उपराष्ट्रपतिको जलपान समारोह प्रधानमन्त्री देउवाद्वारा ‘बहिष्कार’
काठमाडौं, कात्तिक १ । उपराष्ट्रपति नन्दबहादुर पुनले आयोजना गरेको जलपान समारोहमा प्रधानमन्त्री शेरबहादुर देउवा उपस्थित भएनन । उपराष्ट्रपति कार्यालयले प्रधानमन्त्री देउवालाई जलपान समारोहमा सहभागीताका लागि निमन्त्रण पठाएको तर समारोहमा उपस्थित नभएको जनाएको छ । प्रधानमन्त्रीको समारोहमा उपस्थिति नहुनको कारणबारे उपराष्ट्रपतिको कार्यालयले केही बताएको छैन । तर, जानकारहरुका अनुसार नेकपा माओवादी केन्द्रकोे सहयोगमा प्रधानमन्त्री बनेका देउवाले हिजो मंगलबार मात्रै माओवादीबाट सबै मन्त्रीलालई विनाविभागीय बनाएका थिए । त्यसपछि दुई पार्टीबीचको सम्बन्ध निकै विग्रिएको छ । उपराष्ट्रपति पुन माओवादी पृष्ठभूमिका भएकाले प्रधानमन्त्री देउवाले जलपान समारोह बहिष्कार गरेको हुन सक्ने बताएका छन । उपराष्ट्रपति पुनले शुभ दिपावली, छठ एवम् नेपाल सम्वतको अवसरमा बुधबार जलपान समारोहको आयोजना गरेका थिए । बुधबार अपरान्ह ३ बजे उपराष्ट्रपति भवनको प्राङ्गणमा सुरु भएको समारोहमा राष्ट्रपति विद्यादेवी भण्डारी, प्रधानन्यायाधीश, पूर्व प्रधानमन्त्रीहरु, उपप्रधानमन्त्री, मन्त्री, राजनीतिक दलका नेताहरु, संवैधानिक अंगका प्रमुखहरु, कुटनीतिक नियोगका प्रतिनिधि, सरकारका उच्च पदाधिकारीलगायत विशिष्ट व्यक्तित्वहरुको उपस्थिति रहेको तर प्रधानमन्त्री देउवा उपस्थित थिएनन । प्रत्येक वर्षको दिपावली, छठ तथा नेपाल संवत्को अवसर पारेर उपराष्ट्रपतिले जलपान समारोहको आयोजना गर्ने प्रचलन छ ।
