भक्तपुर, चैत ६ । नेपाल मजदुर किसान पार्टीका अध्यक्ष नारायणमान बिजुक्छेंले वैदेशिक हस्तक्षेप नभए तोकिएकै समयमा स्थानीय निकायको निर्वाचन हुने दाबी गरेका छन् । आइतबार रफत सञ्चार क्लबले आयोजना गरेको साक्षात्कार कार्यक्रममा बोल्दै बिजुक्छेंले भने, ‘निर्वाचन बहिष्कार गर्ने अधिकार सबैमा भएता पनि सम्भव भएका स्थानमा निर्वाचन गरिनुपर्छ र बाँकी रहेको स्थानमा पछि निर्वाचन गर्न सकिन्छ ।’ निर्वाचन आयोगले आचारसंहिता जारी गरेपनि ठूला दलहरुले त्यसको पालना नगरेको भन्दै आचारसंहिता लागू गर्ने तर्फ निर्वाचन आयोगको ध्यान जानु पर्नेमा जोड दिए । सरकारमा सामेल दल र प्रतिपक्षले विभिन्न बहानामा आचारसंहिता उल्लंघन गर्दा समेत निर्वाचन आयोगले केहि गर्न नसकेको उनको टिप्पणी छ । विजुक्छेंले सत्ता समिकरणमा फेरबदल आउन सक्ने सम्भावना समेत औंल्याए । नेपाली काँग्रेस र मधेसी दलहरु बीच सत्ता समिकरण हुन सक्ने बताउँदै विजुक्छेंले अवको सत्ता समिकरणमा एमाले र एमाओवादी एकातर्फ, काँग्रेस र मधेसी दलहरु अर्कोतर्फ भएर सत्ताको समिकरण हुनसक्ने बताए ।

चिनियाँ सरकारले २० देखि ४५ बर्षका युवाका लागि विशेष अफरको घोषणा गरेको छ । यो अफर अनुसार आफ्नो शुक्रकीट दान गर्ने प्रत्येक युवकलाई सरकारका तर्फबाट निशुल्क गोल्ड आइफोन दिइने छ । यो चीन सरकारले युवाका लागि धेरै संवेदनशील आग्रह गरेको छ । सरकारले भनेको छ, ‘कृपया आफ्नो देशका लागि शुक्रकीट दान गर्नुहोस ।’ यस कार्यका लागि चीन सरकारले सामाजिक सञ्जालको साहरा समेत लिएको छ । सरकारले सामाजिक सञ्जालमा केही खेलहरु अपलोड गरेको छ । यी सबै खेल सकिएपछि शुक्रकीट दान गर्नेलाई एक हजार अमेरिकी डलर वा एक गोल्ड आइफोन प्रदान गरिने अफरको सूचना सम्प्रेषण गरिएको छ । भनिन्छ चीन दिनदिनै बूढो हुँदै गइरहेको छ । काम गर्ने मान्छेको कमी भइरहेको छ । थुप्रै चिनियाँहरु सन्तान जन्माउँन चाहँदैनन् । चीन सरकारले भनेको छकी साँस्कृतिक र राजनीतिक कारणले स्वइच्छाले शुक्रकीट दान गर्ने युवाहरुको कमीले गर्दा चीनको शुक्रकीट बैंकमा यसको कमी भइरहेको छ । ‘अपरिचित पुरषको शुक्रकीटबाट गर्भ धारण गर्नु कन्फ्युसियसको सिद्धान्तको अवहेलना गर्नु हो’ भन्ने धारणा चिनियामा व्याप्त छ । कन्फ्युसियसलाई चीनमा देवता मानिन्छ । यसै कारणले चिनियाँ युवा पनि आफ्नो शुक्रकीट दान गर्नुलाई नैतिक मान्यता विपरितको कार्य मान्दछन् । चीन सरकारको योजना यो छकी गम्भीर संकट आउनु भन्दा पहिला नै देशलाई जवान अवस्थामा कायम राख्नका लागि कृत्रिम गर्भाधानको उपाय अपनाउनु पर्छ । पछिल्लो समय चीनको जनसङ्ख्या घट्दोक्रममा रहेको छ । यसले भविष्यमा देशमा शक्रीय जनशक्तिको संकट उत्पन्न हुनसक्ने भन्दै चीनले जनसङ्ख्या वृद्धिका लागि विभिन्न नीति अगाडि सारिरहेको छ ।

चैत ५ । निरोगी बन्नु सबैको चाहना हुन्छ । तैपनि अत्याधुनिक जीवनशैलीको सबैभन्दा ठूलो असर मानिसको स्वास्थ्यमा पर्ने गरेको छ । लामो समयसम्म कार्यालयमा काम गर्नुपर्ने बाध्यता, तनाव र घरपरिबारको जिम्मेवारीलगायतका कारण हामी चाहेर पनि स्वस्थ बन्न सकेका हुँदैंनौं । व्यस्तताका कारण धेरैले आफ्नो स्वास्थयमा हेचक्राइ गरेको पाइन्छ । खानपिन र आहारमा राम्रो बिचार पुर्‍याएमा मानिस पूर्ण रुपमा स्वस्थ बन्न सक्ने विज्ञहरु बताउछन् । नियमित रुपमा यी खानेकुरा खाँदा मानिसको समग्र स्वास्थ्यमा सुधार आउने विज्ञहरुको भनाई छ । निम्न उल्लेखित खानेकुराहरु नियमित सेवन गरेमा उमेर नपुग्दै बुढ्यौली हुने समस्याबाट बच्ने, कोलस्ट्रोल र रक्तचापको नियन्त्रण हुने तथा शरीरलाई डायबिटिजलगायतबाट मुक्त हुन सकिने विज्ञहरु बताउँछन् । स्याउ : दिनहुँ एउटा स्याउ खाँदा रोग भाग्छ भन्ने अंग्रेजी उखान अहिले व्यवहारिक रुपमा नै सत्य सावित हुँदैछ । स्याउमा शरीरलाई आवश्यक पर्ने फाइबर हुन्छ, जसले शरीरको पाचन प्रणालीलाई सहयोग गर्छ । स्याउमा भिटामिन ए, सी, इ, फस्फोरस, म्याग्नेसियम,पोटासियम लगायत शरीरलाई आवश्यक पर्ने तत्व हुन्छ, जसले शरीरलाई स्वस्थ बनाउछ । देशी बदाम र ओखर : नियमित आल्मोन्डको सेबनले स्मरण क्षमता बृद्धि गर्छ । सबैभन्दा महत्वपूर्ण त यसले आँखाको दृष्टिमा सुधार ल्याउछ भनेर विभिन्न अध्ययनहरुले प्रमाणित गरेका छन् । गर्भवती महिलाले बदाम खाँदा बच्चाको दृष्टि बलियो हुने विज्ञहरुको भनाई छ । आल्मोन्डले छालामा चमक ल्याउछ । अंगुरः तौल घटाउन चाहनेका लागि अंगुर अचुक उपाय हुन सक्छ । नियमित अंगुरको सेबनले ब्लड सुगरको तह पनि घटाइदिन्छ । अंगुरमा हुने पेक्टिन नामक तत्वले रक्त प्रबाहमा हुने कार्बोहाईड्रेटको तह घटाइदिन्छ र शरीरलाई मोटो हुनबाट बचाउछ । गेडागुडीः प्राय सबै मौसमी गेडागुडीले हाम्रो शरीरलाई आवश्यक पर्ने भिटामिन प्रोटिन लगायतका खानेकुरा प्रदान गर्छन् । गेडागुडीमा पर्याप्त मात्रामा फाइबर, म्याग्नेसियम, आइरन, जींक र भिटामिन बी हुन्छ, जसले रक्तचाप घटाउने र डायबिटिज नियन्त्रण गर्छ । केराः पोटास र आइरनको मुख्य स्रोत केराले हेमोग्लोबिनको तहलाई नियन्त्रण गर्छ । केरा पाचन प्रणालीमा पनि उत्तिकै प्रभावकारी भएकोले नियमित दुईओटा केरा खाँदा कब्जियतको समस्या हुँदैन । ग्रीन टिः तौल घटाउन ग्रीन टि निकै प्रभावकारी मानिन्छ । यसले शरीरको मेटाबोलिजमलाई बृद्धि गर्छ । यो एन्टिअक्सिडेन्टको महत्वपूर्ण स्रोत समेत हो । यसमा मानिसलाई बृद्ध हुनबाट बच्ने गुण समेत हुन्छ । यसले कोलेस्ट्रोलको तहलाई पनि सुधार गर्छ । दहीः दही क्याल्सियमको महत्वपूर्ण स्रोत हो । दहीले हड्डी बलियो बनाउन पनि उत्तिकै सहयोग पुर्याउछ । माछा, मासु र अन्डा नखाने मानिसले दहीबाट प्रोटिन लिन सक्छ । यसले पाचन प्रक्रियालाई सशक्त बनाउछ । दहीमा हुने यही गुणका कारण खाना खाईसकेपछि डेर्जटको रुपमा समेत प्रयोग गर्ने गरिन्छ ।

काठमाडौँ, चैत  ५। उपप्रधान तथा गृहमन्त्री विमलेन्द्र निधि आतङ्कवाद प्रतिवादसम्बन्धी भारतमा आयोजना गरिएको अन्तर्राष्ट्रिय सम्मेलनमा भाग लिई शुक्रबार नेपाल फर्केका छन् ।   त्रिभुवन अन्तर्राष्ट्रिय विमानस्थलमा पत्रकारसँग कुरा गर्दै मन्त्री निधिले भ्रमण उपलब्धिमूलक रहेको बताए । उनले सबै किसिमको आतङ्कवादको अन्त्यका लागि अन्तर्राष्ट्रिय सहयोग आवश्यक रहेको र नेपाल आतङ्कवादको अन्त्यका लागि प्रतिबद्ध रहेको भनी सम्मेलनमा प्रस्तुत गरेको नेपालको प्रस्ताव स्वीकृत भएको उल्लेख गरे।   भारतीय प्रधानमन्त्री नरेन्द्र मोदीसँगको भेटवार्ताको चर्चा गर्दै गृहमन्त्री निधिले प्रधानमन्त्री मोदीले कञ्चनपुर घटनाबारे सूक्ष्म अध्ययन भइरहेको र दोषीलाई कारबाही गर्न भारत सरकार तयार रहेको आश्वासन दिएको जानकारी दिए । नेपालमा आगामी वैशाख ३१ गते हुन लागेको स्थानीय तहको निर्वाचनका लागि बन्दोबस्तीका सामान उपलब्ध गराउन भारत तयार रहेको गृहमन्त्री निधिले बताए ।  उनले दुई देशबीचको सम्बन्धमा देखिएको समस्यालाई कूटनीतिक तवरबाट समाधान गर्न सकिने धारणा दुवै पक्षबाट व्यक्त गरिएको बताए । उनले भ्रमणका क्रममा भारतीय विदेशमन्त्री सुस्मा स्वराज, गृहमन्त्री राजनाथ सिंह तथा भारतीय नेताहरु डा मनमोहन सिंह, डिपी त्रिपाठी, सीताराम येचुरी, त्यहाँका पत्रकार , नागरिक समाजका अगुवासँग भेट भएको र ती भेटघाटमा सबैले नेपालको लोकतन्त्र र आर्थिक समृद्धिमा भारतको अत्यन्त सहयोग र सहानुभूतिको भावना देखाएको बताए ।  इन्डिया फाउन्डेसनले आयोजना गरेको सो सम्मेलनमा भाग लिन उनी फागुन ३० गते त्यसतर्फ प्रस्थान गरेका थिए । रासस

मोरङ, चैत ४ । मोरङको म्याजिक चप्पल उद्योगको आगो अझै नियन्त्रणमा आउन सकेको छैन । मोरङको टंकिसिनबारीस्थित जयश्री पियुटेक उद्योगमा बिहान ४ बजेदेखि लागेको आगो निभाउने प्रयास जारी भएपनि नियन्त्रणमा आउन सकेको छैन । आगो नियन्त्रण गर्नका लागि विराटनगर, दमक, इटहरी, धरान, इनरुवा, राजविराज लगायत नगरपालिकाका दमकल प्रयोग गरी आगो निभाउने प्रयास भइरहेको प्रहरीले जनाएको छ । आगो नियन्त्रणमा आउन कठिन भएकाले उद्योग आसपासका क्षेत्राका बासिन्दा र अन्य उद्योगमा सतर्कता अपनाउन थालिएको छ । आगो फैलिएर थप क्षति नहोस् भनेर सतर्क गराइएको प्रहरीको भनाइ छ । उद्योग परिसरमा रहेको बिजुलीको ट्रान्सफर्मर विष्फोट भएकाले त्यही कारण आगलागी सुरु भएको अनुमान गरिएको छ । म्याजिक चप्पल र जुत्ताको उत्पादक सो उद्योग सुनसरी–मोरङ औद्योगिक क्षेत्रमा पर्छ । मोरङका प्रहरी उपरीक्षक सन्दिप भण्डारीका अनुसार आगो निभाउन प्रहरी, स्थानीय बासिन्दालगायत बिहानैदेखि सक्रिय छन् । झापा, मोरङ, सुनसरी र सप्तरी गरी चार जिल्लाका १० वटा दमकल प्रयोग भइरहेको प्रहरीले जनाएको छ । आगोले उद्योगका कच्चपदार्थ र तयारी सामान जलेको छ । क्षतिको विवरण संकलन भइरहेको बताइएको छ ।

काठमाडौं, चैत ३ । आजदेखि सुरु भएको एसइइको परीक्षामा सहभागी विद्यार्थीहरुको साथबाट बरामद गरिएको चिटले एकै दिनमा नौ वटा बोरा भरिएको छ । परिक्षालाई अमर्यादित र चिट चोरिएको पाइएमा कारवाही गर्ने भनिरहेका बेला महोत्तरीका विभिन्न स्कुलहरुमा परिक्षा हलमा पुगेका प्रहरी र शिक्षकको टोलीले चिट भने बोराका बोरा चिट बरामद गरिएको हो । कक्षा १० को माध्यमिक शिक्षा परीक्षाको पहिलो दिन आज अनिवार्य अङ्ग्रेजी विषयको परीक्षा चलिरहँदा जिल्लाका विभिन्न परीक्षा केन्द्रबाट नौ बोरा चिट बरामद भएको प्रहरी र शिक्षकहरुले बताएका छन् । कुल २८ वटा परीक्षा केन्द्रबाट ९ बोरा चिट बरामद गरिएको हो । परीक्षा केन्द्रको मूल गेटमा खटिएका प्रहरी र शिक्षक टोलीले गरेको संयुक्त चेक जाँचमा विद्यार्थीबाट नौ बोरा गाइड, पुस्तक तथा फ्लेप बरामद भएको जिल्ला शिक्षा कार्यालय महोत्तरीले जनाएको छ ।

काठमाडौं, चैत  ३ ।  संयुक्त लोकतान्त्रिक मधेसी मोर्चाका कार्यकर्ताहरुले रौतहट जिल्लाको विभिन्न स्थानमा स्थापना गरिएको गाउँपालिका कार्यालयमा झुण्डाएको साइनबोर्ड तोडफोड गरेका छन्। स्थानीय तह संरचनाको विरोध गर्दै उनीहरुले वोर्ड तोडफोड गरेका हुन्। रौतहटमा तीन नगरपालिका र १३ गाउँपालिका सहित स्थानीय तह कार्यान्वयन भएका १६ वटा कार्यालयहरु मध्ये अधिकांश कार्यालयका साइनवोर्डहरु तोडफोड गरिएको छ। जिल्ला समन्वय समितिको कार्यालयमा झुण्डयाइएका साइन बोर्डलाई मोर्चाका कार्यकर्ताहरुले बुधवार दिउँसो तोडफोड गरेका थिए। यसैगरी इशनाथ गाउँपालिका औरैयामा उद्घाटन कार्यक्रम संचालन भईरहदा मोर्चाका कार्यकर्ताहरुले कार्यक्रम विथोलेर आगजनी गरेका थिए। यस्तै दुर्गा भगवती गाउँपालिका गंगापिपरा, माधवनारायण गाँउपालिका, गढीमाई, गुजरामाई, पतुवा विजयपुर, कटहरिया, देवाही, मौलापुर गाउँपालिकाहरुमा झुण्डयाइएको बोर्ड तोडफोड गरी जलाएपछि कामकाज ठप्प भएको जिल्ला समन्वय समिति रौतहटले जनाएको छ। समन्वय समितिका संयोजक उमेश बस्नेतले राजपुर र परोहा गाउँपालिकाको उद्घाटन गरिएको उनले बताए। वृन्दावन गाउँपालिका विश्राम्पुरमा कार्यालय संचालन भएपनि राष्ट्रिय झण्डा र कालो झण्डा दुइटै झुण्डयाइएको जानकारी दिदै संयोजक बस्नेतले राजनीतिकरुपमा समस्या समाधान नभए सम्म स्थानीय तहमा काम गर्न निकै गाह्रो भएको बताए। स्थानीय निकायको पुर्नसंरचनाको विषयलाई लिएर रौतहटमा विरोध गरेको मोर्चाले जनाएको छ। समान जनसंख्याको आधारमा स्थानीय तहको पुनर्संरचना हुनु पर्ने र संसदमा दर्ता रहेको संविधान संशोधन प्रस्ताव परिमार्जन सहित पारित हुनुपर्ने माग मोर्चाको रहेको नेपाल सदभावना पार्टीका नेता अनिल सिंहले बताए। यो खबर आजको नागरिक दैनिकमा  छ ।

काठमाडौं, फागुन २८ । वार्सिलोनासँग च्याम्पियन्स लिगको अन्तिम १६ अन्तर्गत दोस्रो लेगको खेलमा ६–१ ले पराजित भएपछि फ्रेन्च क्लब पेरिस सेन्ट जर्मनी (पिएसजी) को खराब दिन सुरु भएको छ। पहिलो लेगको खेल ४–० ले जितेको फ्रेन्च क्लब दोस्रो लेगमा ६–१ को खराब नतिजा भोग्दै बाहिरिएको थियो । वार्सिलोनासँगको लज्जास्पद पराजयपछि घर फर्किएको पिएसजीका खेलाडीलाई बोउरगेट विमानस्थलमा सयौं दर्शकले गाली बेइज्जती गरेका थिए। विमान स्थलको पार्किङ क्षेत्रमा राखिएको खेलाडीको केही गाडी तोडफोड पनि भएको क्लबले जनाएको छ । समर्थकको अप्रिय व्यवहारबाट बच्न विमानस्थलबाट तुफान बाहिर निस्किने क्रममा मिडफिल्डर थियागो मोटाको गाडीले एक समर्थकलाई छोएको बताइएको छ। क्लबका खेलाडीहरूलाई आफ्नो परिवार कसरी जोगाउने भन्ने समस्या भइरहेको बेला ‘ला’ इक्युप’ पत्रिकाले अर्को सनसनी खेज खुलासा गरेको छ । र्सिलोनासँगको खेल अगाडि क्लबका दुई खेलाडी रातभरी पार्टीमा व्यस्त थिए । ‘ला’ इक्युपको टेलिभिजन संस्करणमा मिडफिल्डर ब्लास माटाउडी र मार्को भेराटी राती अबेरसम्म नाइट क्लबमा रहेको समाचार सार्वजनिक भएको थियो । यो समाचारपछि क्लबका समर्थक झन् भड्किने डरले पिएसजीले समाचारको खण्डन गरेको छ। क्लबले एकै दिन दुईवटा विज्ञप्ती सार्वजनिक गर्दै भनेको छ, ‘जुन प्रकारले अनुचित प्रचारबाजी गरिएको छ, पराजयको कारण त्यो हुँदै होइन । पत्रिकाले हचुवाको भरमा, समाचारको पुष्टी नगरि सार्वजनिक गरेको छ। यसमा कुनै सत्यता छैन ।’ भेराटीका एजेन्ट डोनाटो डि काम्पलीले पत्रिका माथि कानुनी उपचार खोजिने जानकारी दिए । जुन समाचार ‘ला’ इक्युपले लेख्यो, त्यो निराधार छ। हामी कुन विषयलाई समातेर मुद्धा दायर गर्ने भन्ने कुराको तयारी गरिरहेका छौंं’, एजेन्ट काम्पलीले भने।

डुम्रे (तनहुँ), फागुन २३ । फेसबुकमार्फत महिलालाई साथी बनाई ठगी धन्दा गर्ने एक युवकलाई प्रहरीले प्रकाउ गरेको छ । प्रकाउ पर्नेमा राम्जाकोट–२ पिपलटारका २७ वर्षिय मोहनबहादुर पाटामगर रहेका छन् । जिल्ला प्रहरी कार्यालय तनहुँका प्रहरी उपरीक्षक उमेशराज जोशीका अनुसार पाटामगर देवघाटमा प्रकाउ परेका थिए । पक्राउ परेका पाटामगरले आफू सम्पन्न परिवारको सदस्य भएको भन्दै फेसबुकमार्फत साथी बनाउँदै महिलालाई ठग्दै आएका थिए । प्रहरी उपरीक्षक जोशीका अनुसार सीता गुरुङबाट दुई तोला ५० ग्रामको सुनको सिक्रीसहितको लकेट, देवी मगरबाट एक तोला ५० ग्रामको सुनको सिक्री र जमुना गुरुङको एक तोला ७५ ग्रामको सुनको सिक्री ठगी गरेका थिए । फेसबुकमार्फत ठगी धन्दा गरेका पाटामगरले आफ्ना बाबु बेलायतको लाहुरे भएको, पोखरा रामबजारमा घर भएको, काठमाडाँै चल्ने दुईवटा माइक्रो बस भएको भन्दै महिलालाई झुट्टा विवरण दिई फसाउने गरेको बुझिएको छ । यस घटनाका विषयमा थप अनुसन्धान भइरहेको प्रहरीले जनाएको छ । रासस

फागुन ९ । अभिनेत्री करिना कपुरले आफ्ना पति सैफ अलि खान र पूर्व प्रेमी साहिदले सँगै अभिनय गरेको बलिउड फिलिम ‘रंगुन’ हेरेपछि दंग पर्दै यस फिलिम वर्षकै उत्कृष्ट हुने प्रतिक्रिया दिएकी छिन् । हालसालै उनले यस फिलिम हेरेर त्यसतो प्रतिक्रिया दिएकी हुन् । उनले भनिन्, ‘मैले यो फिल्म हेरे, यस वर्षकै उत्कृष्ट फिल्म हुने आश गरिरहेकी छु किनकी यस फिल्मलाई मेरा प्रिय निर्देशक विशाल भारद्वाजले निर्देशन गरेका छन् जसले ओमकारा पनि बनाएका थिए ।’ यस फिलिमलाई दर्शकले पनि मनपराउने उनले आशा व्यक्त गरिन् । उनले फिल्ममा लङ्डा त्यागीको भूमिकामा सैफ अत्यन्तै राम्रो देखिएको बताइन् । त्यस्तै ‘रंगुन’मा सैफले यस अघि कहिल्यै निर्वाह नगरेको पारसी भूमिका असरदार रहेको पनि बताइन् । विशालका फिल्मका नकारात्मक पात्रहरू सधैं दंग पार्ने किसिमका हुने उनले बताइन् । फिलिममा कंगना, सैफ तथा शाहिद जस्ता ३ जना चम्किला कलाकारहरूको वेजोड प्रस्तुती रहेको उनले बताइन् । उनीहरू फिल्म उद्योगका उत्कृष्ट कलाकारहरू हुन् भन्दै आफू उनीहरूबाट कम आशा गर्न नसक्ने बताइन् ।

महोत्तरी, फागुन ७ – महोत्तरी लक्ष्मिनियाँ–७ स्थित राष्ट्रिय उच्च मावि कान्तिबजारको कक्षा ९ मा अध्ययनरत प्राविधिकतर्फका विद्यार्थीले आधुनिक प्रविधिद्वारा च्याउखेती उत्पादन गर्दै आएका छन् । विद्यालयमा कृषि विज्ञानतर्फ अध्ययनरत् ४८ जना विद्यार्थीले स्थानीयस्तरमा पाइने सामग्रीको प्रयोगले विद्यालयको एउटा अँध्यारो कोठामा परीक्षणका क्रममा सामूहिक रुपमा च्याउ उत्पादन गर्दै आएका हुन् । च्याउ उत्पादनका लागि उनीहरुले गाउँघरमै पाइने धानको भुस, पोलिथिनको ब्याग एवम् च्याउको बीउको प्रयोग गर्ने गर्छ । धानको भुसलाई पानीमा उमालेर पोलिथिनको भाँडामा राखिन्छ, त्यसपछि त्यसमा च्याउको बीउ हालेर आधुनिक प्रविधिले च्याउ खेती गर्दै आएकोे कक्षा ९ मा अध्ययनरत छात्रा निलु मोक्तानले बताइन् । च्याउ उत्पादनका लागि जिल्ला कृषि विकास कार्यालयले बीउ उपलब्ध गराएको छात्र शिवकिरण महतोले बताए । त्यस्तै छात्रा संरचना कुमारी साहले ३० दिनमा पूर्णरुपमा तयार हुने सो च्याउ उत्पादनको लागि तीन हप्तासम्म अँध्यारो कोठामा राख्नुपर्ने बताए । कक्षा ९ मा अध्ययनरत ती विद्यार्थीलाई छ समूहमा विभाजन गरेर प्रयोगात्मक विधिद्वारा शिक्षण गराउँदै आएको शिक्षक देवनारायण सिंहले बताए । यस विद्यालयका आफ्नै जग्गामा विद्यार्थीले काउली, आलु, गहुँलगायतका बाली परीक्षणका रुपमा उत्पादनसमेत गर्दै आएका छन् । कक्षा १२ सम्म अध्यापन हुने सो विद्यालयमा यसै वर्षदेखि प्राविधिकतर्फका कृषि विज्ञान विषयका तीन वर्षे कक्षा सञ्चालन गर्दै आएको विद्यालयका प्रधानाध्यापक राजकिशोर सिंहले जानकारी दिए  । यसै वर्षदेखि सुरु भएको सो विषय अध्ययनका लागि जिल्लाका विभिन्न स्थानका साथै धनुषा र सर्लाहीका विद्यार्थी यहाँ आउने गरेको सो विद्यालयले जनाएको छ ।

काठमाडौं, फागुन ५ । लोकसेवा आयोगले राजपत्रअनंकित प्रथम श्रेणी (नायब सुब्बा) पदमा माग गरेभन्दा करिब १६६ गुणा बढी आवेदन परेको छ । आयोगले माग गरेको चार सय ५८ पदमा ७६ हजार तीन सय ९९ जनाको आवेदन परेको दरखास्त संकलन शाखाका अधिकृत नारायण गौतमले जानकारी गराए । आयोगले गत पुसको अन्तिम सातादेखि माघ २८ गतेसम्म रापअ प्रथम श्रेणीका विभिन्न समूहका पदमा आवेदन माग गरेको थियो । अनलाइनमार्फत् फाराम भरेकामध्ये ६७ हजार आठ सय ९८ जनाले आयोगमार्फत् तथा अन्यले हुलाकमार्फत् शुल्क बुझाएको उनले जानकारी गराए । उनकाअनुसार पाँच विकास क्षेत्रबाट आवेदकले फाराम भरेका थिए । रापअ प्रथम श्रेणी समूहमा नासुका लागि प्रशासन, परराष्ट्र, राजस्व, लेखा र न्यायसेवातर्फ विज्ञापन गरिएको थियो । नासुको यही फागुन २८ गते परीक्षा हुँदैछ ।

जुम्ला, फागुन छ । कृषि विकास मन्त्रालयको ‘एक गाविस, एक कृषि प्राविधिक’ नीति कार्यान्वयन तहमा पुगेको छ । उक्त नीतिअनुसार जिल्ला कृषि विकास कार्यालयले गतवर्ष हाँकु, लाम्रा, रारालिही र पाण्डव गुफा गाविसमा चारजना कृषि प्राविधिक नियुक्त गरेको थियो । चालु आवमा आठ जनालाई कृषि प्राविधिकमा सिफारिस गरिएको वरिष्ठ कृषि विकास अधिकृत भरतप्रसाद कँडेलले जानकारी दिए । सिफारिस गरिएका प्राविधिकलाई गुठीचौर, छुमचौर, ताम्ती, घोडमहादेव, बड्की, शनिगाउँ, बुम्रमाडीचौर र मालिकाबोता गाविसमा खटाइएको छ । गत वर्ष कृषि प्रसार सेवामा कृषिको पहुँच वृद्धि गर्ने, सेवा प्रवाहमा सहजता र छरितोपन दिने उद्देश्यले जनशक्ति थप गरिएको कार्यालयले जनाएको छ ।

काठमाडौँ, माघ २८ । पौष शुक्ल पूर्णिमादेखि सुरु भएको श्रीस्वस्थानी व्रत कथाको आजबाट साँगे गरिएको छ । श्री स्वास्थानीको पूजाआजा गरी आजबाट स्वास्थानी साँगे गरिएको हो । व्रत बस्ने प्रत्येक महिलाले महिनाभरि स्नान गरी मध्याह्न श्रीस्वस्थानीको पूजा गरी एक छाक खाएर बस्नुका साथै हरेक दिन स्वस्थानी कथावाचन र श्रवण गरेका थिए । सत्ययुगमा हिमालयकी पुत्री पार्वतीले महादेव स्वामी पाउनाका लागि विष्णुको सल्लाहानुसार निराहार बसी स्वस्थानीको व्रत गर्दा आफ्नो मनोकाङ्क्षा पूर्ण भएको र पार्वतीले लोककल्याणका निम्ति सो व्रतकथा प्रचारप्रसार गराई गरिब तथा दुःखीको उद्धार गरेकाले परम्परागत रूपमा सो कथा प्रचलित हुँदै आएको मानिन्छ । काठमाडौंको साँखुस्थित शालीनदीमा आज भक्तजनहरुको अत्याधिकै घुँइचो लागेको थियो ।

काठमाडौँ, माघ २७ । नेपाल विद्युत प्राधिकरणले चितवन जिल्लालाई पनि लोडसेडिङ मुक्त भएको घोषणा गरेको छ । प्राधिकरणले काठमाडौँ उपत्याकामा तिहारदेखि र केही महिना अघि पोखरालाई लोडसेडिङमुक्त बनाएको थियो । केही समयअघि चितवनमा एक सार्वजनिक कार्यक्रममै उर्जामन्त्री जनार्दन शर्मा प्रभाकरले चितवनललाई छिटै लोडसेडिङमुक्त गरिने बताएका थिए । ‘आजदेखि चितवन जिल्ला लोडसेडिङमुक्त भएको छ, । औद्योगिक फिडरबाहेक सबै फिडरमा अब लोडसेडिङ हुँदैन’ प्राधिकरणको चितवन शाखाले जनाएको छ । चितवनमा राष्ट्रिय ग्रीडबाट बिजुली वितरण भएका सबै क्षेत्रमा लोडसेडिङ नहुने विद्युत प्राधिकरणले बतायो । प्राधिकरणका कार्यकारी निर्देशक कुलमान घिसिङले जेठभित्रमा नेपालभर लोडसेडिङ अन्त्य भएको घोषणा गर्ने नीति अनुरुप चितवन जिल्लालाई लोडसेडिङ अन्त्य गरिएको प्राधिकरणले जनायो । आजदेखि चितवनबासीले प्राविधिक समस्या बाहेक बत्ती जाने समस्या झेल्न पर्दैन ।