काठमाडौँ, २० जेठ । निर्वाचन आयोगले मतपत्र च्यातिएको सात दिनपछि चितवनको भरतपुर महानगरपालिका वडा नं १९ मा पुनः मतदान गर्ने निर्णय सुनाएको छ । निर्वाचन आयोगको आजको बैठकले मतगणनास्थलको अनधिकृत कब्जा भएको भन्ने पुष्टि हुन आएको जनाउँदै १९ नं वडामा पुनः मतदान गर्ने निर्णय गरेको हो । बैठकपछि आयोगद्वारा जारी विज्ञप्तिमा भनिएको छ – “कब्जाबाट असर परेको चितवन जिल्ला भरतपुर महानगरपालिका वडा नं १९ को मतदान केन्द्रको सम्पूर्ण मतपत्र अवैध घोषित गरी मतदान रद्द गर्ने ।” प्रमुख निर्वाचन आयुक्त डा अयोधी प्रसाद यादवले सञ्चारकर्मीसँग कुराकानी गर्दै भन्नुभयो–“स्थगित मतगणना कार्यक्रम मतदानद्वारा टुङ्गोमा पु¥याउने निर्णय भएको छ ।” आयोगले मतदान रद्द गरिएका मतदान केन्द्रको मतदान हुने स्थान, मिति र समय तोकी पुनः मतदान गराउने व्यवस्था मिलाउन भरतपुर महानगरपालिका, चितवनका मुख्य निर्वाचन अधिकृतलाई निर्देशन दिने निर्णय पनि गरेको छ । पहिलो चरणको स्थानीय तहको वैशाख ३१ गते भएको निर्वाचनको मतगणनाका क्रममा जेठ १४ गते आइतबार राति उम्मेदवारका प्रतिनिधिमध्ये केही मतगणनास्थल प्रवेश गरी गणना भएका र नभएका गरी ९० मतपत्र च्यातेका थिए । उक्त घटनामा ७० वटा मतपत्र गणना गर्नै नमिल्ने गरी च्यातिएको थियो भने २० वटा मतपत्र गन्ती गर्न सकिने अवस्थामा रहेको बुझिएको छ । प्रमुख निर्वाचन आयुक्त डा यादवले भन्नुभयो – “हामीले निर्णय गर्दा व्यवस्थापिका–संसद्ले बनाएको स्थानीय तहको कानुनको दफा ४९ र ५० लाई आधार मानेका छौँ, हामीले आफ्नोतर्फबाट केही निर्णय गरेका छैनौँ । उक्त वडाको एक हजार ८०९ मतगणना भइसकेको थियो । मतपत्र च्यातिने घटनाअघि भरतपुर नगरपालिकाका २९ वडामध्ये २७ वटा वडाको मतगणना पूरा भइसकेको थियो । च्यातिएका ९० वटा मतपत्रलाई बन्दमा नराखी पुनः मतदानमा गएर सबै मतदातालाई सक्रिय तुल्याई सौहार्दपूर्ण वातावरणमा पुनः मतदान गर्नु राम्रो हुने बताउँदै उहाँले भन्नुभयो – “यो प्रजातन्त्रमा निरन्तर हुने अभ्यास हो ।” नष्ट भएका ९० वटा मतपत्रबाटै निर्णयमा पुग्नु प¥यो भने के गर्ने भनी प्रश्न गर्दै प्रमुख निर्वाचन आयुक्त यादवले कतिपय मतपत्र गन्नै नसकिने गरी धुजाधुजा भएर च्यातिएको छ, यो अप्ठेरो स्थिति हो, लोकतन्त्रमा जनताको एउटा मतको पनि ज्यादै महत्व हुन्छ, च्यातिएका मतपत्र कसरी व्यवस्थापन गर्ने भन्ने मुख्य प्रश्न हो । मतपत्र च्यातिएको घटना भएपछि त्यहाँका मुख्य निर्वाचन अधिकृतले स्थगन गरेको सूचनासहित पठाएको प्रतिवेदन र आयोगका सहन्यायाधिवक्ता गीताप्रसाद तिम्सिनाको नेतृत्वमा खटिएको अनुगमन टोलीको प्रतिवेदन तथा स्थानीय तह निर्वाचन ऐनलाई टेकेर आयोगबाट पुनः मतदान गर्ने निर्णय भएको हो । हालसम्म भएको मतगणनाअनुसार भरतपुर महानगरपालिकामा नेपाली काँग्रेस र नेकपा ९माओवादी केन्द्र०को तर्फबाट संयुक्त उम्मेदवार रेणु दाहाल र नेकपा ९एमाले०का देवी ज्ञवालीबीच तीव्र प्रतिस्पर्धा रहेको छ । सत्तारुढ नेपाली काँग्रेस, माओवादी केन्द्र र प्रमुख प्रतिपक्षी दल एमालेबीच निर्वाचनमा जाने कि मतगणना गर्ने भन्ने विषयमा फरक फरक धारणा सार्वजनिक हुँदै आएको थियो । भरतपुर घटनालाई राजनीतिक दलले कानुनी पाटोबाटभन्दा पनि प्रतिष्ठाको मुद्दाका रुपमा व्याख्या गर्दै आ–आफ्ना तर्क अघि सार्दै आएका छन् । सत्तारुढ दल पुनः मतदानको पक्षमा रहेको थियो भने प्रतिपक्षले मतगणनाको मागलाई जोडदार रुपमा उठाउँदै आएको छ । पहिलो चरणमा निर्वाचन भएका २८३ मध्ये भरतपुर महानगरपालिकाबाहेक २८२ तहको नतिजा यसअघि नै सार्वजनिक भइसकेको छ । रासस

नेकपा एमालेले भरतपुर १९ मा पुनः मतदान गर्ने निर्णय अस्वीकार गरेको छ । शनिबार एमाले स्थायी कमिटीको बैठकले यस्तो निर्णय गरेको हो । एमालेका स्थायी कमिटी सदस्य शंकर पोखरेलका अनुसार आयोगको उक्त निर्णय प्रतिवाद गर्ने तयारी गरेको छ । त्यस्तै संसद चल्न नदिने बताएका छन् । स्थानीय तह निर्वाचन ऐन २०७३ को दफा ५० को उपदफा १ को खण्ड ख बमोजिम मतगणना स्थलको अनाधिकृत कब्जा भएको पुष्टि हुन आएको हुँदा सोहि दफाको उपदफा ४ बमोजिम कब्जाबाट असर परेको बडा नम्बर १९ को मदतान केन्द्रको सम्पूर्ण मतपत्रहरु अवैध घोषित गरि मतदान गर्ने अायोगले निर्णय गरेको थियो । रद्द गरिएका मतदान केन्द्रको मतदान हुने स्थान, मिति र समय ताेक्न भरतपुर महानगरपालिका चितवनका मुख्य निर्वाचन अधिकृतलाई जिम्मेवारी समेत आयोगले दिएको छ ।

काठमाडौं, जेठ २० । भरतपुरको वडा नं.१९ मा पुनःमतदान गराउने निर्णयप्रति एमालेले असहमत जनाएको छ । निर्वाचन आयोगको निर्णय संविधानविपरीत रहेको जिकिर गरेको छ । बहुप्रतिक्षित भरतपुर महानगरपालिकाको मतगणनाको विषय अन्ततः पुनः मतदानमा गएर टुङ्गिने भएको छ। भरतपुर महानगरपालिका वडा नं.१९ को मत च्यातिएको बुथमा फेरि मतदान गराउने निर्णय आज बसेको निर्वाचन आयोगको बैठकले गरेको हो । भरतपुर महानगरमा पुन: मतदान हुनेमा एमालेको आपत्ति निर्वाचन आयोगले दलका प्रतिनिधिबाट मतपत्र च्यातिएपछि विवादीत बनेको चितवनको भरतपुर महानगरपालिकामा पुन : मतदान गर्ने निर्णय गरेको छ । मतगणनाको क्रममा मतपत्र च्यातिएपछि स्थगित भएको भरतपुर महानगरको वडा नम्बर १९ मा पुन मतदान गर्नुपर्ने निस्क्रिय आयोगले निकालेको हो । अनुगमन टोलीको प्रतिवेदन अध्ययन गर्दा मतगणना स्थलको अनधिकृत कब्जा भएको भन्ने पुष्टि हुन आएको उल्लेख गर्दै निर्वाचन आयोगले  वडा नम्बर १९ को मतदान केन्द्रलाई अवैध घोषित गरेर मतदान रद्ध गर्ने निर्णय गरेको हो । आज बसेको आयोगको बैठकले रद्ध गरिएको मतदान केन्द्रको पुन मतदान गराउन भरतपुर महानगरका चितवनका मुख्य निर्वाचन अधिकृतलाई निर्देशन दिएको छ । गत जेठ १४ गते राती भरतपुर महानगरको वडा नम्बर १९ को मतगणनाको क्रममा माओबादी केन्द्रले प्रतिनिधीले ९० वटा मतपत्र च्यातेका थिए । यता, एमालेले निर्वाचन आयोगको निर्णयमा आपत्ती जनाउँदै आन्दोलनमा जाने चेतावनी दिएको छ । एमाले अध्यक्ष केपी ओलीले आयोगको निर्णय आपत्तीजनक भएको बताउँदै आन्दोलनका कार्यक्रम घोषणा गरेर अघि बढ्ने चेतावनी दिएको छ ।

काठमाडौँ, जेठ २० । राष्ट्रपति विद्यादेवी भण्डारीले अझैपनि सहज र सुपथ स्वास्थ्य सेवा पुर्याउन चुनौती रहेको बताउनुभएको छ। नेपाल क्यान्सर अस्पताल हरिसिद्विको आज औपचारिक उद्घाटन गर्दै राष्ट्रपति भण्डारीले कडा रोगको उपचारमा ठूलो धनराशि खर्च गर्न परिरहेको उल्लेख गर्नुभयो । उहाँले भन्नुभयो, ‘‘क्यान्सरजस्तै कडा रोगको उपचारमा ठूलो खर्च भइरहेको छ । सरकारले स्वास्थ्य सेवाको क्षेत्रमा सुधारका कदम चालेको छ । निजी अस्पतालले पनि उपचारमा विश्वासनीयता बढाउँदैँ लगेको छ ।’’ कार्यक्रममा स्वास्थ्यमन्त्री गगनकुमार थापाले सरकारको एक्लो प्रयासले मात्र स्वास्थ्य सेवाका उद्देश्य पूरा नहुने भएकाले जनतालाईसँगै लैजान यसै वर्षमा ‘मेरो वर्षः म स्वस्थ मेरो देश स्वस्थ’ नामक अभियान सुरु गरेको स्पष्ट पार्नुभयो । उहाँले भन्नुभयो, ‘‘कडा रोगको उपचार सहज र सस्तो बनाउन प्रारम्भिक अवस्थामा रोगको पहिचान र उपचार गर्न हरेक रोगको प्रोटोकल बनाउन लागिएको छ । त्यसको सुरुवात क्यान्सर प्रोटोकलबाट सुरु भइसकेको छ । भने हरेक स्वास्थ्य केन्द्र र जनता स्वास्थ्य क्लिनिकबाट नसर्ने रोगको परीक्षण र उपचार सुरु गरिएको छ ।’’ उद्योगमन्त्री नवीन्द्रराज जोशीले सबै रोगको उपचार नेपालमै सम्भव बनाउन निजी क्षेत्रले पनि सकारात्मक भूमिका खेलेको बताउनुभयो । नेपाल क्यान्सर अस्पतालका कार्यकारी निर्देशक डा सुदिप श्रेष्ठले उच्चस्तरीय क्यान्सर उपचार दिन चुनौतीको सामना गर्दै अस्पताल सुरु गरिएको बताउनुभयो । निजी क्षेत्रबाट सञ्चालित पहिलो सेवाग्राही अस्पतालको रुपमा रहेको छ ।

काठमाडौँ, जेठ २० । भूकम्पपछिको पुनःनिर्माणको जिम्मा स्थानीय सरकारलाई दिनुपर्नेमा विज्ञहरुले जोड दिएका छन् । अल ‘थ्री’ मिडिया घरद्वारा सञ्चालित टेलिभिजन कार्यक्रम ‘बलियो घर’ को पहिलो वार्षिकोत्सवका अवसरमा आज यहाँ आयोजित कार्यक्रममा स्थानीय तहको बारेमा स्थानीय तहलाई ज्ञान भएकाले भूकम्पको पुनःनिर्माण स्थानीय तहलाई दिनुपर्नेमा विज्ञहरुले जोड दिएका हुन् । कार्यक्रममा शिक्षामन्त्री धनिराम पौडेलले जनताको आवास निर्माणमा सरकारले वितरण गरेको अनुदान समयमा ठिक ढङ्गले जान नसकेको भन्दै स्थानीय तहलाई अधिकार दिए छिटो वितरण हुने बताउनुभयो । उहाँले भन्नुभयो, “स्थानीय सरकारलाई अधिकार दिए पुनःनिर्माणको कामले तीव्रता पाउँछ ।” सङ्घीय मामिला तथा स्थानीय विकास मन्त्रालयका सचिव दिनेशकुमार थपलियाले स्थानीय तहको निर्वाचनसँगै पुनःनिर्माणको काम तीव्रगतिमा हुने बताउनुभयो । उहाँले निजी आवास, सार्वजनिक पूर्वाधार, आयोजना निर्माण र सम्पदा निर्माण भएमात्र पुनःनिर्माणले सार्थकता पाउने विश्वास व्यक्त गर्नुभयो । भूकम्प प्रविधि राष्ट्रिय समाज नेपाल (एनसेट) का कार्यकारी निर्देशक डा आमोदमणि दीक्षितले प्रविधियुक्त बलियो घर निर्माणलाई सरकारले प्राथमिकता दिनुपर्ने बताउनुभयो । उहाँले छिमेकीमुलुकको पुनःनिर्माणलाई अनुशरण गरेर नेपालको पुनःनिर्माणलाई अगाडि बढाउनुपर्नेमा जोड दिनुभयो । राष्ट्रिय पुनःनिर्माण प्राधिकरणका विज्ञ सदस्य डा चन्द्रबहादुर श्रेष्ठले हरेक स्थानीय तहमा पुनःनिर्माणका लागि आवश्यक विज्ञ समूह खटाएर पुनःनिर्माणको कामलाई प्राधिकरणले तीव्रगतिमा गर्न लागेको बताउनुभयो । नेपाल पर्यटन बोर्डका प्रमुख दीपकराज जोशीले भूकम्पले क्षति पु¥याएका पर्यटकीय संचरनालाई चाँडो पुनःनिर्माण गरी धेरै भन्दा धेरै पर्यटकलाई भित्र्याउनुपर्ने बताउनुभयो । पुरातत्व विभागका महानिर्देशक भेषनारायण दाहालले विश्व सम्पदामा सूचीकृत भएका सांस्कृतिक सम्पदाको पुनःनिर्माणका लागि प्राधिकरणले विशेष ध्यान दिनुपर्ने विचार व्यक्त गर्नुभयो । ‘बलियो घर’ कार्यक्रमका उत्पादक सुनिल कोइराला, राष्ट्रिय पुनःनिर्माण प्राधिकरणका सहसचिव द्वारिका श्रेष्ठ, प्रवक्ता डा भिष्मकुमार भुषाल, नेपाल पर्यटन बोर्ड सञ्चालक समितिका सदस्य राजेन्द्रप्रसाद सापकोटा, पत्रकार श्रीरामसिंह बस्नेत, सम्पदा विशेषज्ञ सूर्यभक्त सागाछेले पुनःनिर्माणमा दक्ष जनशक्ति नहुँदा पुनःनिर्माणमा समस्या भएको भन्दै आवश्यक जनशक्ति उत्पादनमा गर्नुपर्नेमा जोड दिनुभयो ।

कञ्चनपुर, जेठ १५ । कञ्चनपुरको बेलौरी नगरपालिकामा एक सय घर धुरी नेकपा एमाले छोडी माओवादी केन्द्रमा प्रवेश गरेका छन् । कञ्चनपुर एमाले सचिवालय सदस्यसहितको उक्त टोलीले माओवादीमा प्रवेश गर्न आएपछि उनीहरुलाई एक कार्यक्रमबीच माओवादीमा स्वागत गरिएको हो । माओवादीका तर्फबाट प्रदेश इन्चार्ज लेखराज भट्ट, जिल्ला इन्चार्ज देवीलाल चौधरी, पोलिटव्युरो सदस्य विना मगर, प्रदेश नम्बर ७ को प्रचार–प्रसार विभाग प्रमुख सरल ओम भट्ट लगायतको टोलीले उनीहरुलाई माओवादी केन्द्रमा स्वागत गरेका हुन् । कञ्चनपुरको पुनरर्वास र वेलौरी नगरपालिकामा माओवादी केन्द्रको प्रभाव राम्रो भएका कारण हरेक दिन नेकपा एमाले तथा नेपाली कांग्रेसबाट माओवादी केन्द्रमा प्रवेश गर्नेको संख्या बढ्दो छ ।

काठमाडौं, जेठ १५ । आगामी जेट ३१ गते हुने भनिएको दोस्रो चरणको स्थानीय निर्वाचनको मिति सरेको छ । आज बालुवाटारमा बसेको मन्त्रि परिषद्को बैठकले निर्वाचन मिति सारेर असार ९ गतेलाई निश्चित गरेको हो । प्रमुख दलहरुका शीर्ष नेताहरुको बैठकमा राष्ट्रिय जनता पार्टीलाई सहभागी गराउन चुनावको मिति केही दिन सार्ने समझदारी भएको हाे । प्रदेश नम्बर १, २, ५ र ७ का लागि आगि निर्वाचन आगामी असार ९ गते हुने भएको हो ।

भरतपुर, जेठ १५ । मतपत्र च्यातिएपछि स्थगित भनेको भरतपुर महानगरपालिका १९ काे मतगणना हाललाई स्थगित गरिएकाे छ । मतपत्र च्यातिएको विवाद मिलाउन निर्वाचन आयोगको वैठक बसेपछि अन्ततः आयोगले छानविन गर्न समिति गठन गरेको हो । समितिले आगामी बुधबारसम्मका लागि घटनाबारे अध्ययन गरेर रिपोर्ट बुझाएपछि आयोगले निर्णय लिनेछ । त्यसबेलासम्मका लागि मतगणना स्थगित भएको हो । भरतपुर महानगरको मतगणना अन्तिम चरणमा पुगेका बेला आइतबार राती मतपत्र च्यातिएपछि मतगणना स्थगित बनेको हो । मतपत्र कसले च्यातेको हो भन्नेबारे अझैसम्म पनि नेकपा एमाले र माओवादी केन्द्रले एकअर्कालाई दोषारोपण लगाइरहेका छन् । चितवन प्रहरीले घटनामा संलग्न माओवादी केन्द्रका दुई जना र नेकपा एमालेका १ जना गरी तीन जनालाई पक्राउ गरेको छ । घटनाबारे छलफल गर्न सोमबार बसेको निर्वाचन आयोगको बैठकले स्थानीय तह निर्वाचन ऐन ०७३ को दफा ५० को उपदफा ३ बमोजिम छानविन समिति गठन गरेको छ । सहमहान्यायाधिवक्ता गीताप्रस्राद तिमल्सिनाको नेतृत्वको समितिमा गृह मन्त्रालयका प्रतिनिधि र नेपाल प्रहरीको प्रहरी नायव महानिरीक्षक रहनेछन् । ऐनको दफा ५० को उपदफा ४ मा यदि अनधिकृत तवरले मतगणनास्थल कब्जा भएको पाइए कब्जाबाट असर परेका मतदान केन्द्रहरुको मतपत्रहरु बदर भएको घोषणा गर्ने र पुनः मतदान गर्ने व्यवस्था छ ।

बिर्तामोड, जेठ १५ । झापा बिर्तामोड ४ स्थित सिम्रिक वचत तथा ऋण सहकारी संस्था लि.ले पत्रकार सहारा उपचार कोषका लागि ५१ हजार रुपैयाँ प्रदान गरेको छ । संस्थाका अध्यक्ष कमलबहादुर बस्नेत र सचिव सुवास भट्टराईले आज सोमबार उक्त रकम महासंघका अध्यक्ष तारामणि सापकोटा र पत्रकार सहारा उपचार कोषका संयोजक एकराज गिरी लाई प्रदान गरे । मानव सेवा त्यसमा पनि घाइते र बिरामी पत्रकारको उपचारमा सहयोग पुर्याउन पत्रकार महासंघले थालेको अभियानको सिम्रिकका अध्यक्ष बस्नेतले सराहना गरे । नेपाल पत्रकार महासंघ झापा शाखाले पत्रकारको उपचारमा सहयोग गर्ने उद्देश्यले स्थापना गरेको पत्रकार उपचार कोष १ करोड रुपैयाँको बनाउने लक्ष्य लिएको छ । कोषमा विभिन्न क्षेत्रबाट सहयोग प्राप्त हुनेक्रम जारी रहेको छ । कोषमा दाताहरुको नाम आजीवन रहनुका साथै प्रदान भएको रकम कहिल्यै नासिने छैन र त्यसको व्याजबाट मात्र पत्रकारको उपचारमा सहयोग गरिने छ । सिम्रिकका अध्यक्ष बस्नेत र सचिव भट्टराईले पत्रकारको हितमा देशमै नयाँ र नमूना काम झापाबाट सुरु भएकोमा प्रशंसा गर्दै संस्थाको तर्फबाट सहयोग गर्न पाएकोमा खुशी व्यक्त गरे ।‘पत्रकार महासंघलाई हाम्रो यो सहयोग अन्तिम होइन’–अध्यक्ष बस्नेतले भने–‘आगामी दिनमा पनि सहयोग र सहकार्य जारी रहने छ ।’ सहयोग हस्तान्तरण समारोहमा अध्यक्ष सापकोटा, कोषका संयोजक एवं महासंघका उपाध्यक्ष गिरी, महिला उपाध्यक्ष भीमा शिवाकोटी, सहसचिव केशव भट्टराई, सदस्य सुशीला संग्रौलाले सिम्रिकको सहयोगको सराहना गर्दै धन्यवाद ज्ञापन गरे ।  

चितवन, जेठ १५ । गयराती भएको मतपत्र च्यात्ने घटनामा संलग्नलाई तत्काल कारवाही गर्नुपर्ने माओवादी केन्द्रले माग गरेको छ । निर्वाचनको मतगणनाको अन्तिम चरणमा आएर एमालेले गरेको यस्तो गलत हर्कको माओवादी केन्द्रले घोर भत्र्सना जनाएको छ । माओवादी केन्द्रले आज एक विज्ञप्ती जारी गरी एमालेले मतगणनास्थलमा निषेधित विद्युतीय सामग्री प्रवेश गराउने, मनिसहरु प्रवेश गराउने, हो–हल्ला गर्ने जस्ता अतिरञ्जित कार्य एमालेले गरेको विज्ञप्तिमा उल्लेख छ । ४ चारको को मतान्तर हुँदा खुशी बनेको एमाले मतान्तर घटेर सात सयमा आइपुग्दा हार्ने डरले एमालेले सबै मतपत्र च्यात्न लागेको अवस्थामा त्यही बसेका माओवादीका साथीहरुले त्यसलाई रोक्ने क्रममा घटना भएको बताइएको छ । माओवादीले उक्त वडामा पुनः मतदान गर्नुपर्ने र प्रहरीले पक्राउ गरिएका माओवादी कार्यकर्ताहरुलाई तत्काल रिहाई गर्नुपर्ने विज्ञप्तीमा उल्लेख छ । यस्ताे छ विज्ञप्ती

चितवन, जेठ १५ । भरतपुरमा गयराती मतगणनास्थलमै मतपत्र च्यातिएपछि अहिले एमालेले विरोध र्याली निकालेको छ । माओवादी केन्द्र र नेकपा एमालले घटनाको दोषी एकअर्कालाई आरोप–प्रत्यारोप लगाइरहेका छन् । घटनाको विरोधमा नेकपा एमालेले विरोध र्याली समेत निकालेको छ । एमालेले एक विज्ञप्ति जारी गरी मतगणना अन्तिम–अन्तिम चरणमा पुगेका बेला माओवादीले हार्ने डरले मतपत्र च्यातेको आरोप लगाएको छ । घटनाबारे निर्वाचन आयोग भने केही बोलेको छैन । यस्तो छ एमालेको विज्ञप्ति

विराटनगर, जेठ १५ । दोस्रो चरणको निर्वाचनअन्तर्गत मोरङमा निर्वाचनको तयारी तीव्र गतिमा भइरहेको छ । यस जिल्लाका एक उपमहानगरपालिका, आठ नगरपालिका र आठ गाउँपालिका गरी १७ वटा स्थानीय तहमा निर्वाचन अधिकृतको कार्यालय आजबाट सञ्चालनमा आएको पूर्वाञ्चल क्षेत्रीय निर्वाचन कार्यालयले जनाएको छ । विराटनगर उपमहानगरपालिकामा मुख्य निर्वाचन अधिकृतको कार्यालय स्थापना गरिएको छ । यसका साथै मोरङको ६६९ वटा मतदान केन्द्रका लागि चार हजार १४ कर्मचारी खटिनेछ । यसका लागि कर्मचारीको छनोट र तालिम कार्य एक साताभित्रमा सम्पन्न गरिसक्ने पूर्वाञ्चल क्षेत्रीय निर्वाचन कार्यालयका प्रमुख प्रेमप्रसाद सञ्जेलले जानकारी गराउनुभयो । सो निर्वाचनका लागि छ लाख ५१ हजार मतपत्र प्राप्त भइसकेको छ । पुराना मतपेटिका सात हजार मौज्दात रहेकामा केन्द्रीय कार्यालयबाट थप ८५÷८५ लिटरको एक हजार १०६ वटा थप मतपेटिका पठाइएको बताइएको छ । यसैबीच, निर्वाचनमा मतदान गर्ने प्रक्रियालगायतका विषयमा जानकारी गराउनका सडक नाटक, पर्चा पोष्टर वितरण, मतदाता शिक्षालगायतका कार्य सुचारु भएका छन् । सफलतापूर्वक निर्वाचन गराउनका लागि दलहरुबीच सहमति स्थानीय तहको निर्वाचन सफलतापूर्वक निष्पक्ष ढङ्गले सम्पन्न गराउनका लागि यहाँ सर्वदलीय समन्वय समिति गठन गरिने भएको छ । विभिन्न राजनीतिक दल, सुरक्षाकर्मी, निर्वाचन अधिकृतलगायतको विराटनगरमा बसेको बैठकले धाँधलीरहित निर्वाचन सम्पन्न गराउनका लागि सातबुँदे सहमति पनि गरेको छ । सो अवसरमा निर्वाचनको अवधिभर निर्वाचन आचारसंहिताको सबैले प्रभावकारी ढङ्गले पालना गर्ने र आचारसंहितालाई पालना नगर्नेलाई कानुनी कारबाही गर्नेसमेत सहमति भएको हो । यसका साथै मतगणना गर्दा कुनै पनि मतपत्रमाथि विवाद भएमा निर्वाचन अधिकृतले गरेको निर्णयलाई अन्तिम मान्ने, मतदाता परिचयपत्रको वितरण कार्यमा दलका कार्यकर्ताले सघाउने र मतदाता शिक्षालाई प्रभावकारी बनाउने सहमति भएको सो कार्यालयले जनाएको छ । मुख्य निर्वाचन अधिकृत विनोदकुमार पोखरेलको अध्यक्षतामा उक्त कार्यक्रममा दलका कार्यकर्ताबीच विवाद भएमा समाधानका लागि एक दलको एक नेताको नाम, दर्जा र फोन नं निर्वाचन अधिकृतलाई उपलब्ध गराउनेसमेत सहमति भएको छ ।

चितवन, जेठ १५ । माओवादीले मतपत्र च्यात्न खोजेको प्रचारको माओवादी नेता नारायण दाहालले खण्डन गरेका छन् । निर्वाचन आयोगसँग बारम्बार निर्वाचन प्रक्रियालाई व्यवस्थित गर्न माग गर्दा समेत एमालेले ल्याएका गैर कानुनी व्यक्तिहरुलाई भित्र पस्न दिनुको परिणाम गएरातीको घटना भएको उनले बताए । एभरेष्टदैनिकडटकमसँग कुरा गर्दै दाहालले माओवादी र एमालेबीच भएको विवादका क्रममा मतपत्र तानातान हुँदा मतपत्र च्यातिएको बताए । “तर हामीलाई लगाइएको आरोप गलत छ ।” उनले भने, “च्यात्नै मन भए हामी ४ हजार अन्तर हुँदा च्यात्छौं, हामी त्यति मूर्ख छैनौं । जनताको मतको कदर हामीले गर्न जानेका छौं ।” एमालेले निर्वाचन आचार संहिताको पालना नगरी मतगणना हुने स्थलमा स्वतन्त्र उम्मेदवारका नाममा विभिन्न मानिसहरुलाई भित्र् छिराउने, हो–होल्ला गर्ने र अन्ततः यस्तो स्थिति सिर्जना भएको उनले बताए । एमालेले च्यात्न खोजेको मतपत्रलाई त्यही बसेका माओवादीका प्रतिनिधिहरुले जोगाउने क्रममा तानातान हुँदा मतपत्र च्यात्तिन पुगेको समेत उनले बताए ।

चितवन, नेपाली कांग्रेसले मतपत्र च्यातिएको वडामा पुनः मतदान गर्न माग गरेको छ । नेपाली कांग्रेस जिल्ला समिति चितवनले एक विज्ञप्ती जारी गर्दै स्थानीय तह निर्वाचन ऐन– २०७३ को दफा ४९ र ५० बमोजिम पुनः मतदान प्रक्रिया सुचारु गर्न माग गरेको हो । पार्टी सभापति जीत नारायण श्रेष्ठद्वारा जारी विज्ञप्तीमा भनिएको छ– स्थानीय निर्वाचन २०७४ अन्तर्गत भरतपुर महानगरपालिकाको मतदान २०७४ वैशाख ३१ गते सम्पन्न भई हिजो जेठ १४ गते गते राती करिब ११.३० बजे वडा नं. १९ को मतगणना भइरहेको र नेपाली कांग्रेसका उम्मेदवारहरुको विजय सुनिश्चित भइसकेको समयमा घटेको घटनाप्रति नेपाली कांग्रेस चितवन खेद व्यक्त गर्दछ । निर्वाचन आयोगमा मतगणना प्रक्रियालाई व्यवस्थित गर्न पटकपटक आग्रह गर्दा समेतव्यवस्थ्ति नगरिदिएको कराण उक्त घटना हुन पुगेको, घटनाको सत्यतथ्य जनसमक्ष ल्याउन र देषीमाथि अबिलम्ब कारवाही गर्न र उक्त वडा नं. १९ को मत परिणामलाई असर पर्ने गरी मत पत्र च्यातिएको हुँदा, नेपाली कांग्रेस जिल्ला समिति चितवनले एक विज्ञप्ती जारी गर्दै स्थानीय तह निर्वाचन ऐन– २०७३ को दफा ४९ र ५० बमोजिम पुनः मतदान प्रक्रिया सुचारु गर्न समेत जोडदार माग गर्दछौं ।

काठमाडौं, जेठ १५ । भरतपुरमा गयराती मतगणना भइरहेकेको क्रममा विवादका कारण मतपत्र च्यातिएपछि अब के हुने होला भन्ने सर्वत्र जिज्ञासा उठेको छ । एमाले र माओवादबीचको विवादका कारण मध्यरातमा उक्त घटना घटेको हो । घटनाबारे माओवादी एमालेले एकअर्कालाई आरोप प्रत्यारोप लगाइरहेका छन् । यो अवस्थामा अब के गर्ने भन्नेबारे निर्वाचन आयोग पनि केही बोलेको छैन । यसबारे कानुनी व्यवस्था भने यस्तो छ । स्थानीय तह निर्वाचन ऐन, २०७३ ४९. मतगणना पूरा हुनु अघि मतपत्र नोक्सान भएमा : (१) मतगणना पूरा हुनुभन्दा पहिले कुनै मतदान केन्द्रमा प्रयोग गरिएको मतपत्र, मतपत्र रहेको मतपेटिका निर्वाचन अधिकृतको नियन्त्रणबाट गैरकानूनी तवरले अन्यत्र लगिएमा वा खोलिएमा वा नाेक्सान गरिएमा वा तोडफोड गरिएमा वा हराएमा वा दुर्घटना वश नोक्सान भएमा निर्वाचन अधिकृतले मतगणनाको काम स्थगित गरी त्यसकोप्रतिवेदन आयोगलाई तुरुन्त दिनु पर्नेछ । (२) उपदफा (१) बमोजिम मतगणनाको काम स्थगित गरिएपछि आयोगले त्यस्तो मतदान केन्द्रको सम्पूर्ण मतदान अवैध भएको घोषणा गर्नेछ र आयोगको निर्देशनमा निर्वाचन अधिकृतले त्यस्तो मतदान केन्द्रमा पुनः मतदान गर्ने स्थान, मिति र समय यथाशिघ्र तोकी सूचना प्रकाशन गर्नेछ ।