काठमाडौं, फागुन २४ । सशस्त्र प्रहरी बल नेपालमा साधारण समूहअन्तर्गत रिक्त रहेका तीन हजार २९७ जनाको लागि नयाँ भर्ना खुुलेको छ । शुक्रबार सार्वजनिक सूचना जारी गर्दै सशस्‍त्र प्रहरी जवान पदमा आवेदन खुला भएको हो । सशस्त्र प्रहरी बलले आवेदन दिन एक महिनाको अवधि अर्थात् २४ फागुनदिख २५ चैत २०७५ सम्मको समय तोकिएको छ। आवेदन दिनको लागि ५५ स्थान तोकिएको छ भने ३ बैशाख २०७६ मा परीक्षा संचालन गर्ने सार्वजनिक सूचनामा उल्लेख गरिएको छ। आवेदन दिनको लागि कम्तीमा आठ कक्षा उत्तीर्ण, पुरुष पाँच फिट दुई इन्च र महिला पाँच फिट हुनु पर्नेछ। पुरुषको लागि न्यूनतम ५० केजी र महिलाको लागि न्यूनतम ४२ केजी तौल अनिवार्य हुनु पर्ने छ। विस्तृत जानकारीका लागि हेर्नुस् सूचना

काठमाडौं, फागुन २३ । नेपाल राष्ट्र बैंकको बालुवाटार भवनको ठेक्का पप्पु कन्स्ट्रक्सनले नपाउने भएको छ । राष्ट्रिय पुनर्निर्माण प्राधिकरणको केन्द्रीय आयोजना कार्यान्वयन इकाई (भवन) ले कम प्रस्ताव गर्नेमध्ये दोस्रो रहेको सिको समानान्तर जेभीलाई ठेक्का दिन लागेको हो । उक्त कम्पनीको प्रस्तावित ठेक्का रकम मूल्य अभिवृद्धि करबाहेक १ अर्ब ८६ करोड २२ लाख ७१ हजार छ । इकाईले असारमा भवन निर्माणका लागि टेन्डर आह्वान गरेकामा सबभन्दा कम दररेट प्रस्ताव गरेको पप्पुले असोजमा ठेक्का पाउने निश्चित थियो । तर, विवादित कम्पनीलाई दिन लागिएको भन्दै आलोचना भएपछि निर्णय रोकिएको थियो । त्यसपछि प्राधिकरणले आवश्यक निर्णयका लागि प्रधानमन्त्री कार्यालय पठाएकोमा ६ महिनापछि बल्ल टुंगो लागेको हो । इकाइले फागुन १६ गते गोरखापत्रमा प्रकाशित गरेको सिको समानान्तरको ठेक्का स्वीकृत गर्ने ७ दिने आशयको सूचनाको म्याद बिहीबार सकिएको छ ।

लम्की, फागुन २३ । चितुवाको आक्रमणबाट कैलालीमा एक प्रहरी घाइते भएका छन् । आज बिहान कैलालीको टीकापुर–१ ब्लक नं ९ खड्ग मेमोरियल बोर्डिङ स्कूल नजीक चितुवाले आक्रमण गर्दा इलाका प्रहरी कार्यालय टीकापुरमा कार्यरत प्रहरी जवान देवीभक्त धिताल घाइते भएका हुन् । घाइते जवानको टीकापुर अस्पतालमा उपचार भइरहेको छ । घाइते धिताल खतरामुक्त रहेको अस्पतालले जनाएको छ । धिताललाई चितुवाले घाँटीको अघि र पछि, हात र ढाडमा गरी चार ठाउँमा चोट पुर्याएको इलाका प्रहरी कार्यालय टीकापुरका प्रमुख प्रहरी नायब उपरीक्षक शिवबहादुर सिंहले बताए ।

काठमाडौं, फागुन १८ । भारत विरुद्धको एकदिवसीय सिरिजको पहिलो खेलमा अष्ट्रेलियाले खराब शुरुवात गरेको छ । टस जितेर ब्याटिङ रोजेको अष्ट्रेलियाले खाता नखोल्दै विकेट गुमाएको छ । उसले कप्तान आरोन फिंचलाई शून्य रनमा गुमाएको हो । उनलाई जसप्रित बुमराहले आउट गरे । खेल भारतको हैदरावादमा भइरहेको हो । यसअघि, अष्ट्रेलियाले भारतसँगको २ टी- २० सिरिज सिजतेकाले वान डेमा पनि आफ्नो शानदार प्रदर्शन कायम राख्न चाहन्छ । यस्तै, भारत टी २० मा बेहोरेको हारको बदला लिन चाहन्छ ।

काठमाडौं, फागुन १८ । पूर्वराष्ट्रपति डा. रामवरण यादवले देशमा इमान्दार नेताहरु नभएको बताएका छन् । उनले मनमोहन अधिकारी, कृष्णप्रसाद भट्टराई, बीपी कोइरालाजस्ता नेताहरु कोही भए आफूलाई देखाइदिन पनि चुनौती दिए । शनिबार डिल्लीबजार बहुमुखी क्याम्पसको ३९ औंँ वार्षिकोत्सव कार्यक्रममा बोल्दै पूर्वराष्ट्रपति यादवले ठेकेदार र पैसा लिएर सांसद बनाउने काम भैरहेकाले देशमा इमान्दार राजनीति गर्नेहरुको अभाव रहेको बताए । उनले राजनीति ठिक नभएकाले देशको शैक्षिक क्षेत्रको पनि उचित विकास हुन नसकेको पनि स्पष्ट पारे । पूर्वराष्ट्रपति यादवले देशको भूगोल सुहाउँदो शिक्षाको आवश्यक्तामा पनि जोड दिए । उनले विज्ञहरुको सुझाव लिएर मुलुकको शिक्षा क्षेत्रको उचित विकासमा सरकारले आवश्यक कदम चाल्नुपर्ने पनि बताए ।

काठमाडौं, फागुन १८ । बंगालदेश विरुद्धको टेस्ट सिरिजको पहिलो खेलको पहिलो इनिङमा न्यूजिल्याण्डले ७१५ रन बनाएको छ । ६ वकेटको क्षतिमा न्यूजिल्याण्डले ७१५ रन बनाउँदै पहिलो इनिङ समाप्त गर्यो । उसका दुई ब्याट्सम्यानले शतक, एकजनाले नटआउट दोहोरो शतक र २ खेलाडीले अर्धशतक प्रहार गरे । न्यूजिल्याण्डका लागि कप्तान केन विलियम्सनले नटआउट २००, टम लाथमले १६१, जीत रावलले १३२, कोलिन डे ग्रेण्डहोमले नटआउट ७६, हेनरी निकोल्सले ५३, नील बैगररले ४७, डीजे वाट्लिङले ३१ र रोस टेलरले ४ रन बनाए । बलिङमा बंगलादेशका सौम्य सरकार, मेहदी हसन मिराजले दुईदुई, मोहमदल्लाह र इबोटोट होसैन चौधरीले एकएक विकेट लिए । यसअघि, टस हारेर ब्याटिङको मौका पाएको बंगलादेश पहिलो इनिङमा २३४ रनमै अलआउट भयो । उसका लागि तमिम इग्बालले १२६ रन जोड्नु बाहेक अन्य ब्याट्सम्यानको प्रदर्शन सन्तोषजनक रहेन । बलिङमा न्यूजिल्याण्डका नील बैगररले ५, टिम साउथीले ३, ट्रेन्ट बोल्ट र कोलिन डे ग्रेण्डहोमले एकएक विकेट लिए ।

बागलुङ, फागुन १८ । बागलुङको बडिगाड गाउँपालिका–१० दर्लिङ्गमा घरायसी विवाद हुँदा श्रीमानले प्रहार गरेको गोली लागेर श्रीमती घाईते भएकी छन्। साविकको दर्लिङ्ग–७ पात्ले कटरियाका ३५ वर्षीय चन्द्रबहादुर घर्तीले प्रहार गरेको भरुवा बन्दुकको छर्रा लाग्दा उनकी २५ वर्षीय श्रीमती बालकुमार घर्ती घाईते भएकी हुन्। कम्मरको भागमा छर्रा लागेर घाइते भएकी घर्तीलाई मोटर बाटोमा हिँउ जमेको कारण उद्धारमा समस्या भएको जिल्ला प्रहरी कार्यालय बागलुङका प्रहरी नायव उपरीक्षक (डिएसपी) चिरञ्जिवी कोईरालले जानकारी दिए । विहीबार मापद पदार्थ सेवन (मापसे) गरी घरमा आएका चन्द्रबहादुरले तरकारी ढिलो पकाएको भन्दै झगडा निकालेपछि भनाभन हुँदा उत्तेजनामा आएर बन्दुक प्रहार गरेको घाईते बालकुमारीले प्रहरीसँग बयान दिएकी छन्। बन्दु प्रहार गर्ने चन्द्रबहादुर फरार रहेका प्रहरी नायव निरीक्षक भोजबहादुर बानियाँले जानकारी दिए । प्रहरीले भरुवा बन्दुक नियन्त्रणमा लिएको छ। बन्दुकको लाईसेन्स समेत नभएको प्रहरी नायव निरीक्षक बानियाँको भनाई छ।  यो समाचार राजधानी दैनिकबाट लिइएको हो ।

काठमाडौं, फागुन १७ । प्रधानमन्त्री केपी ओलीले वाइडबडी खरिद प्रक्रियामा हेलिकोप्टर दुर्घटनामा ज्यान गुमाएका रवीन्द्र अधिकारीलाई मुछ्नु दुखद् भएको बताएका छन् । अधिकारीको शोक प्रस्ताव पारित गर्न नेकपा संसदीय दलको शुक्रबार बसेको बैठकमा प्रधानमन्त्री ओलीले अधिकारीसँग सरोकार नै नभएको वाइडबडीको विषय जोडेर केही तत्वले बदनाम गर्न खोजेको बताए । ‘यतिबेला अरु धेरै कुरा त केही भन्न चाहन्न अत्यन्तै अनुचित ढंगले उहाँको कुनै सरोकार नभएको विषय वाइडबडीको सन्दर्भमा जोडेर केही तत्वहरुले बद्नाम गर्न खोजे जो सम्पूर्ण रुपमा निराधार कुरा हो’ उनले भने, ‘उनले कुनै लोभलालचका लागि होइन र उहाँले वाइडबडीमा आफूले केही गरेको पनि छैन त्यो वाइडबडी उहाँ मन्त्री हुनभन्दा पहिलेको कुरा हो ।’ वाइडबडीमा रविन्द्र अधिकारीलाई आरोप लगाउनु दुखद भएको भन्दै प्रधानमन्त्री ओलीले अगाडि भनेका छन्, ‘मलाई दुःख लाग्छ कि उहाँजस्तो कर्मठ, क्रियाशील मानिसलाई अनुचित ढंगले, त्यस प्रकारले आरोप लाञ्छना लगाउने र अपमान गर्ने कामहरु पनि भयो । मन्त्री अधिकारीले नागरिक उडड्यनको क्षेत्रमा देखिने गरी असाधरण काम गरेको उनले दाबी गरे ।’ छ वटा विमास्थलमा रात्रि उडान सञ्चालन गर्ने, धनगढी, विराटनगर र चन्द्रगढी विमानस्थलको काम अघि बढाउने कुरा अधिकारीकै सक्रियतामा भएको प्रधानमन्त्री ओलीले स्पष्ट पारे ।

काठमाडौँ, फागुन । बिना हिचकिचाहट प्रत्येक महिला तथा किशोरीले आफ्नो शरीर, जीवन र भविष्यको बारेमा आत्मनिर्णय गर्ने अधिकार (सी डिसाइडस) विश्वव्यापी अभियान नेपालमा शुक्रबारबाट औपचारिकरूपमा सुरु गरिने भएको छ । वियोङ्ग बेइजिङ कमिटि (बीबीसी) नामक संस्थाको संयोजकत्वमा नेपालमा उक्त अभियान सुरू गर्न लागिएको हो । सी डिसाइडस्ले एसिया प्रशान्त क्षेत्रका अभियान्तासहितको सहभागितामा काठमाडौँमा शुक्रबार र शनिबार यस अभियानका बारेमा चेतना जगाउने कार्यक्रमको आयोजना गरिनेछ । अभियानका अवसरमा २५ देशका २५ वर्ष उमेर पुगेका २५ जना युवाको अवस्था पनि सार्वजानिक गरिनेछ । वीबीसीका अध्यक्ष शान्ता श्रेष्ठले नेपाली महिला वा किशोरीको शरीर र जीवन अधिकारको सुनिश्चित गर्न सहयोग पुगोस् भन्ने उद्देश्यले नेपालमा उक्त अभियानको थालनी गर्न लागिएको जानकारी दिए ।

काठमाडौं, फागुन १६ । ताप्लेजुङको फुङलिङ नगरपालिका–१० सिस्नेखोलानजिक हेलिकोप्टर दुर्घटना हुँदा संस्कृति, पर्यटन तथा नागरिक उड्डयनमन्त्री रवीन्द्र अधिकारीसहित सबै सातजनाको निधन भएको छ । तेह्रथुमको चौहानडाँडामा विमानस्थलको सम्भाव्यता अध्ययन गरेर फर्किने क्रममा एयर डाइनेस्टी हेली सर्भिसको ‘९एन–एएमआई (एएस ३५०–बी३ई)’ हेलिकोप्टर दुर्घटनामा परेको हो । मन्त्री भएपछि रवीन्द्र अधिकारीका मुख्य उपलब्धि  १. मन्टियल सन्धि संसद्बाट पास गरी कार्यान्वयनमा ल्याए । यसले अन्तर्राष्ट्रिय हवाई दुर्घटनामा नेपालको बिमा २० लाख रुपैयाँबाट डेढ करोडभन्दा माथि पुग्यो। २. राष्ट्रिय गौरवका रूपमा घोषित भैरहवा, पोखरा, निजगढ विमानस्थल निर्माणमा तीव्रता, अल्झन फुकाउने काममा उनको सक्रियता विशेष थियो। ३. उनको कार्यकाल अवधिमा नेपालमा सर्वाधिक पर्यटक नेपाल भित्रिए, सन् २०१८ मा ११ लाख ७३ हजार ३२ जना पर्यटक नेपाल आए । ४. नेपाल भ्रमण वर्ष २०२० को आधार तयार पार्ने काम गरे । पर्यटन व्यवसायीमा आत्मविश्वास बढाउन उनको ठूलो भूमिका छ । ५. त्रिभुवन अन्तर्राष्ट्रिय विमानस्थललाई २१ घन्टा सञ्चालन, त्रिभुवन विमानस्थलको स्तरोन्नतिमा रहेका गाँठा फुकाउन सहजीकरण गरे। ६. धनगढी र चन्द्रगढी विमानस्थलमा रात्रिकालीन उडान सुरु गरे । आन्तरिक नेपाली वायुसेवा कम्पनीले रात्रिकालीन विमान उपत्यकाबाहिर बस्ने गरी काम सुरु गरे । यसले त्रिभुवन विमानस्थलको चाप घटाउन भूमिका खेलेको छ। यो खबर  नयाँ पत्रिका दैनिकबाट लिइएको छ ।

काठमाडौँ, फागुन १५ । मन्त्रीपरिषदको आकस्मिक बैठकले पर्यटनमन्त्री रविन्द्र अधिकारीको निधनमा भोलि बिहिबार राष्ट्रिय शोकको घोषणा गरेको छ । ताप्लेजुङ हेलिकप्टर दुर्घटनापछि बसेको मन्त्रिपरिषद्को आकस्मिक बैठकले मन्त्री अधिकारीको निधनको शोकमा भोलि राष्ट्रिय शोक मनाउने घोषणा गरेको हो । भोलि देशभर र विदेशस्थित कूटनीतिक नियोगहरुमा सार्वजनिक विदा दिइनेछ । प्रधानमन्त्री निवास बालुवाटारमा बसेको आकस्मिक बैठकले भोलि (बिहीबार) सार्वजनिक विदा दिने निर्णय गरेको हो। पाथिभरा जाँदा त्यो हेलिकप्टरमा संस्कृति पर्यटन तथा नागरिक उडड्यनमन्त्री रवीन्द्र अधिकारी पनि सवार थिए। मन्त्रीसहित हेलिकोप्टरमा पर्यटन व्यवसायी आङछिरङ शेर्पा, प्रधानमन्त्रीका स्वकीय सचिव युवराज दाहाल, अर्जुन गुरुङ लगायतको बुधबार निधन भएको हो।  

काठमाडौं, फागुन १५ । नेपाली क्रिकेट टोलीका महत्वपूर्ण सदस्य सन्दीप लामिछानेको टोली लाहोर कलन्दर्सले आज पाकिस्तान सुपर लिग (पीएसएल) मा आज क्युटा ग्लाडिएटर्सविरुद्ध खेल्दै छ । यूएईको दुबई अन्तर्राष्ट्रिय क्रिकेट रंगशालामा लोहोरले ग्लाडिएटर्ससँग आफ्नो दोस्रो खेलमा प्रतिस्पर्धा गर्न लागेको हो । खेल नेपाली समयअनुसार ५ः१५ बजेदेखि सुरु हुनेछ । पीएसएलमा यसअघि यी दुई टिमबीच भएको खेलमा ग्लाडिएटर्सले लाहोरलाई तीन विकेटले पराजित गरेको थियो । आफ्नो पहिलो खेलमा ब्यहोरेको हारलाई बदला लिने दाउमा लाहोर छ । क्युटा ग्लाडिएटर्स भने आफ्नो जितलाई निरन्तरता दिने लक्ष्यमा छ । सन्दीप प्लेइङ इलाभेनमा पर्न सके यो उनको लागि तेस्रो खेल हुनेछ । यसअघि उनले आफ्नो क्लबबाट दुई खेल खेलेका छन् । सन्दीपले पाकिस्ताज सुपर लिगमा २ खेलमा ४ विकेट लिएका छन् । लाहोर कलन्दर्स टोलीः एवि डी विलियर्स (कप्तान), कार्लोस ब्रेथवेट, कोरी एण्डरसन, अन्टोन डेभिच, फकर जमान, हसन अली, मोहम्मद इमरान, शाहिन शाह अफ्रीदी, ब्रेण्डम टेलर, यासिर शाहलगायत नाम चलेका खेलाडी छन् । ग्लेडियेटर्स टोलीः सरफराज अहमद (कप्तान), शेन वाट्सन, डिजे ब्राबो, मोहम्मद अश्गर, मोहम्मद इरफान, मोहम्मद नवाज, सोहिल तनवीर, उमर अकमल, ड्वेन स्मिथ, रिली रोसौउलगायत नाम चलेका खेलाडी छन् ।  

काठमाडौं, माघ २८ । अष्ट्रेलियमा जारी बिग ब्यास लिग (बीबीएल) अन्तर्गत मेलबर्न स्टार्सबाट खेलिरहेका नेपाली लेग स्पिनर सन्दीप लामिछानेले सिड्नी विरुद्धको खेलमा शानदार प्रदर्शन गरेका छन् । उनले आफ्नो तेस्रो ओभरमा पनि विकेट लिन सफल भएका छन् । सन्दीपले आफ्नो तेस्रो ओभरको ४ बलमा बेन वार्सहुसिजलाई आउट गरे । यसअघि, सन्दीपले आफ्नो पहिलो ओभरको पाँचौ बलमा नै विकेट लिन सफल भएका थिए । योसँगै सिड्नीको आठौं विकेट पतन भइसकेको छ । यो समाचार तयार पार्दासम्म सिड्नीले १२ ओभको खेल सकिदा ८ विकेट गुमाउँदै ६५ रन बनाएको छ ।

काठमाडौँ, माघ २७ गते । महासमितिबाट पारित भएका कतिपय विषयलाई विधानमा समावेश नगरिएपछि नेपाली काँग्रेसभित्र मतभिन्नता बढेको छ । महासमितिको बैठक सकिएको डेढ महिनाभन्दा पनि बढी समय हुँदा पनि नयाँ विधान लागू हुन सकेको छैन । गएको पुस ८ गते महासमितिको बैठक सकिए पनि कांग्रेसले विधानलाई अझै अन्तिमरूप दिन सकेको छैन । सभापतिदेखि केन्द्रीय सदस्यसम्म सबै बुथकमिटिबाटै निर्वाचित भएर आउनुपर्ने र सरकारी तथा पार्टीको पदमा आरक्षणको अवसर एकपटक मात्रै दिनुपर्ने भन्ने मुख्य विवादको विषय बनेको छ ।  कांग्रेसका पूर्वमहामन्त्री तारानाथ रानाभाटले भन्नुभयो, ‘‘महासमितिको बैठकबाट पारित भएका प्रस्तावलाई केन्द्रीय कार्यसमितिको बैठकले थप्न, काट्न र घटाउन सक्दैन । काटेर उल्टाउने अनुमति पनि छैन । परिमार्जन मात्रै गर्न सक्छ । सदस्यहरूका भावनामा तलमाथि नहुने गरी परिमार्जन गर्ने अधिकार कार्यसमितिलाई दिएको छ ।’’ उहाँका अनुसार महासमितिको बैठकमा अधिकाँश सदस्यले नेपाललाई हिन्दु राष्ट्र हुनुपर्छ भनेर हस्ताक्षर नै गरेर नेतृत्वलाई बुझाएका थिए । त्यसलाई विधानमा समावेश गर्ने कुरा उत्सुकताको विषय भएको उहाँले बताउनुभयो ।  केन्द्रीय सदस्य डा. शेखर कोइरालाले सभापतिदेखि केन्द्रीय सदस्यसम्म बुथकमिटिबाटै निर्वाचित भएर आउनुपर्छ र समावेशीको अवसर एकपटक मात्रै हुनुपर्छ भन्ने विषयलाई केन्द्रीय समितिले पारित नगरेको, तर महासमितिको बैठकले प्रस्तावलाई पारित गरेको बताउनुभयो । ‘‘महासमिति बैठकमा बोल्दै सभापति शेरबहादुर देउवा र वरिष्ठ नेता रामचन्द्र पौडेलले समेत यी दुई विषयलाई विधानमा समावेश गर्ने प्रतिबद्धता व्यक्त गर्नुभएको हो” उहाँले भन्नुभयो, “महासमितिले पारित गरेका विषयलाई केन्द्रीय कार्यसमितिले परिवर्तन गर्ने कुरा महासमितिलाई म्यान्डेड छैन ।’’  अर्का केन्द्रीय सदस्य मानबहादुर विश्वकर्माले भने आरक्षणबाट एक दुईपटक मात्रै सरकारी पद र केन्द्रीय समितिमा आउन दिनुपर्ने, त्योभन्दा बढी दिनु हुँदैन भन्ने कुरा ठीक नभएको, आठवटा समूहबाट आरक्षणको व्यवस्था भएपछि सबै वर्ग र समूहको प्रतिनिधित्व भइसकेपछि ‘खुला’ भनेर राख्नु नपर्ने तर्क गर्नुभयो । उहाँले पार्टीको कार्यसम्पादन समिति र संसदीय बोर्डमा अनुभवी नहुने तथा पहिलोपटक आउनेले कसरी सही निर्णय गर्न सक्छ भनी प्रतिप्रश्न गर्नुभयो । नेता विश्वकर्माले धनुषा, सिन्धुली, सिन्धुपाल्चोक, तनहुँ, गोर्खा, स्याङ्जा, रुपन्देही र कञ्चनपुरका जिल्ला सभापतिहरुमात्रै त्यसको पक्षमा रहेको दावी गर्नुभयो ।  नुवाकोटका कांग्रेस जिल्ला सभापति जगदीश्वरनरसिंह के.सी.ले भने यी दुवै विषयमा सबै जिल्ला सभापतिहरुको साझा धारणा रहेको बताउनुभयो । उहाँले हेटौंडामा सम्पन्न जिल्ला सभापतिहरूको राष्ट्रिय भेलाले सभापतिदेखि केन्द्रीय सदस्य सबै बुधकमिटिबाट निर्वाचित भएर आउनुपर्ने र आरक्षण पटक पटक एकै व्यक्तिलाई दिन नहुने प्रस्ताव पारित गरेको बताउनुभयो । जिल्ला सभापतिहरूको राष्ट्रिय भेलाले पारित गरेको प्रस्तावकै आधारमा पार्टीका महामन्त्री पूर्णबहादुर खड्काको संयोजकत्वमा गठित विधान मस्यौदा समितिले ती विषयलाई विधानमा समावेश गरेको थियो । त्यति मात्र होइन महासमितिको बैठक बस्नुअघि नुवाकोटको ककनीमा बसेको जिल्ला सभापतिहरूको बैठकले ती दुई विषयलाई विधान मस्यौदामा समावेश गरेकोमा मस्यौदा समितिलाई धन्यवाद दिँदै २४ बुँदै प्रस्ताव पारित गरेको थियो ।  महासमिति बैठकमा तीनै विषयमा तनाव र मतभेद भएपछि सभापति देउवा र वरिष्ठ नेता पौडेलले ती दुवै विषयलाई समावेश गर्ने प्रतिबद्धता जनाउनुभएपछि बैठक सौहाद्र्ध वातावरणमा समापन भएको भनाइ महासमिति सदस्यहरूको छ । सभापतिदेखि केन्द्रीय सदस्यसम्म सबै बुथ कमिटिबाटै निर्वाचित भएर आउँदा अहिलेको जस्तो गुटबन्दी नहुने, नेताहरु तल्लो तहसम्म जिम्मेवार हुने र केही नेताको चाकडी गरेर ठूलो पदमा पुग्ने अभियानको अन्त्य हुने भनाइ कतिपय नेताको छ । याे समाचार गाेरखापत्र दैनिकमा नारद गाैतमले लेखेका छन् ।

राष्ट्रिय क्रिकेट टोलीका प्रशिक्षक जगत टमाटाले अन्तर्राष्ट्रिय क्रिकेट परिषद् आइसीसीले शनिवार पठाएको दुई वर्षको तलब स्वीकार नगर्ने बताएका छन्। खेलाडीहरूको वर्गीकरणका बेला तीन वर्षअघि नेपाल क्रिकेट संघ क्यान र प्रशिक्षक टमाटाबीच तलबबारे सम्झौता हुन लागेको थियो। प्रशिक्षक टमाटाका अनुसार मासिक ५० देखि ७० हजार रुपैयाँमा सम्झौता हुन लागेकै बेला क्यान भङ्ग भएको थियो। उनले भने, “मौखिक कुराकानी भइरहेकै बेला क्यान निलम्बनमा पर्‍यो । जसका कारण मैले तलब सम्झौतामा हस्ताक्षर गरेको छैन।” अहिले आइसीसीले उनलाई मासिक १५ हजारको दरले तलब पठाइदिएको बताइएको छ। जुन ग वर्गका खेलाडीहरूलाई दिने पारिश्रमिक हो। जसमा उनले असन्तुष्टि व्यक्त गरेका हुन्। खेलाडीबाहेक क्यानका व्यवस्थापक तथा प्राविधिक विश्लेषक रमण शिवाकोटीले पनि मासिक १५ हजार रुपैयाँको दरले दुई वर्षको तलब पाउनेछन्। पारसलाई एकमुष्ठ साढे आठ लाख राष्ट्रिय टोलीका कप्तान पारस खड्काले रोकिएको दुई वर्षको तलबका रूपमा एकमुष्ठ आठ लाख ४० हजार रुपैयाँ प्राप्त गर्ने भएका छन्। अन्तर्राष्ट्रिय क्रिकेट परिषद् आइसीसीले शनिवार मात्र रकम पठाएपछि उनीसहित क वर्गमा परेका सात खेलाडीले मासिक ३५ हजारको रूपमा २४ महिनाको तलब पाउने भएका हुन्। क वर्गमा उनीसहित उपकप्तान ज्ञानेन्द्र मल्ल, शरद भेषावकर, बसन्त रेग्मी, सोमपाल कामी, सन्दीप लामिछाने र दिपेन्द्र सिंह ऐरी छन्। दुई वर्षदेखि तलब नपाएका खेलाडीहरूको रकम अन्तर्राष्ट्रिय क्रिकेट परिषद् आइसीसीले शनिवार राष्ट्रिय खेलकुद परिषद्लाई पठाएको परिषद्ले जनाएको छ। विगत २ वर्षदेखि रोक्का राख्दै आएको खेलाडीहरुको मासिक तलब युएई भ्रमणमा पाएको सफलता लगत्तै पठाइदिएको हो। क, ख र ग गरी तीन श्रेणीमा राष्ट्रिय खेलाडीहरूलाई वर्गीकरण गरिएको छ। प्रत्येक समूहमा सात सात गरी २१ खेलाडीहरूले तलब पाउनेछन्। जसमा क वर्गमा परेका खेलाडीले मासिक ३५ हजार, समूह बी का खेलाडीले २५ हजार र समूह सीका खेलाडीले १५ हजार पाउने व्यवस्था छ। समूह बी मा शक्ति गौचन, करण केसी, रोहित पौडेल, आरिफ शेख, ललितनारायण राजवंशी, अनिल शाह र ललित भण्डारी छन्। त्यस्तै समूह सी मा विनोद भण्डारी, सागर पुन, सुनिल धमला, प्रदिप ऐरी, सुवास खकुरेल, दिलिप नाथ र सुशन भारी छन्। पहल क्यान निलम्बन भएको अवस्थामा राष्ट्रिय खेलकुद परिषद्को पहलमा उक्त रकम निकासा भएको परिषद्का प्रेस सल्लाहकार रोहित दाहालले बताए। उनले भने,”दुई वर्ष बित्न लाग्दा समेत आइसीसीले तलब नपठाएपछि सदस्यसचिवले आइसीसीलाई बारम्बार ताकेता गरिरहनुभएको थियो। बल्ल पठाइदियो। अब बाँडिन्छ। ” युवा खेलाडीहरू वर्गीकरणको सूचीमा पर्ने प्रतीक्षामा छन्। पठाइएको रकम एक करोड २७ लाख ८७ हजार ७ सय ८२ रुपैयाँ रहेको छ। यो वर्ष २०१७ र २०१८ को तलब हो। नयाँ वर्गीकरण आइसीसीले क्यानले गरेको वर्गीकरण अनुसार तलब पठाएको हो। अब वर्ष २०१९ का लागि खेलाडीहरूको नयाँ वर्गीकरण हुने बताइएको छ। जसमा पुराना केही खेलाडीहरू सूचीबाट बाहिरिने छन् भने नयाँ खेलाडीहरू थपिने छन्। सन्न्यास लिइसकेका खेलाडी शक्ति गौचन, सुभाष खकुरेल, सुशन भारी जस्ता खेलाडी बाहिरिने तथा अविनाश बोहोरा, सन्दीप जोरा, पवन सर्राफ, भीम सार्की जस्ता खेलाडी वर्गीकरणमा समावेश हुने प्रशिक्षक टमाटाले बताए। बिबिसीबाट