काठमाडौं । यसअघि सामान्य प्रक्रियाबाट हुँदै आएको सौर्य परियोजनाबाट उत्पादित बिजुलीको विद्युत खरिद सम्झौता अब भने प्रतिस्पर्धाबाट मात्रै हुने भएको छ। अन्तर्राष्ट्रिय बजारमा सौर्य परियोजनामा प्रयोग हुने उपकरणको मूल्य घटेको तथा लागत क्रमशः कम हुँदै गएको सन्दर्भलाई ध्यान दिँदै नेपाल विद्युत प्राधिकरणले सोलार प्लान्टबाट उत्पादित ऊर्जाको विद्युत खरिद बिक्री सम्झौता (पीपीए) अब प्रतिस्र्धाबाट गर्ने भएको छ। ऊर्जा, जलस्रोत तथा सिंचाइमन्त्री पम्फा भुसालको अध्यक्षतामा आइतबार बसेको प्राधिकरण सञ्चालक समितिको बैठकले सोलारको पीपीए गर्दा प्रतिस्पर्धाबाट गर्ने निर्णय गरेको छ। सोलारबाट उत्पादित ऊर्जालाई सर्वसुलभ, प्रतिस्पर्धी र पारदर्शी बनाउन पीपीए प्रतिस्पर्धाबाट गर्ने निर्णय लिइएको मन्त्री भुसालले बताउनुभयो। उहाँले भन्नुभयो, “जनतालाई सहुलियत दरमा विद्युत् उपलब्ध गराउन, विद्युत् खरिदलाई प्रतिस्पर्धी तथा पारदर्शी बताउँदै लैजानुपर्छ। सोलारमार्फत हामीले यसको सुरुआत गरेका छौँ।” पछिल्लो विकसित प्रविधिअनुसार सोलारबाट विद्युत् उत्पादन लागत कम हुँदै गएको उल्लेख गर्दै भुसालले भन्नुभयो, “यस अघिको निर्णयअनुसार पनि तीन वर्षमा सोलारको पीपीए दर पुनरावलोकन गर्नुपर्ने थियो।” प्राधिकरणले विद्युत महसुललाई सर्वसुलभ बनाउन, अन्तर्राष्ट्रिय प्रचलन, जनअपेक्षा, विद्युत् माग र आपूर्तिको सन्तुलन एवं प्रचलित ऐन कानुनको मर्मलाई मध्यनजर गर्दै पीपीए गर्दा प्रतिस्पर्धाबाट गर्ने निर्णय गरिएको हो। अबदेखि सोलार आयोजनाबाट उत्पादित विद्युत्को पीपीए गर्दा विद्युत आयोजनाको उत्पादन सम्मिश्रणको अवधारणाअनुसार राष्ट्रिय ग्रिडमा कूल जडित क्षमताको १० प्रतिशतको परिधिभित्र रहेर प्राधिकरणलाई आवश्यक भएको क्षेत्रमा ‘आधार दर’ तोकी सो दरमा नबढ्ने गरी प्रतिस्पर्धामार्फत पीपीएका लागि आह्वान गरिने छ। यसअघि ऊर्जा, जलस्रोत तथा सिंचाइ मन्त्रालयबाट वि.सं. २०७४ माघ २५ मा स्वीकृत ग्रिड कनेक्टेड वैकल्पिक विद्युत ऊर्जा विकाससम्बन्धी कार्यविधि, २०७४ मा उल्लेखित वैकल्पिक सौर्य र वायु ऊर्जाको विद्युत खरिददर प्रतियुनिट ७ रुपियाँ ३० तोकिएको थियो। उक्त दर अधिकतम तीन वर्षभित्र विद्युत खरिद सम्झौता सम्पन्न हुने आयोजनाका लागि कायम हुने निर्णय भएको थियो। मन्त्रालयको सो निर्णयलाई नेविप्रा सञ्चालक समितिले २०७५ असार २६ को ७७३औँ बैठकबाट निर्णय गरी कार्यान्वयमा ल्याएको थियो। तीन वर्षका लागि तोकिएको उक्त दर हालसम्म पनि परिमार्जन हुन सकेको थिएन। हाल अन्तर्राष्ट्रिय बजारमा पछिल्लो विकसित प्रविधिका कारण सोलार आयोजनाबाट उत्पादन गरिने विद्युत्को मूल्य निरन्तर घट्दो क्रममा रहेको छ। प्राधिकरणले अहिलेसम्म २१ सोलार आयोजनासँग ११० मेगावाटको पीपीए गरेको छ। यसमध्ये ६ आयोजनाको निर्माण सम्पन्न भई २९ मेगावाट राष्ट्रिय ग्रिडमा जोडिएको छ। विद्युत विकास विभागका अनुसार कूल २५ आयोजनाको कूल ६०९ मेगावाट क्षमताका आयोजनाले सर्वेक्षण अनुमति लिएका छन्। १९ आयोजनाको कूल ११७ मेगावाट क्षमताका सौर्य परियोजनाले विद्युत उत्पादनको अनुमति लिएका छन्। कूल ३५ आयोजनाले ९१२ मेगावाट बराबरको सौर्य बिजुली उत्पादनको सर्वेक्षणका लागि अनुमतिका लागि आवेदन दिएका छन्।

काठमाडौं । शुक्रराज ट्रपिकल तथा सरुवा रोग अस्पताल, टेकुले कोभिड विरुद्धको खोप अभियान स्थगित भएको छ। आइतबार अस्पतालले विज्ञप्ति जारी गर्दै भोलि सोमबारदेखि अर्को आइतबारसम्म एक साताका लागि खोप अभियान स्थगित भएको जानकारी दिएको हो। दिनदिनै तीव्र गतिमा बढिरहेको कोभिड संक्रमणका बीच अस्पतालका ५० बढी चिकित्सक, स्वास्थ्यकर्मी तथा कर्मचारी कोभिड–१९ बाट संक्रमित भएपछि खोप अभियान स्थगित गरिएको बताइएको छ। कोभिड–१९ विरुद्धको खोप अभियान स्थगित गर्दा सर्वसाधारणलाई पर्ने असुविधाप्रति अस्पतालले क्षमायाचना समेत गरेको छ। हेर्नुस् विज्ञप्ति-

काठमाडौं । साताको दोस्रो दिन आज सोमबार बजारमा सुनचाँदीको मूल्य बढेको छ । नेपाल सुनचाँदी व्यवसायी महासंघका अनुसार आइतबार प्रतितोलामा ९२ हजार ४ सय रुपैयाँमा कारोबार भएको छापावाल सुनको मूल्य सोमबार १ सय रुपैयाँले बढेर ९२ हजार ५ सय रुपैयाँमा कारोबार भइरहेको छ । तेजावी सुन प्रतितोलामा ०२ हजार रुपैयाँमा कारोबार भइरहेको छ । जसको मूल्य आइतबार प्रतितोला रु. ९१ हजार ९ सय तोकिएको थियो । यस्तै, चाँदीको मूल्य पनि आज ५ रुपैयाँले बढेर १ हजार २ सय ५५ रुपैयाँमा कारोबार भइरहेको महासंघले जनाएको छ ।

काठमाडौं । सरकारले दार्चुलाकाे तुइन प्रकरणमा भारतलाई कूटनीतिक नोट पठाएको छ । गृह मन्त्रालयले सहसचिव जनार्दन गौतम नेतृत्वको छानविन समितिको प्रतिवेदन पठाएपछि परराष्ट्र मन्त्रालयले भारतलाई कूटनीतिक नोट पठाएको हो । छानविन समितिको प्रतिवेदनअनुसार सरकारले कूटनीतिक पहल चालेकाे हाे । १५ साउनमा भारतीय सीमा सुरक्षा बल (एसएसबी)ले तुइनको तार काटिदिँदा दार्चुलाको ब्यास नगरपालिका–२ का जयसिंह धामी महाकाली नदीमा खसेर वेपत्ता भएका थिए । घटनाबारे छानविन गर्न गृह मन्त्रालयले बनाएको समितिले एसएसबीको उपस्थितिमा घटना भएको बताएको छ । साथै घटनाबारे थप अनुसन्धान गरी दोषीलाई कारबाही र पीडित परिवारलाई उचित क्षतिपूर्ति दिन सिफारिस गरेको छ । समितिले प्रतिवेदन बुझाएपछि भारतीय विदेश मन्त्रालयले भने छानविन समितिको प्रतिवेदन आन्तरिक भएको र यसबारे आफूहरुलाई जानकारी नभएको प्रतिक्रिया दिएको थियो ।

काठमाडौं । नेपाल विद्युत प्राधिकरणको कार्यकारी निर्देशकमा कुलमान घिसिङलाई गरिएको नियुक्ति खारेजको माग गर्दै परेको रिट प्रधान न्यायाधीश चोलेन्द्र शम्शेर जबराकाे इजलासमा ताेकिएकाे छ । निवर्तमान कार्यकारी निर्देशक हितेन्द्रदेव शाक्यले नियुक्ति बदरको माग गर्दै ३२ साउनमा सर्वोच्च अदालतमा रिट दायर गरेका थिए । रिटमा शाक्यले आफूलाई गैरकानूनी रुपमा प्राधिकरणको कार्यकारी निर्देशक पदबाट हटाएको दाबी गर्दै त्यसलाई बदर गरी आफूलाई यथावत राख्नुपर्ने माग गरेका छन् । प्राधिकरणको कार्यकारी निर्देशक पदबाट मैले राजीनामा दिएको छैन भन्न कुरा निर्विवाद छ। त्यसैगरी मलाई विपक्षी नेपाल सरकारले उक्त पदबाट सुनुवाइको मौका प्रदान गरी कुनै कानूनी आधारमा हटाउने निर्णय गरेको छैन भन्ने कुरा पनि निर्विवाद छ,’ उनको रिटमा भनिएको छ, ‘यस्तो अवस्थामा मेरो यथावत रहेको नेपाल विद्युत प्राधिकारणको कार्यकारी निर्देशक पदमा विपक्षी कुलमान घिसिङलाई नियुक्ति गर्ने कार्य कानून र औचित्यको समेत प्रतिकूल छ।’ साउन २५ गते बसेको मन्त्रिपरिषद बैठकले आफूलाई ऊर्जा आयोगको विज्ञको रूपमा नियक्ति गरेकोमा पनि उनले असन्तुष्टि जनाएका छन्। आफूले उक्त पद स्वीकार नगर्दै आफूलाई विस्थापित गर्न कुलमानलाई नियुक्ति गरिएको शाक्यको जिकिर छ। ‘एउटा पदमा दुई व्यक्ति रहन नसक्ने र मलाई गरिएको ऊर्जा आयोगको विज्ञको पदलाई मैले स्वीकार गरेको अवस्था नहुँदै अप्रत्यक्ष तवरमा मलाई नेपाल विद्युत प्राधिकरणको कार्यकारी निर्देशक पदबाट विस्थापित गर्ने उद्धेश्यले विपक्षी कुलमान घिसिङलाई उक्त पदमा नियुक्त गर्ने विपक्षीहरूको कामकारबाहीले सो पदमा रही सेवा गर्ने र प्राधिकरणको नेतृत्व गर्ने मेरो वैध अपेक्षामा प्रतिकूल असर गरेको छ।’

काठमाडौं । नेपाली क्रिकेट टीमका प्रख्यात खेलाडी तथा पूर्व कप्तान पारस खडकाले प्रधानमन्त्री शेर बहादुर देउवालाई भेटेका छन् । पारसले हालैमात्र अन्तर्राष्ट्रिय क्रिकेटबाट सन्यास लिएका थिए । शनिबार प्रधानमन्त्री निवास बालुवाटारमा उनले देउवालाई भेटेका हुन्। भेटमा प्रधानमन्त्री देउवाले पारसलाई दुई दशकमा नेपाली क्रिकेटले हासिल गरेका सफलता र क्रिकेटमा झन् ठूलो सपना देख्न प्रेरित गरेकामा धन्यवाद दिएका छन्। देउवाले नेपाल र नेपालीको शिर उँचो बनाउन जिन्दगीको दोस्रो इनिङमा पनि सफलता मिलोस् भनेर पारसलाई शुभकामना समेत दिएका छन्।

काठमाडौं । नेपाली कांग्रेसका वरिष्ठ नेता रामचन्द्र पौडेलले फेरि न्यायमुर्तिको काधमा जिम्मेवारी आएको बताएका छन् । प्रतिनिधि सभा विघटनविरुद्ध विपक्षी गठबन्धनले सर्वोच्च अदालतमा रिट दर्ता गर्ने तयारी गरेका बेला पौडेलले यस्तो बताएका हुन् । उनले सामाजिक सञ्जालमा भनेका छन्, ‘संविधान पनि वचोस्, जनता पनि वचुन्, न्यायमुर्तिको काधमा फेरि जिम्मेवारी आयो ।’ यसअघि प्रधानमन्त्री केपी शर्मा ओलीले पुस ५ गते गरेको संसद् विघटन अदालतले खारेज गरिदिएको थियो । त्यसतर्फ संकेत गर्दै पौडेलले फेरि न्यायमुर्तिको काधमा जिम्मेवारी आएको बताएका हुन् । प्रतिनिधि सभा विघटनविरुद्ध प्रतिपक्षी दलहरु आजै सर्वोच्च जाने, सबैलाई नागरिकता लिएर उपस्थित हुन निर्देशन

दोलखाः बुधबार साँझ दोलखामा भूकम्पको महसुस गरिएको छ । बुधबार साँझ ६ः४३ मा गौरिशंकर हिमालको आसपास केन्द्रविन्दु भएर भूकम्प गएको हो । सो भूकम्प ४.२ रेक्टर स्केलको भएको भूकम्प मापन केन्द्रले जनाएको छ ।

काठमाडौं । राष्ट्रपति विद्यादेवी भण्डारीले प्रदेश २ का प्रदेश प्रमुखलाई पदमुक्त गरेकी छन् । मन्त्रिपरिषद्को सिफारिसमा प्रदेश प्रमुख तिलक परियारलाई पदमुक्त गरिएको राष्ट्रपति कार्यालयले जनाएको छ । परियार तत्कालीन नेकपामा माओवादीका नेता हुन् । २०६४ सालको संविधान सभा निर्वाचनमा उनी बाँकेबाट निर्वाचित सांसद थिए । बीचमा उनी मोहन वैद्यसँग गएका थिए। उनी केही समय नेत्रविक्रम चन्द विप्लवको समूहमा थिए । पछि उनी फेरि माओवादीमा फर्किएका थिए ।

एजेन्सी : कोरोना भाइरसको संक्रमणपछि मुम्बईको नानावटी अस्पतालमा उपचाररत बलिउड अभिनेता अभिषेक बच्चन कोरोनामुक्त भएका छन्। अभिषेकले ट्वीट गरेर आफ्नो कोरोना परीक्षण रिपोर्ट नेगेटिभ आएको जानकारी दिएका हुन्। ‘आज दिउँसो मेरो कोभिड–१९ परिक्षणको रिपोर्ट नेगेटिभ आयो। मैले तपाईहरुसँग भनेको थिएँ, म यसलाई हराइदिन्छु। म र मेरो परिवारका लागि तपाईहरुले गर्नुभएको प्रार्थनाका लागि धन्यवाद। नानावटी अस्पतालका डाक्टर र नर्सिङ स्टाफप्रति धेरै धेरै आभार’, उनले ट्वीटरमा लेखेका छन्। अभिषेक २८ दिनपछि कोरानामुक्त भएका हुन्। कोरोना भाइरसको संक्रमण भएपछि अभिषेकका साथै उनका उनका बुवा अभिषेक बच्चन गत जुलाई ११ गते नानावटी अस्पताल भर्ना भएका थिए। बच्चन परिवारका चार जनालाई कारोना भाइरसको संक्रमण भएको थियो। अमिताभ बच्चन, ऐश्वर्या राय बच्चन र आराध्या यसअघि नै कोरोनामुक्त भएर डिस्चार्ज भइसकेका छन्।

काठमाडौंः एसिसी टी-२० पूर्व क्षेत्र क्रिकेट प्रतियोगिताअन्तर्गत नेपालले पहिलो जित हात पारेको छ। बुधबार भएको खेलमा नेपालले घरेलु टोली थाइल्याण्डलाई ९ विकेटले पराजित गरेको हो। ६७ रनको सामान्य लक्ष्य नेपालले १ विकेटको क्षतिमा ५.३ ओभरमा ७२ रन बनाउँदै पूरा गर्यो। यो नेपालले टी-२० क्रिकेटमा सबैभन्दा कम बलमा हात पारेको जित हो। नेपालका लागि कुशल मल्लले ३६ रन र पवन सराफले अविजित २७ रन जोडे। ओपनिङमा आएका पारसले ९ रन बनाए। पहिले ब्याटिङ गरेको थाइल्याण्डले जम्मा ६६ रन बनायो। नेपालका लागि करण केसीले सर्वाधिक ३ विकेट लिए। अविनाश बोहराले २ विकेट हात पार्दा सन्दीप लामिछाने र भुवन कार्कीले समान एक/एक विकेट हात पारे। यसअघि भएको दुबै खेलमा नेपाल पराजित भएको थियो। नेपाल पहिलो खेलमा मलेसिया र दोस्रो खेलमा हङकङसँग पराजित भएको थियो। प्रतियोगितामा नेपाल, मलेसिया, हङकङ, थाइल्यान्ड र सिंगापुरबीच प्रतिस्पर्धा भइरहेको छ। प्रतियोगिताका शीर्ष २ टिम एसिया कप छनोटमा पुग्नेछन्।

विराटनगर– भारतको जोगवनीमा नेपाली मूलकी युवतीको शव विभत्स अवस्थामा फेला परेको छ । विराटनगर–११ पञ्चमुखी चोक माइत भएकी २२ वर्षकी रञ्जना सहनीको हातखुट्टा बाधेको अवस्थामा परवाना नदीमा शव फेला परेको हो । स्थानीय मनिकचन्द सहनीको २२ वर्षीय छोरी रञ्जनाको गत फागुनमा भारतीय नागरिक भीम बहरदारसँग विवाह भएको थियो । विवाहमा मागेजती दाइजो नल्याएको भन्दै घरपक्षबाट मानसिक यातना भोगिरहेकी रञ्जनाको शव सिमावर्ती क्षेत्र जोगवनीदेखि करिब १० किलोमिटर दक्षिण अररिया जिल्ला स्थित परवाना नदीको मिरगन्ज पुल नजिकै भेटिएको हो । आइतबार शव भेटिएपछि प्रहरीले मृतकका श्रीमानसहित ४ जनालाई पक्राउ गरेको छ । माइती पक्षको उजुरीपछि भारतीय प्रहरीले मृतकका श्रीमान भीम बहरदार, जेठाजु अर्जुन बहरदार, ससुरा सैनी बहरदारलाई पक्राउ गरेको हो । स्थानीय उमालाल सहनीका अनुसार रञ्जनाको गत फागुनमा अररिया जिल्ला तकिया निवासी २५ वर्षिय भिम बहरदार मागी विवाह भएको थियो । विवाहपछि दाइजोमा मोटरसाइकल मागेपछि सहनी परिवारले ९० हजार भारतीय रुपैयाँमा मोटरसाइकल किनिदिएको थियो । तर दाइजो नपुगेको युवतीलाई परिवारले मानसिक यातना दिइरहको सहनीले बताए । पछिल्लो समय बहरदार परिवारले पसल राख्न भन्दै युवतीको माइती पक्षसँग दुईलाख मागिरहेको थियो । केही दिन अघि माइत आएकी युवतीलाई श्रीमानले आएर लगेपछि हत्या गरेको माइती सहनीले बताए ।

काठमाडौंः महिला बालबालिका तथा जेष्ठ नागरिक मन्त्री थममाया थापाले कर्मचारी जनताको स्थायी सरकार भएकाले प्रभाबकारी रुपमा सेवाप्रवाह गर्नुपर्ने बताएकी छन् । समाज कल्याण परिषद्ले बिहीबार आयोजना गरेको वडादशैंको शुभकामना आदान–प्रदान कार्यक्रममा बोल्दै मन्त्री थापाले देशको जुनसुकै सामाजिक परिवर्तनका लागि कर्मचारीको योगदान अतुलनिय रहेको धारणा व्यक्त गरिन् । उनले थापाले संघिय लोकतान्त्रिक गणतन्त्र सहितको शासनसत्ता जोगाउनका लागि सबै मिलेर अगाडि बढ्न आग्रह गरिन् । वडादशैं सत्यको बिजयको रुपमा मनाइने पर्व भएपनि हाम्रो समाजमा पूर्णरुपमा सत्यको विजय भइनसकेको उनको भनाई थियो । उनले समाजमा अझैं पनि विभेद, शोषण, दमन, अन्याय र अत्याचार रहेका कारण त्यसलाई परास्त गर्न अभियान संचालन गर्नुपर्नेमा जोड दिइन् । मन्त्री थापाले विगतमा जनता भन्दा माथि कोही एकजना व्यक्ति शासन गर्ने व्यवस्थाको अन्त्य भएर जनताद्धारा निर्वाचित जनताकै छोराछोरीले शासनसत्ता सञ्चालन गर्ने व्यवस्था शुरु भएको बताइन् ।

वाग्लुङ । २४ वर्षीया युवतीको कोठामा राति एकजना परपुरुष आउँछन् । र, दुवैजना अन्तरंग सम्बन्ध गाँस्छन् । त्यो कुरा उनकै आमाजू र आमाजूका श्रीमान्ले देख्छन् । उनीहरूले त्यसो किन गरिस् भन्दै सम्झाउँछन् । तर २४ वर्षीया भीमकली सुनार केही पनि बोल्दिनन् । बरू भीमकली त्यो केटालाई झ्यालबाट भगाउँछिन् । भीमकलीलाई दुवैजना मिलेर सम्झाइबुझाइ गरे । तर उनी उल्टै कोठा बन्द गरेर भित्र बसिन् । आमाजूले ‘हैन बुहारी, भाइ विदेशमा तिमीहरूकै लागि भनेर दुःख गरिरहेको छ । तिमीले किन यस्तो गर्‍यौ’ भन्दै सम्झाइन् । तर उनी एक शब्द पनि बोलिनन् । भोलिपल्ट बिहान गाउँले बसेर उनलाई सम्झाइबुझाइ गराएर घर पठाए । ती परपुरुषको अनुपस्थितिमा नै भीमकलीलाई सम्झाए । त्यहाँबाट घर फर्किएको करिब एक घण्टामा भीमकलीले आत्महत्या गरिन् । कोठाभित्र सलको पासो लगाउँदै उनले आत्महत्या गरेकी थिइन् । आत्महत्या गर्नुअघि उनले एउटा कागजमा सुसाइड नोट लेखेकी थिइन् । जसमा आमाजू र आमाजूका श्रीमान्को कारण आफू आत्महत्या गर्न बाध्य भएको लेखेकी थिइन् । उनले आत्महत्या गर्दा खुट्टा भुइँमा नै टेकिएको थियो । उनले ६ फिट पनि उचाइ नभएको कोठामा सलमा पासो लगाएकी थिइन् । सुसाइड नोटमा उनले कान्छी देउरानीलाई ‘मेरो छोरी र तेरो छोराको इच्छा एउटै हो । मेरो छोरीको नि इच्छा पूरा गरिदेस् । मेरो छोराले स्कूल जाँदा सधैं पैसा माग्छ । पैसा दिएस् ।’ भनेर लेखेकी थिइन् । त्यस्तै ‘मेरो जिन्दगी बर्बाद गर्ने, आत्महत्या गर्न बाध्य पार्ने रविलालको बूढाबूढी (उनको आमाजू र उनको श्रीमान) हुन् ।’ भनेर सुसाइड नोटमा लेखेकी थिइन् । आफूले नराम्रो काम गर्नुहुन्न घरबार बिग्रिन्छ भन्दै सम्झाइबुझाइ गर्दा उल्टै आफूहरूमाथि आरोप लगाएर आत्महत्या गरेको रविलाल सुनारको भनाइ छ । बच्चा बिरामी भएपछि रविलाल कुखुरा खोज्न राति गाउँमा निस्किए । उनीसँग अरू पनि थिए । सालीकै घरमा कुखुरा भए किन अरू ठाउँ जाने भन्दै उनीहरू भीमकलीको घरमा गएका थिए । बच्चा बिरामी परेपछि धामीले कुखुरा खोज्न भनेपछि रविलाल श्रीमती र दुई जना अन्यलाई लिएर राति उनको घरमा गए । उनको घरमा पुगेर कोठाभित्र हेर्दा त एकजना केटा देखियो । रविलालको श्रीमतीले कोठाभित्र केटा देखिन् । ढोका बन्द थियो । तर ढोकामा रहेको प्वालबाट भित्र हेर्दा केटा देखियो । बच्चालाई कुनामा सुताएकी थिइन् । दुवैजना रातो कम्बल ओढेर सुतेका थिए । ‘बुहारीलाई पहिलो पटक यस्तो अवस्थामा भेटियो । त्यसपछि उनले बुहारीलाई सम्झाएकी थिइन् । उता माइती पक्षले भने आफूहरूको अनुपस्थितिमा छलफल गरिएको भन्दै आपत्ति जनाएका छन् । छलफलका क्रममा भीमकलीका माइती पक्षलाई समेत खबर गरिएको थिएन भने केटालाई पनि बोलाइएको थिएन । छलफलकै क्रममा उनलाई अब तेरो बूढा आएर तँलाई मार्छ भन्दै धम्की समेत दिइएको माइती पक्षको आरोप छ । भीमकलीका श्रीमान् वैदेशिक रोजगारीको लागि मलेसियामा छन् । उनी सासू ससुरासँग छुट्टिएर अलग्गै बस्दै आएकी थिइन् । उनी अलग्गिएको एक डेढ वर्ष भएको थियो । उनले ती पुरुषसँग सम्बन्धमा रहेको गाउँलेले थाहा पाएपछि आत्महत्या गरेको हुनसक्ने प्रहरीले जनाएको छ । तर माइती पक्षले भने गाउँलेको कुरा अस्वीकार गरेको छ । उनलाई आत्महत्या गर्न बाध्य पारिएको माइतीको दाबी छ । घटनाबारे थप अनुसन्धान भइरहेको प्रहरीले जनाएको छ । केन्द्रविन्दु अनलाइनबाट साभार

काठमाडौंः  शिक्षक सेवा आयोगले प्राथमिक तहको शिक्षकको खुल्ला प्रतिस्पर्धाको नतिजा सार्वजनिक गर्न सुरु गरेको छ । यसैबीच आयोगले शुक्रबार साँझ ६ बजेसम्म ४ जिल्लाको नतिजा सार्वजनिक गरेको छ । आयोगले आज हुम्ला, जुम्ला, कालिकोट र जाजरकोट जिल्लाको नतिजा सार्वजनिक गरेको हो । हुम्ला जिल्लाको प्रा.वि तहको नतिजा हेर्न यहाँ क्लिक गर्नुस् जुम्ला जिल्लाको प्रा.वि तहको नतिजा हेर्न यहाँ क्लिक गर्नुस् कालिकोट जिल्लाको प्रा.वि तहको नतिजा हेर्न यहाँ क्लिक गर्नुस् जाजरकोट जिल्लाको प्रा.वि तहको नतिजा हेर्न यहाँ क्लिक गर्नुस् आयोगले एकै पटक विज्ञापन गरेको निम्न माध्यमिक तहका लागि १ हजार ५ सय ७४ र माध्यमिक तहका लागि एक हजार शिक्षक छनोट गरिसके पनि प्रा.वि तहको नतिजा भने ढिला गरि सार्वजनिक गरेको हो । आयोगका प्रशासकिय अधिृकत डा. तुलसी प्रसाद थपलियाले धेरै व्यक्तिको विवरण रुजु गर्नुपर्ने भएका कारण नतिजा सार्वजनिक गर्न समय लागेको हो । आयोगले यो पटक प्राथमिक तहमा ९ हजार ९  सय ९६ वटा दरवन्दीमा शिक्षक छनोटको लागि विज्ञापन गरेको थियो। ती सबै कोटाका लागि १४ हजार १ सय २५ जना लिखित परीक्षाबाट छनोटमा परेको थपलियाले जानकारी दिए।