उमेश बन्जाडे, लमही : लुम्बिनी प्रदेशको चर्चित पर्यटकीय क्षेत्र जखेरा तालमा महाशिवरात्री पर्वको अवसरमा भव्य सांस्कृतिक कार्यक्रम हुने भएको छ । लोक तथा दोहोरी गायिका ज्योति मगरको कार्यक्रममा बेजोड प्रस्तुति रहने आयोजकले जनाएको छ । स्थानीय कला, संकृति र सम्पदाको संरक्षण गर्नका लागि कार्यक्रमको आयोजना गरिएको जखेरा शिवालय धार्मिक पर्यटन विकास प्रतिष्ठानका महासचिव लोकमणि बन्जाडेले जानकारी दिए । हरेक वर्ष शिवरात्री पर्वको अवसरमा जखेरा तालमा लाग्ने मेलाले स्थानीय तथा राष्ट्रिय कलाहरूको सम्बर्द्धन गर्दै लोक संस्कृतिलाई उचाइमा पुर्‍याउन टेवा दिइरहेको ताल संरक्षण समितिका सहअध्यक्ष रविध्वज थापाको भानाइ छ । फागुन २७ गते हुने सांस्कृतिक कार्यक्रममा ज्योती मगरसहित गायक दोषहरण चौधरी, गायिका वसन्ती चौधरी, कार्यक्रम प्रस्तोता अनुप बुढा मगर, मोडेल अभिमान चौधरी तथा डिक्र्यु डान्स ग्रुप र देउखुरी डान्सिङ एण्ड सिङ्गीङ स्टारको सम्पूर्ण टिमले सांस्कृतिक प्रस्तुति गर्ने आयोजकले जनाएको छ ।

काठमाडौं । विश्वमा सबैभन्दा बढी हतियार किन्ने देश कुन होला ? यो खुल्दुली सबैमा हुन्छ । इन्टरनेसनल आम्र्स ट्रान्सफोर्स नामक संस्थाले जारी गरेको पछिल्लो तथ्यांकअनुसार हाम्रो छिमेकी मुलुक भारत हतियार आयात गर्ने मुलुकहरूको सूचीमा पहिलो स्थानमा छ । भारतले सन् २००८ देखि सन् २०१३ सम्म जति हतियार आयात गरेको थियो त्योभन्दा २४ प्रतिशत बढी हतियार सन् २०१३ देखि २०१७ को अवधिमा आयात गरेको छ । हतियार आयात गर्ने मुलुकहरूको यो सूचीमा भारतपछि क्रमशः साउदी अरेबिया, इजिप्ट, युनाइटेड अरब इमिरेट्स, चीन, अस्ट्रेलिया, अल्जेरिया, इराक, पाकिस्तान र इन्डोनेसिया छन् । सन् २०१३ देखि २०१७ को अवधिमा भारतले रुससँग ६२ प्रतिशत, अमेरिकासँग १५ प्रतिशत र इजरायलसँग ११ प्रतिशत हतियार किनेको थियो । यो तथ्यांकअनुसार भारत रूस र इजरायलको सबैभन्दा ठूलो हतियार बजार हो । उक्त प्रतिवेदनअनुसार पछिल्लो १ दशकमा चीन हतियार आयातक मुलुकबाट निर्यातक मुलुकमा स्तरोन्नतिसमेत भएको छ । चीन हतियार निर्यातमा अहिले अमेरिका, रूस, फ्रान्स र जर्मनीपछि पाँचौं स्थानमा छ । चीनका हतियारको ठूला ग्राहक पाकिस्तान र बंगलादेश हुन् ।

सुरेन्द्र बस्नेत, अखिल क्रान्तिकारीका प्रवक्ता हुन् । त्रिभुवन विश्वविद्यालयले फागुन १८ गतेलाई स्वतन्त्र विद्यार्थी युनियन(स्ववियु) चुनावको मिति घोषणा गरेको छ । यसअघि फागुन १४ गतेलाई तोकिएको निर्वाचन विप्लव नेतृत्वको नेपाल कम्युनिष्ट पार्टी र कांग्रेस निकट नेपाल विद्यार्थीसँगको आग्हपछि पाँच दिन सारिएको हो । स्ववियु चुनावकै सेरोफेरोमा रहेर प्रवक्ता बस्नेतसँग एभरेष्टदैनिक डटकमका लागि सागर न्यौपानेले गरेको कुराकानी स्ववियु चुनावको मुखैमा आउनुभयो, व्यापक दौडधुप छ जस्तो छ, कस्तो छ तयारी ? निश्चय नै, आठ वर्ष देखि हुन नसकेको स्ववियु चुनाव मुखमै आएको छ। दौडधुप व्यापक वढेकै छ। एकातिर निर्धारित मितिमा जसरी पनि चुनाव सम्पन्न गराउने चुनौति छ भने अर्कोतिर संगठनलाई अब्बल र सशक्त वनाउनुपर्ने दायित्व छ। त्यसैले स्वाभाविक रुपमा व्यस्तता वढेको छ । चुनावको मिति जति नजिक आउँदैछ, कतिपय क्याम्पसमा तनावपूर्ण स्थिति देखिन थालेको छ किन यस्तो भएको होला ? त्रिभुवन विश्वविद्यालयमा रहेको भागवण्डा प्रणालीका कारणले पनि यस्ता तनावहरु जन्मिने गर्दछन् । खासगरी एउटा अमुक पार्टीवाट अमुक सपथ खाएर आएका त्रिविका पदाधिकारी र क्याम्पस प्रमुखहरुले निष्पक्ष रुपमा कार्यसम्पादन नगर्नाले पनि झडपहरु निम्तिने गरेका छन् । निषेधको राजनीतिक संस्कार पनि हामी कहाँ छ । विचार भन्दा पनि वाहुवलको प्रयोग गर्ने प्रवृत्ति पनि विद्यमान छ।तर आज हाम्रो संगठनको पहलमा ल्याइएको २८ वर्षे उमेरहद सहितको मिश्रित प्रणालीले धेरै हदसम्म यस्ता समस्यालाई न्युनिकरण गर्ने अपेक्षा गरेका छौं ।  तर चुनावकै मुखमा अराजक गतिविधि बढनुको कारण राजनीतिक भागवण्डाका कारण मात्रै होला र ? उमेरका हिसावले विद्यार्थी रगत अलि तातो त हुनेनै भयो । तर विद्यार्थी जगत उतिकै विवेकशील पनि हुन जरुरी छ। विगत वर्षहरु भन्दा त यसपालि धेरै नै कम तनाव देखिन्छ । अहिले ल्याइएको निर्वाचन आचारसंहिताले पनि तनाव न्युनिकरण गरेको छ। यति हुँदाहुँदै पनि छिटपुट अराजकता देखिएको छ । तपाईँहरु प्रचण्ड निकट अखिल क्रान्तिकारीले क्याम्पसहरुमा जित्ने संभावना कत्तिको छ ? आसन्न स्ववियु निर्वाचनमा अखिल (क्रान्तिकारी)पहिलो संगठन वन्नेछ। ऐजेण्डा र विचारका हिसाबले हाम्रो संगठन सदैव अग्रणी छ । हामीले ‘जसको नीति उसको नेतृत्व,नयाँ स्ववियुमा क्रान्तिकारी वर्चस्व’ भन्ने नारा नै दिएका छौं । जसरी राष्ट्रिय राजनीति हामी निकटको माओवादी केन्द्रको ऐजेण्डामा हिडेको छ ठिक त्यसैगरी विद्यार्थी आन्दोलन र स्ववियु पनि हाम्रै ऐजेण्डामा अघि वढेको छ। हाम्रो संगठन अखिल क्रान्तिकारी विद्यार्थी आन्दोलनमा एउटा अलग विचार, विद्रोह र वलिदानको धारा हो । यो शैक्षिक आन्दोलनको एउटा व्राण्ड नै हो। तपाईँहरुकै संगठनभित्र कुरा मिलेको छैन कसरी जित्नुहुन्छ अधिकांश क्याम्पस ? गलत कुरा हो यतिबेला हामी भित्र अभुतपुर्व एकता छ । कुनै विवाद छैन । हामीले एकतावद्ध रुपमा डेढ महिने क्रान्तिकारी जागरण अभियान देभभर चलायौं । एकतावद्ध भएर नै स्ववियु निर्वाचन अभियानको नेतृत्व गर्यौं । एकतावद्ध भएर नै अरु संगठन भन्दा धेरै अगाडि नै सर्वसम्मत रुपमा देशैभरका उम्मेदवार टुङ्गो लगाएका छौं । अन्य संगठनले उम्मेदवार अझै टुंगो लगाएका छैनन् । एउटा मिसन र अभियानमा हिडेपछि अरु सवै कुरा विर्सिएर मिसन पूरा गर्न अहोरात्र खट्नु वास्तवमा क्रान्तिकारीहरुको विशेषता जस्तै भएको छ । उम्मेदवार सर्वसम्मत गरिएको त भन्नुभयो तर, कतिपय क्याम्पसमा तपाईँहरुकै संगठनबीच तनावपूर्ण अबस्था देखिएको छ भन्छन ! एउटा जिवन्त राजनीतिक र वैचारिक संगठनमा अन्तरविरोध त अवश्य हुन्छन् । अन्तरविरोध विनाका संगठनहरु त मृतप्राय हुन्छन्। तर यतिबेला हामी जुन मिसनमा जुटिरहेका छौं , त्यसमा कुनै अन्तरविरोध छैन। निर्णय पुर्व छलफलमा ब्यापकता र निर्णय पश्चात् कार्यान्वयनमा एकरुपता अखिल (क्रान्तिकारी)को मौलिक विशेषता नै हो । २८ वर्षे उमेरहदले तपाईँहरुभित्र उम्मेदवारनै छैनन् भन्ने कुरा साँचो हो ? यो सांचो कुरा हैन । ९५ प्रतिशत भन्दा वढि विद्यार्थी २८ वर्षभन्दा मुनिका हुन्छन् । अनि उम्मेदवार नपाउने भन्ने त प्रश्नै भएन नी । हामीले विद्यार्थीका बीचबाट नै विद्यार्थीको नेता छान्ने प्रणाली स्थापित गर्न लागि यो उमेरहदको कुरा अघि सारेका हौं । हामीसँग एकसेएक उम्मेदवार छन्। विद्यार्थीका नाममा उल्टो विद्यार्थीलाई नै शोषण गरेर वर्षौसम्म कलेजका गेट ढुकेर बस्ने खालका उम्मेदवार चाहिँ अब नपाइने भए। यस्ता उम्मेदवार त नपाइएकै राम्रो हो । नयाँ प्रणालीसँगै अब ठेकेदार मार्काका उम्मेदवार भने अवश्य पाइने छैनन्। विद्यार्थीको नेतृत्व माथिवाट थोपरिने विषय हैन, विद्यार्थीले आफैं छान्ने विषय हो । तपाईँहरुको संगठनलाई एजेण्डा क्रान्तिकारी बोक्ने तर, आफ्नै एजेण्डा बेच्न नसक्ने पनि भन्दा रहेछन् नी साँचो हो ? एजेण्डा वेच्ने नै भन्ने त भएन । तथापि तँपाईको प्रश्नको मर्मसँग म एकहद सम्म सहमत नै छु । शायद तँपाईले भन्न खोजेको कुरा हामीले हाम्रा ऐजेण्डा कतिपय सन्दर्भमा स्थापित गर्न र त्यसको अपनत्व लिन सकेनौं कि भन्ने तर्फ लक्षित भएजस्तो लाग्यो। यो पुर्ण सत्य त अवश्य हैन। तर एकहद सम्म यसमा सत्यताको केही अंश पनि नभएको हैन। उदाहरणका लागि पछिल्लोपटकको शैक्षिक लोनको विषयलाई लिन सकिन्छ । यो विषय हामीले २०६९ साल मंसिर २४ गते तत्कालीन प्रधानमन्त्री डा.बाबुराम भट्टराईलाई बुझाएको मागपत्रको वुँदा नं.५ मा नै छ । त्यसपछि पनि यसको निरन्तर उठान र वहस पैरवी गर्यौं । पछि शिक्षा मन्त्री गिरिराजमणी पोखरेललाई उक्त मागबारे प्रमुखताका साथ ज्ञापनपत्र सहित राख्यौं । उहाँले आफ्नो १८ बुँदे शैक्षिक सुधारको घोषणापत्रमा त्यो विषय राख्नुभयो । र हाम्रो निरन्तरको दवाव र ध्यानाकर्षण सँगै सरकारले त्यस मुद्दालाई सम्बोधन गर्यो। यसरी एउटा लामो श्रृङखलामा शैक्षिक लोनको विषय आएको हो । तर यहाँ एउटा विद्यार्थी संगठनले भोलिपल्ट त्यो विषय संयुक्त सरकारवाट सम्बोधन हुँदै गरेको थाहा पाएपछि अघिल्लो दिन ज्ञापनपत्र पेश गरेकोे नाटक गर्यो । मिडियामा अतिरञ्जनापुर्ण होहल्ला गर्यो। यस्ता कुरा प्रचारमा ल्याउनमा हाम्रो पनि केही कमी भएको साँचो हो राम्रा एजेण्डा उठाएर पनि हामी प्रचार गर्न सक्तैनौं । वास्तवमा मुलुकमा नयाँ संविधान बनाएर शिक्षा ,स्वास्थ्य र रोजगारलाई नागरिकको मौलिक हकको रुपमा ग्यारेन्टी गराउने अभियान पनि हामीले नै चलाएको हो । अरु संगठनहरु नयाँ संविधानको पक्षमा कहिल्यै थिएनन् । अहिले स्ववियुमा २८ वर्षे उमेरहद सहितको मिश्रित निर्वाचन प्रणाली पनि हाम्रै ऐजेण्डा हो । स्ववियु निर्वाचनको क्रममा हामीले ‘सरकार विद्यार्थीको सर्टिफिकेट लेऊ,शैक्षिक लोन र पार्टटाइम जब देऊ’ भन्ने ऐजेण्डालाई प्रमुखताका साथ उठाएका छौं ।

विराटनगर । सार्वजनिक लेखा समितिका सभापति ऋषिकेश पोखरेलले श्रीमती अञ्जला कोइरालालाई अघि सारेर गरेको सहकारी कारोबारमा उन्मुक्ति लिन खोजेका छन् । तथ्यहरूले पोखरेल दम्पतीलाई जवाफदेही बनाउने स्पष्ट भए पनि सरकारले अनुसन्धानमा ढिलाइ गरिरहेको छ । मोरङमा सञ्चालित उमागौरी कृषि सहकारीले आफ्ना ऋणीका लालपुर्जा धितो राखेर रूपन्देहीको आरएसडीसी लघुवित्तबाट ४ करोड २५ लाख ऋण लिएको थियो । थप ३ करोड ऋण लिन अञ्जलासमेतको उपस्थितिमा ०७७ पुस २९ को सञ्चालक समिति बैठकले निर्णय गरेको थियो । त्यसको १३ महिनापछि ०७८ माघ ५ मा अञ्जलाले सञ्चालक समिति सदस्यबाट राजीनामा दिएकी थिइन् । राजीनामा दिएपछि उनले सहकारीको सम्पूर्ण दायित्वबाट उन्मुक्ति लिन खोजेकी छन् । जबकि उनी सञ्चालक सदस्य रहेकै बेला लघुवित्तबाट लिइएको ऋण सहकारीले तिरेको छैन । यसका लागि रूपन्देहीको आरएसडीसी लघुवित्तले कर्जा उठाउन अञ्जलासहित सञ्चालक समितिका सबै सदस्यलाई कालोसूचीमा राखेर सूचना सार्वजनिक गरेको छ । यद्यपि संसद्का लेखा समिति सभापति ऋषिकेश पोखरेलले यो विषयमा आफू र श्रीमतीलाई अनावश्यक रूपमा जोडिएको दाबी गर्दै आइरहेका छन् ।

दाङ । रुसी अक्टोबर क्रान्तिका नायक तथा विश्व कम्युनिस्ट आन्दोलनका महान नेता लेनिनकाे शतवार्षिकीको अवसरमा याे वर्ष देशभर विभिन्न कार्यक्रमहरु भइरहेका छन् । उनका विश्व, कम्युनिस्ट आन्दोलनमा लेनिनले विकास गरेकाे विचार, संघर्ष र  समग्र याेगदानका विषयहरु समेटेर आगामी जनवरीमा समापन गर्नेगरी जनस्तरबाट केन्द्रीयस्तरमा गठित लेनिन स्मृति शतवार्षिकी समितिले राजनधानीमा विभिन्न कार्यक्रमहरु सञ्चालन गर्दै आएको छ भने राजधानी बाहिर पनि कार्यक्रमहरु भइरहेका छन् । साेही अभियान अन्तर्गत आजको सन्दर्भमा लेनिनका योगदान, रुसमा भएको युगान्तकारी अक्टोबर क्रान्ति र प्रतिक्रान्तिका शिक्षाहरु, लेनिनवादको महत्व लगायतका विषयहरुलाई जनस्तरसम्म पुर्याउने उद्देश्य राखेर लेनिन शतवार्षिकी समिति दाङले यही कार्तिक १० गते गर्न लागिरहेकाे वृहत् विचार अन्रतक्रिया कार्यक्रमकाे सम्पूर्ण तयारी अन्तिम चरणमा पुगेकाे लेनिन शतवार्षिकी समिति दाङका संयाेजक प्रमाेद धितालले जनाएका छन् । दाङको घोराहीमा आगामी कार्तिक १० गते ‘लेनिन र आजको समय’ विषयक विचार गोष्ठी हुन  लागेकाे धितालले प्राणमञ्चसँग बताए । लेनिन स्मृति शतवार्षिकी, दाङ आयोजक समितिको आयोजनामा हुने सो कार्यक्रममा सतवार्षिकका केन्द्रीय संयोजक निनू चापागाइँ र सदस्य डा.अमर गिरी मुख्य वक्ताको रुपमा उपस्थित हुनेछन् । कार्यक्रममा आयोजक समितिकै केन्द्रीय सदस्य तथा दाङका संयोजक प्रमोद धितालले पेश गर्ने ‘लेनिन र आजको समय’ शिर्षकको कार्यपत्रमाथि शशिधर भण्डारी, निर्मल आचार्य, डा. शुरामणि बेलबासे, सविन पोख्रेल र गणेश आचार्यले टिप्पणी गर्नेछन् । केन्द्रमा गठित लेनिन स्मृति शतवार्षिकी समितिको केन्द्रीय आयोजक समितिले अन्तराष्ट्रिय लेनिन सेमिनार लगायत विभिन्न कार्यक्रम गरिसकेको छ भने तथा जिल्लाहरुमा गठित आयोजक समितिहरुले यस अघि विभिन्न कार्यक्रमहरु गर्दै आएका छन् । केन्द्रीय स्तरबाहेक पोखरा र दाङमा लेनिन स्मृति शतवार्षिकी आयोजक समितिहरु गठन गरिएका छन् । आयोजकहरुले आगामी जनवरीसम्म थप कार्यक्रम सहित शतवार्षिकी अभियान सम्पन्न गर्ने योजना बनाएका छन् । दाङको घोराहीमा हुने वृहत विचार गोष्ठीमा सक्रिय सहभागीताका लागि सम्पूर्ण समाज रुपान्तरणकारी, प्रगतिशील तथा वामपंथीहरुलाई आयोजक समितिले अनुरोध गरेको छ ।

कञ्चनपुर । प्रकाश दाहाल स्मृति प्रतिष्ठानले कञ्चनपुरको ग्रामीण भेगका विपन्न समुदायका विद्यार्थीलाई विद्यालय पोसाक वितरण गरेको छ। आइतबार प्रतिष्ठानले लालझाडी गाउँपालिकाका विपन्न समुदायका विद्यार्थीलाई विद्यालय पोसाक वितरण गरेको हो। नेकपा माओवादी केन्द्रका युवा नेता प्रकाश दाहालको स्मृतिमा विपन्न समुदायका विद्यार्थीलाई पोसाक वितरण गरिएको हो। नेकपा माओवादी केन्द्रकी नेतृ एवं पूर्वखानेपानीमन्त्री विना मगरको प्रमुख आतिथ्यमा प्रतिष्ठानले लालझाडी–४ जाईस्थित स्वतन्त्र माविका विद्यार्थीलाई युनिफर्म वितरण गरेको लालझाडी गाउँपालिकाका निवर्तमान प्रमुख मदन सेन बडायकले जानकारी दिनुभयो ।  पोशाक वितरण गर्दै पूर्वमन्त्री एवं स्व। प्रकाश दाहालकी पत्नी मगरले प्रकाश दाहाल स्मृति प्रतिष्ठानले यस्तै ग्रामीण भेगका विपन्न समुदायका विद्यार्थीको सामाजिक विकासका क्षेत्रमा काम गर्दै आएको बताउनुभयो । विद्यालय व्यवस्थापन समितिका अध्यक्ष हेमराज रानाले विपन्न समुदायका विद्यार्थीका लागि प्रतिष्ठानले गरेको सहयोगले विद्यार्थीलाई टेवा पुग्ने बताउनुभयो ।

काठमाडौं। संस्कृति, पर्यटन तथा नागरिक उड्ययन मन्त्री हित बहादुर तामाङले नेपालको अर्थतन्त्रको विकासमा पर्यटन क्षेत्र महत्वपूर्ण मेरुदण्ड भएको भन्दै यसको बिकासका लागि राज्य, निजी क्षेत्र र व्यवशायीहरु साझा संकल्पका साथ अघि बढ्नु पर्नेमा जोड दिएका छन् ।  आज काठमाण्डौँमा आयोजित ८ औँ राष्ट्रिय टुरगाईड सम्मेलनलाई संबोधन गर्दै मन्त्री तामाङले नेपालमा पर्यटन व्यवशायलाई सबै पक्ष मिलेर अघि बढेमा माथि पुर्याउन सकिने विस्वास व्यक्त गरे। उहाँले प्रकाशशरण महतले अर्थमन्त्री हुँदा आर्थिक बर्ष ८०/८१ मा लगाएको अतिरिक्त कर सहित विभिन्न करहरु हटाउन आफूले मन्त्री परिषद्मा ठाडो प्रस्ताव लगेको जानकारी दिँदै अर्थमन्त्रीले कर विज्ञहरुसँग छलफल गर्ने भनेकाले पारित भने हुन बाँकी रहेको बताए । पर्यटन ऐन शंसोधनका लागि विधेयक पनि प्रकृयागत रुपमा अघि बढीसकेको जानकारी दिँदै यो छलफल पछि पारित हुने जानकारी दिए।  मन्त्री तामाङले देशमा राजनीतिक स्थीरता नभए सम्म व्यवशायीक , प्रशासनिक वा कुनै पनि क्षेत्रले गति लिन नसक्ने भन्दै दैवको लिला टार्न सकिन्न भने जस्तै सरकार फेरबदलको कुरा अघि बढीरहेकोले यसका बारेमा अहिले केही भन्न नसकिने अवस्था बनेको बताए ।  आफूले पर्यटन क्षेत्रको विकासका लागि निकै महत्व दिएको भन्दै मन्त्री तामाङले राज्यको लगानी गर्न नसकेको, सोचे जति पर्यटक भित्र्याउन नसकिएको र देशले अपेक्षित लाभ लिन पनि नसकेको भन्दै यसबारेमा गंभीर भएर अघि बढ्न उहाँले सबै पक्षलाई अपील गरे ।

काठमाडौं । संघीय संसद्अन्तर्गत प्रतिनिधिसभाको बैठक जारी छ ।बैठकमा उर्जा, जलस्रोत तथा सिंचाईमन्त्री शक्तिबहादुर बस्नेतले ‘जलस्रोत विधेयक, २०८१’ प्रस्तुत गर्ने सम्भावित कार्यसूची छ।  बैठकमा प्रधानमन्त्री पुष्पकमल दाहाल ‘प्रचण्ड’ले राष्ट्रियसभामा उत्पत्ति भएको ‘राज्य व्यवस्था तथा सुशासन समितिको प्रतिवेदनसहितको संवैधानिक परिषद् सम्बन्धी पहिलो संशोधन विधेयक, २०७९’ छलफल र पारितका लागि प्रस्ताव गर्ने कार्यसूची रहेको संसद् सचिवालयले जनाएको छ। 

काठमाडौँ । शुक्रबार संघीय संसद्अन्तर्गत् प्रतिनिधि सभाको बैठक बस्दैछ। बैठक संसद् भवन नयाँ बानेश्वरमा बिहान ११ बजे सुरु हुनेछ । शुक्रबारको बैठकमासमेत विनियोजन विधेयकमाथि छलफल हुनेछ। शुक्रबार विभिन्न मन्त्रालयको बजेटमाथि संसदले छलफल गर्ने कार्यसूची रहेको संघीय संसद सचिवालयले जानकारी गराएको छ । सरकारले गत जेठ १५ गते १८ खर्ब ६० अर्बको बजेट प्रस्तुत गरेको थियो। शुक्रबारको बैठकमा वन तथा वातावरण, खानेपानी, सञ्चार तथा सूचना प्रविधि र संस्कृति, पर्यटन तथा नागरिक उड्डयन मन्त्रालयको बजेटमाथि छलफल हुनेछ।

दैलेख। दैलेखको भैरवी गाउँपालिका–१ जलजलेमा पेट्रोलियम पदार्थ उत्खनन एवं अन्वेषणमा दर्जनौं कामदार एवं प्राविधिक जुटेका छन् । उत्खननका क्रममा दुई सय १८ मिटर ड्रिलिङ भएको छ ।  ड्रिलिङ चार हजार पाँच सय मिटरसम्म गरिने खानी तथा भूगर्भ विभागअन्तर्गतको पेट्रोलियम अन्वेषण परियोजनाका सूचना अधिकारी प्रकाश लुइँटेलले बताए ।  कामदार अहोरात्र खटेका र आलोपालो प्रणाली लागु गरेर काम भइरहेको जानकारी दिँदै उनले आगामी चार महिनाभित्र उत्खनन पूरा गर्ने लक्ष्यका साथ काम भइरहेको बताए । चीन सरकारसँग २०७५ सालमा भएको सम्झौताअनुसार दुई अर्ब ५० करोड रुपैयाँ अनुदानमा अन्वेषण थालिएको हो ।  

चितवन । चितवनको नारायणगढ–मुग्लिन सडकखण्डअन्तर्गत भरतपुर महानगरपालिका–२९ सत्रकिलोमा गएराति चार सवारीसाधन एकै ठाउँमा ठोक्किएका छन् । उक्त दुर्घटनामा एकजनाको मृत्यु भएको छ । २२ जना घाइते भएका छन् । दुर्घटनामा परी अन्दाजी १७ वर्षीय किशोरको मृत्यु भएको छ । उनको परिचय खुल्न सकेको छैन ।  जिल्ला प्रहरी कार्यालय चितवनका प्रवक्ता प्रहरी नायब उपरीक्षक भेषराज रिजालका अनुसार घाइतेमध्य ८ जनाको अवस्था गम्भीर र बाँकीको मध्यम रहेको छ । गएराति साढे १२ बजे काठमाडौंबाट प्युठानतर्फ जाँदै गरेको बा४ख ९०८६ नम्बरको बस, नारायणगढदेखि मुग्लिनतर्फ जाँदै गरेको ना ३ ख ७९१५ नम्बरको ट्रक, काठमाडौंबाट महोत्तरीतर्फ आउँदै गरेको ना ७ ख ३२४८ नम्बरको बस र वीरगञ्जबाट काठमाडौंतर्फ जाँदै गरेको ना६ख ८९६८ नम्बरको बस एकैपटक  ठोक्किएका थिए ।  दुर्घटनापश्चात् राति सडक अवरुद्ध भएको थियो । आज बिहानदेखि सवारी साधन दुईतर्फी सञ्चालनमा ल्याइएको प्रहरी नायब उपरीक्षक रिजालले जानकारी दिए ।  घाइतेमध्ये १८ जनाको इच्छाकामना आधारभूत अस्पताल कुरिन्टारमा तथा चारजनाको चितवन मेडिकल कलेजमा उपचार भइरहेको छ ।

काठमाडौं । संसद् बैठक बस्नुअघि प्रतिपक्षी दलहरू छलफलमा जुटेका छन् । नयाँबानेश्वरस्थित संघीय संसद् भवनमा नेपाली कांग्रेससहित प्रतिपक्षी दलको बैठक बसिरहेको राप्रपाका प्रमुख सचेतक ज्ञानबहादुर शाही (ज्ञानेन्द्र शाही)ले जानकारी दिए।  बैठकमा कांग्रेस सभापति शेरबहादुर देउवा, जसपा नेपालका अध्यक्ष उपेन्द्र यादव, राप्रपा उपाध्यक्ष बुद्धिमान तामाङ, लोसपा अध्यक्ष महन्थ ठाकुरसहितका प्रतिपक्षी दलका नेताहरू सहभागी छन्। सहकारीको रकम अपचलनमा गृहमन्त्री रवि लामिछानेको संलग्नता रहेको र छानबिनका लागि संसदीय समिति गठन गर्नुपर्ने माग गर्दै कांग्रेसले सदन अवरुद्ध गर्दै आएको छ । सोही क्रममा बिहीबार संसद् बैठकमा सत्तापक्ष र प्रतिपक्षी दलका सांसदबीच धकेलाधकेल भएपछि प्रतिपक्षी दलहरू एकठाउँमा उभिएका हुन् । उनीहरूले सभामुख देवराज घिमिरेको भूमिकाप्रति असन्तुष्टि जनाएका छन् । 

काठमाडौं । सत्तारुढ प्रमुख घटक नेकपा (एमाले) का प्रमुख सचेतक महेश बर्तौलाले नेपाली काँग्रेसले संसदलाई मुठभेडमा लैजान चाहेको आरोप लगाएका छन्।  शनिवार काठमाडौंमा आयोजित एक कार्यक्रममा बोल्दै बर्तौलाले संसद अवरोध गर्ने क्रममा बिहीबार कांग्रेसले एमाले अध्यक्षमाथि गरेको दुर्व्यवहार प्रयासले मुठभेडतिर लैजान खोजेको पुष्टि हुने बताए।  'संसदमा हाम्रा श्रद्धेय अध्यक्षमाथि अशिष्ट व्यवहार प्रर्दशन गरे, उदण्ड व्यवहार प्रर्दशन गरे। भिडभाड, दादागिरी र उदण्डताका साथ मुठभेडमा लैजान नेपाली काँग्रेस चाहन्छ भन्ने कुरा त्यो अस्तीको घटनाबाट देखिन्छ,’ बर्तौलाले भने।  कांग्रेसले संसदको वेल घेर्‍यो र नाराबाजी गरेकोमा एमालेलाई कुनै आपत्ति नहुने पनि उनले बताए।  'सरकारको आसनमा आएर उपसभामुखको आसनमा आएर जुन प्रकारको अभद्र, अशिष्ट, अमर्यादित र उदण्ड प्रस्तुति उहाँहरुबाट भयो त्यो संसदीय इतिहासमा एउटा कालो दिनको रुपमा रहन्छ,' उनले भने। प्रमुख सचेतक बर्तौलाले सहकारीको ठगी प्रकरण फौजदारी अभियोग भएकाले त्यसलाई संसदले नभई सरकारी निकायले अनुसन्धान गर्नुपर्ने पनि बताए। 

काठमाडौं । संसद्‍मा जारी अवरोध हटाउन शीर्ष नेताहरू अन्तिम कसरतमा जुटेका छन्। बालुवाटारमा सत्तारूढ र प्रमुख प्रतिपक्षी दलहरूबीच सदनको अवरोध हटाउनेबारे छलफल भइरहेको हो। प्रमुख प्रतिपक्षी नेपाली कांग्रेसले सहकारी ठगी प्रकरणमा उपप्रधान एवं गृहमन्त्री रवि लामिछानेमाथि संसदीय छानबिन समिति माग गर्दै सदन अवरोध गर्दै आएको छ। तर संसदीय छानबिनका लागि सत्तारूढ दलहरू तयार नहुँदा सदन चल्न सकेको छैन।  जारी छलफललाई निष्कर्षमा पुर्याउने प्रयासमा प्रधानमन्त्री प्रचण्ड छन्। उनले सहमति हुने चरणमा छलफल अघि बढेकाले बिहान ११ बजेका लागि बोलाइएको बैठक सहमतिको प्रयासका लागि ४ बजेका लागि सार्न सभामुख देवराज घिमिरेलाई टेलिफोन गरेर भनेका छन् । सोही अनुसार संसद् बैठक सरेको छ ।

काठमाडौं । चितवनमा अज्ञात समूहले एक स्कुल बसमा आगजनी गरेको छ।भरतपुर महानगरपालिका–२० स्थित दद्रेनी पुलनजिक हेभन बोडिङ स्कुलको प्रदेश–०६००१ क ०००४५ नम्बरको बसमा आइतबार बिहान आगजनी गरेका हुन्। चितवनका डीसपी भेषराज रिजालका अनुसार घटनाबारे प्रहरीले थप अनुसन्धान जारी राखेको छ। बस जलेर पूर्ण रूपमा क्षति भएको छ।