झापाः नेत्र विक्रम चन्द ‘विप्लव’ नेतृत्वको नेपाल कम्युनिष्ट पार्टीका ‘जनसरकार’ प्रमुख र सेक्रेटरी पक्राउ परेका छन् । जनसरकार प्रमुख पोख्रेल र जिल्ला सेक्रेटरी प्रणीण मिश्रलाई विर्तामोड बजारबाट सोमबार बिहान पक्राउ गरिएको झापा प्रहरीले जनाएको छ । पक्राउ परेका दुबै जना पार्टी कामको सिलसिलामा मोटरसाइकलमा जाँदै थिए ।

धनगढीः कैलालीको अत्तरियाबाट एक किशोरी वेपत्ता भएकी छिन्। डडेल्धुराको पर्शुराम नगरपालिकाको परिगाउँ घर भएर गोदावरी नगरपालिका वडा नम्बर १ बिजयनगरमा बस्दै आएकी १३ वर्षीया किशोरी जानकी नाथ वेपत्ता भएको ईलाका प्रहरी कार्यालय मालाखेतीले जनाएको छ । गोदावरी नगरपालिका २ मा रहेको सुदूरपश्चिम माध्यमिक विद्यालयमा कक्षा ८ मा पढ्दै आएकी नाथ आईतबार बिहान ६ बजे अत्तरियाको वनखेतमा दुध पु¥याउन भएका बेला वेपत्ता भएकी हुन् । काकी जयन्ती नाथका अनुसार वेपत्ता भएपछि जानकीलाई खोजी गर्दा नभेटिएपछि खोजीका लागि ईलाका प्रहरी कार्यालय मालाखेतीमा निवेदन दिइएको छ । मालाखेतीका प्रमुख प्रहरी नायब उपरिक्षक (डिएसपी) ज्ञान बहादुर बिष्टले किशोरीको खोजी भईरहेको बताए ।

इङ्ल्याण्डले अस्ट्रेलियालाई एसेज सिरिज अन्तर्गतको टेस्टको न्तिम दिनमा १३५ रनले हराएपछि इङ्ल्याण्डको भूमिमा १८ वर्ष पछि एसेज सिरिज जित्ने अस्ट्रेलियाको सपना पुरा नहुने भएको छ। स्टुअर्ट ब्रड (४/६२) र स्पिनर ज्याक लीच (४/४९) को शानदार प्रदर्शनले अस्ट्रेलियालाई घुंडा टेक्न बाध्य पारेको हो। यसका साथै इङ्ल्याण्डले एसेज सिरिजमा ४७ वर्ष पुरानो इतिहास दोहोर्याएको छ। दुवै देशबीच १९७२ यता पहिलो पल्ट २-२ ले सिरिज बराबरीमा टुंगिएको हो। लण्डनस्थित ‘द ओभल’ मैदानमा खेलिएको पाँचौं र अन्तिम टेस्टको पाँचौं दिन अस्ट्रेलियाले ३९९ रनको लक्ष पछ्याउँदै गर्दा सबै विकेट गुमाएर हार्न पुगेको हो। यसमा म्याथ्यु भेडले ११७ रन बनाएर अस्ट्रेलियाको पारीलाई सम्हाल्न खोजे पनि पाहुना टोली ७७ ओभरमा २६३ रनमै धराशायी हुन पुग्यो। यसका साथै पाँच खेलहरूको शृंखला २-२ को बराबरीमा टुंगिएको छ। लक्ष पछ्याउन मैदानमा उत्रिएको पाहुना टोलीलाई तीव्र गतिका बलर स्टुअर्ट ब्रडले सुरुमै ह्यारिसलाई ९ रनमा र वार्नरलाई ११ रनमै प्याभेलियन फर्काएपछि कमजोर बने पछि आशा गरिएका स्टिभ स्मिथलाई पनि ब्रडले नै २३ रनमा फिर्ता पठाएपछि अस्ट्रेलियाको पारी सम्हालिन सकेन। उनले नै कमिन्सलाई ९ रनमा आउट गरे। त्यस पछि ज्याक लीचले लाबुसेनलाई १४ रनमा, कप्तान टीम पेनलाई २१ मा, नाथन लियोनलाई १ रनमा र हेजलवुडलाई शून्यको स्कोरमा आउट गरे। त्यसका अतिरिक्त कप्तान जो रुटले पनि दुई विकेट लिए। यस अघि घरेलु टोली चौथो दिनको खेलमा ३२९ रनमा अलआउट भैसकेको थियो। चौथो दिन ८ विकेटको क्षतिमा ३१३ भन्दा अगाडि खेल्न थालेको इङ्ल्याण्ड धेरै बेर क्रिजमा टिक्न सकेन। जोफ्रा आर्चरलाई ३ रनमै आउट भए। उनलाई कप्तान तथा विकेटकिपर टिम पेनले प्याट कमिन्सको बलमा क्याच गरे। आर्चरलाई फिल्ड अम्पायरले आउट दिएका थिएनन तर पेनले अपील गरेपाही उनले फैसला बदलिएका थिए। त्यस पछि ज्याक लीचलाई अफ स्पिनर नाथन लायनले आउट गरे। उनलाई हेजलवुड ले क्याच गरे। उनको व्यक्तिगत स्कोर ९ रन मात्र थियो। यसरी इङ्ल्याण्डको पारी ३२९ मा सीमित हुँदा स्टुअर्ट ब्रड ९ रन बनाएर नट आउट थिए। दोस्रो पारीमा अस्ट्रेलियाको तर्फबाट लायनले सर्वाधिक ४ विकेट लिए भने कमिन्स, पिटर सिडल र मार्शलाई २-२ सफलता हात लाग्यो।

काठमाडौं । दसैं आउन दुई साता बाँकी छँदा काठमाडौं उपत्यकाको सडक, उपत्यका भित्रिने र बाहिरिने नाका तथा राजमार्गको अवस्थामा सुधार भएको छैन । ठाउँ–ठाउँमा सडक विस्तार भइरहेकाले र निरन्तरको वर्षाका कारण सडक तथा राजमार्ग भत्किएका छन् भने सडकभरि खाल्टाखुल्टी परेर दयनीय बन्न पुगेको छ । काठमाडौंबाट बाहिरिने मुख्य नाका थानकोटको सडकखण्डमा खाल्टाखुल्टी देखिएका छन् । कलंकीबाट बाहिरिने अर्को नाका भक्तपुरसम्म राम्रो भए पनि बनेपा पार भएसँगै खाल्टाखुल्टीले सडक भरिएका छन् । बल्खुदेखि हेटौंडा निस्कने सडकखण्डको ठाउँठाउँमा पिच उप्किएको छ भने सडकभरि खाल्टाखुल्टी छन् । काठमाडौं–नुवाकोट–धादिङ तथा रसुवा जाने तीन वटा नाकाको पनि हालत खराब नै छ । टोखा, ककनी र गल्छीको बाटो पनि दयनीय अवस्थामा छ । चावहिल–जोरपाटीको सकड पनि दयनीय छ । त्यस क्षेत्रका स्थानीयले पटक–पटक सडक मर्मत–सम्भार तथा पिच गर्न माग गर्दै सडकमा उत्रिएर आन्दोलन गर्दै आएका छन् । ठेकेदारको लापरवाही र सरकारी निकायको सक्रियता नहुनाले उपत्यका र उपत्यकाबाहिरका सडकको अवस्था दयनीय बन्न पुगेको हो । यो समाचार आजको राजधानी दैनिकमा छापिएको छ ।

काठमाडौंः त्रिकोणात्मक टि–२० सिरिज अन्तर्गत अफगानिस्तानले जिम्बाब्बेलाई १९८ रनको विशाल लक्ष्य दिएको छ । टस हारेर ब्याटिङको मौका पाएको अफगानिस्तानले निर्धारित २० ओभरमा ५ विकेट गुमाएर १९७ रन बनायो । उसका लागि नजिबुल्लाह जर्दानले ६ छक्का र ५ चौकाको मद्दतमा ३० बलमा नटआउट ६९ रनको विष्फोटक प्रदर्शन गरे । यस्तै रहमनउल्लाह गुर्बाजले ४३, माेहम्मद नाबीले ३८, अश्घर अफगान, जनीव तरकाईँले १४–१४ र हजरतुल्लाह जजाईँले १३ रनको योगदान दिए । बलिङमा जिम्बाब्बेका शेन विलियम्स, टेन्डाई छताराले २–२ र आइन्स्ले एनडलोभोले एक विकेट लिए ।

काठमाडौंः  सरकारको निर्देशनमा दुग्ध विकास संस्थान (डीडीसी)ले दुई वर्षपछि दूधको मूल्य बढाएको छ । दुग्ध सहकारीहरु र डेरी उद्योग संघको दबाबमा सरकारले दूध प्रतिलिटर ६ रुपैयाँले बढाएको हो । बढेको मूल्य पर्सि २१ गते शनिबारदेखि लागू हुने डीडीसीकायोजना तथा बजार व्यवस्थापन विभाग प्रमुख सञ्जीव झाले बताए। कृषि तथा पशुपन्छी मन्त्रालयले बिहीबार दूधको मूल्य बढाउने निर्णय गरी कार्यान्वयनका लागि डीडीसीलाई पत्र पठाएकोव्यवस्थापन विभाग प्रमुख सञ्जीव झाले  बताए। मन्त्रालयका प्रवक्तातेजबहादुर सुवेदीले पनि मूल्य बढाउन सिफारिस गरेको बताए। तर, नयाँ मूल्य डीडीसीको बोर्ड बैठकबाट पास भएपछि लागू हुने उनले बताए तर, कृषि सचिव युवकध्वज जिसीले भने मूल्य बढाउने निर्णयबारे आफूलाई कुनै जानकारी नभएको बताए। उनले भने, ‘मूल्य बढेको कुरा थाहा छैन, भेरिफाइ गर्छु।’ उपभोक्ताले अब प्रतिलिटर दूधको ७६ रुपैयाँ तिर्नुपर्नेछ। यसअघि ७० रुपैयाँमा बिक्री वितरण हुँदै आएको थियो। नयाँ भाउ अनुसार ६९ प्रतिशत किसानले र ३१ प्रतिशत उद्योगीले पाउनेछन्। झाका अनुसार यसअघि २०७४ भदौ १ मा दूध प्रतिलिटर ६ रुपैयाँ बढाइएको थियो। दुग्ध सहकारीहरुले मूल्य नबढाए भदौ १ गतेदेखि आन्दोलन गर्ने चेतावनी दिएका थिए। उनीहरुको आन्दोलनमा डेरी उद्योग संघहरुले पनि समर्थन जनाएका थिए। सरकार, उद्योगी, किसानका प्रतिनिधिबीच पटक पटकको वार्ताबाट दूध प्रतिलिटर १० रुपैयाँ बढाउने सिफारिस गरेको थियो।

काठमाडौं । अनेरास्ववियूका  संयोजक ऐन महरसहितका नेताहरुमाथि प्रहरीले कुटपिट गरेको छ । बुधबार विहान पक्राउ परेका चिकित्सा शिक्षा अध्ययन संस्थान आईओएमका स्ववियु सभापति मिलन गैरेसहित नेताहरुलाई भेट्न महेन्द्र पुलिस क्लब पुगेका विद्यार्थी नेताहरुलाई प्रहरीले लाठीचार्ज गरेको हो । अनेरास्ववियु संयोजक ऐन महर, समिक बडाल, सुदेश पराजुलीलगायतका विद्यार्थी नेताहरुमाथि कुटपिट भएको हो । घाइते विद्यार्थीको बागबजारस्थित काठमाडौं मोडल अस्पतालमा  उपचार भइरहेको छ ।

काठमाडौं । लामो समयदेखि अमेरिकामा पढाई गर्दै आएकी मोडेल क्रिष्टिना गुरुङ अहिले चर्चामा छिन् । प्रेम गीत ३ को नायिकामा उनको नाम निश्चित भएपछि क्रिष्टिनाले पढाई पनि सँगै लगेर जाने बताएकी छिन् । छेतेन गुरुङ र सन्तोष सेनले निर्देशन गर्ने यो फिल्ममा प्रदीप खड्का, मनिष राउत, सुनील थापा, शिव श्रेष्ठ लगायतका कलाकारको समेत भूमिका रहनेछ । २७ सय प्रतिस्पर्धीलाई उछिन्दै नायिकामा चुनिएकी क्रिष्टिनाले अमेरिकाको बाल्टीमोरमा ‘इन्फरमेसन सिस्टम’ विषय लिएर अध्ययन गरिरहेकी थिइन् । प्लस २ पछि थप अध्ययनका लागि अमेरिका गएकी क्रिष्टिना आमा बिरामी परेका कारण नेपाल आउने जाने गरिरहन्थिन् । अमेरिकामा रहे पनि नेपालमै भविष्यको खोजी गरेकी क्रिष्टिनाले अब नायिकाको परिचय बनाउँदै छिन् । सानैदेखि नेपाली चलचित्र क्षेत्रमा चासो राख्ने क्रिष्टिना विदेशमा हुँदा झनै बढी नेपाली चलचित्र क्षेत्रप्रति चासो बढेको धारणा राख्छिन् । ‘प्रेम गीत ३’ की ‘गीत’ तपाईंलाई छनोटमा पर्छु भन्नेमा कत्तिको विश्वास थियो ? म नै छानिन्छु झैँ त लागेको थिएन तर यो चलचित्रमा अभिनय गर्न पाए हुन्थ्यो भन्ने लागेको थियो । अचानक फिल्ममा छानिँदा कस्तो महसुस गर्नुभएको छ ? एकदमै खुशी छु । खुशीको सीमा छैन । पहिलेदेखि नै यो क्षेत्रमा । केही गर्न पाए हुन्थ्यो भन्ने लागेको थियो । यो ब्यानरका बारेमा पहिलेदेखि नै थाहा थियो । अमेरिकादेखि नेपाल आउनुभएको छ, नेपाली फिल्मको अवस्थाबारे कत्तिको जानकार हुनुहुन्छ ? खासमा म व्यक्तिगत कारणले अमेरिकाबाट नेपाल आएकी थिएँ । फिल्मको अडिसन हुँदैछ भन्ने थाहा पाएपछि यतै अडिसन दिने सोचेँ । नेपालमै केही गर्नु छ भनेर मौका खोजिरहेकी थिएँ । विदेशमा हुँदा नेपाली फिल्म र नेपालबारे अझै चासो हुने रहेछ । नेपालबारे अपडेटमा रहन्थेँ ।

नयाँ दिल्ली । दिल्लीका मुख्यमन्त्री केजरीवालले फेरी अर्को लोकप्रिय घोषणा गरेका छन् । आफ्नो निशुल्क कोचिङ स्किमको चर्चा गर्दैै उनले अब आफ्नो छोरा र एकजना दर्जीको छोरापनि सँगै आईआईटीमा पढने बताए । आईआईटी नेपालमा पुल्चोक इन्जिनियरिङ जस्तै भारतको सबैभन्दा प्रख्यात शैक्षिक संस्थान हो । हालैमात्र निशुल्क कोचिङ योजना सार्वजनिक गरेका केजरिवालले ट्विट गर्दै भनेका छन्ः मलाई एकदमै खुशी भइरहेको छ । यो वर्ष मेरो छोरा र यिनको छोरा सँगै आईआईटीमा पढन गइरहेका छन् । वर्षौदेखि गरिबको छोरा राम्रो शिक्षाको अभावमा गरिबीमा नै बाँच्नुपर्ने परम्परा चलिआएको थियो । अब सबैलाई असल शिक्षा र तालिम दिएर हामीले गरिबी र अमिरीको दूरी अन्त्य गरेका छौं ।” आम आदमी पार्टीका संयोजक केजरीवालले १६ वर्षीय विजय कुमारका सन्दर्भममा उक्त कुरा गरेका थिए । विजय कुमारले जय भीम मुख्यमन्त्री प्रतिभा विकास योजना अन्तर्गत ४,९५३ विद्यार्थी सँगै इन्जिनियरिङमा प्रवेश पाएका छन् । दिल्ली सरकारले वर्ष २०१७ मा यो योजना लागु गरेका थिए । यस अन्तर्गत दलित समुदायबाट आउने छात्रहरुलाई प्रतिष्पर्धी परिक्षाका लागि निशुल्क कोचिङ दिइने गरिन्छ ।

काठमाडौं । आफ्नै दाजुबाट बलात्कृत भएका दुई किशोरीको बयानका आधारमा चार जनालाई प्रहरीले हिरासतमा लिएको छ । ललितपुरको बुथाथोकी गाउँ निवासी दुई किशोरी आफ्नै दाजु र भाईबाट बलात्कृत भएका हुन । एउटै घरमा बस्ने भारतीय नागरिकले शुरुमा बलात्कार गरेको र पछि आफ्नै दाईले बलात्कार गरेको किशोरीले बताएकी छिन् । सोही घरमा नै अर्की किशोरीलाई भने भाईले बलात्कार गरेका छन् । सीता र गीतालाई बलात्कार गरेको आरोपमा यतिबेला उनीहरुका दाजुभाइसँगै ४ जना महानगरीय प्रहरी वृत्त सातदोबाटोको हिरासतमा छन् । उनीहरु एउटै घरका दुइए वटा तलमा बेग्लाबेग्लै कोठा भाडामा लिएर बसेका थिए । सोही घरमा पेन्टरको काम गर्दै आएका ३७ वर्षीय भारतीय नागरिकले बलात्कार गरेको हो । निज मण्डलले ८ वर्षकी गीतालाई ३० रुपैयाँ र १६ वर्षकी सीतालाई ५० रुपैयाँ दिएर शुरुमा एकै पटक बलात्कार गरेको खुल्न आएको महानगरीय प्रहरी परिसर ललितपुरका प्रमुख एसएसपी रवीन्द्र धानुकले बताए । प्रहरीलाई उनीहरु बस्दै आएको घरबेटीले घटनाबारे जानकारी दिएपछि उनीहरु पक्राउ परेका हुन् । १६ वर्षीया सीताले घटनाबारे घरबेटीलाई बताएकी थिइन । घटनाबारे परिवारलाई थाहा भएपछि गीता र सीताले प्रहरीमा उनीहरु चारैजना विरुद्ध जबर्जस्ती करणी गरेको भन्दै किटानी जाहेरी दिएको प्रहरीले जनाएको छ । सोही आधारमा चारैजना भदौ ७ गते साँझ आफ्नै डेराबाट पक्राउ परेका हुन् । पक्राउ परेका चारैजना माथि जबर्जस्ती करणी मुद्दामा आज जिल्ला अदालत ललितपुरमा म्याद थप हुने प्रहरीले जनाएको छ । रातोपाटीमा प्रकाशित समाचार अनुसार, विगत केही महिना यता मण्डलले कहिले २० त कहिले ३० रुपैयाँ दिएर फकाउँदै उनीहरुमाथि यौनशोषण गर्दै आएका थिए । एसएसपी धानुकले भने, ‘मण्डलले छुट्टै बोलाएर पनि उनीहरुमाथि यौनशोषण गर्दै आएको पाइएको छ ।’ घरमा कोही नभएको मौकामा मण्डल उनीहरुको कोठामा जाने र फकाउँदै शोषण गर्ने गरेको एसएसपी धानुकको भनाइ छ । मण्डलसँगै जबर्जस्ती करणी गरेको आरोपमा पक्राउ परेका अन्य २ जनामा सीताका भाइ र गीताको दाइ रहेका छन् । प्रहरीका अनुसार १६ वर्ष टेकेका भाइले सीतालाई पटक–पटक यौनशोषण गर्दै आएको खुल्न आएको छ । घरमा आमाबुबा नभएको मौकामा भाँडाकुट्टी खेल्ने भन्दै कोठामै सीतालाई यौनशोषण गर्दै आएको पाइएको हो । एउटै घरमा सँगै बस्ने भएपछि सीताको कोठामा गीता र उनको दाइ पनि खेल्न आउँथेँ । सोही क्रममा गीताको ११ वर्षीय दाइले पनि सीतालाई बलात्कार गरेको खुल्न आएको छ । यता, गीतालाई पनि सीताको भाइले बलात्कार गर्दै आएको प्रहरीको भनाइ छ । चार जना मिलेर भाँडाकुट्टी खेल्ने भन्दै कोठामै जबर्जस्ती करणी हुने गरेको महानगरीय प्रहरी वृत्त सातदोबाटोका प्रमुख डीएसपी गौतम मिश्रले जानकारी दिए । यसैगरी मोरङ पथरी घर भई हाल ललितपुर महानगरपालिका–१४ शोभाहिटी बस्दै आएका १९ वर्षीय विकेश खड्का पनि १६ वर्षीया सीतालाई जर्बजस्ती करणी गरेको आरोपमा प्रहरी हिरासतमा छन् । विकेशले प्रहरीसमक्ष डेढ वर्षअघि फेसबुकमार्फत चिनजान भएको सीतालाई पछिल्लो समय नदेखेको बताएका छन् । सीतासँग डेढ वर्षअघि सहमतिमै यौनसम्पर्क भएको विकेशको भनाइ छ । त्यतिबेला सीताको स्कुल छुट्टी हुनासाथ हामी भेटेर सीताकै कोठामा गएर यौनसम्पर्क गर्ने गरेको विकेशले प्रहरी समक्ष बताएका छन् । प्रहरीका अनुसार विकेशविरुद्ध जबर्जस्ती करणी गरेको भन्दै सीताले किटानी जाहेरी दिएपछि पक्राउ परेका हुन् । १६ वर्षीया सीता ४ जनाबाट बलात्कारको शिकार भएकी प्रहरीको अनुसन्धानबाट खुल्न आएको छ । सीतालाई सुरुमा भारतीय नागरिक सञ्जय मण्डलले बलात्कार गरेका थिए । यस्तै विकेशले पनि प्रहरी समक्ष सीतासँग यौनसम्पर्क राख्ने गरेको बताएका छन् । आफ्नै भाइ र गीताको भाइबाट पनि सीता शिकार भएकी छन् । यता, गीता भने ३ जनाको शिकार भएकी छन् । सुरुमा भारतीय नागरिक मण्डलको शिकार भएकी गीता विकेशसँग भने जोगिएकी छन् । सीताको भाइ र आफ्नै दाइबाट पनि गीता यौनशोषणको शिकार भएकी छन् ।  

काठमाडौंः  एसेज टेस्ट सिरिजमा घरेलु टोली इङ्ल्याण्ड नयाँ इतिहास बनाउने स्थितिमा पुगेको छ | एसेज सिरिजको १४० वर्षको इतिहासमा पहिलोपल्ट यस्तो अवस्था आएको हो । एसेज सिरिजमा इङ्ल्याण्डले आजसम्म ३५० रनभन्दा बढीको लक्ष पछ्याएको छैन ।  यसपटक भने उसले ३५९ रनको लक्ष पाएको छ र जो रुटको कप्तानीमा उक्त लक्ष पछ्याउन उससँग दुइ दिनको खेल र सात विकेट बाँकी रहेका छन् । इङ्ल्याण्ड र अस्ट्रेलियाबीचको तेस्रो टेस्ट लीड्सको हेडिङ्लेमा खेलिंदैछ । खेलको तीन पारीहरू समाप्त भइसकेका छन् र आइतवार इङ्ल्याण्डले तीन विकेटबाट आफ्नो चौथो पारी खेल्नेछ । लीड्स टेस्ट म्याचको तीन दिनको खेल समाप्त भैसकेको छ र टस जितेर पहिले बलिङ रोजेको इङ्ल्याण्डले अस्ट्रेलियालाई १७९ रनमै अल आउट गर्न सफल भयो । यो अप्रत्याशित नतिजाले उत्साहित रहेको इङ्ल्याण्ड आफ्नो पहिलो पारीको ब्याटिङ्मा मात्र ६७ रनमै अल आउट भएपछि झन् खेलमा नयाँ मोड आयो । आफ्नो पहिलो पारीको प्रदर्शनबाट निकै निराश रहेको अस्ट्रेलियालाई ११२ रनको अप्रत्याशित अग्रता मिलेपछि नतिजा झनै रोचक हुने देखियो । दोस्रो पारीमा अस्ट्रेलियाले सबै विकेट गुमाएर २४६ रन बनायो र इङ्ल्याण्डसामु ३५९ रनको विशाल लक्ष उभ्याइदियो । दोस्रो पारीमा अस्ट्रेलियाले दिएको लक्ष पछ्याउने क्रममा इङ्ल्याण्डको ओपननिङ जोडीले सस्तैमा घुँडा टेकेपछि उसका अप्ठ्याराहरू अझै बढे । त्यसपछि जो डेनलीले पारीलाई केही सम्हाले र उनी ५० रनको योगदान गरेर आउट भए । तेस्रो दिनको खेल समाप्त हुँदासम्म इङ्ल्याण्डले ३५९ रन पछ्याउँदै ४ विकेटको क्षतिमा २१२ रन बनाइसकेको छ र उसले खेल जित्न १४७ रन अझै बनाउनु पर्ने देखिन्छ । इङ्ल्याण्डका सामु जुन लक्ष छ त्यो सहज जस्तो देखिए पनि अस्ट्रेलिया जस्तो घातक बलिङ् गर्ने टीमका अगाडि यो त्यति सरल छैन भन्ने बुझ्दा हुन्छ ।

तनहुँः  ‘जब मैले बच्चादेखि नै क्रिकेट खेल्न शुरु गरेँ मलाई आज यो अवस्थामा आइपुग्छु भन्ने लागेकै थिएन’, तनहुँको व्यास नगरपालिकाका युवामाझ आफ्नो अनुभव सुनाउँदै नेपाली क्रिकेट टिमका उपकप्तान ज्ञानेन्द्र मल्लले भने, ‘सानैदेखि क्रिकेट एकदमै मन पथ्र्यो, क्रिकेट खेल्दाखेल्दै आजको अवस्थामा आइपुगेको हुँ ।’ उपकप्तान मल्लले शुरुवाती चरणमा फाटेको गोल्डस्टार जुत्ता लगाएर क्रिकेट खेलेको अनुभव सुनाए । ‘आज आफू जुन स्थानमा छु, त्यो सबै सफलता क्रिकेटबाट प्राप्त गरेको हुँ’, उनले भने, ‘जति दिन क्रिकेट खेल्छु, पूर्ण आत्मविश्वासका साथ खेल्छु ।’ व्यास नगरपालिकाले युवा परिषद्का सदस्यका लागि आइतबार आयोजना गरेको अभिमुखीकरण कार्यक्रममा उपकप्तान मल्लले परिश्रम र लगावले नै मानिसलाई सफल बनाउने बताए । ‘जो व्यक्तिले परिश्रम गर्छ त्यो व्यक्ति सँधै सफल हुनेमा कुनै द्विविधा छैन’, उनले भने । नेपाली क्रिकेट टोलीको सवल पक्षका बारेमा सहभागीले सोधेको प्रश्नको उत्तर दिँदै मल्लले एकता नै नेपाली क्रिकेट टोलीको सवल पक्ष रहेको बताए । राष्ट्रिय टोलीको कप्तान हुन मन लाग्दैन? भन्ने प्रश्नको जिज्ञासा मेटाउँदै उपकप्तान मल्लले भने, ‘त्यस्तो भावना कहिल्यै पनि आएन, सधैँ एउटाले मात्रै पद लिएर बस्ने होइन, बरु अरु साथिलाई त्यो स्थानसम्म पुर्याउन पाए मलाई खुशी लाग्छ ।’ कार्यक्रममा राष्ट्रिय महिला धावक मिरा राईलेसमेत आफ्नो अनुभव सुनाएका थिए । गरीब परिवारमा जन्मिएर पूर्व लडाकु हुँदै दौडमार्फत नेपालको नाम विश्वमाझ चिनाउन पाउँदा आफूलाई गर्व लाग्ने गरेको उनको भनाइ थियो । परिषद्का ४० सदस्य सहभागी उक्त अभिमुखीकरण कार्यक्रममा व्यास नगरपालिकाका प्रमुख प्रशासकीय अधिकृत दिनेशराज पन्त, कान्तिपुर टेलिभिजनका कार्यक्रम प्रस्तोता सविना कार्की, मध्यनेपाल पर्यटन विकास समितिका अध्यक्ष हरिसिंह गुरुङ, युवा अभियन्ता सचिन तिमिल्सेना, व्यास नगरपालिका–५ का वडाध्यक्ष मोहनकुमार श्रेष्ठलगायतले आ–आफ्नो अनुभव सुनाएका थिए । व्यास नगरपालिकाका प्रमुख वैकुण्ठ न्यौपानेले अभिमुखीकरणपश्चात् नगरपालिकाका लागि जागरुक युवा तयार भएको बताए । रासस

काठमाडौं । लामो समय घाटामा गएको नेपाल विद्युत् प्राधिकरणले केही वर्षयता निरन्तर नाफा कमाउन थालेको छ। प्राधिकरणले आर्थिक वर्ष २०७५/७६ मा ७ अर्ब २० करोड रुपैयाँ नाफा कमाएको छ। ऊर्जा, जलश्रोत तथा सिँचाई मन्त्री बर्षमान पुनले मंगलबार सिंहदरबारमा पत्रकार सम्मेलन गरेर प्राधिरकणले कमाएको नाफाबारेमा जानकारी दिएका हुन्। कुलमान घिसिङले कार्यकारी निर्देशकको जिम्मेवारी सम्हालेयता प्राधिकरणले लोडसेटिङ हटाएको छ। चुहावट नियन्त्रण गरेपछि तीन वर्षयता प्राधिकरणले लगातार नाफा कमाउन थालेको हो। प्राधिकरणले २०७४/७५ मा साढे २ अर्ब ९० करोड नाफा कमाएको थियो। अघिल्लो आर्थिक वर्षको तुलनामा गत आर्थिक बर्षमा प्राधिकरणले १ सय ४९ प्रतिशतले बढी नाफा कमाएको हो । प्राधिकरणले सावाँ, व्याज र रोयल्टी गरी राज्यको ढुकुटीमा १५ अर्ब ५९ करोड रुपैयाँ जम्मा गरेको छ । प्राधिकरणले विद्युत् चुहावटलाई पनि उल्लेख्यरुपमा घटाएको छ। अघिल्लो वर्षको भन्दा ५ दशमलब १३ प्रतिशतले विद्युत् चुहावट घटेको छ । हाल प्राधिकरणको विद्युत् चुहावट १५ दशकमलब १३ प्रतिशत छ । बेचियो बिजुली प्राधिकरणले गत आर्थिक वर्षमा ३ करोड ४७ लाख युनिट अर्थात् ३२ करोड रुपैयाँको विद्युत् निर्यात गरेको छ । पत्रकार सम्मेलनमा ऊर्जामन्त्री पुनले लामो समयदेखि रुग्न अप्पर त्रिशूली-३ ‘ए’ तथा काबेली करिडोर लगायतका उत्पादनतर्फ १, प्रशारणतर्फ ३ र वितरणतर्फ ३४ गरी ३८ वटा रुग्न आयोजना सम्पन्‍न भएको जानकारी दिए। उनले काठमाडौं उपत्यकालाई ताररहित बनाउने अभियान अन्तर्गत भूमिगत तार बिछ्याउने काम छिट्टै सुरु गरिने बताए। विद्युत् चुहावटमा कमी ल्याउँदै प्रभावकारी सेवा विस्तार लगायतका सुधार गर्दै अघि बढेको प्राधिकरणले भविष्यमा थप नाफा आर्जन गर्ने प्रक्षेपण गरिएको छ।

काठमाडौंः  भारतीय क्रिकेट टिमका कप्तान विराट कोहलीले एक नयाँ कीर्तिमान बनाएका छन् । उनले वेस्ट इन्डिजविरुद्ध वान डे क्रिकेटमा सर्बाधिक रन बनाउने क्रिकेटरको कीर्तिमान बनाएका हुन् । कोहलीले आज १९ रन पूरा गरेसँगै यो उपलब्धि हासिल गरे । यो उपलब्धि हासिल गरेसँगै उनले पाकिस्तानका पूर्व क्रिकेटर जावेद मियादादको २६ वर्ष पूरानो कीर्तिमान भंग गर्न सफल भएका छन् । वान डेमा मियाँदादले वेस्ट इन्डिजविरुद्ध ६४ खेलमा १९३० रन बनाएका थिए । विराटले भने वेस्ट इन्डिजविरुद्ध ३५ खेलमै १९३० रन बनाए ।

काठमाडौं ।  त्रिभुवन विश्वविद्यालयले त्रिविअन्तर्गत डिन कार्यालयबाट सम्बन्धन लिएर शैक्षिक कार्यक्रम सञ्चालन गरेका कलेजमा पनि पूर्ण छात्रवृत्ति लागू हुने भएको छ। यस अघि त्रिविले आंगिक तथा सम्बन्धन प्राप्त क्याम्पसहरूमा १० प्रतिशत विद्यार्थीलाई मात्र अनिवार्य रुपमा निशुल्क छात्रवृत्ति दिदै आएको थियाे। नेपाल विद्यार्थी संघका निवर्तमान महामन्त्री कुन्दनराज काफ्लेको नेतृत्वमा त्रिवि नेतृत्वसँग आइतबार भएको वार्तापश्चात अब डिन कार्यालयबाट सम्बन्धन लिएर शैक्षिक कार्याक्रम सञ्चालन गर्ने कलेजहरूमा पनि लागू हुने निश्चित भएको हो। साउन १३ गते काफ्लेकै नेतृत्वको समूहले त्रिवि उपकुलपति डा.तीर्थ खनियाँलाई ज्ञापनपत्र बुझाई छात्रवृत्ति प्रभावकारी बनाउन दवाव दिएको थियो। नेविसंघले अघि सारेका माग पूरा गर्न त्रिविले गठन गरेको वार्ता समितिले नेविसंघसँग वार्ता गरेको थियो। वार्तामा दुवै पक्षबीच ५ बुँदे सहमति भएको छ। जसअनुसार अब डिन कार्यालयबाट सम्बन्धन लिने कलेजले सञ्चालन गरेका महँगा कोर्समा पनि १० प्रतिशत विद्यार्थीलाई निशुल्क छात्रवृत्ति दिइनेछ। नेविसंघ निवर्तमान महामन्त्री कुन्दनराज काफ्लेले त्रिविसँगको सम्झौता ऐतिहासिक भएको बताए। ‘छात्रवृत्तिको व्यवस्था कार्यान्वयन नै भइरहेको थिएन। यो सहमतिले सबैतिर निशुल्क छात्रवृत्ति लागु गर्न र महँगा कोर्समा पनि १० प्रतिशत छात्रवृत्ति दिलाउन बाटो खुलेको छ’, काफ्लेले भने। उनले सहमति कार्यान्वयन भएमा आर्थिक अभावका कारण महँगो कोर्स पढ्न नसक्ने जेहन्दार विद्यार्थी लाभान्वित हुने बताए। सहमतिमा त्रिविका तर्फबाट वार्ता समिति संयोजक गंगाबहादुर थापा र सदस्यहरूले हस्ताक्षर गरेका छन्। यस्तै नेविसंघका तर्फबाट निमा गिरी, हरि आचार्य, दीपक ओझा, योगेन्द्र रावल, विष्णुहरि खड्का र सन्तोष श्रेष्ठले हस्ताक्षर गरेका छन्। नेविसंघ नेता दिपक ओझाले सहमतिका कारण बिबिए, बिएचमए, बिएसडब्लु, एमबिए, बीआइएम, बिबिएम जस्ता तुलनात्मक रुपमा बढी शुल्क लाग्ने कोर्स पढाई हुने कलेजमा पनि १० प्रतिशत विद्यार्थीले निशुल्क पढ्न पाउने बताए। ५ बुँदे सहमतिपत्रमा त्रिविअन्तर्गत दिइने छात्रवृत्तिको संख्या बढाउने, छात्रवृत्ति कार्यान्वयन गर्न प्रभावकारी अनुगमन गर्ने तथा निशुल्क छात्रवृत्ति पाउने विद्यार्थीलाई रजिष्ट्रेसन, लाइब्रेरी, ल्याब लगायतको शीर्षकमा कुल शुल्कको ५ प्रतिशतभन्दा बढी रकम लिन नपाइने लगायतका विषय समेटिएका छन्।