नुवाकोट, जेठ १ । जिल्लामा नौ स्थानमा मतगणना जारी रहेको छ भने अन्य स्थानमा तयारी भइरहेको छ । विदुर र बेलकोेटगढी नगरपालिका तथा ककनी, तारकेश्वर, तादी, शिवपुरी, लिखु, सूर्यगढी र मेघाङ गाउँपालिकामा मतगणना भइरहेको छ । अहिले विदुरको वडा नं १ को मतगणना भइरहँदा नेकपा(एमाले)बाट प्रमुृखका उम्मेदवार सञ्जु पण्डितले दुई सय , नेपाली काँग्रेसका धु्रव अधिकारीले एक सय ३६ र नेकपा(माअ‍ोवादी केन्द्र)का लीलानाथ न्यौपानेले २१ मत ल्याउनुभएको छ । तादीमा अहिलेसम्म कांग्रेसबाट अध्यक्षका उम्मेदवार नारायणप्रसाद पाण्डेले तीन सय ४८, एमालेका केपी लामिछानेले दुई सय ८५ र माओवादी केन्द्रका मानसिंह तामाङले एक सय ५४ मत ल्याउनु भएकोछ । ककनीमा अध्यक्षमा कांँग्रेसका दीपेश लामाले ५१, माओवादी केन्द्रका मानबहादुर लामाले ४० र एमालेका जितबहादुर बलामीले ३८ मत ल्याउनु भएको छ । बिहान ४ बजेदेखि सुुरु भएको ककनी – १ को मतगणना जारी छ । तारकेश्वरमा एमालेबाट अध्यक्षका उम्मेदवार रमेश वस्तीले ३९, कांग्रेसका उम्मेदवार चोकराज शाक्यले २९ र माओवादी केन्द्रका राजेन्द्र न्यौपानेले १७ मत ल्याउनु भएको छ । यस्तै शिवपुरीमा कांग्रेसका अध्यक्षका उम्मेदवार रामकृष्ण थापाले ७८ तथा एमालेका पदम उप्रेती र माओवादी केन्द्रका मीनबहादुर तामाङले ५६– ५६ मत आएको छ । पञ्चकन्यामा बिहान १० बजेदेखि मतगणना गरिने दलीय सहमति भएको छ । बेलकोटगढी – १ बाट मतगणना सुरु भएको छ । यस्तै सूर्यगढीको वडा नं १ बाट मतगणना आरम्भ भएको छ । यस्तै किस्पाङमा मतगणनाका लागि सर्वदलीय बैठक बसिरहेको छ । दलीय सहमतिपछि केही समयमा नै मतगणना आरम्भ गरिने किस्पाङ गाउँपालिका निर्वाचन अधिकृतको कार्यालयले जनाएको छ । यस्तै मेघाङमा पनि भर्खरै मतगणना सुुरु भएको छ ।

धादिङको नीलकण्ठ नगरपालिका वडा नम्बर ५ मा कांग्रेस र एमाले कार्यकर्ताबीच झडप भएको छ ।  झडपमा एमालेका तीन कार्यकर्ता गम्भीर घाइते भएका छन् । निर्वाचन परिणाम आफ्नो पक्षमा आइसकेको भन्दै कांग्रेसका कार्यकर्ताले आक्रमण गरेको एमाले कार्यकर्ता भिमबहादुर थापाले जनाएका छन् । कांग्रेसको वडा अध्यक्षको उम्मेदवार हस्तबहादुर थापा मगरको नेतृत्वको टोलीले गरेको आक्रमणमा परि एमाले कार्यकर्ताहरु ललित थापा मगर, गणेश थापा मगर र राजेन्द्र थापा मगरलाई गम्भीर घाइते भएका छन् । झडपका क्रममा कांग्रेस कार्यकर्ता मिलन भन्ने धनबहादुर मगर पनि घाइते छन् । घाइतेहरुलाई हिजैराति धादिङ बेसीबाट गएको प्रहरी टोलीले उद्धार गरी उपचारका लागि काठमाडौं ल्याएको छ ।  

काठमाडौं, जेठ १  । काठमाडौंको चन्द्रागिरी नगरपालिकाको मतगणना जारी छ। आइतबार रातिबाट सुरु भएको मतगणनामा नेकपा माओवादी केन्द्रका उम्मेदवारले अग्रता लिएका छन्। सोमबार बिहानसम्म भएको मत गणनामा माओवादी केन्द्रका उम्मेदवारले ३३१ मत पाएका छन् भने कांग्रेसका उम्मेदवारले २९३ मत पाएका छन्। तेस्रो स्थानमा रहेका एमाले उम्मेदवारले १०६ मत पाएका छन्। मत गणना जारी छ।

धनगढी,जेठ १ । आगामी जेठ ३१ गते तोकिएको स्थानीय तहको निर्वाचनको तयारीका लागि प्रचारप्रचार अभियानलाई तीव्र पारेको नेकपा माओवादी केन्द्रले धनगढी उपमहानगरपालिकाका वडा स्तरमा चुनावी सभा गरिरहेको छ । घरदैलोमा गएर मतदाता भेटघाटसंगै वडा स्तरमा चुनावी सभाहरु भईरहेका नेकपा माओवादी केन्द्रका धनगढी नगर इन्चार्ज रमेश धामीले बताए । धनगढी उपमहानगरपालिकाका सबै वडामा चुनावी सभाहरु गरिने उल्लेख गर्दै उनले हाल सम्म ४ वडामा चुनाव सभा सम्पन्न भईसकेका बताए । माओवादीकै नेतृत्वमा भएको आन्दोलनका कारण राजनीतिक परिवर्तन भएको र सिंहदरबारका अधिकार जनताको घरदैलोसम्म पुगेका भन्दै माओवादीले मतदातासंग मत मागिरहेको छ । देशमा आमूल परिवर्तनको नेतृत्व माओवादीले गरेको र अब विकास र समुन्नती पनि माओवादीकै नेतृत्वमा हुने इन्चार्ज धामीले बताए । ‘१० वर्षे जनयुद्धकै कारण मुलुकमा राजतन्त्रको अन्त्य भएर गणतन्त्र स्थापना भएको हो । माओवादी जनयुद्धको जगमा मुलुकमा आमुल राजनीतिक परिवर्तन भए ।’ माओवादी केन्द्रीय सम्मेलन आयोजक समिति सदस्य समेत रहेका धामीले भने–‘मुलकमा अब विकास र आर्थिक क्रान्तिको खाँचो छ । निर्वाचनमार्फत हामीलाई मत दिएर त्यसको नेतृत्व पनि जनताले माओवादीलाई दिनेछन् भन्नेमा हामी आशावादी छौं ।’ चुनावी सभासंगै घरदैलोमा गएर मतदाता भेटघाटसंगै स्थानीय स्तरमा जनताका समस्या र गुनासाहरु सुन्ने कार्य भईरहेको माओवादी धनगढी नगर इन्चार्ज निर्मल शाहले बताए । निर्वाचनको प्रचारप्रसारलाई व्यापक बनाइएको उल्लेख गर्दै उनले माओवादीप्रति जनताको उत्साह बढेको दावी गरे । माओवादीले धनगढी उपमहानगरपालिकाको मेयर, उपमेयर तथा सबैजसो वडाका अध्यक्ष र सदस्यका उम्मेदवार घोषणा गरेर प्रचारप्रसार गरिरहेको छ । धनगढीमा अन्य पार्टीले उम्मेदवार तय गर्न सकेका छैनन्, यद्यपि चुनावी प्रचारमा सबै दलहरु लागि परेका छन् । माओवादीबाट धनगढी उपमहानगरपालिकाको मेयरका उम्मेदवार रामसमझ रानाले प्रदेश नम्बर सातको प्रमुख शहरको रुपमा रहेको धनगढीलाई नमुना शहरको रुपमा विकास गर्ने आफ्नो चुनावी एजेण्डा रहेको बताए । उनले छिट्टै आफ्नो चुनावी प्रतिवद्धता पत्र पनि सार्वजनिक गर्न लागिएको बताए । उम्मेदवार रानाले आफू मेयरमा निर्वाचित भए धनगढीमा व्याप्त, डुवान, अतिक्रमणलगायतका समस्या समाधान गर्ने, उपमहानगरपालिकाका सबै क्षेत्रमा समानुपातिक विकास गर्ने र धनगढीलाई अत्याधुनिक सुविधा सम्पन्न शहरको रुपमा विकास गर्ने बतँए । यसैबीच नेकपा माओवादी केन्द्रले धनगढी उप–महानगरपालिका–१२, जुगेडामा आइतबार चुनावी सभा गरेको छ । सभामा माओवादी नेताहरुले मुलुकको आर्थिक समृद्धिको नेतृत्व गर्न सक्ने पार्टीलाई मतदान गरि विजयी गराउन आग्रह गरेका थिए । कार्यक्रममा माओवादी केन्द्रका स्थायी समिति सदस्य खगराज भट्टले राजनीतिक परिवर्तनपछि अब देशमा आर्थिक परिवर्तन आवश्यक रहेको र त्यसको नेतृत्व माओवादीले मात्र गर्नसक्ने बताए । कार्यक्रममा माओवादीका धनगढी नगर इन्चार्ज रमेश धामी, नगर अध्यक्ष निर्मल शाह, मेयर पदका उम्मेदवार रामसमझ राना, उपमेयर पदका उम्मेदवार शान्ती अधिकारी, धनगढी–१२, का अध्यक्ष पदका उम्मेदवार खडकराज भट्टलगायतले मन्तव्य व्यक्त गरेका थिए । माओवादी केन्द्रले हालसम्म धनगढी उपमहानगरपालिकाको वडा नम्बर ६, ७, १२, १६, मा चुनावी सभा सम्पन्न गरिसकेको माओवादी धनगढी नगर समितिका प्रवक्ता रमेश भट्टराईले जानकारी दिए ।

कैलाली, वैशाख ३१ । कैलालीका अधिकांश मुक्त हलिया परिवारले अझै पनि सरकारले प्रदान गर्ने सुविधा पाउन सकेका छैनन् । राज्यले उनीहरुको नाममा विभिन्न सेवा सुविधाको घोषणा गरे पनि लक्षित समुदायसम्म भने यसको प्रभाव पुग्न नसकेको हो । नेपाल सरकारले नै वि.सं २०६५ सालमा हलिया मुक्तिको घोषणा गरे पनि कतिपय ठाउँमा हालसम्म पनि उनीहरुको अवस्थामा कुनै परिर्वतन आउन सकेको छैन । अहिले पनि कतिपय मुक्त हलिया परिवारहरु अरुको घरजग्गामा बस्नु पर्ने बाध्यता छ । न उनीहरुसँग खानलाई गास छ नत ओत लाग्ने बास नै । हलिया मुक्तिपछि मुलुकमा सरकारको नेतृत्वमा थुप्रै फेरबदल भएको छ । तर, आफूहरुको अवस्थामा फेरबदल नभएको मुक्त हलियाहरुको गुनासो छ । पुनःस्थापनाको लागि प्रभावकारी काम हुन नसक्दा मुक्तिपछि पनि हलियाहरुको अवस्था पुरानै जस्तो रहन पुगेको हो । कैलालीको गौरीगंगा नगरपालिका १ बस्ने गिता नेपालीले हलियाको परिचय पत्र पाएको झण्डै १ दशक पुग्न लाग्यो । तर, अवस्था भने उहि दशक अघि कै छ । न उनीसंग बस्नलाई घर छ नत खेती गर्नलाई जमिन नै । आफूहरु पहिलेको अवस्थाबाटै गुज्रिरेहको उनले दुखेसो गरिन्। उनले सरकारले प्रदान गर्ने दुई लाख रुपैया पाउन लामो समय देखि निकै संघर्ष गरेकी छिन् । कति सरकार बदलिए तर, गिताको दैनिकी भने बद्लिन सकेको छैन। उनले राज्यले हलियाका लागि दिने दुइ लाख रकम लिन सम्बन्धित ठाउँ धाएको बर्षौ बितिसक्यो । तर, उनको मिहिनेतले हालसम्म सार्थक मोड लिन सकेको छैन। यस्तै गौरीगंगा नगरपालिका २ का नरेश शिलाधरले पनि हलियाको परिचय पत्र पाएको धेरै भयो । तर, उनको अवस्था पनि गिताको भन्दा फरक छैन । जुन ठाउँ जाँदा पनि आश्वासन मात्रै पाइन्छ, काम हुने कुनै छाँटकाट नै देखिदैन । उनलाई सरकारप्रति वितृष्णा जागेको छ । उनले मुक्त हलियाको सवालमा सरकार लाचार रहेको भन्दै आक्रोस पोखे । कैलालीमा सुदूरपश्चिमका अन्य जिल्ला भन्दा हलियाको संख्या कम रहेका बताइएको छ । हाल कैलालीमा १ सय २० जना हलिया रहेका छन् । यी मध्ये अधिकांश प्रमाणिकरण भइ सकेका छन् । भने, कतिपय हुन बाँकी छन् । केहिले हलियाको परिचयपत्र समेत पाउन सकेका छैनन् । अधिकांश हलियाहरुको अवस्था दयनीय रहेको हलियाको क्षेत्रमा क्रियाशिल संस्था एनएनएसडब्लुओका जिल्ला सहजकर्ता बिन्दा देवलले बताइन् । राज्यले वि.स. २०६५ सालमा हलिया मुक्तिको घोषणा गरेको थियो । तर, सरकारले न्यायिक तवरले पुनःस्थापना प्याकेज वितरण गर्न नसक्दा उनीहरुको अवस्था फेरिएको छैन । झण्डै १ दशक अघि सरकारले दिने दुई लाख रुपैयाले हाल, हात्तिको मुखमा जिरा भएकाले पनि उनीहरुको अवस्थामा सुधार नआएको कतिपयको भनाइ छ । सरकारले प्रदान गर्दै आएको पुनःस्थापना प्याकेज हलियालाई निल्नु न ओकल्नु भएको हलियाको क्षेत्रमा काम गर्ने संस्था एनएनएसडब्लुओका कैलालीका कार्यक्रम अधिकृत किरण पौडेलले बताए । राज्यले दिदै आएको सुविधा बढाउन अब दबाबको आवश्यकता परेको कतिपयको भनाइ छ । हलियाको जीवनस्तर परिर्वतन गर्नका लागि आन्दोलनको आवश्यकता छ रहेको लामो समयदेखि हलियाको क्षेत्रमा कार्यरत मनिराम देवलले बताए । हलियाको क्षेत्रमा काम गर्ने विभिन्न सरकारी तथा गैरसरकारी संघ संस्थाले पनि प्रभावकारी कार्य नगरेको कतिपय हलियाको गुनासो छ । सरकारले अन्य नागरिक सरह आफूहरुलाई हेर्नु पर्ने मुक्त हलियाले बताएका छन् ।

बीरगन्ज, बैशाख ३१ । नेपाल संघीय समाजवादी पार्टीका केन्द्रिय उपाध्यक्ष राजकुमार यादवले लुटतन्त्रको प्रतिकार गर्न जनता तयार रहेको बताएका छन् । पाटीले पोखरीया नगरपालिका ३ मुडलीमा शनिवार आयोजना गरेको आमसभा तथा पार्टी प्रवेश कार्यक्रमलाई सम्बोधन गर्दै उपाध्यक्ष यादवले ठूला दलका नेताहरुले ग्रामीण क्षेत्रहरुमा आफ्ना आसेपासेहरुलाई प्रयोग गरी लुटतन्त्र मच्चाएको अरोप लगाए । जिल्लाका ग्रामिण तथा नगर क्षेत्रमा निर्वाचनको नाममा चन्दा आतंक, कमिसनको खेल, आर्थिक कुनिती तथा भ्रष्टचार जस्ता कार्यहरु भइरहेको बताए । स्थानिय व्रहमदेव मेहताको सभापतित्वमा सम्पन्न आमसभामा संघिय समाजवादी पार्टीका केन्द्रिय सदस्य नथुनी प्रसाद कुशवाहा भिखम सिंह, दिपनारायण रौीनयार, राहुल सर्राफ, गोरख साह कानु, जितेन्द्र पटेल लगायतका वक्ताहरुले मनतव्य व्यक्त गरेका थिए । कार्यक्रममा नेपाली कांग्रेस, नेकपा एमाले माओवादी केन्द्र, फोरम नेपाल लगायतका राजनैतिक दलहरु परित्याग गरि संघीय समाजवादीमा प्रवेश गर्नेहरुलाई फुल अविर लगाएर नेताहरुले स्वागत गरेका थिए ।

कास्की, वैशाख ३१ । कास्की जिल्लामा ६० प्रतिशतभन्दा बढी मत खसेको क्षेत्रीय निर्वाचन कार्यालय पोखराका प्रमुख गङ्गालाल सुवेदीले जानकारी दिएको छ । आजको निर्वाचनमा मतदाता नामावलीमा नाम भएका युवादेखि ज्येष्ठ नागरिकसम्म उत्साहपूर्वक मतदानमा सहभागी भइरहेका छन् । क्षेत्रीय निर्वाचन कार्यालयका प्रमुख सुवेदीका अनुसार लगभग ७-८ सय मतदाता रहेको मतदान केन्द्रमा दिउँसो २ बजेपछि मतदाता आउने क्रम अत्यन्त न्यून भइसकेको छ ।

काठमाडौँ, वैशाख ३१ । स्थानीय तह निर्वाचनको मतदानको दिन सवारी साधन चलाउन नपाइने नियम मिचेर चलाइएका एक हजार नौ सय ५९ सवारी साधन ट्राफिक प्रहरीले नियन्त्रणमा लिएको छ । निर्वाचन आयोगले अत्यावश्यक, सवारी अनुमति लिएका र सुरक्षाकर्मीका सवारी साधनबाहेक अन्यलाई आज बिहान ५ बजेदेखि बेलुकी ७ बजेसम्म सवारी साधन चलाउन निधेष गरेको छ । काठमाडौँ उपत्यका ट्राफिक प्रहरी महाशाखाका अनुसार प्रहरी निरीक्षक मधुसूदन सिलवालले अपराह्न १ बजेसम्ममा एक हजार आठ सय ३४ मोटरसाइकल, ७६ कार, २८ ट्रक, ८ माइक्रोबस र छ बस नियन्त्रणमा लिइएको जानकारी दिए । आयोगले आचारसंहिता विपरीत सवारी साधान चलाइएको पाइएमा रु २५ हजारसम्म जरिवाना लिन सक्ने व्यवस्था गरेको छ । निषेधित क्षेत्रमा सवारी साधन चलाएमा भने ट्राफिक प्रहरीले रु पाँच सयदेखि एक हजार पाँच सयसम्म जरिवाना लिन सक्ने व्यवस्था छ ।

काठमाडौं, बैशाख ३१ । मतदान शुरु भएलगत्तै तनावग्रस्त बनेको दोलखामा प्रहरीको गोली लागि जना मतदाताको मृत्य भएको छ । दोलखाको मेलङ गाउँपालिका १ स्थित पओटीस्थित सत्यवर माविमा प्रहरीको गोली चलाउँदा मतदाता दिनेश भुजेलको मृत्यु भएको छ भने घटनामा अन्य चार जना गम्भिर घाइते भएको प्रहरीले बताएको छ । गम्भीर चार घाइतेलाई हेलिकोप्टरबाट काठमाडौं ल्याउने तयारी भएको जनाएको छ । आज चुनाव सुरु भएदेखि नै दोलखाका विभिन्न स्थानमा झडप भएको छ । कांग्रेस र एमाले कार्यकर्ताबीच विभिन्न मतदान केन्द्रमा झडप भएको प्रहरीले जनाएकाे छ । दाेलखामा हवार्इ फाइर तथा बुथ कब्जा हुने क्रम बढ्दाे छ । सत्यवर मावि पनि एक्कसी मतपेटिका लुट्न आएको समूहलाई रोक्ने क्रममा प्रहरीले गोली चलाएको जनाएको छ । प्रहरीको गोली लागी उनको मृत्यु भएको स्थानीय प्रशासनले जनाएको छ ।  

काठमाडौं – मानव अंग प्रत्यारोपण केन्द्र भक्तपुरले मुलुकमै पहिलो पटक मस्तिष्क मृत्यु (ब्रेन डेथ) भएका एक ब्यक्तिको मृगौला दुई जनामा प्रत्यारोपण गरेको छ यो खबर आजको कान्तिपुर दैनिकमा छ । केन्द्रका निर्देशक एंव बरिष्ठ मृगौला तथा कलेजो प्रत्यारण शल्यचिकित्सक पुकारचन्द्र श्रेष्ठको नेतृत्वमा गत विहीबार मस्तिष्क मृत्यु भएका एक ब्यक्तिमा दुईवटा मृगौला झिकेर दुई फरक ब्यक्तिमाा प्रत्यारोपण गरिएको हो ।

काठमाडौं, वैशाख ३० । युरोप, बेलायत, रुस, चीन, स्पेनलगायत विभिन्न ९९ मुलुकका विभिन्न संघसंस्थामा साईबर आक्रमण भएको छ । आक्रमणमा परेका कयौँ कम्प्युटर आफै लक हुने र खुल्नका लागी रकम माग गर्ने गरेको बीबीसीले उल्लेख गरेको छ । तीमध्ये बेलायत र स्कटल्याण्डको राष्ट्रिय स्वास्थ्य विभागको सेवा पूर्ण रुपमा प्रभावित भएको छ । बिरामीको अनलाईन रेकर्ड पहुँच बाहिर गएको बीबीसीले उल्लेख गरेको छ । अहिलेसम्म साईबर आक्रमणका ७५ हजार घटना भएको साईबर सुरक्षासम्बन्धी कम्पनी अभाष्टले जनाएको छ । बेलायतमा एक पछि अर्को गर्दै कम्प्यूटरले काम गर्न बन्द गरेपछि साइबर आक्रमणबारे खुलेको थियो । आक्रमणमा परेका कम्प्यूटरका प्रत्येक फाइल खुल्न अनलाईन प्रणालीबाट फिरौती तिनुपर्ने अवस्था रहेको साईबर विज्ञले बताएका छन् । निश्चित समयमा सो रकम भुक्तान नगर्दा रकम बढ्दै जाने गरेको छ ।

दाङ, वैशाख ३० । यहाँका बालबालीकाले काफल बेचेर पढाइ खर्च जुटाउन थालेका छन् । फुर्सद्को समयमा कपुरकोट बजार र तुलसीपुर सल्यान सडक खण्डमा काफल बेच्न बसेका बालबालिकाले दैनिक रु एक हजारदेखि रु एक हजार पाँच सयसम्म आम्दानी गर्ने गरेका कपुरकोट गाउँपालिकाका उमेश पुनले बताउनुभयो । कक्षा ६ मा अध्ययन गर्ने पुन शनिबार तथा विद्यालय छुट्टी भएपछि काफल बिक्री गर्न गरेको बताउनुहुन्छ । “काफल बेचेर पढाइखर्च चलेको छ,” उहाँले भन्नुभयो । हाल स्थानीय तहको निवार्चनका कारण विद्यालय बन्द भएकाले यही मौका छोपेर काफल बिक्री गर्ने गरेको अर्का बालक खिमबहादुर वलीले बताउनुभयो । उहाँ जङ्गलमा गएर बिहान काफल टिप्ने र साँझ बिक्री गर्ने गर्नुहुन्छ । त्यस्तै धनवाङकी कमला पुन अरुसँग खरिद गरेर काफल बिक्री गर्नुहुन्छ । कक्षा ७ मा पढ्दै गरेकी पुनले रु ७० मा एक मानो काफल किनेर रु एक सयमा बिक्री गर्नुहुन्छ । “दैनिक रु तीन सयदेखि रु पाँच सयसम्म फाइदा हुन्छ,” उहाँले भन्नुभयो । काफल बिक्री गरी दैनिक रु चार सय भन्दाबढी आम्दानी गर्ने यमुना घर्तीले सो रकमले कापी, कलम किन्ने गरेको बताउनुभयो । उहाँ जस्तै अन्य बालबालिकाले काफल बेचेर मनग्य आम्दानी गदैआएका छन् ।

दमौली, वैशाख ३० । तनहुँको रिसिङ र बेलभन्ज्याङमा शुक्रबार राति अज्ञात समूहले बस र ट्रकमा आगजनी गरेको छ । रिसिङ –६ चालिसेमा अपरिचित समूहले एउटा बसमा आगो लगाउँदा बस जलेर पूर्ण रुपमा ध्वस्त भएको छ । आठ नौजनाको समूहमा आएका अपरिचित व्यक्तिले पार्किङ गरिराखिएको ना६ ख ३५२५ नं को बसमा आगो लगाएको प्रहरी उपरीक्षक उमेशराज जोशीले बताउनुभयो । उक्त समूहले चालक र सहचालकलाई खुकुरी देखाई बाहिर निकालेर आगो लगाएको र त्यसको तीव्र खोजी भइरहेको जनाइएको छ । एक हप्ताअघि मात्रै अज्ञात समूहले निर्वाचन प्रयोजनका लागि ल्याइएको घिरिङ गाउँपालिकाको स्कार्पियो जिपमा आगजनी गरेको थियो । सो घटनामा शङ्कास्पद एक व्यक्तिलाई प्रहरीले नियन्त्रणमा लिएको थियो । त्यस्तै शुक्रबार राति नै तीन चारजनाको अज्ञात समूहले बन्दीपुर गाउँपालिका– १ स्थित बेलभन्ज्याङमा ना ३ ख ९११६ नं को ट्रकमा आगजनी गरेको छ । चालकलाई ट्रकमै राखेर उनीहरुले आगो लगाए पनि सिसा फोडेर उनी बाहिर निस्केको घटनास्थल पुग्नुभएका प्रहरी नायब निरीक्षक मनोज पाण्डेले बताए । शनिबार बिहान ५.१५ बजेतिर उक्त समूहले पेट्रोल छर्केर ट्रकमा आगजनी गरेको प्रहरी उपरीक्षक उमेशराज जोशीले बताउनुभयो । बन्दमा गाडी चलाएको भन्दै चालक र सहचालकलाई भाटाले समेत हानिएको थियो । चिनी बोकेर डुम्रेबाट पोखरा जाँदै गरेको उक्त ट्रकमा आगजनी भएको इलाका प्रहरी कार्यालय भानुमुकाम डुम्रेका प्रहरी निरीक्षक राजन रायमाझीले बताउनुभयो । व्यास नगरपालिकाबाट लगिएको दमकल, प्रहरी र स्थानीय बासिन्दाले करिब चार घन्टा लागाएर आगो निभाएको प्रनानि पाण्डेले बताउनुभयो । वन कार्यालय नजिकै शङ्कास्पद वस्तु भोर्लेटार चोक र जिल्ला वन कार्यालय नजिकै आज बिहान शङ्कास्पद वस्तु भेटिएको छ । कपडाको डल्लो बनाएर इँट्टा राखिएको अवस्थामा उक्त वस्तु भेटिएपछि व्यास– ५ रामवाण गुल्मबाट गएको बम निष्क्रिय टोलीले उक्त वस्तु हटाएको प्रहरीले जनाएको छ ।

कैलाली, वैशाख ३० । नेत्रविक्रम चन्द विप्लव नेतृत्वको नेपाल कम्युनिष्ट पार्टीका ४ जना कार्यकर्ता आज कैलालीमा पक्राउ परेका छन् । प्रहरीले दुई जनालाई टीकापुर र दुई जनालाई धनगढीबाट आज बिहान समातेको हो । जिल्ला प्रहरी कार्यालयका प्रहरी उपरीक्षक बीरबहादुर बुढामगरले उनीहरुलाई शंकास्पद गतिविधि गरिरहेको र जबर्जस्ती बजार बन्द गराइरहेको अवस्थामा पक्राउ गरिएको बताए । धनगढीमा समातिएका जयबहादुर धानुक पार्टीको राष्ट्रिय युवा जनस्वयम्सेवक जिल्ला उपाध्यक्ष र राजु दाहाल एरिया कमिटी सदस्य हुन् । उनीहरुलाई प्रहरीले से५प २५७ नम्बरको मोटरसाइकलसहित समातेको हो । अखिल क्रान्तिकारीका जिल्ला उपाध्यक्ष झलक बिके र पार्टीका टिकापुर इञ्चार्ज नरेन्द्र बिके टीकापुरबाट पक्राउ परेका छन् । यसअघि धनगढीका दुई ठाउँमा सो पार्टीका कार्यकर्ताले प्रेसर कुकर बम राख्दै यातायात अवरुद्ध पारेका थिए । नेकपाले आव्हान गरेको आमहड्तालको मिश्रित असर देखा परेको छ । लामो दूरीका यातायात र मुख्य बजार बन्द भएपनि साना दूरी सवारी साधन र साना पसल खुलेका छन् । शनिबार भएकाले अधिकांश उद्योग तथा शिक्षण संस्था र सरकारी कार्यालय बन्द छन् ।

रसुवा, वैशाख ३० । आइतबार हुने स्थानीय तह निर्वाचनअन्तर्गत आफ्नो मताधिकार प्रयोग गर्न यहाँका ९० प्रतिशत मतदाताले आ-आफ्नो परिचयपत्र प्राप्त गरेका छन् । जिल्ला अदालतका स्रेस्तेदार एवम् सहायक निर्वाचन अधिकृत ढाकाराम पौडेलका अनुसार ४२ मतदान केन्द्रमा मतदाताले आ-आफ्नो मतदान परिचय लिइरहेका छन् । पाँच गाउँपालिका रहेको जिल्लामा २७ हजार आठ सय ५४ मतदाता छन् । बाँकी १० प्रतिशत मतदाताले आजसम्म परिचयपत्र लिइसक्ने अपेक्षा राखिएको अधिकृत पौडेलले बताउनुभयो । पाँच गाउँपालिकामध्ये गोसाइँकुण्ड र उत्तरगयामा आठ आठ, पार्वतीकुण्डमा छ, नौकुण्डमा ११ र कालिकामा नौ मतदाता केन्द्र रहेको जिल्ला निर्वाचन अधिकारी नवीन खालिङले बताउनुभयो ।