काठमाडौंः २०७६ कै बहुप्रतिक्षित चलचित्र ‘प्रेमगीत–३’ को लागि मुख्य अभिनेत्रीका लागि अडिसन चलिरहेका बेला तेस्रो गीतको अभिनेता को बन्ने भनेर धेरैमा उत्सुकता छ । यसै सन्दर्भमा निर्माण टिमले चलचित्रको मुख्य अभिनेता दर्शकसामु प्रस्तुत गरेको छ । आसुसेन फिल्मस् प्रोडक्सनको ब्यानरमा निर्माण हुन लागेको उक्त चलचित्रमा प्रतिभाशाली युवा मनिष राउतले मुख्य अभिनेताको रुपमा डेब्यु गर्ने भएका छन् । चलचित्र क्षेत्रमा संघर्ष गरिरहेका मनिष राउतले नेपालको चलचित्र कलेज अस्कर इन्टरनेश्नलमा अभिनय अध्ययन गरेका छन् । उनीसँग दर्जनौं लघु चलचित्रमा काम गरेको अनुभब छ । दर्शकले अत्याधिक रुचाएको प्रेमगीत सिरिजको तेश्रो श्रृखलामा यी नयाँ अनुहारलाई मुख्य अभिनेताको रुपमा इन्ट्रि गराएको हो । निर्माण टिमले नव अभिनेता राउतका केहि क्यारेक्टर पोस्टर सार्वजनिक गरेको छ । पोस्टरमा उनि पुरानो जमानाको बन्दुक सहित देखिन्छन् भने अर्कोमा बन्चरो सहित देखिएका छन् । ‘अ फर्बिडन लभ स्टोरी’ भनिएको उक्त रोमान्टिक सिरिजको यो चलचित्र नव वर्षको अवसर पारेर यहि चैत्र २८ गते प्रदर्शनमा आउने पक्का भैसकेको छ । चलचित्रलाई छेतन गुरुङ्ग र सन्तोष सेनले संयुक्त रुपमा निर्देशन गर्दैछन् । छेतेन गुरुङ्ग र मन्दिप गौतमले लेखेको चलचित्रलाई स्वयं निर्देशक सन्तोष सेन र विजय चामलिङ मिलेर निर्माण गर्दैछन् । ‘प्रेम गीत–३’ पहिलो र दोश्रो संस्करण भन्दा निकै ठुलो स्केलमा निर्माण हुने र नेपाली चलचित्र क्षेत्रकै एउटा उदाहरण बन्ने निर्माण पक्षको विश्वास छ ।

काठमाडौं, जेठ ३१  । इन्टरनेटको मूल्य नबढ्ने भएको छ । मन्त्रिपरिषद्को जेठ २३ गते बसेको बैठकले इन्टरनेट जडान गर्दा लाग्ने राउटरलगायत उपकरण, इन्ट्रानेट–लिज लाइन डाटा कनेक्टिभिटी र मर्मत–सम्भार शुल्कमा दूरसञ्चार सेवा दस्तुर छुट दिने निर्णय गरेको थियो । यससँगै इन्टरनेट सेवा प्रदायकले मूल्य नबढ्ने बताएका छन् । मन्त्रिपरिषद्को बैठकको निर्णय बिहीबार सार्वजनिक गर्दै सञ्चार तथा सूचना प्रविधिमन्त्रि गोकुलप्रसाद बास्कोटाले इन्टरनेट जडान गर्दा लाग्ने राउटरलगायत उपकरण इन्ट्रानेट–लिज लाइन डाटा कनेक्टिभिटी र मर्मत–सम्भार शुल्कमा दुरसञ्चार सेवा दस्तुर छुट दिने निर्णय गरेको बताए । यो समाचार आजको अन्नपुर्ण पोस्ट् दैनिकबाट साभार गरिएको छ ।

लमही, जेठ ९ । उपचार रकमको अभावले गर्दा दाङका एकजना मजदुर जीवन मरणको दोसाँधमा छट्पटाई रहेका छन् । रकम अभावले देउखुरीको राप्ती गाउँपालिका ४ मौरीघाट निवासी कृष्ण चौधरीको स्वास्थ्य अवस्था अचेल झन चिन्ताजनक बनेको हो । सामान्य ट्याक्टर चलाएर जीवन निर्वाह गर्दै आइरहेका चौधरीको दुवै मिर्गौलामा उत्पन्न भएको समस्याका कारण उनी अहिले भारतको लखनउस्थित एक अस्पतालमा सहयोगी हातहरुको अपेक्षासहित जिउने हिम्मत गरिरहेका छन् । यतिबेला देउखुरीको मौरीघाट टोल विकास सँस्था ‘कृष्ण चौधरी बचाउ’ अभियान लिएर सहयोगी हातहरु खोज्दै गाउँ–शहरका विभिन्न ठाउँमा हिँडिरहेको छ । संस्थाले समाजमा रहेका सहयोगी मनहरुले एउटा विपन्न वर्गको मान्छेले मृत्युशैय्याबाट छट्पटिदैं मागेको हार–गुहार सुनिदिने अपेक्षा राखेको छ। टोल विकास संस्थाका सदस्य विष्णुमति चौधरीको अगुवाइमा विभिन्न क्षेत्रबाट आएको एक लाख, छ हजार, पाँच सय छ रुपैयाँ अस्पतालसम्म पठाइएको अध्यक्ष प्रेम केसीले जानकारी दिएका छन् । एक छोरा र एक छोरीका पितासमेत रहेका चौधरीको दुवै मिर्गौलामा देखिएको समास्या समाधानका लागि ‘सहयोगी हातहरुले पहल गरिदिए ती कलिला बालबच्चाको मुहारमा कान्ति छाउने थियो’ भन्ने अपेक्षा गरेका छन् टोल बिकास सँस्थाका उपाध्यक्ष बुद्धिमान चौधरीले । उनी भन्छन्– ‘ती अबोध बालबालिकाको अनुहारमा छाएको नैरस्यताको बादल हटाउन हामी लागि परेका छौं । सकभर दानी मन भएका हत्केलाहरु अघि सर्नेछन् र हामी ‘कृष्ण चौधरी बचाउ’ अभियानमा सफल हुने छौं

काठमाडौं, जेठ ७ । महानगरीय प्रहरी बृत महाराजगन्जबाट एक थुनुवा फरार भएका छन् । जबरजस्ती करणी आरोपमा पक्राउ परेका श्रेष्ठ थरका १६ वर्षे युवक मेडिकल चेकजाँच गर्न लैजाँदा वीर अस्पतालबाट फरार भएका हुन् । अनुसन्धानमा रहेका २ मध्ये श्रेष्ठ बुधबार राती साँढे १० बजे फरार भएको प्रहरीले जनाएको छ । दुव्र्यवहारमा पका्रउ परेका दुईमध्ये एक व्यक्ति फरार छन् । हामीले खोजी रहेका छौं प्रहरी परिसरका प्रबक्ता डिएसपी होविन्द्र बोगटीले बताए । पछिल्लो समय बृतका डिएसपी फणिन्द्र प्रसाइको कमजोर कमाण्डका कारण महाराजगन्ज प्रहरी नेतृतव धेरै विवादमा परेको छ । यसअघि हत्या घटना मिलाउन सेटिङ मिलाएको अभियोगमा एक इन्सपेक्टर निलम्बनमा परेका थिए । सो क्षेत्रमा लूटपाट, चोरी लगायतका अनय घटना दैनिक जसो बढिरहेका छन्। उनको कमजोर कमाण्डलाई कस्को संरक्षण ? गरिरहेको छ प्रहरी संगठन भित्र चर्चा चुलिएको छ । अनुसन्धानमा ल्याइएको ती १६बर्षे युवक फरार भएपछि डिएसपी प्रसाइँको सेटिङमा भगाइएको हुनसक्ने आशंका बढेको छ ।

काठमाडौं, जेठ ८ । वेस्ट इन्डिजको क्यारेबियन प्रिमियर लिग (सीपीएल) को ड्राफ्ट आज (बुधबार) बेलायतको लन्डनमा हुँदैछ । ड्राफ्ट नेपाली समयअनुसार बुधबार बेलुका ७ः४५ बजे हुनेछ । यो संस्करणको ‘ड्राफ्ट’ मा ४ नेपाली स्टार खेलाडी पनि समावेश भएका छन् । गत साता सार्वजनिक ‘ड्राफ्ट’ मा ४ नेपालीसहित ५३६ खेलाडी छन् । नेपालबाट सन्दीप लामिछानेसहित दीपेन्द्रसिंह ऐरी, सोमपाल कामी र रोहितकुमार पौडेल ड्राफ्टमा अटाएका छन् । सन्दीपले गतवर्ष नै सीपीएल खेलिसकेका छन् भने सोमपाल, रोहित र दीपेन्द्र पहिलो विदेशी लिग खेल्ने तयारीमा छन् ।  यो वर्षको सीपीएल आउँदो जुलाई ११ देखि अगष्ट १६ सम्म वेस्ट इन्डिजमा हुनेछ । अघिल्लो सिजन राम्रो प्रदर्शन गरेका सन्दीप यो पटक पनि सीपीएलमा छनोट हुने सम्भावना बलियो छ । उनले गत सिजनमा सेन्ट किट्स एण्ड नेभिस प्याट्रियट्सबाट खेल्दै ५ खेलमा ७ विकेट लिएका थिए । सन्दीपलाई गतवर्ष प्याट्रियट्सले ५ हजार अमेरिकी डलर अर्थात ५ लाख ४० हजार पारिश्रमीकमा टोलीमा अनुबन्ध गरेको थियो । सीपीएलमा ६ टोली रहेका छन् ।  

काठमाडौं, जेठ ७ । मोडल खुश्बु ओलीलाई काठमाडौं जिल्ला अदालतले तीन महिना कैद सजाय सुनाएको छ। चेक बाउन्स मुद्दामा ओलीलाई दोषी ठहर गर्दै अदालतले कैद सजाय सुनाएको हो । जिल्ला न्यायाधीश श्रीकृष्ण भट्टराईको एकल इजलासले मंगलबार खुश्बुलाई तीन महिना कैद र ३ हजार रुपैयाँ जरिवानाको सजाय सुनाएको हो। सप्तरीका गोपालबहादुर कट्वालले आफूलाई दिएको ३६ लाख रुपैयाँको चेक बाउन्स भएपछि खुश्बुविरुद्ध साउन १९ गते मुद्दा दार्ता गरेका थिए। सापटी लिएको रकम तिर्न खुश्बुले कट्वाललाई चेक दिएकी थिइन्। विनिमयपत्र अधिकारसम्बन्धी ऐन २०३४ अनुसार दायर मुद्दामा अदालतले ३६ लाख भराउन पनि आदेश गरेको काठमाडौं जिल्ला अदालतका मुद्दा शाखाका अधिकृत टिकासिंह खत्रीले जानकारी दिए।

भोजपुर, जेठ ७ । भोजपुरमा प्रहरी र नेकपा विप्लव समूहका कार्यकर्ताबीच गोली हानाहान भएको छ । भोजपुरको ट्याम्के मैयुम गाउँपालिका–१ स्थित मैयुमडाँडास्थित जंगलमा दुवै पक्षबीच गोली हानाहान भएको हो । जंगलमा थुप्रै हतियारधारी समूह लुकेको भन्ने सूचनाका आधारमा प्रहरीले सो क्षेत्रमा अप्रेशन चलाएको थियो । जंगलमा पुगेको प्रहरी टोलीमाथि उल्टै गोली प्रहार भएपछि प्रहरीले जवाफी फायर गरेको जनाएको छ । जवाफी फायरका क्रममा सो समूहका एक कार्यकर्ता घाइते भएका छन् । उनी भोजपुरका ३२ वर्षीय तिर्थराज घिमिरे रहेको समेत प्रहरीले जनाएको छ । उनलाई प्रहरीले नियन्त्रणमा लिएको छ ।

काठमाडौं, जेठ ७ । गणतन्त्रपछि पूर्वराजाको सम्पत्ति राष्ट्रियकरण भयो। तर, यसको चरम दुरुपयोग बढेको छ। सरकारले व्यक्तिलाभका लागि कानुनैसमेत फेरिदिन थालेको छ। पूर्वराजा वीरेन्द्र र उनको परिवारका नाममा देशभर २१ हजार ५६३ रोपनी जमिन भेटिएको छ। नेपाल ट्रस्ट अन्तर्गत ल्याए पनि सरकारले सदुपयोग गर्न सकेको छैन। दुरुपयोग रोक्न लागिपरेको पनि छैन। राजधानीको मुटु मानिने छाउनीको १५ रोपनी एक आना जग्गा नेपाल ट्रस्टको हुने सर्वोच्च अदालतले अन्तिम फैसला गर्‍यो। त्यसलाई अटेर गरी पूर्वअधिराजकुमारी प्रेरणा राज्यलक्ष्मी शाहले कब्जा जमाएकी छन्। प्रेरणाले यो जग्गा तत्कालीन राजा ज्ञानेन्द्र शाहले आफूलाई दाइजोबापत दिएको जिकिर गरेकी छन्। ‘विजया घर’ बाट चिनिने यो घरजग्गा खाली गराउन ट्रस्टले ५ महिनाअघि नै पत्राचार गर्‍यो। काठमाडौं महानगरपालिकाले पनि यो घरजग्गा खाली गर्न पत्र लेखेको छ। तत्कालीन प्रधानन्यायाधीश सुशीला कार्की, न्यायाधीश दीपककुमार कार्की र सपना मल्ल प्रधानको पूर्ण इजलासले एक वर्षअघि यो सम्पत्ति नेपाल ट्रस्टकै नाममा फिर्ता गर्नुपर्ने फैसला गरेको थियो। दरबार हत्याकाण्डपछि पूर्वराजा वीरेन्द्रको नाममा रहेको यो जग्गा ज्ञानेन्द्रले नामसारी गरी छोरी प्रेरणाको नाममा पास गरिदिएका थिए। यस्तै चन्द्रागिरी नगरपालिकाको सतुगंल, मातातीर्थ र थानकोटको राजाको ‘फर्माएसी बिर्ता’ १७० रोपनी ट्रस्टको जग्गा मोहीलाई नामसारी गरिएको छ। यो समाचार अन्नपूर्ण पोस्ट दैनिकबाट लिइएको हो ।

लमजुङ, जेठ ६ । जंगली च्याउको सेवनबाट लमजुङमा मृत्यु हुनेको संख्या ३ पुगेको छ । एकसाता अघिको च्याउ सेवनले गम्भीर बिरामी क्व्हालोसोंथर गाउँपालिका ९ गिलुङका ५० वर्षीय सुलबहादुर क्षेत्रीको आइतबार बिहान ४ बजेतिर पोखरास्थित पश्चिमाञ्चल क्षेत्रीय अस्पतालमा मृत्यु भएको प्रहरीले जनाएको छ। यसअघि बिहीबार उनको छोरा १२ वर्षीय मन्तोष क्षेत्री र छिमेकीका छोरा १० वर्षीय साजन क्षेत्रीको मृत्यु भइसकेको छ । सुलबहादुरका श्रीमती सरिताको काठमाडौंस्थित ओम अस्पतालमा उपचार भइरहेको प्रहरीले जनाएको छ । वैशाख २७ गते शुक्रबार जंगली च्याउ सेवनपछि बिरामी भएका उनीहरुलाई उपचारको लागि पोखरास्थित गण्डकी मेडिकल कलेज लगिएको थियो । उक्त अस्पतालमा उपचार हुन नसकी काठमाडौंस्थित नेशनल अस्पताल लगिएको थियो । उपचार सम्भव नभएपछि फर्काइएका सुलबहादुर बिहीबारदेखि पोखरास्थित पश्चिमाञ्चल क्षेत्रीय अस्पतालको आइसीयुमा राखिएको थियो । उनको श्रीमती सरिताको काठमाडौंस्थित ओम अस्पतालमा उपचार भइरहेको प्रहरीले बताएको छ । उपचारको क्रममा सुलबहादुरको छोरा मन्तोषको नेशनल अस्पतालमा गत बिहीबार नै मृत्यु भएको थियो । उपचार सम्भव नभएपछि काठमाडौंबाट घर फर्काइएका साजनको गत सोमबार गाउँमै मृत्यु भएको क्व्होलासोंथर गाउँपालिका ९ गिलुङका वडाध्यक्ष नन्दजङ गुरुङले बताए । प्रहरीका अनुसार साजनको बुवा रामबहादुर क्षेत्री र आमा तारा क्षेत्री उपचारको क्रममा पोखरा गएको र घरमा एक्लै हुने भएपछि साजनलाई छिमेकी सुलबहादुर क्षेत्री र सरिताको घरमा बस्न लगाइएको थियो । सुलबहादुरले वैशाख २७ गते शुक्रबार दिउँसो गाउँ नजिकैको जंगलबाट च्याउ टिपेर ल्याएको र त्यही दिन बेलुका पकाएर खाएका थिए । च्याउ सेवनपछि छिमेकीका छोरासहित परिवार नै बिरामी परेका थिए । उनीहरुलाई गाउँलेले उपचारका लागि पोखरा पुर्याएका थिए ।

भद्रपुर, जेठ ५ । झापाको अर्जुनधारा नगरपालिकाले आगलागीलाई तत्काल नियन्त्रण गर्न सकियोस् भनेर हरेक घरमा अग्नि प्रतिरोधात्मक सामग्री अनिवार्यरूपमा राख्नुपर्ने नियम लागू गरेको छ । नगरपालिकाको हालै सम्पन्न नगरसभाले नगरभित्रका सबै आवासीय तथा व्यावसायिक पक्की घरमा अग्नि प्रतिरोधात्मक सामग्री राख्नुपर्ने निर्णय गरेको प्रमुख प्रशासकीय अधिकृत पङ्कज भुर्तेलले बताए। उनका अनुसार नगरपालिकाको इजाजत लिएर बनाइएका घरमा अग्नि प्रतिरोधात्मक सामग्री राखेको यकिन भएपश्चात मात्र नगरपालिकाले घर निर्माण सम्पन्न भएको प्रमाणपत्र दिने छ । आगलागीबाट ठूलो नोक्सानी हुन नदिन पूर्व सावधानीका लागि नगरपालिकाले गरेको निर्णय नगरवासीको हितका लागि भएको हुँदा यसको कडाइका साथ लागू हुनुपर्ने अर्जुनधारा–११ का पुण्यप्रसाद खरेल बताउँछन् । नगरपालिकामा १४ हजार भन्दा बढी परिवारको बसोवास रहेको छ । नगरपालिकाले आज घरधनीलाई सार्वजनिक सूचना गरी अग्निप्रतिरोधात्मक सामग्री अनिवार्य राख्न अनुरोध समेत गरेको छ । झापाका १५ स्थानीय तहमध्ये अग्निप्रतिरोधी सामग्री अनिवार्य गर्ने अर्जुनधारा पहिलो नगरपालिका हो । यस नगरपालिकामा वारुणयन्त्र छैन । रासस

भरतपुर, जेठ ५ । कुखुराको अण्डा र मासुको मूल्य समयानुकूल समायोजन नभएको भन्दै कुखुरापालक किसानले आफूहरू मारमा परेको बताएका छन् । भारतबाट आउने कच्चा पदार्थमा भन्सारदर बढी हुँदा कुखुराजन्य वस्तु उत्पादनको लागत बढेको तर कुखुरा र अण्डाको मूल्य त्यसअनुरूप समायोजन नहुँदा आफूहरू मारमा परेको उनीहरूको दाबी छ । दानाको मूल्य दिन प्रतिदिन बढ्दो छ तर अण्डा लागत मूल्यभन्दा घटीमा बेच्नुपर्ने बाध्यता छ, पश्चिम चितवनका एक किसान भन्छन्, ‘यही अनुपातमा कुखुराको अवस्था कायमै रहने हो भने व्यवसायबाटै विस्थापित हुनुपर्ने अवस्था आउँछ ।’ पहिले १.५ प्रतिशत रहेको भन्सार महसुल अहिले ५ प्रतिशत पुगेको छ । दानासँगै भारतबाट आउने औषधिको समेत अहिले मूल्य बढेको छ । कुखुराको दानाका लागि मकै, भटमासजस्ता कच्चा पदार्थ प्रयोग गरिन्छ । भन्सारदरमा भएको वृद्धिसँगै यसको खरिद मूल्य पनि बढ्नु स्वाभाविक हो । कम हुँदा आयत गरिँदाकै मूल्यभन्दा पनि कम मूल्यमा अहिले अण्डा र कुखुराको कारोबार भइरहेको किसानको दुःखेसो छ । मकै ४० देखि ४५ रुपियाँ केजी पर्छ, भटमासको मूल्य पनि प्रतिकिलो ७० रुपियाँभन्दा बढी छ, नेपाल कुखुरा व्यवसायी मञ्चका अध्यक्ष ऋषिराम पौडेल भन्नुहुन्छ, “मकै र भटमासको मूल्य बढ्दा दानाको मूल्य बढेको छ । यसको प्रत्यक्ष प्रभाव अण्डा र कुखुरा उत्पादन गर्ने किसानमा परेको छ।” अहिले किसान तहमा प्रतिक्रेटमा ठूलो अण्डाको २५० रुपियाँ र मझौला अण्डामा १८० रुपियाँ मूल्य कायम भएको छ । केही अघिसम्म ठूलो अण्डाको २०० रुपियाँ र मझौला अण्डाको १३० रुपियाँ मात्रै थियो । अहिले वृद्धि भएकै ठूलो अण्डाको मूल्यलाई आधार मान्ने हो भने अहिले किसानले एउटा अण्डाको मूल्य ८।३३ रुपियाँ पाएका छन् । क्रेटमा ३० वटा अण्डा हुन्छन् । यस्तै ब्रोइलर कुखुराको मासु पनि अहिले किसान तहमा प्रतिकिलो १९० रुपियाँ छ । कुखुरा पाल्न भएको लगानीका तुलनामा यसको मासु र अण्डाको मूल्य कमी हो । किसान राजकुमार श्रेष्ठ भन्नुहुन्छ, “हामीलाई अहिले लागतको तुलनामा एउटा अण्डामा तीन रुपियाँ र कुखुरामा प्रतिकिलो औसत १५ रुपियाँ घाटा भइरहेको छ ।” नेपालभर अहिले दैनिक ३५ देखि ४० लाख अण्डा उत्पादन भइरहेको छ । यो सङ्ख्या चितवनमा १५ हजारको हाराहारीमा भएको नेपाल कुखुरा व्यवसायी मञ्चको तथ्याङ्क छ । यस्तै नेपालमा अहिले दैनिक पाँच लाख केजी कुखुराको मासु खपत भइरहेको छ । नेपालमा खपत हुने कुखुराको मासु नेपाली उत्पादनले धानेको पाइन्छ । आफै आत्मनिर्भर हुँदै गएको व्यवसायमा पनि देखिएको यो समस्या समाधानमा तत्काल सम्बन्धित निकायको ध्यान जान जरुरी छ । नेपालको कुल गार्हस्थ उत्पादनको करिब चार प्रतिशत र कुल कृषि गार्हस्थ उत्पादनको करिब आठ प्रतिशत हिस्सा पोल्ट्री क्षेत्रले ओगटेको छ । पोल्ट्री क्षेत्रमा करिब एक लाख ५० हजारले प्रत्यक्ष र अप्रत्यक्ष रोजगारी पाएका छन् । पशु सेवा विभागको सन् २०१७ को तथ्यांकअनुसार नेपालमा करिब ७ करोड कुखुरा छन् । देशको कुल मासु उत्पादनको करिब १७.२ प्रतिशत हिस्सा पोल्ट्री क्षेत्रले ओगटेको छ । मञ्चका व्यवस्थापक शिवप्रसाद बराल किसानलाई विस्थापित हुनबाट बचाउन पनि मासु र अण्डाको मूल्य लागतअनुसारको समायोजन हुनुपर्ने जरुरी ठान्नुहुन्छ । कम्तीमा किसानको लागत बराबरको मूल्य कायम हुन सक्ने हो भने मात्रै पनि साना किसानलाई यो पेसामा टिकाइराख्न सकिन्छ ।

काठमाडौं, जेठ ५ । प्रधानमन्त्री केपी शर्मा ओलीले शान्तिका नायक गौतमबुद्धको जन्मस्थल लुम्बिनीमा अर्को वर्ष ‘वैशाख डे’ मनाउने निर्णय गरेको बताएका छन् । शनिवार भगवान् बुद्धको २५६३औं बुद्धजयन्तीका अवसरमा आनन्दकुटी विहारमा आयोजना गरिएको सभामा उहाँले भियतनाम तथा क्याम्बोडिकाको भ्रमणका अवसरमा विश्वका बुद्ध धर्मावलम्बी तथा नेतालाई अर्को वर्ष लुम्बिनीमा हुने ‘वैशाख डे’मा भाग लिन आउन आमन्त्रण गरेको जानकारी दिए । नेपालमा बुद्ध जन्मेको भएपनि विश्वलाई शान्ति, सद्भाव तथा दया, माया तथा भ्रातृत्व भावको मार्ग देखाएको बताउँदै प्रधानमन्त्री ओलीले बुद्धको ज्ञानलाई २५०० वर्षपछि पनि सूत्रबद्ध गरिएको बताए । उनले भने, ‘भगवान् बुद्ध त्यस्तो व्यक्ति हुनुहन्छ, उनले प्राप्त गरेको बोधिज्ञानले २५०० वर्षभन्दाअघिदेखि विश्वलाई प्रज्वलित गरिरहेको छ ।” प्रधानमन्त्री ओलीले गौतमबुद्धको जन्म लुम्बिनीमा नै भएको हो भनी स्तम्भ निर्माण गरेर बुद्ध जन्मको इतिहासलाई जीवित पार्ने तथा प्रमाणका रुपमा स्तम्भ निर्माण गर्ने सम्राट अशोकको पनि स्मरण गरे । नेपालका लागि श्रीलङ्काली राजदूत डब्लुएस पेरेराले विश्वभर शान्ति र सद्भाव फैलाउने भगवान् गौतमबुद्धको ज्ञान आज पनि महत्वपूर्ण रहेको बताउँदै बुद्धजयन्तीको दिन श्रीलङ्कामा बिदा दिइने गरेको चर्चा गरे। उनले सन् १९९० मा बुद्धको जन्म, बोधिज्ञान प्राप्त तथा महापरिनिर्वाणको दिवसको दिनलाई ‘वैशाख डे’ का रुपमा मनाउने संयुक्त राष्ट्रसङ्घले घोषणा गरेको जानकारी दिए । नेपाल र श्रीलङ्काबीच सन १९५७ मा कूटनीतिक सम्बन्ध स्थापना भएपछि द्विपक्षीय मैत्रीसम्बन्ध विकास भएको चर्चा गर्दै लुम्बिनी, रामग्राम, निग्लिहवा, गोटीहवाजस्ता थुप्रै बुद्धधर्मको तीर्थस्थलले दुई मुलुकबीचको धार्मिक सम्बन्ध थप प्रभावकारी भएको बताए । बुद्धजयन्ती समारोह समितिका उपाध्यक्ष भिक्षु कौदन्य महास्थवीरले भियतनाममा हालै सम्पन्न वैशाख डेमा प्रधानमन्त्रीका साथ भियतनाम जान पाएको र त्यहाँ प्रधानमन्त्रीले अर्को वर्ष लुम्बिनीमा वैशाख डे मनाउने घोषणा गरी विश्वका नेतालाई आमन्त्रण गरेको स्मरण गर्दै अर्कौ वर्ष हुने वैशाख डेमा सरकारलाई सफलता मिलोस् भनी कामना गरे । उनले वि.सं १९८१ तिर नेपालमा राणा शासनले भिक्षुलाई बुद्धधर्म प्रचार गरेको आरोपमा देश निकाला गरेको स्मरण गर्दै चन्द्रागिरि डाँडा कटाई देश निकाला भएका आठ जना भिक्षुलाई वि.सं २००३ मा मात्र देशमा प्रवेश पाएको स्मरण गरे । २५६३ औँ बुद्धजयन्ती समारोह समितिका महासचिव भिक्षु प्रियदर्शी महास्थवीरले बुद्धको शिक्षालाई सबैले व्यवहारमा उतार्न सकेमा देशमा सच्चा शान्ति हुने बताए । बुद्धजयन्ती समारोह समितिका अध्यक्ष एवं आनन्दकुटी विहारका प्रमुख भिक्षु मैत्रय महास्थवीरले गौतमबुद्धको जन्मभूमि नेपालमा शान्तिको सन्देश प्रचारप्रसार गर्ने तथा बुद्धको ज्ञान जनजनमा फैलाउनुपर्ने बताए ।

काठमाडौं, जेठ ५ । नेपाल कम्युनिस्ट पार्टी (नेकपा) अध्यक्ष प्रचण्डले स्थानीय जनप्रतिनिधीलाई जनताको मन जितेर काम गर्न निर्देशन दिएका छन् । ललितपुर महानगरपालिका–२६ को ढोलाहिटीको नयाँ भवनको आज विहान उद्घाटन गर्दै पचण्डले यस्तो निर्देशन दिएका हुन् । उनले संघीयतामा तीन तहको सरकार सिंहदरबारको अधिकार गाउँतहसम्मै पुर्याउने उदेश्यका साथ निर्माण गरिएकोले जनप्रतिनिधीले जनताको मन जितेर काम गर्नुपर्ने बताए । पूर्व प्रधानमन्त्रीसमेत रहेका प्रचण्डले केन्द्रीकृत संरचनामा रहेको सिंहदरवारवाट जनताले सेवा लिन नसकेको ठानेर तिन तहको सरकार बनाएको र नयाँ संरचनाले जनताको मन जित्ने गरी काम गर्नुपर्ने बताए । ‘जनप्रतिनिधीले एकतावद्ध भएर उदेश्य प्राप्तीमा मिहिनेत गर्न जरुरी छ । जनतालई राम्रो सेवा सुविधा दियौं भन्ने प्रमाणित गर्नु आवश्यक छ । सिंहदरवारको अधिकार जनताकै घरदैलोमा ल्याउने योजना अन्तर्गतकै तीन तहको सरकार बनेको हो । यो स्थानिय तह जनताको सेवा सुविधाका लागि हो । यहाँको जनप्रतिनिधीले जनताकाबीचमा आफूलाई काम गरेको प्रमाणित गर्नुपर्छ ।’ अध्यक्ष्य प्रचण्डले भने । वजेट र पूर्वाधारको अभावले अपेक्षा अनुसार प्रत्यक्ष रुपमा सेवा प्राप्त गर्न नसके पनि अब यस विषयमा सबैले ध्यान केन्द्रित गर्नुपर्ने प्रचण्डको भनाई थियो । उनले आफु ललितपुरमै बसेर विद्रोहको तयारी गरेको, शान्ति प्रक्रियापछि पनि ललितपुरमै बसेको र अहिले ललितपुरमै आफ्नो बसाई भएकाले पनि यो जिल्लासँग भावनात्मक सम्वन्ध रहेको बताए । ललितपुरको समृद्धि र विकास आफ्नो पनि चाहाना रहेको भन्दै प्रचण्डले यसका लागि प्रधानमन्त्रीसहितको जनप्रतिनिधीको वैठक राख्न आफुले पहल गर्ने बताए ।

काठमाडौं, जेठ ५ । इटालियन सिरी ए को ‘प्लेयर अफ द सिजन’ को उपाधि पोर्चुगलका स्टार फरवार्ड क्रिस्टियानो रोनाल्डोलाई प्रदान गरिएको छ । सिरी ए को अवार्डमध्ये लिग च्याम्पियन युभेन्ट्सबाट रोनाल्डोले मात्र अवार्ड जित्न सफल भए ।   रोनाल्डोले युभेन्टसलाई लिग च्याम्पियन बनाउन महत्त्वपूर्ण भूमिका खेलेका छन् । उनले लिगमा २२ गोल गर्दै ११ असिस्ट पनि प्रदान गरे । च्याम्पियन्स लिगमा भने उपाधि लक्ष्य सफल हुन नसकेको युभेले घरेलु प्रतियोगितामा उत्कृष्ट प्रदर्शन गर्यो । रोनाल्डो यही सिजन युभेन्टसमा आवद्ध भएका हुन् । 

काठमाडौं, जेठ ३ । आयरल्याण्डमा जारी क्रिकोणात्मक क्रिकेट सिरिजको फाइनल खेलमा बंगलादेशविरुद्ध वेस्ट इन्डिजले उत्कृष्ट प्रदर्शन गरेको छ । उसले बिनाविकेट १३१ रन बनाइसकेको छ । साथै, वेस्ट इन्डिजका दुवै ओपनरले अर्धशतकसमेत पूरा गरिसकेका छन् ।  लाइभ खेल हेर्न यहाँ क्लिक गर्नुस् यो समाचार तयार पार्दासम्म २० ओभरमा वेस्ट इन्डिजका ओपनरद्धय साइ होपले ५६ बलमा ६८ र सुनील अम्ब्रिसले ६५ बलमा ६९ रन बनाएर खेलिरहेका छन् । फाइनल खेलमा वेस्ट इन्डिजले टस हारेर ब्याटिङ गरिरहेको हो ।