नवलपरासी, पुस ७ । नवलपरासीको एउटा सिंगो गाउँ नै एक व्यक्तिको नाममा दर्ता रहेको रहस्य खुल्न आएको छ । पश्चिम नवलपरासीको पाल्हीनन्दन गाउँपालिकाको एउटा सिङ्गो गाउँ सनई स्थानीय भोनु चौधरीको नाममा रहेको खुल्न आएको छ । विसं २०२४ मा नापी गर्दा हाल वडा नं ६ मा पर्ने साविक सनई गाविस वडा नं २ को सनई गाउँ नै भोनु चौधारीको नाममा दर्ता भएको ५१ वर्षपछि अहिले आएर थाहा भएको हो । उक्त गाउँमा ९० घरधुरी छन् । सनई २ (क) कित्ता नं ३३५ को गाउँब्लक भनी १० बिघा दुई कठ्ठा पाँच धुर जग्गा स्थानीयवासी भोनु चौधरीको नाममा दर्ता रहेको परासी नापी कार्यालयको फिल्डबुकमा उल्लेख छ । गाउँ ब्लकमा पर्ने सो जग्गाको आव २०७१/७२ मा नापी गरी पूर्जा वितरण गर्ने क्रममा सो रहस्य खुलेको पाल्हीनन्दन–६ का वडाध्यक्ष कृष्णचन्द्र यादवले जानकारी दिए । पुर्जा वितरणका लागि भन्दै नापी कार्यालयले नापजाँच गरेको तर लामो समयसम्म पनि पुर्जा नपाएपछि बुझ्न जाँदा एकै व्यक्तिको नाममा दर्ता भएकाले पुर्जा दिन नमिल्ने भनेपछि सो रहस्य खुलेको अध्यक्ष यादवले बताए । स्थानीयवासीसँग पञ्चायतकालमा गाउँ पञ्चायतले वितरण गरेको जग्गाधनी पुर्जा भने छ । गाउँ पञ्चायतले दिएको पुर्जा देखाउँदै स्थानीयवासी ६८ वर्षीय शिवचरण केवटले भन्नुभयो, “हामीसँग पुर्जा छ तर कसरी एउटै व्यक्तिको नाममा दर्ता भयो, हामी साह्रै मर्कामा परेका छौँ, मेरो १४ धुर जग्गा प¥यो, अहिले भोनुका परिवारले कि पैसा देऊ, कि सट्टामा जग्गा देऊ भन्छन् हामी गरीबले कसरी दिने ?” एउटै व्यक्तिको नाममा दर्ता रहेकोे गाउँको उक्त ब्लकको जग्गामा पर्ने ८५ घरधुरीमध्ये पूर्वगाविस अध्यक्ष राजेन्द्र सहानी, हाल सोही वडाका कार्यालय सहायक रहेका शम्भु सहानीलगायतको पनि घर परेको छ । चार पुस्तादेखि बस्दै आए पनि अहिलेसम्म एउटै व्यक्तिको नाममा दर्ता छ भन्ने थाहा नै नपाएको भन्दै कार्यालय सहायक सहानीले भने, “मेरो पनि एक कठ्ठा जग्गा परेको छ, नक्सामा गाउँब्लक र फिल्डबुकमा एउटै व्यक्तिको नाममा दर्ता भएको पाइयो, यो बदर हुनुपर्छ ।” अर्का ६५ वर्षीय स्थानीयवासी सुदामा चौधरीले यस्तो अवस्था आउनामा जनताको भन्दा पनि त्यस बखतका कर्मचारीबाट गल्ती भएको हुन सक्ने या भोनुले नै प्रलोभनमा पारेर दर्ता गराएको हुनसक्ने जिकिर गरे । भोनुको मृत्यु भइसकेको र हाल उनका दुई छोरा छन् । गाउँलेसँग भोनुका छोराले आफ्नो नाममा रहेको जग्गाको आधारमा रकम वा त्यसको सट्टामा जमीन दिन दबाब दिने गरेको स्थानीयवासीको गुनासो छ तर भोनुका छोरा रामशङ्करले भने यस विषयमा कुनै प्रतिक्रिया दिन चाहेनन् । नापी कार्यालयका नापी अधिकृत धमेन्द्रकुमार श्रेष्ठले सो जग्गा व्यक्तिको नाममा दर्ता रहेकाले गाउँब्लकको जग्गाको नापनक्सा भए पनि उनहरुलाई पुर्जा दिन नमिलेको बताए । अब मन्त्रालयबाट निर्देशन वा मन्त्रिपरिष्दबाटै निर्णय गरेर व्यक्तिको नाममा रहेको उक्त जग्गा बदर गरे मात्र पुर्जा वितरण गर्न सकिने उनको भनाइ थियो । पाल्हीनन्दन गाउँपालिका अध्यक्ष बैजुप्रसाद गुप्ताले पुस्तौँदेखि बस्दै आएका स्थानीयवासीले जोतभोग गरिरहेको सो जग्गाको पुर्जा उनीहरूलाई उपलब्ध गराउनुपर्नेमा जोड दिँदै त्यसका लागि आफूले सक्दो पहल गरेर न्याय दिलाउने बताए । गाउँवासीहरूले लालपुर्जा बदर गरी आ–आफ्नै नाममा तात्कालिन गाउँ पञ्चायतको पुर्जाका आधारमा लालपुर्जा पाउनुपर्ने माग गर्दै आएका छन् । रासस

नुवाकोट, मंसिर २८ । नुवाकोटमा मिनी ट्रक दुर्घटना हुँदा २६ जनाको मृत्यु भएको छ । जिल्लाको दुप्चेश्वर गाउँपालिका १ घ्याङडाँडामा मिनी ट्रक गाडी दुर्घटना हुँदा १६ जनाको मृत्यु भएको हो । शुक्रबार साँझ भएको दुर्घटनामा १६ जनाको मृत्यु भएको घटनास्थलबाट प्रहरी सहायक निरीक्षक ज्ञानलाल यादवले जानकारी दिए । घटनाको विस्तृत विवरण आउा बाँकि छ । मृतकको सनाखत भएको छैन। उद्धारका लागि जिल्लाबाट प्रहरी टोली आइरहेको इलाका प्रहरी कार्यालय समुद्रटारका इञ्चार्जसमेत रहेका यादवले बताए। ३९१३ नम्बरको ट्रक सडकबाट करिब एक हजार मिटर तल नदीमा खसेको छ। गाडी किम्ताङबाट सिसिपु जाँदै गर्दा दुर्घनामा परेको हो। प्रमुख प्रहरी उपरीक्षक (एसपी) बसन्तबहादुरले कान्तिपुरसित भने, ‘दुर्घटनामा व्यापक मानवीय क्षति भएको र अहिलेसम्म ४र५ जनाको शव भेटिइसकेको छ।’ शिखरबेंसीबाट सिसिकु जाँदै गरेको ट्रक दुर्घटनामा परेको हो। स्थानीयका अनुसार ट्रकमा ४०र४५ सवार थिए।

सुनसरी, मंसिर २८ । गोर काटेको आरोपमा सुनसरीको धरानबाट शुक्रबार १० जना पक्राउ परेका छन् । बिहान ६ बजे धरानको लोसे भन्ने ठाउँमा गोरु काटिरहेको अवस्थामा राजेश खड्गी, राजेन्द्र खड्गी, आशिष खड्गी, अनिल शाही, अनिष शाही, सुनसरी भोक्राह नर्सिङ-३ का बहिस मियाँ, रिजमान मियाँ, शाहदत्र मनसुरी, आशिक मनसुरी र महमुदी मनसुरी पक्राउ परेका हुन् । उनीहरुलाई बिशेष सुराकीको आधारमा पक्राउ गरिएको इलाका प्रहरी कार्यालय धरानले जनाएको छ । पक्राउ परेका दश जनालाई इलाका प्रहरी कार्यालय धरानमा राखेर थप अनुसन्धान भइरहेको बताइएको छ ।

काठमाडौं, मंसिर २८ । नेपाल कम्युनिष्ट पार्टी (नेकपा) को स्थायी समिति बैठक भोलि बस्दैछ । स्थायी समितिको बैठकमा नेकपा (माओवादी केन्द्र) र नेकपा (एमाले)बीचको एकता प्रक्रियालाई टुंगो लगाउने मुख्य एजेण्डा रहेको छ । यसबाहेक सरकारको समीक्षाका बारेमा समेत स्थायी समितिको बैठकमा छलफल हुन सक्ने देखिन्छ । पार्टी एकीकरणका विषयमा प्रदेशस्तरसम्मको एकताका बारेमा नेकपाको सचिवालयले यसअघि नै टुंगो लगाईसकेको अवस्था छ । भोली बस्ने स्थायी समितिको बैठकले ७७ वटा जिल्लाका इन्चार्ज र अध्यक्षबारे निर्णय गर्ने छ । यसबाहेक प्रदेश समन्वय कमिटि र विशेष प्रदेश कमिटिका बारेमा समेत भोली छलफल हुन सक्ने छ । यसअघि प्रदेश तहमा एकीकरणका लागि नेकपाले सात वटै प्रदेशमा पूर्व नेकपा एमाले र माओवादी केन्द्रबाट रहने गरी कार्यदल गठन गरेको थियो । कार्यदलले दिएको सिफारिस गरेको आधारमा सामान्य परिमार्जन सहित सचिवालय बैठकले प्रदेशको एकीकरण प्रक्रिया टुंगो लगाएको हो । अब जिल्ला इन्चार्ज र अध्यक्ष तथा सचिवको चयन हुन बाँकी छ । त्यसपछि जिल्ला कमिटि र सो भन्दा मातहतका कमिटिहरुको एकीकरण हुने छ । नेपाल कम्युनिष्ट पार्टी (नेकपा) भित्र पार्टीका प्रभावशाली नेता माधव नेपाललाई समर्थन गर्ने समूहले भने यसअघि नै प्रदेश एकीकरणको प्रक्रियामा आपत्ती जनाएको थियो । माधव नेपाल समूहले प्रदेशको एकीकरणलाई समेत स्थायी कमिटिको बैठकबाट टुंगो लगाउनु पर्ने अडान लिएको थियो । यद्यपी सचिवालयले भने त्यो प्रस्ताव स्वीकार गरेन । नेकपाका अध्यक्षद्वय केपी ओली र प्रचण्डले निर्णय लादेको आरोप माधव नेपाल समूहको छ । यता अध्यक्षद्वयले भने माधव नेपाल समूहको आरोपबारे कुनै खण्डन सार्वजनिक गरेका छैनन् । तर माधव नेपाल समूहले आफ्नो समूह–स्वार्थ पुर्ति गर्न अनावश्यक बार्गेनिङ गरेको संस्थापन पक्षका समर्थक बताउँछन् । यो पृष्ठभूमिमा भोली बस्ने स्थायी कमिटिको बैठकमा माधव नेपाल समूहले जिल्ला नेतृत्वको बारेमा विशेष अडान लिने रणनीति अपनाउने देखिएको छ । एभरेष्ट दैनिकलाई प्राप्त जानकारी अनुसार, माधव नेपाल समूहले ७७ वटै जिल्लामा सम्भावित नेतृत्वको सूचि नै तयार गरी त्यसमा अडान लिने तयारी गरेको छ । यसअघि एकता कार्यदलले दिएको सुझावमा आंशिक सहमति मात्र रहेको भन्दै माधव नेपाल समूहले सबै जिल्लामा आफ्नो समूहका कार्यकर्ता तथा नेताहरु समेत समेटिनुपर्ने अडान राख्दै भोलीको बैठकमा अडान लिने बताइन्छ । पूर्व नेकपा माओवादी केन्द्रभित्र खासै विवाद नरहेपनि पूर्व एमालेभित्र नेपाल, खनाल, गौतम र ओली समूहहरुको सशक्त संगठनात्मक उपलब्धिका कारण भोलीको बैठक प्रभावित हुन सक्ने देखिन्छ । जनवादी केन्द्रीयताको सिद्धान्तलाई मान्ने दावी गरेपनि पूर्व नेकपा एमाले समूहभित्र नेतृत्वविरुद्ध सार्वजनिकरुपमा नै आलोचना हुने गरेको छ। माधव नेपाल समूहका नेता योगेश भट्टराई, घनश्याम भुसाललगायतले नेकपाको गठनपछि सार्वजनिकरुपमा नै कतिपय विषयमा आलोचना गर्दै आएका छन् । स्थायी कमिटिको बैठकमा संस्थापन पक्षले भने कार्यदलको सिफारिसलाई नै निर्णयार्थ प्रस्तुत गर्ने देखिन्छ । माधव नेपाल समूहले भने रणनीतिकरुपमा आफ्नो समूहका कतिपय व्यक्तिहरुको स्थान सुरक्षित हुने अवस्थामा मात्रै कार्यदलको बैठकमा प्रस्तुत हुने जिल्ला नेतृत्व स्वीकार गर्ने देखिन्छ । नेकपाको गठन भएको लामो समय भएपनि तल्लो तहसम्म एकता हुन नसक्दा यसको प्रत्यक्ष असर पार्टी मात्र भई सरकारको काम कारवाहीमा पनि परेको छ । सरकारलाई कसले नियन्त्रण या नियमन गर्ने भन्ने विषयमा अहिले पनि विवाद नै रहेको छ । पूर्व माओवादी केन्द्रभित्र खासै विवाद भने देखिएको छैन । तर पूर्व एमालेभित्रको विवादले पूर्व माओवादी समूहभित्र पनि प्रभाव पर्न सक्ने सम्भावना नदेखिएको होइन । प्रदेश र जिल्लास्तरमा नेतृत्व या अन्य तहमा स्थान नपाउने पूर्व माओवादीहरुले पूर्व नेकपा एमालेका केही समूहलाई समर्थन गर्न सक्ने सम्भावना उत्तिकै रहेको छ । जे होस, भोलीको बैठक भोली नै निर्णायार्थ सम्पन्न हुनसक्ने देखिन्न । नेकपाभित्रका कैयन समूहका समूहगत एजेण्डाहरुका आधारमा निर्णय प्रक्रिया प्रभावित हुने अवस्थामा भोलीको बैठकमा केही नयाँ नदेखिएपनि यसले नेकपालाई नयाँ ध्रुविकरण र उचाईतर्फ भने लैजाने देखिन्छ । अहिले पूर्व नेकपा माओवादीले भने पूर्व नेकपा एमालेभित्रको अन्तरविरोधलाई पर्ख र हेरको आधारमा लिएको देखिन्छ । अध्यक्ष प्रचण्डले अहिले कुनै एकल समूहलाई समर्थन गरेका छैनन् । सबै समूह मिलेर राष्ट्रिय समृद्धिको अभियानमार्फत समाजवादतर्फ अघि बढनुपर्ने बताउँदै प्रचण्डले विधि र पद्दतीमार्फत असहमित र अन्तरविरोध हल गर्नुपर्ने कुरामा बारम्बार जोड दिँदै आएका छन् । प्रचण्डको नेतृत्व र उनको भिजन अनुसार नेकपा अघि बढ्न सकेको अवस्थामा पूर्व नेकपा एमालेको अन्तरविरोधलाई साम्य पार्न भने बल पुग्ने देखिन्छ ।

काठमाडौं, मंसिर २२ । ईपीएल खेलमा प्रहार भएको छक्का आज ठूलो चर्चाको विषय बनेको छ । विराटनगर वारियर्सका खेलाडी बाबर हायातको ब्याटिङबाट आयोजक जोहोरा स्पोर्टस्का प्रवन्ध निर्देशक आमिर अख्तरको गाडीको सीसा नै फुटेको हो । चितवन टाइगर्सका खेलाडीको बलिङ सामना गरिरहेका खेलाडी बाबरले छक्का प्रहार गर्दा पार्किङमा रोकिराखेको आमिरको गाडीको अगाडिको भागको सीसा नै फुटेको हो । विराटनगर वारियर्स र चितवन टाइगर्सबीचको खेल चितवनले ५ रनले जित्दै सम्पन्न भएको छ । हङकङका नागरिक बाबर हायातले चितवन टाइगर्सविरुद्धको आजको खेलमा ९० रन पुर्याएका थिए ।

काठमाडौं, मंसिर २८ । युरोपियन क्लब फुटबलको दोस्रो ठूलो प्रतियोगिता यूरोपा लिगको नक आउट चरणको समीकरण पूरा भएको छ । समूह चरणको अन्तिम खेलमा हिजो इंग्लिस क्लव चेल्सी बराबरीमा रोकिँदा आर्सनल विजयी भएको छ । यसअघि नै नकआउट चरणमा पुगिसकेको चेल्सी समूह चरणको अन्तिम खेलमा हंगेरीको मोल भिडी फुटबल क्लबसँग दुई–दुई गोलको बराबरीमा रोकियो । यो खेलमा चेल्सीका स्पेनिस स्ट्राईकर अल्भारो मोराटा चोटग्रस्त भएका छन् । युरोपा लिगको अर्को खेलमा आर्सनलले अजरबैजानको एफके काराबागलाई १–०ले हराएको छ । उता, स्कटिस च्याम्पियन सेल्टीक पनि नाटकीय रुपमा नकआउट चरणमा प्रवेश गरेको छ । समूहको अर्को खेलमा रोजेनबर्ग र लेपेजिगले बराबरी खेलेपछि अन्तिम खेलमा साल्जबर्गसँग २–१ ले पराजित भए पनि सेल्टीक नकआउट चरणमा पुग्न सफल भयो । उता, इटालियन क्लव एसी मिलान भने युरोपा लिगको समूह चरणबाटै बाहिरिएको छ । समूहको अन्तिम खेलमा ओलम्पियाकोससँग ३–१ ले पराजित हुँदै मिलान प्रतियोगिताबाट बाहिरिएको हो । गएरातिका खेलपछि यूरोपा लिग फुटबलको अन्तिम ३२ चरणमा पुग्ने सबै टोलीको टुंगो लागेको छ । समूह चरणबाट छनोट भएका २४ तथा च्याम्पियन्स लिगबाट झरेका ८ टोलीले अन्तिम ३२ चरणमा प्रतिस्पर्धा गर्नेछन् ।  

विराटनगर, मंसिर ३ । नेपाली कांग्रेसका सभापति शेरबहादुर देउवाले पार्टीमा कोइरालाहरुबीचको एकताबाट पार्टीलाई फाइदा हुने बताएका छन् । विराटनगर विमानस्थलमा सोमबार साँझ सञ्चारकर्मीसँग कुरा गर्दै उनले पार्टीभित्र मोर्चाबन्दी गर्न पाइने स्पष्ट पारे । पूर्वप्रधानमन्त्री देउवाले कांग्रेस प्रजातान्त्रिक पार्टी भएकाले यसभित्र गुट उपगुट हुने बताउँदै विगतमा पार्टी सभापति गिरिजाप्रसाद हुँदा विधानअनुसार सञ्चालन नभएको प्रष्ट पारे । पार्टीभित्र आन्तरिक द्वन्द्व भए पनि यो अराजक नभएको बताउँदै उनले पार्टीको महाधिवेशन तोकिएको समयमा हुने बताए । एक प्रश्नको जवाफमा सभापति देउवाले नेपाल विद्यार्थी संघले आफ्नो कार्य राम्ररी गरेमा महाधिवेशन हुने विचार व्यक्त गरे । -रासस

मेलम्ची, कात्तिक २८ । जिल्ला समन्वय समिति सिन्धुपाल्चोकका सदस्य देशबहादुर तामाङमाथि खुकुरी र बियरको बोतल प्रहार भएको छ । आक्रमणमा परी तामाङ गम्भीर घाइते हुनुभएको छ । सोमबार मेलम्ची नगरपालिका–१२ बाहुनेपाटीमा तामाङमाथि आक्रमण भएको जिल्ला समन्वय समिति सिन्धुपाल्चोकका उपप्रमुख बालकुमारी सापकोटाद्वारा हस्ताक्षरित विज्ञप्तिमा उल्लेख गरिएको छ । अराजक तत्वको जमातले तामाङमाथि आक्रमण गरी घाइते बनाएको भन्दै जनप्रतिनिधिमाथिको हमलाको समितिले निन्दासमेत गरेको छ । विज्ञप्तिमार्फत दोषीलाई अविलम्ब पक्राउ गरी कडा कानूनी कारवाहीको माग गरिएको छ । तामाङलाई आफ्नै भाइले आक्रमण गर्दा घाइते भएका थिए । बाटोको विषयलाई लिएर इन्द्रावती गाउँपालिका–५ बस्ने ३२ वर्षीय अणबहादुर तामाङले दाजुलाई बियरको बोतलले हिर्काएका थिए । टाउकामा चोट लागेर घाइते भएका सदस्य तामाङको अहिले धुलिखेल अस्पतालमा उपचार भइरहेको छ । रासस

काठमाडौं, कार्तिक २७ । छठ पर्वका अवसरमा स्थानीय कमलपोखरी पुगेर मंगलबार राष्ट्रपति विद्यादेवी भण्डारी र उपराष्ट्रपति नन्दबहादुर पुन ‘पासाङ’ ले सूर्यलाई अघ्र्य दिई पूजार्चना गरेका छन । राष्ट्रपति भण्डारीले अपराह्न ४ बजे तथा उपराष्ट्रपति पुनले साँझ ५ बजे कमलपोखरी पुगेर पूजार्चना गरेका हुन् । कमलपोखरी छठ पूजा समितिले आयोजना गरेको छठ पर्व विशेष कार्यक्रममा उनीहरु सहभागी भएका थिए । छठ पर्वका लागि कमलपोखरी विशेष रुपमा सिँगारिएकाले अहिले झकिझकाउ छ । कमलपोखरीमा शुरुदेखि नै राष्ट्रपति, उपराष्ट्रपति र प्रधानमन्त्री सहभागी हुँदै आएकामा यस पटक बिरामी भएकाले प्रधानमन्त्री केपी शर्मा ओली भने सरिक हुन सक्नुभएन । सो क्रममा विभिन्न क्षेत्रबाट महत्वपूर्ण योगदान पुर्याउने पाँच जनालाई सम्मान गरिएको थियो । गीतकार रत्नशम्शेर थापा, नियात्राकार घनश्याम राजकर्णिकार तथा समाजसेवी इन्द्रदेव मिश्र, सुरेश जैन र भक्तबहादुर सिंहलाई राष्ट्रपति भण्डारीले कदरपत्रसहित सम्मान गरेकी थिइन् । सांसद गगनकुमार थापाले आठ वर्षदेखि कमलपोखरीमा छठ पर्व मनाउन थालिएको जानकारी दिए । शुरुआतका समयमा बर्तालुको अभावमा खोजेर ल्याउनुपरेको कमलपोखरीमा अहिले यति ठूलो सद्भावका साथ राष्ट्रिय पर्वका रुपमा छठ मनाउन पाउनु गर्वको कुरा भएको उहाँले प्रतिक्रिया दिनुभयो । नेपाली पर्वमा एकार्कालाई ग्रहण गर्ने वातावरण बढ्दै गएको र राष्ट्रपति सहभागी हुँदा कमलपोखरीको गरिमा झन् बढेको उनले बताए । आयोजक समितिका संयोजक राजेन्द्र सिंहले आठ वर्षदेखि छठ घाट निर्माण गरेर विशेष पूजा थालिएको जानकारी दिँदै यस पटक पूजाका लागि २६० कक्ष बुकिङ भएको बताए । सो क्रममा महेशकुमार अग्रवाल, नरोत्तम वैद्यलगायतले छठ पर्वका अवसरमा शुभकामना व्यक्त गरेका थिए । छठ मनाउन शुरु गरेसँगै अहिले कमलपोखरीको मुहार फेरिएको छ । विगतमा फोहर फाल्ने ठाउँ बनेको कमलपोखरी अहिले आकर्षक बनेको छ । काठमाडौंका थापाथली, गौरीघाट, रानीपोखरी र कमलपोखरीमा छठ पूजा गर्ने गरिएकामा रानीपोखरी क्षतिग्रस्त छ । तराईमा मनाइने मिथिला संस्कृतिमा आधारित छठ पर्व विसं २०४६ पछि काठमाडौं उपत्यकालगायत पहाडी जिल्लामा पनि मनाउन थालिएको हो । आज छठ पर्वको तेस्रो दिन सूर्यदेवको आराधना, उपासना र पूजा गरी हर्षोल्लासपूर्वक छठ पर्व मनाइँदैछ । चार दिनसम्म मनाइने यस पर्वमा सम्पूर्ण शक्तिको स्रोत सूर्यको उपासनाको पहिलो दिन नुहाएर चोखो भई खाने, दोस्रो दिन खरना, तेस्रो दिन अस्ताउँदो र चौथो दिन उदाउँदो सूर्यलाई अघ्र्य दिइएपछि विधिवत्रुपमा सम्पन्न हुने गर्दछ । छठको मुख्य दिन आज साँझ अस्ताउँदो सूर्यलाई पूजाराधना गरी अघ्र्य दिइएको छ । बुधबार उदाउँदो सूर्यलाई अर्घ दिएपछि छठ पर्व सम्पन्न हुन्छ । छठ पर्वमा व्रत गरे दुःख र दरिद्रताबाट मुक्ति पाइने जनविश्वास छ । रासस

चर्चित अभिनेता सरोज खनालले आइतबार एक कार्यक्रमको बिच चितवनको रत्ननगरमा रहेको गामबेशीको चेपाङ संरक्षण केन्द्रलाई एक लाख एकाउन्न हजार एकसय एकाउन्न रुपैया रुपैयाको चेक हस्तान्तरण गरेका छन् । अमेरिकामा अक्टोबर १३ मा केसी डान्स सेन्टरले आयोजना गरेको कलिउड नाइट २०१८ मा सहभागी सुपर मम हरुले संकलन गरेको ७ सय ११ अमेरिकन डलर ,महेन्द्र कुवर बाट ५०० डलर र समाजसेवी श्याम बजिमायाबाट १०१ डलर गरि जम्मा भएको एक लाख एकाउन्न हजार एकसय एकाउन्न रुपैयाको चेक गामबेशीको चेपाङ संरक्षण केन्द्र अध्यक्ष केपी किरण शर्मालाई प्रदान गरेका हुन् । कार्यक्रममा बोल्दै अभिनेता सरोज खनालले दशैंमा अमेरिका गएको बेला त्यहाँ गरिएको सस्कृति कार्यक्रमबाट उठेको पैसा केसी डान्स सेन्टरका संस्थापक द्वय नविन केसी तथा लुना श्रेष्ठ मार्फत आफुलाई यस केन्द्रमा सहयोग गर्न प्रदान गरिएको र अन्य व्यक्तिबाट पनि केही रकम सहयोग भएको हुदाँ यस गामबेशीको चेपाङ संरक्षण केन्द्रलाई सहयोग गर्न पौड खुशी लागेको बताए । कार्यक्रममा खनालले चेपाङ्ग बालबालिकालाई पढेर ठुलो मान्छे बन्नुपर्छ भन्दै शिक्षा भन्दा ठुलो केही नहुने भन्दै यस केन्द्र ले यसरी चेपाङ्ग बालबालिकालाई शिक्षा दिएकोमा अध्यक्ष केपी किरण शर्मालाई धेरै धेरै धन्यवाद दिदै फेरि–फेरि सहयोग गर्ने समेत बताए । गामबेशीको चेपाङ संरक्षण केन्द्र अध्यक्ष केपी किरण शर्माले यसरी नै विभिन्न व्यक्तिको सहयोगले यो केन्द्र यहाँसम्म आएको भन्दै सहयोग गर्ने सबै हातलाई धेरै धेरै धन्यवाद दिए । अहिले १३२ जना चेपाङ्ग बालबालिकालाई शिक्षा तथा बस्न खानको सम्पूर्ण व्यवस्था गरेको केन्द्र बाट करिब ४०० भन्दा बढी चेपाङ्ग बालबालिकालाई शिक्षा दिएको बताए । कार्यक्रममा स्कुल हेडमास्टर रामबहादुर थापामगर ,समाजसेवी हरि केसी, पत्रकार रवि रोजी लगायतको उपस्थिति रहेको थियो । सो कार्यक्रममा चेपाङ बालबालिकाले उपस्थिति सबैलाई आफ्नो समुदायको निकै मार्मिक गीत सुनाएका थिए ।

लहान, कार्तिक २५ । सिरहाको लहानमा जन्मदिनको पार्टीको बहानामा बोलाइएका १५ वर्षीया बालिका र २० वर्षीया युवती सामूहिक बलात्कारको शिकार भएका छन् । इलाका प्रहरी कार्यालय लहानका अनुसार तिहारको भाइटीकाको दिन कार्तिक २३ गते राति जन्मदिनको पार्टीको बहानामा घरबाट ल्याएर लहानको भोटिया टोलमा सामूहिक बलात्कार भएको थियो । सिरहाको सिसवनीकी युवती र लक्ष्मीपुर पतारीकी बालिकालाई भोटिया टोलमा ल्याएर सात जना युवकको समूहले बलात्कार गरेको प्रहरीले जनाएको छ । पीडित बालिका र युवतीको बयान अनुसार लहान ११ का हरि चौधरीले ‘मेरो बर्थडे परेकाले घरमा जाऔं’ भन्दै मोटरसाइकलमा लगेको प्रहरीले जनाएको छ । हरि चौधरीकै घरमा सात जना युवा मिलेर सामुहिक बलात्कार गरेको पीडितलाई उद्धृत गर्दै प्रहरीले जनाएको छ । खोजीका लागि विशेष टोली इलाका प्रहरी कार्यालय लहानका प्रमुख प्रहरी नायव उपरीक्षक राजेश थापाका अनुसार सामूहिक बलात्कारमा संलग्न भई फरार भएकाहरुको खोजीका लागि प्रहरीको विशेष टोली परिचालन गरिएको छ । प्रहरीका अनुसार सामूहिक बलात्कारमा लहान ११ का २३ वर्षीय हरि चौधरी, २१ वर्षीय अनिल चौधरी र २१ वर्षीय सुनिल चौधरीको नाम खुलेको र अन्य चार जनाको नाम खुल्न बाँकी रहेपनि हुलियाको आधारमा खोजी भइरहेको छ । पीडित बालिका र युवतीको स्वास्थ्य परीक्षण लहानस्थित रामकुमार उमाप्रसाद स्मारक अस्पतालमा गरिएको छ । नयाँपत्रिकाबाट

मुम्बई । बलिउडका सुपरस्टार शाहरुख खानको अर्काे बलिउड चलचित्र ‘जिरो’ को पोष्टर हालैमात्र रिलिज भएको छ । अगिल्लो पोष्टरमा शाहरुख खानलाई बउआ सिंह भूमिकामा अभिनेत्री कैटरिना कैफसँग रोमान्स गरिरहेको देख्न सकिन्छ देखिन्छ भने हाल सार्वजनिक दोस्रो पोष्टरमा उनलाई व्हिल चेयरमा बसेकी अनुष्काको साथमा देख्न सकिन्छ । दोस्रो तस्विरबाट यस चलचित्रमा अनुष्काले अपाङ्ग केटीको भूमिका निर्वाह गरेको बुझ्न सकिन्छ । चलचित्र ‘जिरो’ को ट्रेलर सुपरस्टार शाहरुख खानको शुभ जन्मदिनको अवसर पारे रिलिज हुने तयारीमा रहेको छ । यस्तो हुने छ तयारी ट्रेलर रिलिजको लागि उनको टिम मुम्बईको बडालास्थित सिनेमा हललाई उत्तरी भारतीय सहर मेरठ जस्तै देखिने गरेर सजाइरहेको छ । यसको पुष्टि चलचित्रसँग जोडिएका कलाकारहरूले गरिसकेका  छन् । सिनेमा हललाई मेराथ्को घण्टाघर जस्तै लाग्ने गरेर सजाइने बताइएको छ । त्यहाँ बनाइएको स्टेजमा शाहरुख बउआ सिंह बनेर गम्छा, लेदर ज्याकेट र जिन्स लगाएर आउने छन् । । यस मौकामा शाहरुखले आफ्नो फ्यानहरुलाई पनि निमन्त्रणा दिएका छन् । एकैसाथ ३ सेलिब्रेशन २ नोभेम्बरका दिन शाहरुखको जन्मदिन रहेको छ । त्यही बेला दिपावली पनि भएको र शाहरुखको चलचित्र जिरो पनि डिसेम्बरमा रिलिज हुने छ । यस तरिकाले भन्नुपर्दा शाहरुख खानको साथ सेलिब्रेसन गर्ने तीनओटा अवसरप्राप्त भएको छ ।यस मौकाको लागि उनले खास ेतयारी गरिराखेका छन् । यस्तो छ मन्नतको स्पेशल डेकोरेशन शाहरुख खान आफ्नो बंगला मन्नतलाई यसरी सजाइरहेका छन् । यसका केही तस्वीरहरु सामाजिक सञ्जालमा भाइरल पनि भइरहेका छन् । जसमा शाहरुखका घर मन्नत उज्यालोले जगमगाइरहेको देखिन्छ ।  शाहरुखको यो चलचित्र २१ डिसेम्बरमा रिलिज हुने भएको छ । एकैसाथ यसरी तीन अवसर परेकाले सुपरस्टार शाहरुख खानले अाफ्नो बंगला मन्नतलार्इ यसरी सजाएका केही तस्वीरहरु भाइरल भइरहेका छन् । हेर्नुहोस् केही तस्वीरहरु- एजेन्सीको सहयोगबाट

काठमाडौं, कार्तिक १५ । पोखरा प्रिमियर लिगमा बिहीबारको पहिलो खेलमा चितवनले काठमाडौंलार्इ १३ रनले हराएको छ । चितवनले दिएको एक सय ५० रनको अक्ष्य पछ्याउने क्रममा पूरा ओभर खेल्दै काठमाडौंले ९ विकेटको क्षतिमा एक सय ३६ रन बनाएको हो । काठमाडौंका लागि गौरव टोमारले सर्वाधिक ३९ रन, कप्तान ज्ञानेन्द्र मल्ल ३० रन र पवन सफारले २८ रनको योगदान गरे । चितवनका लागि करण केसीले ३ विकेट र पारस खड्काले २ विकेट लिए । यस्तै सन्नि पटेल, समित पटेल र भुवन कार्कीले समान १–१ विकेट लिए । टस हार्दै ब्याटको निम्तो पाएको चितवनले पाँच विकेटको क्षतिमा एक सय ४९ रन बनाएको थियो । चितवनका लागि ब्याट्सम्यान हरिशंकर शाहले ६० रन, अनिल शाहले २७ रन, कप्तान पारस खड्काले १४ रन, समित पटेलले ३१ रन र सन्नी पटेलले १३ रन बनाए । काठमाडौंका लागि बसन्त रेग्मी २ विकेट लिए । नन्दन यादव र पवन सफारले १र १ विकेट लिए । जितसँगै चितवन ४ खेलमा ४ अंक सहित तेस्रो स्थानमा छ भने काठमाडौं ३ खेलमा ४ अंक सहित चौथो स्थानमा रहेको छ ।

बीबीसी । भारत पञ्जावको अमृतसरमा रेलले किच्दा रामलिलामा रावणको भूमिका निभाएका स्थानीय दलविर सिंहकोसमेत मृत्यु भएको छ।   विगतमा सँधै रामको भूमिमा खेल्दै आएका सिंहले यो वर्ष पहिलो पटक रावण बनेर अभिनय गरेका थिए। साथीहरुको आग्रहमा यस वर्ष उनी रावण बनेका थिए तर त्यसलगत्तै उनले जीवन गुमाउन पुगेको बीबीसीले जनाएको छ।   रामलिलाको आफ्नो भूमिका सकिएपछि सिंह पनि रावणको पुत्ला दहन हेर्न भिडमा सामेल थिए। साथीहरुको आग्रहमा उनी मैदान झरेका थिए मञ्चबाट। तर उनको यस वर्षको रावणको भूमिका उनको जीवनकै अन्तिम अभिनय बन्न पुगेको छ।   रामलिलाको मञ्च रेल पट्रिबाट २५ मिटर मात्रै टाढा बनाइएको थियो। शुक्रबार दसहराको अवसरमा ‘अमृतसर रेल वे स्टेशन’ बाट दुई किलोमिटर दुरीमा रहेको धोवीघाट मैदानमा रेलको पट्रिमै उभिएर रावणको पुत्ला दहन हेरिरहेका दर्शकहरुलाई रेलले किचेको थियो ।   धोपिघाटमा पुत्ला दहन हेर्न करिव दुई सय जना भेला भएका थिए। जरुवा फाटक क्रसिगको ढाको बन्द भएपनि रावण दहन राम्रोसँग हेर्न र मोबाइलमा भिडियो तथा तस्बिर खिच्न दर्शकहरु रेलको पट्रिमै उभिएका थिए। लगत्तै आएको जालन्धर-अमृतसर डिएमयु रेलले हान्दा ७० जना मृत्यु भएको थियो।

कविर खानः कविर खान फिल्म निकै सानदार बनाउँछन् । उनी धेरै पारिश्रमिक लिने निर्देशक पनि हुन् । उनी हरहमेसा आफ्नो फिल्मको बारेमा सोच्ने गर्दछन् । उनी निर्देशकको अलवा लेखन र छायाँकार पनि हुन् । कबिर एक बर्षमा ४०० करोड भन्दा बढी कमाउने निर्देशक हुन् ।   राजकुमार हिरानीः हरेक फिल्ममा नैतिक सन्देश दिने राजकुमार हिरानीको बिषेशता नै हो । उनी फिल्ममार्फत युवा र किशोर दर्शकमा पुग्ने कोसिस गर्दछन् । उनले आमिर खानका साथ ३५० करोड भन्दा पनि बढी आम्दानीका लागि प्रेरणात्मक फिल्ममा काम गरिरहेका छन् ।   रोहित सेट्टीः रोहित पनि बलिउडका धनी निर्देशक बनेका छन् । उनलाई तीन चलचित्रले यो स्थानमा पुर्याएको हो । उनका फिल्म ‘चेन्नई एक्सप्रेस’, ‘दिलवाले’ र ‘सिंघम स्क्रिन’ उनका महत्वपूर्ण फिल्मका उदाहरण हुन् । उनी बढी कमाउने निर्देशकमा पर्दछन् ।   फरहान अख्तर र जोया अख्तरः यी दुवैले बलिउडमा राम्रा फिल्म बनाएका छन् । फरहान र जोया दिदीभाई हुन् । यी दुवै एकसाथ लोकप्रिय छन् । दर्शकको मनोरञ्जन ध्यानमा राखेर यी दुवैले फिल्म बनाउने गरेका छन् ।   उनीहरुका फिल्मले बलिउडमा एक नयाँ आयाम बनाएका छन् । यीनको फिल्म ‘दिल चाहता है’ र ‘जिन्दगी नामिलेगी दोबारा’ बलिउडमा सुपरहित साबित भयो । यी दुवै पनि बलिउडमा धेरै कमाउने निर्देशकमा पर्दछन् । अरबाज खानः फिल्मबाट दर्शकको मन जित्ने निर्देशक हुन् अरबाज खान । जसको उदारण ‘दबंग’लाई लिन सकिन्छ । धेरै हिट फिल्म नदिए पनि उनी धेरै पारिश्रमिक लिने निर्देशकमा पर्दछन् । -एजेन्सी