भारत–चीनबीच लिपुलेक व्यापारिक सम्झौताप्रति नेपाल बुद्धिजीवी संगठनको आपत्ति
काठमाडौं । भारत र चीनले हालै लिपुलेकको भू–भाग प्रयोग गरी व्यापार र सहयोग गर्ने विषयमा भएको सम्झौताप्रति नेपाल बुद्धिजीवी संगठनले गम्भीर आपत्ति जनाएको छ । संगठनका अध्यक्ष कृष्ण के.सी.द्वारा जारी विज्ञप्तिमा भनिएको छ, “नेपालको भूभाग लिपुलेकलाई भारतीय प्रधानमन्त्री नरेन्द्र मोदी र चिनियाँ प्रधानमन्त्री ली खछ्याङले व्यापारिक मार्गका रुपमा प्रयोग गर्ने सहमति जनाउनु नेपालको सार्वभौमिकतामाथि ठाडो हस्तक्षेप हो ।” विज्ञप्तिमा नेपालको संविधान, इतिहास, तथ्य र प्रमाणअनुसार लिपुलेक नेपालको अविभाज्य भूभाग भएको स्पष्ट भएको उल्लेख गर्दै, भारत–चीनबीच भएको यस्तो सम्झौता अस्वीकार्य रहेको चेतावनी दिइएको छ । साथै नेपाल सरकारलाई आफ्नो राष्ट्रिय सार्वभौमिकता र अखण्डताको रक्षा गर्न कूटनीतिक पहल गर्न आग्रह गरिएको छ । संगठनले नेपाल–भारतबीचको स्थायी मैत्रीपूर्ण सम्बन्धलाई बलियो बनाउन दुवै मुलुकबीचका सीमा विवाद ऐतिहासिक नक्सा, सम्झौता र प्रमाणका आधारमा समाधान गर्नुपर्नेमा जोड दिएको छ ।
