भक्तपुर, चैत ११। देशभर सञ्चालित माध्यमिक शिक्षा परीक्षा ‘सेकेन्डरी एजुकेसन एक्जाम’ (एसइई) आजबाट सकिएको छ । संशोधित शिक्षा ऐनअनुसार कक्षा १२ सम्म माध्यमिक शिक्षा कायम भएपछि यस वर्षदेखि लागू भएको एसइई परीक्षा आजदेखि सम्पन्न भएको परीक्षा नियन्त्रण कार्यालय सानो ठिमीका परीक्षा नियन्त्रक अम्बिकाप्रसाद रेग्मीले जानकारी दिएका छन् । प्राविधिकधार तर्फको परीक्षा भने चैत १४ गते सम्पन्न हुने छ । परीक्षामा देशभरबाट करिब पाँच लाख ३८ हजार १८२ परीक्षार्थी सहभागी भएका थिए ।

दोहा, फागुन २२ । धनकुटा प्रवासी सेवा समाज दोहा कतारको अध्यक्षमा ललित लिम्बु निर्वाचित भएका छन् । दोहाको टप फर्म रेष्टुरेन्टको सभाहलमा फागुन २१ गते सकिएको पाँचौ अधिवेशनबाट लिम्बुको अध्यक्षतामा १७ सदस्सीय नयाँ कार्यसमिति निर्विरोध चयन गरेको छ । समाजको प्रथम उपाध्यक्षमा पदम कुमार घिमिरे ,द्धितीय उपाध्यक्ष डिल्ली कुमार सुवेदी, तृतीय उपाध्यक्ष सन्तोष सिवा निर्वाचित गरेको छ । समाजको महासचिवमा रबिन थापा मगर, सचीव मोतीराम पाँचकोटि ,संगठन सचिव मन्दिप राई, कोषाध्यक्षमा प्रेम जिमि ,सह कोषाअध्यक्ष केशव राना मगरलाई चुनेको छ । समाजको सदस्यहरु सारुक सुन्दास,रामजी आचार्य, देव सुन्दास, तिल बिक्रम मगर र सरोज थापा रहेका छन् । कार्यक्रममा नव निर्वाचित अध्यक्ष लिम्बुले निर्वाचित कार्य समितिलाई धन्यवाद दिँदै कतारमा रहेका धनकुटा बासिहरु नेपालीहरुको हक अधिकार र हितका क्षेपमा काम गर्ने प्रतिवद्धता जनाए । उनले भने–तपाईँहरुले ठूलो जिम्मेवारी दिनुभएको छ, यसलाई म पालना मात्रै गर्न छैन सबैको हित र अधिकार रक्षाका लागि काम गर्नेछु, यस्तै सहयोग पाइरहुँ ।’ समाजका कार्यवाहक अध्यक्ष ललित लिम्बुको अध्यक्षता तथा गैर आवासीय नेपाली संघ राष्ट्रिय समन्वय परिषद कतारका अध्यक्ष बिनेष तामाङको प्रमुख आथित्यमा अधिवेशन भएको हो । व्यानर अनावरण तथा दिप प्रज्वलन गरि सुरु गरिएको कार्यक्रमको सञ्चालन समाजका सद्स्य रबिन राना मगर तथा स्वागत मन्तव्य समाजका सल्लाहकार प्रमुख तुलसी सुबेदीले गरेका थिए । कतारमा कार्यरत धनकुटा बासीहरुको पहलमा २००४ सालमा “धनकुटा प्रवासी सेवा समाजको चाहना, शुद्ध सामाजिक भावाना” भन्ने मुल नाराको साथ स्थापित भएको धनकुटा प्रवासी सेवा समाज कतारमा रहेका संघ संस्थाहरुको सुचिमा छुट्टै पहिचान बनाउन सफल संस्थाको रुपमा रहेको छ । समाजका सदस्य रबिन थापा मगरले प्रगति विवरण सुनाउदै समाजले कतारका विभिन्न सामाजिक संघ संस्थाहरुसँग सहकार्य गरि कतार तथा नेपालमा भएका प्राकृतिक विपत्ति, शिक्षा ,स्वास्थ र यातायात जस्ता सामाजिक कामहरुमा सहयोग पुर्याउदै आएको प्रष्ट पारेका थिए । उक्त कार्यक्रममा पत्रकार महासंघका अध्यक्ष गणेश प्रसाद बन्जाडे , समाजसेवी तथा वुद्दीजिवी चानक पोखरेल , कास्की आदर्स सेवा समाज , मोरङ सुनसरी सेवा समाज , पाल्पा , संखुवासभा , वखलढुङा , उदयपुर , प्युठान , भोजपुर ,गोरखा , तमु गुरुङ समाज , किराँत याक्थुङ सहित पन्ध्र भन्दा माथी संघ संस्थाहरुको उपस्थिति रहेको थियो । उपस्थिति सामाजिक संघ संस्थाहरुको प्रतिनिधित्व गर्दै शुभकामना मन्तव्यको लागी मोरङ सुनसरी सेवा समाज , कास्की सेवा समाज र संखुवासभा सेवा समाजका अध्यक्ष क्रमस युगेन्द्र कार्की , मन ब राना मगर र लोक ब गुरुङले राख्नु भएको थियो । जातीय संस्था बाट किरात याक्थुङ कतार र जनजाती महासंघ कतारका प्रतिनिधिले शुभकामान मन्तव्य राखेका थिए । शुभकामना मन्तव्य राख्दै पत्रकार महासघ शाखा कतारका अध्यक्ष गणेश बन्जाडेले र समाजसेवी चानक पोखरेलले धनकुटा पुर्वाञ्चलकै केन्द्र ,प्राकृतिक सम्पदा र कला सस्कृती धनी रहेको औलाउदै समाजले कतारमा पनी स्थापित संघ संस्थाहरु सँग समन्वय गर्दै कला संस्कृती ,खेलकुद क्षेत्र लगायत अन्य सामाजिक काम हरुको प्रशंसा गरेका थिए । समाजले समाजलाई विभिन्न बीधामा सहयोग पुर्याउने खेलाडी, कलकारहरुलाई खादा र प्रमाण पत्र बाट सम्मान गरेको थियो । त्यस्तै समाजलाई वर्तमान सम्म ल्याईपुर्याउन सहयोग गर्ने र धनकुटा समाजका संस्थापकहरुलाई दोसल्ला र सम्मान पत्रबाट सम्मान गरेको थियो । कार्यक्रममा बोल्दै प्रमुख अथिती बीनेश तामाङले जिल्ला वासीहरु एकतबद्द हुनु आफैमा राम्रो कुरा हो जसबाट प्रवासमा हामी माथी हुनेगरेका र आईपर्ने समस्या र अप्ठ्याराहरु लाई छिट्टै सम्बन्धित निकाय सम्म पुर्याउन महत्त्वपूर्ण भूमिका खेलिरहेको स्मरण गर्दै कतारको परिवेशमा धेरै जातिय र जिल्ला गत सामाजिक संघ सस्थाहरु स्थापित रहेको बताए । तामाङले गैर आवसिय नेपाली संघ राष्ट्रीय समन्वय परिषद कतारले कतारमा स्थापित सामाजिक संघ संस्थाहरु सँग समन्वय गरिएको जनाउदै जिल्ला संस्थाहरुले आफ्ना आन्तरिक कार्यक्रम बाहेक अब आउँदा दिनहरुमा हाम्रा राष्ट्रीय पर्व र दिनहरु सबैले एकै ठाउमा मनाउनु पर्ने कुरामा जोड दीदै जिल्ला संस्थाहरु लाई सहयोग गर्नको लागि अनुरोध पनि गरेका छन् ।

मुसीकोट, फागुन १२ । प्रधानमन्त्री पुष्पकमल दाहाल ‘प्रचण्ड’ले माओवादी जनयुद्दकै कारण यति उपलब्धि भएको भन्दै अब चुनावको लड़ाईमा लाग्न आफ्ना कार्यकर्ताहरूलार्इ निर्देशन दिएका छन् । रुकुमको मुसिकोट नगर्पालिका वार्ड ६ स्थित सहिद स्मारकमा आयोजित कार्यक्रमलार्इ सम्बोधन गर्दै प्रधानमन्त्री प्रचण्डले भने –‘हामीले सुरु गरेको मिसन पूरा भएको छैन हामी आफ्नो योजना सफल बनाउन उकालो र अप्ठेरो बाटो हिडिरहदा चौतारिमा बसेका छौ, सङ्घिय गणतन्त्र त्यही चौतारी हो । यहि चौतारिमा बसेर नया तागत ल्याएर सामाज्वाद तिर जानुछ । तपाइहरुलाइ भ्रम नहोस् ।’ प्रधानमन्त्रीले थपे, ‘तपाईं आधार इलाकाका कम्रेड हामिले हाम्रो बाटो बिर्सेका छैनौ । हाम्रै कारण ठूलठूला राजनीतिक परिवर्तन सफल भए । यसको रक्षा र बिकास हामीले नै गर्नुछ ।’ रोल्पा रुकुमले हिजो गरेको योगदान दुनियाले हेरेको छ भन्दै प्रधानमन्त्रीले समाजवाद्को निर्माणका लागि आर्थिक बिकास आवश्यक रहेको बताए । उनले भने ‘आर्थिक विकास गरेर मात्रै सामाजवादि क्रान्तिको सफलताको आधार बन्छ ।’ सरकारले चुनावको मिति घोषणा गरिसकेकोले एकताबद्द भएर चुनावमा लाग्न जिल्लाका नेता कार्यकर्तालार्इ उनले निर्देशन दिए । सम्बोधनका क्रममा प्रधानमन्त्रीले अप्ठ्यारोमा संविधान जारी गरेको बताए । तर यसलार्इ संबोधन गर्न आवश्यक रहेको भनार्इ व्यक्त गरे । संविधान कार्यान्वयनको लागि पनि चुनाव जरुरी रहेको भन्दै उनले चुनाव नहुने हो भने संबैधानिक सङ्कट आउने भएकोले र राजनितिक उपलब्धी गुम्न नदिन सरकारले चुनाव गराउन लागि परेको दाबी गरे । ‘निर्वाचन अभियानकै रुपमा गर्नुछ’– प्रधानमन्त्री प्रचण्डले भने –आउने मङ्सिर भित्रै प्रदेश र केन्द्रीय चुनाव हुन्छ ।’ नेता कार्यकर्तालार्इ उनले भने ‘हिजो हामीले यहिबाट सुरु गरेको युद्धले यहाँसम्म उपलब्धी ल्याउन मद्दत गर्यो अब निर्वाचनको लडाइँ जित्नुछ यो त हाम्रो आधार इलाका हो यहाँ त पुरै जित्नै पर्छ । त्यसको लागि एकताबद्ध भएर लाग्नुहोला । उनले जनयुद्धको जग्गा सम्बन्धी कुरा मन्तृपरिसदबाट सैद्धान्तिक सहमति भैसकेको बताए । हाम्रो क्याबिनेटमै सहमती भैसकेको छ जग्गा सम्बन्धी समस्या हल हुन्छ तपाइहरु ढुक्क भएर अघि बड्दा हुन्छ । सहिद परिवारलाई सेयर होइन नगद प्रधानमन्त्री प्रचण्डले जनयुद्धका सहिद बेपत्ता परिवारलार्इ तामाकोशीको सेयर दिने कुरा कानुनी झन्झट्ले रोकिएको बताए । ‘अब हामीले सहिद बेपत्ता परिवारलाई पाँच लाख नगद दिने छौं यसका लागि अर्थ मन्त्रालय र शान्ति तथा पुनर्निर्माण मन्त्रालयसँग सहमति भैसकेको छ सबैलाइ पाँच लाख निकासी हुन्छ’ प्रधानमन्त्री प्रचण्डले भने । कामी बुढा सहिद प्रचण्डले जनयुद्धका प्रथम सहिद कामी बुढालार्इ राष्ट्रिय सहिद घोषणा हुने बताए ।सहिद बारेमा कार्यदल बनाएर राष्ट्रिय सहिद घोषणा गर्ने कार्यक्रम भएको भन्दै प्रधानमन्त्री प्रचण्ड नेतृत्वको सरकार हुँदा नै त्यो काम हुने उनले बताए ।

वासिंटन, फागुन ८ । अमेरिकाको क्यालिफोर्नियामा आएको भीषण आँधीमा परेर चार जनाको मृत्यु भएको छ भने सयौं मानिसहरु घाइते भएका छन् । केही वर्षयताकै ठूलो मानिएको उक्त आँधीका कारण लाखौ मानिसहरु प्रभावित बनेका छन् । बोम्बोजेनेसिस नाम दिइएको सो आँधीसँगै आएको ठूलो पानी र बाढीका कारण क्यालिफोर्नियाका डेढ लाखभन्दा धेरै घरमा बिजुलीको आपूर्ति बन्द भएको छ । लस एन्जलस नजिक पहिरोको जोखिम बढेपछि सयौं घर खाली गरिएको छ । अझै तीब्र गतिमा हावा चल्ने, ठूलो वर्षा हुने र बाढीको खतरा रहेको मौसमविदहरुले बताएका छन् । लस एन्जलस अन्तर्राष्ट्रिय विमानस्थलबाट हुने तीन सयभन्दा बढी उडान रद्द गरिएका छन् । यस्तै मूख्य सडकमार्ग पनि बन्द भएको छ । बाटोमा पानी जमेको छ भने गाडीहरु पानीमा डुबेका छन् । वैज्ञानिकहरुले यस आँधीलाई ‘वेदर बम’को संज्ञा दिएका छन् । पाँच वर्ष लामो खडेरीपछि यो अतिवृष्टि भएको मौसमविदहरुले बताएका छन् । एजेन्सी

काठमाडौँ, माघ २५ । राष्ट्रिय प्रजातन्त्र पार्टीको आसन्न महाधिवेशनका लागि आज देशभर जिल्ला अधिवेशन भइरहेको छ । आगामी फागुन ६ देखि ९ गतेसम्म काठमाडौँमा हुने महाधिवेशनका लागि प्रतिनिधि छान्न अधिवेशन भइरहेको हो । देशका ७५ जिल्लामा एकै दिनमा सम्पन्न गर्ने लक्ष्य राखिएको उक्त अधिवेशनमा प्रत्येक जिल्लाबाट नौजनाको अनुपातमा देशभरबाट ६७५ केन्द्रीय प्रतिनिधि छनोट गरिने पार्टीका प्रवक्ता राजाराम श्रेष्ठले जानकारी दिए । अधिवेशनबाट एक अध्यक्षसहित ६५ प्रतिशत सदस्यको निर्वाचन गरिने र बाँकी ३५ प्रतिशत सदस्य तथा पदाधिकारी मनोनीत गरिने उनले बताए । एउटामात्र निर्वाचन क्षेत्र रहेको जिल्लाबाट २५ सदस्य तथा १० वटा निर्वाचन क्षेत्र रहेको जिल्लामा ६५ सदस्य जिल्ला प्रतिनिधिका रुपमा छनोट हुने छन् । महाधिवेशन प्रयोजनका लागि पार्टीले करिब २० लाख साधारण सदस्यता वितरण गरेको बताइएको छ । स्थानीय धुम्बाराहीमा भइरहेको पार्टीको काठमाडौँ जिल्ला अधिवेशनबाट सर्वसम्मत नेतृत्व छनोट गर्ने प्रयास हुने बताइन्छ ।

कैलाली, २३ माघ । नेपाली सेनाले कैलालीको टीकापुरमा संचालन गरेको निःशुल्क स्वास्थ्य शिविरबाट दुई हजारभन्दा बढीले सेवा लिएका छन् । जिल्ला प्रशासन कार्यालयको सहकार्य आज संचालन गरेको सो निःशुल्क स्वास्थ्य शिविरमा सेनाको विशेषज्ञ डाक्टरसहितको ५० जनाको मोबाइल हस्पिटलको टोली रहेका थिए । उक्त टोलीले स्वास्थ्य शिविरमा निःशुल्क स्वास्थ्य सेवा उपलब्ध गराएको थियो । शिविरमा कैलाली जिल्ला प्रशासन कार्यालयले निःशुल्क औषधिको व्यवस्था गरेको थियो । स्वास्थ्य शिविरबाट प्रदान गरिएको सेवाका बारेमा रक्षामन्त्री बालकृष्ण खाँण, नेपाली सेनाका बलाध्यक्ष रथी पूर्णचन्द्र थापालगायतले जानकारी लिएका थिए ।

न्यूयोर्क, माघ २ । ‘न हामी न चीनतिर झुकेका छौं, न त भारततिर नै, हामी नेपालतिर अवश्य झुकेका छौं,’ परराष्ट्रमन्त्री डा.प्रकाशशरण महतले अमेरिकाको टेक्सासमा भने । पुष्पकमल दाहाल नेतृत्वको वर्तमान सरकार कुनै खाले विदेशी शक्तिबाट प्रभावित नरहेको मन्त्री महतले स्पष्ट पारे । गैरआवासीय नेपाली संघ (एनआरएनए) को अमेरिकाको डालासमा शनिबारदेखि सुरु भएको साधारण सभाको उद्घाट्न गर्दै परराष्ट्रमन्त्री महतले हल्ला गरेर राष्ट्रवादी नभइने र त्यसले राष्ट्र बलियो नहुँने बताए । बाबुराम भट्टराईले भारतसँग विप्पा सम्झौता गरेर देशलाई घाटा लागेको बताए । महतको भनाइ थियो ‘आन्तरिक पार्टीको स्वार्थ, व्यक्तिगत स्वार्थ र विदेश नीति सँग मिसमास गर्दा देशलाई घाटा हुन्छ र अहिलेसम्म देशलाई घाटा भईरहेको मैले महसुश गरेको छु,’ उनले भने । सडकमा आन्दोलन गरेर कुनै कुराको सम्बोधन नहुँने र त्यसले छिमेकीहरुमा नराम्रो सन्देश जानेतर्फ सबै सचेत रहनुपर्ने उनको भनाई थियो । भने– ‘कुटनीतिक टेबलमा ठोस कुरा गर्नुपर्छ, हाम्रा आवश्यकता र अधिकारहरु ठोसरुपमा राख्नुपर्छ,’ मन्त्रीमहतले भने‘ सहि ठाँउ र समयमा भनौ, सडकमा होइन् ।’ उदघाटन सत्रमा अमेरिकाकालागि नेपाली राजदूत अर्जुन कार्की, एनआरएनएका केन्द्रीय उपाध्यक्ष कुमार पन्त, कांग्रेस केन्द्रीय सदस्य कल्याण गुरुङ, एनआरएनए अमेरिकाका अध्यक्ष केशव पौडेल लगायतकाले आआफनो मन्तव्य राखेका थिए । साधारण सभाको उदघाटनकै लागि मन्त्री महत, पत्नीसहित बिहीबार टेक्सास आएका हुन् ।

अष्ट्रेलिया, माघ १ । अष्ट्रेलियामा चर्चित कलाकारद्धय सीताराम कट्टेल ‘धुर्मुस’ र कुञ्जना घिमिरे ‘सुन्तली’ सम्मिलित ‘धुर्मुस–सुन्तली साँझ’हुने भएको छ । अष्ट्रेलियाको सिड्नी, मेलबर्न र ब्रिसबनमा ३ सातासम्म हुन लागेको कार्यक्रममा कलाकारद्वयलाई सम्मान गर्ने कार्यक्रम समेत रहेको आयोजकले जानकारी दिएको छ । आयोजकका अनुसार सिड्नीमा यही शनिबार कार्यक्रम आयोजना हुँदैछ भने मेलबर्नमा २९ तारिख र ब्रिसबनमा फेब्रुअरी ४ तारिखमा आयोजना हुँदैछ । सिड्नीमा रहेको गजबको इभेन्टसले आयोजना गर्न लागेको धुर्मुस सुन्तली साँझमा उनीहरुका साथै गायक भरत सिटौला र दीपक आचार्य ‘बाङ्गे बा’को समेत प्रस्तुति रहनेछ । कार्यक्रमबाट संकलित रकम धुर्मुस सुन्तली फाउण्डेसनको सहयोगार्थ खर्च गरिने आयोजकले जानकारी दिएको छ । कार्यक्रममा स्थानीय गायकगायिकाहरु समीर आचार्य, ईश्वर पोखरेल, सञ्जीव पराजुली, मोक्षदा सिलवाल, सुजन पोखरेलले गायन प्रस्तुत गर्नेछन भने सिड्नीमा नेपाली नृत्यको प्रबर्द्धन गरिरहेको नृत्य समूह द नेक्स्टले समेत आफ्नो प्रस्तुति देखाउनेछन् ।

वीरगन्ज, माघ १ । मुलुकको अर्थतन्त्रको प्रमुख ढोकाको रुपमा रहेको वीरगन्जका उद्योगी तथा व्यवसायीले उल्लेख्य मात्रामा विद्युत् उपलब्ध गराउन माग गरेका छन् । विगत वर्षमा हिउँदको समयमा विद्युतको अभावमा आधा क्षमतामा मात्रै उद्योग व्यवसाय चलाउँदै आएका उद्योगी व्यवसायीले यसवर्ष भने दैनिक २० घन्टा विद्युत् पाएका छन् तर भोल्टेजको समस्याका कारण हैरानी खेप्नुपरेको भन्दै उनीहरुले सो समस्या समाधान गर्न ऊर्जा मन्त्री जनार्दन शर्मा र प्राधिकरणका प्रमुख कार्यकारी अधिकृत कुलमान घिसिङसँग आग्रह गरे । नेपाल विद्युत् प्राधिकरणले चाहेजति विद्युत् उपलब्ध गराउनसक्ने हो भने तत्काल एक हजार मेगावाट भन्दा बढी विद्युत् खपत हुनसक्ने देखिएको छ । विद्युतको अभावमा वर्षौ खुम्चिएर बसेका उद्योगीले पछिल्लो दिनमा नियमित विद्युत् पाएपछि खुसी व्यक्त गर्दै भनेका छन् ‘‘वीरगन्ज सहर फेरि गुल्जार हुने दिन आउँदैछ, मात्रै विद्युत् जरुरी छ ।’’उद्योगी व्यवसायीले प्राधिकरणको प्रसारण लाइनमा पटक/पटक ट्रिप हुने, भोल्टेजको खराबीका कारण उपकरण जल्ने गरेको भन्दै समस्या समाधान हुनुपर्नेमा जोड दिएका हुन् । उनीहरुले शुद्ध विद्युत् सेवा प्राप्त गर्ने हो भने एकाध वर्षमा मुलुकलाई आर्थिक आत्मनिर्भरता प्रदान गर्नसक्ने तथा हजारौँलाई रोजगारी दिनसक्ने समेत बताएका छन् । उद्योगीले निर्माण सम्पन्न हुने चरणमा रहेको रक्सौल–परवानीपुर प्रसारण लाइनबाट भित्रने ५० मेगावाट विद्युत् वीरगन्जलाई नै उपलब्ध गराइदिन समेत आग्रह गरेका छन् । दुई वटा मात्रै टावर निर्माण गर्न बाँकी रहेको सो प्रसारण लाइनको काम यही माघ १६ गतेभित्र सम्पन्न गर्ने लक्ष्य प्राधिकरणले राखेको छ । सानो भन्दा सानो समस्या पर्दा समेत नेपाल विद्युत् प्राधिकरणको क्षेत्रीय कार्यालय हेटाैंडा दौड्नुपर्ने बाध्यतामा रहेको भन्दै उद्योगी व्यवसायीले समस्या समाधान गरिदिन समेत ऊर्जा मन्त्री, ऊर्जा सचिव, प्राधिकरणका कार्यकारी निर्देशकको ध्यानाकर्षण गराएका हुन् । वीरगन्ज उद्योग वाणिज्य सङ्घका अध्यक्ष प्रदीप केडियाले उद्योगी व्यवसायीको मागअनुसार विद्युत् उपलब्ध गराउन माग गरे । अध्यक्ष केडिया औद्योगिक नगरिलाई काठमाडौँ उपत्यकालाई जस्तै विद्युतभार कटौतीमुक्त बनाउनुपर्नेमा जोड दिए । सङ्घका उपाध्यक्ष सुवोध गुप्ता प्राधिकरणले आफ्नो प्रसारण लाइनको सुधारमा विशेष जोड दिनुपर्ने बताए । नियमित विद्युुत् आपूर्ति भए हाल प्राप्त भइरहेको भन्दा दोब्बर बढी राजस्व प्राप्त हुने भन्दै उपाध्यक्ष गुप्ता प्राधिकरणको हप्कैया ग्रीडको स्तरोन्नती, भोल्टेज सन्तुलन एवम् क्यापासिटर राखेर उद्योगीलाई सरकारले राहत दिनुपर्ने बताए । सङ्घका वरिष्ठ उपाध्यक्ष ओमप्रकाश शर्माले भने समस्या परेर फोन गर्दा प्राधिकरणको फोन नउठ्ने प्रवृत्ति दुःखद रहेको, कहिल्यै प्राधिकरणले आफूहरुको दुःख र गुनासो नसुनेको गुनासो गरे । ऊर्जा सचिव अनुपकुमार उपाध्याय उद्योगीको मागअनुसार सरकार औद्योगिक वातावरण बनाउन तयार रहेको धारणा राखे । उहाँले सरकारले अगाडि सारेका केही महत्वपूर्ण आयोजनामा लगानी गर्न वीरगन्जका उद्योगी व्यवसायी पनि तयार हुनुपर्ने बताए । प्राधिकरणका कार्यकारी निर्देशक कुलमान घिसिङले प्रसारण लाइनमा देखिएका समस्या छिट्टै समाधान हुने र भोल्टेजमा देखिएको तल माथिलाई पनि नियन्त्रण गरिने स्पष्ट पारे । ऊर्जामन्त्री जनार्दन शर्माले आफूहरुले सङ्कटको समाधानका लागि भन्दै दैनिक २० घन्टा विद्युत् उपलब्ध गराएको र छिट्टै औद्योगिक कोरिडोरलाई विद्युत्भार कटौतीमुक्त बनाइने बताए । उनले आगामी एक वर्षभित्र उद्योगलाई कति विद्युत् चाहिने हो सो को वस्तुनिष्ट जानकारी गराउन र ‘नेपालको पानी जनताको लगानी’ कार्यक्रमअनुसार जलविद्युत् क्षेत्रमा लगानी गर्न समेत आग्रह गरे ।

काठमाडौं, पुस २३ । उपत्यकाका प्रमुख नदी सफाइ गर्ने क्रममा आज तिलगङ्गास्थित बागमती किनारमा फोहोर फाल्दै गर्दा चार पसल र एक होटल गरी पाँचलाई कारबाही गरिएको छ । अन्नपूर्ण मिठाई पसल गौशाला, तिलगङ्गाका प्रेम श्रेष्ठ फर्निचर पसल, अरुण शर्मा सिसा पसल र चिकेन हाउस तिलगङ्गाका कामदारलाई फोहोर फाल्दै गर्दा पक्राउ गरी जनही रु पाँच हजारका दरले रु २० हजार जरिवाना गरिएको काठमाडौँ महानगरपालिका नगर प्रहरीका प्रहरी नायब निरीक्षक बद्रीमान नगरकोटीले बताए । ‘फोहर फाल्दा रङ्गेहात पक्राउ परेका शिवशंकर होटल जयबागेश्वरीका कामदार जरिवाना रकम रु पाँच हजार ल्याउँछु भनी गएकामा जरिवाना बुझाउन नआई फोनबाट जरिवाना तिर्दिन जे सक्नुहुन्छ गर्नुस्, भनेपछि महानगरीय प्रहरी वृत्त गौशालाको सहयोगमा सञ्चालक प्रज्वलमान श्रेष्ठलाई नियन्त्रणमा लिइएको छ’– उनले भने । फोहोरमैला ऐनअनुसार सार्वजनिक स्थानमा फोहोर फाल्नेलाई स्थानीय निकायले रु.पाँच हजारदेखि रु.एक लाख ५० हजारसम्म जरिवाना र छ महिना जेलमा राख्न पाउने व्यवस्था गरिएको छ । प्रत्येक शनिबारझैँ आज पनि उपत्यकाका प्रमुख नदी सफाइ गरी १० मेट्रिक टन फोहोर व्यवस्थापन गरिएको छ । बागमती सफाइको एक सय ९१ औँ हप्तामा आज तिलगङ्गा क्षेत्रमा सफाइ गरी छ मेट्रिक टन फोहोर व्यवस्थापन गरेका छन् । स्वतः स्फूर्तरुपमा सफाइमा उपस्थित भएकालाई दुई समूहमा विभाजन गरी एक समूहले सफाई र अर्को समूहले तिलगङ्गा क्षेत्रका घरघरमा छिरेर जनचेतनामूलक अभियान सञ्चालन गरेको अधिकार सम्पन्न बागमती सभ्यता एकीकृत विकास समितिका आयोजना प्रमुख राजेशप्रसाद सिंहले राससलाई जानकारी दिए । तिलगङ्गा क्षेत्रका घरदैलोमा गई नदीमा फोहोर नफालौँ, फोहोर फाल्नेलाई कारबाहीको दायरामा ल्याऔँ, उपत्यकाका नदी सफाइ अभियानमा आफूलाई नजिक पर्ने स्थानमा सहभागी बनौँ भनी जागरणमूलक कार्यक्रम गरिएको उनले बताए । रुद्रमती सफाइको १५० औँ हप्तामा आज बूढानीलकण्ठदेखि बुद्धनगरसम्म १० स्थानमा सफाइ गरिएको रुद्रमती सरोकार समाजका उपाध्यक्ष रोहित गिरीले जानकारी दिएको छ । आजको विशेष कार्यक्रमको शुभारम्भ स्वास्थ्यमन्त्री गगनकुमार थापाले बूढानीलकण्ठ मन्दिर परिसरमा गरिएको थियो । कार्यक्रमको शुभारम्भ गर्दै मन्त्री थापाले रुद्रमतीलाई उपत्यकाको पहिलो सफा नदी बनाउन सबै जुट्नुपर्ने बताए । यो अभियानमा आफ्नो पनि साथ र सहयोग रहने उनको भनाई रहेको थियो । सफाइ अभियान सुरु हुनुअघि योग शिक्षकद्वय डा.राजु अधिकारी र किशोर साहीले योग प्रशिक्षण दिएका छन् । सफाइमा मुख्य सचिव डा.सोमलाल सुवेदी, पूर्वसचिव किशोर थापा, प्रहरी अतिरिक्त महानिरीक्षक विज्ञानराज शर्मा लगायतले सफाइ अभियानको नेतृत्व गरेको थियो । रुद्रमतीका १० स्थानबाट तीन मेट्रिक टन फोहर व्यवस्थापन गरियो । सफाइमा नेपाली सेना, नेपाल प्रहरी, सशस्त्र प्रहरी, समाज, वातावरण संरक्षण अभियान, वेलकेयर अस्पताल, महानगरीय प्रहरी वृत्त गौशाला र कमलपोखरी, चारुमती मित्र समूह, भण्डारेश्वर व्यवस्थापन समिति, महानगरपालिकाका ७, ९ र ३३ वडा कार्यालय लगायतको सक्रियता रहेको थियो । विष्णुमती सफाइको १२४ औँ हप्ताका अभियन्ता पनि आज रुद्रमतीमै केन्द्रित भएको अभियानकर्मी विजेन्द्र लामाले जानकारी दिए । बूढानीलकण्ठस्थित विष्णुमती मुहानमा सफाइ गरी एक मेट्रिक टन फोहोर व्यवस्थापन गरिएको उनले बताए । रासस

काठमाडौं, पौष ८। प्रधानमन्त्री पुष्पकमल दाहाल ‘प्रचण्ड’ले पर्यटन उद्योग र पर्यटन व्यवसायको विकासका लागि सरकार गम्भीर भएको बताएका छन्। शुक्रबार पर्यटन व्यवसायमा क्रियाशील संस्था टानको ३८ औ वार्षिक साधारण सभाको उद्घाटन गर्दै प्रधानमन्त्रीले पर्यटनको विकासमा सरकार गम्भीर भएको बताएका हुन् । साधारण सभाको उद्घाटन गर्दै प्रधानमन्त्रीले भने, ‘नेपाल अथाह पर्यटकीय सम्भावना बोकेको मुलूक हो । नेपालको अर्थतन्त्रमा पर्यटन व्यवसायको महत्वपूर्ण योगदान रहँदै आएको छ । हामीमा ईच्छाशक्ति भयो र इमान्दार भयौं भने मात्रै नेपालको पर्यटन व्यवसायमा निकै ठूलो प्रगति हासिल गर्न सकिन्छ ।’ नेपालको पर्यटन प्रवद्र्धनका लागि सरकारले पहल गरिरहेको जानकारी दिँदै प्रधानमन्त्रीले भने, ‘यस अवधिमा मैले पाथिभरा, खप्तड, रारा लगायतका पर्यटकीय स्थलहरुको अवलोकन भ्रमण गरें । हामीमा ईच्छाशक्ति भयो भने थुप्रै सम्भावनालाई अवसरमा बदल्न सकिन्छ । भर्खरै मात्र काठमाडौं–निजगढ दु्रतमार्ग नेपालले नै बनाउने पहल गरेका छौं । केरुङ नाका सञ्चालनका लागि कुराकानी गरिएको छ । किमाथान्का र हिल्साजस्ता उत्तरी नाकाको सडक निर्माणले तिब्रता पाएको छ । अब हामीले पर्यटनको क्षेत्रमा गुणात्मक उपलब्धि हासिल गर्न सक्छौं । यसका लागि उत्साहजनक रुपमा नीजि क्षेत्रको साझेदारी आवश्यक छ ।’ कार्यक्रममा पर्यटन क्षेत्रका विभिन्न संघ संस्थाका प्रतिनिधिहरुले भूकम्पपछि नेपालमा पर्यटक आगमनको क्रम घटेकोमा क्रमशः पर्यटक आगमनमा प्रगति भएको भन्दै व्यवसायिक वातावरणका लागि पहल गरिदिन सरकारसँग आग्रह गरेका थिए ।

काठमाडौं, पुस ७  । सूचना तथा सञ्चार मन्त्रालयले सञ्चार सङ्ग्रहालय तथा आमसञ्चार अध्ययन प्रतिष्ठान विकास समिति (गठन) आदेश, २०७३ तर्जुमा गरिएको जनाएको छ । मन्त्रालयस्तरीय विकास समस्या समाधान समितिको हालै आयोजित बैठकमा मन्त्रालयका नीति योजना, अनुगमन तथा मूल्याङ्कन शाखाका प्रमुख एवम् उपसचिव रुद्रादेवी शर्माले चालु आर्थिक वर्षको प्रथम चौमासिक विवरण प्रस्तुत गर्दै मन्त्रिपरिषद्बाट अनलाइन सञ्चारमाध्यम सञ्चालन निर्देशिका, २०७३ स्वीकृत भएको र त्यसमा संशोधनका लागि कानुन न्याय तथा संसदीय मामिला मन्त्रालयको सहमति माग गरिएको जानकारी दिए उनले लोककल्याणकारी विज्ञापनको वितरणसम्बन्धी कार्यविधि, २०७२ स्वीकृत भई लागू भएको, मन्त्रालय र अन्तर्गतका निकायको पुनःसंरचनासम्बन्धी प्रारम्भिक प्रतिवेदन तयार भई उच्चस्तरीय प्रशासन सुधार कार्यान्वयन समितिमा पठाइएको तथा आमसञ्चार क्षेत्रलाई व्यवस्थित गर्न राष्ट्रिय आमसञ्चार नीति, २०७३ नेपाल सरकारबाट स्वीकृत भएको जानकारी दिए । पत्रकार आचारसंहिता परिमार्जनपश्चात् प्रेस काउन्सिलबाट स्वीकृत गरी कार्यान्वयनमा ल्याइएको, राष्ट्रिय समाचार समिति, गोरखापत्र र रेडियो नेपालको डिजिटल आर्काइभ बनाउने कार्य भइरहेको तथा सञ्चार सङ्ग्रहालय तथा आमसञ्चार अध्ययन प्रतिष्ठान विकास समिति (गठन) आदेश, २०७३ तर्जुमा गरिएको त्यसअवसरमा जानकारी दिइएको थियो । पत्रकार परिचयपत्र वितरण अनलाइनमार्फत गर्न सफ्टवेयर निर्माण भई परीक्षणका क्रममा रहेको तथा सूचना विभागबाट जारी गरिएको पत्रकार परिचयपत्र प्राप्त पत्रकारलाई सरकारी अस्पतालमा उपचार खर्चमा ५० प्रतिशत छुट दिने व्यवस्था गर्न कार्यविधि अन्तिम चरणमा पुगेको छ । चलचित्रकर्मी परिचयपत्र वितरणसम्बन्धी मापदण्ड, २०७२ स्वीकृत गरी लागू गरिएको छ । चलचित्र घरमा बक्स अफिस प्रणाली (इ–टिकेटिङ) लागू गर्ने प्रयोजनका लागि परामर्शदाता माग गरिएको छ । दूरसञ्चारका टावर र अप्टिकल फाइबरको सह प्रयोगलाई प्रोत्साहित गर्न स्वतन्त्र पूर्वाधार प्रदायकको अनुमतिपत्र खुला गर्न अध्ययन भई कानुनी प्रारुप तयार गर्ने क्रममा रहेको, मर्जर र एक्विजिसन तथा क्रस सब्सीडीबारे निर्देशिका दूरसञ्चार प्राधिकरणमा छलफलका क्रममा रहेको, ब्रोडब्यान्ड नीति पारित भई गुरुयोजना तयार गर्न नियुक्त परामर्शदाताबाट अन्तिम प्रतिवेदन प्राप्त भई सोलाई अन्तिम रुपदिने कार्य भइरहेको तथा सूचना तथा सञ्चार प्रविधि नीतिको कार्ययोजना बनाउन दूरसञ्चार प्राधिकरणलाई अनुरोध गरिएको मन्त्रालयले जनाएको छ । विसं २०७२ साल वैशाखको विनाशकारी भूकम्पबाट क्षति भएका नेपाल टेलिकमका ८७ वटा बिटिएस टावरमध्ये ८२ वटाको मर्मत गरी सञ्चालनमा ल्याइएको, नेपाल टेलिकमलाई फोर–जी सञ्चालनको अनुमति दिइएको र पुस १७ गतेदेखि यस्तो सेवा सञ्चालन हुने तयारी गरिएको तथा एनसेल प्रालिबाट फोर–जी सेवा सञ्चालनसम्बन्धी रोलआउट योजना प्राप्त भई निर्णयको प्रक्रियामा रहेको तथा फ्रिक्वेन्सीको प्रयोगको प्राविधिकस्तरअनुसार अनुगमन र निरीक्षणको कार्यलाई निरन्तरता दिइएको छ । देशका १५ जिल्लाका १५ वटा सामुदायिक विद्यालयमा आम नागरिकको सूचनामा पहुँच वृद्धि गर्ने उद्देश्यले सूचना तथा सञ्चार मन्त्रालयबाट सामुदायिक सूचना केन्द्रहरु स्थापना गरिएको र थप जिल्लामा यस्ता केन्द्र स्थापनाका लागि अध्ययन भइरहेको छ । देशका ७५ जिल्लाका प्रत्येक एक÷एक गाविसलाई सूचना प्रविधिमैत्री गाविसका रुपमा विकास गर्ने कार्यक्रमअनुरुप भूकम्प प्रभावित जिल्लाको टेन्डर गरिएको छ । नेपालको आफ्नै भू–उपग्रहको विकास गरी दूरसञ्चार प्रविधि, रेडियो र टेलिभिजनको विस्तार गर्ने उद्देश्यले भू–उपग्रह प्रक्षेपणका लागि आशय पत्र माग गरिएको छ । मध्यपहाडी लोकमार्ग, जिल्ला सदरमुकाम र नगरपालिका समेतमा अप्टिकल फाइबर पु¥याउन प्रदेश नं १, २ र ३ को लागि नेपाल टेलिकमसँग सम्पन्न भई कार्य अगाडि बढेको तथा प्रदेश नं ४ र ५ को टेन्डर प्रकाशन गरिएको र प्रदेश नं ६ र ७ का लागि टेन्डर प्रकाशन गर्ने क्रममा रहेको छ । यही अवधिमा, दूरसञ्चार प्राधिकरणबाट युनाइटेड टेलिकम लिमिटेडलाई आधारभूत टेलिफोन सेवाको एकीकृत अनुमतिपत्र प्रदान गरिएको छ । हुलाक बचत बैंकका ३४ जिल्लामा सफ्टवेयर अपग्रेड गरी डाटा इन्ट्री सम्पन्न भएको र बाँकी ३१ जिल्लामा डाटा इन्ट्रीका लागि कर्मचारीलाई तालिम दिइएको छ । हुलाक वस्तुको विद्युतीय प्रणालीबाट रेकर्ड राख्ने व्यवस्था गरी अन्तर्राष्ट्रिय हुलाक प्रणालीमा आबद्ध हुनेगरी सम्भाव्यता अध्ययन भइरहेको, महानगरपालिका र उपमहानगरपालिकामा द्रूत डाकसेवा सञ्चालन गर्ने कार्यविधि तयार भइसकेको तथा अतिरिक्त हुलाकबाट भईआएका कार्यहरु स्थानीय निकायहरुसँगको सहकार्यमा गर्ने योजना अघि सारिएको छ । सार्वजनिक सेवाका भुक्तानी पनि हुलाकबाट गर्नेगरी सम्भाव्यता अध्ययन भइरहेको मन्त्रालयले जनाएको छ । सुरक्षण मुद्रणसम्बन्धी कानुनमा सुधार गरी सुरक्षण मुद्रणालय स्थापनाका प्रक्रिया आरम्भ गर्ने उद्देश्यअनुरुप सुरक्षण मुद्रण विकास समिति (गठन), आदेश २०७३ नेपाल सरकारबाट स्वीकृत भई कार्य अघि बढेको तथा सुरक्षण मुद्रणसँग सम्बन्धित यन्त्र उपकरण खरिद गर्न टेन्डरका लागि आवश्यक कार्य अघि बढेको मन्त्रालयले जनाएको छ । चालु आर्थिक वर्षको प्रथम चौमासिक अवधिमा सूचना तथा सञ्चार मन्त्रालयबाट रु पाँच अर्ब ६८ करोड ३६ लाख राजस्व सङ्कलन भएको छ । साथै, दूरसञ्चार प्राधिकरणबाट फ्रिक्वेन्सी दस्तुरबापत रु एक अर्ब ७३ करोड ९६ लाख, ग्रामीण दूरसञ्चार विकास कोष दस्तुरबापत रु दुई अर्ब ३७ लाख, रोयल्टी दस्तरबापत रु तीन अर्ब ९४ करोड ८६ लाख सङ्कलन भएको छ । नेपालमा हाल ल्यान्डलाइनको सङ्ख्या आठ लाख ५२ हजार, मोबाइल र सिडिएमए सङ्ख्या तीन करोड एक लाख १९ हजार र अन्य सेवा आठ लाख ४७ हजारसमेत तीन करोड १८ लाख २० हजार तथा इन्टरनेटका प्रयोगकर्ताका सङ्ख्या एक करोड ३९ लाख ६२ हजार रहेको छ । मन्त्रालयका नीति योजना अनुगमन तथा मूल्याङ्कन शाखाका शाखा अधिकृत सन्तोष कुमार खत्री र सुनिलकुमार केसी समेतले तयार गर्नुभएको मन्त्रालयस्तरीय प्रथम चौमासिक प्रगति प्रतिवेदनमाथि सूचना तथा सञ्चारमन्त्री सुरेन्द्रकुमार कार्की र मन्त्रालयका सचिव दिनेशकुमार थपलियाले टिप्पणी गर्दै मन्त्रालयका कार्य जनताप्रति जवाफदेही हुनुपर्नेमा जोड दिनुभएको थियो । रासस  

काठमाडौँ, मङ्सिर २१ । राप्रपाका अध्यक्ष कमल थापाले राष्ट्रिय एकता र मुलुकको अखण्डताका लागि दलहरुका नेतृत्व एकताबद्ध हुन नसके देश नियन्त्रणबाट बाहिर जाने आशङ्का गरे । रिपोर्टर्स क्लब नेपालले आज आयोजना गरेको कार्यक्रममा उनले संविधान जारी भएको करिब १५ महिना भए पनि कार्यान्वयनमा समस्या देखिएकाले सबै दल जिम्मेवार भई समस्या समाधानका लागि अगाडि बढ्नुपर्ने सुझाव दिए । यथास्थितिमा विधेयक स्विकार्न नसकिने बताउँदै उनले भने–“विधेयकमा समावेश गरिएका अधिकांश विषयवस्तु तथा दफा राष्ट्रको हितमा छैनन् । ” अध्यक्ष थापाले विधेयकप्रति मधेसी मोर्चा असन्तुष्ट तथा प्रमुख प्रतिपक्षसहित केही दलका साथै प्रदेश नं ५ का जनता आन्दोलनमा रहेकाले सरकारले विकल्प खोज्नुपर्नेमा जोड दिए । अध्यक्ष थापाले निर्धारित समयभित्र तीन चरणको चुनाव गराउनुपर्ने संवैधानिक बाध्यता रहेको तर मधेसी मोर्चाको सहभागिताबिना चुनाव गर्न कठिन रहेको स्पष्ट गरे । रासस

वीरगन्ज, मङ्सिर २० । सीमावर्ती भारतको खमिया गाउँबाट अवैधरुपमा तस्करी गरी नेपालतर्फ ल्याइँदै गरेको करोडौँ मूल्य बराबरको मासको दाल आज बिहान पर्सा प्रहरीले समातेको छ । भारत पश्चिमी चम्पारनको खमिया गाउँको बाटो भएर छवटा भारतीय नम्बरको ट्र्याक्टरमा अवैधरुपमा ल्याइरहेको करिब रु एक करोडभन्दा बढी मूल्यको साढे १३ सय बोरामा रहेको करिब ४० हजार किलो मासको दाल पर्सा प्रहरीले आज बिहान ४ बजे समातेको हो । पर्साका प्रहरी उपरीक्षक गोविन्द साहको नेतृत्वमा गएको टोलीले जिल्लाको जानकी नगर–९ बाट सो दाल पक्राउ गरेको हो । सो दाल कस्को हो खुल्न सकेको छैन । समातिएको सो दाल छानबिन गरी भन्सार कार्यालयमा बुझाउने भनेर जिल्ला प्रहरी कार्यालय पर्सामा लगिएको छ । रासस

काठमाडौं, मंसिर १९ । आज बस्ने भनिएको व्यवस्थापिका संसदको बैठक पुनः सारिएको छ । संविधान संशोधन विधेयकविरुद्ध एमाले तथा विपक्षी दलका सांसदहरुले वैठक अवरुद्ध गरेपछि आगामी मंसिर २२ गतेसम्मका लागि वैठक स्थगित गरिएको हो । नेपाल मजदुर किसान पार्टीकी सांसद अनुराधा थापा मगरले बोलेलगत्तै विपक्षी दलका सांसदहरु आफ्नो सिटबाट उठेर वैठक अवरुद्ध पारेका थिए । सभामुख ओनसरी घर्तीले बारम्बार आफ्नो सिटमा बस्नका लागि पटक पटक अनुरोध गर्दा पनि सांसदहरुले अटेर गरेपछि आगामी बुधबारसम्मका लागि बैठक स्थगित गरिएको हो । संसदको अर्को बैठक २२ गते दिउँसो १ बजे बस्नेछ । आजको बैठकमा अख्तियारका निलम्बित प्रमुख लोकमानसिंह कार्कीको महाअभियोगको प्रस्तावमाथिको छलफल अघि बढाउन कार्यसूची थियो ।