कैलाली, जेठ १५ । दास्रो चरणको चुनाव नजिकिएसंगै कैलालीको घोडाघोडी नगरपालिकामा चुनावी चहलपहल बढिरहेको छ । विभिन्न राजनितिक दलहरु यतिबेला घर–घरमा पुग्न थालेका छन् । उम्मेदवार र नेताहरु मतदाताका घरघरमा गएर मत मागिरहेका छन् । मत माग्न जाने उम्मेदवारहरु विकास निर्माणका आश्वासन दिने गरेका छन् । स्थानीय बासिन्दा भने आश्वासन नेताका आश्वासनमा नलाग्ने बताउछन् । काम गर्ने उम्मेदवारलाई मात्र मत दिने स्थानीय बासिन्दाको भनाई छ । नगरपालिकाको बासिन्दा भए पनि विकास निर्माणका न्यूनतम पूर्वाधार नभएकाले नगरबासीको अनुभव नभएको स्थानीयको भनाई छ । आधारभूत पूर्वाधारको समेत विकास नभएकाले विकासप्रेमी नेतालाई मात्र जिताउनु पर्ने धारणा स्थानीयको छ । चुनाव जितेपछि थुप्रै काम गर्छु भनेर आश्वासन बाँड्ने भन्दा पनि काम गरेर देखाउनु पर्ने घोडाघाडी नगरपालिका–२, टनकपुरका स्थानीय धनबहादुर देउवा बताउँछन् । चुनाव जितेपछि सुकुम्बासीलाई लालपुर्जा दिने, नदी, खोलामा कल्भट हाल्ने, पुल–पुलेसा बनाइ दिने भन्दै नेताहरु मत मागिरहेका स्थानीय कमलप्रसाद तिवारी बताउँछन् । ‘अब नेताका आश्वासनमा होइन, काम गर्नेलाई जिताउनु पर्छ ।’ उनले भने । यसअघि कहिल्यै घरदैलोमा नआउने नेताहरु अहिले दिनैपिच्छे घरमा आउने गरेका घोडाघोडी नगरपालिका–८, तारानगरका पुष्पराज खनालले बतँए । ‘हाम्रो टोलको प्रमुख समस्या बाटोको हो । बाटो कालोपत्रे गर्नेलाई मत दिन्छौं ।’ टनकपुरका स्थानीय धनबहादुर देउवाले भने । नेताहरुले यसअघि पनि विकास निर्माण गर्ने आश्वासन विभिन्न राजनीतिक दलहरुले बाँडे पनि काम पुरा नगरेकाले नेताका आश्वासनमा विश्वास नलागेको बताउँदै स्थानीय पुष्पराज खनालले बताए ।

लहान, जेठ ७ । सिरहाको भगवानपुर गाउँपालिका–५ स्थित भित्री सडकखण्डमा गएराति ट्र्याक्टर दुर्घटना हुँदा एकजनाको मृत्यु भएको छ भने अर्का एकजना गम्भीर घाइते भएका छन् । राति १० बजेतिर स१त २९७३ नंको ट्र्याक्टर अनियन्त्रित भई दुर्घटना हुँदा ट्र्याक्टरमा सवार भगवानपुर गाउँपालिका–५ निवासी १७ वर्षीय अमर मण्डलको मृत्यु भएको प्रहरीले जनाएको छ । सो दुर्घटनामा ट्र्याक्टरमा सवार भगवानपुर गाउँपालिका–५ कै १६ वर्षीय शिवनारायण मण्डल गम्भीर घाइते भएका छन् । दुर्घटनामा परी गम्भीर घाइते भएका शिवनारायण र अमरलाई उपचारका लागि लहानतर्फ लैजाने क्रममा बाटोमै अमरको मृत्यु भएको इप्रका, लहानले जनाएको छ । घाइते शिवनारायणको लहानस्थित रामप्रसाद उमा स्मारक अस्पतालमा उपचार भइरहेको छ ।

उदयपुर, जेठ ७ । उदयपुरको त्रियुगा नगरपालिकास्थित बरुवा नदी तथा त्रियुगा नदीको मानव बस्ती क्षेत्र र वन जङ्गल क्षेत्रका अतिसंवेदनशील स्थानबाट अहिले केही ट्र्याक्टर व्यवसायी र केही लोडर सञ्चालकहरूले फेरि अवैध तरिकाले बालुवा, गिट्टी, रोडा र ढुङ्गा झिक्ने कार्य गर्न थालेका छन् । विगतमा पनि यी संवेदनशील स्थानबाट ट्र्याक्टर व्यवसायीले मनपरी ढुङ्गा, गिट्टी र रोडा अवैध तरिकाले झिक्ने र बिक्री गर्ने गर्दै आएका थिए । प्रहरी, प्रशासनको सक्रियतामा यो कार्य नियन्त्रण भए तापनि अहिले स्थानीय चुनावको मुखमा आएर प्रहरी प्रशासन तथा राजनीतिक दलको ध्यान अन्यत्र गएको मौका पारेर फेरि ट्र्याक्टर व्यवसायीले मनपरी तरिकाले ढुङ्गा, रोडा र गिट्टी निकाल्न थालेको स्थानीय भूपेन्द्र कार्कीले बताउनुभयो । अहिले गाईघाटको बरुवा नदीको पुल क्षेत्र र बरुवा नदीकै माथिल्लो ढिम्कीको अति संवेदनशील मानिएको जङ्गल क्षेत्रबाट गिट्टी रोडा र बालुवा मनपरी ढङ्गबाट अवैध तरिकाले निकाल्ने कार्य थालेको ढिम्कीका स्थानीय तेजबहादुर सार्कीले बताउनुभयो । यता गाईघाट बजारको त्रियुगा नदी किनारमा रहेको त्रियुगा बसपार्क र त्रियुगा पुल क्षेत्र अतिसंवेदनशील क्षेत्र मानिँदै आएको क्षेत्रबाट समेत रात्रिको समयमा ट्र्याक्टर व्यवसायीले मनपरी ढङ्गले गिट्टी, बालुवा र रोडा उत्खनन गरेर बिक्री गर्ने गरेको स्थानीयवासी सुरेन्द्र साह बताउनुहुन्छ । यी संवेदनशील स्थानका नदी क्षेत्रबाट गिट्टी, बालुवा तथा ढुङ्गा र रोडा उत्खनन गर्न नपाइने नियम जिल्ला विकास समिति, त्रियुगा नगरपालिका र प्रहरी प्रशासनले समेत लगाएको छ । स्थानीय प्रहरी, प्रशासन र सम्बन्धित निकायको ध्यान अन्यत्र हुन थालेको मौका छापेर ट्र्याक्टर व्यवसायी र केही तस्करले अहिले फेरि नदीका पदार्थजन्य वस्तु अवैध रूपमा उत्खनन गरेर चोरी गर्न थालेको स्थानीयवासीले नै बताउन थालेका छन् ।

झापा, जेठ ७ । झापाको शिवसताक्षी नगरपालिकामा जुस सर्किएर एक बालकको मृत्यु भएको छ ।  शिवसताक्षी–८ डुरामारीका रुपदोष श्रेष्ठका छ वर्षीय छोरा गौरव श्रेष्ठको मृत्यु भएको जिल्ला प्रहरी कार्यालय, झापाले जनाएको छ । शनिबार बेलुका ओरेन्ज जुस पिउँदा सर्किएर सिकिस्त बिरामी भएपछि उपचारका लागि लाइफलाइन अस्पताल दमक लैजाने क्रममा बालकको बाटोमै मृत्यु भएको प्रहरीले जनाएको छ ।

डोल्पा, जेष्ठ ६ । डोल्पालीवासीहरुको आयस्रोत बन्दै आएको यार्चाकुन्भु टिप्ने समय नजिकिदै गर्दा सर्वसाधारणहरु पाटन जाने तयारी गरिरहेका छन् । शे–फोक्सुण्डो राष्ट्रिय निकुञ्जको क्षेत्रभित्र पाइने महत्वपूर्ण बुटी यार्चाकुन्भु टिप्न यो वर्ष यही जेठ ११ गतेबाट प्रवेश खुला गर्ने शे–फोक्सुण्डो राष्ट्रिय निकुञ्ज डोल्पाले जनाएको छ । यार्चाकुन्भु टिप्न पाटन जाने प्रवेशको समय नजिकिंदै आएको बेला पाटनमा आवश्यक पर्ने पाल, ओड्ने ओछ्याउने, अन्य न्याना कपडाहरु, आवश्यक खानेकुरा र अन्य बन्दोबस्तीका सामग्रीहरु जम्मा तथा तयारी गर्न थालिएको सर्मी–३ का नारदे बुढाले बताए । यार्चाकुन्भु टिप्न जाने समय नजिकिदै गए पछि डोल्पाका विद्यालयहरुमा पनि प्रभाव पर्न सुरु भैसकेको स्थानीय नरबहादुर रोकाया बताउँछन् । उनका अनुसार यतिखेर कुटानी पिसानी र अन्य बन्दोबस्तीका सामग्री तयारी गर्न सबै लागेका छन् । निकुञ्जभन्दा बाहिरका विभिन्न पाटनमा समेत यार्चाकुन्भु पाइने गर्दछ । माझफाल, सहरतारा, मुकोट, छार्का, दुनैलगायतका केही साविकका गाउँपालिकाहरुमा पनि पाइन्छ । नेपाल सरकारले यार्चाकुन्भु व्यवस्थापन निर्देशिका प्रकाशन गरेर विभिन्न मापदण्डहरु तोकेको छ । जसमा १६ वर्षमुनिका बालबालिकाहरु यार्चाकुन्भु संकलन गर्न पाटन जान नपाउने, गर्भवती महिला जान नपाउने जस्ता सीमा तोकिएको भन्ने खबरले सर्वसाधारणहरुमा खैलाबैला मच्चिएको छ । यार्चाकुन्भु बालबालिकाहरुले नै बढी भेट्टाउने भन्दै अभिभावकहरु बालबालिकाहरुलाई पाटन लैजाने गर्छन् । ५–७ वर्षका बालबालिकाहरु, सुत्केरी, वृद्धवृद्धाहरु, गर्भवतीहरु, अपाङ्ग लगायतका व्यक्तिहरु पनि यार्चाकुन्भु टिप्न पाटन जाने गर्छन् । निकुञ्जले यो वर्ष निर्देशिकाको कडाइका साथ पालना गराउने तयारीमा रहेको शे–फोक्सुण्डो राष्ट्रिय निकुञ्ज डोल्पाले जनाएको छ ।

नुवाकोट, जेष्ठ ६ । स्थानीय तह निर्वाचनमा पहिलो चरणमा एमालेबाट खुल्ला वडा सदस्यमा विजयी भएका नुवाकोट लिखु गापा १ का नवनिर्वाचित सदस्यको मृत्यु भएको छ । खानीगाउँका ४९ वर्षीय ठाकुर लामिछानेको हृदयघातका कारण मृत्यु भएको जिल्ला प्रहरी कार्यालय नुवाकोटले जनाएको छ । शनिबार बिहान खानीगाउँस्थित घर नजिक रहेको राममन्दिरबाट फर्किने बित्तिकै अचनाक घरभित्रै उनी ढलेका थिए । त्यसपछि लामिछानेलाई परिवारका सदस्यहरुले उपचारका लागि विदुर लैजाने क्रममा शनिबार दिउँसो करिब १ बजे मृत्यु भएको प्रहरीले जनाएको छ ।

राजविराज, ६ जेठ । पूर्वपश्चिम राजमार्ग अन्तर्गत सप्तरीको कन्चनरुप नगरपालिका– ११ स्थित मोहुली पुलमा मोटरसाइकल दुर्घटनामा परी आज एकजना म्यादी प्रहरीको मृत्यु भएको छ । मृत्यु हुनेमा सप्तरीको इलाका प्रहरी कार्यालय मोहुलीमा कार्यरत सप्तरीकै कृष्ण सबरण गाउँपालिका– ३ का २६ वर्षीय मीननारायण चौधरी रहेको प्रहरीले जनाएको छ । पश्चिमबाट पूर्व तर्फ जाँदै गरेको चौधरी सवार ना ३३ प ४१२२ नम्बरको मोटरसाइकल आफँै अनियन्त्रित भई मोहली पुलमा ठोकिँएको थियो । त्यस्तै मोटरसाइकल पछाडी सवार प्रहरीचौकी पकरीमा कार्यरत सप्तरी कृष्ण सबरण गाउँपालिका– १ बस्ने २३ वर्षीय म्यादी प्रहरी रगुनन्दन चौधरीसमेत गम्भीर घाइते भएका छन् । घाइते उहाँको ठेलियास्थित धर्मेश्वर अस्पतालमा उपचार भइरहेको इलाका प्रहरी कर्यालय मोहुलीले जनाएको छ ।

बुटवल, जेठ २ । प्रभु बैंक लिमिटेडले यहाँको एक सुस्तः बाल विद्यालयलाई फर्निचर प्रदान गरेको छ । बुटवल उपमहानगरपालिका वडा नं ७ को दीपनगरमा रहेको सुस्तःमनस्थिति बाल विद्या मन्दिरमा आठ वटा कुर्ची र दुई वटा टेबुल हस्तान्तरण गरेको हो । बैंकले सामाजिक उत्तरदायित्वअन्तर्गत बाल विद्या मन्दिरमा फर्निचर हस्तान्तरण गरेको बैंकका बुटवलका प्रमुख गणेशबहादुर पछाइले बताउनुभयो । उहाँले बैंकले यस प्रकारका सामाजिक कामलाई निरन्तरता दिने बताउनुभयो । बाल विद्या मन्दिरकी अध्यक्ष मीना भुसालले यहाँका बालबालिकालाई अध्ययनसँगै हेरचाहका लागि प्राप्त फर्निचरले सहज हुने बताउनुभयो । सो बाल विद्या मन्दिरमा ३५ बालबालिका छन् ।

महोत्तरी, जेठ २ । मुठ्ठीदान अभियानमार्फत महोत्तरीको बर्दिबासस्थित जनता माध्यमिक विद्यालयले विद्यालयको परिसरमा शुरु गरेको ‘बालमैत्री वातावरण निर्माण परियोजना’ का लागि रु डेढ लाखभन्दा बढी रकम सहयोगस्वरुप सङ्कलन भएको छ । गत बिहीबारदेखि सुरु गरेको सो अभियानअन्तर्गत विगत चार दिनको अवधिमा रु एक लाख ६० हजार ३५५ सहयोग सङ्कलन भएको हो । मुठ्ठीदान अभियानअन्तर्गत बिहीबार पहिलो दिन रु ७८ हजार २९३, शुक्रबार रु २८ हजार ८३७, शनिबार रु ३७ हजार ९२५ र सोमबार रु १५ हजार ३०० गरी कुल रु एक लाख ६० हजार ३५५सङ्कलन भएकोे परियोजनाको सञ्चार सहयोगी तथा सामाजिक अभियन्ता राजकरण महतोले जानकारी दिनुभयो । जेठ महिनाभित्र निर्माण कार्य सम्पन्न हुने गरी विद्यालयमा सञ्चालित परियोजना सम्पन्न गर्न कुल रु ४८ लाख छ हजार ८२६ खर्च हुने अनुमान गरिएको अभियन्ता महतोले बताउनुभयो । परियोजनाभित्र ५०० मिटर पक्की बाटोमा सडकको दुवैतिर रेलिङसहितको अत्याधुनिक गार्डेन निर्माण गरिने योजना रहेको विद्यालय व्यवस्थापन समितिका अध्यक्ष देवनारायण महतोले बताउनुभयो । विद्यालयको परिसरभित्र रहेको करिब एक बिगाहा क्षेत्रफलमा चिल्ड्रेन पार्क, अत्याधुनिक फाउन्टेन (झरना), सांस्कृतिक कार्यक्रमको लागि स्टेज, सवारी पार्किङ स्थल, खानेपानीको धारा निर्माण सो परियोजनाभित्र रहने उहाँले जानकारी दिनुभयो । विसं २०१६ मा स्थापित भएको सो विद्यालयमा शिशु कक्षादेखि कक्षा १२ सम्ममा गरी एक हजार छ जना विद्यार्थी अध्ययनरत रहेको विद्यालयका सूचना अधिकारी सुशीलकुमार यादवले बताउनुभयो । समुदायबाट सहयोग सङ्कलन गर्न विद्यालयका शिक्षक, विद्यार्थीहरु समूहमा घर घर हिँडेर मुठ्ठीदान अभियानअन्तर्गत सहयोग सङ्कलन गरिरहेका छन् ।

गौशाला, जेठ २ । महोत्तरीको बर्दिवासमा नगरपालिकाको भवन निर्माण गर्नका लागि स्थानीयवासी १० जनाले रु पाँच करोड ५० लाख मूल्यबराबरको जग्गा दान गरेका छन्। स्थानीयवासी भवनाथ पोखरेल, रमेशकुमार, विनोद भण्डारी, गोपी पोखरेल, रामजी महतो, अर्जुनसिंह ठकुरी, शेखरकपिल हमाल र लालबहादुर हमाललगायतले दुई कठ्ठा १० धुर जग्गा दिनुभएको हो । बर्दिवास नगरपालिका कार्यालय निर्माणका लागि स्थानीयवासीले आफ्ना करोडौँ मूल्य पर्ने जग्गादान दिएपछि नगरपालिकाले उनीहरुलाई फूलमाला र अबिर लगाएर सम्मान गरेको नगरपालिकाका सूचना अधिकारी नारायणसिंह ठकुरीले बताउनुभयो ।

राजविराज, जेठ २ । सेभ द सप्तरीको स्पोनसरसिप कार्यक्रमअन्तर्गत जिल्लाको दक्षिणी भेगमा रहेका दलित एवम् अति पिछडिएका परिवारलाई जीविकोपार्जनका लागि सोमबार यहाँ पम्पसेट (बोरिङ) प्रदान गरिएको छ । राजविराजस्थित सेभ द सप्तरीको कार्यालयमा आयोजित पम्पसेट वितरण कार्यक्रममा सेभ द सप्तरीका अध्यक्ष ध्रुवकुमार देवले तीनवटा कृषक समूहलाई सतप्रतिशत निःशुल्क सिँचाइ गर्नेगरी प्रत्येक समूहलाई एक÷एक वटाका दरले पम्पसेट (बोरिङ) प्रदान गर्नुभएको छ । सेभ द चिल्ड्रेनको सहयोग तथा सेभ द सप्तरीको आयोजनामा दिनारामभद्री कृषक समूह कोलाडी, सखडेश्वरी कृषक समूह छिन्नमस्ता, कमलामाई कृषक समूह कोचाबखारीसहित तीनवटा समूहलाई सो पम्पसेट (बोरिङ) वितरण गरिएको बताइएको छ । साथै, पम्पसेट (बोरिङ)सहित बोरिङ डेलिभरी पाइप, हेड कल (ट्युबेल) लगायतका सामानसमेत वितरण गरिएको छ । वितरण गरिएको पम्पसेट (बोरिङ) बाट धान, गहुँ, तथा तरकारी खेतीलगायत अन्य खेती गरी जीविकोपार्जन गर्न सकिने र यसबाट भएको आम्दानीले घरमा पढाइबाट वञ्चित रहेका बालबालिकालाई पढाउने उद्देश्यले पनि पम्पसेट (बोरिङ) बाँडिएको सेभ द सप्तरीका फिल्ड अफिसर परमेश्वरप्रसाद मण्डलले बताउनुभयो ।

काठमाडौं, जेठ २ । प्रहरी प्रधान कार्यालयले इन्सपेक्टर पदमा खुल्ला प्रतियोगिताद्वारा छनोट भएको उम्मेद्वारहरुको नाम सार्वजनिक गरेको छ । प्रहरी प्रधान कार्यालयबाट २०७३ जेठ ५ गते प्रकाशित बिज्ञापन अनुसार दरखास्त दिई संचालन भएको अन्तरर्वार्ता परीक्षामा सहभागी भएका मुख्य तथा बैकल्पिक सूचीमा रहेका उम्मेदवारहरुको योग्यताक्रम अनुसारको अन्तिम नतिजा सोमबार प्रकाशित गरेको हो । अन्तिम नतिजामा उर्तीर्ण भई नियुक्तिका लागि सिफारिस भएका मुख्य उम्मेदवारहरुले आवश्यक सम्पूर्ण कागजपत्र सहित जेठ ८ गते सोमबार ११ः०० बजे प्रहरी प्रधान कार्यालय, मानवस्रोत बिकास विभाग, कर्मचारी प्रशासन शाखामा सम्पर्क राख्न प्रहरी हेड्क्वार्टरले आग्रह गरेको छ ।

लोकेश धामी कैलाली, जेठ १ । कैलालीको दुई छुट्टाछुट्टै ठाउँबाट ठूलो संख्यामा बाघ र चितुवाको छाला बरामत गरिएको छ । आइतबार गोदावरी नगरपालिका बडा नम्बर १२ चौकिगाउँ र जिल्ला घोडाघोडी नगरपालिका ७ कृतिपुर भन्ने ठाउँबाट उक्त परिणाममा बहुमूल्य छाला बरामत गरिएको हो । उक्त स्थानमा पाटेबाघको छाला, चितुवाको छाला र हड्डीको कारोबार भइ रहेको छ भन्ने विशेष सूचना आधारमा क्षेत्रिय प्रहरी कार्यालयबाट खटिएको विषेश अनुसन्धान टोली र जिल्ला प्रहरी कार्यालय कैलालीबाट गएको संयक्त प्रहरी टोलीले ठूलो परिमाणमा वन्यजन्तुको छाला र हड्डी बरामत गरिएको प्रहरीले जनाएको छ । बरामत गरिएकोमा पाटेबाघको छाला १ थान, चितुवाको छाला ३ थान र चितुवाको हड्डी ६ किलो ७ सय ग्राम फेला परेको जिल्ला प्रहरी कार्यालय कैलालीका प्रमुख अर्जुन चन्दले जानकारी दिए । यस्तै ओसारपसारमा प्रयोग भएका दुइ थान मोटरसाइकल सहित ६ जना पक्राउ परेका छन् । पक्राउ पर्नेहरुमा कैलालीको गौरीगंगा नगरपालिका ४ बस्ने ७० वर्षिय धर्मराज पौडेल, गोदावरी नगरपालिका १२ का ५० वर्षिय पूर्ण बहादुर ओली, धनगढी उप–महानगरपालिका १६ का ३० वर्षिय राम बहादुर चौधरी, जोशीपुर गाउँपालिका–५ का ३५ वर्षिय रमेश चौधरी, घोडाघोडी नगरपालिका–८ बस्ने गगन साउँद र जोशीपुर गाउँपालिका– १ का ३७ वर्षिय लोकबहादुर बि.क रहेका छन् । उनीहरुलाई कारबाहीको लागि जिल्ला वन कार्यालयमा बुझाउने पक्रियामा रहेको जिल्ला प्रहरी कार्यालय प्रमुख चन्दले जानकारी दिए । बरामत छाला र हड्डीबा संलग्न २ जना फरार रहेको र उनीहरुको खोजी भइरहेको प्रहरीले जनाएको छ । प्रहरीको प्रारम्भिक जानकारी अनुसार उक्त बरामत भएको चितुवाको छाला डोटीबाट पाटेबाघको छाला शुक्लाफटाबा ल्याएको हुनसक्ने जनाइएको छ ।

झापा, जेठ १ । अख्तियार दुरुपयोग अनुसन्धान आयोगले छ लाख ८० रुपैयाँ घुस लिँदालिँदै नापी कार्यालय दमकका एक कर्मचारीलाई आज पक्राउ गरेको छ । पक्राउपर्नेमा नापी कार्यालय दमकका सर्वेक्षक विनोदकुमार मण्डल रहेका छन् । उनलाई अख्तियार दुरुपयोग अनुसन्धान आयोग, इटहरीको टोलीले पक्राउ गरेको प्रहरी नायब उपरीक्षक रमेश बस्नेतले बताए । सेवाग्राहीको रु ३० हजारमा हुने कामका लागि उनले छ लाख ८० हजार रुपैयाँ रकम मागेपछि पक्राउ गरिएको बस्नेतले बताए । मण्डललाई आज दिउँसो अख्तियारको टोलीले उनकै कार्यकक्षबाट रङ्गेहात पक्राउ गरेको हो । दमकका एक जग्गा व्यवसायीको प्लटिङको जग्गाको काम मिलाइदिने भन्दै घुस लिँदालिँदै उनलाई पक्राउ गरेको बताइएको छ ।

तनहुँ, जेठ १ । तनहुँको व्यासीमा आइतबारे विक्रम परियारको हत्यामा संलग्न भएको आरोपमा पाँच जनालाई प्रहरीले पक्राउ गरेको छ । पक्राउ पर्नेमा दुईजना महिला पनि छन् । उनीहरुलाई आइतबार राति व्यासीकै एक घरबाट लुकेर बसेको अवस्थामा पक्राउ गरिएको प्रहरीले जनाएको छ । अनुसन्धान चलिरहेको भन्दै प्रहरीले पक्राउ परेकाको नाम खुलाएको छैन । आइतबार मतदान गरेर बजार घुम्न निस्किएका बेला नचिनेका मानिसको समूहले परियारको हत्या भएको थियो । उनको शव पोष्टमार्टमका लागि दमौली अस्पतालमा राखिएको छ ।