काठमाडौं, चैत १७ । बालाजुस्थित प्राचीन धार्मिक तीर्थस्थल बाइसधारामा आज ‘बाइसधारा मेला’ लागेको छ । प्रत्येक वर्ष चैत शुक्ल पूर्णिमाका दिन यहाँ बाइसधारा मेला लाग्छ । काठमाडौँ उपत्यका तथा त्यस वरपरका क्षेत्रबाट बिहानैदेखि बाइसधारामा स्नान गर्न भक्तजनको घुइँचो लागेको छ । काठमाडौँ उपत्यकाको पश्चिम उत्तरतिर नागार्जुन पर्वतमुनि पर्ने बालाजुमा आजको दिन स्नान गरी पवित्र भएर यहाँको नारायण मन्दिरमा तथा स्थानीय जामाचो डाँडामा रहेको मन्दिरमा भक्तजनले मेला भर्ने प्रचलन छ । जामाचोमा रहेको चैत्यमा विपश्वी बुद्धले आई बसेको मानिन्छ । हाल शिवपुरी नागार्जुन राष्ट्रिय निकुञ्जमा पर्ने दुई हजार १२८ मिटर अग्लो जामाचो हाल लामो पदयात्राका लागि प्रख्यात छ जहाँ अनेक खालका वनस्पति पाइन्छ । हिन्दू तथा बौद्ध धर्मावलम्बी दुवैको आस्था केन्द्रका रूपमा रहेको बालाजु क्षेत्र धार्मिक सहिष्णुताको दृष्टिले पनि उदाहरणीय छ । उक्त स्थानमा आज नुहाउनाले जो कोहीको पनि शरीरका सम्पूर्ण रोगव्याधी हटेर सुख प्राप्त हुने, पारिवारिक समृद्धि कायम हुने र परलोकमा समेत पुण्य प्राप्त हुने जनविश्वास रहिआएको छ । नेपाल संवत् ८७५९विसं १८१२तिर० मा कान्तिपुरका राजा जयप्रकाश मल्लले २१ ढुंगेधारा स्थापना गराएकामा पछि विसं १८५५ मा राजा रणबहादुर शाहले थप एउटा ठूलो ढुंगेधारा स्थापना गरेपछि सो स्थान बाइसधाराको नामले चिनिन गएको हो । ‘स्वयम्भू पुराण’मा उल्लेख भएअनुसार कुनै समयमा चीनबाट महामञ्जुश्री बोधिसत्व केशिनी र उपकेशिनी देवीसहित पञ्चशील पर्वत पार गरेर नेपाल आएका थिए । त्यतिबेला उनले नगरकोटमा बसी उपत्यकाको पानी कसरी निकास गरी पठाउने भनेर सोचेका थिए । पछि यहाँको पानी सुकेपछि विपस्सी बुद्धले कमलका फूल रोपेर ‘ॐ नमोरत्नत्रयाय’ भनी मन्त्रोच्चारण गर्दा यहाँ स्वयम्भू ज्योतिरूपको उत्पत्ति हुन गएको सांसद वसन्त मानन्धर बताउनुहुन्छ ।

लहान, १७ चैत । पूर्वपश्चिम राजमार्गअन्तर्गत सप्तरीको खडक नगरपालिका–८ मा टिपरको ठक्करबाट गम्भीर घाइते एक युवकको गए राति उपचारको मृत्यु भएको छ भने एक गम्भीर घाइते भएका छन् । पूर्वबाट पश्चिम जाँदै गरेको स १ क १७९ नंको टिपरले स ६ प २८९१ नंको मोटरसाइकललाई ठक्कर दिँदा मोटरसाइकल चालक सिरहाको नवराजपुर गाउँपालिका–१ निवासी ३० वर्षीय सञ्जय यादवको मृत्यु भएको प्रहरीले जनाएको छ । दुर्घटनामा गम्भीर घाइते यादवको लहानस्थित सप्तऋषि अस्पतालमा उपचारका क्रममा मृत्यु भएको इलाका प्रहरी कार्यालय कल्याणपुरले जनाएको छ । सोही दुर्घटनामा परी गम्भीर घाइते अमितको विराटनगरस्थित न्यूरो अस्पतालमा उपचार भइरहेको छ ।

काठमाडौँ, चैत १६। शुक्रवार साँझ नयाँ दिल्लीस्थित एपोलो अस्पतालमा निधन भएका कांग्रेस नेताको निधनप्रति कांग्रेस सभापति शेरबहादुर देउबाले शोक प्रकट गरेका छन्। फेसबुक मार्फत  शोक सन्देश जारी गर्दै देउवाले भनेका छन्, ‘उहाँको निधनले मुलुकले एउटा जिम्मेवार र अनुभवी नेता गुमाएको छ।’ २०४८ सालपछि गृह, जलस्रोतलगायतका शक्तिशाली मन्त्रालयको नेतृत्व गरेका खड्कालाई सर्वोच्च अदालतले भ्रष्टाचारी ठहर गर्दै ६ वर्षअघि डेढ वर्ष कैद र ९४ लाख ७४ हजार १ सय २२ रुपैयाँ बिगो र त्यति नै जरिवाना गरेको थियो। कैद भुक्तान गरेर निस्किएका खड्का त्यसपछि पुन: कांग्रेसको राजनीतिमा फर्किएका थिए। १३ औं महाधिवेशनमा खड्का लोकप्रिय मतसहित केन्द्रीय सदस्य निर्वाचित भएका थिए। फागुन ४ गते राति हृदयाघात भएपछि काठमाडौंस्थित नर्भिक अस्पतालमा भर्ना भएका खड्कालाई फागुन ६ गते उपचारका लागि एपोलो लगिएको थियो। सुरुमा अवस्था सामान्य रहे पनि विस्तारै छाती र टाउकोमा समस्या देखिएको थियो भने मृगौलाले काम गर्न छाडेको थियो। खड्काको ३० महिनाअघि एपोलोमै मृगौला प्रत्यारोपण गरिएका खड्काको स्वास्थ्य जटिल भएपछि कांग्रेसले रमेश लेखक, शंकर भण्डारीलगायतका नेतालाई स्वास्थ्य अवस्था बुझ्न दिल्ली पठाएको थियो। बिहीबारमात्रै स्वदेश फर्किएका ती नेताले कांग्रेस केन्द्रीय समितिको शुक्रबारको बैठकमा स्वास्थ्य अवस्थाबारे रिपोर्टिङ गरेका थिए। कांग्रेस प्रवक्ता विश्वप्रकाश शर्माले खड्काको पार्थिव शरीर नेपाल ल्याउनेबारे पार्टीले परिवारजनसँग सल्लाह गरिरहेको बताए। शर्माले कांग्रेसले एउटा टोली शनिबार नै दिल्ली पठाउने बताएका छन्।   खड्काको स्वास्थ्य जटिल बनेको जानकारी पाएपछि गृहजिल्ला दाङमा शुभेच्छुक कार्यकर्ताहरूले मन्दिरमा पूजाआजासमेत गर्दै आएका थिए ।  

दार्चुला । नेपाल सरकारले अन्तर्राष्ट्रिय सीमा नदीका रुपमा रहेको महाकाली नदीमा पुल लगाउन भारतीय पक्षलाई एक महिनापछि अनुमति दिएको छ । भारतीय पक्षले माग गरेको ठाउँमा तीन वटा पुल लगाउन आज नेपाल सरकार गृह मन्त्रालयबाट अनुमति प्राप्त भएको प्रजिअ जनार्दन गौतमले जानकारी दिनुभयो । भारतीय पक्षले त्रिदेशीय सीमा क्षेत्रमा पर्ने ब्यास गाउँपालिका–२ को नजांग, लखनपुर र छाङकङरे खोलामा अस्थायी काठेपुल लगाउन नेपाल सरकारसँग अनुमति माग गरेको थियो । कैलाश मानसरोवर जाने तीर्थयात्री तथा सौका समुदायको हुने बसाइँसराइलाई मध्यनजर गर्दै केही समयका लागि मात्रै अनुमति दिएको प्रजिअ गौतमले जानकारी दिनुभयो । यसअघि भारतीय पक्षले नेपालको सहमति बिना नै ब्यास गाउँपालिका–२ को ताम्पाक, नजांग, घाटीबोगड, मल्लो घाटीबोगड र वडा नं १ को छाङकाङरे र बुदी खेलामा अस्थायी काठेपुल लगाएर भारत पट्टि निर्माण भइरहेको सडकमा काम गर्ने मजदुरलाई आवतजावत गराइरहेको थियो भने नेपाली भूमिमा डेढ किमी कच्ची सडक र झण्डै दुई किमी बाटोसमेत निर्माण गरेको थियो । रासस

काठमाडौँ । काठमाडौँ महानगरपालिकाभित्र प्लाष्टिकजन्य वस्तु प्रयोग गर्दै हुनुहुन्छ ? भेन्डिङ उपकरणमा फोहर राख्नुस् पैसा लिनुस् । प्लाष्टिकजन्य वस्तु प्रयोग गरेपछि निस्कने फोहर वस्तुलाई थप व्यवस्थापन र पुनः प्रयोग गर्नका लागि भेन्डिङ उपकरणको उपयोगसंगै नयाँ अवधारणाका साथ कामपा अघि बढ्न लागेको हो । पछिल्लो समय प्लाष्टिकजन्य फोहरबाट शहर प्रदूषित भएकाले आगामी दिनदेखि त्यसलाई नियन्त्रण गर्न निश्चित स्थानमा फोहर संकलन गर्ने भाँडो राखी शहरलाई व्यवस्थित गर्न लागिएको कामपाका निजी साझेदारी एकाइ प्रमुख महेश काफ्लेले जानकारी दिनुभयो । उहाँले भन्नुभयो, “भेन्डिङ उपकरण त्यो हो जुन निश्चित स्थानमा राखिन्छ र त्यसमा नागरिकले प्लाष्टिकजन्य फोहर राखेर आफ्नो परिचय खुलाएपछि सामग्रीको अनुपातका आधारमा सोही व्यक्तिको मोबाइलमा ब्यालेन्स प्लस हुन्छ ।” उक्त उपकरणलाई एटिएम प्रयोग गरे जसरी प्रयोग गर्न सकिन्छ । उक्त उपकरणको प्रयोगबाट शहर सफा हुनाका साथै सर्वसाधारणले फोहर निश्चित स्थानमा राखेबापत केही रकम पाउनेछन् । त्यसरी जम्मा गरिएको फोहरलाई पुनः प्रयोग गरिनेछ । भेन्डिङ उपकरण पुनः प्रयोग गर्न सकिने प्लाष्टिकजन्य फोहर संकलन गर्ने भाँडो हो जस्मा पानी, कोक, चिजबल, चाउचाउको प्याकेटलाई राख्न सकिन्छ जुन प्लाष्टिक पुनः प्रयोग गर्न सकिन्छ । यस किसिमको अभ्यास अन्तर्राष्ट्रियस्तरमा लामो समयदेखि प्रयोगमा आइसकेको भए पनि नेपालमा भने पहिलो हो । शुरुवात्को समय भएकाले हाल अन्तर्राष्ट्रिय विमानस्थल, न्यूरोड, दरबारमार्गलगायत मानिसको बढी आवतजावत हुने सात स्थानमा यस्ता उपकरण राखिने योजना कामपाको छ । रासस

काठमाडौँ । गर्मीयाम शुरु भएसँग मुलुकका ३२ जिल्लाको १७७ वनमा आगलागी भएको छ । वन विभागका अनुसार अर्घाखाँची, बारा, भोजपुर, चितवन, दाङ, धादिङ, धनकुटा, धनुषा, डोटी, दोलखा, डडेलधुरा, गोरखा, जुम्ला, काभ्रे, कपिलबस्तु, महोत्तरी, नवलपरासी, ओखलढुंगा, पाँचथर, पर्सा, रौतहट, रसुवा, सिन्धुली, सोलुखुम्बु, सुनसरी, सप्तरी, सर्लाही, सिरहा, सुर्खेत, तनहुँ, तेह्रथुम र उदयपुरका वनमा आगलागी भएका हुन् । विभागका सहायक वन अधिकृत डम्बरबहादुर भण्डारीले हिउँद यामसँगै हावाहुरी र गर्मीले धेरै वनमा आगलागी हुने गरेको जानकारी दिनुभयो । “देशभर कति हेक्टरमा आगलागी भयो भन्नेबारे विस्तृत विवरण आउन बाँकी छ,”, उहाँले भन्नुभयो । गत आर्थिक वर्षमा विभिन्न जिल्लाका तीन लाख ५० हजार हेक्टरमा आगलागी भएको थियो । रासस

लहान । सिरहाको बरियारपट्टि गाउँपालिका–१ मा आज बिहान आगलागी हुँदा करीब रु तीन लाख बराबरको क्षति भएको छ । बरियारपट्टि–१ निवासी योगेन्द्र यादवका घरबाट सल्केको आगो फैलिएर उहाँका दुई घर, घरमा रहेको रु २५ हजार, फर्निचर, खाद्यान्नलगायत सम्पूर्ण सामान जलेर नष्ट भएको प्रहरीले जनाएको छ । स्थानीयवासी र प्रहरीको सहयोगमा आधा घण्टाभित्र आगो नियन्त्रणमा लिइएकाले थप दुर्घटना हुनबाट जोगिएको स्थानीयवासीले बताएका छन् । रासस

काठमाडौं । मंगलबार दिउँसो १ बजे राष्ट्रिय सभा बैठक बस्दै छ । दिउँसो १ बजे बस्ने बैठकमा सत्य निरुपण तथा मेलमिलाप आयोग र बेपत्ता पारिएका व्यक्तिको छानविन आयोग सम्वन्धी अध्यादेश पेश हुने कार्यसूची रहेको संसद सचिवालयका सह–प्रवक्ता केशव अर्यालले जानकारी दिनुभयो । दुवै आयोगको गत फागुनमा समयावधी सकिएपछि कांग्रेस सभापति शेरबहादुर देउवा नेतृत्वको सरकारले अध्यादेश मार्फत एक वर्षको म्याद थप गरेको थियो । यसैबीच, प्रतिनिधिसभाको नियमावली मस्यौदा समिति बैठक पनि मंगलबार बस्दै छ । बैठकले प्रतिनिधि सभा मातहत रहने समितिको नाम, संख्या लगायतबारे छलफल गर्नेछ । यी बिषयमा राजनीतिक दलको समेत सहमति आवश्यक रहेकाले सबै पक्षसँग घनिभूत छलफल आवश्यक रहेको समितिले जनाएको छ ।

रोल्पा । पश्चिम रोल्पालाई जिल्ला सदरमुकाम लिवाङसँग जोड्ने रोल्पाको माडीखोला पुल निर्माण आरम्भ भएको १० वर्षमा मात्रै दुईवटा पिलर ठड्याएपछि बेवारिसे बनेको छ । पुल निर्माण नहँुदा जिल्ला सदरमुकाम आवतजावतमा लामो समयदेखि कष्ट व्यहोर्दै आएपछि तत्कालीन समस्या समाधानका लागि अस्थायी बेलीब्रीज निर्माण गरिएको थियो । बेलीब्रीज निर्माणसँगै पक्की पुल निर्माणमा बेवास्ता बढ्दै जान थालेको भन्दै स्थानीयले गुनासो गर्न थालेका छन् । ०६५ सालमा सडक विभागमार्फत गरिएको टेण्डरबाट काठमाडौँमा रहेको लामा÷एडी÷धर्मेन्द्र जेभी निर्माण कम्पनीले सो पुल निर्माण गर्ने जिम्मा पाएको थियो । शुरुवाती चरणमा निर्माणको केही काम गरे पनि राजनीतिक पहुँचका आधारमा निर्माण व्यवसायी वसन्त दशौदीले निर्माण कार्यमा आलटाल गरेसँगै पुल निर्माण कार्य अनिश्चित बनेको स्थानीयले आरोप लगाएका छन् । निर्माण कार्यलाई तीव्रता दिने उद्देश्यले रोल्पाका स्थानीय राजनीतिक दल र सामाजिक संघ संस्थाको टोली संघर्ष समिति बनाएर सडक डिभिजन कार्यालय प्यूठानसमेत पुगेको थियो । पक्की पुल निर्माण कार्यलाई सरोकारवालाले जोड दिनुपर्ने स्थानीय युवा ध्रुवचन्द्र पुनले प्रतिक्रिया दिनुभयो । राज्यका महत्वपूर्ण जिम्मेवारीमा रहेका रोल्पाली नेताको ध्यान जान जरुरी रहेको पुनले बताउनुभयो । बेलीब्रीज बनेसँगै जनतामा शिथिलता देखिँदा दबाब कम भएको उहाँको भनाइ छ । पुल निर्माणका लागि जनताको निरन्तर दबाब खबरदारी जरुरी रहेको पुनको भनाइ छ । प्यूठानको स्थानीय प्रशासन, सडक डिभिजन कार्यालय, रोल्पाको सर्वपक्षीय टिम र निर्माण व्यवसायीबीच अविलम्व निर्माण कार्य सम्पन्न गर्ने सहमति भएपनि निर्माण व्यवसायीले सहमति कार्यान्वयन नगरेको राष्ट्रिय जनमोर्चा रोल्पाका अध्यक्ष मेघनाथ विष्टले जानकारी दिनुभयो । अविलम्व काम शुरु गर्ने सहमति भएपछि ठेकेदारले अर्को एउटा पिलर ठड्याउने बाहेक थप काम गरेनन्, विष्टले भन्नुभयो । पुल निर्माणका क्रममा आफ्नो विभिन्न निर्माण सामग्री हराएको तथा लागत इष्टमेटभन्दा बढी काम थपिएको भन्दै निर्माण व्यवसायी डिसी फाइल बोकेर क्षतिपूर्ति माग गर्दै हिँडिरहेको भन्ने आफूले सुनेको विष्टले बताउनुभयो । तीन वर्षका लागि टेण्डर आह्वान भए पनि राजनीतिक शक्तिको संरक्षणका कारण समयमा १० वर्षसम्म निर्माण हुन नसकेको नेपाली काँग्रेस रोल्पाका सभापति अमरसिं पुनले बताउनुभयो । अर्को टेण्डरका लागि प्रक्रिया अगाडि बढिरहेको हुँदा अबको एक÷दुई वर्षमा निर्माण कार्य सम्पन्न गर्ने गरी आफूहरुले दबाब दिइरहेको सभापति पुनले बताउनुभयो । पुल निर्माणमा उदासीनता देखिएको भन्दै जनताले आवाज उठाउँदै आइरहेको नेकपा (एमाले) रोल्पाका अध्यक्ष हरिप्रसाद घर्तीमगरले बताउनुभयो । जनताको मागका आधारमा सम्बन्धित निकायमा आफूहरुले दबाब दिइरहेको घर्तीले प्रतिक्रिया दिनुभयो । ठेक्का रद्द गरेर अर्को टेण्डर गर्ने तयारी भइरहेकाले निकट भविष्यमै पक्की पुल बन्नेमा आफू आशावादी रहेको घर्तीले बताउनुभयो । पुरानो टेण्डर रद्द भएको हँुदा अविलम्व नयाँ टेण्डर खोली काम सुचारु गर्न सडक डिभिजन कार्यालय, प्यूठानसँग कुराकानी भइरहेको रोल्पा नगरपालिकाका प्रमुख पूर्ण केसीले प्रतिक्रिया दिनुभयो । पुल निर्माण कार्यलाई तदारुकताका साथ अगाडि बढाइने प्रमुख केसीले बताउनुभयो । सो नदीमा वैकल्पिक व्यवस्थाका लागि भन्दै हाल बेलीब्रीज राखिएको भए पनि आवतजावतमा निकै समस्या हुने गरेको यातायात व्यवसायी रामचन्द्र थापाले बताउनुभयो । बेलीब्रीज निर्माण गरिएको स्थान निकै साँगुरो भएकाले जुनसुकै बेला दुर्घटना हुनसक्ने सम्भावना छ थापाले भन्नुभयो । साँघुरो बेलीब्रीज कच्ची सडक र अत्यन्तै अप्ठेरो घुम्तीका कारण समयमै सावधानी अपनाउन नसके सो स्थानमा धनजनको ठूलो क्षति हुने सम्भावना रहेको यात्रुले गुनासो गरेका छन् । पुल निर्माणसँगै पश्चिम रोल्पामा उत्पादन भएका तरकारी, फलफूल, घिउ, दाल, जडीबुटी, खसी बोका सदरमुकाम लिवाङ ल्याउन किसानलाई सहज हुने भएको छ । सदरमुकाम लिवाङ, सुलिचौरजस्ता बजार क्षेत्रमा खपत हुने अधिकांश तरकारी पश्चिम रोल्पाबाट सल्यान, दाङ हुँदै पुनः रोल्पा आउँदा लागत मूल्य पनि अधिक हुने भएकाले पुल निर्माणपछि बजार मूल्य पनि कम हुने उपभोक्ताले आशा व्यक्त गरेका छन् । सो पुल बनेसँगै रोल्पाका साविक दुई दर्जनभन्दा बढी गाविस तथा दाङ र सल्यानसम्मको यातायात सेवासमेत सहज हुने बताइएको छ ।रासस

जाजरकोट । नलगाड पहुँच मार्ग निर्माण भइरहेको सडकको बीचमा रहेको नलगाड नदीमा हालिएको लाप्को (काठको फड्के) बाट खसेर एक जनाको मृत्यु भएको छ । जिल्लाको बारेकोट गाउँपालिका–७ का ४० वर्षीय कालीबहादुर नेपालीको आज बिहान मृत्यु भएको बारेकोट गाउँपालिका पशुपक्षी शाखाका प्रमुख गोविन्द सिंहले जानकारी दिनुभयो । नलगाड नगरपालिका–५ खाराको बीचमा रहेको नलगाड नदीमा काठको लाप्कोबाट नदी पार गर्दैगर्दा चिप्लिएर नेपालीको मृत्यु भएको सिंहको भनाइ छ । काठमाडौँबाट कमाइ गरी घर खर्च लिएर आएका नेपालीको मृत्यु भएको सिंहले बताउनुभयो । निर्माण व्यवसायीको लापर्बाहीले समयमा पहुँचमार्ग निर्माण नहुँदा यहाँका हजारौँ स्थानीयवासीले समस्या भोग्दै आएका छन् । करिब तीन किलोमिटर सडक नलगाड नदीको बीचबीचमा रहेको लाप्कोको भरमा वारपार गर्नुपर्ने हुन्छ । यो भन्दा अगाडि दुई महिनाको बीचमा लडेरै तीनजनाको मृत्यु भइसकेको छ । रासस

खोटाङ । बाँसको भाटाले हानेर खोटाङमा एक वृद्धले आफ्नै श्रीमतीको हत्या गरेका छन् । दिक्तेल रुपाकोट मझुवागढी नगरपालिका–३ बाम्राङस्थित ससुराली घरमा बस्दै आएका हलेसी तुवाचुङ नगरपालिका–१० का ६० वर्षीय मकरध्वज राईले ५० वर्षीया श्रीमती आइसरी राईको हत्या गरेका हुन् । घरायसी विवादमा सोमबार साँझ श्रीमान्-श्रीमतीबीच झगडा हुँदा श्रीमानले हानेको बाँसको भाटाले लागेर श्रीमतीको मृत्यु भएको जिल्ला प्रहरी कार्यालय खोटाङका प्रहरी नायब उपरीक्षक लोकदर्शन थापाले जानकारी दिनुभयो । “श्रीमतीले मादकपदार्थ सेवन गरेकी रहेछन् ।” उहाँले भन्नुभयो, “मातेको झोँकमा श्रीमान्माथि जाइलाग्दा श्रीमान्ले बाँसको भाटाले हान्दा उनको मृत्यु भएको खुल्न आएको छ ।” घटनालगत्तै श्रीमान् मकरध्वजलाई नियन्त्रणमा लिएर अनुसन्धान थालिएको प्रहरीले जनाएको छ । मृत आइसरीको शव परीक्षणका लागि राति नै जिल्ला अस्पताल दिक्तेल पु¥याइएको आफन्तले जनाएका छन् । रासस

पर्वत । पर्वतको मोदी गाउँपालिका–१ भुकताङ्लेका वडासदस्य भुलबहादुर पौडेलको घरमा सोमबार साँझ आगलागी भएको छ । भुकताङ्लेको मोहोरियामा रहेको उहाँको दुईतले घरमा साँझ ७ः३० बजे आगो लागेको हो । आगालागीबाट घरमा भएको अन्नपात, लत्ताकपडा, नगद जलेर नष्ट भएको छ । एक्कासि आगो सल्किएपछि कुनै पनि सामान निकाल्न नपाएको वडाध्यक्ष गौप्रसाद गुरुङले जानकारी दिनुभयो । पौडेलको घरमा उहाँकी आमा विष्णुमती पौडेलले किराना पसलसमेत चलाउँदै आउनुभएको थियो । आगलागीमा परी उक्त पसलका सबै सामग्री नष्ट भएका छन् । आगलागीमा रु १५ लाखभन्दा बढीको क्षति भएको अनुमान गरिएको वडाध्यक्ष गुरुङले बताउनुभयो । उक्त आगो राति अबेर प्रहरी चौकी र स्थानीय बासिन्दाको प्रयासमा नियन्त्रणमा लिइएको छ । आगलागीबाट मानवीय क्षति भने हुन पाएन । आगालागीको कारण भने खुल्न सकेको छैन । गर्मी बढेसँगै भाइरलका बिरामी बढे यसैबीच, गर्मीयाम शुरु भएसँगै पर्वतमा भाइरल र ज्वरोका बिरामी उच्च दरमा बढेका छन् । बदलिँदो मौसमका कारण भाइरलका बिरामी बढेको जिल्ला अस्पताल पर्वतले जानकारी दिएको छ । जिल्ला अस्पतालसँगै पर्वतका गाउँगाउँमा रहेका स्वास्थ्य संस्थामा समेत बिरामीको चाप बढेको हो । अहिले जिल्ला अस्पताल पर्वतमा दैनिकजसो १२० जनासम्म भाइरल ज्वरोका बिरामी आउने गरेको अस्पतालले जनाएको छ । अन्य समयमा ४० देखि ५० जनासम्म बिरामी आउने अस्पतालमा विगत एक सातादेखि तेब्बरको संख्यामा वृद्धि भएका छन् । त्यसमध्ये अधिकांश भाइरलका बिरामी रहेका छन् । स्वास्थ्य कार्यालयको तथ्यांकअनुसार केही समय अघिको तुलनामा यतिबेला तेब्बरको संख्यामा भाइरलका बिरामी बढेको बताइएको छ । भाइरलको प्रकोप बढी मात्रामा बालबालिकामा देखिएको छ । बालबालिकासँगै एकैघरमा चारपाँच जनाको संख्यामा उपचारका लागि आउने गरेको जिल्ला अस्पताल पर्वतका प्रमुख डाक्टर बुद्धिबहादुर थापाले जानकारी दिनुभयो । वृद्धवृद्धामा समेत यसको संक्रमण देखिएको छ । दूषित पानी र प्रदूषित हावाहुरीका कारण भाइरलको प्रकोप बढेको अस्पतालका डा थापाले जानकारी दिनुभयो । यसबाट बच्न दूषित खाना र खानेपानी प्रयोग नगर्ने र कारणवस संक्रमण देखिएमा तत्काल उपचारको विधि अपनाउन सुझाव दिएको डाक्टर थापाले बताउनुभयो । पन्ध्र श्ययाको क्षमता रहेको अस्पतालमा अहिले वैकल्पिक बेडको व्यवस्था गरेर बिरामी भर्ना गरिएको छ । लामो समयको खडेरी र गर्मीका कारण छिटो बिरामी परिने भएकाले संख्या बढेको डा थापाले जानकारी दिनुभयो । गाउँगाउँमा पनि भाइरल ज्वरोका बिरामीको संख्या बढेको जानकारी आएपछि प्रत्येक स्वास्थ्य चौकीमा पर्याप्त औषधि र स्वास्थ्यकर्मीलाई चौबिसै घण्टा खटिन निर्देशन दिइएको छ । जिल्लाका अन्य निजी स्वास्थ्य क्लिनिकमा समेत भाइरलका बिरामीको संख्या बढेको जनाएका छन् । शुरुमा टाउको दुख्ने, जीउ दुख्ने, रुघा खोकी लाग्ने, छाती घ्यारघ्यार हुने, हाच्छिउ आउने र उच्च ज्वरो आएर परिक्षण गर्न आउने बिरामीको संख्या बढेको हो। लगातार टाउको दुख्ने, खोकी लाग्ने, छाती घ्यारघ्यार हुने, हाच्छिउँ आउने, उच्च ज्वरोलगायतका लक्षण देखा परेमा तुरुन्त नजिकको स्वास्थ्य संस्थामा पुगेर उपचार गर्न डा थापाले सुझाव दिनुभएको छ । उहाँले यस्ता संक्रमण एकजना मानिसबाट अर्काे मानिसमा सजिलै सर्ने हँुदा बेलैमा सचेत हुनुपर्नेमा जोड दिनुभयो । रासस

चितवन । मान्छे खाने बाघ नियन्त्रणका लागि चितवन राष्ट्रिय निकुञ्जले हात्तीसहित पशु चिकित्सक र वन प्राविधिज्ञको टोली परिचालन गरेको छ । मकवानपुर जिल्लाको मनहरी गाउँपालिका–७ रमौली प्रतापपुरस्थित पर्सा राष्ट्रिय निकुञ्जको क्षेत्रमा सोमबार बाघको आक्रमणबाट एकजनाको मृत्यु भएको थियो । शव उठाउने क्रममा पुनः बाघले आक्रमण गर्दा अन्य दुईजना घाइते भएका थिए । बाघले यसरी मान्छेलाई आक्रमण गरेपछि अन्य मानवीय क्षति हुन नदिन नियन्त्रणका लागि हात्तीसहित टोली खटाइएको चितवन निकुञ्जका सहायक संरक्षण अधिकृत एवं सूचना अधिकारी नुरेन्द्र अर्यालले जानकारी दिनुभयो । डाटगनसहित टोली परिचालन भएको चितवन निकुञ्जले जनाएको छ । सम्भव भए डार्टगनमार्फत नियन्त्रणमा लिइनेछ । बाघ नियन्त्रणमा पर्सा र चितवन निकुञ्जको संयुक्त टोली परिचालन भएको चितवन निकुञ्जका प्रमुख संरक्षण अधिकृत बेदकुमार ढकालले जानकारी दिनुभयो । चितवन राष्ट्रिय निकुञ्जका दुईवटा हात्ती र राष्ट्रिय प्रकृति संरक्षण कोष सौराहाको दुईवटा गरी चार हात्तीसहित पशु चिकित्सक, वन प्राविधिज्ञसहितको टोली बाघ नियन्त्रणका लागि प्रतापपुर पुगेको निकुञ्जका वरिष्ठ पशु चिकित्सक डा कमल गैरेले जानकारी दिनुभयो । “टोलीले आसपास नै बाघ छ भन्ने अनुमान गरेको छ, डा गैंरेले भन्नुभयो, बाघलाई नियन्त्रणको प्रयास भइरहेको छ ।” सोमबार दिउँसो देखिनै टोली परिचालन भएको भन्दै पर्सा राष्ट्रिय निकुञ्जका प्रमुख संरक्षण अधिकृत हरिभद्र आचार्यले राति ११ बजेदेखि दोस्रो अपरेशन शुरु भएको जानकारी दिनुभयो । सो टोलीमा प्राविधिज्ञ, चिकित्सक र डार्ट टोलीसहित करीव ५० जना परिचालन भएको आचार्यले जानकारी दिनुभयो । आज पनि बिहानैदेखि टोलीले बाघको खोजी गरिरहेको जनाइएको छ । रासस

विराटनगर, चैत १२ । प्रदेश नं १ का मुख्य न्यायाधिवक्ता चुँडामणि आचार्यले आज पद तथा गोपनीयताको शपथ ग्रहण गर्नुभयो । प्रदेश प्रमुखको कार्यालयमा आयोजित समारोहमा उच्च अदालत विराटनगरका मुख्य न्यायाधीश डा कुलरत्न भूर्तेलले उहाँलाई पद तथा गोपनीयताको शपथ ग्रहण गराउनुभएको हो । समारोहमा प्रदेश प्रमुख प्रा डा गोविन्द तुम्बाहाङ, मुख्यमन्त्री शेरधन राई, आन्तरिक मामिला तथा कानूनमन्त्री हिक्मत कार्की, सामाजिक विकासमन्त्री जीवन घिमिरेलगायत सुरक्षा निकायका प्रमुख, कानून व्यवसायी, प्राध्यापक र सञ्चारकर्मीको उपस्थिति थियो । नेपालको संविधानको धारा १६० को उपधारा २ बमोजिम आचार्यलाई प्रदेश नं १ को मुख्य न्यायाधिवक्तामा नियुक्तिको सिफारिश गरिएको थियो । वरिष्ठ अधिवक्ता आचार्यले २०४४ सालदेखि जनता ल क्याम्पसमा प्राध्यापक रहनुभएको थियो । २०४६ सालमा अधिवक्ता हुनुभएका आचार्य नेपाल बार एसोसिएसनका केन्द्रीय उपाध्यक्ष र मोरङ बारका अध्यक्षसमेत भइसक्नुभएको छ ।

काठमाडौं, चैत्र १२ । नेपाली कांग्रेसले नेता खुमबहादुर खड्काको स्वास्थ्य अवस्था बुझ्न दुई नेतालाई भारत पठाउने भएको छ । उपचारका क्रममा दिल्ली रहेको नेता खड्काको स्वास्थ्य जटिल बन्दै गएपछि कांग्रेसले केन्द्रीय सदस्यद्वय शंकर भण्डारी र रमेश लेखकलाई मंगलबार (भोलि) भारत पठाउने निर्णय गरेको हो । सोमबारको कांग्रेस केन्द्रीय कार्यसमिति बैठकले उक्त निर्णय गरेको हो । मिर्गौला प्रत्यारोपण गरेका खड्काको स्वास्थ्यमा समस्या देखिएपछि केही समय अघि उनलाई नयाँदिल्ली लगिएको थियो । मिर्गौला, छाती र नसाको समस्याबाट पीडित खड्काको नयाँदिल्लीस्थित एपोलो अस्पतालमा उपचार भइरहेको छ । स्वास्थ्य अवस्था गम्भीर भएपछि उनलाई भेन्टिलेटरमा राखेर उपचार भइरहेको बताइएको छ ।