विर्तामोडको कर्फ्यु हट्यो
विर्तामोड, कात्तिक १२ । झापाको विर्तामोड बजार क्षेत्रमा स्थानीय प्रशासनले लगाएको कर्फ्यु हटाएको छ । बालकको रहस्यमय मृत्युलाई लिएर भएको प्रदर्शन हिंसात्मक भएपछि त्यसको नियन्त्रणका लागि भन्दै स्थानीय प्रशासनले झापाको बिर्तामोडमा लगाएको कर्फ्यु हटाएको छ । आइतबार राती ९ देखि १२ घण्टाका लागि हटाएको हो । अर्जुनधारा नगरपालिकाका ११ वर्षीय लक्ष्मण सिवोकाटीको हत्यामा संलग्नलाई कारबाहीको माग गर्दै आफन्त तथा स्थानीयबासीले गरेको प्रदर्शन हिंसात्मक बन्न नदिन भन्दै प्रशासनले शुक्रवार दिउँसो साढे एक बजेबाट बजार क्षेत्रमा कर्फ्यु लगाएको थियो । सोमबार विहानसम्मको अवस्थालाई हेरी कर्फ्यु थप गर्ने नगर्नेबारे निर्णय गर्ने प्रशासनले बताएको छ । कफ्र्यु तोड्दै भएको प्रदर्शनमा प्रहरीले गोली चलाउदा अर्जुनधाराका नरेश थापाको मृत्यु भएको थियो भने ६ जना घाइतेको अवस्था गम्भीर छ ।
