रहेनन् निष्ठाका सतिसाल बौद्धिक व्यक्तित्व प्रदीप गिरी
काठमाडौं । नेपालको राजनीतिमा आदर्श र इमानको नेताका रुपमा परिचित वैचारिक व्यक्तित्व प्रदीप गिरी हामीसँग रहेनन् । घाँटीको क्यान्सरका कारण मेडिसिटी अस्पतालमा भर्ना भएका गिरिको आज निधन भएको हो । नेता गिरिको उपचारका क्रममा शनिबार साँझ निधन भएको कांग्रेस नेता दीपकुमार उपाध्यायले बताए। उनको एक महीनादेखि नेपाल मेडिसिटी अस्पतालमा उपचार भइरहेको थियो। झण्डै एक महिनादेखि उपचाररत गिरीलाई बचाउने अथक प्रयास भएपनि उनले संसार परित्याग गरेका हुन । उनलाई पछिल्लो समय निमोनियाले समेत च्यापेको चिकित्सकले बताएका थिए । नेपालको राजनीमिा इमान र निष्ठाको राजनीतिक पर्यायका रुपमा गिरिको नाम सधैं इतिहासको पानामा अमर रहनेछ । पद र प्रतिष्ठाकाे लाभ नलिने र सामाजिक परिवर्तनलाई धरातलीय यथार्थका रुपमा बुझ्ने र व्याख्या गर्ने गिरिले कार्ल मार्क्स, महात्मा गान्धी, समाजवादी चिन्तक राममनाेहर लाेहिया, बिपी काेइराला लगायतका नेतालाई आदर्श मान्ने गर्दथे । बौद्धिक नेताका रूपमा परिचित ६१ वर्षीय प्रदीप गिरी नेपाली कांग्रेसका सांसद समेत रहेका थिए । बुबा मित्रलाल गिरी नेपाली कांग्रेसका नेता भएकाले सानै उमेरमा राजनीतिमा संलग्न भएको र २०१७ सालदेखि सक्रिय राजनीति प्रारम्भ गरेका थिए । राजनीतिक संघर्षका क्रममा २०२५ सालमा १८ महिना र २०४२ सालमा झण्डै एक वर्ष समेत गरी हालसम्म कुल चार वर्ष उहाँले जेल जीवन बिताएका गिरि लोकतान्त्रिक समाजवादका अनुयायी थिए । उनीे २०२४ सालमा नेपाल छात्र सङ्घ (बनारस)को निर्वाचित उपाध्यक्ष बनेका थिए । २०५१ सालको संसदीय निर्वाचनमा सिरहा क्षेत्र नं। ५ बाट निर्वाचित गिरीले २०५६ को संसदीय निर्वाचनमा समेत भाग लिएका थिए । त्यतिबेला व्यवस्थापिका संसदमा उहाँले नेपाली काङ्ग्रेस, प्रजातान्त्रिकका तर्फबाट प्रतिनिधित्व गरेका थिए । भारत, जवाहरलाल नेहरू विश्वविद्यालयबाट अर्थशास्त्र र दर्शनशास्त्रका स्नातकोत्तर गिरी अध्ययन र नियमित लेखनमा समेत सक्रिय रहँदै आएका थिए । गिरिले लेनिन (जीवनी), नारी, मार्क्सवाद र अर्थशास्त्र लगायत झण्डै एक दर्जन पुस्तक लेखेका छन् ।
