यवसाय नै धरापमा पर्ने भन्दै कर नबढाउन ठेला व्यवसायीहरुले आग्रह गरेका छन् । उपमहानगरपालिकाले दोब्बर कर बढाउने निर्णय फिर्ता हुनुपर्ने र कर बढेपछि असुलेको कर पनि फिर्ता हुनुपर्ने माग ठेला व्यवसायीहरुले गरेका छन् । सडकमा बसेर व्यापार गरेर जिविकोपार्जन गरिरहेकोलाई मारमा पारेर उठीबास लगाउन खोजेको आरोप उनीहरुले लगाएका छन् । जनप्रतिनिधि छानेर पठाउँदा समेत स्थानीय निकायले कर बढाएर दुख दिएको ठेला व्यवसायी रविन्द्र सापकोटाले बताए । उनले सानोतिनो व्यापार गरेर जेनतेन गुजारा गरिरहेको अवस्थामा दोब्बर कर बढाईदा समस्यामा परेको दुखेको पोखे । धनगढी चौराहा आसपासमा ठेलामा मकै पोलेर गुजारा चलाई रहेकी ६५ वर्षिया नन्दा सदाले पहिलेको भन्दा दोब्बरले कर बढाइदा तिर्न समस्या भएको बताईन । उनले ठेलामा खासै कमाई नहुने भएकाले बढाएको कर तिर्न समस्या हुने बताईन । धनगढी उपमहानगरपालिकाले नगर क्षेत्रभित्र रहेका ठेला व्यवसायहरुबाट कर उठाउने जिम्मा धनतारा निमार्ण सेवालाई दिएको छ । गत आर्थिक वर्षमा वार्षिक ५ लाख ८० हजारमा ठेक्का पाएको उक्त निर्माण कम्पनीले दैनिक १० रुपैया उठाउने गरेकोमा चालु आर्थिक वर्षमा ठेक्का रकम समेत दोब्बर बनाई ११ लाख २ हजारमा ठेक्का पाएको छ । सो कम्पनीका प्रतिनिधि धनबहादुर बिकले दैनिक १ सय ५० भन्दा ठेला व्यवसायीहरुबाट रकम उठाउने गरेको जानकारी दिए । ठेकेदार कम्पनीले आर्थिक वर्ष २०७३÷०७४ को पुरानो रसिद प्रयोग गरेर कर असुलिरहेको छ । कम्पनीका प्रतिनिधि बिकले नयाँ ठेली छपाउन ढिलाई भएकोले पुरानो ठेली प्रयोग गरेको स्वीकार गरे । धनगढी उपमहानगरपालिकाका आन्तरिक लेखा परिक्षक लेखनाथ ओझाले राजनितिक दलका सयंन्त्र लगाएत कर निर्धारण समितिले कर निर्धारण गरेर करको दायरा बढाएको बताए । उनले उपमहानगरपालिकाले निर्धारण गरेको कर वैज्ञानिक र जायज भएको बताए ।

काठमाडौं, साउन १ । सेनेगलमा फुटबल रंगशालाको पर्खाल भत्कँदा ८ जनाको मृत्यु भएको छ भने अरु कम्तीमा ४९ जना घाइते भएका छन् । अश्रुग्यासबाट बच्न सयौं समर्थकहरु एकैपटक कमजोर पर्खाल चढ्न खोज्दा पर्खाल भत्किएपछि सो घटना भएको हो । सेनेगलको राजधानी डकारमा रहेको डेम्बा दियोप रंगशालामा स्टेड डे एम्बोर र युनियन स्पोर्टिभ वाकमबीच लिग कप फुटबलको फाइनल खेल भइरहेको समयमा दुई विपक्षी समूहबीच झडप भएको थियो । झडप नियन्त्रणमा लिन प्रहरीले अश्रुग्यास प्रहार गरेकाे थियाे । भागदौड मच्चिनुपूर्व अतिरिक्त समयमा सकिएको खेल स्टेड डे एम्बोरले २–१ गोलले जितेको थियो ।

सोलुखुम्बु, असार ३१ । सोलुखुम्बुमा विषालु जंगली च्याउ खाँदा चार जना गम्भीर बिरामी भएका छन्। सोलु दुधकुण्ड नगरपालिका–३ तामाखानीमा विषयुक्त जंगली च्याउ पोलेर खाँदा उनीहरु बिरामी भएका हुन्। च्याउ खाएर बिरामी भएकामध्ये एक जनाको अवस्था चिन्ताजनक छ। बिरामी भएका तीन जना प्राथमिक स्वस्थ्य चौकी तामाखानीमा उपचारपछि घर फर्किसकेका छन्। भने नवराज राईको अवस्था भने चिन्ताजनक रहेको छ । उनीहरुले शुक्रबार दिउँसो करिब १२ बजेतिर च्याउ पोलेर खाएका थिए।

कपिलबस्तु, असार २९ । कपिलबस्तुको सदरमुकाम तौलिहवास्थित एचडी मेमोरियाल विद्यालयमा आगलागी भएको छ । विहान विद्यालयमा परिक्षा संचालन भइरहेको अवस्थामा एक्कासी आगलागी भएको हो । आगलागी भएको समाचार पाएलगत्तै दुईवटा दमकलहरु घटनास्थलमा पुगेको भएपनि एउटामा पानी नभएकोले पुनः पानी लिन फर्कियो भने अर्काेलाई चलाउनका लागि दक्ष प्राविधिक नभएपछि हाल स्थानीयको पहलमा आगो नियन्त्रणमा ल्याउने कार्य भइरहेको छ । कपिलबस्तु नगरपालिकामा भएका दुईवटै दमकल वेकामका भएका छन् । विद्यालय भवनसँगै जोडिएको विजुलीको पोलभएका कारण विद्युत सर्ट भएर आगलागी भएको अनुमान लगाइएको छ । घटनामा अहिलेसम्म मानवीय क्षति भने भएको छैन ।

काठमाडौँ, असार २८। संयुक्त अरब इमिरेट्समा हुने एएफसी २३ वर्षमुनि (यु–२३)को च्याम्पियनसिप छनोट प्रतियोगितामा सहभागी हुने नेपाली फुटबल टोलीलाई आज बिदाइ गरिएको छ । अखिल नेपाल फुटबल संघ (एन्फा) कम्प्लेक्समा आयोजित कार्यक्रममा राष्ट्रिय खेलकुद परिषद् (राखेप)का सदस्य सचिव केशवकुमार विष्ट, एन्फा अध्यक्ष नरेन्द्र श्रेष्ठलगायतले टोलीलाई सफलताको शुभकामनासहित राष्ट्रिय झण्डा दिएर बिदाइ गरे । यही असार ३१ गतेदेखि सञ्चालन हुने उक्त प्रतियोगितामा नेपाल समूह डीमा परेको छ । नेपालको समूहमा आयोजक युएई, उज्वेकिस्तान र लेबनान छन् जसमा नेपालले आफ्नो पहिलो खेल युएईसँग शनिबार खेल्दै प्रतियोगिताको उद्घाटन हुनेछ । त्यसैगरी दोस्रो खेलमा नेपाल सोमबार उज्वेकिस्तानसँग भिड्नेछ भने तेस्रो तथा समूह चरणको अन्तिम खेल बुधबार लेबनानसँग प्रतिस्पर्धा गर्नेछ । सन् २०१८ मा चीनमा हुने एएफसी यु–२३ च्याम्पियनसिपको छनोट चरणमा सहभागी ४० टोलीलाई १० समूहमा विभाजन गरिएको छ । प्रत्येक समूहका समूह विजेता र १० समूहका उत्कृष्ट पाँच उपविजेता टोली फाइनल प्रतियोगिताको लागि छनोट हुने प्रावधान छ । त्यस्तै आयोजकका हैसियतले चीन भने प्रतियोगितामा सिधै छनोट हुनेछ । नेपाली टोली बिहीबार बिहान त्यसतर्फ प्रस्थान गर्ने एन्फाले जनाएको छ ।

गोरखा, असार २८ । जिल्ला समन्वय समिति गोरखाले चेपाङ समुदायका २३ जना विद्यार्थीलाई पठनपाठनमा सहयोग पु¥याउन जिल्ला समन्वय समिति गोरखाले २३ जना विद्यार्थीलाई छात्रवृत्ति रकम उपलब्ध गराएको छ । उच्च शिक्षा पढ्दै आएका (कक्षा ११ देखिमाथि अध्ययनरत) चेपाङ समुदायका विद्यार्थीलाई पठनपाठनमा सहयोग पु¥याउने उद्देश्यले उक्त छात्रवृत्ति रकम प्रदान गरिएको हो । गोरखाको घ्याल्चोक, भुम्लिचोक, ताङ्लीचोक, मकैसिङ, ताक्लुङ गाउँका ती विद्यार्थीलाई जनही रु चार हजार १६६ का दरले छात्रवृत्ति रकम उपलब्ध गराइएको जिसस गोरखाका खरिदार रामप्रसाद पोखरेलले बताउनुभयो । २४ जनाका लागि छात्रवृत्ति आएको भए पनि एक जना पढाइ छाडेर जागिर खान गएपछि २३ जनालाई छात्रवृत्ति दिइएको हो । चेपाङ विकास कार्यक्रममार्फत विद्यार्थीलाई छात्रवृत्ति वितरण गर्न रु एक लाख बजेट आएको थियो । मकैसिङको विजया भवानी मावि, कुरिनटारको सर्वशान्ति मावि, भुम्लिचोकको भद्रकाली मावि र मजिरटारको शङ्खदेवी माविमा पढ्दै आएका विद्यार्थीलाई छात्रवृत्ति दिएको पोखरेलले जानकारी दिनुभयो । चेपाङलाई लोकसेवा तयारी कक्षा यसैगरी चेपाङ युवायुवतीलाई लक्षित गरी लोक सेवा तयारी कक्षा सञ्चालन गरिएको पनि पोखरेलले बताउनुभयो । गत असार ११ गतेदेखि २५ गतेसम्म सदरमुकाममा सञ्चालन गरिएको उक्त तयारी कक्षामा स्थानीय विकास अधिकारी नारायणप्रसाद आचार्य, तथ्याङ्क कार्यालय प्रमुख यज्ञमूर्ति भण्डारी, श्रेष्तेदार गोविन्दप्रसाद घिमिरेलगायत प्रशिक्षण दिनुभएको थियो । लोकसेवा तयारी कक्षाका लागि रु एक लाख ५० हजार बजेट आएको पनि पोखरेलले जानकारी दिनुभयो ।

जापान, असार२३ । जापानवाट नेपाल लगायत विश्वका बिभिन्न देशहरुमा रेमिटेन्स कारोवार गर्दै आएको आइएमई क्योदाई रेमिटेन्सले जापानस्थित फुकुओकाको हाकातामा नयाँ शाखा विस्तार गरेको छ । आफ्नो सञ्जाल विस्तारका क्रममा जापानको फुकुओका शहरको हाकातामा शुक्रबारदेखि नयाँ शाखा बिस्तार गरिएको हो । आइएमईका प्रमूख कार्यकारी अधिकृत सुमन पोखरेल, क्योदाई रेमिटेन्सका प्रमुख याचिरो किमोतो र एनआरएन जापानका उपाध्यक्ष टक गैरेले संयुक्त रुपमा नयाँ शाखाको शुभारम्भ गरेका थिए । शाखा उद्घाटनका कार्यक्रममा बोल्दै आइएमईका प्रमुख कार्यकारी अधिकृत सुमन पोखरेलले विदेशबाट पैसा पठाउने भन्ने बित्तिकै आइएमईको नाम आउने हुँदा यसको छुट्टै पहिचान रहेको बताउदै पैसा पठाउने बिश्वासिलो र भरपर्दो ब्राण्डको रुपमा आइएमईलाई लिएकोमा सबैलाई धन्यवाद व्यक्त गरे । टोकियोपछि नेपाली विद्यार्थीहरुको बाहुल्यता फुकुओकामा रहेको हुनाले नेपाली विद्यार्थी सहित सबैको लागि सहज होस् भन्ने उदेश्यले फुकुओकामा शाखा विस्तार गरिएको हाकाता शाखा प्रमुख रामकृष्ण श्रेष्ठले बताए । नयाँ शाखा विस्तारसँगै क्योदाई रेमिटेन्स ले फुकुओकामा रहेका सम्पूर्ण नेपाली संघसंस्थाहरुको लागि विशेष अवसरमा हुने छलफलमा निशुल्क बैठक हल उपलब्ध गराउने समेत बताइएको छ ।

धनगढी, असार २१ ।  कैलालीको घोडाघोडी र लम्किचुहा नगरपालिकामा नेकपा एमाले विजयी भएको छ । एमालेका तपेन्द्र रावलले ८ हजार १६४ मत पाए । उनका निकटतम प्रतिद्वन्द्वी माओवादी केन्द्रका लक्ष्मण थारुले ७ हजार २३७ मत पाए ।बुधबार विहान सम्पन्न मत गणना अनुसार घोडाघोडीमा मेयर र उपमेयर दुबै एमालेले जितेको छ । उपमेयरमा एमालेकी लक्ष्मी चौधरी ७ हजार २३४ मतका साथ विजयी भएकी छन् । निकटतम प्रतिद्वन्द्वी माओवादी केन्द्रकी ममता चलाउनेले ७ हजार ६४ मत पाइन् । कैलालीकै लम्किचुहा नगरपालिकाको प्रमुख र उपप्रमुख दुबैमा एमाले विजयी भएको छ ।

काठमाडौं, असार १९ । स्थानीय तह दोस्रो चरण अन्तर्गत असार १४ गते भएको ३३४ स्थानीय तह मध्ये अहिलेसम्म्म २४६ तहको मत परिणाम सार्वजनिक भएको छ । सार्वजनिक भएको मतपरिणाम अनुसार नेकपा एमालेले १०४ स्थानीय तहमा विजयी भएको छ । भने नेपाली कांग्रेस ९६ स्थानीय तहमा विजयी भएको छ । त्यसैगरी नेकपा माओवादी केन्द्र ३२ स्थानीय तहमा विजयी भएको छ । भने संघीय समाजवादी फोरमले ६ स्थानीय तहमा जित हात पारेको छ । त्यस्तै, नेपाल लोकतान्त्रिक फोरमले ४, राष्ट्रिय जनमोर्चाले २ र राप्रपाले १ र स्वतन्त्रले १ स्थानीय तहमा जित हात पारेका छन् ।

प्रेम सुनार गुल्मी, असार १४ । आज विहान ७ बजेदेखि सुरु भएको मतदान अपरान्ह १२ बजेसम्ममा ३० प्रतिशत मत खसेको छ । गुल्मीको एउटा केन्द्र बाहेक जिल्लाभरी नै निकै उत्साहका साथ मतदान कार्यक्रम भइरहेकाे छ । कालिगण्डकी गाउँपालिकाको कोरेङ्ग मावि केन्द्रमा माओवादी कार्यकर्ताहरुलाई एमाले कार्यकर्ताले आक्रमण गरेको भन्ने विवादका कारण मतदान सुरु नै हुन नसकेको प्रमुख निर्वाचन अधिकृत मातृकाप्रसाद मरासीनीले जानकारी दिएका छन् । त्यस्तै धुर्कोट गाउँपालिकाको वाग्लामा गएराती एमाले कार्यकर्ता र कांग्रेस कार्यकर्ताको गएराती झडप भएको विषयमा पुनः विवाद हुँदा एक घण्टा रोकिएको थियो । अन्यत्रा भने सुध्रिदो मौसमसँगै मेला लागेजसरी जनतामा निकै उत्साहका साथ मतदान गरेका छन् । मतदान नगरेकाहरु पंक्तिमा बसीरहँदा मतदान गरेकोहरु समेत घर नफर्किई त्यही बसीरहेका देखिन्थे । गुल्मीमा १०१ वर्षिया बृद्धा तुलासा देवि अर्यालदेखि बाबुको क्रिया बसेका क्रियापुत्री खड्ग श्रेष्ठले समेत मतदान गरेका छन् । त्यस्तै प्यारालाईसिसबाट विगत १० बर्षदेखि थला परेकी ८७ वर्षिया अम्विकादेवी पन्थीलाई पनि स्टेचरमा वोकेर ल्याई मतदान गराइएको छ ।

बाजुरा, असार ११ । उत्तरी भेगकोे पाण्डवगुफा गाउँपालिका– ३ की फुलटुक्का ढोली सुत्केरी व्यथाले छटपटिएकी छन् । उनलाई व्यथा लागेको दुई दिन बित्दा पनि शिशु पाउन सकेकी छैनन् । साबिकको गोत्री गाविसमा रहेको गोत्री स्वास्थ्य चौकी हुनीमहतिमा शिशु पाउन नसकेपछि उनलाई सुत्केरी गराउनका लागि तीन दिनको पैदल यात्रामा रहेको जिल्ला सदरमुकाम मार्तडीमा पठाइएको स्वास्थ्य चौकीले जनाएको छ । फुलटुक्काको पाठेघरमा रहेको जाली फुटिसकेको, मुख खुकुलो हँुदै गएको र पेटको कडापन नरम हँुदै गएकाले सुत्केरी हुन समस्या भएको जिल्ला स्वास्थ्य कार्यालय बाजुराका प्रमुख डा रुपचन्द्र विश्वकर्माले जानकारी दिनुभयो । गोत्री स्वास्थ्य चौकीबाट कोल्टी प्राथमिक स्वास्थ्य केन्द्रमा सुत्केरी गराउनका लागि करिब सात घन्टाको पैदलयात्रा गर्नुपर्ने बाध्यता छ । उनको उपचारका लागि स्वास्थ्य मन्त्रालय र क्षेत्रीय स्वास्थ्य निर्देशनालयमा खबर गर्दा हेलिकप्टर प्रयोग गर्न बजेट नभएको जनाएकाले फुलटुक्काको ज्यान जोखिममा रहेको बताइएको छ । सुत्केरीको ज्यान बचाउनका लागि मन्त्रालयका सचिवसँग हेलिकप्टर उडानका लागि सम्पर्क भइरहेको डा विश्वकर्माले बताउनुभयो । यसअघि पनि सुत्केरी व्यथाले च्यापेर शिशु पाउन नसकी समयमै उपचार नहुँदा र यातायातको सहज पहँुच नहुनाले साबिकको गोत्री गाविसकी एक महिलाको मृत्यु भएको थियो।

सोलुखुम्बु, असार ९ । खहरे खोलाले बगाउँदा दुई विद्यार्थीको मृत्यु भएपछि तिनका आफन्तले विद्यालयमा तोडफोड गरेका छन् । विद्यालय प्रशासनको लापर्बाहीका कारण विद्यार्थीको मृत्यु भएको आरोपसहित आफन्तले आक्रोश व्यक्त गर्दै विद्यालयमा तोडफोड गरेका हुन् । विद्यालय प्रशासनले घटनाको जिम्मा लिनुपर्ने र उचित क्षतिपूर्ति उपलब्ध गराउनुपर्ने उनीहरुको माग छ । विद्यालय परिसरमै शव राखेर उनीहरुले बिहीबार साझदेखिनै विद्यालय घेराउ गरेका थिए । अहिले विद्यालय व्यवस्थापन समिति र मृतकका आफन्तबीच छलफल भइरहेको प्रहरी निरीक्षक प्रधुम्न अधिकारीले जानकारी दिए । बिहीबार अपराह्न ५.३० बजे दूधकौसीका गाउँपालिका– १ नेलेस्थित जोगरामा रेहको खहरे खोलाले बगाउँदा सोही स्थानको हिमशिखर बोर्डिाङ स्कुलमा एल केजीमा अध्ययनरत– सात वर्षीया सागर कटुवाल र कक्षा– २ मा अध्ययनरत– ८ वर्षीया रचना बस्नेतको घटनास्थलमै मृत्यु भएको थियो । सोही खोलाले बगाउँदा दूधकौसीका गाउँपालिका– १ जोगराका २५ वर्षीया गणेश बस्नेत र सात वर्षीया सञ्जु कटुवालसमेत घाइते भएका थिए ।

काठमाडौं, असार ७ । एक हप्ताअघि पूर्वीनेपाल हुँदै प्रवेश गरेको मनसुन आठ दिनपछि देशभर सक्रिय भएको छ । मंगलबार बंगालको खाडीबाट आउने पूर्वी वायु बलियो भएपछि देशैभर मनसुन सक्रिय भएको हो । देशका अधिकांश भूभागमा वर्षासँगै सुरु भएको जल तथा मौसम विज्ञान विभाग पूर्वानुमान महाशाखाका मौसम विज्ञ सुवा रिमालले बताए । विभागले यसवर्ष औसत वर्षा हुने अनुमान गरेको नयाँ पत्रिकामा खबर छ । बुधबार सुदूरपश्चिमको तराई क्षेत्रबाहेक अधिकांश भूभागमा वर्षा हुने महाशाखाको अनुमान छ । सुदूरपश्चिमकमो तराई क्षेत्रमा भने मौसम बदली मात्रज्ञ हुन सक्ने अनुमान छ ।

प्रेम सुनार गुल्मी । गुल्मी दरवार गाउँपालिकामा भएको कांग्रेस एमाले विचको प्रतिशोध पुर्ण भनिएको कुटपिट घटनाको शिकार सैनिक जवान समेत भएको खुलेको छ । त्यस गाउँपालिका–४ को विरवासमा दुई जना एमाले कार्यकर्ता कांग्रेस कार्यकर्ताबाट निर्घात कुटिएको भनिए पनि एक जना कुनै राजनैतिक दलको कार्यकर्ता नभई विदामा घर आएका नेपाली सेनाका जवान भएको आज जिल्ला प्रहरी कार्यालयमा भएको छलफलका क्रममा खुलेको हो । प्रत्यक्षदर्शीका अनुसार बुधवार साँझ करिव साढे ८ वजेको समयमा विदेश जाने तयारीका क्रममा स्थानिय एक युवाले साथी भाई विच विरवासको एक होटलमा भोजको आयोजना गरेका थिए । नाचगान, हुटिङ्ग चलि रहेकै वेला वाहिरबाट वोलाउन आएका केहि युवाहरुको समुहले भोजमा सहभागी त्यसै विरवास घर भई नेपाली सेना सल्यान व्यारेकमा कार्यरत २४ वर्षिय सुर्यबहादुर पल्ली र सोही उमेरका स्थानिय ओमबहादुर रजालीलाई टाउँकोमा रड प्रहार गरी मरणसन्न हुने गरी ढलाएका थिए । यस घटनालाई त्यहाँको कांग्रेस एमाले दुवैले एकले अर्कोलाई दोषि देखाउँदै राजनैतिक प्रतिशोध भने पनि निर्घात कुटाई खाने मध्येका पल्ली राजनीति संग चासो राख्नै नमिल्ने संस्था नेपाली सेनाका जवान भएको स्थानियवासीले बताएका छन् । उनिहरुलाई कुटपित गर्ने चार जना युवाहरुलाई प्रहरीले पक्राउ गरी जिल्ला प्रहरी कार्यालयको नियन्त्रणमा राखेको छ । कुटपीटको आरोपमा सोहि स्थानका ३६ बर्षिय बिशाल सोमरे, २२ बर्षिय प्रेम सोमरे, ३४ बर्षिय पदम पल्ली र २७ बर्षिय ज्ञानु रेश्मीलाई प्रहरीले गिरफतार गरेको जिल्ला प्रहरी कार्यालयले जनाएको छ ।अहिले छलफल चलिरहेकोले कुनै प्रतिकृया नदिने त्यस कार्यालयका प्रवत्ता महेन्द्र नेपालले बताए । ‘पदम पल्लीले होटल बाहिर बोलाएपछि म बाहिर आएँ, जिल्ला अस्पताल तम्घासको शैयामा उपचार भई रहेका सैनिक जवान पल्लीले भने वाहिर निस्कीन साथ एक्कासी रड प्रहार गरे पछि म वेहोस भएर ढले त्यस पछि केहि थाह पाईन । अर्का घाईते रजाली पनि अक्कासी टाउँको रड प्रहार गरे पछि केहि होस नपाएको बताउँछन् । कुटपीट गर्ने युवाहरु कांग्रेस र कुटिने युवाहरु मध्येका एक जना रजाली एमाले समर्थक कार्यकर्ता भएको प्रहरीले जनाएको छ । यो घटनालाई जिल्ला तथा स्थानीय एमाले नेताहरुले नियोजित आक्रमण भएको बताएका छन् । नेकपा एमालेको तर्फबाट गुल्मी दरवार गाउँपालिका ४ विरवासका वडाध्याक्ष खुम बहादुर पल्लीले दिउँसो कांग्रेसकको टिसर्ट लगाउँदै र चुनावी गीत घन्काउँदै मोटरबाटमो डोजर चलाउँदै गरिएको बेला आफ्ना कार्यकर्ताहरुले सम्झाएको रिस साँधेर सँझ नियोजित रुपमा कांग्रेसजनले आक्रमण गरेको र गाउँ त्रसित पारेको आरोप लगाए । उता नेपाली कांग्रेसका नेताहरुले पनि एमालेहरुले आफुहरुलाई गाउँमा त्रसित पारेको आरोप लगाउँछन् । नेपाली कांग्रेस त्यहाँका वडा सभापति केशवराज कँडेलले पहिला उनिहरुले घच्चाएको र घुचडा घुचड गर्ने क्रममा उनिहरु नै बढि आक्रोषित भई घर घरमा ढोका हान्ने काम भएको र आफुलाई समेत कुटपिट गरेको बताए । निर्वाचनको प्रचार प्रचारका क्रममा केहि दिन यता त्यस गुल्मी दरवार गाउँपालिकाका विभिन्न स्थानमा कांग्रेस र एमालेका कार्यकर्ताहरु विच झडप हुँदै आईरहको छ । तिन दिन अघि कांग्रेसले त्यसको छिमेकी गाउँ उपल्लो भंगेरीमा पाईप बाँड्यो रे भन्ने आरोप लगाउँदै निगरानी गर्न पुगेका एमालेका केहि कार्यताहरुलाई त्यसै गाउँपालिकाका कांग्रेस कार्यकर्ताहरुको ठुलो समुह जुटेर झण्डै चार घण्टा सम्म घेराउँ गर्दै लछार पछार समेत गरेका थिए । उक्त गाउँपालिकामा कांग्रेस , एमाले विच कडा चुनावी टक्कर छ । उक्त गाउँपालिका सदरमुकामको रेसुङ्गा नगरपालिका संग जोडिएको गाउँपालिका हो ।