तेह्रथुम, कात्तिक ११ । वर्षाले अवरुद्ध तेह्रथुमको पूर्वी संक्रान्ति–म्याङलुङ सडक खण्ड छ महिनापछि सञ्चालनमा आएको छ । सवारीसाधन सञ्चालनमा आएपछि आठराई क्षेत्रका स्थानीयवासीलाई सदरमुकाम आवतजावतमा सहज भएको छ । वर्षाका कारण सडकको विभिन्न खण्डमा पहिरो र खाल्डाखुल्डी भएका कारण सवारी साधन सञ्चालनमा गत जेठ महिनाबाट समस्या भएको थियो । सडक अवरुद्ध हुँदा आठराईवासी सात जिल्ला घुमेर यातायातका साधनबाट सदरमुकामको यात्रा गर्न बाध्य थिए । जिल्लाका स्थानीय तहले आ–आफ्ना क्षेत्रका सडक खुलाउन सडक मर्मतमा खर्च गरेको जिल्ला समन्वय समितिका प्रमुख शिवप्रसाद ढुंगानाले बताए । चाडबाडका बेला यात्रुलाई आवतजावतका लागि सहज होस् भनेर सडक मर्मत गरिए पनि अहिले मात्र संक्रान्ति–म्याङलुङ सडक सञ्चालनमा आएको आठराई गाउँपालिकाका अध्यक्ष मानबहादुर लिम्बूले बताए । वर्षाले अवरुद्ध ६८ किलोमिटर आठराई संक्रान्ति–म्याङलुङ सडक सञ्चालनमा आएपछि साना सवारीसाधन समेत आवतजावत गर्नसक्ने सुनसरी यातायत संघ आठराईका प्रमुख बद्री सेढार्इंले बताए । अहिले म्याङलुङ–वसन्तपुर, म्याङलुङ– पोक्लाबाङ, सिधुवा–शुक्रबारे, म्याङलुङ सम्दु, जिरिखिम्ती– मोराहाङ, संक्रान्ति–खाम्लालुङ, सक्रान्ति–थोक्लुङ, औँशीडाँडा–थोक्लुङ सडक सञ्चालन भएका छन् ।

काठमाडौं, कात्तिक ११ । बत्तीसपुतलीस्थित श्रीरामचन्द्र मन्दिरमा नेपालमा नै पहिलोपटक इ–पूजाको प्रारम्भ गरिएको छ । श्रीरामचन्द्र मन्दिर जीर्णोद्धार एवं संवद्र्धन समितिले शुक्रबार राजधानीमा आयोजना गरेको कार्यक्रममा मन्त्रिपरिषदका पूर्वाअध्यक्ष खिलराज रेग्मीले इ–पूजाको शुभारम्भ गर्दै देशमा नै पहिलोपटक इ–पूजाको सुरुआत गरेर मन्दिरले धार्मिक पर्यटन प्रवद्र्धनमा नयाँ आयाम थपेको बताए । पूर्वमन्त्री शंकरप्रसाद कोइरालाले प्रविधिमार्फत् मन्दिर विश्वभर छरिएर रहेका भक्तजनसम्म पुगेको र मन्दिरबाट पुनःनिर्माण र व्यवस्थापनको पाठ अरूले सिक्नसक्ने बताए । मन्दिर सम्वद्र्धन समितिका सदस्यसचिव डा. गोविन्द टण्डनले अनलाइनबाट भुक्तानी गरी रु ५०१ देखि रु एक लाख ११ हजार १११ सम्मको पूजा गर्नसक्ने व्यवस्था गरिएको बताए । केही महिनामै अनलाइनमार्फत् प्रत्यक्षरुपमा पूजा गरेको दृश्यसमेत देखाउन तयारी गरिएको उनले जानकारी दिए । मन्दिरको वेबसाइट www.ramepuja.org मा गएर पूजाका लागि फाराम भर्नसकिने बताइएको छ । इ–पूजा व्यवस्थापनको जिम्मेवारी नेपारिका टेक्नोलोजी प्रालिलाई दिइएको छ । सो अवसरमा प्रालिका दुर्गा फुयाँल, मन्दिर व्यवस्थापन समितिका अध्यक्ष केशवध्वज राणालगायतले सांस्कृतिक गतिविधिलाई आधुनिक प्रविधिसँग जोडिनुपर्ने धारणा राखे ।

काठमाडौं, कात्तिक ११ । धर्मगुरुको भेष धरी कामलीला गर्ने स्वामीहरूको कर्तूत आजकल भटाभट सार्वनजिक भइरहेका छन् । भारतको कर्नाटकमा एक कथित स्वामीको आपत्तिजनक अवस्थाको भिडियो सार्वजनिक भएको छ । समाचारहरूमा आएअनुसार, स्वामीले मठभित्रै एक महिलासँग सम्बन्ध बनाइरहेका थिए । त्यहाँ उपस्थित कुनै एक मानिसले यसको भिडियो बनाएर लीक गरिदिएको थियो । स्वामीको नाम नन्जेश्वर हो र उससँग भएकी महिला एक अभिनेत्री हुन् । भिडियो कहिले खिचिएको थाहा हुन सकेको छैन तर यस मामिलामा आरोपित स्वामीलाई प्रहरीले पक्राउ गरेको छ । दयानन्द उर्फ नन्जेश्वर स्वामीले मठलाई दिइएको जमीनको दुरुपयोग गरेको समेत आरोप छ । यी स्वामीको नाम यसअघि पनि महिलाहरूसँग जोडिएकाृ बताइएको छ । नन्जेश्वर स्वामी पर्वतराज शिवाचार्यका छोरा हुन् । शिवाचार्य चाहिँ कर्नाटकको मदेवनपुरा मठका अध्यक्ष हुन् । सन् २०११ मा नन्जेश्वर स्वामी दयानन्द मठका अध्यक्ष बन्न चाहन्थे तर यसका लागि समर्थन पाएनन् ।

लमजुङ,कात्तिक ११ । विगतका बर्ष हिमाली जिल्ला मनाण्का बासिन्दा यो मौसममा जाडो छल्न बेसी झर्ने सुरसारमा लाग्थे । तर यस बर्ष उनीहरु गाउँमै छन् । आजको कान्तिपुरमा खबर छ । पोखरालगायत स्थानमा बस्दै आएकाहरुसमेत गाउँ फर्कदै छन् । चुनाव नसकिएसम्म सहर नझर्न उम्मेदवारले मतदातालाई आग्रह गरेका छन् । मनाङ गाउँका छिरिङ लोप्साङ गुरुङ मंसिर १० को चुनावपछि मात्रै काठमाडौं जाने बताउँछन् । उनले भने, -नेताहरु गाउँ आएका छन् । -चुनावसम्म बस्नुपर्यो । -अब भोट हालेर मात्रै झर्नुपर्ला

काठमाडौं, कात्तिक ११ । झापाको अर्जुनधाराका बालक हत्यापछि आन्दोलनमा उत्रिएका प्रदर्शनकारीमाथि प्रहरीले गोली चलाउँदा शुक्रबार थप एक जनाको मृत्यु भएपछि सरकारले चार सदस्यीय उच्चस्तरीय छानविन समिति गठन गरेको छ । गृहमन्त्रालयका सहसचिव वीरेन्द्रकुमार यादवको संयोजकत्वमा चार सदस्यीय छानविन समिति गठन गरेको हो । समितिमा नेपाल प्रहरीका प्रहरी नायव महानिरीक्षक रमेशकुमार भट्टराई, सशस्त्र प्रहरीका प्रहरी नायव महानिरीक्षक चिरिञ्जीवी अधिकारी र राष्ट्रिय अनुसन्धान विभागका अनुसन्धान निर्देशन हरिहर पौडेल सदस्य छन् । असोज १४ गते हराएका अर्जुनधारा ११ का बालक ११ वर्षीय लक्ष्मण शिवाकोटी मृत भेटिएपछि घटनाको छानविन गर्न माग गर्दै शुक्रबार वर्तामोडामा प्रदर्शन भएको थियो । प्रदर्शन अनियन्त्रित भएपछि प्रहरीले गोली चलाउँदा अर्जुनधारा नपा ५ का वर्ष ३० का नरेश थापाको मृत्यु भएको थियो । थापाको मृत्युपछि प्रदर्शनकारीले तोडफोड र आगजनी गरेका थिए । घटनापछि शुक्रबार दिउँसो १ः ३० बजेबाट लगाइएको कफ्र्यू अनिश्चित समयका लागि लगाइएको छ । गृहमन्त्रालयकाअनुसार प्रहरी र प्रदर्शनकारीबीच भएको झडपमा ६ सर्वसाधारणसहित नेपाल प्रहरीतर्फ २७ जना र सशस्त्र प्रहरीका सात सुरक्षाकर्मी घाइते भएका छन् । घाइतेको बीएनसी र मेची अञ्चल अस्पतालमा उपचार भइरहेको छ । गृहले शुक्रबार भएको घटनाप्रति दुःख ब्यक्त गर्दै मृतकप्रति श्रद्धाञ्जली ब्यक्त गरेको छ । गृह मन्त्रालयकाे  विज्ञप्ति

काठमाडौं, कात्तिक ११ । पहिला मदिरा सडकको अवस्थाका कारण बढी दुर्घटना हुने उपत्यकामा पछिल्लो समयमा दुर्घटनाको कारकमा परिवर्तन देखिएको छ । पछिल्लो समय तनाव, उच्च रक्तचाप, कानमा राखेको मोबाइल डिभाइस, छारे रोग र अनुभव नभएका चालकका कारण दुर्घटनम बढी हुने गरेको छ । यो कुरामा न प्रहरीलाई हेक्का छ, न चालकलाई नै । मस्तसँग हाँकिरहेको सवारीसाधन बिनाकारण ठोक्किन पुग्छ । सडकमा उभिएका ट्राफिक प्रहरीले कारण केलाउँदा यिनैमध्ये कुनै देखिन्छ । ‘बाटो, गाडी सबै ठिक हुन्छन्, त्यस्तो बेला सडक छेउको बिजुलीको खम्बामा ठोक्किएका हुन्छन्,’ ललितपुर ट्राफिक परिसरका प्रहरी निरीक्षक सीताराम हाछेथुले भने । ‘देखिने खास कारण विनै दुर्घटना भएका हुन्छन्, सोध्दा एक्कासी अँध्यारो देखेँ भन्छन्,’ उपत्यका ट्राफिक प्रहरी महाशाखाका प्रमुख डिआइजी सर्वेन्द्र खनालले भने । ‘यसबारे मनस्थितिको अध्ययन भएको छैन, तर मानसिक तनाव या उच्च रक्तचापको कारणले दुर्घटना भएको देखिन्छ,’ उनले भने । -नागरिक दैनिकबाट

काठमाडौं, कात्तिक ११ । दैलेखको आठबीस नगरपालिकाको राकमकर्णालीस्थित जाक्सी गाउँ निवासी नानीदेवी शाही हिजोआज एचआइभीसँग लडिरहेकी छन् । उनलाई एचआईभी संक्रमण भएको १० वर्ष भयो । उनका श्रीमान मजदुरीका लागि भारत जान्थे । भारतमा असुरक्षित यौनसम्पर्क गरेका कारण एचआईभी संक्रमित भएपछि उनको मृत्यु भइसकेको छ । नानीदेवीले श्रीमानको मृत्यु भएको ५ वर्षपछि मात्र आफूलाई पनि संक्रमण भएको जानकारी पाइन् । उपचारमा हालसम्म उनले आफ्नो खेतबारी बेचिसकेकी छन् । उनका देवरको पनि एचआईभीका कारण मृत्यु भइसकेको छ । जाक्सीकै ६३ वर्षीय धनसरा माझीको पीडा पनि कम छैन । उनले आफू एचआईभी संक्रमित भएको थाहा पाएको १० वर्ष बित्यो । मजदुरीकै क्रममा उनका श्रीमानको भारतमा मृत्यु भएपछि उनी लामो समयसम्म बिरामी भइन् । नेपालगञ्जमा परीक्षण गर्दा उनमा पनि संक्रमण भएको खुल्यो । –नेपाल समाचारपत्र दैनिकबाट

झापा, कात्तिक १० । झापाको बिर्तामोडमा प्रहरीको गोली लागी एक जनाको मृत्यु भएको छ । अर्जुनधारा नगरपालिका–११ का नरेश थापाको प्रहरीले हानेकोे गोली लागी मृत्यु भएको हो । बालकको मृत्यु प्रकरणबारे छानविन गर्न माग गर्दै निकालिएको र्‍यालीमा प्रहरीले गोली चलाउँदा एक जनाको मृत्यु भएको छ । विर्तामोडस्थित इलाका प्रहरी कार्यालय अगाडि प्रदर्शन गरिरहेको समूहमाथि प्रहरीको गोली चलाएको थियो । प्रहरीले १४ राउण्ड गोली चलाएको थियो । गोली लागेर १ जनाको मृत्यु भएको छ भने ७ जना घाइते छन् । घाइतेको स्थानीय अस्पतालमा उपचार भइरहेको छ ।

धादिङ, कार्तिक १० । त्रिभुवन राजपथ अन्तर्गत धादिङस्थित धुनिवेशी नगरपालिका- ९ मा शुक्रबार विहान भएको दुर्घटनामा २ जनाको घटनास्थलमै मृत्यु भएको छ । गल्छी वैरेनीबाट काठमाडौं गइ रहेको बा २ ख ७१८२ नम्वरको वालुवा वोकेको ट्रिपरले काठमाडौंवाट नौविसे आइरहेको  बा ८२ प ७७९७ नम्वरको मोटर साइकललाई ठक्कर दिदा दुई जनाको घटना स्थलमै मृत्यु भएको छ । मृत्यु हुनेमा मोटर साइकल चालक काठमाडौं बबरमहल वस्ने २१ वर्षीय रामेश्वर सिलवाल र सोहि मोटरसाईलमा सवार काठमाडौं महानगरपालिका –११, त्रिपुरेश्वर वस्ने वर्ष २१ का सलिन तुलाधरको घटनास्थलमै मृत्यु भएको हो । ट्रिपर चालकलाई प्रहरी नियत्रणमा रहेका ईलाका प्रहरी कार्यालय खानीखोलाका प्रहरी निरीक्षक जीवन निरौलाले वताए ।

काठमाडौं,कात्तिक १० । सामान्य प्रशासन मन्त्रालयले स्थानीय तहमा पठाएका १५ सयमध्ये झन्डै पाँच सय कर्मचारीको सरुवा फिर्ता गरिएको छ । फिर्ता गरिएकामध्ये करिब २ सय ५० जना सोर्सफोर्स लगाउनेहरु छन् भने बाँकी बिरामी, अपांग तथा समस्यामा परेका कर्मचारी रहेको मन्त्रालयले जनाएको छ । मन्त्री, सांसद्, विभिनन दलका नेता, टे«ड युनियनका नेतालगायत भीआईपीहरुको उच्च दबाबमा सरुवा भईसकेका कर्मचारीको सरुवा फिर्ता गरिएको हो ।

काठमाडौं, कात्तिक १० । उदाउँदो सूर्यलाई अघ्र्य दिएर छठ पर्वको समापन गरिएको छ । मिथिलाञ्चलको महान् पर्व छठ आज विहान उदाउँदो सूर्यलार्य अघ्र्य दिएर समापन गरिएको हो । छठको मूख्य दिन हिजो काठमाडौंसहित तराईका विभिन्न जिल्लामा अस्ताउँदो सूर्यलाई अघ्र्य दिँदै षष्ठी माताको पूजा गरी धुमधामका साथ मनाइयो । त्यसपछि पनि भक्तजनहरु रातभर जाग्राम बसी पूजा आराधना गर्दै आज विहान उदाउँदो सूर्यलार्य अघ्र्य दिएर आ–आफ्ना घर फर्किएका हुन् । छठको तेस्रो तथा मूख्य दिन अस्ताउँदै गरेको सूर्य तथा षष्ठी मातालाई अर्घ दिन श्रद्धालु भक्तजनहरु नदी, तलाउ, पोखरीमा भेला भएका थिए । तराईसहित देशका विभिन्न जिल्लामा झकिझकाउसँग सिंगारिएका नदी तथा तलाउ किनारामा जम्मा भएका भक्तजनले श्रद्धापूर्वक सूर्य र षष्ठी माताको उपासना गर्दै पूजा गरे । जनकपुरका ऐतिहासिक गंगा सागर, धनुष सागर, अरगजा पोखरी, दशरथ तलाउसहित दुई दर्जनभन्दा बढी पोखरीमा छठ मनाउन ब्रतालुको घुईंचो लागेको थियो । वीरगञ्जको घडीअर्वा पोखरीमा पनि छठको उत्तिकै रमझमका साथ यो पर्व मनाइयो । नवलपरासीमा पनि उसैगरी धुमधामसँग मनाईयो । परासीसंँगै उनवच, त्रिवेणी, नवलपुर क्षेत्रलगायतका नदी र तालहरुमा पनि पूजाआजा गरिएको छ । सप्तरीको कोशी ब्यारेज, भारदह, छिन्नमस्ता, कञ्चनपुर, हनुमाननगर, बीरेन्द्रबजार, सीतापुर, महुली, रुपनी, बर्साइन, पातो, कल्याणपुर, कडरबोना, मानराजा, सखडा, सदरमुकाम राजविराजसहितका स्थानहरुमा पनि उत्तिकै उल्लासले यो पर्व मनाईदै छ । कोशी ब्यारेजमा भारतको पूर्णिया, फारबीसगञ्ज, राजपुरसहित स्थानबाट छठ मनाउन ब्रतालु ओइरिएका छन् । विराटनगरमा पनि विभिन्न नदी, तलाउ, पोखरीमा भेला भएर यो पूर्व मनाइयो । झापाको मेची नदी किनारमा नेपाल भारत दुबै देशका श्रद्धालु भेला भएर पूजा आराधना गरेका थिए । यता, सिन्धुली जिल्लाका केही स्थानमा छठ मधेशी र पहाडिया समुदाय एकापसमा मिलेर मनाएका छन् ।

काठमाडौं, कात्तिक १० । चालकहरुसँग घुस लिएको आरोपमा तीनजना ट्राफिक प्रहरी निलम्बनमा परेका छन् । महानगरीय ट्राफिक प्रहरी महाशाखाले एक असई र दुई जवानलाई बुधबार निलम्बन गरेको हो । निलम्बनमा पर्नेमा चुणामणि पोखरेल, जवानद्वय रणबहादुर माल र जालन्धर बास्तोला छन् । तीनैजना रंगेहात घुससहित पक्राउ परेका हुन् । थानकोट तथा नागढुंगा क्षेत्रमा कार्यरत ट्राफिक प्रहरीविरुद्ध उजुरी आएपछि ट्राफिक प्रहरी महाशाखाका डिआइजी सर्वेन्द्र खनालले महाशाखामा सादा पोशाकमा छड्के पठाएका थिए । त्यस क्रममा चालकसँग लिएको घुस रकमसहित उनीहरु पक्राउ परेका थिए । महाशाखाले निलम्बन गरी उनीहरुमाथि कारवाही अघि बढाएको छ । यो घटनापछि नागढुंगा र थानकोट प्रभागमा कार्यरत सबै ट्राफिक प्रहरीलाई महाशाखाले तानेको छ । इन्चार्जसहित नागढुंगामा कार्यरत १६ र थानकोटमा कार्यरत १५ जनालाई महाशाखामा सरुवा गरिएको हो । –नयाँ पत्रिका दैनिकबाट

काठमाडौं, कात्तिक १० । मुलुककै विद्युतको ‘ब्याकअप’ का रुपमा रहेको कुलेखानी जलाशय यस वर्ष भरिएको छैन । यस वर्षको मनसुन बन्द भए पनि कुलेखानी जलाशय भने भरिएन । गत वर्ष पनि यस्तै स्थिति थियो । कुलेखानी जलाशयमा १ हजार ५ सय २२.१६ सेन्टिमिटरमात्र पानीको सहत रहेको छ । विद्युत आपूर्तिको ‘पिकआवर’ मा प्राधिकरणले कुलेखानी सञ्चालन गर्दै आएको छ । मकवानपुरको तल्लो भागमा वर्षायाममा व्यापक रुपमा वर्षा भएर बस्ती डुबान र पहिराले घरहरु नै बगायो तर कुलेखानीको जलाधार क्षेत्रमा खासै पानी नपरेकाले पनि जलाशय नभरिएको हो । –कान्तिपुर दैनिकबाट

काठमाडौं, कात्तिक १० । फेसबुकले लाइक तथा सेयरको मात्राका आधारमा शुल्क लाग्ने नयाँ नियम ल्याउने तयारी गरेको छ। उक्त नियम अनुसार थोरै मात्र बजार विस्तार गरेका सञ्चार क्षेत्रलाई प्रभाव पार्ने देखिन्छ। फेसबुकले अहिले परीक्षण गरिरहेको यो नियम कार्यान्वयनमा आएपछि फेसबुकमा कुनै पनि समाचारले पाउने लाइक तथा सेयरका मात्राअनुसार फेसबुक कम्पनीलाई शुल्क तिर्नुपर्ने हुन्छ। फेसबुकको उक्त नियमले साना मिडियाहरू प्रत्यक्ष प्रभावित हुनेछन् । बजार विस्तार यथेष्ट मात्रामा हुन नसकेका मिडियाहरू यस नियमले बन्द नै हुने अवस्थामा पुग्न सक्ने सामाजिक सञ्जाल विश्लेषकहरुको भनाइ छ। फेसबुकको यो नियम अहिले स्लोभाकिया, सर्विया, श्रीलङ्कालगायतका मुलुकमा परीक्षण भइरहेको छ। फेसबुक कम्पनीका अनुसार मानिसहरूले अरूको पोष्टलाई लाइक तथा सेयर परिपाटीका वृद्धि भएका कारण यस्तो नियम ल्याउन लागिएको हो। यस्तो नियम परीक्षणका लागि ल्याउन लागिएको समेत कम्पनीले बताएको छ। सामाजिक सञ्जाल फेसबुकबाट हुने बौद्धिक चोरीलाई नियन्त्रण गर्नका लागि फेसबुक कम्पनीले यस्तो नियम ल्याउन लागेको दाबी गरेको छ। लाइक तथा सेयरको मात्राका आधारमा शुल्क तिर्न नसक्ने प्रकाशक कम्पनीहरू यस नियमले अप्ठ्यारोमा पर्नेछन्। बजफिडजस्ता फेसबुकबाट अडियन्स आउने समाचार पोट्रलहरु यो नियमका कारण धरासायी हुने दाबी गरिएको छ।एजेन्सी

काठमाडौं, कात्तिक ९ । नयाँ शक्ति पार्टी नेपालको केन्द्रीय परिषद्का वरिष्ठ सदस्यद्वय डा भरत लामिछाने र ठाकुरप्रसाद चापागाईँलगायतले बृहत् वाम ध्रुवीकरण अभियानमा समाहित हुने निर्णय गरेका छन । नयाँ शक्तिमा रहेका सबै नेता तथा कार्यकताई बृहत् वाम एकतामा सहभागी हुन आग्रह गर्दै उनीहरुले नेपालको आर्थिक, सामाजिक तथा सांस्कृतिक परिवर्तनका लागि परिवर्तनकारी शक्तिहरु एकजुट हुनुपर्नेमा जोड दिए । डा लामिछाने र चापागार्इंले ‘सनकको भरमा राजनीति नचल्ने’ भएकाले लोकतान्त्रिक गठबन्धन परित्याग गरी वाम ध्रुवीकरण अभियानमा सामेल हुन डा बाबुराम भट्टराईलगायतलाई समेत आग्रह गरे । बृहत् वाम एकता अभियानबाट बाहिरिएर डा भट्टराईले इतिहासको आवश्यकतालाई सम्मान गर्न नसकेको समेत उनीहरुले आज जारी गरेको विज्ञप्तिमा उल्लेख छ । रासस