राणाले चन्दलाई उच्छृंखल र अनियन्त्रित भनेपछि…
काठमाडौं, फागुन ७ । राष्ट्रिय प्रजातन्त्र पार्टीका शीर्ष नेताहरूले आगामी निर्वाचनमा पहिलो र वैकल्पिक राजनीतिक शक्ति बन्ने दाबी गरेका छन् । शुक्रबार पार्टी एकता महाधिवेशनको उद्घाटनमा शीर्ष नेताहरूले समकालीन ठूला दलहरू चुक्दै आएको भन्दै अबका तीनवटा निर्वाचनबाट राप्रपालाई पहिलो शक्तिमा स्थापित गर्ने दाबी गरेका हुन् । अध्यक्ष कमल थापाले दुई पार्टी एक भएपछि अब भरपर्दो र विश्वासिलो दल मुलुकले पाएको बताए । राष्ट्रिय अध्यक्ष डा. प्रकाशचन्द्र लोहनीले ठूला दलका कारण मुलुक संकटतर्फ धकेलिँदै गएको आरोप लगाउँदै राप्रपाले अब देश बनाउने दाबी गरे । पूर्वराष्ट्रिय अध्यक्ष पशुपतिशमशेर राणाले इमानदार भएर काम गरेमा राप्रपालाई चुलीमा पुर्याउन सकिने बताएका थिए । पूर्वअध्यक्ष राणाले दुई पार्टी एक भएर ०५१ मा चुनावमा गए पनि चन्द पक्षले उच्छृंखलता र अनियन्त्रित व्यवहार देखाएको आरोप लगाए । ‘०५१ मा दुई राप्रपा एक हुँदा हामी तेस्रो पार्टी भयौँ । दुईपटक सरकारको नेतृत्वमा पनि पुग्यौँ,’ राणाले स्मरण गरे, ‘जब हामी मिल्छौँ जनताले विश्वास गर्छन् । हामी फेरि एक भएका छौँ, अब दुई र दुई मिलेर चार होइन, २२ बन्ने वेला आएको छ, यसका लागि हामी एक हुनुपर्छ । चुनाव जितेर सरकारमा जाने, तर संसद्मा उच्छृंखलता र अनियन्त्रित व्यवहार देखाउने जस्तो व्यवहार अब कदापि नदेखाउँ ।’ राणालगत्तै बोलेका नेता चन्दले आरोपको खण्डन गरे । ‘म राणाजीको सहयोगमा प्रधानमन्त्री बनेको हुँ, तर उहाँ (राणा) ले आरोप लगाएजस्तो भएको म मान्दिनँ,’ चन्दले भने, ‘म चारपटक प्रधानमन्त्री भएँ । तपाईंहरूको आशीर्वाद पाए फेरि प्रधानमन्त्री बनुँला । आजको नयाँ पत्रिकामा खबर छ ।
