काठमाडौं, कात्तिक १९ । ललितपुर महानगरपालिका प्रमुख चिरिबाबु महर्जनको कार्यशैलीप्रति असन्तुष्टि जनाउँदै अधिकांश वडाध्यक्षसहित कार्यपालिका सदस्यहरुले विरोध गरेका छन् । प्रमुख महर्जन निरङकुश तबरले चलेको भन्दै १४ जना वडाध्यक्षसहित ८ जना नगर कार्यपालिकाका सदस्यहरुले विरोध गरेका हुन् । विरोधका कारण शुक्रबार तय गरिएको महानगरपालिकाको वैठक स्थगित गरिएको नेपाल समाचारपत्रमा खबर छ ।

भक्तपुर, कात्तिक १८ . संविधान कार्यान्वयन र देशको समृद्धिका लागि आसन्न प्रतिनिधि र प्रदेशसभा निर्वाचनका लागि वाम गठबन्धन बनेको भक्तपुरबाट उम्मेदवारी दिएका वाम उम्मेदवारहरुले बताएका छन् । प्रेस चौतारी नेपाल र प्रेस सेन्टर नेपालले आयोजना गरेको संयुक्त पत्रकार सम्मेलनमा भक्तपुर निर्वाचन क्षेत्र नं. १ र २ का उम्मेदवारहरुले यस्तो बताउनु भएको हो । कार्यक्रममा पूर्वमन्त्री एवं एमालेका तर्फबाट भक्तपुर निर्वाचन क्षेत्र नं. २ बाट प्रतिनिधिसभामा उम्मेदवारी दिनुभएका महेश बस्नेतले देशमा संविधान कार्यान्वयन गरी स्थिर सरकार गठन गर्दै देशको समृद्धिका लागि वामगठबन्धन बनेको बताउनुभयो । विपक्षीले आफूविरुद्ध गर्ने आलोचनादेखि नडराउने बताउँदै उहाँले विपक्षीसँग सौहार्द रुपमा चुनाव लडेर विजय हासिल गर्ने दाबी गर्नुभयो । आफू छोटो समयका लागि मन्त्री हुँदा भक्तपुरमा पाँच अर्बको विकास बजेट ल्याएर ४८ वटा सडकदेखि हनुमन्ते र मनोहरा करिडोरको काम भइरहेको, मेलम्चीको पानी ट्याङ्की बनिरहेको दाबी गर्दै उहाँले आफू भक्तपुरको मुहान फेर्न तयार रहेको बताउनुभयो । भक्तपुर क्षेत्र नं १ प्रदेश क बाट उम्मेदवार हुनुभएका माओवादी केन्द्रका जिल्ला ईन्चार्ज देवीप्रसाद ढकालले लोकतन्त्रको सुनिश्चितताका लागि वाम गठबन्धन बनेको बताउनुभयो । निर्वाचनपछि प्रदेश कानून बनाएर संविधान कार्यान्वयन गर्न र स्थायी सरकार गठन गरेर विकासको गतिलाई तिब्र पार्ने आफ्नो उद्देश्य रहेको उहाँको भनाइ थियो । कार्यक्रममा क्षेत्र नं २ प्रदेश  क का एमालेका उम्मेदवार शशीजंङ्ग थापा र प्रदेश नं ख बाट एमालेका उम्मेदवार राजेन्द्रमान श्रेष्ठले एमालेको जीतले नै देशको समृद्धि हुने विचार व्यक्त गर्नुभयो । यता क्षेत्र नं १ को प्रतिनिधिसभामा वाम गठबन्धनबाट उम्मेदवार भएका माओवादी केन्द्रका मिलन सुवाल, सोही क्षेत्रको प्रदेश नं २ ख भक्तपुरका उम्मेदवार रोमन शिलाकारले वाम गठबन्धनलाई जनताको साथ रहने विश्वास व्यक्त गर्नुभयो । एमाले र माओवादी केन्द्रको छुट्टाछुट्टै भेला यसैबीच, प्रतिनिधि र प्रदेशसभाको आसन्न निर्वाचनमा एकताबद्ध भएर जाने लक्ष्यका साथ गठन भएको वाम गठबन्धन भक्तपुरमा टुट्ने अवस्थामा पुगेको छ । उम्मेदवारको विवादपछि आज एमाले र माओवादी केन्द्रले जिल्लामा छुट्टाछुट्टै भेला गरेका छन् । भक्तपुरको निर्वाचन क्षेत्र नं १ को प्रदेश नं १ क मा माओवादी केन्द्र र एमालेको छुट्टाछुट्टै उम्मेदवारी परेपछि दुई पार्टीबिच विवाद चुलिएको हो । यस क्षेत्रमा वाम गठबन्धनको तर्फबाट माओवादी केन्द्रका जिल्ला संयोजक डिपी ढकालको उम्मेदवारी परेको छ भने एमालेको तर्फबाट एमाले जिल्ला सचिव हरिशरण लामिछानेको उम्मेदवारी परेको छ । आज सूर्यविनायकमा एमाले समर्थित युवा संघ नेपाल र अनेरास्ववियु, भक्तपुरले आयोजना गरेको संयुक्त विस्तारित भेलामा यस क्षेत्रको उम्मेदवारको रुपमा लामिछानेलाई अगाडि सार्दै प्रचारमा जुटेको थियो । आजै, यता माओवादी केन्द्रले पनि सूर्यविनायकमै कार्यकर्ता भेला गरेर भक्तपुरमा वाम एकतामा संकट आएको र एमालेले उम्मेदवारी फिर्ता नलिए वाम एकता तोडेर अगाडि बढ्ने गरी तयारी रहने बताइएको छ । एमाले सम्बद्व युवा संघ नेपाल र अनेरास्ववियुले गरेको कार्यक्रमको बारेमा जानकारी दिँदै युवा संघ नेपालका भक्तपुर अध्यक्ष दीपक दाहालले एमालेको आधिकारिक उम्मेदवार हरिशरण लामिछाने भएकाले उहाँको प्रचारमा युवा जुटेको बताउनुभयो । अनेरास्ववियूका जिल्ला अध्यक्ष जयराम बास्तोलाले एमालेको उम्मेदवारले मात्रै चुनाव जित्ने निश्चित भएकाले लामिछानेलाई अगाडि सारेको बताउँदै उहाँ नै उम्मेदवार भएको बताउनुभयो । यता वाम गठबन्धनका रुपमा रहेको माओवादी केन्द्रका उम्मेदवार ढकालले भने आफू गठबन्धनको उम्मेदवार भएकाले कुनै हालतमा उम्मेदवारी फिर्ता नलिने बताउनुभयो । एमाले र माओवादी केन्द्रका उच्च नेताहरूको बैठकले भक्तपुर निर्वाचन क्षेत्र नं १ को प्रतिनिधि र प्रदेशसभाको दुईवटै प्रदेश माओवादी केन्द्रको भागमा र क्षेत्र नं २ को प्रतिनिधि र प्रदेशसभा एमालेको भागमा परेकाले यसलाई कायम राख्नुपर्ने बताउनुभयो । उहाँले भक्तपुरमा वाम गठबन्धन संकटमा परेको बताउँदै भोलि लामिछानेले उम्मेदवारी फिर्ता नलिए गठबन्धन तोडेर माओवादी केन्द्र अगाडि बढ्ने बताउनुभयो ।

धादिङ, कात्तिक १८ । क्षेत्र नं २ को प्रदेशसभा (क) का वाम गठबन्धनका उम्मेदवार डा रामकुमार अधिकारीले वाम तालमेलका कारण आफू उम्मेदवार भएकाले नेकपा एमाले र नेकपा ण्माओवादी केन्द्र पार्टी एकीकरण नभए आफूले चुनाव जितेर राजीनामा दिने बताएका छन । सदरमुकाम धादिङबेंसीमा माक्र्सवाद अध्ययन प्रतिष्ठानले शनिबार आयोजना गरेको कम्युनिष्ट एकता र आसन्न निर्वाचनबारे विचारगोष्ठीमा डा अधिकारीले आफू एमाले र माओवादी केन्द्र दुवैको उम्मेदवार भएकाले कहीँ कतैबाट पार्टी एकता नभएमा आफूले जितेर प्रदेशसभा सदस्यबाटै राजीनामा दिएर स्वतन्त्र नागरिक भएर बस्ने प्रतिबद्धता गरे । एमाले पोलिटब्यूरो सदस्य डा गंगालाल तुलाधरले समाजवादको बाटोमा पुग्न वाम गठबन्धनको अपरिहार्यता भएको बताए । माओवादी केन्द्रका केन्द्रीय सदस्य पुष्पविक्रम मल्लले कम्युनिष्ट पार्टी एकताले जनतालाई सकारात्मक सन्देश दिएको बताए ।

धादिङ, कात्तिक १८ । नीलकण्ठ नगरपालिकाअन्तर्गतको १४ वटा वडा कार्यालय नगरपालिकाको कार्यालय र नगरपालिकाअन्तर्गत निर्माण गरिने चारवटा पार्कसमेत गरी २० स्थानमा आगामी पाँच वर्षका लागि निःशुल्क इन्टरनेट सेवा उपलब्ध हुने भएको छ । नीलकण्ठ नगरपालिकाको पहिरो बैठकबाट नीलकण्ठ नगरपालिकालाई स्मार्ट सिटी बनाउने घोषणा गरेकाले त्यसको पूर्वाधारका लागि माइक्रोसफ्ट इनोमेशन सेन्टरसँगको साझेदारीमा उक्त सेवा उपलब्ध गराउन लागेको हो । शुक्रबार एक समारोहका बीच नीलकण्ठ नगरपालिकाका प्रमुख भीमप्रसाद ढुंगाना र माइक्रोसफ्ट इनोमेशन सेन्टरका राष्ट्रिय निर्देशक वीरलोचन तुलाधरले सम्झौतापत्रमा हस्ताक्षर गरे । इन्टरनेट सेवा क्षेत्रका विज्ञ बाबुराम आचार्य, राष्ट्रिय निर्देशक तुलाधर, कार्यकारी अधिकृत जगन्नाथ लामिछानेलगायतका वक्ताले २१औँ सताब्दीको विज्ञान र प्रविधिको युगमा जुनसुकै काममा पनि इन्टरनेट सेवा आवश्यक भइसकेको सान्दर्भिकतामाथि प्रकाश पारे । प्रमुख भीमप्रसाद ढुंगानाले आफूले प्रतिबद्धता जनाएको काम पूरा गर्न पाएकामा खुशी व्यक्त गर्दै चाँडै नै सार्वजनिक पार्कको निर्माण गरी नगरपालिकाभित्रको १४ वटै वडामा पक्की बाटो निर्माण गर्ने कामको शुरुवात समेत गरिसकेको बताए ।

काठमाडौं, कात्तिक १८ । अनामनगरको गल्ली छिचोल्दै म्युजिक बैंक आइपुगिन् विमला लामा थिङ । प्लास्टिकको बैजनी चप्पल ढोकाबाहिर खोलेर ६७ वर्षीया उनी स्टुडियोभित्र पसिन्– गीत रेकर्ड गराउन । विमला ती गायिका हुन्, जसको सपना १६ पटकसम्म रेडियो नेपालको स्वर परीक्षामा ‘असफल’ हुँदा समेत मरेन । ‘मेरो गीत आज रेकर्ड होला त बाबु ?’ रेकर्डिङमा व्यस्त कृष्ण पुनलाई कुप्रो ज्यानले नमस्कार टक्र्याउँदै प्रश्न गरिन् । कृष्णको हाउभाउले शुभ बताइरहेको थियो । उनी सोफामा बसिन् । एकछिन सुस्ताइन् अनि घडी हेरिन् । त्यसपछि झोलाबाट सीडीका पोका र कागजका टुक्रा निकालिन् । ‘गीत रेकर्ड गराउन पैसा कहाँबाट ल्याउनुहुन्छ नि आमा ?’ कृष्णले विमलालाई सोधे । उनले पुलुक्क हेरिन् । एकछिन चुपचाप बसिन् । ‘महिनाको एक हजार एकल महिलाको भत्ता आउँछ । त्यही जम्मा गरेर रेकर्ड गर्छु,’ विमलाको भनाइ मार्मिक थियो । उनको भनाइले स्टुडियोमा सन्नाटा छायो । उनी भने गीतका पानाहरू मिलाउन व्यस्त थिइन् । विमला बाँचिरहेको यो उमेरमा कोही आँगनको डिलमा बसेर नाति÷नातिनी खेलाउँदै होलान्। कोही कौसीमा बुढेसकाल गन्दै होलान् । कोही वृद्धाश्रममा बसेर अन्तिमपटक सन्तानको मुख हेर्न पदचाप पर्खिरहेका पनि होलान् । उनी भने राजधानीका रेकर्डिङ स्टुडियो धाइरहेकी छन् । –अन्नपूर्ण पोस्ट दैनिकबाट

गुल्मी, कात्तिक १७ । नेपाली काग्रेसका केन्द्रीय सदस्य एवं गुल्मी क्षेत्र नम्वर १ का प्रतिनिधी सभा सदस्यका उम्मेदवार चन्द्र भण्डारीले आफु वेलायतको प्रधानमन्त्री हुनु पर्ने खालको नेता भएको दावी गरेका छन् । ‘गुल्मी क्षेत्र नम्वर २ को सांसद भएको कार्यकालमा गरेको विकास हेर्ने हो भने आफू बेलायतको प्रधानमन्त्री हुनु पर्ने हो ।’ प्रेस युनियन गुल्मीले आयोजना गरेको कार्यक्रममा भण्डारीले भने, ‘यति विकास गर्दा पनि तपाई पत्रकारले लेखी दिनु हुन्न भने मेरो भन्नु केहि छैन् ।’ गुल्मी क्षेत्र नं. २ बाट वाम गठबन्धनका तर्फबाट एमाले सचिव प्रदिप ज्ञवाली उम्मेदवारी बनेका छन । ज्ञवाली र भण्डारीबीच यसअघिदेखि नै तीब्र प्रतिस्पर्धा हुने गरेको थियो । तर अहिले वाम गठबन्धनले गर्दा भण्डारीलाई निकै गाह्रो हुने देखिएको छ । वाम गठबन्धनपछि देशभर राजनीतिक ध्रुबीकरण तीब्र रुपमा अघि बढिरहेको छ ।

जनकपुरधाम, कात्तिक १७ । लागुपदार्थ बेचबिखन गर्ने एक भारतीयलाई धनुषा जिल्ला प्रहरीले पक्राउ गरेको छ । जिल्ला प्रहरी कार्यालय धनुषाबाट खटिएको प्रहरी टोलीले भारतीय सीमाबाट नेपालतर्फ ठूलो मात्रामा लागुपदार्थ ल्याउँदै गरेका भारत मधुवनी जिल्ला हरलाखी ग्राम पञ्चायत इटहर्वा वडा नं १ का २४ वर्षीय अन्सारूल राइनलाई पक्राउ गरी यहाँ आज आयोजित पत्रकार सम्मेलनमा सार्वजनिक गरियो । प्रहरी नायब उपरीक्षक प्रवीण धितालका अनुसार धनुषा जिल्ला धनौजी–४ बाट राइनलाई प्रतिबन्धित नाइट्रोभेट नामक ५०० पत्ता लागुपदार्थसहित पक्राउ गरिएको हो । त्यस्तै तराई राष्ट्र जनतान्त्रिक पार्टीका सैन्य कमान्डर बताउने कमला नगरपालिका वडा नं ७ का ३२ वर्षीय विजय यादवलाई पक्राउ गरिएको छ । इलाका प्रहरी कार्यालय खजुरीबाट खटिएको प्रहरी टोलीले सीमा नजिक जाँच गर्ने क्रममा यादवलाई पक्राउ गरेको बताइएको छ । यादव सिरहाको मिर्चैयामा माओवादी नेता लालु खानलाई गोली हानी घाइते बनाएको ज्यान मार्ने उद्योग तथा संगठित अपराधमा संलग्न रहेको जनाइएको छ । कार्यालयका अनुसार छ महिनामा सो भूमिगत समूहका चार जनालाई पक्राउ गरिएको छ । पक्राउ पर्नेमा धनुषा जिल्ला ठाडीझिजा गाविस वडा नं ४ का ३५ वर्षीय प्रमोद ठाकुर तथा कमला नगरपालिका वडा नं २४ वर्षीय विष्णुदेव सहनी, वडा नं ७ का ३६ वर्षीय दीपकुमार महतो र २० वर्षीय छोटकन ठाकुर छन् । रासस

भीमदत्तनगर, कात्तिक १७ । प्रहरीको लागुऔषध नियन्त्रण ब्युरोको टोलीले आज कैलालीको गोदावरी नगरपालिका–१ अत्तरिया बजारबाट तीन किलो २०० ग्राम लागुऔषध चरेशसहित तीन जनालाई नियन्त्रणमा लिएको छ । लागुऔषध नियन्त्रण ब्युरो शाखा कार्यालय भीमदत्तनगरबाट प्रहरी नायब निरीक्षक अंक बुढाको नेतृत्वमा खटिएको टोलीले अत्तरिया बजारबाट चरेशसहित तीन जनालाई नियन्त्रणमा लिएको हो । पक्राउ पर्नेमा स्थानीयवासी सरेशराम विक, गणेश भट्टराई र यज्ञबहादुर सिंह रहेको प्रहरी नायब निरीक्षक बुढाले बताए । पक्राउ गरिएको अभियुक्त र चरेशसहित कारबाहीका लागि जिल्ला प्रहरी कार्यालय कैलालीको जिम्मा लगाएको ब्युरोले जनाएको छ ।

चितवन, कात्तिक १७ । उपराष्ट्रपति नन्दबहादुर पुनले प्रतिनिधि सभा र प्रदेश सभा सदस्यको निर्वाचनलाई महाउत्सवका रुपमा सम्पन्न गर्नुपर्ने बताएका छन । नेपाल पोल्ट्री महासंघले आयोजना गरेको नेपाल पोल्ट्री तथा लाइभस्टक अन्तर्राष्ट्रिय प्रदर्शनी, २०७४ को आज यहाँ उद्घाटन गर्दै उनले भने, “नयाँ संविधानको कार्यान्वयनको निर्णायक तथा अन्तिम चरण प्रतिनिधि सभा र प्रदेश सभाको निर्वाचन रहेकाले यसलाई महाउत्सवको रुपमा सम्पन्न गर्न सबैको सक्रिय सहयोग आवश्यक छ ।” उपराष्ट्रपति पुनले राजनीतिक दलका नेता कार्यकर्ता तथा उम्मेदवारले आ–आफ्ना एजेण्डा लिएर मतदाताकहाँ पुगिरहेको उल्लेख गर्दै निर्वाचन निष्पक्ष, स्वतन्त्र र भयरहित वातावरणमा हुनुपर्छ, यसका लागि सरकार, राजनीतिक दल र सम्बन्धीत सबै पक्षको ध्यानाकर्षण गराउन चाहन्छु भने । “विगतका निर्वाचन जस्तै आउँदो निर्वाचन पनि उत्सवका रुपमा सम्पन्न हुन्छ, यसले संविधान कार्यान्वयनले सुखद रुप लिन्छ,” उनले भने, “निर्वाचनमा सहभागी भई सार्वभौम अधिकार प्रयोग गर्न म आम मतदातालाई आग्रह गर्दछु ।” उपराष्ट्रपति पुनले चितवन पोल्ट्री क्षेत्रमा राम्रो प्रगति गरेको उल्लेख गर्दै झण्डै छ दशक लामो इतिहास बोकेको पोल्ट्री क्षेत्र आज देशको आत्मनिर्भर क्षेत्रका रुपमा विकास भएको बताए । यो क्षेत्रलाई आत्मनिर्भर बनाउन निजी क्षेत्रको प्रमुख भूमिका रहेको बताउँदै उहाँले यसलाई उदाहरणका रुपमा लिएर अन्य क्षेत्रलाई पनि आत्मनिर्भर बनाउने योजना तर्जुमा गर्न सरकारलाई सुझाव दिए । कार्यक्रममा पशुपक्षी विकास मन्त्रालयका सचिव प्रकाश माथेमाले पोल्ट्री क्षेत्रको व्यवसायीकरण र बजारीकरणका लागि सरकारले सक्दो सहयोग गरिरहेको बताउँदै विसं २०६८ मा पक्षी नीति निर्माण गरी नीतिगतरुपमा पोल्ट्री क्षेत्रको विकासका लागि टेवा पु¥याउने काम भइरहेको छ भने । आत्मनिर्भर हुँदै गएको यो व्यवसायको विकासमा निजी क्षेत्रको योगदानको उच्च कदर गर्नुपर्नेमा उनले जोड दिए । नेपाल उद्योग परिसंघका अध्यक्ष हरिभक्त शर्माले यो व्यवसायको विकास र विस्तारका लागि सरकारी सहयोगको खाँचो रहेको बताउँदै विश्वका विभिन्न देश पुगेर अवलोकन गर्नुपर्ने प्रदर्शनी स्वदेशमै हुनु आफैँमा महत्वपूर्ण रहेको धारणा व्यक्त गरे । भरतपुर महानगरपालिकाका प्रमुख रेणु दाहाल, नेपाल पोल्ट्री महासंघका अध्यक्ष गुणचन्द्र विष्ट, उपाध्यक्ष टीकाराम पोखरेललगायतले पोल्ट्री व्यवसायको विविध पक्षमाथि प्रकाश पारे । आजबाट शुरु भएको प्रदर्शनीमा नेपाल, भारत, जर्मनी, बेल्जियम, नेदरल्याण्ड, चीन, अमेरिका, टर्की, मलेसिया, ताइवान, इटली, इजराइल, बंगलादेशलगायत देशका १७० वटा कक्ष रहेको नेपाल पोल्ट्री महासंघका अध्यक्ष गुणचन्द्र विष्टले जानकारी दिए । प्रदर्शनीका क्रममा स्वदेश र विदेशका विज्ञहरुले कार्यपत्र प्रस्तुत गर्ने गरी कार्यशाला गरिँदैछ । प्रदर्शनीमा २५ देखि ३० हजार व्यवसायी एवंं सर्वसाधारण अवलोकनका लागि आउने अनुमान गरिएको छ । प्रदर्शनीका लागि करिब ५०० विदेशी यहाँ आएका छन् ।

भक्तपुर, कात्तिक १७। भक्तपुरको मध्यपुर थिमि प्रहरी वृत्तमा कार्यरत एक प्रहरी हवल्दारको गएराति ११ बजे मृत्यु भएको छ । कार्यालयमै ड्युटीका क्रममा एक्कासि ढलेका ४३ वर्षीय लालबाबु राउतको मृत्यु भएको वृत्त प्रमुख एवं प्रहरी नायब उपरीक्षक प्रज्वल महर्जनले जानकारी दिए । ढलेलगत्तै गठ्ठाघरस्थित नागरिक अस्पताल पु¥याइए पनि चिकित्सकले मृत घोषणा गरेका थिए । वीरगञ्ज पर्सा निवासी राउतको शव परीक्षणका लागि शिक्षण अस्पताल महाराजगञ्ज लगिएको छ । रासस

काठमाडौं, कात्तिक १७ । मंसिर १० र २१ गते हुने प्रदेश र प्रतिनिधिसभा सदस्य निर्वाचनका लागि दलहरुले समानुपातिकतर्फ बुझाएको बन्दसूची निर्वाचन आयोगले आज सार्वजनिक गर्ने भएको छ । आज सार्वजनिक गरिएका सूचीमध्येबाट प्रदेश र प्रतिनिधिसभाका समानुपातिक तर्फका ३३० जना सदस्य निर्वाचित हुनेछन् । गत असोज २९ गते दलहरुले बुझाएको सूचीका त्रुटी सच्याउँदै निर्वाचन अधिकृतको कार्यालयले शुक्रबार अपरान्ह ५ बजेभित्र सूची सार्वजनिक गर्ने आयोगले जनाएको छ । समानुपातिकतर्फ आयोगमा प्रतिनिधिसभा तर्फ ४९ र प्रदेश सभातर्फ ५५ दलले बन्दसूची बुझाएका थिए । धेरै दलले बुझाएको बन्दसूचीमा प्राविधिक भएपछि आयोगले सुर्धान कार्तिक १२ गतेसम्मको म्याद दिएको थियो । समानुपातिकतर्फ प्रतिनिधिसभामा १ सय १० र सातै प्रदेशसभाका लागि २ सय २० जना सदस्य चुनिनेछन् ।

बैतडी, कात्तिक १७ । राष्ट्रिय प्रजातन्त्र पार्टी बैतडीले केही व्यक्तिले पार्टी छाडेर जाँदैमा पार्टीलाई कुनै असर नपर्ने जनाएको छ । बिहीबार एक विज्ञप्ति जारी गर्दै राप्रपाले केही व्यक्तिले गरेको हर्कतले पार्टी कति पनि विचलित नभएको जनाएको छ । आयातीत र स्वार्थी व्यक्ति कुनै पनि पार्टीमा धेरै दिन नटिक्ने भएकाले राप्रपालाई कुनै नोक्सान नभएको विज्ञप्तिमा जनाइएको छ । प्रतिनिधिसभा र प्रदेशसभाको निर्वाचनको मुखमै संस्थापक नेताहरु र युवा नेताहरुले पार्टी परित्याग गरी वाम गठबन्धनमा प्रवेश गरेपछि राप्रपा बैतडीले कुचोले बढार्नुपर्ने फोहोर हावाले उडाएर लगेको टिप्पणी गरेको छ । पार्टीका पूर्वअध्यक्षलगायत एक दर्जन संस्थापक नेताले असन्तुष्टि जनाउँदै पार्टी परित्याग गरेको एक हप्तापछि बुधबार मात्रै राप्रपाका सुदूरपश्चिम सहसंयोजक पुष्करराज जोशी ‘लख्खाभाइ’ लगायतका कार्यकर्ताले राप्रपा त्यागेर वाम गठबन्धनमा प्रवेश गरेका थिए । त्यसको भोलिपल्टै बिहीबार राप्रपाले प्रेस विज्ञप्ति निकाल्दै आफ्नो पार्टी मुद्दाको हिसाबले बलियो रहेको र कट्टर राष्ट्रवादी नेताहरु पार्टीमा रहेकाले पार्टी कुनै हिसाबले पनि कमजोर नभएको दाबी गरेको छ । राप्रपाले प्रदेश र प्रतिनिधिसभाको निर्वाचनमा नेपाली काँग्रेससंग गठबन्धन भएअनुसार लोकतान्त्रिक शक्तिलाई जिताउन अपिल गरेको छ । कांग्रेससंग तालमेल गरेपछि प्रदेश सभा निर्वाचन क्षेत्र नं २ मा राप्रपाले नेता गणेशबहादुर चन्दलाई उम्मेदवार बनाएको छ । ‘बैतडी जिल्लामा राष्ट्रवादी र स्वच्छ छवि भएको पार्टी राप्रपा मात्रै रहेकाले हिन्दू राष्ट्र जोगाउन लोकतान्त्रिक गठबन्धनलाई सघाउन अनुरोध गर्दछौँ’– जिल्ला अध्यक्ष प्रेमबहादुर चन्दद्वारा हस्ताक्षरित प्रेस विज्ञप्तिमा भनिएको छ । बैतडीमा लोकतान्त्रिक गठबन्धनबाट नेपाली काँगे्रसका नेता तथा वाणिज्य राज्यमन्त्री नरबहादुर चन्द प्रतिनिधि सभा सदस्यका लागि उम्मेदवार बन्नुभएको छ भने प्रदेशसभाका लागि बैतडी ‘क’ मा नेपाली काँग्रेसका हरिमोहन भण्डारी र ‘ख’ मा राप्रपाका गणेशबहादुर चन्द चुनावी मैदानमा रहेका छन् । एक लाख ३२ हजार ३१९ मतदाता रहेको बैतडीमा पहिलो चरणअन्तर्गत मंसिर १० गते निर्वाचन हुने भएको छ ।

ढाका, कात्तिक १७ । बंगलादेशमा एक रिक्सा चालकले त्यहाँका चर्चित नायकविरुद्ध मुद्दा दायर गरेका छन् । एउटा फिल्ममा ती नायकले प्रयोग गरेको मोबाइल नम्बर आफ्नो रहेको भन्दै एक रिक्सा चालकले मुद्दा दायर गरेका हुन् । बंगलादेशका अभिनेता शाकिब खानले एउटा फिल्ममा प्रयोग गरेको मोबाइल नम्बर रिक्सा चालक इजाजुल मियाँको हो । फिल्ममा उक्त मोबाइल नम्बर सार्वजनिक भएपछि कयौं युवतीले उक्त नम्बर नायक शाकिब कै रहेको ठानेर फोन गर्ने गरेको रिक्सा चालक इजाजुलको भनाइ छ । ‘फिल्ममा मेरो मोबाइल नम्बर प्रयोग गरिएपछि मलाई सारै तनाव भएको छ, दिनहुँ अनावश्यक फोन आइरहन्छ,’ उनले भने । इजाजुलले नायक शाकिबसँग क्षतिपूर्ति रकमको मागसमेत गरेका छन् । उनका अनुसार पाँच दिनभित्र पाँच सयभन्दा बढीले फोन गरेका छन् । रिक्सा चालक इजाजुलको मोबाइल नम्बर गत जुनमा प्रदर्शित एक चलचित्र प्रयोग गरिएको थियो । सो चलचित्रका निर्माता तथा निर्देशक नायक शाकिब स्वयं हुन् । फिल्मको एउटा दृष्यमा नायकले आफ्नी प्रेमिकालाई आफ्नो मोबाइल नम्बर भन्दै एउटा नम्बर भन्छन् । त्यो नम्बर संयोगवस रिक्सा चालक इजाजुलको हो । ‘मलाई दैनिक फोन आउन थाल्यो, अधिकांश कल नायक शाकिबका महिला प्रशंसकको आउने गरेको छ,’ उनले भने, ‘म तपाईको फ्यान हुँ, म तपाईसँग दुई मिनेट कुरा गर्न सक्छु ? भनेर फोन गर्छन्,’ उनले भने । इजाजुलका अनुसार उनी आफ्नो मोबाइल नम्बर परिवर्तन गर्न समेत सक्दैनन् । किनकि उनका ग्राहकले समेत सोही नम्बरमा फोन गर्दै आएका छन् । सुरुमा अदालतले मुद्दा दायर गर्न समेत मानेको थिएन । तर जब इजाजुलको समस्याबारे राम्ररी अवगत गराइयो, अदालतले मुद्दा दायर गरेको छ । (एजेन्सी)

काठमाडौं, कात्तिक १७ । नेपालका तेस्रो मुलुकबाट आयात गरिएका व्यापारिक सामान कोलकाता बन्दरगाहबाट ल्याउन मुस्किल पर्न थालेको छ । बन्दरगाह अस्तव्यस्त हुँदा सामान निकाल्न कठिन भएको आयातकर्ताको गुनासो छ । बाहिरबाट आएका कन्टेनरले सामान पुर्‍याएर समयमा बन्दरगाह फर्कन नसक्दा सिपिङ कम्पनीलाई बढी विलम्ब शुल्क तिर्नुपर्ने भएको छ । भारतको कोलकाता बन्दरगाहको व्यवस्थापनको कमजोरीका कारण आयातकर्ताले प्रतिकन्टेनर झन्डै डेढ लाख रुपैयाँ थप खर्चिनुपरेको आयातकर्ताको दाबी छ । आयातकर्ताले सामान नेपाल भित्र्याउन पनि सकिरहेका छैनन् । गत असोजदेखि आएका अधिकांश कन्टेनर अझै कोलकाता बन्दरगाहमै थन्किएका छन् । कन्टेनर बन्दरगाहमा आएदेखि सिपिङ कम्पनीले बिलम्ब शुल्क जोड्न थाल्छन् । कन्टेनर गन्तव्यमा पुगेर बन्दरगाहसम्म फर्किनका लागि औसतमा १५ देखि २१ दिनसम्म ‘फ्रि’ समय हुन्छ । आयातकर्ताका अनुसार सिपिङ कम्पनीले उपलब्ध गराएको फ्रि समय कोलकाता बन्दरगाहबाट कन्टेनर जाँचपास गराउनैमा लाग्न थालेको छ । –कान्तिपुर दैनिकबाट

काठमाडौं, कातिक १६ । प्रमुख निर्वाचन आयुक्त डा अयोधीप्रसाद यादलले दोस्रो चरणअन्तर्गत आगामी मङ्सिर २१ गते हुने प्रतिनिधि सभा र प्रदेश सभाको प्रत्यक्षतर्फको निर्वाचनका लागि राजनीतिक दलको उल्लासपूर्ण सहभागितामा उम्मेदवारी मनोनयन दर्ता भएकोमा खुशी प्रकट गर्दै सवैप्रति धन्यवाद ज्ञापन गरेका छन । पत्रकारसँग कुराकानी गर्दै उनले उम्मेदवारी दर्तामा देखिएको मीत्रभाव र उत्साहलाई निर्वाचन आचारसंहिता पालनामा पनि कायम राख्न राजनीतिक दल र उम्मेदवारलाई सुझाव दिए ।