पाँचथर, जेठ ६ । पाँचथरमा मन्तव्य राख्ने क्रममा एक जना शिक्षकको मृत्यु भएको छ । जिल्लाको फिदिम नगरपालिका–१४, स्थित महादेव गुप्तेश्वर माविका शिक्षक लालबहादुर फागोको मन्तव्य राख्ने क्रममा मृत्यु भएको हो । सोमबार विद्यालयका शिक्षक अशोक तिम्सिनाको बिदाई तथा नवनियुक्त शिक्षक फागोकै स्वागतका लागि आयोजित कार्यक्रममा मन्तव्य राख्ने क्रममा उनको निधन भएको स्थानीय राम बाँस्कोटाले जानकारी दिए । स्थानीयकाअनुसार शिक्षक फागो कार्यक्रममा मन्तव्य राख्नेबित्तिकै बेहोस भएर ढलेका थिए । अचानक बेहोस भएर ढल्न पुगेका फिदिम–११, मूलडाँडा स्थायी घर भएका ३५ वर्षीय शिक्षक फागोको केहीबेरमै मृत्यु भएको बताइएको छ । उहाँको शवलाई पोस्टमर्टमका लागि सरदरमुकाम फिदिमतर्फ ल्याइँदै गरेको फिदिम–८, तमाखेस्थित प्रहरी चौकीले जनाएको छ । शिक्षक फागोलाई केही दिनअघि मात्र करारमा नियुक्त गरिएको थियो ।

धनगढ, वैशाख १५ । प्रदेश नं. ५ सरकारले सुदुरपश्चिम प्रदेशवासीलाई लुम्बिनी घुम्न आउन निम्तो दिएको छ । सुदुरपश्चिम प्रदेशको अस्थायी राजधानी धनगढीमा लुम्बिनी भ्रमण वर्ष २०७६ प्रचारप्रसार उपसमितिले पत्रकार सम्मेलन गर्दै बुद्ध जन्मस्थल लुम्बिनी भ्रमणका लागि निम्तो दिएको हो । सुदुरपश्चिम प्रदेशका उद्योग, पर्यटन, वन तथा वातावरण मन्त्री माया भट्टलाई प्रदेश नं.५ सरकारको तर्फबाट भ्रमणको निम्तो लिएर आएको प्रचारप्रसार उपसमितिका सचिवालय सदस्य प्रदीप आचार्यले प्रदेशबासीमा निमन्त्रणा सन्देश पु¥याउन अनुरोध गरे । ‘सुदुरपश्चिमका पर्यटकीय स्थलमा आउने पर्यटकलाई लुम्बिनी पु¥याउने र लुम्बिनी आएका पर्यटकलाई सुदुरपश्चिमका पर्यटकीय स्थल घुम्ने वातावरण बनाउनका लागि प्रदेश–प्रदेशबीच सहकार्य र समन्वयका लागि पनि यो अभियानको थालनी भएको हो–आचार्यले भने । बुद्धको जन्मभूमि रुपन्देहीको लुम्बिनी, क्रिडास्थल कपिलवस्तुको तिलौराकोट, मावली तथा ससुराली रुपन्देहीको देवदह, बुद्धको अस्तुधातु रहेको नवलपरासीको रामग्राम, बुद्धस्थलहरु गोटिहवा, सगरहवा, कुदान, अरौराकोट, सिसहनिया लगायतका पर्यटकीय स्थलमा घुम्न आउने पर्यटकको संख्या २५ लाख पु¥याउने उद्देश्यसहित प्रदेश नं. ५ सरकारले २०७६ साललाई लुम्बिनी भ्रमण वर्ष मनाउने घोषणा गरेको छ । लुम्बिनीमा पर्यटक आगमनलाई बढाउने र बसाई लम्बाउने सोचका साथ प्रदेश सरकारले प्रवद्र्धनात्मक कार्यक्रम थालेको प्रदेश ५ पर्यटन मन्त्रालयका शाखा अधिकृत केशव सुनारले जानकारी दिए । प्रदेश नं.५ का पहाडी जिल्लामा हिल स्टेसन बनाउने र लुम्बिनी घुमेर सकेपछि ती स्थानमा विश्रामको वातावरण मिलाउने तयारी सरकारको छ । सोही अवसरमा बोल्दै सुदुरपश्चिम प्रदेशकी उद्योग, पर्यटन, वन तथा वातावरण मन्त्री माया भट्टले लुम्बिनी भ्रमण वर्ष सफल पार्नका लागि सुदुरपश्चिम प्रदेश सरकारले पूर्णरुपमा सहयोग गर्ने बताइन् । उनले प्रदेश नं. ५ बासीले सुदुरपश्चिम क्षेत्र र सुदुरपश्चिमबासीले लुम्बिनी भ्रमण गर्ने गरी नीति ल्याउन लागेको बताइन् । पर्यटन अभियन्ता, व्यवसायी र सरोकारवालासँग छलफल गरेर छिटै नै प्रदेश सरकारले पर्यटन नीति ल्याउन लागेको उनले बताइन् । प्रदेश ५ सरकारले गरेका राम्रा कामहरुको अनुसरण गर्दै सुदुरपश्चिम प्रदेश सरकारले प्रदेशभित्रका पर्यटकीय स्थलहरुको प्रवद्र्धनका लागि काम गर्ने मन्त्री भट्टले बताइन् । ‘पहिले प्रदेश घुमौं, त्यसपछि अरु प्रदेशहरु घुमौं, त्यसपछि देशभर घुमौं र अनिमात्रै विदेश घुमाँैं, उनले भनिन्–यसका लागि सुदुरपश्चिम प्रदेश सरकारले अभियान नै चलाउने छ ।’ सुदुरपश्चिम सुन्दर रहेको भन्दै मन्त्री भट्टले पर्यटन प्रवद्र्धनका लागि सबैका बीचमा समन्वय र सहकार्यको खाँचो रहेको बताइन् । उनले सुदुरपश्चिम सरकारकै तर्फबाट यसैवर्ष लुम्बिनी घुम्न आउने वाचा गर्दै सुदुरपश्चिम प्रदेश घुम्न प्रदेश ५ सरकारलाई निम्तो गरिन् । यस्तै सुदुरपश्चिमका पर्यटन अभियन्ताहरु गोपी हमाल, दिनेश भण्डारी, रमण श्रेष्ठले बोल्दै लुम्बिनी क्षेत्रमा आउने पर्यटकलाई सुदुरपश्चिममा आउनेगरी समन्वय गर्नुपर्ने बताए । उनीहरुले सुदुरपश्चिम क्षेत्र र लुम्बिनी क्षेत्रका पर्यटकीय स्थललाई एकैसाथ प्रवद्र्धन गरेमा प्रभावकारी हुने बताए । यस्तो छ भ्रमण वर्षको कार्यक्रम सिद्धार्थ गौतमबुद्ध मात्रै होइन, लुम्बिनी क्षेत्रमा त्यसअघिका क्रकुच्छन्द र कनकमणि बुद्ध पनि जन्मिएका थिए । क्रकुच्छन्द र कनकमणि बुद्ध कपिलवस्तुको गोटिहवा र अरोराकोटमा जन्मिएका थिए । बुद्धको अस्तुधातु समेत लुम्बिनी क्षेत्रमै रहेको छ । रुपन्देही, कपिलवस्तु र नवलपरासी (पश्चिम) का बुद्धस्थलहरुलाई लुम्बिनी क्षेत्रमा राखेर प्रदेश सरकारले प्रवद्र्धनात्मक कार्यक्रम थालेको हो । लुम्बिनी भ्रमण वर्षको मूल समितिको अध्यक्षमा प्रदेश ५का मुख्यमन्त्री शंकर पोखरेल रहेका छन् भने कार्यकारी समितिको संयोजकमा प्रदेश सरकारका उद्योग, पर्यटन, वन तथा वातावरण मन्त्री लिला गिरी रहेका छन् । प्रदेश ५ सरकारले भ्रमण वर्ष प्रचार प्रसारका लागि नेपाल पत्रकार महासंघ प्रदेश ५ का उपाध्यक्ष भरत केसीको संयोजकत्वमा प्रचारप्रसार उपसमिति गठन गरेको छ । भ्रमण वर्षले यस क्षेत्रमा व्यवसायीलाई आकर्षित गर्ने र स्थानीय समुदायलाई पर्यटकमैत्री बनाउन सफल हुने विश्वास मूल समितिको छ । भ्रमण वर्षको कार्यक्रम २०७६ को वैशाख बुद्ध पूर्णिमाका दिन शुरू भई चैत्र शुक्ल पूर्णिमाका दिन समापन हुने छ । कार्यक्रमका लागि उद्योग, पर्यटन, वन तथा वातावरण मन्त्रालयले चार करोड १९ लाख ६० हजार बजेट विनियोजन गरेको छ । लुम्बिनी र प्रदेशभित्रका ऐतिहासिक, धार्मिक, सांस्कृतिक तथा पूरातात्विक महत्वका क्षेत्रको पहिचान, संरक्षण र सम्बद्र्धन गर्दै पर्यटन व्यवसायमा समेत टेवा पु¥याउने उद्देश्यले भ्रमण वर्ष मनाउन लागिएको हो । प्रदेशको समृद्धिका लागि सरकारले कृषि, उद्योग र पर्यटन क्षेत्रको विकासलाई प्रमुख आधारका रूपमा योजनाबद्ध रूपले कार्यक्रम अघि बढाएको प्रचार प्रसार समितिका सदस्य अमृत गिरीले बताए । पर्यटन क्षेत्रको विकासमा लुम्बिनी भ्रमण वर्ष महत्वपूर्ण हुने प्रदेश ५ सरकारको विश्वास छ । भ्रमण वर्षमा मुख्यतया लुम्बिनी क्षेत्र तथा बुद्ध सर्किटसँग सम्बन्धित तिलौराकोट, गोटिहवा, कुदान, निग्लिहवा, देवदह, अरौराकोट, सगरहवा, सिसहनियालगायतका क्षेत्रलाई लक्षित गरी कार्यक्रम सञ्चालन गरिने उपसमिति सदस्य सी.पी. खनालले जानकारी दिए । लुम्बिनी क्षेत्र तथा बुद्ध सर्किटसँग सम्बन्धित स्थानहरूको साथै नजोडिएका तर भारत हुँदै लुम्बिनी क्षेत्रमा पर्यटक भ्रमण गर्ने प्रमुख नाका बेलहियामा समेत विभिन्न कार्यक्रम गरिने उपसमिति सदस्य रुद्रहरि कुँवरले बताए । यस्तै, गौतमबुद्धको जीवनीसँग सम्बन्धित सडक प्रदर्शनी होटल तथा पर्यटन व्यवसायीमार्फत् सातवटै प्रदेश र भारतको कुशीनगर, बोधगया एवं लुम्बिनीको सीमा क्षेत्रमा समेत प्रवद्र्धनात्मक कार्यक्रम सञ्चालन गरिने छ । भ्रमण वर्षमा मायादेवी प्रसूति मार्ग घोषणा तथा प्रसूति उत्सव, लुम्बिनी फूड फेस्टिबल, सुजाता खीर उत्सव, लुम्बिनी मायादेवी मन्दिर परिसरमा दैनिक दीप प्रज्वलन, मासिक फूलमून डे उत्सव, धार्मिक यात्रा, त्रिपिटक वाचन, लुम्बिनी पिस म्याराथन लगायतका कार्यक्रम गरिने छ । २२ फागुनमा उद्योग, पर्यटन, वन तथा वातावरण मन्त्रालयको प्रस्तावमा मन्त्रिपरिषद् बैठकले पर्यटन प्रवद्र्धन गर्ने उद्देश्यले २०७६ लाई लुम्बिनी भ्रमण वर्षको रुपमा मनाउने निर्णय गरेको थियो । मायादेवी प्रसुति उत्सव महारानी मायादेवी सुत्केरी हुने बेला नजिकिदै गएपछि पहिलो सन्तानको जन्म दिन माइती जानुपर्ने त्यतिबेलाको परम्पराअनुसार उनी कपिलवस्तुको राजधानी तिलौराकोटबाट सुसारे, सेनासहित माइती देवदह प्रस्थान गरिन् । बाटोमा पर्ने मनमोहक लुम्बिनी बगैचामा विश्राम गरिन् । सोही क्रममा उनलाई बेथा लाग्यो । बगैचामा साल वृक्षको हाँगा समातेर सिद्धार्थलाई जन्म दिइन् । महारानी मायादेवीको कोखबाट बालक सिद्धार्थको जन्म भएको खबर सुनेर राजा शुद्धोधनले कपिलवस्तु राज्यमा महाउत्सव मनाउने घोषणा गरे । सोहीअनुसार लुम्बिनीमा कोलिय र शाक्य राज्यका भद्रभलाद्मीहरुको उपस्थिति भयो । कपिलवस्तु राज्यभरि सरसफाई गरियो, तुलब्यानर टाँगियो, बाजागाजा लगाउन लगाइयो, प्रत्येक घरअघि घडा राख्न लगाइयो, स्वागतद्वारहरु निर्माण भए । महारानी शिशु सिद्धार्थलाई लिएर लुम्बिनीबाट कपिलवस्तु फर्किदा हजारौं नागरिकहरु उत्सवमा सहभागी भए । त्यही महाउत्सवको झल्को दिने गरी बुद्धपूर्णिमाको अर्को दिन जेठ ५ गते प्रसुति उत्सव मनाइने छ । के हो सुजाता खीर उत्सव ? सिद्धार्थले गृहत्याग गरेपछि ६ वर्षसम्म महातपस्या गरे । धेरै गुरुको आश्रममा गएर सेवा गरे । एकपछि अर्को साधना गर्दै गए । तर अहंकारको तृप्त अर्थात दुःखको संसार समाप्त भएन । एक दिन गुरुले भने, ‘दिन–प्रतिदिन भोजन कम गर्दै जानु । जुन दिन भोजनमा एउटामात्र चामलको दाना रहन्छ, त्यो दिन ज्ञान प्राप्त हुन्छ ।’ सिद्धार्थले त्यही अनुसार गर्दै गए । छ महिनामा एउटा चामलको दानामात्र भोजन भयो । ज्ञान त प्राप्त भएन, तर शरीर पूर्णतया विनाश भयो । हड्डी र छालामात्र बाँकी रह्यो । उरुवेलको निरन्जना नदी तरेर भिक्षाटनमा जानुपर्ने थियो । नदी तर्न सकेनन्, बाटोमै ढले । हातखुट्टा फतक्क गल्यो । तब सिद्धार्थको चेतना खुल्यो, ‘मलाई यो के भयो ? भवसागर तर्ने उद्देश्यले सन्यास लिएको हुँ । तर आज यो सानो नदी पनि तर्न सकिन ?’ एक बिहान निरन्जना नदीमा स्नान गरेर सुजाताले दान गरेको खीर भोजन गरे । निराहार तपस्या बसेका गौतमबुद्ध कमजोर र जीर्ण भइसकेको अवस्थामा सुजाता नामक युवतीले खीर खुवाएपछि सोही राती ज्ञान प्राप्त भएको घटनालाई उत्सवको रुपमा मनाइने छ । लुम्बिनी भ्रमण वर्षका उद्देश्यहरू ० नेपाल सरकारबाट सन् २०२० लाइ भिजिट नेपाल वर्षका रुपमा मनाउन लागिएको कार्यक्रमलाई आधार प्रशस्त गर्ने । ० पर्यटन प्रवद्र्धन मार्फत समृद्धि हासिल गर्न टेवा पुर्याउने । ० यस क्षेत्रको धार्मिक, पर्यटकीय, साँस्कृतिक, पुरातात्विक एवम् ऐतिहासिक महत्वका स्थानहरूको पहिचान, संरक्षण, सम्वद्र्धन तथा व्यवस्थापनमा टेवा पुर्याउने । ० लुम्विनी आउने पर्यटकहरूको बसाई अवधि लम्ब्याउने । ० लुम्विनी क्षेत्रलाई सिद्धार्थ, कनकमुनि र क्रकुछन्द बुद्धको जन्मस्थल तथा बौद्ध दर्शन तथा शान्तिकोे उद्गम स्थलका रुपमा ब्यापक प्रचार गर्ने । ० लुम्विनीलाई केन्द्रमा राखेर प्रदेश नं ५ का महत्वपूर्ण पर्यटकीय गन्तब्यहरूको प्रचार–प्रसार र प्रबद्र्धन गर्ने । लुम्बिनी भ्रमण वर्ष कार्यक्रम २०७६ का विशेषताहरू १ लुम्बिनी भ्रमणवर्ष शुभारम्भ समारोह–२०७६ जेष्ठ ४ गते २.मायादेबी प्रसुति उत्सव—२०७६ जेष्ठ ५ गते ३. लुम्बिनी फुड फेष्टिबल ४.सुजाता खीर उत्सव ५. सडक प्रदर्शनी ६. मायादेवी मन्दिर परिसरमा दैनिक दीप प्रज्वलन ७ मासिक फूल मून डे (पूर्णिमा) उत्सव ८. धार्मिक यात्रा र त्रिपिटिक वाचन ९ योग तथा ध्यान शिविरहरू १०. स्थानीय उत्पादनहरूको बिक्रीकक्ष (कोसेली घर)को व्यवस्था अपेक्षित उपलब्धी ० राष्ट्रिय र अन्तराष्ट्रिय क्षेत्रमा लुम्बिनी क्षेत्रको प्रचार भई सो क्षेत्रको महत्व बढ्ने र बिकास हुने, ० लुम्बिनी क्षेत्रमा आउने पर्यटकको संख्या र उनीहरूकोे बसाई अवधिमा वृद्धि हुने , ० लुम्बिनी क्षेत्रका स्थानीय उत्पादन तथा ब्यापार ब्यवसायमा बृद्धि हुने, ० होटेल, ट्राभल एजेन्सी, यातायात लगायतका पर्यटन ब्यवसायको प्रबद्र्धन हुने, ० रोजगारीको सिर्जना हुने, ० प्रदेश सरकार र लुम्बिनी विकास कोष बीच समन्वय र सहकार्य भई यस क्षेत्रको पर्यटन प्रवद्र्धनमा सकारात्मक प्रभाव पर्ने ।

काठमाडौं, वैशाख ६ । त्रिभुवन विश्वविद्यालयले परीक्षाफल प्रकाशित गरेको छ । कानून संकाय तर्फको स्नातकोत्तर तह तेस्रो वर्षको परीक्षाफल प्रकाशन गरेको त्रिविले जनाएको छ । कानुन संकायमा उच्च तहसम्म अध्यन गर्ने विद्यार्थीहरुको संख्या कम देखिएको छ । परीक्षामा जम्मा ६३ जनाले भाग लिएकोमा २३ जना उर्तीण भएका छन् । जुन आधाभन्दा पनि धेरै थोरै हो । परीक्षाफल हेर्नको लागि यहाँ थिच्नुहोस्

काठमाडौंं, वैशाख ५ । सामना म्यूजिक क्रियशन प्रालिको आयोजनामा राष्ट्रिय साधना म्यूजिक अवार्ड २०७६को आवेदन फारम धमाधम वितरण भइरहेको छ। अग्रजलाई सम्मान नवलाई प्रोत्साहन, कला–गला तथा संस्कृति संरक्षणमा हाम्रो अभियान भन्ने मुख्य उद्देश्यका साथ आयोजना गर्न लागिएको साधना म्यूजिक अवार्डका कार्यक्रम संयोजक गौतम शेर्पाले बताए । नेपाली लोकगीत, आधुनिक, पप र लोक पप, डिजे गीत र राष्ट्रिय गीतलगायत ५० विधामा आवेदन फारम भर्न सकिने आयोजकले बताएको छ । २०७५ बैशाख १ गतेदेखि चैत मसान्तभित्र बजारमा आएका गीत संगीतका कलाकारले सो अवार्डमा सहभागिता जनाउन सक्ने सामना म्युजिक क्रियसनकी अध्यक्ष सामना शाहले बताए । गायक गायिकाको हकमा भने भिडियो तयार नभएपनि सहभागी हुन सक्ने भएका छन । फारम भर्ने अन्तिम मिति २०७६ बैशाख १५ गतेसम्म भर्न सक्ने ब्यावस्था मिलाइएको छ । आवेदन फारम अनामनगरस्थित सामना म्यूजिक क्रियसन प्रालिको कार्यालयबाट प्राप्त गर्न सकिने भएको छ । साथै फोन नं ९८०८८५३१०३ र ९८०८४७८७९९ मा सम्पर्क गर्न सकिने व्यवस्था गरिएको सामना म्यूजिक क्रियसन प्रालीका सदस्य सचिव गोकर्ण लामिछानेले बताए ।

काठमाडौं, चैत १० । चर्चित हास्य टेलिश्रृखला ‘मेरी बास्सै’ बन्द हुने भएको छ । मिडिया हबसँग विभिन्न कुरा नमिलेपछि ‘मेरी बास्सै’ बन्द हुने भएको हो । टेलिश्रृखलाका मुख्य कलाकार मरीचमान श्रेष्ठ ‘बल्छ’ ले फेसबुकमार्फत मेरी बास्सै बन्द हुने जानकारी दिएका छन् ।

काठमाडौं, माघ १८ । यूएई विरुद्धको टी ट्वान्टी अन्तर्राष्ट्रिय क्रिकेट सिरिजको दोस्रो खेलमा नेपालले शानदार शुरुवात गरेको छ । नेपालले तीन ओभर नसकिदै नेपालले दोस्रो सफलता प्राप्त गरेको छ । दोस्रो विकेट पनि सोमपाल कामीले नै लिएका छन् । उनले आफ्नो दोस्रो ओभरको तेस्रो बलमा गुलाम सबीरलाई क्याच आउट गराए । नेपालले आज टस हारेर बलिङको निम्तो पाएको छ । आजको खेलम दुई जना खेलाडी परिवर्तन भएका छन् । टिमबाट रोहितकुमार पौडेल र बसन्त रेग्मी आउट हुदा ललितनारायण राजवंशी र पवन सर्राफ टिममा परेका छन् । पवनको यो टी-ट्वान्टी क्रिकेटमा डेब्यु पनि हो । तीन खेलको टी-ट्वान्टी सिरिज अन्तर्गत नेपालले दोस्रो खेलमा आज युएईसँग प्रतिस्पर्धा गर्न लागेको हो । पहिलो खेलमा यूएईसँग २१ रनले पराजित भएको नेपाललाई आजको खेलमा जित्नै पर्ने दबाब छ । आईसीसी क्रिकेट एकेडेमीमा हुने खेलमा नेपाल जित हात पार्ने लक्ष्यमा हुनेछ ।

काठमाडौंँ, माघ ८ गते । भक्तपुरको ठिमी र ललितपुरको लगनखेलबाट केही दिनअघि प्रहरीले ड्रोन जफत ग¥यो र उडाउने व्यक्ति नियन्त्रणमा परे ।  महानगरीय प्रहरी परिसर भक्तपुरका अनुसार, पक्राउ व्यक्तिले घरमा लगाइएको पूजाको भिडियो खिच्न सम्वन्धित निकायको स्वीकृति नलिई ड्रोन उडाएको बयान दिए । त्यस्तै लगनखेलमा भने त्यतिकै शोखका लागि छतमा बसेर अरूलाई ड्रोन उडाउन सिकाइरहेको अबस्थामा प्रहरीले एक जनालाई पक्राउ गरेको थियो । ड्रोन आयात गर्नुभन्दा उडाउन स्वीकृति लिन झन्झटिलो भएकाले आफूखुशी उडाइएको भनाई ती ड्रोन चालकको छ ।  त्यस्तैं, स्वीकृति नलिइ ड्रोन उडाएको भन्दै सोलुखुम्बुबाट पनि प्रहरीले केही दिनअघि एक विदेशीलाई नियन्त्रणमा लिएको थियो । तर, ती विदेशीले ड्रोन उडाउनका लागि स्वीकृति लिनुपर्छ भन्ने ज्ञान नहुँदा गल्ती भएको स्वीकारेपछि नउडाउने शर्तमा उन्मुक्ति पाए । गृह मन्त्रालयका अनुसार, नेपाली आकासमा ड्रोन उडानसम्वन्धी कार्यविधि झन्झटिलो हुँदा स्वीकृत नलिई आफूखुशी ड्रोन उडाउने समस्या बढ्दै गएको छ । शान्तिसुरक्षाका दृष्टिकोणले संवेदनशील ड्रोन आपराधिक गतिविधिमा प्रयोग हुन सक्ने सम्भावना प्रवल छ ।  गृहका प्रवक्ता रामकृष्ण सुवेदीले ड्रोनक्यामेराको बढ्दो प्रयोगसँगै उडान कार्यविधि नै परिवर्तन गर्नुपरेको बताउनुहुन्छ । ‘विवाह–ब्रतवन्धदेखि चलचित्रको भिडियो खिच्न ड्रोन क्यामेराको प्रयोग गर्ने गरेको देखियो’ उहाँले भन्नुभयो– उडान कार्यविधि कसिलो र झन्झटिलो हुँदा आफूखुशी उडाउने समस्या बढ्यो ।  यसरी, आफूखुशी ड्रोन उडाउँदा हवाईस्थल, विशिष्ट ब्यक्तिको शान्तिसुरक्षामा असर पर्नुका साथै सर्वसाधारण समेत त्रास हुने गरेको भनाइ प्रहरीको छ । ड्रोन सजिलैसँग ल्याउन पाउने तर, उडान गर्न गृह मन्त्रालय, नागरिक उड्डयन प्राधिकरणदेखि पुरातत्व विभागसम्मको स्वीकृति लिनुपर्ने ब्यवस्था रहेको छ ।  उक्त कार्यविधि पूरा गर्न कम्तिमा महिना दिन लाग्ने गरेको सेवाग्राही बताउँछन् । सम्पर्क तथा पहुँच भएकाले स्वीकृति नै लिन्छन् नभएकाले आफूखुशी उडाउँछन् । ड्रोन क्यामेराको प्रयोग आफैमा नराम्रो भने होइन, एक सुरक्षा अधिकारीले भन्नुभयो– तर, दुरुपयोग हुनसक्छ ।  यही समस्यालाई समाधान गर्न ड्रोन उडाउनका लागि स्थानीय निकायबाट नै स्वीकृति पाउने गरी कार्यविधि निर्माण भइरहेको जानकारी गृह प्रवक्ता सुवेदीले दिनुभयो । गृह, सञ्चार तथा सूचना प्रविधि, पर्यटन तथा नागरिक उड्डयन, वातावरण, वन्यजन्तु, राष्ट्रिय निकुञ्ज, पुरातत्व विभाग लगायत सरकारका विभिन्न निकायबाट सिफारिसपत्र ल्याउनुपर्ने हुन्छ । सोही सिफारिस कागजपत्रका आधारमा गृह मन्त्रालयले ड्रोन उडाउन स्वीकृति दिने गर्छ ।  पुरातात्विक, धार्मिक तथा सांस्कृतिक सम्पदा, राष्ट्रिय निकुन्ज, सुरक्षा निकायका कार्यालय, हवाईस्थल, प्रशासनिक भवन लगायतका स्थानमा ड्रोन उडाउन प्रतिवन्ध गरिएको छ । तर, कतिपयले आफूखुशी सामरिक स्थानमा समेत ड्रोन उडाउने गरेकाले नियन्त्रणमा लिई जफत गर्ने गरिएको हो ।  गृह मन्त्रालयका अनुसार, ड्रोन उडाउन स्वीकृतिका लागि महिनामा करीब २५ भन्दा बढी निवेदन पर्ने गरेका छन् । कार्यविधि सजिलो बनाइएमा यो सङ्ख्या बढ्न सक्ने भनाइ मन्त्रालयको छ । स्वीकृति लिएर उडाउँदा दुर्घटना नहुन सक्छ, महानगरीय प्रहरी परिसर काठमाडौंँका प्रमुख वसन्त लामा भन्नुहुन्छ–गलत कार्यमा पनि प्रयोग हँुदैन ।  ड्रोन क्यामेरा भित्र्याउन सामान्यतया ड्रोन चालक अनुमतिपत्र भए पुग्ने गरेको देखिन्छ । सोही अनुमतिपत्रका आधारमा ब्यक्ति तथा संस्थाले विभिन्न प्रयोजनका लागि ड्रोन क्यामेरा भित्र्याउने गरेका छन् ।  विकसित मुलुकमा ड्रोन क्यामेराको प्रयोग गरी विशिष्ट ब्यक्तिमाथि आक्रमणका साथै सामरिक सम्पदाको तस्वीर लिने, सुरक्षा संरचनामाथि निगरानी राख्ने र चोरीजन्य अपराध बढेसँगै नेपालमा पनि ड्रोनको दुरुपयोग हुन नदिन नयाँ कार्यविधि ल्याउन लागिएको मन्त्रालयले जनाएको छ । -देव कुँवर/गाेरखापत्र

नेपाली सेनाले नेपाल प्रहरीलाई हस्तान्तरण गरेका १० वटा घोडा मध्ये तीनवटा मरिसकेका छन् भने ६ वटा विविध कारणले काम लिन नसकिने अवस्था छन्। प्रहरीसँग रहेका १३ वटा घोडामध्ये चारवटा मात्र ‘ड्यूटी’ गर्न सक्ने अवस्थामा रहे पछि अन्य घोडा पाल्न आर्थिक भार परेको गुनासो प्रहरी अधिकारीहरूको छ। सडकमा अत्यधिक चाप हुने समयमा निश्चित चोक, सार्वजनिक स्थान तथा विशेष चाडपर्वका अवसरमा जम्मा हुने भिड नियन्त्रण गर्न ट्राफिक प्रहरीले घोडाको प्रयोग गर्दै आएको छ। २०७२ सालको कार्तिक महिनामा १७ वर्ष उमेरसम्मका १० घोडाहरू सेनाले ट्राफिक व्यवस्थापन प्रयोजनका लागि प्रहरीलाई हस्तान्तरण गरेको थियो। घोडा पाल्ने खर्चै चर्को प्रहरीसँग रहेका घोडाहरूको परिचालन, रेखदेख र प्रशिक्षणका लागि १८ जना खटिएका छन्। माउण्टेड भनिने घोडचढी प्रहरी शाखाका हवल्दार रामहरी कोइरालाले भने, “१३ घोडालाई दानापानी, स्याहार-सुसार, तालिम तथा व्यायाम गराउनुपर्छ। तर प्रयोग गर्न ४ घोडाहरूमात्र तयार छन्।” उनका अनुसार हरेक दिन प्रत्येक घोडालाई झण्डै साढे दुई किलो चना, डेढ केजी जौ, र एक केजी चोकर खुवाउनुपर्छ। झण्डै १९ केजी सुकेको घाँस सोत्तरको रुपमा प्रयोग हुन्छ। त्यसका अतिरिक्त प्रतिमहिना एक घोडालाई दुई जोर टाप लगायतका अन्य सामग्रीको पनि आवश्यक पर्छ। काठमाण्डू उपत्यकाको ट्राफिक व्यवस्थापनमा वर्षौदेखि प्रयोग हुँदै आएका घोडाहरूलाई महानगरीय ट्राफिक महाशाखा रामशाहपथमा राखिँदै आएको थियो। तर स्थान अभावका कारण हाल रानीबारीमा २० क्षमताको नयाँ घोडा कवल निर्माण गरि उक्त घोडाहरूलाई सारिएको महाशाखाले जनाएको छ। घोडाका ड्युटी प्वाईन्ट १३ मध्ये ४ घोडा मात्र ट्राफिक व्यवस्थापनामा खटिन सक्ने अवस्थामा रहेपछि प्रहरीले हाल ‘ड्युटी प्वाईन्ट’ अर्थात् खटिने स्थानहरू समेत कटौती गरेको छ। प्रहरी हवल्दार कोइरालाका अनुसार पहिले सुन्धारा, भोटाहिटी, नयाँ बानेश्वर, कोटेश्वर र कालिमाटी लगायतका क्षेत्रमा खटिने घोडा हाल सुन्धारा र भोटाहिटीमा मात्र सीमित बनेका छन्। नयाँ बनेको घोडा कवल रानीबारीमा भएपछि ट्राफिक व्यवस्थापनको अवधि समेत घटेको घोडचढी प्रहरीहरूको अनुभव छ। “विगतमा साढे दुई घण्टासम्म काम गर्ने घोडाहरु हाल एक-डेढ घण्टामात्रै काम गर्न सक्छन् र आउजाउमै दुईघण्टा खर्च हुन्छ,” एक प्रहरी जवानले भने। हाल प्रहरीसँग रहेका घोडाहरु अस्वस्थ, अशक्त र घाइते नभएको भए उपत्यकाको ट्राफिक व्यवस्थापन थप चुस्त हुने बुझाइ स्वयम् प्रहरीको छ। भोटाहिटीमा खटिएका प्रहरी हवल्दार मधुकर कँडेल भन्छन्, “१०-१२ जना प्रहरीले गर्ने ट्राफिक व्यवस्थापन एउटा घोडाको सहयोगमा गर्न सकिन्छ।” घोडाबाट टाढासम्म सडक अनुशासन पालना गरे नगरेको अवलोकन गर्न सकिने, घोडाको उपस्थितिले सडक प्रयोगकर्ता तथा पैदलयात्री केही संयमित रहने लगायतका कारणले पनि ट्राफिक व्यवस्थापन सहज हुन्छ। -बिबिसी नेपालीबाट

काठमाडौं, पुस २६ । महानगरीय अपराध महाशाखाले विदेश पठाइदिने भन्दै रु एक करोड ५० लाख ठगी गर्ने एक जनालाई पक्राउ गरेको छ । पुतलीसडकमा गेट्स कन्सल्टेन्सी सञ्चालन गरी अष्ट्रेलिया, क्यानडा लगायतका मुलुक पठाइदिने भन्दै २० जनाभन्दा धेरै व्यक्तिसँग रु एक करोड ५० लाख ठगी गर्ने पाल्पाका ३४ वर्षीय गणेश ढकाललाई बुधबार दिउँसो महाशाखाको टोलीले पक्राउ गरेको हो । महाशाखाका प्रवक्ता नरेन्द्रप्रसाद उप्रेतीले भक्तपुरको सूर्यविनायक बस्ने आभाष खनाललाई क्यानडा पठाइदिने भन्दै रु सात लाख ठगी गरेको उजुरीका आधारमा ढकाललाई पक्राउ गरिएको जानकारी दिए । ढकालले ठगी गरेको पैसा खनालले मागेपछि खाली चेक दिएकाले उनलाई बैंकिङ र ठगी कसुर अन्तर्गत अनुसन्धान भइरहेको प्रवक्ता उप्रेतीले बताए ।

रूपन्देही — प्रदेश सभा र मन्त्रालयले गाडी खरिदमा चलखेल गरेको सार्वजनिक भएपछि प्रदेश ५ सभाको सार्वजनिक लेखा समितिले गम्भीर चासो देखाउँदै छानबिनका लागि फाइल झिकाएको छ । समितिले सचिवालय र मन्त्रालयका गाडी खरिद सम्बन्धमा छलफल गर्न शुक्रबार अकस्मिक बैठक बोलाएको छ । त्यही बैठकमा आइपुग्ने गरी सचिवालय र मन्त्रालयका सवारी साधन खरिद सम्बन्धी सबै फाइल मगाएको हो ।  गाडी खरिदमा देखिएको आर्थिक चलखेलका विषयमा गम्भीर छलफल गर्न सांसदले माग गरेका छन्। प्रदेश सभा सचिवालयदेखि मन्त्रालयसम्मका गाडी खरिदमा चलखेल भएको सार्वजनिक भएपछि गम्भीर ध्यानाकर्षण भएको लेखाले जनाएको छ। छानबिनका लागि आकस्मिक बैठक बोलाइएको सार्वजनिक लेखा समितिका सभापति डिल्लीबहादुर चौधरीले बताए। ‘बडो लज्जाको विषय भयो, मैले इमर्जेन्सी बैठक बोलाइसकेँ,’ उनले भने, ‘बैठकमा छलफल हुन्छ र विज्ञ सहितको छानबिन टोली बनाइन्छ।’ प्रदेश सभा सचिवालयले प्रमुख सचेतक, विपक्षी दलका नेतादेखि विषयगत समितिका सभापतिले प्रयोग गर्ने गरी १३ वटा गाडी किनेको छ। तीमध्ये ११ वटा टाटा कम्पनीका सफारी स्ट्रोम गाडी छन्। आन्तरिक मामिला तथा कानुन मन्त्रालय बाहेक सबैले टाटाको सफारी स्ट्रोम खरिद गरेका छन्। बजार मूल्यभन्दा ४ देखि ५ लाखसम्म बढी मूल्यमा गाडी खरिद गरेको देखिएपछि आर्थिक चलखेल गरिएको आशंका छ। टाटाको आधिकारिक बिक्रेता सिप्रदी ट्रेडिङ मार्फत किनिएका गाडीको बजार मूल्य ७३ लाख ५५ हजार उल्लेख छ। त्यसमा नगद छुट गरेर स्थानीय बिक्रेता सफल अटो इन्टरनेसनलले ६८ लाख ५५ हजारमा उपभोक्तालाई उपलब्ध गराउँदै आएकोमा सचिवालय र मन्त्रालयले ७१ लाख ९४ हजार ९ सय ९९ रुपैयाँदेखि ७२ लाख ९९ हजारसम्ममा खरिद गरेका हुन्। ७ मन्त्रालय र सचिवालयले यो वर्ष ३२ भन्दा बढी गाडी किनेका छन्। त्यसमा २५ करोडभन्दा बढी खर्च भएको छ। सर्वसाधारण र संघसंस्थाले खरिद गर्ने यही गाडीको पहिलो वर्षको ५५ हजार मूल्यको बिमा र आन्तरिक सजावटको झन्डै ४० हजारको खर्च कम्पनी आफैँले गर्छ। सचिवालय र मन्त्रालयले खरिद गरेका गाडीको त्यो खर्च भने खरिदकर्ताले गर्ने सम्झौता छ। त्यसले प्रतिगाडी झन्डै ४ लाख ४० हजारदेखि ५ लाख ४४ हजारसम्म आर्थिक चलखेल भएको देखिएको सभापति चौधरीले बताए। बिग्रिन थाले चालक र बिक्रेताका अनुसार सफारी टाटा स्ट्रोम भारतमा असफल भइसकेको गाडी हो। नेपालका तराई क्षेत्रका सडक लक्षित भए पनि प्रदेश ५ का पहाडी जिल्लामा समेत सभापति र मन्त्री त्यही गाडी चढेर जाने गरेका छन्। चढ्न थालेको एक महिनामै गाडी बिग्रिएका छन्। सभापति चौधरी चढ्ने गाडी तराईमै गुडाउँदा पनि बिग्रिएको छ। सामाजिक विकासमन्त्री सुदर्शन बराल रोल्पा पुगेर फर्कने क्रममा पछाडिको बम्पर उछिट्टियो। त्यस्तै भूमि, व्यवस्था, कृषि तथा सहकारीमन्त्री चढेको गाडी नेपालगन्जमा भैंसीको पाडोसँग ठोक्किँदा अगाडिको बम्पर खस्यो। चालकले समेत टाटा सफारी स्ट्रोम गाडी स्कोर्पियोको तुलनामा कमसल भएको बताएका छन्। दुईथरी मूल्य प्रदेश सरकारले तयार गरेको कार्यविधिमा सचिवका लागि ५५ लाख र मन्त्री एवं सभापतिका लागि ७५ लाख रुपैयाँसम्मको गाडी खरिद गर्नसक्ने उल्लेख छ। त्यही कार्यविधिलाई आधार बनाएर मन्त्रालय र सचिवालयले टेन्डर मार्फत सार्वजनिक खरिद ऐनअनुसार गाडी किनेका हुन्। प्रक्रिया पूरा गरिए पनि आर्थिक चलखेल भएको सत्तापक्षकै एक सदस्यले बताए। ‘हामी बोल्न मिल्दैन, कम्युनिस्ट सरकारकै बदनाम गर्ने गरी चलखेल भयो,’ उनले भने, ‘कार्यविधि निर्माणदेखि खरिद गर्दासम्म सबै प्रक्रिया मिलाएकाले छानबिनबाट पनि केही हुने देखिन्न।’ नेकपाका प्रमुख सचेतक भूमिश्वर ढकालले गाडी खरिद र सम्झौतामा आफ्नो संलग्नता नभएको बताएका छन्। उनले प्रदेशसभा र मन्त्रालयले गरेको खुला टेन्डर आहवानअनुसार इ–बिडिङमार्फत सिप्रदीसँग कारोबार भएको बताए। ‘मेरो कुनै संलग्नता छैन, बदनाम गरियो,’ उनले भने, ‘ई–बिडिङ, सम्झौता र भुक्तानीमा समेत स्थानीय बिक्रेता सफल अटो इन्टरनेसनलको संलग्नता छैन।’ सफल अटोमा उनीसहित अन्य तीन जनाको लगानी छ। याे समाचार कान्तिपुर दैनिकमा प्रकाशित छ ।

इलाम, पुष २४ । डा. गोविन्द केसीले भोलिदेखि इलाममा अनशन शुरु गर्ने चेतावनी दिएका छन् । सदरमुकाम इलाम बजारमा मंगलबार सञ्चारकर्मीसँग कुरा गर्दै डा. केसीले संसदीय उपसमितिले १५ औं सत्याग्रहको उपलब्धिस्वरुप राज्यसँग भएको सहमति लत्याएकाले इलाममा १६ औं सत्याग्रह गर्ने चेतावनी दिएका हुन् । उनले लेखा समितिको उपसमितिको सिफारिशमा पुनरावलोकन गर्दै आफूहरुसँग भएका सहमति सरकारले अक्षरश पालना गर्नु पर्ने धारणा राखे । अबको सत्याग्रह स्वास्थ्य क्षेत्रसँग मात्र सम्बन्धित नरही कुशासनका विभिन्न पक्षविरुद्ध हुने केसीले बताए । यसअघि सम्झौता कार्यान्वयन नभएको भन्दै डा. केसी पुस १७ देखि अनशन बस्न इलाम आएका थिए । तर, संसदीय उपसमितिले २ दिनको समय माग गरेपछि उनले ७ दिनको समय दिएका थिए । यो अवधिमा पनि माग पूरा नभएको भन्दै पुनः सत्याग्रहका लागि उनी आजै इलाम आएका हुन् । डा. केसी लामो समयदेखि स्वास्थ्य शिक्षा र सेवामा सूधारको माग राख्दै आन्दोलनरत छन् ।

काठमाडौं, पुस २३ । पूर्वाञ्चल विश्वविद्यालय अन्तर्गतको ब्याचलर इन पब्लिक हेल्थको स्नातक तहको चौथो सेमेस्टरको उत्तर पुस्तिका आर्थिक लेनदेनका आधारमा जाचिएको तथ्य खुलेको छ । महानगरीय प्रहरी परिसर काठमाडौंले उत्तर पुस्तिका जाँच्ने लेक्चरर खेमराज शाहीले अर्का लेक्चरर अर्जुन भाटले विद्यार्थीसँग पैसा उठाएर कपी जाँचेको भन्दै पक्राउ गरेको छ । परिसरले आर्थिक लेनदेनका आधारमा नम्बर तय गरिएको यो मुद्दामाथि थप छानविन गर्न अनुसन्धानको फाइल अख्तियार दुरुपयोग अनुसन्धान आयोग पठाएको छ। कीर्तिपुर नेशनल आर्युवेद रिसर्च एण्ड ट्रेनिङ सेन्टरमा विशेषज्ञको हैसियतमा कार्यरत शाही काठमाडौं लिटिल एन्जल्स कलेज, भ्याली कलेज र एसियन कलेजको व्यवस्थापन संकायमा क्वान्टिटेटिभ टेक्निक्स पनि पढाउँथे। पूर्वाञ्चल विश्वविद्यालयसम्बद्ध कलेजहरुमा पढाउने भएका कारण उनले पब्लिक हेल्थको २ सय ९२ थान उत्तर पुस्तिका जाँच गर्ने जिम्मा पाएका थिए। शाहीले पूर्वाञ्चल विश्वविद्यालय सम्बद्ध कलेजहरुमा पढाउने साथी अर्जुन भाटलाई आफूले ल्याएका उत्तर पुस्तिका दिएर ती उत्तर पुस्तिका विद्यार्थी खोज्ने जिम्मा दिएका थिए। प्रहरीका अनुसार यी दुवैले मिलेमतोमा विद्यार्थी पहिचान गर्ने, उनीहरुसँग पैसाको बार्गेनिङ गर्ने र पैसा पाएपछि उत्तर पुस्तिकाको खाली भागमा उत्तरहरु थपेर विद्यार्थीलाई पास गराइदिने काम गर्थे। अनुसन्धानका क्रममा भाटले कपीको फोटो खिचेर विद्यार्थीहरुको पहिचान गर्दै भाइबारबाट पठाउँथे। अक्षर चिनेर विद्यार्थीहरुले आफ्नो कपी पहिचान गर्थे। त्यसपछि मात्रै उनीहरुबिच बार्गेनिङ सुरु हुन्थ्यो। अनुसन्धानका क्रममा प्रहरीले शाही र भाट दुवैको मोबाइल जफत गरेर मोबाइलमा भएका तस्बिर र सन्देशहरु जाँच गरेको थियो। उनीहरु दुवैको कल डिटेल हेर्दा विद्यार्थीसँग बारम्बार सम्पर्क भएको देखिन्छ। पैसा लिएर जाँचिएको कपी दुई साता भन्दा अघि नै जाँचेर पूर्वाञ्चल विश्वविद्यालय पठाइसकिएको थियो। प्रहरीले विश्वविद्यालयसँग समन्वय गरेर सिलबन्दी रहेका कपी झिकाएको थियो। प्रहरीले कपीका हेन्डराइटिङ जाँच गर्न प्रहरी प्रधान कार्यालयको फरेन्सिक डिर्पाटमेन्टमा पठाएको थियो। फरेन्सिक जाँचमा विधार्थीको सक्कली लेखन र उत्तर पुस्तिकाको पछिल्ला पानामा रहेको अक्षर फरक रहेको र ती अक्षरहरु फरक–फरक समयमा लेखिएको देखियो। प्रहरीका अनुसार पैसाको सोझो डिल गर्ने जिम्मा भाटले लिएका थिए। सुरुवाती अनुसन्धानका क्रममा उनीहरुकरिब २५ जना विद्यार्थीसँग रकम उठाएको देखिन्छ। अनुसन्धानमा संग्लन एक अधिकारीका अनुसार अघिल्लो वर्ष पनि उनीहरुले यसैगरी विद्यार्थीबाट पैसा लिएर नम्बर चढाएका थिए। प्रहरीले किर्तीपुरस्थित निवासबाट शाहीलाई नियन्त्रणमा लिएको थियो। प्रहरी परिसर काठमाडौंका प्रवक्ता डिएसपी होविन्द्र बोगटीका अनुसार बयानका क्रममा शाहीले आरोप स्वीकार गरेको बताएका छन्। बोगटीले भने, ‘यो अख्तियारको अनुसन्धानको कार्यक्षेत्र भएकाले थप अनुसन्धानका निम्ती फाइल बुझाएका छौं।’ कान्तिपुर दैनिकबाट

कायरो, पुस २२ । इजिप्टमा शनिबार एक चर्चको बाहिरी इलाकामा रहेको विस्फोट पदार्थ निष्क्रिय गर्ने क्रममा एक प्रहरीको मृत्यु भएको सुरक्षा स्रोतले जानकारी दिएको छ । इजिप्टको कायरो शहरको सीमा इलाकामा रहेको नासर शहरमा अवस्थित चर्चको बाहिरी इलाकामा रहेको उक्त विस्फोट पदार्थ निष्क्रिय गर्ने क्रममा भएको विस्फोटमा परी अन्य दुई प्रहरी घाइते भएका प्रहरी अधिकारीहरुले जानकारी दिएका छन् । एउटा झोलामा लुकाएर राखिएको सो विस्फोट पदार्थ प्रहरीले फेला पारेका थिए । सो झोलामा रहेको बम फेला पार्ने मुस्ताफा आबिद नाम गरेका ती प्रहरीले बम निष्क्रिय कार्यका विषेशज्ञ थिए । उनी नै सो बम निष्क्रिय बनाउने क्रममा मारिएका हुन । इजिप्टको जनसङ्ख्यामा १० प्रतिशत रहेका क्रिश्चियन समूदायमाथि बारम्बार इस्लिामिक स्टेट्स (आइएस) लडाकू ) समूहले आक्रमण गर्दै आएका छन् । सोही कारण अहिलेको राखिएको विस्फोटक पदार्थमा पनि उनै समूहको हात हुनु पर्ने प्रहरीको अनुमान रहेको छ । रासस

काठमाडौं, पुस २२ । साताको पहिलो दिन आइतबार कारोबार भएको दोस्रो घण्टाको अवधिमा नेप्से परिसूचक शून्य दशमलव ३१ प्रतिशतले घट्न पुगेको छ । कारोबार भएको एक घण्टासम्म बढेको परिसूचक सोपछि ३ दशमलव ६४ अंकले घटेर १ हजार १ सय ७४ दशमलव ३७ विन्दुमा पुगेको छ । यस अवधिसम्म १ सय २० कम्पनीको रू.१० करोड बराबरको शेयर कारोबार भएको छ । नौ समूहको परिसूचकमा वित्त, उत्पादन तथा प्रशोधन र ‘अन्य’ समूहको परिसूचक बाहेक बाँकी समूहको परिसूचक घटेपछि नेप्से परिसूचक घट्न पुगेको हो ।

नयावर्ष २०१९ को अवसर पारेर लामो समय नेपाली गीत–संगीत तथा चलचित्रमा निरन्तर संघर्ष गरी रहेका गायक, नायक शंकर लामिछानेको हिन्दी गीत ‘हर लम्हा’को म्युजिक भिडियो सार्वजनिक भएको छ। स्वयं लामिछानेको शब्द, संगीत रहेको उक्त गीतमा भारतका पाशर्व गायक निलेश सिंह र सहेवाको आवाजमा रहेको ‘हर लम्हा’ गीतमा गायक तथा नायक शंकर लामिछाने र नेपाली चर्चित नायिका मरिस्का पोखरेलको दमदार अभिनय देख्न सकिन्छ। कुस्माज़ इन्टरटेनमेन्टको प्रस्तुति रहेको उक्त भिडियोलाई नेत्र गुरुङले निर्देशन, मिलन शंकरको छायांकन र सम्पादन नेत्र गुरुङले गरेका छन् । हेर्नुहोस् भिडियो–