काठमाडौं : सार्वजनिक यातायात सञ्चालन गर्ने सरकारको निर्णयपछि नेपाल राष्ट्रिय यातायात व्यवसायी महासंघको बैठक बस्ने भएको छ । सरकारको निर्णयका सम्बन्धमा माहासंघको आधिकारिक धारणा तय गर्न बैठक बस्ने भएको हो । महासंघले आधिकारिक निर्णयविना सरकारको निर्णयको स्वागत वा विरोध केहि पनि नगर्ने नीति लिएको छ । तर, उक्त निर्णय आमसञ्चार माध्यमबाट थाहा पाउनुपरेको र यातायात खोल्ने सम्बन्धमा आफूहरूसँग कुनै छलफल नगरिएकोमा महासंघ असन्तुष्ट बनेको छ । महासंघका महासचिव सरोज सिटौंलाका अनुसार महासंघले भोलि शुक्रबार दिउँसो १ बजेका लागि बैंठक बोलाएको छ । सरकारले सार्वजनिक यातायात सेवा बन्द गर्दा र खोल्ने निर्णय गर्दा समेत सम्बन्धित व्यवासयीहरुसँग कुनै छलफल नगरेकोप्रति व्यवसायीहरूले असन्तुष्टि व्यक्त गरेका छन् । महासंघकै ट्याक्सी तर्फका केन्द्रिय सदस्य अर्जुन गौतमले सार्वजकि यातायात सञ्चालन गर्न दिने सरकारको निर्णय स्वागतयोग्य भएपनि कुनै मापदण्ड र योजनाविना घोषणा मात्र गरिएकाले व्यवसायीहरु अन्योलतामा परेको बताए ।

सिन्धुपाल्चोक : सभामुख अग्नीप्रसाद सापकोटाले सिन्धुपाल्चोकको बाह्रबिसेमा गएराति आएको बाढी-पहिरोबाट भएको मानवीय तथा भौतिक क्षतिप्रति गहिरो दुःख व्यक्त गरेका छन् । घटनास्थलको स्थलगत अवलोकनपछि सिन्धुपाल्चोकको चौतारामा आज पत्रकारहरूसँग कुराकानी गर्दै उनले बाह्रबिसे नगरपालिका–५ स्थित जम्बु खोलामा गएराति आएको बाढी–पहिरोमा परी घाइते हुने र पीडित परिवारको उद्दारमा कुनै सम्झैता नहुने बताएका हुन् । सभामुख सापकोटाले उद्धार जारी रहेको र राहत सामग्री वितरण भइरहेको उल्लेख गर्दै बेपत्ताको खोजी र उद्धारमा सरकार प्रभावकारी ढङ्गबाट अगाडि बढ्ने बताए । जिल्ला विपद् व्यवस्थापन समितिले पीडित ३० परिवारलाई राहत वितरण गरेको प्रमुख जिल्ला अधिकारी उमेशकुमार ढकालले जानकारी दिएयो । टेन्ट, मेट्रिक्स, त्रिपाल, भाँडा सेट, कम्बल, कपडालगायतको सामग्री वितरण गरिएको छ । वाग्मती प्रदेशका सामाजिक विकासमन्त्री युवराज दुलाल, आन्तरिक मामिलामन्त्री सालिकराम जम्मकट्टेल र वन, वातावरण तथा पर्यटनमन्त्री सरेश नेपाल लगायतको टोली घटनास्थलमै पुगी उद्धार कार्यमा जुटिरहेका छन् । अरनिको राजमार्गअन्तर्गत बाह्रबिसे-कोदारीखण्डको खगदल भन्ने स्थानको पक्की पुल बाढीले बगाएपछि आवतजावत पूर्णरुपमा बन्द भएको छ ।

काठमाडौं : ग्लोबल आइएमई बैंकको प्रमुख कार्यकारी अधिकृतबाट पर्शुराम कुँवरले दिएको राजीनामा स्वीकृत भएको छ । साउन १ गतेदेखि लागू हुने गरी कुँवरले दिएको राजीनामा बैंक सञ्चालक समितिले स्वीकृत गरेको हो । तत्कालीन जनता बैंकको प्रमुख कार्यकारी अधिकृत रहेका कुँवर ग्लोबल र जनता मर्ज भएसँगै बैंकको प्रमुख कार्यकारी अधिकृत भएका थिए । २०७८ जेठसम्म कार्यकाल भए पनि उनले बीचमै बैंक छोडेका हुन् । क्षेत्रीले स्वास्थ्यको कारण देखाउँदै बैंक छाडेका बताइएको छ ।

काठमाडौं : सरकारले सार्वजनिक यातायातका साधन सञ्चालन गर्न दिने भएको छ । सरकारका प्रवक्ता सञ्चार तथा सूचना प्रविधि मन्त्री डा. युवराज खतिवडाले यस बारेको जानकारी दिएका हुन् । खतिवडाले असार २३ गते बसेको मन्त्रिपरिषद् बैठकले काठमाडौं उपत्यकाभित्र ३ वटा जिल्लालाई एउटा जिल्ला मानेर सवारीसाधन चल्न दिने निर्णय भएको बताएका छन् । ‘काठमाडौं उपत्यका भित्र काठमाडौं, ललितपुर र भक्तपुरलाई एउटा जिल्ला मानेर सार्वजनिक सवारीसाधन चल्न दिने निर्णय भएको छ’, उनले भने, ‘उपत्यका बाहिर एउटा जिल्ला भित्र सवारी साधन चल्न दिइने निर्णय भएको छ ।’

काठमाडौं : नेपालमा अहिलेसम्म ७७ मध्ये ५ जिल्ला कोरोना संक्रमण मुक्त भएका छन् । स्वास्थ्य तथा जनसंख्या मन्त्रालयका अनुसार बिहीबारसम्म नेपालमा ५ जिल्ला कोरोना संक्रमण मुक्त भएका छन् । कोरोना संक्रमण मुक्त हुनेमा सोलुखम्बु, धनकुटा, मुस्ताङ, हुम्ला र भोजपुर रहेका छन् । देशभर आज १०८ जनाको पीसीआर पोजिटिभ नेपालमा बिहीबार १ सय ८ जनामा कोरोना भाइरस संक्रमण देखिएको छ । देशका विभिन्न २५ प्रयोगशालामा गरिएको परीक्षणमा आज थप १ सय ८ जनामा कोरोना संक्रमण देखिएको हो । योसँगै सङ्क्रमितको कुल संख्या १६ हजार ४ सय २३ पुगेको छ । त्यस्तै आज १ सय ३९ जना उपचारपछि डिस्चार्ज भएका छन् । योसँगै नेपालमा कोरोना जित्नेको संख्या ७ हजार ८ सय ९१ पुगेको छ ।

काठमाडौं : काठमाडौंमा आज ५ जनामा कोरोना भाइरस (कोभिड-१९) पोजिटिभ देखिएको छ । आज विभिन्न ३ अस्पतालमा रहेका प्रयोगशलामा परीक्षण गर्दा काठमाडौंमा आज ५ जनामा कोरोना पोजिटिभ देखिएको हो । काठमाडौंमा बुधबारको तुलानामा आज संक्रमितको संख्या कम हो । उपत्यकाका भक्तपुर र ललितपुरमा भने बिहीबार संक्रमित थपिएका छैनन् । आज १०८ जनाको पीसीआर पोजिटिभ नेपालमा बिहीबार १ सय ८ जनामा कोरोना भाइरस संक्रमण देखिएको छ । देशका विभिन्न २५ प्रयोगशालामा गरिएको परीक्षणमा आज थप १ सय ८ जनामा कोरोना संक्रमण देखिएको हो । योसँगै सङ्क्रमितको कुल संख्या १६ हजार ४ सय २३ पुगेको छ । त्यस्तै आज १ सय ३९ जना उपचारपछि डिस्चार्ज भएका छन् । योसँगै नेपालमा कोरोना जित्नेको संख्या ७ हजार ८ सय ९१ पुगेको छ ।

काठमाडौं : नेपालमा बिहीबार १ सय ८ जनामा कोरोना भाइरस संक्रमण देखिएको छ । देशका विभिन्न २५ प्रयोगशालामा गरिएको परीक्षणमा आज थप १ सय ८ जनामा कोरोना संक्रमण देखिएको हो । योसँगै सङ्क्रमितको कुल संख्या १६ हजार ४ सय २३ पुगेको छ । त्यस्तै आज १ सय ३९ जना उपचारपछि डिस्चार्ज भएका छन् । योसँगै नेपालमा कोरोना जित्नेको संख्या ७ हजार ८ सय ९१ पुगेको छ ।

काठमाडौं : जनता समाजवादी पार्टीकी नेतृ सरिता गिरी आजदेखि सांसद पदबाट मुक्त भएकी छन् । संघीय संसद सचिवालयले गिरीको सांसद पद रिक्त भएको सूचना जारी गरेसँगै सांसद पदबाट मुक्त भएकी हुन् । पार्टीको ह्वीप उल्लंघन गरेको र नेपालको जारी नयाँ नक्साप्रति असहमति जाहेर गरेको भन्दै उनलाई समाजवादी पार्टीले पार्टीको साधारण सदस्य पनि नरहने गरी हटाएको थियो । समाजवादीले संसद सचिवालयलाई पत्र पठाएर गिरीलाई पदमुक्त गराउन अनुरोध गरेको थियो । संसद सचिवालयले सभामुख अग्निप्रसाद सापकोटालाई समाजवादी पार्टीले संसद सचिवालयलाई दिएको पत्रबारे जानकारी दिएपछि गिरी पदमुक्त बनेकी हुन् । संविधानको धारा ८९ बमोजिम सांसद गिरी सांसदबाट निष्कासित भएको संसद सचिवालयले जारी सूचनामा उल्लेख गरेको छ ।

काठमाडौं : जनता समाजवादी पार्टी नेपालले औपचारिक रुपमा राजनीतिक दलको मान्यता पाएको छ । जसपा निर्वाचन आयोगमा दर्ता भएसँगै नयाँ दल बनेको हो । आयोगको बुधबार बसेको बैठकले जसपा दर्ता गर्ने निर्णय भएको निर्वाचन आयोगका प्रवक्ता राजकुमार श्रेष्ठले जानकारी दिए । जसपालाई दल दर्ताको प्रमाणपत्र लिन शुक्रबार बोलाइएको बताइएका छ । गत वैशाख १० गते समाजवादी पार्टी र राष्ट्रिय जनता पार्टीबीच एकीकरण भई जसपा गठन गर्ने सहमति भएको थियो । एकीकरण घोषणा भएको जसपाले दल दर्ताका लागि जेठ २५ गते आयोगमा आवश्यक कागजात बुझाएको थियो । जसपाका नेता केशव झाले आयोगमा आधिकारिक रुपमा दल दर्ता भएपछि पार्टी एकीकरणका बाँकी काम अघि बढाइने बताए । आयोगमा अहिले १३२ राजनीतिक दल दर्ता भएका छन् । दुई पार्टी राजपा र समाजवादी पार्टी एकीकरण भएपछि अब आयोगमा दर्ता भएका १३१ दल हुनेछन् । जसपाको सहमतिअनुसार पार्टीको केन्द्रीय कार्यकारिणी समिति अध्यक्षमा महन्थ ठाकुर र उपेन्द्र यादव रहेका छन् । पार्टीका वरिष्ठ नेतात्रयमा अशोककुमार राई, डा. बाबुराम भट्टराई र राजेन्द्र महतो रहेका छन् । तत्कालका लागि ३० सदस्यीय कार्यकारिणी सदस्य घोषणा गरिएको छ ।

काठमाडौंः बुढानिलकण्ठ विद्यालयले विद्यालय सञ्चालन नभएको अवस्थाको शुल्क नलिने भएको छ । विद्यालयका प्रिन्सिपल होमनाथ आचार्यले बन्दाबन्दी ९लकडाउन० का बीच मासिक शुल्क बुझाइसकेको भए पनि पछि शुल्कमा मिलान गरिने बताए । उनले विद्यार्थीको मासिक शुल्क पेश्की स्वरुप बुझाउनका लागि पठाइएको बिल अर्को निर्णय नहुँदासम्मका लागि स्थगित गरिएको समेत जानकारी दिए । विद्यालयले लकडाउन समयमा चैतदेखि असारसम्मको मासिक शुल्क भन्दै अभिभावकलाई बिल पठाएको थियो ।

लण्डनः आफ्नै नवजात शिशुको हत्या आरोपमा पक्राउ परेकी एक नेपाली महिलालाई आज हत्या अभियोगमा बेलायतको विन्चेस्टर क्राउन कोटमा उपस्थित गराइएको छ । ३ वर्षअघि नेपालबाट बेलायत आएकी २३ वर्षीया बबिता राईलाई सन् २०१७ मे मा नवजात शिशुलाई मारेर इङ्ग्ल्याण्डको अल्डरसटमा रहेको म्यानर पार्कमा गाडेको आरोपमा पक्राउ गरेको जनाइएको छ । प्रहरीका अनुसार उक्त शिशुलाई १९ मे, सन् २०१७ मा सो पार्कमा काम गर्ने एक कामदारले मर्मतसम्भारका क्रममा फेला पारेका थिए । कामदारले प्रहरीलाई खबर गरेपछि राईलगायत अन्य चार जनाविरुद्ध प्रहरीले अभियोग दर्ता गरेको थियो । प्रहरीका अनुसार शिशुको टाउकामा गम्भीर चोट लागेको सन् २०१८ मा गरेको शव परीक्षण रिपोर्टले देखाएको थियो । अदालतमा उक्त शिशुलाई ‘यम’ नामले सम्बोधन गरिएको थियो । अगस्ट १९ तारिखमा थप सुनुवाइ गर्ने गरी अदालतले आज समय तोकेको छ । दोभाषेको सहयोगमा आफ्नो कुरा राखेकी राईले अदालतले आफूलाई तारिख दिन नमाने बताउनुभयो । न्यायाधीशले उहाँलाई आफ्नो पक्षमा वकालत गर्ने वकिलले थप कागजात बुझाएर पुन तारिखका लागि निवेदन दिनसक्ने जनाएका छन् ।

काठमाडौंः नेकपा प्रवक्ता नारायणकाजी श्रेष्ठले भारतीय मिडियाको अनर्गल प्रचारले सीमा नाघेको बताएका छन् । साथै उनले बकवास बन्द गर्न भारतीय मिडियालाई चेतावनी दिएका छन् । सामाजिक सञ्जालमा ट्वीट गर्दै उनले भनेका छन्, ‘भारतीय सञ्चार माध्यमले हाम्रो सरकार र प्रमकाबारेमा गरेको अनर्गल प्रचारले सीमा नाघ्यो । हद भयो । बकवास बन्द गर ।’ उनले राष्ट्रिय सार्वभौमिकता र भौगोलिक अखण्डताको रक्षाको निम्ति आफूहरू एक ढिक्का रहेको भन्दै विदेशीको फुटाउ र स्वार्थ पुरा गर भन्ने नीति सफल हुन नदिने बताएका छन् । भारतीय सञ्चार माध्यमले हाम्रो सरकार र प्रमकाबारेमा गरेको अनर्गल प्रचारले सीमा नाघ्यो।हद भयो।बकवास बन्द गर।हाम्रो राष्ट्रीय सार्वभौमिकता र भौगोलिक अखण्डताको रक्षाको निम्ति हामी एक्ढिक्को छौं।बिदेशीको फुटाउ र स्वार्थ पुरा गर नीति सफल हुन दिनेछैनौ।यहाँ के गर्ने भन्ने हाम्रो कुरा हो। — NKShresthaPrakash (@nksthaprakash) July 9, 2020 नेपालले लिपुलेक, लिम्पियाधुरा क्षेत्र समेटेर नयाँ नक्सा जारी गरेपछि पछिल्लो समय भारतीय मिडियामा प्रधानमन्त्री केपी ओली र नेपालमा चिनियाँ प्रभाव भन्दै अतिरन्जित सामग्रीहरू प्रकाशन प्रसारण भइरहेका छन् । टाइम्स अफ इन्डियाले प्रधानमन्त्रीको आपत्तीजनक स्केच बनाएर समाचार छापेको छ भने जी न्युजको बिहार झारखण्ड टेलिभिजनले प्रधानमन्त्री ओलीलाई चिनियाँ राजदूत होउ यान्छीले हनी ट्रयापमा पारेको भिडिओ सामग्री प्रसारण गरेको छ ।

महेन्द्रनगरः भीमदत्त नगरपालिकाका प्रमुख सुरेन्द्र विष्टले नगर प्रमुख निर्वाचित भएको तेस्रो वर्ष प्रवेशमा जनप्रतिनिधि सहित सहयोगी सबैमा आभार व्यक्त गर्दै धन्यवाद दिएका छन् । नगर प्रमुख विष्टले बिहीबार वक्तव्यमार्फत तीन वर्षदेखि नगरको विकासका लागि निर्वाचनमा गरिएका प्रतिवद्धता पूरा गर्न सहयोग गर्ने सबैलाई धन्यवाद दिएका हुन् । २०७४ असार १४ गतेको स्थानीय तह निर्वाचनमा निर्वाचित मेयर विष्टले असार २४ गते पद तथा गोपनियताको शपथ लिएका थिए । उनी भीमदत्तको मेयरमा निर्वाचित भएको तीन वर्ष पूरा भएको छ । मेयर विष्टले संघीय लोकतान्त्रिक गणतन्त्रलाई संस्थागत गर्न तीन तहको निर्वाचनको दिनलाई स्वर्णिम दिनका रुपमा स्मरण गरेका छन् । ‘संघीय लोकतान्त्रिक गणतन्त्र नेपालको संविधानले व्यवस्था गरे बमोजिमको तीन तहका सरकारहरु मध्ये स्थानीय तह (स्थानीय सरकार) को निर्वाचन सम्पन्न भएको स्वर्णिम दिनलाई म एक पटक स्मरण गर्न चाहन्छु’ नगर प्रमुख विष्टले वक्तत्वमा भनेका छन् । भीमदत्त नगरपालिकाका नगर वासिन्दाको साथ र समर्थनले नगर प्रमुखमा निर्वाचित भएको उल्लेख गर्दै उनले नगर विकासको सेवा गर्ने मौका दिएकोमा आभार व्यक्त गरेका छन् । स्थानीय तह निर्वाचनमा गरिएका प्रतिवद्धता पूरा भए नभएको इतिहासले समीक्षा गर्ने नगर प्रमुख विष्टले बक्तव्यमा उल्लेख गरेका छन् । उनले भनेका छन्, ‘नगर प्रमुख पदमा निर्वाचित भएको दिन देखि आजका दिनसम्म आइपुग्दा समग्र नगरको विकास र समृद्धिका लागि मैले के कति गर्न सके वा सकिन इतिहासले समीक्षा गर्ने नै छ ।’ तीन वर्षमा स्थानीय, प्रदेश र संघीयका सबै जनप्रतिनिधि, राजनीतिक दल, नागरिक समाज, उद्यमी, व्यवसायी, सञ्चार, कर्मचारी सबैमा सहयोग पाएको उल्लेख गर्दै आगामी अबका दुई वर्षमा पनि सबैको सहयोग पाउने आशा व्यक्त गरिएको छ ।

मेलम्चीः सिन्धुपाल्चोकको बाह्रबिसेमा आएको बाढीबाट प्रभावितको उद्धारका लागि हेलिकप्टरसहितको टोली घटनास्थल पुगेको छ । मौसम प्रतिकूलताले काभ्रेपलाञ्चोकको मङ्गलटारमा अवतरण भएको कैलाश एयरको हेलिकप्टर सिन्धुपाल्चोकको बाह्रबिसेकाे जम्बु पुगेको हो । वाग्मती प्रदेशका सामाजिक विकासमन्त्री युवराज दुलालले हेलिकप्टर घटनास्थलमा पुगिसकेको र अब घाइतेको उद्धार थालिने जानकारी दिए । नेपाल कम्युनिष्ट पार्टी (नेकपा) का केन्द्रीय सदस्य माधव सापकोटासहितको टोली हेलिकप्टर लिएर बाह्रबिसे पुगेको हो । उक्त हेलिकप्टरबाट दुई गम्भीर घाइतेलाई काठमाडौं लगिने छ । सभामुख अग्निप्रसाद सापकोटासहित गएको हेलिकप्टर भने खराब मौसमका कारण धुलिखेलको आकाशबाट फर्किएको थियो । सिन्धुपाल्चोक पहिरोः राजमार्ग अवरुद्द हुँदा उद्धारमा समस्या, हेलिकप्टर पनि जान सकेन

गृहसचिव महेश्वर न्यौपानेबाट नवनियुक्त प्रहरी महानिरीक्षक शैलेश थापा क्षेत्रीलाई बिहीबार नियुक्ति–पत्र प्रदान । काठमाडौंः नेपाल प्रहरीका नवनियुक्त महानिरीक्षक शैलेश थापाक्षेत्रीलाई गृह मन्त्रालयमा बिहीबार बिहान आयोजित विशेष समारोहमा प्रहरी महानिरीक्षकको दर्ज्यानी चिन्ह प्रदान गरिएको छ । गृहसचिव महेश्वर न्यौपानेले महानिरीक्षक थापाक्षेत्रीलाई दर्ज्यानी चिन्ह प्रदान गरे । थापा क्षेत्रीलाई नेपाल सरकार मन्त्रिपरिषद्को निर्णयले यही २३ गते प्रहरी महानिरीक्षकमा नियुक्त गर्ने निर्णय गरेको थियो । सो अवसरमा गृहसचिव न्यौपानेले प्रहरी नेतृत्वलाई व्यवसायिक र पेशाप्रति इमान्दार बन्न निर्देशन दिँदै भ्रष्टाचारमा शून्य सहनशीलता र कानुन कार्यान्वयनमा कडा बन्न नेतृत्व सक्षम हुनुपर्ने बताए । प्रहरी प्रमुख छनोटमा हुने घृणित परम्परा हटेको चर्चा गर्दै उनले नवनियुक्त महानिरीक्षक थापा क्षेत्री र अर्का दावेदार प्रहरी अतिरिक्त महानिरीक्षक हरिबहादुर पालबीचको भद्रसहमति प्रसंशनीय रहेको बताए । ‘अबको नेतृत्वले उहाँहरूबाट सिक्नुपर्छ’, उनले भने, ‘विगतमा जे जस्ता गतिविधि भए–भए । त्यसको जिम्मेवार प्रहरी सङ्गठनभित्रका सदस्यहरू बन्नुपर्छ । अपारदर्शी र गैरजिम्मेवार कार्य सम्पादन मूल्याङकनका कारण पनि यस्तो समस्या सिर्जना भएको देखिन्छ ।’ महानिरीक्षक थापा क्षेत्रीले आफ्नो बोली व्यवहार नम्र र भद्र भए पनि यसको फाइदा उठाउने कार्य कहीँकतैबाट हुन नदिने प्रतिबद्धता व्यक्त गरे । ‘कानुनी कारबाहीका सवालमा म कसैसँग झुक्नेछैन’, उनले भने । उनले देश र नागरिकको सुरक्षा र प्रहरी सङ्गठनको हितका लागि सहकार्य गरी अगाडि बढ्ने प्रतिबद्धता जनाए । कार्यक्रममा सशस्त्र प्रहरी महानिरीक्षक शैलेन्द्र खनाल, राष्ट्रिय अनुसन्धान विभाग प्रमुख, एआइजीहरू, सातवटै प्रदेशका प्रदेश प्रहरी प्रमुखहरू सहभागी थिए ।