माेरङ । मोरङ–१ मा प्रतिनिधिसभा सदस्यका उम्मेदवार कुलप्रसाद साम्बा (कुशल लिम्बू) ले चुनावी अभियानलाई तीव्रता दिँदै मतदातामाझ विकास, पारदर्शिता र जनउत्तरदायित्वको स्पष्ट प्रतिबद्धता व्यक्त गरेका छन् । नेपाली कम्युनिष्ट पार्टी (नेकपा) का तर्फबाट उम्मेदवारी दिएका लिम्बू यतिबेला उर्लाबारी, मिक्लाजुङ, लेटाङ र केराबारीका विभिन्न बस्तीमा घरदैलो तथा भेटघाट कार्यक्रममा सक्रिय छन् । घर–घरमा पुगेर स्थानीय समस्या र जनअपेक्षा सुन्ने क्रममा उनले शिक्षा, स्वास्थ्य, कृषि, रोजगारी र पूर्वाधार विकासलाई प्राथमिकतामा राखेर काम गर्ने योजना प्रस्तुत गरिरहेका छन् । लेटाङमा आयोजित घरदैलो कार्यक्रममा स्थानीयसँग प्रत्यक्ष संवाद गर्दै उनले भने, “राजनीति पदका लागि होइन, जनताको सेवा र परिवर्तनका लागि हो । मोरङ–१ को विकासलाई अब तीव्र गति दिनुपर्छ ।” लिम्बूले विगतमा प्रदेशसभा सदस्यका रूपमा काम गर्दा हासिल गरेको अनुभवलाई संघीय संसदमा उपयोग गर्दै क्षेत्रीय विकासलाई संस्थागत ढंगले अघि बढाउने प्रतिबद्धता जनाए ।पारदर्शी शासन, प्रभावकारी सेवा प्रवाह र रोजगारी सृजनालाई केन्द्रमा राखेर दीर्घकालीन योजना कार्यान्वयन गर्ने उनको भनाइ छ। चुनावी अभियानका क्रममा युवा, किसान, व्यवसायी तथा ज्येष्ठ नागरिकसँग अन्तरक्रिया गर्दै उनले विकासका अधुरा काम पूरा गर्ने र नयाँ सम्भावनालाई अवसरमा रूपान्तरण गर्ने अठोट व्यक्त गरेका छन् । मतदाताहरूले पनि उनको सक्रियता, स्पष्ट दृष्टिकोण र जनतासँगको निरन्तर सम्पर्कलाई सकारात्मक रूपमा लिएका छन्। लोकतन्त्रमा मत नै सबैभन्दा ठूलो शक्ति भएको उल्लेख गर्दै लिम्बूले भावनामा होइन, विवेकमा आधारित निर्णय गर्न आग्रह गरेका छन् । “देश र भविष्य पुस्ताको हितलाई केन्द्रमा राखेर सही नेतृत्व चयन गरौँ,” उनको आह्वान छ। मोरङ–१ मा कुशल लिम्बूलाई विकासप्रेमी, सक्रिय र प्रतिबद्ध उम्मेदवारका रूपमा हेरिँदै आएको स्थानीय कार्यकर्ताहरूको दाबी छ। चुनाव नजिकिँदै जाँदा उनको पक्षमा जनसमर्थन क्रमशः सुदृढ बन्दै गएको बताइएको छ।

काठमाडौं । नेपाली कम्युनिस्ट पार्टी (नेकपा) का संयोजक पुष्पकमल दाहाल ‘प्रचण्ड’ले जेनजी युवाहरूले आयोजना गरेको प्रदर्शनलाई भ्रष्टाचार नियन्त्रण, सुशासन स्थापना र सामाजिक सञ्जालमाथिको प्रतिबन्ध हटाउनुपर्ने जायज मागमा आधारित शान्तिपूर्ण आन्दोलनका रूपमा व्याख्या गर्नुभएको छ।  प्रशासनको स्वीकृतिमा सम्पन्न उक्त प्रदर्शनप्रति सुरुदेखि नै पार्टीले ऐक्यबद्धता जनाएको उल्लेख गर्दै उहाँले युवाहरूको आवाज लोकतन्त्रको जीवन्त संकेत भएको बताउनुभयो। प्रचण्डले विहीबार पार्टी कार्यालय पेरिसडाँडामा आयाेजना गरिएकाे पत्रकार सम्मेलनमा यस्ताे बताउनु भएकाे हाे । उहाँले त्यस आन्दाेलनमा तत्कालिन सरकारद्वारा अपनाइएको बल प्रयोग र दमनको नीतिप्रति गम्भीर आपत्ति जनाउँदै २३ गतेको कारबाहीमा १९ जना युवाको ज्यान गएको सूचना प्राप्त भएको उल्लेख गर्नुभयो। ती युवाहरूलाई पार्टीले शहीद घोषणा गरिसकेको जानकारी दिँदै उहाँले “युवाहरूको रगतको मूल्य राज्यले चुकाउनैपर्छ” भन्ने दृढ अडान दोहोर्याउनुभयो।  उहाँका अनुसार जनताको मौलिक अधिकारको प्रयोगमाथि गरिएको आक्रमण लोकतान्त्रिक मूल्य–मान्यताविरुद्धको कदम हो। घटनापछि तत्काल सरकारको राजीनामा माग गरिएको र प्रमुख प्रतिपक्षको हैसियतमा अन्य प्रतिपक्षी दलहरूसँग बैठक आह्वान गरी संयुक्त दबाब सिर्जना गर्ने प्रयास गरिएको पनि उहाँले स्पष्ट पार्नुभयो।  भ्रष्टाचार र दमनविरुद्ध साझा मोर्चा निर्माण गरेर अगाडि बढ्नु समयको आवश्यकता भएको उहाँको भनाइ थियो। सत्ताधारी शक्तिमाथि टिप्पणी गर्दै प्रचण्डले “दुई तिहाइको अहंकार र दम्भ” ले राज्य संयन्त्रलाई दुरुपयोग गरी भ्रष्टाचारलाई संरक्षण गरेको आरोप लगाउनुभयो। उहाँले २३ गतेको घटनालाई “अतिवादी प्रवृत्ति” को परिणामका रूपमा चित्रण गर्दै राज्यद्वारा गरिएको हत्या अस्वीकार्य भएको बताउनुभयो।  साथै २४ गते आन्दोलनमा घुसपैठ गरी सरकारी संरचना, प्रहरी कार्यालय तथा नेताका निवासमा गरिएको आगजनीलाई अर्को “विध्वंसकारी अतिवाद” को संज्ञा दिँदै त्यस्ता गतिविधिको पनि स्पष्ट विरोध गर्नुभयो। “हत्या गर्ने र विध्वंस गर्ने दुवै प्रवृत्ति राष्ट्रको स्वाधीनता र जनअधिकारका विरुद्ध छन्,” उहाँले भन्नुभयो, “हामी यी दुवै अतिवादविरुद्ध उभिएका छौँ र शान्तिपूर्ण, जनमुखी राजनीतिक विकल्प निर्माणका लागि प्रतिबद्ध छौँ।” प्रचण्डको भनाइले नेकपा युवाहरूको न्याय, सुशासन र लोकतान्त्रिक अधिकारको पक्षमा स्पष्ट रूपमा उभिएको सन्देश दिएको छ। पार्टीले संयम, एकता र जनदबाबमार्फत राजनीतिक निकास खोज्ने रणनीति अघि सारेको बताउँदै उहाँले आन्दोलनलाई सकारात्मक रूपान्तरणतर्फ लैजान सबै लोकतन्त्रप्रेमी शक्तिलाई सहकार्यका लागि आह्वान गर्नुभयो।

काठमाडौं । नेपाली कम्युनिस्ट पार्टी (नेकपा) संयाेजक तथा पूर्वप्रधानमन्त्री पुष्पकमल दाहाल ‘प्रचण्ड’ले वर्तमान राजनीतिक असहजतालाई लोकतान्त्रिक प्रक्रियाबाट समाधान गर्नुपर्नेमा जोड दिँदै निर्वाचन नै देशलाई निकास दिने एकमात्र वैधानिक र जिम्मेवार विकल्प भएको स्पष्ट पार्नुभएको छ।  बिहीबार पार्टी केन्द्रीय कार्यालय काठमाडौंमा आयोजित पत्रकार सम्मेलनमा सम्बोधन गर्दै उहाँले मुलुक गम्भीर मोडमा उभिएको उल्लेख गर्दै अब अन्योल, द्वन्द्व र अस्थिरताको चक्र तोड्ने माध्यम जनताको अभिमत मात्रै भएको बताउनुभयो। प्रचण्डले आगामी निर्वाचन सामान्य परिस्थितिको नियमित अभ्यास नभई विशिष्ट र जटिल अवस्थाको ऐतिहासिक राजनीतिक परीक्षा भएको उल्लेख गर्नुभयो। “यो निर्वाचन देशको भविष्यको दिशानिर्देश गर्ने निर्णायक मोड हो,” उहाँले भन्नुभयो, “यसलाई सफल बनाउनु सम्पूर्ण समाजको सामूहिक जिम्मेवारी हो।” जेनजी आन्दोलनप्रति समर्थन, दमनप्रति कठोर आपत्ति प्रचण्डले २३ गते जेनजी युवाहरूले गरेको प्रदर्शन भ्रष्टाचार नियन्त्रण, सुशासन स्थापना र सामाजिक सञ्जालमाथिको प्रतिबन्ध हटाउनुपर्ने जस्ता जायज मागमा आधारित रहेको स्पष्ट पार्नुभयो। ती प्रदर्शनहरू प्रशासनको स्वीकृतिमा शान्तिपूर्ण रूपमा सम्पन्न भएको उल्लेख गर्दै उहाँले सुरुदेखि नै पार्टीले युवाहरूको आवाजलाई समर्थन गर्दै आएको बताउनुभयो। तर, सरकारद्वारा अपनाइएको बल प्रयोग र दमनको नीतिप्रति उहाँले तीव्र असन्तुष्टि व्यक्त गर्नुभयो। २३ गतेको सरकारी कारबाहीमा १९ जना युवाको ज्यान गएको स्रोतहरूबाट आएको जानकारी उल्लेख गर्दै उहाँले ती युवाहरूलाई पार्टीले शहीद घोषणा गरेको जानकारी दिनुभयो। “युवाहरूको रगतको मूल्य राज्यले चुकाउनैपर्छ,” उहाँले दृढ स्वरमा भन्नुभयो। घटनापछि तत्कालै सरकारको राजीनामा मागिएको र प्रमुख प्रतिपक्षको हैसियतमा प्रतिपक्षी दलहरूको बैठक बोलाएर संयुक्त दबाब सिर्जना गर्ने प्रयास गरिएको उहाँले बताउनुभयो। ‘दुई तिहाइको दम्भ’ र दुई अतिवादविरुद्ध स्पष्ट अडान प्रचण्डले सत्ताधारी शक्तिमाथि “दुई तिहाइको अहंकार र दम्भ” ले भ्रष्टाचारलाई संरक्षण गरेको र असहमति दमन गरेको आरोप लगाउनुभयो। उहाँले २३ गतेको हत्या काण्डलाई “अतिवादी प्रवृत्ति” को रूपमा चित्रण गर्नुभयो भने २४ गते आन्दोलनमा घुसपैठ गरी सरकारी संरचना, प्रहरी कार्यालय र नेताका निवासमा आगजनी गरिनु अर्को “विध्वंसकारी अतिवाद” भएको टिप्पणी गर्नुभयो। “हत्या गर्ने र विध्वंस गर्ने दुवै प्रवृत्ति राष्ट्रको स्वाधीनता र जनअधिकारका विरुद्ध छन्,” उहाँले भन्नुभयो, “हामी यी दुवै अतिवादविरुद्ध उभिएका छौँ।” परिवर्तनकारी राष्ट्रवादी शक्तिको दाबी संघीय लोकतान्त्रिक गणतन्त्र र समावेशी समानुपातिक लोकतन्त्रको रक्षा तथा विकास पार्टीको आधारभूत प्रतिबद्धता भएको उल्लेख गर्दै उहाँले पार्टीलाई राष्ट्रिय एकता र संवैधानिक उपलब्धिको रक्षाकर्ताका रूपमा प्रस्तुत गर्नुभयो। झन्डै दुई दर्जन वामपन्थी तथा देशभक्त शक्तिहरू एकीकृत भएर निर्माण भएको नेपाली कम्युनिस्ट पार्टी अहिलेको निर्वाचनमा परिवर्तनकारी राष्ट्रवादी शक्तिको रूपमा उभिएको उहाँको दाबी थियो। उहाँका अनुसार यस निर्वाचनमा हत्या गर्ने अतिवाद, विध्वंसकारी अतिवाद र परिवर्तनकारी राष्ट्रवादी शक्ति-यी तीन प्रवृत्तिहरूबीच मुख्य प्रतिस्पर्धा हुनेछ। आत्मसमीक्षा र सुशासनको प्रतिबद्धता प्रचण्डले पार्टीले आफ्ना कमजोरीहरूको निर्मम आत्मसमीक्षा गर्ने प्रतिबद्धता व्यक्त गर्नुभयो। “हामीले विगतका त्रुटिबाट पाठ सिकेर अगाडि बढ्नेछौँ,” उहाँले भन्नुभयो। सुशासन, सामाजिक न्याय र समृद्धि पार्टीको मुख्य लक्ष्य रहेको उल्लेख गर्दै उहाँले कृषि आधुनिकीकरण, उद्योग प्रवर्द्धन, उत्पादन र उत्पादकत्व वृद्धि, पर्यटन विस्तार तथा ऊर्जा विकासमार्फत राष्ट्रिय अर्थतन्त्रलाई गतिशील बनाउने स्पष्ट योजना रहेको बताउनुभयो। भ्रष्टाचारको पूर्ण नियन्त्रण र सामाजिक विभेदको अन्त्यलाई प्राथमिक चुनावी एजेन्डा बनाइएको उहाँले दोहोर्‍याउनुभयो। गठबन्धनबिनै जनताको भरोसामा अन्य दलहरू अन्तरिम सरकार वा संसद पुनःस्थापनाको बहसमा अल्झिएका बेला आफ्नो पार्टीले सुरुदेखि निर्वाचनकै पक्षमा अडान लिएको उल्लेख गर्दै उहाँले जनतासँग प्रत्यक्ष जाने नीति नै सही भएको बताउनुभयो। उहाँले यसपटक कुनै पनि दलसँग समीकरण वा गठबन्धन नगरेको स्पष्ट पार्नुभयो। “हामी आफ्नै एजेन्डा, आफ्नै शक्ति र जनताको बलमा चुनाव लड्छौँ,” उहाँले भन्नुभयो। बागलुङमा एक सिटका लागि जनमोर्चासँग मात्र तालमेल भएको र अन्यत्र कुनै गठबन्धन नभएको जानकारी दिँदै सामाजिक सञ्जालमा फैलाइएका ‘महागठबन्धन’ सम्बन्धी चर्चालाई नियोजित भ्रम र फेक न्यूज भन्दै खारेज गर्नुभयो। संवैधानिक सुधार र प्रणाली परिमार्जनको संकेत प्रचण्डले निर्वाचनपछि संविधान संशोधनमार्फत शासकीय स्वरूप र निर्वाचन प्रणालीमा आवश्यक परिमार्जन गर्ने स्पष्ट संकल्प व्यक्त गर्नुभयो। हालको प्रणालीले स्पष्ट बहुमत दिन कठिन भएको र ‘त्रिशंकु संसद’ बन्न सक्ने सम्भावना रहेको उल्लेख गर्दै स्थिर सरकार र प्रभावकारी शासनका लागि सुधार अपरिहार्य भएको बताउनुभयो। जेनजी युवाहरूले उठाएका पहिचान, अधिकार र सहभागिताका मुद्दाहरूलाई संविधानमै सम्बोधन गर्ने प्रतिबद्धता पनि उहाँले व्यक्त गर्नुभयो। परिणाम जे भए पनि स्वीकार निर्वाचन प्रक्रियामा सहभागी भइसकेपछि त्यसको जस्तोसुकै परिणाम आए पनि स्वीकार गर्ने पार्टीको अडान दोहोर्‍याउँदै उहाँले लोकतन्त्रमा जनताको फैसला अन्तिम हुने बताउनुभयो। निर्वाचन स्वच्छ, निष्पक्ष र भयरहित वातावरणमा सम्पन्न गर्न सुरक्षा निकाय-सेना र प्रहरी-को महत्वपूर्ण जिम्मेवारी रहेको उल्लेख गर्दै कर्मचारीतन्त्र र न्यायालयले पूर्वाग्रहविहीन ढंगले राष्ट्रहितमा काम गर्नुपर्नेमा जोड दिनुभयो। उहाँका अनुसार आगामी निर्वाचनमा मुख्य प्रतिस्पर्धा नेपाली कम्युनिस्ट पार्टी, नेपाली कांग्रेस, नेकपा एमाले र राष्ट्रिय स्वतन्त्र पार्टी बीच केन्द्रित हुने देखिन्छ। संकटलाई अवसरमा बदल्ने सन्देश प्रचण्डको सम्बोधनले वर्तमान संकटलाई लोकतान्त्रिक अभ्यासमार्फत अवसरमा रूपान्तरण गर्ने स्पष्ट राजनीतिक सन्देश दिएको छ। आत्मसमीक्षा, सुधार, संवैधानिक परिमार्जन र आर्थिक रूपान्तरणको प्रतिबद्धतासहित निर्वाचनमा जाने घोषणाले उहाँले आफ्नो पार्टीलाई स्थायित्व, सुशासन र राष्ट्रिय स्वाभिमानको वाहक शक्तिका रूपमा प्रस्तुत गर्नुभएको छ। देश असहज परिस्थितिमा उभिएको यस घडीमा उहाँको सन्देशले राजनीतिक ध्रुवीकरणभन्दा माथि उठेर जनताको मतमार्फत समाधान खोज्नुपर्ने आवश्यकता पुनः स्मरण गराएको छ। लोकतान्त्रिक मार्ग, राष्ट्रिय एकता र समृद्धिको लक्ष्य-यिनै तीन आधारमा अघि बढ्ने प्रतिबद्धतासहित प्रचण्डले राष्ट्रलाई भरोसाको नयाँ संकेत दिनुभएको छ।  

काठमाडौं । नेपाली कम्युनिस्ट पार्टी (नेकपा) का संयाेजक  पुष्पकमल दाहाल प्रचण्डले जेनजी आन्दोलनबारे छानबिन गर्न गठित उच्चस्तरीय जाँचबुझ आयोगको प्रतिवेदन पटक–पटक सारिँदै जानु उचित नभएको बताउनुभएको छ । नेपाली कम्युनिस्ट पार्टीका संयोजकसमेत रहनुभएका प्रचण्डले बिहीबार पार्टी केन्द्रीय कार्यालय पेरिसडाँडामा आयोजित पत्रकार सम्मेलनमा सञ्चारकर्मीले राखेका जिज्ञासाको जवाफ दिँदै आयोगको कार्यप्रक्रियामा भएको ढिलाइले जनविश्वासमा नकारात्मक असर पर्ने बताउनुभयो । उहाँले प्रतिवेदन समयमै सार्वजनिक हुनुपर्ने धारणा राख्दै भन्नुभयो, “आयोगको प्रतिवेदन समयमा नै आउनुपर्थ्यो । एकपटक सारियो भने कामको चाप वा अन्य कारणले हुन सक्छ भन्ने बुझ्न सकिन्छ । दुईपटकसम्म पनि केही जटिलता देखिएको होला भन्न सकिन्छ । तर तीनपटक सारेर अझ चुनावपछि मात्रै ल्याउने भन्ने कुरा सही होइन ।” प्रचण्डले दोषी पहिचान गरी कारबाहीको प्रक्रिया अघि बढाउन ढिलासुस्ती गर्न नहुने बताउनुभयो । “दोषी ठहर गरेर कानुनी कारबाही अघि बढाउनुपर्थ्यो । ढिलासुस्ती गरेर समय सार्दै जानु र चुनावपछि मात्र गर्ने भन्नु उचित होइन,” उहाँले भन्नुभयो । उहाँले छानबिन आयोगहरू निष्पक्ष, प्रभावकारी र समयसीमाभित्र काम गर्नुपर्नेमा जोड दिँदै पारदर्शिता र जवाफदेहिताको मापदण्ड कमजोर हुन नहुने बताउनुभयो । संवेदनशील विषयमा सत्यतथ्य सार्वजनिक गर्न ढिलाइ हुँदा पीडित पक्षमा निराशा बढ्ने र राज्यप्रति अविश्वास पैदा हुने उहाँको भनाइ थियो । प्रचण्डले लोकतान्त्रिक अभ्यासमा छानबिन प्रक्रिया विश्वसनीय र परिणाममुखी हुनुपर्ने उल्लेख गर्दै जनताको चासो र सरोकारलाई केन्द्रमा राखेर काम गर्न सबै निकाय जिम्मेवार हुनुपर्ने बताउनुभयो । उहाँले न्याय र सुशासनको पक्षमा आफ्नो पार्टी दृढतापूर्वक उभिने स्पष्ट सन्देश दिनुभएको छ ।

काठमाडौं । आगामी प्रतिनिधि सभा निर्वाचन–२०८२ का सन्दर्भमा नेपाली कम्युनिस्ट पार्टी (नेकपा) ले राष्ट्रिय राजनीतिक दिशालाई स्पष्ट मार्गदर्शन गर्ने गरी विस्तृत राजनीतिक अपिल सार्वजनिक गरेको छ । पार्टीका संयोजक पुष्पकमल दाहाल ‘प्रचण्ड’ र सहसंयोजक माधव कुमार नेपालद्वारा जारी उक्त अपिलमा मुलुकको स्वाधीनता, लोकतन्त्रको सुदृढीकरण, सुशासन, आर्थिक–सामाजिक रूपान्तरण तथा वैज्ञानिक समाजवादको आधार निर्माणलाई प्रमुख एजेन्डाका रूपमा अघि सारिएको बताइएकाे छ। अपिलमा नेपाल इतिहासदेखि नै कुनै पनि विदेशी शक्तिको अधीनमा नरहेको र भविष्यमा पनि स्वाधीन राष्ट्रका रूपमा अघि बढ्ने स्पष्ट धारणा व्यक्त गरिएको छ । बाह्य हस्तक्षेपका गतिविधिहरूप्रति सचेत रहँदै राष्ट्रिय हितलाई सर्वोपरि राखेर परराष्ट्र नीति सञ्चालन गर्ने प्रतिबद्धता दोहोर्याइएको छ । पञ्चशीलको सिद्धान्त, संयुक्त राष्ट्रसंघको बडापत्र तथा पारस्परिक सम्मान र लाभका आधारमा सबै मित्र राष्ट्रसँग सम्बन्ध सुदृढ गर्ने नीति पार्टीले अघि सारेको छ । साथै नेपालसँग भएका असमान सन्धि–सम्झौताहरूको पुनरावलोकन तथा राष्ट्रिय हितविपरीत रहेका प्रावधानहरू खारेज गरी अतिक्रमित भूमि फिर्ता गर्ने दिशामा कूटनीतिक र कानुनी पहल गर्ने प्रतिबद्धता अपिलमा उल्लेख छ । राष्ट्रिय एकता, सुरक्षा र सार्वभौमसत्ताको संरक्षणलाई पार्टीले मूल प्राथमिकतामा राखेको छ । लोकतान्त्रिक प्रणालीको सुदृढीकरण र प्रणालीगत सुधार अपिलमा उल्लेख गरिएको छ कि संघीयता, समानुपातिक–समावेशी प्रतिनिधित्व र बहुदलीय प्रतिस्पर्धात्मक लोकतन्त्र नेपाली जनताले लामो सङ्घर्षपछि प्राप्त गरेको उपलब्धि हो । यस प्रणालीविरुद्ध हुने कुनै पनि षड्यन्त्रलाई परास्त गर्दै यसलाई थप सुदृढ र स्थिर बनाउने नेकपाको अडान रहेको छ । निर्वाचन प्रणाली अत्यधिक खर्चिलो, जटिल र अस्थिर सरकार निर्माणतर्फ उन्मुख रहेको भन्दै पार्टीले यसलाई सरल, पारदर्शी र कम खर्चिलो बनाउने आवश्यकतामा जोड दिएको छ । स्थिर सरकार, प्रभावकारी नीति कार्यान्वयन र विकास निर्माणलाई गति दिन प्रणालीगत सुधार आवश्यक रहेको अपिलमा उल्लेख छ । संविधान जननिर्वाचित संविधानसभाबाट निर्माण गरिएको ऐतिहासिक दस्तावेज भएकाले यसलाई संरक्षण गर्दै आवश्यक परिमार्जन संविधानकै प्रक्रियाअनुसार गर्न सकिने धारणा पार्टीले राखेको छ । संविधानको पुनरावलोकन, शासकीय स्वरूपलगायतका विषयमा गम्भीर समीक्षा गरी समयानुकूल सुधार अघि बढाउने प्रतिबद्धता व्यक्त गरिएको छ । सुशासन, पारदर्शिता र भ्रष्टाचारविरुद्ध कठोर अभियान नेकपाले सुशासन र पारदर्शितालाई आधुनिक लोकतन्त्रको आधारस्तम्भका रूपमा व्याख्या गर्दै भ्रष्टाचारविरुद्ध शून्य सहनशीलताको नीति लिने घोषणा गरेको छ । सार्वजनिक पद धारण गरेका सबै व्यक्तिको सम्पत्ति छानबिन गर्न उच्चस्तरीय आयोग गठन गर्ने तथा अवैध रूपमा आर्जित सम्पत्ति राष्ट्रियकरण गर्ने व्यवस्था गर्नुपर्ने आवश्यकता अपिलमा उल्लेख छ । कमिसनतन्त्र, ढिलासुस्ती, कालोबजारी, मिटरब्याज शोषण र वित्तीय क्षेत्रका विकृतिविरुद्ध कडा कानुनी तथा संरचनागत सुधार गरिने प्रतिबद्धता पनि व्यक्त गरिएको छ । राज्यका सबै अङ्गहरू शक्ति पृथकीकरणको सिद्धान्तअनुसार स्वायत्त र प्रभावकारी रूपमा सञ्चालन हुनुपर्नेमा पार्टीले जोड दिएको छ । सङ्घीयताको मर्मअनुरूप स्थानीय तहसम्म प्रभावकारी सेवा प्रवाह सुनिश्चित गर्ने, जनताको घरदैलोमै प्रशासनिक सेवा पुर्‍याउने र विकास योजनामा जनसहभागिता अभिवृद्धि गर्ने लक्ष्य अपिलमा समेटिएको छ । सामाजिक न्याय, समानता र विभेदविरुद्ध अभियान समाजमा विद्यमान वर्गीय, जातीय, लैङ्गिक, भाषिक, धार्मिक तथा भौगोलिक विभेद अन्त्य गर्न नेकपाले विशेष अभियान सञ्चालन गर्ने जनाएको छ । जातीय छुवाछुत, छाउपडी, बोक्सी प्रथा र अन्य कुरीतिविरुद्ध कानुनी मात्र होइन सामाजिक जागरणमार्फत पनि परिवर्तन ल्याउने अठोट व्यक्त गरिएको छ । समान अवसर, सामाजिक सुरक्षा, महिला सशक्तीकरण र उत्पीडित समुदायको अधिकार संरक्षणलाई प्राथमिकतामा राख्दै समतामूलक समाज निर्माण गर्ने प्रतिबद्धता अपिलमा समेटिएको छ । आर्थिक रूपान्तरण र स्वाधीन अर्थतन्त्र निर्माण अपिलमा नेपालको प्रमुख आर्थिक समस्या उत्पादनको कमी, बेरोजगारी, व्यापार घाटा, वैदेशिक ऋण वृद्धि र परनिर्भर अर्थतन्त्र रहेको उल्लेख छ । यी समस्याको समाधानका लागि कृषि उत्पादन वृद्धि, स्वदेशी कच्चा पदार्थमा आधारित उद्योग विकास, ऊर्जा उत्पादन विस्तार, पर्यटन प्रवर्द्धन र निर्यातमुखी रणनीति अवलम्बन गर्ने पार्टीको योजना छ । प्रगतिशील कर प्रणालीमार्फत राज्यकोष सुदृढ गर्ने, वित्तीय क्षेत्रमा संरचनात्मक सुधार गर्ने तथा लक्षित वर्ग केन्द्रित कार्यक्रम सञ्चालन गरी गरिबी न्यूनीकरण गर्ने प्रतिबद्धता पनि व्यक्त गरिएको छ । युवा रोजगारी सिर्जना, सीप विकास तथा स्वदेशमै उत्पादन र स्वरोजगारलाई प्रोत्साहन गर्ने कार्यक्रम अघि बढाइने उल्लेख छ । वैज्ञानिक समाजवादको दीर्घकालीन लक्ष्य नेकपाले आफ्नो अन्तिम लक्ष्य नेपाली विशेषताको वैज्ञानिक समाजवाद रहेको स्पष्ट पारेको छ । उत्पादनका साधनमाथि सामूहिक स्वामित्व, सबै नागरिकका लागि शिक्षा, स्वास्थ्य, रोजगारी तथा आधारभूत आवश्यकता सुनिश्चित हुने प्रणाली निर्माण गर्ने उद्देश्य राखिएको छ । आर्थिक–सामाजिक रूपान्तरणका व्यापक महाअभियान सञ्चालन गर्दै समाजवादको आधार निर्माण गर्न पार्टी प्रतिबद्ध रहेको अपिलमा उल्लेख छ । विगतका कमी–कमजोरीप्रति आत्मालोचना गर्दै सुधारसहित अगाडि बढ्ने तथा “व्यवस्था हामीले बदल्यौँ, अब अवस्था पनि बदल्ने छौँ” भन्ने मूल नारालाई व्यवहारमा उतार्ने संकल्प गरिएको छ । मतदातासँग विशेष आह्वान अपिलको अन्त्यमा संयोजक पुष्पकमल दाहाल ‘प्रचण्ड’ र सहसंयोजक माधव कुमार नेपालले आगामी निर्वाचनमा तारा चुनाव चिन्हमा मतदान गरी परिवर्तन र रूपान्तरणको अभियानलाई सशक्त बनाउन आम मतदातासँग हार्दिक अपिल गरेका छन् । अपिलकाे पुरा पाठ प्रतिनिधि सदस्य निवार्चन–२०८२ नेपाली कम्युनिष्ट पार्टीको अपिल आदरणीय दिदीबहिनी तथा दाजुभाइहरू,  यही २०८२ फागुन २१ मा प्रतिनिधि सदस्यको निर्वाचन हुन गइरहेको छ। यस अवसरमा हामी सर्वप्रथम यहाँहरू सबैमा हार्दिक अभिवादन गर्दछौँ। आज हामीले उपयोग गरिरहेका हकअधिकारहरू प्राप्त गर्नका निम्ति सङ्घर्ष गर्ने क्रममा आफ्नो जीवनको आहुति दिनुहुने ज्ञात–अज्ञात सम्पूर्ण आदरणीय शहीदहरूमा भावपूर्ण श्रद्धाञ्जली अर्पण गर्दछौँ। घाइते, अपाङ्ग र बेपत्ता योद्धाहरूप्रति हार्दिक सम्मान व्यक्त गर्दछौँ। मुलुकको लोकतान्त्रिक आन्दोलन एवं कम्युनिष्ट आन्दोलनका सबै अग्रज नेताहरूप्रति उच्च सम्मान व्यक्त गर्दछौँ। हामी पहिले विभिन्न कम्युनिष्ट तथा समाजवादी पार्टीको रूपमा क्रियाशील थियौँ। अहिले बाइस वटा कम्युनिष्ट तथा समाजवादी पार्टी र समूह मिलेर नेपाली कम्युनिष्ट पार्टी बनाएका छौँ र तारा चिन्ह लिएर तपाईँहरूमाझ आएका छौँ। यहाँहरूसमक्ष हामी निम्न प्रतिबद्धताहरू जाहेर गर्दछौँ : ★ अहिले मुलुकमा जुन खालका बाह्य हस्तक्षेपकारी गतिविधि भएका छन्, त्यसबाट इतिहासमा कहिल्यै कुनै विदेशी शक्तिको अधीनमा नरहेको हाम्रो राष्ट्रको स्वाधीनता र स्वाभिमानमा आँच आउन सक्ने खतरा महसुस भएको छ। नेपाल कम्युनिष्ट पार्टी आफ्नो स्थापना कालदेखि नै नेपाल राष्ट्रको स्वतन्त्रता, भौगोलिक अखण्डता, सार्वभौमसत्ता सम्पन्नता र स्वाभिमानको पक्षमा दृढतापूर्वक उभिँदै आएको छ। आज पनि हामी हाम्रो राष्ट्रिय स्वाधीनता र स्वाभिमानको रक्षाका निम्ति त्यही दृढताका साथ उभिने प्रतिबद्धता जाहेर गर्दछौँ। ★ अहिले मुलुकमा संघीयता र समानुपातिक एवं समावेशी सहभागिताजस्ता मौलिक विशेषतासहितको बहुदलीय प्रतिस्पर्धात्मक लोकतान्त्रिक प्रणाली कायम छ। यो प्रणाली नेपाली जनताले लामो बलिदानी सङ्घर्ष गरेर स्थापना गरेको प्रणाली हो। अहिले यसका विरुद्ध अनेक प्रकारका षड्यन्त्र भइरहेका छन्। हामी यस प्रणालीविरुद्धका सबै षड्यन्त्रहरूलाई परास्त गर्दै यसलाई सुदृढ र सुस्थिर बनाउँदै समाजवादी लोकतन्त्रको रूपमा विकास गर्न चाहन्छौँ। ★ लोकतन्त्रको सुदृढीकरण र विकासको सवाल स्थापित प्रणालीको स्थिरताको सवाल पनि हो। मुलुकको विकासका निम्ति लोकतान्त्रिक प्रणालीको स्थिरता जरुरी छ। अहिले हाम्रो स्थापित प्रणालीका विरुद्ध गतिविधि गर्दै मुलुकमा अस्थिरता सिर्जना गर्ने दुष्प्रयास भइरहेको छ। हामी त्यस प्रकारको दुष्प्रयासलाई परास्त गर्दै मुलुकमा स्थिरता कायम गरी लोकतन्त्रको सुदृढीकरण र विकासको यात्रामा अगाडि बढ्न दृढप्रतिज्ञ छौँ। ★ हाम्रो संविधान जननिर्वाचित संविधान सभाबाट निर्माण गरिएको संसारका उत्कृष्ट संविधानमध्ये एक हो। यसमा नेपाली जनताले लामो समयसम्म अनेक प्रकारका बलिदानपूर्ण सङ्घर्ष सञ्चालन गरेर प्राप्त गरेका अधिकारहरू दस्तावेजीकरण गरिएको छ। त्यसैले यो जनताले सङ्घर्ष गरेर प्राप्त गरेका अधिकारहरूको दस्तावेज हो। यसलाई खारेज गर्ने अधिकार कसैलाई पनि छैन। तथापि यो अपरिवर्तनीय दस्तावेज भने होइन। यसको कार्यान्वयन गर्दा देखापरेका समस्या समाधान गर्नका निम्ति यसमा आवश्यक परिमार्जन गर्न सकिन्छ, गर्नुपर्दछ। तर त्यसको प्रक्रिया स्वयं संविधानले निर्देश गरेबमोजिम हुनुपर्दछ भन्ने हाम्रो दृढ मान्यता छ। संविधान कार्यान्वयनको गम्भीर समीक्षा एवं पुनरावलोकन गरेर त्यसबाट निस्किएका निष्कर्षका आधारमा शासकीय स्वरूपलगायत विभिन्न पक्षमा परिमार्जन गर्नुपर्दछ भन्ने हाम्रो दृढ अठोट रहेको छ। ★ अहिलेको निर्वाचन प्रणाली अत्यन्त खर्चिलो, भड्किलो, जटिल र कुनै एक दलले बहुमत ल्याउन नसक्ने खालको छ। कुनै पनि दलको एकल बहुमत नआएपछि गठबन्धनको सरकार बन्ने र त्यो अस्थिर भई विकास निर्माणका काम गर्न नसक्ने अवस्था देखिएको छ। हामी यस निर्वाचन प्रणालीलाई परिवर्तन गरेर सरल र कम खर्चिलो बनाउन चाहन्छौँ। त्यसमा हामी प्रतिबद्ध छौँ। ★ सुशासन र पारदर्शिता आधुनिक लोकतन्त्रका अपरिहार्य पक्ष हुन्। अहिले जनताले सुशासन र पारदर्शिता अनुभूत गरेका छैनन्। भ्रष्टाचार, कमिसनतन्त्र, अपारदर्शिता र ढिलासुस्ती क्यान्सरजस्तै फैलिरहेको छ। सङ्घीयताको मर्मअनुरूप जनताको घरदैलोमै प्रभावकारी सेवा प्रदान भएको छैन। हामी यस स्थितिमा परिवर्तन गर्नैपर्ने पक्षमा छौँ। भ्रष्टाचारमा शून्य सहनशीलतासहितको सुशासन, पूर्ण पारदर्शिता, शक्ति पृथकीकरणको सिद्धान्तअनुरूप राज्यका सबै अङ्गहरूको सञ्चालन र सङ्घीयताको मर्मअनुरूप जनताको घरदैलोमै प्रभावकारी सेवा प्रदान गर्ने हाम्रो दृढप्रतिज्ञा छ । ★ एक उच्चस्तरीय सम्पत्ति छानबिन आयोग गठन गरेर आजसम्म सार्वजनिक पद धारण गरेका सबै व्यक्तिको सम्पत्ति छानबिन गरी भ्रष्टाचारीमाथि कडाभन्दा कडा कारबाही गर्नुपर्दछ र भ्रष्टाचार गरी कमाएको सम्पत्ति राष्ट्रियकरण गर्नुपर्दछ भन्नेमा हामी प्रतिबद्ध छौँ। ★ हाम्रो समाजमा अहिले पनि वर्गीय, जातीय, लैङ्गिक, भाषिक, धार्मिक, सांस्कृतिक र भौगोलिक विभेद, असमानता र उत्पीडन कायम छ। जातीय छुवाछुतजस्तो मानव मर्यादाको कलङ्कसमेत समाजमा अझै विद्यमान छ। छाउपडी र डाइनी–बोक्सीजस्ता कुरीति र अन्धविश्वास पनि विद्यमान छन्। यी सब सामन्ती व्यवस्थाका अवशेष हुन्। हामी सबै प्रकारको विभेदकारी व्यवहार, असमानता, उत्पीडन, कुरीति र अन्धविश्वासको अन्त्य गर्न चाहन्छौँ। त्यसका लागि प्रभावकारी कदम चाल्न प्रतिबद्ध छौँ। ★ उत्पादनको कमी र बेरोजगारी ठूलो समस्याका रूपमा रहेका छन्। यो समस्याको समाधान गर्न कृषि उत्पादनमा वृद्धि, स्वदेशी कच्चा पदार्थमा आधारित उद्योगधन्दाको विकास, औद्योगिक उत्पादनमा वृद्धि, ऊर्जा उत्पादनमा वृद्धि, व्यापार प्रवर्द्धन तथा पर्यटन उद्योगको विकास र पर्यटन आगमनमा वृद्धि गर्न विशेष योजना बनाएर काम गर्नुपर्ने पक्षमा छौँ। त्यसो गरेर नागरिकका लागि रोजगारीका अवसर सिर्जना गर्न सकिनेछ, राष्ट्रिय आय वृद्धि गर्न सकिनेछ, खाद्यान्नमा आत्मनिर्भर हुन सकिनेछ र व्यापार घाटा कम गर्न सकिनेछ। ★ आयातआधारित राजस्व, निरन्तर बढ्दो व्यापार घाटा, चर्को बेरोजगारी, जनशक्तिको विदेश पलायन, वैदेशिक ऋणको निरन्तर वृद्धि, पुँजीगत खर्च कम हुने समस्या, महँगीको अचाक्ली वृद्धि, कालोबजारी, उत्पादनका साधनहरूमा दलाल पूँजीपतिहरूको नियन्त्रण, मिटरब्याजीको शोषण, वित्तीय क्षेत्रमा मौलाएका विकृति, अभाव र गरिबी नेपाली अर्थतन्त्रका आधारभूत समस्या हुन्। हामीले जबसम्म हाम्रो आफ्नै स्वाधीन अर्थतन्त्र निर्माण गर्न सक्दैनौँ, तबसम्म अर्थतन्त्रका उपर्युक्त समस्याबाट मुक्त हुन सकिँदैन र हाम्रो परनिर्भरता कायम रहन्छ। कृषि, औद्योगिक, पर्यटन, ऊर्जालगायत क्षेत्रमा उत्पादन वृद्धि गरेर परनिर्भरता कम गर्दै जानु र स्वाधीन अर्थतन्त्रको जग बसाल्नु आजको हाम्रो मुख्य आर्थिक कार्यभार हो। यो कार्यभार वहन गर्नका निम्ति हामी दृढतापूर्वक अगाडि बढ्न प्रतिबद्ध छौँ। राज्यकोष बलियो बनाउन प्रगतिशील कर लगाइनेछ। वित्तीय क्षेत्रमा नीतिगत र संरचनागत सुधार गरिनेछ। गरिबीको अन्त्य गर्न लक्षित वर्ग र समुदायकेन्द्रित कार्यक्रम सञ्चालन गरिनेछ। ★ प्राकृतिक सम्पदा र वातावरणको संरक्षण गर्दै दिगो विकासका लागि प्राकृतिक स्रोतको सदुपयोग गरिनेछ। विकासका योजना निर्माण गर्दा विपद्जन्य जोखिम र त्यसको व्यवस्थापनमा ध्यान दिने नीति अवलम्बन गरिनेछ। ★ हाम्रो लक्ष्य नेपाली विशेषताको वैज्ञानिक समाजवाद हो। वैज्ञानिक समाजवाद भनेको सबै जनताका निम्ति खाना, छाना र नाना तथा शिक्षा, स्वास्थ्य र रोजगारी उपलब्ध गराइएको, उत्पादनका साधनमाथि सामूहिक स्वामित्व भएको र सामाजिक न्याय एवं समानतासहितको समाज व्यवस्था हो। वर्तमान नेपाली समाजमा आर्थिक–सामाजिक रूपान्तरणका व्यापक अभियान सञ्चालन नगरी त्यो अवस्था निर्माण गर्न सकिँदैन। त्यसैले हामी वर्तमान नेपाली समाजमा व्यापक रूपमा आर्थिक–सामाजिक रूपान्तरणका अभियान सञ्चालन गरेर समाजवादको आधार निर्माण गर्नुपर्दछ भन्ने पक्षमा छौँ। ★ देशमा भएको राजनीतिक परिवर्तनअनुरूप आर्थिक–सामाजिक रूपान्तरण हुन नसकेको हुँदा व्यवस्था बदलिए पनि जनताको अवस्था बदलिएन भन्ने भाष्य निर्माण हुन गयो। मुलुकमा विकास हुँदै नभएको त होइन, तर जति भयो त्यो पर्याप्त भएन। त्यसैले यो भाष्य बन्न गयो। यसलाई बदल्नुपर्छ। यसलाई बदल्न आर्थिक–सामाजिक रूपान्तरणका महाअभियान सञ्चालन गर्नु जरुरी छ। त्यो हामी गर्नेछौँ। मुलुकको आर्थिक–सामाजिक रूपान्तरण गरेर समाजवादको आधार निर्माण गर्नेछौँ। ★ हामी हाम्रो राष्ट्रिय हितलाई सर्वोपरि राखेर परराष्ट्र सम्बन्ध सञ्चालन गर्नेछौँ। हामी राष्ट्रहरूबीच समानता, अहस्तक्षेप, पारस्परिक लाभ र सम्मानलगायत पञ्चशीलका सिद्धान्त, संयुक्त राष्ट्र सङ्घको बडापत्र र अन्तर्राष्ट्रिय कानुनी मान्यताका आधारमा हाम्रा छिमेकीलगायत सबै मुलुकसँग सुमधुर सम्बन्ध राख्न चाहन्छौँ र अरूले पनि हामीसँग तदनुरूपकै सम्बन्ध राखून् भन्ने चाहन्छौँ। हाम्रो परराष्ट्र नीति यही मान्यतामा आधारित हुनेछ। हामी यही नीतिअनुसार नेपालसँग भएका असमान सन्धि–सम्झौताहरू खारेज गर्न र नेपालको अतिक्रमित भूमि फिर्ता गर्न चाहन्छौँ। हामी राष्ट्रिय एकता र सुरक्षाको प्रवर्द्धन गर्दै मानवता र विश्व शान्तिको पक्षमा उभिनेछौँ। ★ हामीले विगतमा अनेक प्रकारका क्रान्तिकारी सङ्घर्ष सञ्चालन गरी मुलुकमा ठूलाठूला राजनीतिक परिवर्तन गरेका थियौँ। त्यसैले भन्न सक्छौँ कि व्यवस्था बदलेको हामीले हो, अब अवस्था पनि हामीले नै बदल्नेछौँ। अरूले गफ गर्ने हुन्, हामी काम गर्छौँ। जसरी व्यवस्था बदल्यौँ, त्यसैगरी अवस्था पनि बदल्नेछौँ। यो हाम्रो दृढ प्रतिज्ञा हो। यसमा हामी लागिपर्नेछौँ। विगतमा हाम्रा पनि कतिपय कमी–कमजोरी भएका होलान्। त्यसमा हामी आत्मालोचित छौँ र कमी–कमजोरीलाई सच्याएर अघि बढ्न प्रतिबद्ध छौँ। यहाँहरूसँग हाम्रो हार्दिक अपिल छ कि यस पटक तारा चुनाव चिन्हमा मतदान गरी हामीलाई व्यवस्था बदलेझैँ देशको अवस्था पनि बदल्ने अवसर प्रदान गर्नुहोस्। धन्यवाद। ............................ पुष्पकमल दाहाल ‘प्रचण्ड’ संयोजक  ............................ माधव कुमार नेपाल  सहसंयोजक

काठमाडाैं । आगामी फागुन २१ गते हुने प्रतिनिधिसभा निर्वाचन नजिकिँदै जाँदा नेपाली कम्युनिस्ट पार्टी (नेकपा) को पक्षमा देशभर जनलहर बढ्दो क्रममा देखिएको छ। गाउँदेखि सहरसम्म आयोजित सभा, भेटघाट र घरदैलो कार्यक्रममा उल्लेख्य जनसहभागिता देखिन थालेपछि नेकपा समर्थकहरू उत्साहित बनेका छन्। पार्टीका केन्द्रीय तथा स्थानीय नेताहरूले विकास, सुशासन, सामाजिक न्याय र राष्ट्रिय स्वाभिमानका मुद्दालाई प्राथमिकतामा राख्दै मतदातामाझ पुगिरहेका छन्। रोजगारी सिर्जना, कृषि उत्पादनमा आत्मनिर्भरता, शिक्षा–स्वास्थ्यको सुदृढीकरण तथा भ्रष्टाचार नियन्त्रणजस्ता एजेन्डाले आम नागरिकको ध्यान आकर्षित गरेको नेताहरूको भनाइ छ। विभिन्न जिल्लाबाट प्राप्त विवरणअनुसार युवा, महिला तथा मजदुर समुदायको सक्रिय सहभागिताले चुनावी माहोल थप उत्साहजनक बनेको छ। विशेषगरी पहिलो पटक मतदान गर्न लागेका युवाहरू परिवर्तन, पारदर्शिता र स्थायित्वको अपेक्षासहित नेकपाको पक्षमा खुलेर लागिरहेका दृश्यहरू देखिन थालेका छन्। राजनीतिक विश्लेषकहरूका अनुसार निर्वाचन मिति नजिकिँदै जाँदा नेकपाले प्रस्तुत गरेको स्पष्ट कार्यक्रम र संगठनात्मक सुदृढताले जनविश्वास बढाएको संकेत मिलिरहेको छ। जनताको दैनिकीसँग प्रत्यक्ष जोडिएका मुद्दामा केन्द्रित अभियानले ग्रामीण भेगसम्म सकारात्मक प्रभाव पारेको बताइन्छ। फागुन २१ को निर्वाचनलाई परिवर्तन, स्थायित्व र समृद्धिको मार्गचित्रसँग जोड्दै नेकपाका उम्मेदवारहरू जनताको घरदैलोमा निरन्तर संवाद गरिरहेका छन्। देशभर देखिएको यो उत्साह र समर्थनलाई नेकपाले जनमतको बलियो आधारका रूपमा लिएको छ।

कञ्चनपुर। कञ्चनपुर क्षेत्र नम्बर–१ मा चुनावी माहोल झनै नेकपा पक्षमा उभिएको छ। प्रगतिशील लोकतान्त्रिक पार्टी (प्रलोपा) का उम्मेदवार देपेन्द्रबहादुर शाहीले पार्टी परित्याग गरी नेपाली कम्युनिस्ट पार्टी (नेकपा)मा प्रवेश गरेका छन्। उनले नेकपाकी उम्मेदवार बिना मगरलाई समर्थन गर्ने औपचारिक घोषणा गरेका छन्। शाहीसँगै प्रलोपाका कञ्चनपुर जिल्ला प्रमुख तथा केन्द्रीय सदस्य अमरसिंह विष्टसहित ५४ जना नेता–कार्यकर्ता नेकपामा समाहित भएका छन्। शाही र विष्ट दुवै प्रलोपाका केन्द्रीय सदस्य रहँदै आएका प्रभावशाली नेताका रूपमा चिनिन्थे। उनीहरूको प्रवेशसँगै कञ्चनपुर–१ मा नेकपाको जनाधार अझ सुदृढ भएको राजनीतिक विश्लेषकहरूको भनाइ छ। गत १० फागुन बेलौरीमा पत्रकार सम्मेलन गरी चुनावी घोषणापत्र सार्वजनिक गरेका शाहीले छोटो समयमै जनभावना र देशको अग्रगामी राजनीतिक दिशालाई आत्मसात गर्दै नेकपाको नेतृत्वमा अघि बढ्ने निर्णय लिएको बताएका छन्। नेकपा नेताहरूले शाहीसहितका नेता–कार्यकर्तालाई पार्टीमा स्वागत गर्दै यो प्रवेशले कञ्चनपुरमा परिवर्तन, स्थिरता र समृद्धिको अभियानलाई थप गति दिने बताएका छन्। कञ्चनपुर–१ मा पछिल्लो समय नेकपाप्रति बढ्दो समर्थनले चुनावी समीकरण स्पष्ट बन्दै गएको छ। शाहीसहितको सामूहिक प्रवेशलाई नेकपाले ‘जनताको विश्वास र अग्रगामी शक्तिको एकीकरण’ का रूपमा लिएको छ।

 इलाम । यही फागुन २१ गते हुने प्रतिनिधिसभा सदस्य निर्वाचन लागि इलाम निर्वाचन क्षेत्र नं. २ का उम्मेदवार ओमबहादुर गुरुङ ‘सौरव’ ले समृद्ध इलाम निर्माणका लागि तारा चिन्हमा मतदान गर्न इलामवासीसँग अपिल गरेका छन् । नेपाली कम्युनिष्ट पार्टीका तर्फबाट उम्मेदवारी दिएका गुरुङले सुशासन, समृद्धि, जनअधिकार र समाजवादतर्फको साझा यात्रालाई केन्द्रमा राख्दै विस्तृत राजनीतिक प्रतिबद्धता पत्र सार्वजनिक गरेका छन् । प्रतिबद्धता पत्रमा गुरुङले कृषि क्षेत्रमा बीउ-बिजनमा अनुदान, कृषिजन्य वस्तुको व्यवस्थित बजारीकरण, सुकुम्बासी तथा भूमिहीन किसानको पहिचान र जमिन व्यवस्थापनमा पहल गर्ने प्रतिबद्धता जनाएका छन् । पाँच लाख रुपैयाँसम्म पूँजी भएका कृषिसम्बन्धी उद्योग निःशुल्क दर्ताको प्रक्रिया अघि बढाइने, दुग्ध किसानलाई उचित मूल्य सुनिश्चित गर्दै मिल्क होलिडे अन्त्यका लागि धुलो दूध उद्योग स्थापना गरिने उनले उल्लेख गरेका छन् । चिया किसानको हरियो पत्तीको मूल्य स्थायित्वका लागि उद्योगीसँग समन्वय गरिने पनि प्रतिबद्धता जनाएका छन् । स्वास्थ्य क्षेत्रमा आपतकालीन स्वास्थ्य कोष स्थापना, स्वास्थ्य बीमा कार्यक्रम प्रभावकारी बनाउने, प्रत्येक स्थानीय तहमा विशेषज्ञ सेवा सहितको सुविधा सम्पन्न स्वास्थ्य केन्द्र निर्माणमा पहल गरिने प्रतिबद्धता जनाइएको छ। इलाम जिल्ला अस्पताललाई शिक्षण अस्पतालको रूपमा विकास गरी जिल्लालाई मेडिकल हब बनाउने योजना पनि प्रतिबद्धतापत्रमा समेटिएको छ । पर्यटन प्रवर्द्धनतर्फ सदरमुकाम आसपासका चिया बगान, पानिटार, जितपुरको ध्याउ पोखरी, सिद्धिथुम्का, गुफाथुम्की, पाटेनागी, खान्दुङ गुफालगायत क्षेत्रको सौन्दर्यकरण गरिने बताइएको छ । त्यस्तै माइपोखरी, गजुरमुखी, लारुम्बा, माइस्थान र नारायणस्थानलगायत धार्मिक क्षेत्रलाई धार्मिक पर्यटनको केन्द्रका रूपमा विकास गरिने प्रतिबद्धता छ । युवालाई लक्षित गरी सीटीईभीटीसँग समन्वयमा सीपमूलक तालिम, स्वरोजगार कार्यक्रम, दुर्व्यसन नियन्त्रण अभियान र रोजगारमूलक शिक्षा अनिवार्य बनाउने योजना अघि सारिएको छ । साथै सार्वजनिक पदाधिकारीको सम्पत्ति छानबिन, गरिबी दर पाँच प्रतिशतमा झार्ने, वार्षिक १० हजार रोजगारी सिर्जना, दलित तथा अल्पसंख्यक युवालाई सहुलियत ऋण, सबै किसानलाई परिचयपत्र वितरण, स्वास्थ्य बीमा सर्वसुलभ बनाउनेजस्ता महत्वाकांक्षी लक्ष्यसमेत राखिएको छ। प्रतिनिधिसभा सदस्य निर्वाचनमा तारा चिन्हबाट उम्मेदवारी दिएको उल्लेख गर्दै गुरुङले अत्यधिक बहुमतले विजय गराई समृद्ध इलाम-२ निर्माणको अभियानमा सहभागी हुन सबै मतदातासँग अपिल गरेका छन् । उनले प्रतिबद्धतापत्रलाई चुनावी दस्तावेज मात्र नभई साझा संकल्प र कार्यदिशाका रूपमा अघि बढाउने प्रतिबद्धता व्यक्त गरेका छन् । प्रतिवद्धतापत्र :

 इलाम । यही फागुन २१ गते हुने प्रतिनिधि सभा सदस्य निर्वाचनका लागि नेपाली कम्युनिष्ट पार्टीका तर्फबाट इलाम क्षेत्र नं. १ का उम्मेदवार रणबहादुर राईले ‘समृद्ध इलाम’ निर्माणका लागि आफ्नो विस्तृत संकल्पपत्र सार्वजनिक गरेका छन् । दुई कार्यकाल सूर्योदय नगरपालिकाको नगर प्रमुखको अनुभवलाई राजनीतिक पूँजीका रूपमा प्रस्तुत गर्दै उनले अब त्यो अनुभव सिङ्गो निर्वाचन क्षेत्रको समृद्धिमा लगाउने प्रतिबद्धता जनाएका छन् । राईले भ्रष्टाचारमुक्त, पारदर्शी र जनउत्तरदायी प्रशासनका लागि डिजिटल सुशासन लागू गर्ने तथा जेनजी पुस्ताको भावनाअनुरूप जवाफदेहिता सुनिश्चित गर्ने प्रतिबद्धता जनाएका छन् । ‘मेरो उम्मेदवारी पदका लागि होइन, समृद्ध इलामको स्पष्ट मार्गचित्र कार्यान्वयनका लागि हो,’ उनले संकल्पपत्रमा भनेका छन्, ‘निर्वाचित भएपछि प्रत्येक ६ महिनामा प्रगति प्रतिवेदन सार्वजनिक गर्नेछु ।’ कृषि र औद्योगिक विकासमा जोड राईले अलैंची, चिया, अदुवा, सुपारी, कफी र किबीजस्ता नगदेबालीको व्यवसायीकरण, ब्रान्डिङ र अन्तर्राष्ट्रिय बजार विस्तारका लागि पहल गर्ने योजना अघि सारेका छन् । निजी, सहकारी र सार्वजनिक साझेदारी मोडेलमार्फत उद्योगमा लगानी भित्र्याउने, किबी र गाई जोनलाई ‘सुपरजोन’ बनाउने तथा आलु विकास केन्द्रमार्फत टीपीएस प्रविधि भित्र्याउने प्रतिबद्धता जनाएका छन् । कृषि तथा पशु बीमालाई घरदैलोमा पुर्‍याउने, सुपारी खेतीलाई औपचारिक कृषि उपजमा सूचीकृत गर्ने र खोरेतमुक्त क्षेत्र घोषणा गरी पशुपालन आधुनिकीकरण गर्ने लक्ष्यसमेत राखिएको छ। पर्यटन र पूर्वाधार अन्तर-पालिका पर्यटन गुरुयोजना निर्माण गरी धार्मिक, सांस्कृतिक, कृषि तथा साहसिक पर्यटन सर्किट विकास गरिने उल्लेख गरिएको छ । मदन भण्डारी राजमार्गलाई आर्थिक मेरुदण्डका रूपमा विकास गर्दै क्षेत्रका विभिन्न केन्द्र जोड्ने, सडक सञ्जाल वर्गीकरण गरी अन्तरपालिका तथा अन्तरजिल्ला सम्पर्क सुदृढ गर्ने योजना सार्वजनिक गरिएको छ । शिक्षा र डिजिटल नवप्रवर्तन इलामलाई कोशी प्रदेशकै ‘एजुकेसन हब’ बनाउने लक्ष्यसहित विद्यालय र क्याम्पसमा डिजिटल ल्याब तथा अनुसन्धान केन्द्र स्थापना, विद्यालय तहदेखि नै कोडिङ र आइ शिक्षा लागू गर्ने र सीपमूलक तथा रोजगारमूलक शिक्षामा नीतिगत सुधार गर्ने प्रतिबद्धता गरिएको छ । स्वास्थ्य, खानेपानी र सिँचाइ सुविधासम्पन्न क्षेत्रीय अस्पताल निर्माण, सबै नागरिकलाई राष्ट्रिय स्वास्थ्य बीमामा आबद्ध गराई डिजिटल हेल्थ रेकर्ड प्रणाली लागू गर्ने योजना अघि सारिएको छ । अधुरा खानेपानी आयोजना सम्पन्न गरी प्रत्येक घरमा शुद्ध पानी पुर्याउने तथा आधुनिक प्रविधियुक्त सिँचाइ आयोजना विस्तार गर्ने प्रतिबद्धता जनाइएको छ । सामाजिक सुरक्षा र युवा भूमिहीन, सुकुम्बासी तथा अव्यवस्थित बसोबासीका समस्या समाधान, वैदेशिक रोजगारीबाट फर्केकाको सीप र पूँजी उत्पादन क्षेत्रमा परिचालन तथा अनौपचारिक श्रमिकलाई सामाजिक सुरक्षा कोषमा आबद्ध गराउने योजना रहेको छ । युवा लक्षित खेलकुद एकेडेमी, परामर्श केन्द्र स्थापना र ‘संसद–युवा संवाद’ कार्यक्रममार्फत युवालाई नीति निर्माणमा सहभागी गराइने जनाइएको छ । भाषा, संस्कृति र वातावरण आदिवासी तथा स्थानीय समुदायको भाषा, लिपि र संस्कृतिको संरक्षण गर्दै सांस्कृतिक पर्यटनसँग जोडिने कार्यक्रम सञ्चालन गरिने उल्लेख गरिएको छ । हात्ती, बाँदर र बदेलबाट हुने क्षति न्यूनीकरण, बाढी–पहिरो जोखिम नियन्त्रण र चुरे संरक्षणका लागि तटबन्ध तथा विपद् बीमा कार्यक्रम ल्याइने राईले उल्लेख गरेका छन् । डिजिटल इलामको अवधारणा ‘इलाम डिजिटल हब’ स्थापना गरी स्थानीय युवालाई गाउँमै बसेर आइटी आउटसोर्सिङमार्फत आम्दानी गर्ने वातावरण बनाइने योजना सार्वजनिक गरिएको छ । तीन तहका सरकार, निजी क्षेत्र र सहकारीबीच समन्वय गर्दै दिगो विकास लक्ष्य हासिल गरिने राईले दाबी गरेका छन् । उम्मेदवार राईले उज्यालो इलाम निर्माणका लागि आफ्नो निर्वाचन चिन्ह ‘तारा’मा मतदान गर्न अपिल गर्दै एक मतले इलामको समृद्धिको आधार तयार हुने विश्वास व्यक्त गरेका छन् । संकल्पपत्र :

काठमाडौँ । नेपाली कम्युनिष्ट पार्टी (नेकपा) पर्वतका उम्मेदवार मनहरि तिमिल्सिनाले आधुनिक कृषि र पर्यटन, गुणस्तरीय शिक्षा व्यवस्था, सर्वसुलभ स्वास्थ्य सेवा, सडक र यातायात विकासका लागि प्रतिबद्धता गरेका छन् । त्यस्तै, स्वच्छ ऊर्जा उत्पादन, सिँचाइ तथा भूसंरक्षण, प्राकृतिक प्रकोप व्यवस्थापन, डिजिटल पर्वत निर्माण र समान समावेशीकरणमा उनले जोड दिएका छन् । रोजगारी सिर्जना र उद्यमशीलता, खनिज सम्पदाको व्यवस्थित उपयोग र सांस्कृतिक विरासतहरुको संरक्षणलाई पनि उनले आफ्नो प्राथमिकताको सूचीमा राखेका छन् । तिमिल्सिनाले कफीबारी, सुन्तलाबारी, ग्रामीण बस्ती र प्राकृतिक दृश्यलाई जोडेर ‘एग्रो–टुरिज्म सर्किट’ बनाउने प्रतिबद्धता गरेका छन् । उनले सामुदायिक होमस्टेहरुलाई थप सुविधायुक्त बनाउने उनको प्रतिबद्धता छ । उच्च भेगमा आलुको बीउ, स्याउ÷ओखर, मध्य भेगमा सुन्तला, कफी, अलैँची आदि पकेट क्षेत्रमा वैज्ञानिक माटो परिक्षणका आधारमा विकास गर्ने पनि उनले बताएका छन् । उनले एक पालिका÷वडा–एक विशेष उत्पादन गर्ने नीति लिने पनि बाचा पत्रमार्फत् उल्लेख गरेका छन् । उनले विद्यार्थी संख्याका आधारमा विद्यालय एकीकरण गरी ठूला आवासीय विद्यालयको स्तरमा विकास गर्ने, हरेक मुख्य केन्द्रमा स्मार्ट कक्षाकोठा स्थापना गर्ने, मावि तहमा इलाइब्रेरी, आइटी ल्याब निर्माण गरी गणित र विज्ञानमा एआइमा आधारित सिकाइ टुलको प्रयोग गर्ने भनेका छन् । तिमिल्सिनाले जिल्ला अस्पताललाई प्रदेश÷केन्द्रीय अस्पतालसँग जोडी टेलिमेडिसिन सेवा सुरु गर्ने र मोबाइलबाटै विशेषज्ञ डाक्टरसँग परामर्श लिन सकिने एपको विकास गर्ने पनि उनको भनाई छ । प्रत्येक गाउँपालिकामा आधुनिक स्वास्थ्य चौकी र ल्याबको स्तरोन्नति गर्ने पनि उनको प्रतिबद्धता छ । सबै पालिकाका केन्द्रहरुलाई बाह्रमासे सडकले जोडने बताइएको छ ।ं तिमिल्सिनाले जिल्लाभरी फाइबर अप्टिक इन्टरनेट विस्तार गरी डिजिटल पर्वत फ्रेमवर्क लागु गर्ने भनेका छन् । युवाहरुलाई डिजिटल रोजगारी सिर्जना गर्न आईटी पार्क स्थापना गर्ने र प्रत्येक पालिका केन्द्रमा ई लाइब्रेरी फ्री वाइफाई निर्माण गर्ने उनको भनाई छ ।

काठमाडौं । नेपाली कम्युनिष्ट पार्टी (नेकपा) ले निर्वाचन सम्बन्धी समसामयिक विषयमा पार्टीको धारणा सार्वजनिक गर्न पत्रकार भेटघाट कार्यक्रम आयोजना गर्ने भएको छ। पार्टीका संयोजक पुष्पकमल दाहाल ‘प्रचण्ड’को विशेष उपस्थितिमा उक्त कार्यक्रम सञ्चालन गरिने जनाइएको छ। समसामयिक राजनीतिक अवस्था र निर्वाचनसँग जोडिएका विषयमा पार्टीको आधिकारिक धारणा सार्वजनिक गर्ने उद्देश्यले कार्यक्रम आयोजना गरिएको पार्टीले जनाएको छ। कार्यक्रम २०८२ साल फाल्गुन १४ गते दिउँसो ३:०० बजे पार्टीको केन्द्रीय कार्यालय, पेरिसडाँडामा हुने तय गरिएको छ। पार्टीले देशभरका सञ्चारमाध्यमलाई कार्यक्रमको समाचार संकलन तथा रिपोर्टिङका लागि सञ्चारकर्मी खटाइदिन अनुरोध गरेको छ।

विराटनगर । मोरङ निर्वाचन क्षेत्र नम्बर–४ अन्तर्गत बेलबारी नगरपालिका–७ का ५३ जना युवाहरू नेपाली कम्युनिष्ट पार्टी  (नेकपा) मा प्रवेश गरेका छन् । स्थानीय तहदेखि प्रतिनिधिसभासम्मको निर्वाचन गतिविधि तीव्र भइरहेका बेला युवाहरूको सामूहिक प्रवेशले क्षेत्रको चुनावी माहोल थप तातेको छ । माेरङ-४ का प्रतिनिधिसभा सदस्य पदका नेकपाका उम्मेदवार अमनलाल मोदीले आयोजित कार्यक्रममार्फत ती युवाहरूलाई टीका–माला लगाई औपचारिक रूपमा पार्टीमा स्वागत गरेका हुन् । बेलबारी–७ मा आयोजित अगुवा कार्यकर्ता भेलालाई सम्बोधन गर्दै उनले युवाहरूको सक्रिय सहभागिताले पार्टी संगठन थप सुदृढ हुने विश्वास व्यक्त गरे । “देशको रूपान्तरण र समाजवादी लक्ष्य प्राप्तिका लागि युवाशक्ति अपरिहार्य छ,” उनले भने, “युवाहरूको भरोसा र साथले मोरङ–४ मा नयाँ राजनीतिक सन्देश प्रवाह हुनेछ।” उक्त कार्यक्रममा मुन्ना राजवंशीको नेतृत्वमा युवाहरूको ठूलो समूह पार्टी प्रवेश गरेको निर्वाचन परिचालन समितिका इन्चार्ज रुपेश खतिवडाले जानकारी दिए । उनका अनुसार प्रवेश गर्ने युवाहरू यसअघि नेपाली कांग्रेस, नेकपा एमाले, राष्ट्रिय स्वतन्त्र पार्टी लगायत विभिन्न दलमा क्रियाशील थिए । “विकास, पारदर्शिता र वैकल्पिक राजनीतिक दिशाको खोजीमा रहेका युवाहरूले वर्तमान परिस्थितिमा नेपाली कम्युनिष्ट पार्टी नै उपयुक्त शक्ति ठानेर प्रवेश गरेका हुन्,” खतिवडाले दाबी गरे । कार्यक्रममा बोल्दै नवप्रवेशी युवाहरूका तर्फबाट प्रतिनिधिहरूले राजनीतिक स्थिरता, रोजगारी सिर्जना, शिक्षा र स्वास्थ्य क्षेत्रमा सुधारको अपेक्षा राख्दै आफूहरू परिवर्तनको अभियानमा सहभागी भएको बताएका थिए । उनीहरूले स्थानीय स्तरमा देखिएका बेरोजगारी, पूर्वाधार अभाव र युवामैत्री कार्यक्रमको कमी जस्ता समस्यालाई समाधान गर्न सशक्त राजनीतिक विकल्प आवश्यक रहेको धारणा व्यक्त गरे । भेलामा पार्टीका जिल्ला तथा क्षेत्रीय नेताहरूको पनि उपस्थिति रहेको थियो । नेताहरूले संगठन विस्तार अभियानलाई तीव्र पारिएको उल्लेख गर्दै आगामी निर्वाचनमा मोरङ–४ बाट विजयी हुने लक्ष्यसहित घरदैलो, टोलभेला र अन्तरक्रिया कार्यक्रमलाई निरन्तरता दिइने बताएका छन् । बेलबारी–७ मा भएको सामूहिक पार्टी प्रवेशलाई स्थानीय राजनीतिक वृत्तमा चासोका साथ हेरिएको छ । निर्वाचन नजिकिँदै जाँदा विभिन्न दलहरूबीच कार्यकर्ता तानातान बढिरहेको अवस्थामा युवाहरूको यो कदमले क्षेत्रीय शक्ति सन्तुलनमा प्रभाव पार्ने विश्लेषण गरिएको छ । पार्टीले आगामी दिनमा युवालाई नेतृत्व विकास, वैचारिक प्रशिक्षण र सामाजिक अभियानमा सक्रिय सहभागिताका लागि विशेष कार्यक्रम ल्याउने घोषणा समेत गरेको छ । स्थानीय स्तरमा संगठन विस्तारसँगै युवामुखी कार्यक्रम अघि सार्दै चुनावी अभियानलाई अझ प्रभावकारी बनाइने नेताहरूले बताएका छन् ।

चितवन । चितवन क्षेत्र नम्बर–३ मा प्रतिनिधिसभा निर्वाचनको माहोल दिनानुदिन उत्साहपूर्ण बन्दै गएको छ। विकास, सुशासन र समृद्धिको स्पष्ट एजेन्डासहित चुनावी मैदानमा उत्रिएकी रेनु दाहालको पक्षमा विभिन्न दलबाट समर्थन र पार्टी प्रवेशको क्रम तीव्र बनेको छ। यसैक्रममा नेपाली कांग्रेसका सक्रिय युवा नेता राजकुमार तामाङ र बुद्ध घिसिङले पार्टी परित्याग गर्दै नेकपामा प्रवेश गरेका छन्। उनीहरूले चितवन–३ को समग्र विकास र समृद्धिका लागि रेनु दाहालको नेतृत्व आवश्यक रहेको निष्कर्षसहित साथ दिने घोषणा गरेका हुन्। राजकुमार तामाङले विज्ञप्तिमार्फत नेपाली कांग्रेसमा विभिन्न जिम्मेवारी सम्हाल्दै लामो समय काम गरेको स्मरण गर्दै आजकै मितिदेखि साधारण सदस्यसमेत नरहने गरी पार्टी परित्याग गरेको जानकारी दिएका छन्। उनले अब नेकपाको नीति र कार्यक्रमप्रति प्रतिबद्ध रहँदै रेनु दाहाललाई विजयी बनाउन सक्रिय भूमिका निर्वाह गर्ने बताएका छन्। बुद्ध घिसिङले पनि युवाको आकांक्षा पूरा गर्न सक्षम नेतृत्वको पक्षमा उभिएको स्पष्ट पारेका छन्। ‘तारा’ चुनाव चिन्हबाट उम्मेदवारी दिएकी रेनु दाहालले भरतपुरमा कार्यान्वयन गरिएको विकास मोडललाई चितवन–३ मार्फत राष्ट्रिय स्तरमा विस्तार गर्ने लक्ष्य राखेको बताउँदै आएकी छन्। उनले युवा पुस्ताको बढ्दो साथ र विश्वासले आफ्नो अभियान अझ बलियो र उत्साहजनक बनेको प्रतिक्रिया दिएकी छन्। चितवन–३ मा पछिल्लो समय देखिएको पार्टी प्रवेश र समर्थनको लहरले चुनावी प्रतिस्पर्धालाई थप गतिशील बनाएको छ। विश्लेषकहरूका अनुसार विकासकेन्द्रित एजेन्डा र युवामुखी प्रतिबद्धताका कारण रेनु दाहालको अभियानले व्यापक जनसमर्थन हासिल गरिरहेको संकेत देखिएको छ।

धादिङ । प्रतिनिधिसभा सदस्यका लागि धादिङ क्षेत्र नम्बर १ बाट नेपाली कम्युनिष्ट पार्टी (नेकपा) का उम्मेदवार राजेन्द्र प्रसाद पाण्डे को पक्षमा चुनावी समीकरण थप सुदृढ बनेको छ। सोही क्षेत्रमा स्वतन्त्र उम्मेदवारी दिएका निरन्जन संजेलले आफ्नो उम्मेदवारी निष्क्रिय बनाउँदै पाण्डेलाई औपचारिक समर्थन गर्ने घोषणा गरेपछि चुनावी माहोल थप बलियो बनेको हो। बुधबार धुनीबेशी नगरपालिका–१, भन्ज्याङ पोखरीमा आयोजित नेकपाको चुनावी सभालाई सम्बोधन गर्दै संजेलले आफ्नो उम्मेदवारी फिर्ता (निष्क्रिय) भएको घोषणा गरे। कार्यक्रममा पाण्डे र संजेलबीच आपसी सहमतिपत्रमा हस्ताक्षरसमेत भएको छ। सहमतिसँगै दुवै पक्षले धादिङको विकास र समृद्धिका साझा एजेन्डामा सहकार्य गर्ने प्रतिबद्धता व्यक्त गरेका छन्। सभालाई सम्बोधन गर्दै संजेलले पाण्डेलाई धादिङको मात्र नभई सिंगो देशकै अभिभावकका रूपमा चित्रित गरे। उनले भने, “राजेन्द्र प्रसाद पाण्डे धादिङको विकासप्रेमी नेता मात्र नभई सिंगो देशकै एक अभिभावक हुनुहुन्छ। जिल्लाको सर्वाङ्गीण विकासका लागि उहाँको विजय अपरिहार्य रहेकाले मैले उम्मेदवारी निष्क्रिय पारी उहाँलाई समर्थन गर्ने निर्णय गरेको हुँ।” संजेलले आफ्नो निर्णय व्यक्तिगत स्वार्थभन्दा माथि उठेर धादिङको दीर्घकालीन हितलाई केन्द्रमा राखेर गरिएको स्पष्ट पारे। उनले विकास, पूर्वाधार विस्तार, रोजगारी सिर्जना र सुशासनको सवालमा पाण्डेको स्पष्ट दृष्टिकोण र अनुभव नै अहिलेको आवश्यकता भएको बताए। “जिल्लाको सम्भावनालाई वास्तविक उपलब्धिमा रूपान्तरण गर्न सक्षम नेतृत्व चाहिन्छ। त्यो क्षमता पाण्डेजीमा देखेको छु,” उनले थपे। यसअघि मंगलबार साँझ नै सामाजिक सञ्जालमार्फत पाण्डेलाई समर्थन गर्ने घोषणा गरेका संजेलले बुधबारको कार्यक्रममार्फत औपचारिकता दिएका हुन्। हस्ताक्षरपछि उनले आफ्नो सम्पूर्ण चुनावी संयन्त्र, समर्थक तथा शुभेच्छुकलाई पाण्डेको पक्षमा सक्रिय रूपमा परिचालन गर्ने प्रतिबद्धता जनाए। राजनीतिक विश्लेषकहरूका अनुसार संजेलको समर्थनले धादिङ–१ मा पाण्डेको पक्षमा थप सकारात्मक सन्देश प्रवाह भएको छ। स्वतन्त्र उम्मेदवारको समर्थनले मत विभाजनको सम्भावना घट्नुका साथै नेकपाको संगठनात्मक आधार अझ मजबुत बन्ने आकलन गरिएको छ। कार्यक्रममा बोल्दै पाण्डेले संजेलप्रति आभार व्यक्त गर्दै धादिङको साझा सपना साकार पार्न सबै राजनीतिक शक्ति र नागरिक समाजसँग सहकार्य गर्ने प्रतिबद्धता दोहोर्‍याए। उनले भने, “धादिङको समृद्धि कुनै एक व्यक्तिको एजेन्डा होइन, यो हामी सबैको साझा दायित्व हो। आजको सहमति विकास र स्थायित्वको पक्षमा गरिएको सकारात्मक कदम हो।” पाण्डेले आगामी कार्यकालमा सडक, शिक्षा, स्वास्थ्य, खानेपानी र कृषि आधुनिकीकरणलाई प्राथमिकतामा राख्ने योजना रहेको बताए। साथै युवालाई स्वरोजगार र उद्यमशीलतामा प्रोत्साहन गर्ने कार्यक्रम ल्याइने जानकारी दिए। स्थानीय बासिन्दाहरूले पनि संजेलको निर्णयलाई सकारात्मक रूपमा लिएको प्रतिक्रिया दिएका छन्। उनीहरूले जिल्लाको विकासका लागि एकीकृत नेतृत्व आवश्यक रहेको र त्यसका लागि पाण्डेको अनुभव उपयोगी हुने बताएका छन्। धादिङ–१ मा चुनावी प्रतिस्पर्धा तीव्र बन्दै गएको बेला स्वतन्त्र उम्मेदवारको समर्थनले नेकपाको पक्षमा थप ऊर्जा थपिएको छ। संजेलको उम्मेदवारी निष्क्रिय भएसँगै पाण्डेको चुनावी अभियान थप उत्साहका साथ अगाडि बढेको नेताहरूको दाबी छ। यस घटनाक्रमले धादिङ–१ को चुनावी समीकरणलाई नयाँ मोड दिएको छ। पाण्डेको पक्षमा देखिएको समर्थन र एकताले आगामी निर्वाचनमा प्रभाव पार्ने अनुमान गरिएको छ।

लम्जुङ । प्रतिनिधिसभा निर्वाचन नजिकिँदै जाँदा लम्जुङमा राजनीतिक सरगर्मी दिनानुदिन तीव्र बन्दै गएको छ। यसैक्रममा नेपाल कम्युनिस्ट पार्टी (नेकपा) का तर्फबाट उम्मेदवार बनेका हरि जङ्ग तामाङको पक्षमा जनलहर बढ्दै गएको दाबी गरिएको छ। नयाँ पुस्ताको प्रतिनिधित्व, बौद्धिक क्षमता र जनस्तरसँगको सजीव सम्बन्धका कारण तामाङ यतिबेला चर्चाको केन्द्रमा छन्। अध्ययन, दृष्टि र प्रतिबद्धता संयोजनका केन्द्र तामाङ हरि जङ्ग तामाङले त्रिभुवन विश्वविद्यालय बाट उच्च शिक्षा हासिल गरेका छन्। कानुन र सामाजिक अध्ययनसँग सम्बन्धित विषयमा गहिरो अध्ययन गरेका उनी हाल त्रिभुवन विश्वविद्यालय अन्तर्गत स्कुल अफ एजुकेश्नमा पिएचडी अध्ययनरत ३५ वर्षे युवा हुन । उनको शैक्षिक पृष्ठभूमिले राजनीतिलाई भावनात्मक नाराभन्दा माथि उठाएर तथ्य, अनुसन्धान र नीतिगत बहसको आधारमा अघि बढाउनुपर्ने स्पष्ट सन्देश दिन्छ। समर्थकहरूका अनुसार संसद्मा प्रभावकारी भूमिका निर्वाह गर्न शैक्षिक र बौद्धिक तयारी अत्यन्तै महत्त्वपूर्ण हुन्छ, र तामाङमा त्यो क्षमता विद्यमान छ। जनआन्दोलन र समुदायसँगको सम्बन्ध तामाङको राजनीतिक यात्रा कुनै अचानक उछाल होइन। उनी नेपाल आदिवासी जनजाति महासंघ लम्जुङका पूर्व अध्यक्षका रूपमा कार्य गरिसकेका छन्। सो जिम्मेवारीमा रहँदा उनले आदिवासी जनजाति, सीमान्तकृत र आवाजविहीन समुदायको सवाललाई संगठित ढङ्गले उठाएका थिए। लम्जुङको बेसीशहरबाट आफ्नो राजनीतिक आधार निर्माण गरेका तामाङ स्थानीय जनताको दुःख, संघर्ष र आकांक्षासँग प्रत्यक्ष रूपमा जोडिएका छन्। गाउँ–टोलमा पुगेर छलफल गर्ने, सुझाव संकलन गर्ने र नीतिगत समाधान खोज्ने उनको शैलीलाई समर्थकहरूले “जमिनसँग जोडिएको नेतृत्व” का रूपमा व्याख्या गरेका छन्। किन बढ्दैछ तामाङप्रति जनलहर? लम्जुङमा विगतका चुनावहरूमा परम्परागत दल र पुरानै अनुहारबीच प्रतिस्पर्धा हुँदै आएको थियो। तर यसपटक नयाँ पुस्ताको प्रतिनिधित्व गर्ने उम्मेदवारप्रति उत्साह बढ्दो छ। तामाङप्रति जनलहर बढ्नुका केही मुख्य कारणहरू यसप्रकार छन्— १. स्पष्ट राजनीतिक दृष्टिकोण: तामाङले शिक्षा, रोजगारी, सुशासन र न्याय प्रणाली सुधारलाई आफ्नो केन्द्रीय एजेन्डा बनाएका छन्। अस्पष्ट नाराभन्दा ठोस नीति प्रस्तावसहित मैदानमा उत्रनुले मतदातामा विश्वास बढाएको छ। २. युवा ऊर्जा र वैकल्पिक सोच: युवाहरूलाई अवसर, सीप विकास र स्वरोजगारसँग जोड्ने कार्यक्रमलाई प्राथमिकता दिएका कारण युवा वर्गमा उनको लोकप्रियता बढ्दै गएको देखिन्छ। ३. अकादमिक र नीतिगत क्षमता: पिएचडी अध्ययनरत उम्मेदवारका रूपमा नीति निर्माण, संसदीय बहस र विधेयक तयारीमा प्रभावकारी योगदान दिन सक्ने विश्वास व्यक्त गरिएको छ। ४. पारदर्शिता र जवाफदेहिता: गुट–उपगुट, नातावाद र परम्परागत शक्ति संरचनाबाट बाहिर रहेर नयाँ राजनीतिक संस्कारको वकालत गर्नुले मतदातामा सकारात्मक सन्देश प्रवाह गरेको छ। चुनावी एजेन्डा: शिक्षा, रोजगारी र सुशासन तामाङले गुणस्तरीय सार्वजनिक शिक्षामा लगानी वृद्धि, सामुदायिक विद्यालय सुदृढीकरण, युवाका लागि उद्यमशीलता प्रवर्द्धन कार्यक्रम र स्थानीय स्रोत–साधनको अधिकतम उपयोगमार्फत रोजगारी सिर्जनालाई प्राथमिकतामा राखेका छन्। “राजनीति सेवा गर्ने माध्यम हो। जनताको विश्वास जित्न पारदर्शिता, इमानदारी र नीतिगत स्पष्टता आवश्यक हुन्छ। म संसद्मा पुगेपछि लम्जुङको आवाज राष्ट्रिय स्तरमा बलियोसँग उठाउने प्रतिबद्धता व्यक्त गर्छु।” उनले भने। घरदैलो अभियानमा उत्साह हाल तामाङले लम्जुङका विभिन्न वडा, गाउँ र बस्तीमा घरदैलो अभियान सञ्चालन गरिरहेका छन्। स्थानीय नागरिक, शिक्षक, युवा समूह र किसानसँग प्रत्यक्ष संवाद गर्दै सुझाव संकलन गर्ने अभियानले चुनावी माहोल थप उत्साहपूर्ण बनेको बताइएको छ। समर्थकहरूका अनुसार पछिल्ला दिनहरूमा विभिन्न समुदाय, पेशागत समूह र युवाहरू खुला रूपमा तामाङको पक्षमा उभिन थालेका छन्। सामाजिक सञ्जालदेखि स्थानीय छलफल मञ्चसम्म उनको उम्मेदवारीबारे सकारात्मक बहस बढ्दै गएको देखिन्छ। परिवर्तनको संकेत? लम्जुङमा यसपटकको निर्वाचन केवल उम्मेदवारको प्रतिस्पर्धा मात्र नभई राजनीतिक संस्कार र नेतृत्वको शैलीबीचको प्रतिस्पर्धाका रूपमा हेरिएको छ। नेपाल कम्युनिस्ट पार्टी (नेकपा) ले अघि सारेका उम्मेदवार हरि जङ्ग तामाङलाई समर्थकहरूले “नयाँ सोच, स्पष्ट नीति र जवाफदेही नेतृत्व” को प्रतिनिधि बताएका छन्। जनतामाझ बढ्दो समर्थन र सक्रिय घरदैलो अभियानले लम्जुङमा नयाँ राजनीतिक समीकरणको संकेत देखिएको राजनीतिक वृत्तमा चर्चा हुन थालेको छ। आगामी निर्वाचनले त्यसको अन्तिम निर्णय गर्नेछ, तर हालसम्मको माहोलले भने तामाङप्रति बढ्दो जनलहर स्पष्ट देखाएको समर्थकहरूको दाबी छ।