काठमाडौं, माघ २४ । अमेरिकी राष्ट्रपति डोनल्ड ट्रम्पले आप्रवासीसम्बन्धि आफ्नो नीतिमा संसदले सहमति नजनाउने हो भने पूर्ण रुपमा बन्द गर्न पाउँदा आफू खुशी हुने बताएका छन् । आप्रवासी नीति सुधार्न नमान्ने हो भने यो बन्द गरिनेछ र यो मुलुकका हितमा हुनेछ, ट्रम्पले भने । ह्वाइटहाउसमा बोल्दै ट्रम्पले हत्याराहरुलाई मुलुक प्रवेशको छिद्र रोक्ने कानूनमा सुधार गर्न तयार नहुने हो भने आप्रवासीलाई अमेरिका प्रवेशमा सधैका लागि बन्द गरिने चेतावनी दिए । आप्रवासीका लागि सधैका लागि ढोका बन्द गर्न पाउँदा सबैभन्दा बढी खुशी आफू नै हुने पनि उनको भनाइ थियो । डेमोक्रेट सीनेटर चक सुमरले भने बन्द गर्ने कुरा ट्रम्पको मात्र चाहना भएको अरु कसैले यसमा साथ नदिने प्रष्ट गरे । अर्कातिर ह्वाइटहाउसका प्रवक्ता सराह स्यान्डर्सले भने राष्ट्रपति ट्रम्पले बन्द नै गर्ने विषयमा वकालत नगरेको प्रष्टीकरण दिनुभएको छ । राष्ट्रपतिले दीर्घकालीन समाधान खोज्न मात्र चाहेको उनको भनाइ थियो ।

काठमाडौं, माघ २४ । माल्दिभ्सका पूर्वराष्ट्रपति मोहमद नाशीदले राष्ट्रपति अब्दुल्ला यामीनले संकटकालको घोषणा गरेपछि उत्पन्न राजनीतिक संकटमा हस्तक्षेप गर्न भारत र अमेरिकालाई आह्वान गरेका छन् । निर्वासनमा रहेकाा नाशीदले सेना सहितको दूत पठाएर माल्दिभ्समा भौतिक उपस्थिति जनाउन भारतलाई अनुरोध गरेका हुन् । ट्वीटरमार्फत् नाशीदले माल्दिभ्सका जनताको तर्फबाट भन्दै पक्राउ गरिएका न्यायाधीश र राजनीतिक बन्दीको रिहाइका लागि सत्तारूढ नेताहरूका सबै आर्थिक कारोबार रोकिदिन भारत र अमेरिकालाई गुहारेका छन् । माल्दिभ्समा सुरक्षा सैन्यले सर्वोच्च अदालतमा हस्तक्षेप गरी दुई जना वरिष्ठ न्यायाधीश र अर्का पूर्वराष्ट्रपति मौमून अब्दुल गयूमलाई पक्रेपछि नाशीदले यो आह्वान गरेका हुन् । यसअघि अमेरिकी विदेश मन्त्रालयले राजनीतिक बन्दीलाई रिहा गर्न सर्वोच्च अदालतले दिएको आदेश मान्न राष्ट्रपति यामीनले अस्वीकार गरेकामा चिन्ता व्यक्त गरेको थियो । विपक्षीहरूले राष्ट्रपति अधिनायकवादी दिशमा अगाडी बढेको आरोप लगाएका छन् । विपक्षी राजनीतिज्ञहरुलाई रिहा गर्न आदेश दिएपछि रुष्ट बनेको सरकारले संकटकाल घोषणा गरेर प्रधानन्यायाधीश अब्दुल्लाह साइद र अर्का न्यायाधीश अली हमिदलाई पक्रेको थियो । सर्वोच्च अदालतले सन् २०१५ मा निर्वासनमा बसेका पूर्व राष्ट्रपति मोहम्मद नाशिदमाथिको सुनुवाइ पनि असंवैधानिक भएको निर्णय गरेको थियो ।

काठमाडौं, माघ २४ । ताइवानमा ६ दशमलव ४ म्याग्नेच्युडको भूकम्प जाँदा दुई जनाको मृत्यु भएको छ भने सयौं घाइते भएका छन् । भूकम्पका कारण दर्जनौ भवन भत्केका छन् । स्थानीय समय अनुसार राति ११ बजेर ५० मिनेटमा भूकम्प जाँदा अधिकांश मानिस निन्द्रामा थिए । भूकम्पलगत्तै भागदौड मच्चिदा सयौं घाइते भएका हुन् । मूख्य शहरमा रहेको एक होटेल भासिएकाले होटेलका थुप्रै कर्मचारी फसेको बताइएको छ । १० तलाको होटेल भासिँदा तल्लो तलामा रहेका कर्मचारी फसेका हुन् । होटेलका २८ कर्मचारीलाई भने उद्धार गरिएको छ । उद्धारमा सेना, प्रहरी स्थानीय खटेका छन् ।

काठमाडौं- ताइवानमा शक्तिशाली भूकम्प गए पछि कम्तिमा पनि दुई जनाको मृत्यु भएको छ भने सय भन्दा बढी घाइते भएका छन् । बीबीसीले जनाए अनुसार ताइवानको हुआलिन भन्ने सहरमा आएको ६ दशमलव ४ तीव्रताको भूकंपका कारण केही अग्ला भवनहरू क्षतिग्रस्त भएका छन् । ताइवानी मिडियाहरूमा भूकंप स्थानीय समयानुसार राति ११ बज्र ५० मिनेटमा गएको जनाइएको छ । सामाजिक सञ्जालहरूमा सडकहरू र अगला भवनहरू क्षतिग्रस्त भएको देखाइएको छ । प्राप्त समचारहरूमा एउटा होटल भत्किएको र त्यसभित्र केही मानिस फसेको जनाइएको छ ।तिनीहरूको उद्वार कार्य जारी रहेको जनाइएको छ । स्थानीयहरू भयभीत छन् र उनीहरू सडकमै रात बिताउन चाहिरहेका छन् । स्थानीय मिडियाहरूमा समाचार छ । रोयटर्स समाचार एजेंसीले अधिकारीहरूलाई उद्धृत गर्दै भानेको छ देशको उत्तरी तटीय क्षेत्रमा केही पुलहरू तत्काललाई प्रयोग गर्न नमिल्ने गरी क्षतिग्रस्त भयाएका छन् । सडकहरूमा चिरा परेका छन्, चट्टानहरू खसिरहेका छन् र ग्यास पाइपहरूमा चुहावटका खबर आइरहेका छन्- समचारहरूमा उल्लेख छ । राष्ट्रपति साइ इंग वेनले तत्काल विपद व्यावस्थापनका उपाय अपनाउन सम्बन्धित मंत्रालयहरूलाई आदेश दिइसकेका छन् । प्रभावित क्षेत्र राजधानी ताइपेईबाट करिब एक सय ६० किलोमिटरको दूरीमा रहेको छ । भूकम्पको लागि संवेदनशील मानिने ताइवानमा साना-तिना कंपनहरू गइराख्छन् । अर्थक्वेकट्ऱ्याक डट कमले पछिल्लो २४ घण्टामा सो क्षेत्र आसपास छ वटा साना कम्पन महसुस गरिएको जनाएको छ ।

काठमाडौं- मालदिभ्समा राष्ट्रपति अब्दुल्ला यामीनले १५ दिनका लागि संकटकालको घोषणा गरेका छन् । देशमा राजनीतिक संकट गहिरिन थालेपछि सोमवार राष्ट्रपतिले सो कदम चालेका हुन् । राष्ट्रपति यामीनका सहायक अजीमा सुकुरले यसको घोषणा गरेका हुन् । यस कदमले त्यहाँको सुरक्षा बललाई शंकास्पद व्यक्तिहरूलाई गिरफ्तार गर्ने ऱ् हिरसतमा राख्ने असीमित शक्ति प्रदान गर्नेछ । त्यहाँको उच्चतम न्यायालय र सरकारबीच गतिरोध बढ्दै गरेपछि यस्तो घोषणा गरिएको हो । अत्यधिक अंतरराष्ट्रीय दबाब र चासोका बावजुद राष्ट्रपतिले राजनैतिक बन्दीहरूलाई रिहा गर्न दिएको उच्चतम न्यायालयको आदेश नमान्ने बताएका छन् । राष्ट्रपति यामीनले न्यायाधीशहरूलाई आफ्नो फैसला बदल्न तीनवटा पत्र लेख्नासाथ सुकुरले सरकारी टेलिभिजनमा संकटकाल लगाइएको घोषणा गरेका थिए । यामीनले यो दोस्रो पल्ट संकटकालको घोषणा गरेका हुन् । यसअघि नोभेम्बर २०१५ मा कथित रूपले उनको हत्याको प्रयास भएको भनेर संकटकाल घोषणा भएको थियो । अधिकारीहरूका अनुसार राष्ट्रपतिले दुइ दिनभित्र यस घोषणाका बारेमा संसदलाई सूचित गर्नुपर्ने छ । तर अधिकारिहरूले देशको संसदलाई अनिश्चितकालको लागि निलंबित गरिएको जनाएका छन् । उच्चतम न्यायालयले गत बिहीबार १२ जना निलंबित संसदलाई बहाल गरिदिएको थियो । यामीन पक्षका ती सांसद विपक्षसँग मिल्न गएपछि ८५ सदस्यीय संसदमा राष्ट्रपतिको पार्टी अल्पमतमा परेको थियो । जसले उनीमाथि महाअभियोगको खतरा रहेको थियो ।

काठमाडौं, माघ २२ । अफ्रिकाको पश्चिमी क्षेत्रमा पर्ने गिनीको खाडीबाट ठूलो मात्रामा इन्धन बोकेको एउटा ट्यांकर बेपत्ता भएको छ । बेनिन तटबाट चालक दलका २२ भारतीय नागरिकसहितको ट्यांकर बेपत्ता भएको हो । पनामा पंजीकृत मरिन एक्सप्रेस नामको सो ट्यांकर गत बिहीबारदेखि सम्पर्कविहीन बनेको हो । अनुकूल मौसमका बावजुद ट्यांकर बेपत्ता भएपछि त्यसलाई लुटेराले कब्जामा लिएको हो कि भन्ने आशंका गरिएको छ । यसअघि पनि सोही इलाकामा इन्धन बोकेका ट्यांकरलाई लुटेरा समूहले निशाना बनाउँदै आएका थिए । बेपत्ता ट्यांकरमा १३ हजार ५ सय टन पेट्रोलियम पदार्थ रहेको बताइएको छ । बेपत्ता ट्यांकरको खोजी भइरहेको अधिकारीहरुले जनाएका छन् ।

काठमाडौं, माघ २२ । परमाणु विवादका कारण दुई कोरियाबीच तनाव जारी रहेकै बेला उत्तर कोरियाले उच्च तहका नेतालाई दक्षिण कोरिया पठाउने निर्णय गरेको छ । उत्तर कोरियाका राष्ट्रपति किम जोन उनले आफ्ना देशका उच्च तहका नेता किम योङ नामलाई दक्षिण कोरिया पठाउने निर्णय गरेका हुन् । दक्षिण कोरियामा हुन लागेको शीतकालिन ओलम्पिकको पूर्वसन्ध्यामा किम योङ नामलाई दक्षिण कोरिया पठाई दुई देशबीचको सम्बन्ध सुधारको प्रयास गर्न लागिएको हो । किम योङ नामको भ्रमण दलमा अन्य २२ जना उत्तर कोरियाली प्रतिनिधी पनि रहने छन् । नाम चार वर्षअघि पनि दक्षिण कोरिया पुगेका थिए । भ्रमणका क्रममा दक्षिण कोरियाका प्रतिनिधीसँग भेट गरी दुई देशबीचको सम्बन्ध बिस्तारको पहल गर्ने अपेक्षा उत्तर कोरियाको छ । कुटनीतिक रुपमा निकै नै प्रभावशाली नेता मानिएका नेता नामले यसअघी पनि दुर्ई कोरियाबीचको सम्बन्ध बिस्तारमा महत्वपूर्ण भूमिका निर्वाह गरेका थिए । किम योङ नाम दक्षिण कोरियामा हुने शीतकालिन ओलम्पिकमा दुई कोरियाका एथलेट्सहरुले संयुक्त रुपमा झन्डोत्तोलन गर्नुहुने भएको छ । सोही ओलम्पिकका लागि उत्तर कोरियाका खेलाडीहरु दक्षिण कोरिया पुगिसकेका छन् ।

काठमाडौं, माघ २२ । माल्दिभ्स सरकारले राष्ट्रपति अब्दुल्लाह यामिनलाई गिरफ्तार गर्न वा महाभियोग लगाउन सर्वोच्च अदालतले आदेश दिए नमान्न सुरक्षा निकायलाई निर्देशन दिएको छ । माल्दिभ्सको सर्वोच्च अदालतले पूर्व राष्ट्रपति मोहम्मद नसिदमाथि लागेको आतंकवादको आरोप खारेज गर्दै पक्राउ परेका विपक्षी ९ जना सांसदलाई रिहा गर्न आदेश दिएको थियो । यो आदेशसँगै माल्दिभ्समा विपक्षी दलले संसद्मा बहुमत प्राप्त गरेको छ । तर माल्दिभ्स सरकारले अदालतको आदेश अस्वीकार गर्दै संसद् नै स्थगित गरिदिएको छ । अदालतको आदेशपछि महान्यायाधीवक्ता मोहम्मद अनिलले राष्ट्रपतिलाई गिरफ्तार गरिनु गैरकानुनी हुने बताए । उनले सर्वोच्च अदालतले राष्ट्रपतिलाई पदच्युत गराउन खोजेको आरोप लगाए । उनले सर्वोच्च अदालतले राष्ट्रपतिलाई गिरफ्तार गर्न आदेश दिए त्यो असंवैधानिक हुने बताए । उनले सेना र प्रहरीलाई असंवैधानिक आदेश पालना नगर्न निर्देशन दिए । यसैबीच पूर्वराष्ट्रपति मोहम्मद नासिदले राष्ट्रपति यामिनले तत्काल सत्ता छाड्नुपर्ने बताएका छन् । उनले सुरक्षा फौजलाई देशको संविधानको रक्षा गर्न पनि आह्वान गरेका छन् । हाल श्रीलंकामा निर्वासनमा रहेका नासिद प्रजातान्त्रिक तरिकाबाट निर्वाचित हुने माल्दिभ्सका पहिलो नेता हुन् । उनीमाथि सन् २०१५ मा आतंकवादको आरोप लागेको थियो । तर सर्वोच्च अदालतले त्यो आदेश राजनीतिक रुपमा अभिप्रेरित भएको ठहर गरेको छ । यसैबीच विपक्षी दल माल्दिभ्स डेमोक्रेटिक पार्टीले अदालतको आदेशको पालना गर्न सरकारलाई आग्रह गरेको छ । विपक्षी दलका प्रवक्ता अब्दुल गफूरले सरकारले आदेशको पालना नगरेको भन्दै प्रधानन्यायाधीशसहित दुई जना वरिष्ठ न्यायाधीशलाई पक्राउ गर्न सरकारले प्रयास गरेको आरोप लगाएका छन् । उनले सरकारले न्यायपालिकाको शक्तिलाई कमजोर बनाउने प्रयास गरेको आरोप पनि लगाए ।

काठमाडौं, संसारका सबैभन्दा व्यस्ता एयरपोर्टहरुमा गनिने मुम्बई एयरपोर्टले आफ्नै रेकर्ड तोडेको छ । मिडिया रिपोर्टका अनुसार गत २० जनवरीका दिन मुम्बई एयरपोर्टले २४ घण्टामा ९८० फ्लाइटको एराइभल ल्याण्डिङको रेकर्ड बनाएको हो । मुम्बई इन्टरनेशनल एयरपोर्टका प्रवक्ताका अनुसार, मुम्बई एयरपोर्टले यसअघि गत ६ डिसेम्बरका दिन ९७४ वटा फ्लाईट सञ्चालन गरेको रेकर्ड तोडेको हो । संसारमा सबैभन्दा व्यस्त दोश्रो नम्बरको एयरपोर्ट गैटविक एयरपोर्ट हो । यहाँ एकल रनवेका लागि २०१८ मा प्रतिदिन ८७० उडानको घोषणा गरिएको छ ।

बेइजिङ, चीन, २१ माघ (रासस/सिन्ह्वा) ः चिनियाँ पत्रकार संगठनले सन् २०१६ र २०१७ मा प्रकाशित गरिएका समाचारमध्ये राष्ट्रिय उत्कृष्ट पत्रकारिताका लागि दर्ता भएका ९२ समाचारलाई झुटा विवरण भनी आइतबार प्रतिस्पर्धाका लागि अयोग्य ठहर गरेको छ । अयोग्य ठहर गरिएका समाचार विवरणमध्ये ७१ समाचार रेडियो तथा टेलिभिजनका लागि तयार गरिएका समाचार रहेका संगठनले उल्लेख गरेको छ । संगठनले केही समाचार बिषयको वास्तविक भाव परिवर्तन गरी प्रतिस्पर्धाका लागि दर्ता गरिएको तथा केही समाचार सामग्री झुटा रहेको बताएको छ । समाचारमा तथ्यगत सामग्रीको प्रयोग नगरिँदा यसले चिनियाँ पत्रकारिता पुरस्कारमाथिको विश्वसनीयता तथा विशेषतामा नै असर पर्ने चिनियाँ पत्रकार संगठनले जनाएको छ । संगठनले पुरस्कारका लागि तय गरिएको उक्त मापदण्डले झुटा समाचार निर्माण तथा प्रशारणमा योगदान गर्ने विश्वास लिएकोे बताएको छ । संगठनले सन् १९९० मा स्थापना गरेको चिनियाँ पत्रकारिता पुरस्कार र चाङजियाङ तथा ताओफेन पुरस्कारहरू चीनको पत्रकारिता क्षेत्रमा सबैभन्दा उत्कृष्ट (ठूला) पुरस्कारहरू हुन् ।

काठमाडौं, माघ २१ । सिरियामा रुसी सैन्य विमान जमिनमा खसालिएको छ । विद्रोही नियन्त्रित पूर्वोत्तर इदलिब प्रान्तमा विमान खसालिएको हो । विमान खस्दा पनि सुरक्षित रहेका पाइलटलाई भने जमिनमा आक्रमण गरी मारिएको रुसले जनाएको छ । विमान अलकायदासँग सम्बन्ध रहेको हयात तह्रीर अलशाम नामक समूहले खसालेको बताइएको छ । रुसले यस क्षेत्रमा सहयोगी सिरियाको साथ विद्रोहीमाथि आक्रमण गरिरहेको छ । गत डिसेम्बरदेखि सिरियाले रुसी सहयोगमा हवाई आक्रमण गरिरहेको छ । यसै आक्रमणका कारण लाखौं मानिस विस्थापित भएका छन् । २४ घन्टाको बीचमा रुसले थुप्रैं पटक हवाई आक्रमण गरेको पनि बताइएको छ ।

जयपुर (भारत)– आफूविरुद्ध उजुरी दर्ता भएपछि थुनिने डरले बाबा रामदेव हाईकोर्टको शरणमा पुगेका छन् । पतंजलीले उत्पादन गरेको बिष्कुट पूर्णशुद्धता नभएको भन्दै बाबा रामदेवविरुद्ध प्रहरीमा उजुरी परेको थियो । भारतीय पत्रिका अमर उजालामा प्रकाशित समाचार अनुसार बाबा रामदेवको निवेदनमाथि सुनुवाई गर्दै राजस्थान हाईकोर्टले उजुरीकर्ता र प्रदेश सरकारका नाममा कारण देखाउ आदेश जारी गरेको छ । अजमेर निवासी एसके सिंहले जालुपुरा थानामा बाबा रामदेवसहित आचार्य बालकृष्ण र आस्था च्यानलविरुद्ध उजुरी दर्ता गराएका थिए । हाईकोर्टले उजुरीकर्ता र प्रदेश सरकारका नाममा उजुरी रद्द नगर्नुपर्ने कारण मागेको छ । अदालतले जवाफ दिने समय मार्चसम्म तोकेको छ । न्यायाधीश दीपक माहेश्वरीको एकल इजलासले रामकिशन यादव उर्फ बाबा रामदेव र आचार्य बालकृष्णसहित आस्था च्यानलले दर्ता गराएको आपराधिक निवेदनमाथि प्रारम्भिक सुनवाई गर्दै कारण देखाउ आदेश दिएको हो । पतंजलिको एउटा बिस्कुटमा शतप्रतिशत आटा भएको र मैदाको प्रयोग नभएको दावी गरिएपनि विष्कुटमा मैदा मेटिएको उजुरीकर्ताको दावी छ । विष्कुटको विज्ञापन आस्था च्यानलबाट गरिएकाले च्यानलविरुद्ध पनि उजुरीदर्ता गरिएको थियो । अदालतमा दर्ता गरिएको निवेदनमा बाबा रामदेव विरुद्धको उजुरीलाई चुनौति दिँदै विश्वस्तरमा प्रतिष्ठित बाबालाई बद्नाम गराउन प्रहरीमा उजुरी दिइएको दावी गरिएको छ । उजुरीकर्ताले विष्कुटमा मिलाइएको मैदाको मात्रा लगायतबारे पनि उजुरीमा उल्लेख नगरेको दावी गरिएको छ ।

काठमाडौं । भारतीय प्रधानमंत्री नरेन्द्र मोदीका बारेमा थुप्रै किताबहरू लेखिएका छन् तर अब उनी आफैं लेखक बनेर सामुन्ने आएका छन् । उनले लेखेको एउटा पुस्तक ‘एक्जाम वारियर्स’ आज विमोचन हुँदैछ । विशेष गरी विद्यार्थीहरूलाई लक्षित गरी लेखिएको यस पुस्तकमा दस र बाह्र कक्षाका विद्यार्थीहरूलाई परीक्षाको समय हुने तनाव कसरी कम गर्ने भन्ने बारे टिप्स दिइएको छ । यस पुस्तकको विमोचन कार्यक्रममा विदेशमंत्री सुषमा स्वराज प्रमुख अतिथि रहने कार्यक्रम रहेको छ । यस पुस्तकमा अन्तरक्रियात्मक शैलीमा विद्यार्थीहरूलाई विभिन्न सुझावहरू दिइएका छन् । यसको प्रकाशन पेंगुइन पब्लिशर्सले गरेको हो ।

हङकङ, माघ २० । हङकङमा घर बनाउन खाडल खन्दा विशाल बम फेला परेको छ । दोस्रो विश्वयुद्धका क्रममा अमेरिकाले खसालेको दुईवटा बम हङकङमा फेला परेको हो । लामो प्रयासपछि सुरक्षाकर्मीहरुले सो बम निष्कृय तुल्याएका छन् । ४५० किलो वजनको सो बम वान चाई जिल्लाको एक व्यापारिक क्षेत्रमा फेला परेको हो । भवन निर्माण भइरहेको क्षेत्रमा खाडल खन्दा सो बम फेला परेको हो । बम फेला परलगत्तै आसपासका करिब चार हजारभन्दा बढी नागरिकलाई सो क्षेत्रबाट हटाइएको थियो । सडकलाई घेराबन्दी गरिएको थियो भने रातभर खटेर उक्त बमलाई हङकङ प्रहरीको बम निरोधक समूहले निष्कृय तुल्याएको थियो । एकसाता भित्रै हङकङमा दोस्रो विश्वयुद्धको समयको बम फेला परेको यो दोस्रो घटना हो । अमेरिकामा निर्माण भएको ‘एन–एम६५’ बम दोस्रो विश्वयुद्धका क्रममा अमेरिकाले जापान अधिनस्थ हङकङमा खसालेको हो । समाचार एजेन्सीहरुका अनुसा बम निरोधक समूहले बमको बाहिरी भागमा प्वाल बनाएर विस्फोटक पदार्थलाई नष्ट गरेको हो । जमिनमुनी गाडिएर रहेको अवस्थामा बम फेला परेपछि सर्वसाधारणमा आतंक बढ्न थालेको छ । यस्ता बम अझै कति होलान् र कहाँ कुन अवस्थामा होलान् भन्ने प्रष्ट नहुँदा सर्वसाधारणमा सन्त्रास बढाएको हो ।

काठमाडौं, माघ ११ । अमेरिकाको एक अदालतले अमेरिकाका ओलम्पिक जिम्नास्टिक्स टिमका पूर्व डाक्टर लरी नस्सारलाई यौन शोषणको आरोपमा १७५ वर्षको जेल सजाय सुनाएको छ । १ सय ६० जना पीडितको बयानपछि अदालतले उनलाई जेल सजाय सुनाएको हो । नस्सारले माफी माग्ने प्रयास गरे पनि न्यायाधीशले अस्वीकार गर्दै जेल सजाय तोकेका हुन् । नस्सारले कयौं युवतीलाई यौन दुव्र्यवहार गरेको ठहर गर्दै अदालतले जेल सजाय दिएको हो । उनले कतिपय ओलम्पिक खेलाडीलाईसमेत यौन दुव्र्यवहार गरेको पुष्टि भएको छ । ५४ वर्षीय नस्सारलाई यसअघि पनि बालबालिकामाथि यौन हिंसा गरेको आरोपमा ६० वर्षको कैद सजाय सुनाइएको थियो । न्यायाधीश रोजमेरी अकिलिनाले सजायँ सुनाउँदै नस्सारको कडा आलोचनासमेत गरेका छन् । उनले पीडित महिलाको कुरा सुन्दा उनीहरुको सम्मानका लागि पनि नस्सारलाई ठूलो सजाय दिनुपरेको बताए । उनले नक्सार जेलभन्दा बाहिर राख्न लायक व्यक्ति नभएको समेत बताए । पीडित महिलाहरुसँग अदालतले एक हप्तादेखि बयान लिएको थियो । अन्तिममा नस्सारलाई पनि आफ्ना भनाई राख्ने मौका अदालतले दिएको थियो ।