काठमाडौंः दक्षिण अफ्रिकासँगको टी–२० क्रिकेट सिरिज पाहुना टोली इंग्ल्याण्डले २–१ ले जितेको छ । अन्तिम खेलमा दक्षिण अफ्रिकालाई ५ विकेटले हराउँदै इंग्ल्याण्डले सिरिज जितेको हो । ‘निर्णायक म्याच’मा दक्षिण अफ्रिकाले दिएको २ सय २३ रनको विशाल लक्ष्य इंग्ल्याण्डले १९.१ ओभरमा ५ विकेट गुमाएर भेट्टायो । उसका लागि कप्तान इओन मोर्गनले विस्फोटक ब्याटिङ गरे । उनले २२ बलमा ७ छक्का प्रहार गर्दै अविजित ५७ रनको योगदान दिए । यस्तै जोनि बेरिस्टोले ६४, जस बटलरले ५७ र बेन स्टोक्सले २२ रन बनाए । बलिङमा दक्षिण अफ्रिका टीमका लुंगि एन्गीडिले सर्बाधिक २ विकेट लिए । यसअघि टस जितेर ब्याटिङ गरेको दक्षिण अफ्रिकाले निर्धारित २० ओभरमा ६ विकेट गुमाएर २ सय २२ रन बनायो । उसका लागि हेनरिक क्लासेनले शानदार ब्याटिङ गरे । सिरिजको पहिलो र दोस्रो खेलको विश्रामपछि प्लेइङ ११ मा फर्किएका उनले ‘निर्णायक’ म्याचमा ३३ बलमा ४ छक्का र ४ चौकासहित ६६ रनको योगदान दिए । यस्तै टेम्बा बवुमाले ४९, कप्तान क्विन्टन डीककले ३५, रस्सी भ्यान डर दुसेन, ड्वाइन प्रेटोरियसले ११–११, डेविड मिलरले अविजित ३५ रन बनाए । पहिलो इनिङ्समा दक्षिण अफ्रिकाका ब्याट्सम्यानले १३ छक्का र १५ चौका प्रहार गर्दै रन बनाएका हुन् । बलिङमा इंग्ल्याण्ड टीमका बेन स्टोक्स, टम करनले २–२, आदिल रशिद र मार्क उडले एक–एक विकेट लिए । सिरिजको पहिलो खेलमा दक्षिण अफ्रिका १ रनले विजयी हुँदा दोस्रो म्याचमा २ रनले पराजित भएको थियो ।

काठमाडौंः नेकपा अध्यक्ष प्रचण्डले माघ १५ गते बस्ने केन्द्रिय बैठकअघि पार्टी एकीकरणका सबै काम सम्पन्न हुने बताएका छन् । शुक्रबार नवलपुरमा आयोजित अगुवा कार्यकर्ता प्रशिक्षण कार्यक्रममा उनले पार्टी एकताका सम्पूर्ण काम अन्तिम चरणमा रहेको बताए । उनले यो ठूलो काम रहेको भन्दै केही समय लागेको बताए । उनले अगाडि भने, ‘केन्द्रिय समिति बैठकपछि देशव्यापी रूपमा प्रशिक्षण शुरू गर्छौं । पार्टीमा नयाँ रक्तसञ्चार गर्ने अभियानको तयारी भइरहेको छ । त्यसका लागि मैले नयाँ कार्ययोजना ल्याएर आउँदैछु ।’ उनले राष्ट्रिय सभामा शतप्रतिशत नतिजा ल्याएको भन्दै त्यो पार्टी मिसनमा बढिरहेको छ भन्ने बलियो प्रमाण रहेको बताए । उनले आउने दिन अझै उज्यालो हुने भन्दै भने, ‘समाजवादको नयाँ मोडल नेपालबाट विश्वलाई दिन्छौं ।’

काठमाडौंः सिद्धार्थ बैंकले संस्थागत सामाजिक उत्तरदायित्वअन्तर्गत काठमाडौंको त्रिपुरेश्वरमा रहेको नेपाल आँखा अस्पतालसँग सहकार्य गर्दै संयुक्तरुपमा ६ दिने निस्शुल्क आँखा शल्यक्रिया शिविर सम्पन्न गरेको छ। बैंकले विभिन्न ठाउँमा यस्तो शिविर सञ्चालन गरेको जनाएको छ। शल्यक्रियाका लागि बैंकले नेपाल आँखा अस्पताललाई ४ लाख ६७ हजार रुपैयाँ आर्थिक सहयोग प्रदान गरेको थियो ।सहयोग रकम बैंकका संचालक समितिका अध्यक्ष मनोजकुमार केडियाले अस्पतालका प्रमुख कार्यकारी अधिकृत दमनबहादुर घलेलाई हस्तान्तरण गरेका थिए। बैंकले संस्थागत सामाजिक उत्तरदायित्वअन्तर्गत स्वास्थ्य, वातावरण तथा अन्य विभिन्न क्षेत्रमा विभिन्न कार्यक्रम गर्दै आइरहेको छ र आगामी दिनहरुमा पनि यस्ता सामाजिक कार्यक्रमहरुमा निरन्तर सहभागिता जनाउँदै जाने जनाएको छ। सबै क्षेत्रमा बैंकिङ पहुँच पुर्‍याउने उद्देश्यले बैंकले देशभर १८० शाखा, १०१ शाखारहित बैंकिङ सेवा, २०० एटिएम र १६०० भन्दा धेरै पिओएस मेसिनमार्फत सेवा दिइरहेको जनाएको छ।

काठमाडौंः नेपालको सुशासनको अवस्थामा सुधार हुँदै गएको अन्तर्राष्ट्रिय अध्ययनले देखाएको छ । भ्रष्टाचार अवधारणा सूचकांक (करप्सन पर्सेप्सन इन्डेक्स–सीपीआई)मा नेपाल गत वर्षभन्दा ११ स्थान माथि उक्लिएको छ । गत वर्ष ३१ अंक पाएको नेपालले यस वर्ष ३४ अंक पाएर केही माथि उक्लिँदै सुधार गरेको हो । तर, अझै पनि नेपालको अवस्थामा आशा गरेअनुरूप सुधार आउन नसकेको अन्तर्राष्ट्रिय अध्ययनले देखाएको छ । भ्रष्टाचार अवधारणा सूचकांकले ५० अंक ल्याउने मुलुकलाई सुशासनको अवस्था राम्रो भएको मान्ने गरेको छ । सूचकांकमा ५० भन्दा कम अंक पाउने मुलुक भ्रष्टाचारग्रस्त मानिन्छन् । नेपालको अवस्था अझै सुधारोन्मुख रहेको टीआईको निष्कर्ष छ । सन् २०१८ मा १२४औं स्थानमा रहेको नेपाल यस वर्ष ११३औं स्थानमा उक्लिएको छ । यस वर्ष नेपालले तीन अंक बढी पाएर कुल ३४ अंक बनाए पनि सबैभन्दा बढी भ्रष्टाचार हुने मुलुकमध्ये २०औं स्थानमा छ । भ्रष्टाचार अवधारणा सूचकांक २०१९ का लागि ६ वटा अन्तर्राष्ट्रिय संस्थाले सर्वेक्षण गरेका थिए । विश्व बैंक, वल्ड इकोनोमिक फोरम, ग्लोबल इनसाइट, बर्टेल्स्म्यान फाउन्डेसन, वल्र्ड जस्टिस प्रोजेक्ट र भेराइटिज अफ डेमेक्रेसी प्रोजेक्ट (भीडीईएम) को सर्वेक्षणका आधारमा सूचकांक प्रतिवेदन सार्वजनिक गरिएको हो । नेपाललाई विश्व बैंकले ३५ अंक दिएको छ भने वल्र्ड इकोनोमिक फोरमले ४० नम्बर, ग्लोबल इनसाइटले ३५ नम्बर, बर्टेल्स्म्यान फाउन्डेसनले २९ नम्बर, वल्र्ड जस्टिस प्रोजेक्ट ३५ नम्बर र भेराइटिज अफ डेमेक्रेसी प्रोजेक्टले २९ नम्बर दिएको छ । १ सय ८० मुलुकमा गरिएको अध्ययन प्रतिवेदन सार्वजनिक गर्दै ट्रान्सफरेन्सी इन्टरनेसनल नेपालले भ्रष्टाचारको नियन्त्रणको प्रयास सुधारोन्मुख भए पनि आशाअनुसारको प्रतिफल प्राप्त नभएको जनाएको छ । एक वर्षको अवधिमा भ्रष्टाचार नियन्त्रणका लागि स्थापित निकायहरू गत वर्षको तुलनामा बलियो र मजबुत देखिन थालेका छन् । गत वर्षको तुलनामा नेपालले एउटाबाहेक सबैजसो क्षेत्रमा बढी अंक पाएको छ । आयात–निर्यात, सार्वजनिक सेवा, कर भुक्तानी, ठेक्कापट्टा र न्याय प्राप्तिका लागि घुसखोरीको विषयमा स्थिति सुधार भएको छ । ट्रान्सपरेन्सी इन्टरनेसनल नेपाल च्याप्टरका मुकुन्द प्रधानका अनुसार सन् २०१९ मा विश्वभर भ्रष्टाचार विरोधी अभियानमा शिथिलता आएको छ । पैसाले राजनीतिमा प्रभाव पारेका मुलुकमा भ्रष्टाचार मौलाएको देखिएको उनले बताए । सन् २००४ देखि नेपालमा ट्रान्सपरेन्सीको सूचांकमा समेटिन थालेको हो । सर्वेक्षणअनुसार निर्वाचनपछि पनि नेपालको सार्वजनिक क्षेत्रमा भ्रष्टाचार, व्यापार व्यवसायमा घुस, सार्वजनिक पद र अधिकारको दुरुपयोग, अनुगमन र कारबाहीमा कमी, सूचनामा नागरिकको पहुँचमा कमी, राजनीतिमा भ्रष्टाचार जस्ता दीर्घकालीन समस्या विद्यमान रहेको देखिन्छ । इन्टरनेसनल नेपालले भनेको छ, ‘भ्रष्टाचार अवधारणा सूचकांक २०१९ मा नेपालले पाएको स्कोरले भ्रष्टाचारको स्थिति चिन्ताजनक रहेको देखिन्छ ।’ ट्रान्सपरेन्सी इन्टरनेसनलले शक्ति पृथकीकरणको प्रवद्र्धन, पक्षपातरहित बजेट र सेवामा सरोकारवालाको पहुँच, राजनीतिमा पैसाको प्रभावलाई न्यूनीकरण, स्वार्थको द्वन्द्वमा सम्बोधन, निर्णय प्रक्रियामा सरोकारवालाको अर्थपूर्ण पहुँच, निर्वाचनमा देखिने विकृतिको अन्त्य तथा नागरिक, सामाजिक अभियन्ता र पत्रकारहरूको सशक्तीकरणजस्ता विषयको सम्बोधनबाट भ्रष्टाचार नियन्त्रण गर्न र राजनीतिप्रति विश्वास जगाउन सरकारलाई सुझाव दिएको छ । भ्रष्टाचारमा कुन देशको अवस्था कस्तो ? विश्वमा सबैभन्दा कम भ्रष्टाचार हुने देशमा डेनमार्क छ । यसले ८७ अंक प्राप्त गरेको छ । विश्वमा सबैभन्दा बढी भ्रष्टाचार हुने देश सोमालिया रहेको जारी सूचीमा उल्लेख छ । सोमालियाले मात्रै ९ अंक प्राप्त गरेको छ । विश्वमा सुशासनको अवस्था सबैभन्दा उत्कृष्टको सूचीमा रहेका डेनमार्क र न्युजिल्यान्डले १०० अंकमा ८७ अंक पाएका छन् । त्यस्तै, फिनल्यान्डले कुल १०० अंकमा ८६ अंक प्राप्त गरेको छ । सुशासनमा उत्कृष्ट सिंगापुर, स्विडेन र स्विट्जरल्यान्डले ८५ अंक प्राप्त गरेका छन् । ट्रान्सपरेन्सी इन्टरनेसनल नेपालले सबैभन्दा बढी भ्रष्टाचार हुने मुलुकको सूचीमा भेनेजुएला, यमन, सिरिया, दक्षिण सुडान र सोमालिया जनाएको छ । कुल १०० अंकमा भेनेजुएला १६ अंकसहित १७६औं र यमन १५ अंक पाएर १७७औं स्थानमा छ । सिरिया १३ अंकसहित १७८औं, दक्षिण सुडान १२ अंकसहित १७९ र सोमालिया ९ अंकसहित पुछारमा छ । दक्षिण एसियाली राष्ट्रमा भुटान कम भ्रष्टाचार गर्ने मुलुक एसिया प्यासिफिक मुलुकमा सबैभन्दा कम भ्रष्टाचार हुने मुलुकका रूपमा न्युजिल्यान्ड रहेको छ भने सबैभन्दा धेरै भ्रष्टाचार हुने मुलुकमा अफगानिस्तान देखिएको छ । सीपीआई २०१९ मा दुई तिहाइ मुलुकले ५० भन्दा कम अर्थात् औसत ४३ अंक पाएका छन् । २२ देशले भ्रष्टाचारको सूचकांकमा सुधार गरेका छन् भने २१ देशको स्कोर अझ तल झरेको छ । दक्षिण एसियामा सबैभन्दा कम भ्रष्टाचार हुने देश भुटान हो । भुटान ६८ अंक प्राप्त गरी २५औं स्थानमा छ । दक्षिण एसियाली मुलुकमध्ये भुटान ६८ अंक प्राप्त गरी २५औं, भारत ४१ अंक प्राप्त गरी ८०औं, मालदिभ्स र श्रीलंका ३८ अंक प्राप्त गरी ९३औं, पाकिस्तान ३२ अकंसहित १२०औं, बंगलादेश २६ अंक प्राप्त गरी १४६औं र अफगानिस्तान १६ अंक प्राप्त गरी १७३औं स्थानमा छन् । त्यस्तै, चीन ४१ अंक प्राप्त गरी ८०औं स्थानमा छ । कसरी हुन्छ मापन? नागरिक र सेवाग्राहीले व्यक्त गर्ने अवधारणका आधारमा तय गरिने भ्रष्टाचार अवधारणा सूचकांक ९करप्सन पर्सेप्सन इन्डेक्स–सीपीआई० प्रतिवेदन तयार गर्ने क्रममा ट्रान्सपरेन्सी इन्टरनेसनल नेपाल आफैं प्रत्यक्ष संलग्न हुँदैन । विभिन्न अन्तर्राष्ट्रिय गैरसरकारी संस्था र दातृ निकायले गर्ने सर्वेक्षणका क्रममा संकलन गरिने सूचनालाई विश्लेषण गरेर समग्र सूचक निकालिन्छ । अनुसन्धानका लागि विभिन्न स्रोतबाट तथ्यांक संकलन गरिन्छ । सम्बन्धित मुलुकमा भ्रष्टाचारको स्थितिबारे व्यवसायी तथा विभिन्न क्षेत्रका विज्ञ के सोच्छन् भनेर उनीहरूको धारणा बुझिन्छ । सार्वजनिक क्षेत्रमा रहेको भ्रष्टाचारबारे उनीहरूको धारणालाई विभिन्न अंक दिइन्छ । त्यसका आधारमा देशअनुसार विषयलाई स्कोर दिइन्छ । जहाँ अंक ० देखि १०० भित्रमा ० ले ‘सबैभन्दा भ्रष्टाचार हुने’ बुझाउँछ भने १०० ले ‘सबैभन्दा कम भ्रष्टाचार हुने’ भन्ने बुझाउँछ । यो समाचार राजधानी दैनिकबाट लिइएको हो ।

काठमाडौंः धनगढीमा एकजना युवक मृत अवस्थामा भेटिएका छन्। धनगढी उपमहानगरपालिका वडा नम्बर ३ मा अछामको मंगलसेन नगरपालिका ६ का ३४ वर्षीय इन्द्रप्रसाद शर्मा मृत अवस्थामा भेटिएको प्रहरीले जनाएको छ। जिल्ला प्रहरी कार्यालयका अनुसार शर्मा खेतमा घोप्टो परेको अवस्थामा मृत भेटिएका हुन्। अहिले प्रहरीले घटना स्थलको मुचुल्का उठाउने काम भईरहेको छ। बाँकी कुरा घटनाको अनुसन्धानपछि खुल्ने जिल्ला प्रहरी कार्यालयका प्रहरी नायब उपरिक्षक दक्षकुमार बस्नेतले जानकारी दिए।

काठमाडौंः अन्तर्राष्ट्रिय क्रिकेट परिषद् (आईसीसी) ले सार्वजनिक गरेको एक दिवसीय वरियतामा नेपाल १८ औं स्थानमा यथावत् रहेको छ । नयाँ वरियतामा नेपालले १९ रेटिङ अङ्क पाएको छ । हाल नेपालभन्दा तल संयुक्त अरब इमिरेट्स (युएई) र पपुवा न्युगिनी रहेको छ । युएई १९ तथा पपुवा न्युगिनी २० औं स्थानमा छन् । नयाँ वरियतामा इङल्याण्ड शीर्ष स्थानमा छ भने भारत दोस्रो स्थानमा छ । त्यसैगरी न्युजिल्याण्ड तेस्रो, अस्ट्रेलिया चौथो र दक्षिण अफ्रिका पाँचौं स्थानमा छ । टी–ट्वान्टी वरियतामा भने नेपाल १२ औं स्थानमा छ ।

धनगढीः सुदूरपश्चिम प्रदेश सरकारले पुष १० गते सार्वजनिक विदा दिएको छ । पुष १० गते परेको भुँवा पर्वको अवसरमा प्रदेश सरकारले सुदूरपश्चिममा सार्वजनिक विदा दिएको हो । आन्तरिक मामिला तथा कानून मन्त्रालयले एक सूचना जारी गर्दै विदाबारे जानकारी दिएको हो ।

घोराहीः दाङ-देउखुरी जिल्ला अदालतबाट धरौटीमा रिहा हुने आदेश पाएका विप्लव नेतृत्वका २१ नेता-कार्यकर्ताले रिहा हुन इन्कार गरेका छन् । अदालतको रिहा हुने आदेशपछि पनि कारागार नै रोज्नेमा प्रतिबन्धित विप्लव समूहका महासचिव नेत्रविक्रम चन्दका सहोदर दाजु चन्द्रबहादुर चन्द ‘वीरजंग’ चन्दसमेत छन् । गत कात्तिक २९ मा दाङबाट पक्राउ परेका प्रतिबन्धित विप्लव नेतृत्वका २१ नेता-कार्यकर्तालाई जनही १५ हजार रुपैयाँ धरौटीमा छाड्न दाङ-देउखुरी जिल्ला अदालतका न्यायाधीश रीतेन्द्र थापाको इजलासले सोमबार आदेश दिएको थियो । अदालतको यस्तो आदेशपछि रिहा हुनुपर्नेमा सबै २१ जनै विप्लवका नेता-कार्यकर्ताले कारागारमै बस्ने निर्णय गरेका हुन् । अदालतको आदेशपछि पनि पुनः पक्राउ गर्ने उद्देश्यले अदालत परिसर बाहिर प्रहरी तैनाथ भएपछि रिहा नभएर कारागार नै रोजेको विप्लवका दाजु वीरजंगले बताए । ‘१५ हजार धरौटी बुझाएर पनि पुनः प्रहरीले पक्राउ गर्ने देखिएपछि रिहा नभएर कारागार जाने निर्णय गरेका हौं’, अदालत परिसरमा वीरजंगले सञ्चारकर्मीसँग भने । सरकारले विप्लव समूहमा संलग्नको आरोपमा यसका नेता-कार्यकर्तालाई पक्राउ गर्दै मुद्दा चलाएको छ । सरकारको मुद्दा सामना गर्दै अदालतबाट रिहा हुने आदेश पाएकाहरूलाई पनि प्रहरीले पुनः अदालत बाहिरबाटै पक्राउ गर्ने गरेको छ । देशव्यापी रूपमा देखिएको यो प्रवृत्ति दाङमा पनि दोहोरिने भएपछि विप्लवका दाजुसहितका नेता-कार्यकर्ता दाङ-देउखुरी अदालतको आदेशपछि पनि रिहा नभएका हुन् । गत कात्तिक २९ गते विप्लव समूहको राप्ती व्युरो बैठक बसिरहेका बेला प्रहरीले नेपाल-भारत सीमामा पर्ने दाङको राजपुर गाउँपालिका-४, मगराइना गाउँबाट यसका मध्य-पश्चिम व्युरो इञ्चार्ज वीरजंगसहितका २१ नेता-कार्यकर्तालाई पक्राउ गरेको थियो । उनीहरुविरुद्ध संगठित अपराध गरेको आरोपमा मुद्दा चलाइएको थियो ।

काठमाडौंः पक्राउपछि जेल चलान भएका बाराको विश्रामपुर गाउँपालिका अध्यक्ष अमिरीलाल राउतले २९ दिन जेल बसेर २ हजार रुपैयाँ जरिवना तिर्नुपर्ने भएको छ । राउतलाई जिल्ला अदालत बाराले २०६३ सालको भदौ २९ गते सवारी ज्यानमुद्धामा २९ दिन कैद र २ हजार रुपैयाँ जरिवानाको फैसला सुनाएको थियो । १३ वर्ष पुरानो सवारी ज्यान मुद्दामा फरार प्रतिवादीको आरोप लागेका राउतलाई पक्राउ गरी उक्त कैद र जरिवाना भुक्तानीका लागि आइतबार नै कारागार पठाएको हो । जिल्ला प्रहरी कार्यालय बाराका एसपी विकासराज खनालले राउतलाई २९ दिन थुनामा राख्न कारागार पठाइसकिएको जानकारी दिएका छन् । राउतलाई आजै पक्राउ गरेका आजै अदालतमा पेश गरी कारागार पठाइएको हो ।

दैलेखः जिल्लाको ठाटिकाँध गाउँपालिकाका अध्यक्ष धिरबहादुर शाहीसहित अपहरणमा परेकी उनको धर्मपत्नी इला मल्ल शाही दैलेख र कालिकोट जिल्लाको सिमानामा पर्ने बर्ता लेकमा भेटिएकी छन् । अपहरणको सूचना पाए लगत्तै स्थानीयले खोजी गर्न हिडेको टोलीले दैलेख र कालिकोट पर्ने भर्तालेकमा बिहान ९ बजे फेला पारेको सूचना आफूलाई प्राप्त भएको गाउँपालिका वडा १ का वडा अध्यक्ष नर्तमबहादुर बुढाले बताए । उनी फेला परे पनि अपहरमा परेका अध्यक्ष शाहीको अवस्था अज्ञात रहेको  वडाध्क्ष बुढाले बताए । विप्लव नेतृत्वको नेकपा समूहले शनिबार अध्यक्ष शाही र उनकी श्रीमतीलाई घरबाटै अपहरण गरेको प्रहरीले आशंका गरेको छ । ठाटिकाँध गाउँपालिका वडा २ श्रीपाटामा रहेको घरबाट राति १२ बजे अध्यक्ष शाही र उनकी श्रीमती अपहरण परेको जिल्ला प्रहरी कार्यालय दैलेखले जानकारी दिएको छ । जिल्ला प्रहरी कार्यालय दैलेखका प्रहरी प्रमुख हरिबहादुर वलीले अपहरणमा परेको खबर आएको र त्यसको लागि प्रहरीले अनुसन्धान गरिरहेको बताए । गाउँपालिका उपाध्यक्ष सुस्मीता शाहीका अनुसार आफू जिल्लामा आएको र अध्यक्ष र उनकी धर्मपत्नीलाई अपहरण गरेको सूचना आफूलाई ठाँटिकाँध प्रहरीले दिए । गाउँपालिकामा त्यस्तो केही थिएन कसरी एक्कासी अपहरण भयो उनले बताए । वडा नम्वर १ का वडा अध्यक्ष नर्तमबहादुर बुढाका अनुसार राती १५ जनाको टोली आएर अपहरण गरेको भन्ने सुनेर स्थानीय आफन्त र अन्य टोली खोजी कार्यमा लागको बताए ।

काठमाडौंः न्युरोड टिमले कतार एयरवेज सहिद स्मारक ए डिभिजन लिगको आफ्नो पहिलो खेलमा जित हात पारेको छ । न्युरोड टिमले सरस्वती युथ क्लबलाई ४–० ले हराउँदै प्रतियोगितामा पहिलो जित निकालेको हो । सातदोबाटोस्थित एन्फा कम्प्लेक्समा सम्पन्न खेलमा न्युरोड टिमले उत्कृष्ट प्रदर्शन गर्दै पहिलो खेलमा जित हात पारेको हो । न्युरोडको जितमा सरोज तामाङले दुई तथा जुनियर र ओआनाले सामान एक एक गोल गरे । न्युरोड टिमका लागि पहिलो हाफको ३५ औं मिनेटमा जुनियर ओगेंले हेडमार्फत् गोल गरेर १–० को अग्रता दिलाए । कप्तान प्रकाश बुढाथोकीको कर्नरमा जुनियरले हेडमार्फत गोल गरेका थिए । सरोज तामाङले खेलको ६९ औं मिनेटमा गोल थप्दै अग्रतालाई २–० पारे भने एरिक विष्टले ८१ औं मिनेटमा तेस्रो गोल गर्दा ९० औं मिनेटमा जोर्डन जुनियर निडेम्बाले गोल थप्दै सरस्वती क्लबमाथि न्युरोडको जितको अन्तर ४–० पारे । बाट

काठमाडौंः शहीद स्मारक ए डिभिजन लिग फुटबल आजबाट शुरु हुँदैछ । उद्घाटन खेलमा नेपालका दुई पूर्व कप्तानको टिम भिड्दैछ । सातदोबाटोमा हुने उद्घाटन खेल नै मच्छिन्द्र र बिग्रेडबीच हुनेछ । पूर्व कप्तान अनिल गुरुङले ब्रिगेड ब्वाइजको कप्तानी गर्दैछन् भने विराज महर्जनले मच्छिन्द्राको कप्तानी गर्दैछन् । गत वर्ष रेलिगेसन बिना खेलाइएको भन्दै आलोचना भए पछि यसपटक भने रेलिगेसन सहित खेल हुने भएको छ । दिउँसो तीन बजे उद्घाटन हुने लिगमा ९१ खेल हुनेछ । १४ क्लबको प्रतिश्पर्धा रहने लिग विजेतालाई ५० लाख पुरस्कार राखिएको छ । उपविजेतालाई ३५, तेस्रोलाई २५, चौथोलाई १५, पाँचौंलाई सात र छैटौं हुनेलाई ५ लाख पुरस्कारको राशी तोकिएको छ ।

सप्तरीः सप्तरीको राजविराजस्थित तैतरीगाछीबाट सेवाग्राहीसँग घुस लिँदै गर्दा अख्तियारको टोलीले मङ्गलबार साँझ एक नायब सुब्वा (नासु)लाई पक्राउ गरेको छ । अख्तियार दुरुपयोग अनुसन्धान आयोग इटहरीको टोलीले सप्तरीको महदेवा गाउँपालिका–६ का वडा सचिव तथा नासु नवोनाथ मिश्रलाई सेवाग्राहीबाट रु दुई लाख घुस लिएको आरोपमा पक्राउ गरिएको अख्तियार दुरुपयोग अनुसन्धान आयोगका सूचना अधिकारी ज्ञानेन्द्रप्रसाद ढकालले जानकारी दिए । उजुरीका आधारमा खटिएको अख्तियारको टोलीले राजविराजस्थित तैतरीगाछीको एउटा चिया पसलमा जन्मदर्ता प्रमाणपत्रसम्बन्धी कागजात बनाइदिने भन्दै सेवाग्राहीसँग नासु मिश्रलाई घुस लिइरहेको अवस्थामा पक्राउ गरिएको अख्तियारले जनाएको छ । पक्राउ परेका मिश्रलाई अख्तियार दुरुपयोग अनुसन्धान आयोगको कार्यालय इटहरी ल्याएर आवश्यक अनुसन्धानको कार्य अगाडि बढाइएको सुचना अधिकारी ढकालले जानकारी दिए ।

बुटवलः रुपन्देहीको ओमसतियामा छोराले आफ्नै आमाबुवाको हत्या गरेको प्रहरीले जनाएको छ । ओमसतिया गाउँपालिका, ४ का गोरखबहादुरले ७२ वर्षीय बुवा रामनारायण यादव र ७० वर्षीया आमा थगना यादवको धारिलो हतियार प्रहार गरी हत्या गरेका हुन् । जिल्ला प्रहरी कार्यालय रुपन्देहीका प्रमुख, एसपी हेम थापाका अनुसार हतियार प्रहारबाट रामनारायणको घटनास्थलमै मृत्यु भएको हो भने गम्भीर घाइते थगनाको युनिर्भसल मेडिकल कलेज भैरहवामा उपचारका क्रममा मृत्यु भएको हो । गोरखबहादुरलाई प्रहरीले नियन्त्रणमा लिएको छ ।

एजेन्सी । साविक विजेता म्यानचेस्टर सिटीले इङ्लिस प्रिमियर लिगमा चेल्सीमाथि रोचक जित निकालेको छ । शनिबार राति भएका प्रतिस्पर्धात्मक खेलमा सिटीले चेल्सीलाई २–१ गोलले हरायो । घरेलु मैदानमा सिटीलाई जिताउन केभिन डि ब्रुयन र रियाद महारेजले गोल गरे । चेल्सीका एन्गोलो कान्टेले गोल गरे । सिटीले एक गोलले पछि परेको स्थिति उल्ट्याएर जित निकालेको थियो । खेलमा सुरुवाती अग्रता चेल्सीले लिएका थियो । २१औं मिनेटमा कान्टेले माटियो कोभासिसको पासमा गोल गर्दै चेल्सीलाई अग्रता दिलाए । तर, चेल्सीको अग्रता लामो समय टिकेन । २९औं मिनेटमा केभिन डि ब्रुयनले बराबरी गोल फर्काए । ३७औं मिनेटमा रियाद महारेजले गोल गर्दै घरेलु टोली सिटीलाई अग्रता दिलाए । त्यही गोलनै सिटीको लागि निर्णायक बन्यो । दोस्रो हाफमा दुवै टोलीले मौका पाएपनि गोल गर्न सकेनन् । जितसँगै सिटी लिगको तेस्रो स्थानमा उक्लिएको छ । सिटीको १३ खेलबाट २८ अंक बनाएको छ । २६ अंक बनाएको चेल्सी चौथो स्थानमा छ । शीर्ष स्थानमा रहेको लिभरपुलको ३७ अंक पुगेको छ । प्रिमियर लिगमा शनिबार राति भएको अन्य खेलमा वल्भ्सले बर्नमाउथलाई २–१, नर्विच सिटीले एभर्टनलाई २–० र बर्नलीले वाटफोर्डलाई ३–० गोलले हराएको छ । अर्को खेलमा आर्सनल र साउथह्याम्पटन २–२ गोलको बराबरी खेल्दै अंक बाँडेका छन् ।