बुटवल, माघ २२। राष्ट्रपति विद्यादेवी भण्डारीले शिक्षाबिना देश विकास हुन नसक्ने बताएकी छिन् । रुपन्देहीको ग्रामीण क्षेत्रमा रहेको हरैया माध्यमिक विद्यालयको स्वर्ण महोत्सव समारोहमा बोल्दै राष्ट्रपति भण्डारीले शिक्षा क्षेत्रको विकासका लागि राज्यले लगानी वृद्धि गनुपर्नेमा जोड दिइन् । शिक्षाले नै देशमा आमूल परिवर्तन ल्याउन सक्ने तथा राष्ट्रिय विकासको प्रमुख आधार शिक्षा भएकोले मुलुकको दिगो विकासका लागि शिक्षामा लगानी वृद्धि गर्न आवश्यक रहेकामा उनले बताइन् । शान्ति, विकास र आपसी भातृत्वलाई शिक्षाले प्रभाव पार्ने भएकाले बालबालिकालाई यसै किसिमको शिक्षा प्रदान गर्नुपर्ने राष्ट्रपति भण्डारीले बताइन् । देशको अधिकांश विद्यार्थीहरूको पढ्ने सामुदायिक विद्यालयको गुणस्तर सुधार गरी रोजगारमूलक शिक्षा प्रदान गर्न आवश्यक रहेको उनले बताइन् । राष्ट्रपति भण्डारीले भनिन्, ‘राज्यले कूल बजेटको जम्मा ४.५ प्रतिशत रकम मात्र शिक्षा क्षेत्रमा बिनियोजन गरेको अवस्थामा व्यावहारिक र जीवनोपयोगी शिक्षामा राज्यले लगानी बढाउन आवश्यक छ ।’’

काठमाडौँ, माघ २१। शिक्षामन्त्री धनीराम पौडेलले अस्थायी शिक्षकको माग सम्बोधनका आफ्नो तर्फबाट पहल गरिरहेको बताएका छन् । अस्थायी शिक्षक आन्दोलन केन्द्रीय समितिले ध्यानाकर्षण गराउँदा मन्त्री पौडेलले मागलाई सम्बोधन गराउन राजनीतिक सहमतिको प्रयास गरिने बताए । समितिले प्रक्रिया पूरा गरी स्थायी गराउन कानुनी प्रबन्ध गरिनुपर्ने माग अघि सारेको छ । मन्त्री पौडेलले भने ‘शिक्षा ऐन संशोधनका लागि राजनीतिक सहमतिमा पुग्न आवश्यक छ, मेरोतर्फबाट सक्दो कोसिस गर्नेछु ।’ विद्यमान ऐनमा विज्ञापन हुने दरबन्दीमा ५० प्रतिशतलाई आन्तरिक प्रतिस्पर्धाबाट प्राथमिकताका साथ अस्थायीलाई स्थायी गरिने र परीक्षामा सामेलन नहुनेलाई तोकिएको सुविधा दिई बिदाइ गर्ने उल्लेख छ । मन्त्रीसमक्ष समितिका अध्यक्ष नारायणप्रसाद दाहालले माग पूरा नभएसम्म दबाबमूलक कार्यक्रम जारी राख्ने बताएका थिए । समितिका सञ्चार संयोजक लक्ष्मीकुमारी सत्यालले तीन दिनदेखि केशरमहलस्थित नेपाल शिक्षक महासङ्घमा आफूहरुले सञ्चालन गरेको रिले अनसन जारी रहने जानकारी दिएकी थिइन् । रासस

मीना घोरसाइने काभ्रे, माघ १८ । बालुवापाटी गाविस–९ की १४ वर्षीया सिर्जना ढकाल दिनहुँ दुई घन्टा पैदल हिँडेर नगरकोटमा रहेको महाकाली माविमा पढ्न जान्छिन् । दिनहुँ दुई घन्टा हिँडेर विद्यालय जान निकै कठिन भएको उनले बताइन् । “विद्यालय हिँडेर जाँदा कहिलेकाहीँ ढिलो पुगिन्छ अनि पढाइ छुट्छ” – उनले भनिन् , “बिरामी परेको बेलामा कहिलेकाहीँ परीक्षासमेत छुटेको छ, पढाइमा निकै लगाव भएकाले जस्तोसुकै चुनौतिको सामना गरेरपनि त्यहाँसम्म जानुपर्ने बाध्यता छ ।” बालुवापाटी गाविसका २, ७, ९ वडाका विद्यार्थी आर्थिक अबस्थाका कारण सहरसम्म गएर पढ्ने अवस्था नभएकाले टाढा भएपनि नगरकोटसम्म गएर पढ्न बाध्य भएका हुन् । बालुवापाटी–२ स्थित श्री सेतीदेवी प्रावि करिब आठ वर्षदेखि बन्द भएकाले त्यहाँका साना बालबालिकासमेत नगरकोटसम्म पढ्न जान बाध्य भएका हुन् । गाउँमा विद्यालय नहुँदा आठ वर्षीय बालुवापाटी–९ की आयुशा ढकाल नगरकोटमा रहेको सनराइज बोर्डिङ स्कुलमा पढ्न जान्छिन् । कक्षा ३ मा अध्ययनरत उनले स्कुलमा पुग्न ढिला भए स्कुलको ढोका नै बन्द हुने भएकाले घर फर्कनुपर्दा समय त्यसै खेर जाने बताइन् । हाल सो क्षेत्रमा विदेशीको सहयोगमा सञ्चालित सामुदायिक शिक्षा नामक विद्यालयमा एलकेजीसम्म पढाइ हुँदै आएको र अर्को वर्षदेखि कक्षा एकसम्म पढाइ हुने भएको छ । सो विद्यालयलाई सरकारी विद्यालयको रुपमा परिणत गर्ने पहल भइरहेको नगरहोम नेपाल नामक संस्थाका सदस्य उद्धव ढकालले बताए । गाउँमा विद्यालय नहुँदा अभिभावकसमेत चिन्तित छन् । हुनेखाने परिवारले छोराछोरीलाई सहरमा पढ्न पठाउने गर्छन् भने नहुनेले टाढाभएपनि पढ्न पठाउन बाध्य छन् । आफ्नो आर्थिक अवस्था निकै कमजोर भएकाले छोराछोरीलाई गाउँकै विद्यालयमा पढाउन बाध्य भएको बालुवापाटी–२ की भागिरथी घोरसाइनको भनाई छ । गाविसको तथ्याङ्कअनुसार उक्त गाविसमा जम्मा ८७ प्रतिशत जनजातिको बसोबास छ भने अन्य ब्राह्मण क्षेत्री १३ प्रतिशतमात्र छन् । त्यस्तै उक्त जातिहरुको शिक्षामा पहुँच जनजातिको जम्मा प्रतिशतमध्ये १३ प्रतिशत मात्र छ भने ब्राह्मण क्षेत्रीको जम्मा प्रतिशतमध्ये सात प्रतिशतको मात्र शिक्षामा पहुँच रहेको छ । गाउँमै विद्यालयको अभावका कारण त्यस्तो अवस्था भएको गाविसका गाविस सचिव मकुन्द गजुरेल  बताउँछन् । साथै गाउँमै भएको सेतीदेवी प्रावि विगत लामो समयदेखि बन्द रहेको र उक्त विद्यालयमा कार्यरत दुई शिक्षकको दरबन्दी अझै खारेज भइनसकेकाले उक्त विद्यालयलाई पुनःसञ्चालन गरेर शिक्षकलाई त्यही काम गराउने वातावरण तयार गर्न पहल भइरहेको उनी बताउँछन् ।

काठमाडौँ, माघ १८ । अस्थायी शिक्षक आन्दोलन, केन्द्रीय समिति, २०५५ ले सोमबार नेकपा (एमाले) केन्द्रीय कार्यालयमा आफूहरुलाई प्रक्रिया पूरा गरी स्थायी गराउन ध्यानाकर्षण गराएको छ । एमाले केन्द्रीय कार्यालयका सचिव कृष्णगोपाल श्रेष्ठलाई भेटी समितिका अध्यक्ष नारायणप्रसाद दाहालले मागपत्र बुझाउनुभएको थियो । समितिले स्थायी हुँदा अस्थायीको सेवावधि गणना गर्न, अवकाशप्राप्त अस्थायी शिक्षकलाई स्थायीसरहको औषधोपचार र उपदान दिन तथा स्वेच्छिक अवकाश लिन चाहनेलाई स्थायीसरहको सुविधान दिन पनि माग गर्दै आएको छ । समितिका केन्द्रीय सदस्य लक्ष्मीकुमार सत्यालले अन्य दललाई पनि सो मागपत्र बुझाइने जानकारी दिनुभयो । हाल मुलुकमा करिब २५ हजार अस्थायी सरकारी शिक्षक छन् । रासस

गुल्मी, माघ १० । गुल्मीको एक विद्यालयले अक्षयकोष स्थापनाका लागि आर्थिक संकलन अभियानलाई तीव्रता दिएको छ । कुर्घा गाविस–७ गुर्जाङमा रहेको खड्कदेवी प्राथमिक विद्यालयले सञ्चालन गरेको अभियानबाट हालसम्म स्वदेश तथा विदेशमा रहेका विभिन्न व्यक्तिबाट रु २० लाख सङ्कलन प्राप्त भएको विद्यालयका प्रधानाध्यापक कुलराज शर्माले जानकारी दिए । विद्यार्थीको लागि निःशुल्क रुपमा दिवा खाजा, पोसाक र कपि कलमको सुविधा र सहयोग गर्ने लक्ष्यसहित विद्यालयले रु ३० लाखको अक्षयकोष स्थापना गर्ने उद्देश्य पूरा नहुञ्जेलसम्म आर्थिक सङ्कलन अभियान जारी राख्ने समेत प्रधानाध्यापक शर्माले जानकारी दिए ।

म्याग्दी, माघ ७। पाल्पामा महेन्द्ररत्न उच्चमावि बरङ्जाका पूर्वविद्यार्थीहरुले मिलेर स्कुलमा छात्रवृत्ति कोषको स्थापना गरेका छन् । सोही स्कुलबाट एसएलसी तथा दसजोड दुई उत्तीर्ण गरेका उनीहरुले चारलाख बराबरको छात्रवृत्ति कोषको स्थापना गरेका हुन् । गरिब तथा जेहेन्दार विद्यार्थीको पठनपाठनमा सहयोग पु¥याउने उद्देश्यले छात्रवृत्ति कोष स्थापना गरिएको महेन्द्ररत्न उमावि पूर्व विद्यार्थी सङ्घका अध्यक्ष लोकेश पुन मगरले जानकारी दिए । उनका अनुसार कोषलाई बढाएर १० लाख रुपैयाँ पु¥याउने लक्ष्य रहेको र कोषमा जम्मा भएको रकमको ब्याजबाट विद्यार्थीलाई छात्रवृत्ति प्रदान गरिनेछ । कक्षा ६ देखि कक्षा १२ सम्मका गरिब, दलित, जेहेन्दार र जनजाति विद्यार्थीलाई छात्रवृत्ति प्रदान गरिनेछ ।

काठमाडौं, माघ ७ । सरकारले काठमाण्डौं विश्वविद्यालय (केयु)को उपकुलपतिमा पुनः रामकण्ठ माकाजुलाई नियुक्त गरेको छ । केयुको कुलपति रहेका प्रधानमन्त्री पुष्पकमल दाहाल‘प्रचण्ड’ले शुक्रबार उनलाई चारवर्षे कार्यकालका लागि नियुक्त गरेका हुन् । उपकुलपति छनौट समितिले पाँच जनाको नाम सिफारिस गरेको थियो । समितिले पूर्व उपकुलपति माकाजूसहित पूर्व रजिस्ट्रार भक्तमान तुलाधर, रजिस्ट्रार एवं कार्यवाहक उपकुलपति भोला थापा, पूर्व डिन मनप्रसाद वाग्ले र बायोटेक्नोलोजी विभागका प्रमुख जनार्दन लामिछानेको नाम सिफारिस गरेको थियो । यसअघि पनि उनी उपकुलपति थिए । मकाजुलाई उपकुलपतिमा नियुक्त भएपनि पत्र भने बुझ्न बाँकि छ । यसअघि मकाजुको ४ बर्षे कार्यकाल सकिएपछि मंसिर २६ गतेयता उपकुलपति पद रिक्त थियो ।

बेनी (म्याग्दी), माघ ५  । न्यु वेस्ट पोइन्ट आवासीय माविका विद्यार्थीले ड्रोन निर्माण गरी सफल परीक्षण गरेका छन् । विद्यालयले आयोजना गरेको अञ्चलस्तरीय बृहत् हस्तकला चित्रकला र रोबोटेक प्रदर्शनीमा कक्षा १२ का विद्यार्थीले ड्रोन बनाएर उडाएका हुन् । प्रदर्शनीमा विद्यार्थीले ड्रोन उडाउनुका साथै चित्रकला, हस्तकलाअन्तर्गत काठ, माटो, सिलाइबुनाइ, धातुमा कोरिएका चित्रकला, कागजका विभिन्न वस्तु, फोटो प्रदर्शनी, घर भवन मन्दिर र विभिन्न वस्तु तथा स्थलका मोडेल, फोटो फ्रेम, फोटो समेत प्रदर्शनी गरेका थिए । त्यसका साथै अटोमेटिक कार, सेन्सर लाइट, सेन्सर जडित पानी तान्ने मोटर, धुवाँ तथा मानव डिटेक्टिभ सेन्सरलगायतका विद्यार्थीद्वारा निर्माण गरिएका सामग्रीको प्रदर्शनी गरिएको थियो । फाइल तस्वीर

पोखरा, पुस २८। नेपाल विद्यार्थी सङ्घका केन्द्रीय अध्यक्ष नैनसिंह महरले आगामी फागुन १४ गते नै स्वतन्त्र विद्यार्थी युनियनको निर्वाचन हुनुपर्ने बताएका छन् । नेपाल प्रेस युनियन कास्कीले आयोजना गरेको पत्रकार भेटघाट कार्यक्रममा उनले विगत आठ वर्षयता स्ववियु निर्वाचन हुन नसकेको बताउँदै नेपाली विद्यार्थी आन्दोलनको एउटा महत्वपूर्ण उपलब्धिका रुपमा रहेको यो निर्वाचन जुनसुकै हालतमा हुनुपर्ने बताए । नैतिकतामा आधारित मानवतावादी शिक्षा वर्तमानको आवश्यकता भएकोमा जोड दिँदै उनले आर्थिक रुपमा विपन्न विद्यार्थीले पैसाको अभावमा गुणस्तरीय एवम् प्राविधिक शिक्षाको अभाव भोग्न नपर्ने अवस्था सिर्जना गर्नु राज्यको दायित्व भएको बताए ।

 काठमाडौं, पुस २६ । बैङ्कमा जागिर खाने सोचमा हुनुहुन्छ भने तपाईका लागि राम्रो अवसर आएको छ । साना किसान विकास बैंकमा अधिकृत देखि सहायक श्रेणीसम्मको ११ पदमा आवेदन खुलेको छ । तह ६ देखि तह चार सम्मका लागि आवेदन खुलेको हो । काठमाडौं, बुटवल, पोखरा, नेपालगञ्ज, जनकपुर हेटौडा । विर्तामोडका लागि ११ पदमा आवेदन खुलाएको बैङ्कले जनाएको छ । अधिकृत ६ तहका लागि वाणिज्यशास्त्र व्यवस्थापन वा अर्थशास्त्र विषय लिएर मास्टर्स(स्नातकोत्तर) पास गरेकोले आवेदन दिन सक्ने बैङ्कले जानकारी दिएको छ । त्यस्तै तीन वर्ष सम्बन्धित क्षेत्रमा काम गरेको अनुभव भएकाले आवेदन दिन सक्ने बताइएको छ । कम्प्युटर सम्बन्धि आधाभूत तालिम लिएको हुनुपर्ने योग्यता तोकिएको छ । त्यस्तै चौथो तहमा आवेदन दिन वाणिज्यशास्त्र वा अर्थशास्त्र विषयमा विए पास गरेको हुनुपर्ने एक वर्षको अनुभव भएको र कम्प्युटरको तालिम लिएकाले आवेदन दिनसक्ने बैङ्कले जनाएको छ । इच्छुक व्यक्तिले बैंकको कार्यालयमा आवेदन दिन सक्ने बैंकले जनाएको छ । पढ्नुस् सूचना

काठमाडौं, पुस १९ । लोकसेवा आयोगले निजामती सेवातर्फको राजपत्रांकित तृतीय श्रेणी (शाखा अधिकृत) का लागि पाँच सय तीन जनाको आवेदन मागेकोमा अहिलेसम्म ३० गुणा बढीले आवेदन फाराम भरेका छन् । आयोगले मंसिर २९ गते शाखा अधिकृतका विभिन्न सेवातर्फका लागि दरखास्त आवेदन माग गरेको थिए । शाखा अधिकृत पदका लागि पाँच सय तीन जना मागेको मध्येमा १५ हजारले आवेदन भरेको आयोगका दरखास्त व्यवस्थापन केन्द्रका शाखा अधिकृत नारायणप्रसाद गौतमले जानकारी दिए । आज राति १२ बजेसम्म आयोगले तोकेको सामान्य दस्तुर र पुस २५ गते राति १२ बजेसम्म दोब्बर दस्तुरमा अनलाइनमार्फत फाराम भर्न पाइने छ । गत वर्षदेखि अनलाइनमार्फत फाराम भर्न थालेपछि जतिबेला पनि उम्मेदवारले फाराम भर्न सक्नेछन् ।

काठमाडौं, पुष १० । ओखलढुङ्गा जिल्लालाई साक्षर जिल्ला घोषणा गरिएको छ । शिक्षा मन्त्री धनिराम पौडेलले आइतबार सदरमुकाम ओखलढुङ्गामा आयोजित कार्यक्रममा दीप प्रज्वलन गरी ओखलढुङ्गा जिल्लालाई मुलुकको ३३ औं साक्षर जिल्ला घोषणा गर्नु भएको हो । यस अघि मुलुकका ३२ वटा जिल्ला साक्षर घोषणा भैसकेका थिए । २०६८ सालको जनगणना अनुसार १५ देखि ६० बर्ष उमेर समूहका १ लाख ४७ हजार ९ सय ४८ जनसंख्या मध्ये ९९ दशमलब ५ प्रतिशतले लेखपढ गर्न जानेकाले जिल्लालाई साक्षर घोषणा गरिएको ओखलढुङ्गाका जिल्ला शिक्षा अधिकारी बालकृष्ण चापागाईंले जानकारी दिनुभयो । साक्षरता घोषणा सभालाई संवोधन गर्दै शिक्षा मन्त्री पौडेलले दुर्गम जिल्ला भएर पनि ओखलढुङ्गा जिल्लाले शैक्षिक क्षेत्रमा गरेको प्रगति प्रशंसनिय भएको बताउनुभयो । उहाँले सन् २०१७ सम्ममा नेपाललाई पूर्ण साक्षर घोषणा गर्न राज्यले अन्तर्राष्ट्रिय क्षेत्रमा गरेको प्रतिवद्धता पूरा गर्न देशका सबै नागरिक लाग्नु पर्नेमा जोड दिनुभयो । शिक्षा मन्त्री पौडेलले देशको आबश्यकता अनुसारको शिक्षा प्रणाली विकास गर्ने उद्देश्यले सरकारले शिक्षा ऐनको आठौं संशोधन गरेको बताउनुभयो । पञ्चायती व्यवस्थाले स्थापित गरेको शिक्षा नीतिलाई बदलेर मुलुकको बदलिंदो राजनीतिक परिवर्तनलाई संस्थागत गर्ने खालको शिक्षा प्रणालीको बिकास गर्नु अहिलेको प्रमुख कर्तव्य भएको उहाँको भनाई थियो । ‘राजनीतिक सत्ताले आफू अनुकूलको शैक्षिक प्रणालीको विकास गर्छ । हामीले ठूलो त्याग र बलिदानपछि संघिय गणतान्त्रिक नेपालको निर्माण गरेका छौं । हामी पञ्चायती व्यवस्थाले स्थापित गरेको पुरानो शिक्षा नीतिलाई बदलेर संविधानले परिकल्पना गरे अनुसारको शैक्षिक प्रणाली निर्माण गर्न चाहन्छौं ।’ उहाँले शिक्षा नियमाबली निर्माणको काम अन्तिम चरणमा पुगेको जानकारी दिनुभयो । शिक्षा ऐन कार्यान्वयनमा जाँदा राज्यलाई आर्थिक भार बढ्ने भएकाले त्यसको व्यवस्थापनको लागि अर्थ मन्त्रालयको स्वीकृति लिनु पर्ने भएकाले नियमावली जारी गर्नमा केही ढिलाई भएकोे बताउनुभयो । अहिलेको राजनीतिक प्रणाली अनुसारको शैक्षिक प्रणाली स्थापित गर्नु । संघिय गणतन्त्रलाई संवोधन गर्ने खालको । संविधानका भावना अनुसारको । राज्य प्रणालीले माग गरे अनुसारको कार्यक्रममा सांसदहरु यज्ञराज सुनार, रामहरी खतिवडा र सकुन्तला राजभण्डारी, माओवादी केन्द्रका पोलिटव्यूरो सदस्यय मोहन खड्का, नेपाली कांग्रेसका प्रदिप बानियाँ, नेकपा एमालेका नेत्रप्रसाद भट्टराई, अनौपचारिक शिक्षा केन्द्रका प्रमुख दिवाकर ढुंगेल, पूर्वाञ्चल विकास क्षेत्रका क्षेत्रीय शिक्षा निर्देशक केशवप्रसाद दहाल, स्थानिय विकास अधिकारी यज्ञबहादुर खत्री, सहायक प्रमुख जिल्ला अधिकारी, त्रिलोचन रिमाल, नेपाल शिक्षक संघका केन्द्रीय उपाध्यक्ष गोकर्ण बानियाँ, क्रान्तिकारी माओवादी केन्द्रका नेता रुद्र फूँयाल, संघिय समाजवादी पार्टीका नेता धिरेन्द्र रुम्जाली, राप्रपाका धनराम श्रेष्ठ, बरुणेश्वर माविका प्रधानाध्यापक कुलप्रसाद खतिवडा, जिल्ला शिक्षा समितिका सदस्य बाबुराम गौतम, विभिन्न संघसंस्थाका प्रतिनिधी लगायतले बोल्नु भएको थियो । बक्ताहरुले भूकम्पले क्षतिग्रस्त ओखलढुंगाका विद्यालय संरचनाको निर्माणमा सरकारले ध्यान दिनु पर्नेमा जोड दिएका थिए । शैक्षिक सिकाईमा अभिभावक र बालबालिकालाई जोड्न सके शिक्षाको दिगो हुनेमा वक्ताहरुले जोड थियो । कार्यक्रममा विभिन्न विद्यालयका विद्यार्थीहरुले देशभक्तिपूर्ण गित तथा नृत्य प्रस्तुत गरेका थिए । कार्यक्रममा साक्षरता अभियानमा विभिन्न ढंगले सहयोग पु¥याउने श्रोत केन्द्रका प्रमुख तथा विभिन्न संघसंस्थाका प्रतिनिधीहरुलाई प्रशंसा पत्र प्रदान गरिएको थियो ।

भक्तपुर, मंसिर ३० । राष्ट्रिय परीक्षा बोर्डले कक्षा एघारको परीक्षाफल प्रकाशित गरेको छ । परीक्षमा सम्मिलितमध्ये ५१ दशमलव ७१ प्रतिशत परीक्षार्थी उत्तीर्ण भएको वोर्डले जनाएको छ । बिहीबार साँझ प्रकाशित परीक्षाफल अनुसार १ लाख ३७ हजार ६ सय ५ जना उत्तीर्ण भएका छन् । परीक्षामा २ लाख ६६ हजार १०३ परीक्षार्थी सहभागी भएका थिए । यसअघि मंसिर २१ गते बोर्डले कक्षा एघारको आंशिक तर्फको नतिजा सार्बजनिक गरेको थियो ।

काठमाँडौ, मंसिर २४ परीक्षा नियन्त्रण कार्यालय सानोठीमी भक्तपुरले यस वर्षको कक्षा १० को अन्तिम परीक्षाको तालिका सार्वजनिक गरेको छ । कार्यालयका अनुसार आगामी चैत्र ३ गते पहिलो दिन अंग्रजी, ४ गते नेपाली, ६ गते गणित, ७ गते विज्ञान, ८ गते सामाजिक शिक्षा, ९ गते स्वास्थ्य जनसंख्या तथा वातावरण, १० गते ऐच्छिक प्रथम र ११ गते ऐच्छिक द्वितिय विषयका लागि परीक्षा हुने छ । प्राविधिक धारका विद्यार्थीको परीक्षा भने १४ गते सकिनेछ । परीक्षामा ६ लाख भन्दा बढी विद्यार्थी सामेल हुने छन ।