काठमाडौ, भदौ ३० । अमेरिकाले नेपाललाई ५० अर्बभन्दा बढी रुपैयाँ सहयोग गर्ने भएको छ । अमेरिकी फ्ल्यागसिप कार्यक्रम मिलेनियम च्यालेन्ज कर्पोरेसन (एमसीसी)मार्फत नेपाललाई सो रकम उपलब्ध हुने भएको हो । अमेरिकमा एक कार्यक्रमका बीच अर्थमन्त्री ज्ञानेन्द्रबहादुर कार्की र एमसीसीका निमित्त प्रमुख कार्यकारी अधिकृत जोनाथन नासले सो सहयोगसम्बन्धी सम्झौतामा आज हस्ताक्षर गरेका छन् । अमेरिकाले दिने ५० अर्ब सहयोगमा नेपाल सरकारले १३ अर्ब थप गरी विद्युतको प्रसारण लाइन र सडक मर्मतमा खर्च गर्नेछन् । सहयोग रकमबाट करिब ३ सय किलोमिटर लामो उच्च भोल्टेज विद्युत लाइन निर्माण गरिनेछ । त्यस्तै तोकिएको स्थानमा सडक मर्मतपछि नयाँ सडक निर्माणमा समेत खर्च हुने सम्झौतामा उल्लेख छ । यो एमसिसिबाट दक्षिण एसियामै सबैभन्दा ठूलो सहयोग हो ।

काठमाडौं, भदौ ३० ।अखिल नेपाल फुटबल संघ (एन्फा)ले थ्रीस्टार क्लबलाई क्षतिपूर्तिस्वरुप रु एक करोड ५० लाख दिने भएको छ । एन्फा अध्यक्ष नरेन्द्र श्रेष्ठको अध्यक्षतामा बिहीबार बसेको एन्फाको केन्द्रीय समितिको बैठकले करिब १० महिनापछि थ्रीस्टारलाई उक्त रकम औपचारिकरुपमा दिने निर्णय गरेको हो । थ्रीस्टारले गत वर्ष एन्फाको लापरबाहीका कारण एएफसी कपको दोस्रो चरणको खेल खेल्न पाएको थिएन । उक्त खेल खेल्न नपाएपछि थ्रीस्टारले रु ६ करोड क्षतिपूर्तिसहित दोषीमाथि कारबाहीको माग गरेको थियो । उक्त निर्णय आगामी असोज २३ गते हुने एन्फाको विशेष साधारणसभाबाट अनुमोदनका लागि प्रस्तुत् गरेपछिमात्र कार्यान्वयन प्रक्रिया अघि बढ्ने एन्फाले जनाएको छ । बैठकले ‘ए’ डिभिजन क्लबका १२ टोली र २०७२ सालमा राष्ट्रिय लिग खेलेका मोफसलका चार क्लबलाई समेटेर १६ टोलीलाई ‘ए’ डिभिजन लिग खेलाउने निर्णय गरेको छ । बिहीबारैको बैठकले साफ १५ वर्षमुनिको (यु–१५) च्याम्पियनसिपमा दोस्रो स्थान हासिल गरेको नेपाली टोलीका प्रत्येक खेलाडी, प्रशिक्षक र फिजियोथेरापिस्टलाई जनही रु २५ हजार पुरस्कारस्वरुप दिने निर्णय गरेको छ । घरेलु मैदानमा नै भएको उक्त प्रतियोगितामा नेपाल फाइनल खेलमा भारतसँग पराजित हुँदै दोस्रो बनेको थियो ।

ताप्लेजुङ, भदौ २५ । नेकपा एमालेका सचिव तथा प्रसार विभाग प्रमुख योगेश भट्टराईले आफ्नो पार्टीलाई सिद्धाउन अन्तराष्ट्रिय शक्ति लागेको आरोप लगाएका छन । असोज २ गते २ नम्बर प्रदेशको स्थानीय निर्वाचनमा एमालेबाट उम्मेदवार भएका र हुन चाहनेहरुलाई छिमेकी भारतबाट पनि किन एमालेबाट उठेको भनेको आफूहरुलाई जानकारी आएको दावी गरे। आइतबार ताप्लेजुङमा आयोजित एक कार्यक्रममा नेता भट्टराईले आफ्नो पार्टीविरुद्ध सुरुमा नेपालका शक्तिहरुमात्रै लागे पनि अहिले बाहृय शक्तिहरु पनि सक्रिय रुपमा लागेको आरोप लगाएका छन । अहिलेको सत्ता गठबन्धन( कांग्रेस–माओवादी) पनि उनीहरुले चाहेर नभई बाहृय हस्तक्षेपमा बनेको नेता भट्टराईको दावी छ ।

भदौ १८ । अक्टोपस, कोरल रिफ, सी अरचिन, स्टारफिस, जेली फिस, बे अफ अलास्का, मर्मेड, पर्ल, बेटा फिस, सी ड्रागन लगायत समुद्री जीवनबाट अभिप्रेरित १५ वटा अनुपम, आकर्षक र लोभलाग्दा पहिरन शैलीहरु । सृजनात्मक सोच र कल्पनाशीलताले सजिएका यी पहिरनहरुले करिब एक घण्टाको समय उपस्थित फेसन पारखी दर्शकहरुलाई समुद्री परिवेशमा विचरण गराएको अनुभूति भयो । गत शनिबार दरबारमार्गस्थित होटल याक एण्ड यतिमा संचालन भएको नमूना कलेज अफ फेसन टेक्नोलजीमा फेसन डिजाइनिङमा स्नातकको पढाईमा अध्ययनरत १२औं ब्याचका ५७ जना विधार्थीहरुको अन्तिम परिक्षाको महत्वपूर्ण पाटोका रुपमा प्रस्तुत सो फेसन शोको मुख्य आकर्षण थिए उल्लेखीत पहिरनशैलीहरु । ‘रिकोरेन्जा डिला मोडा’ शीर्षक अन्तर्गत विद्यार्थी स्वयंले आयोजना एवं व्यवस्थापन गरेको सो ग्राजुएसन फेसन शोमा अन्य पाँच वटा सिक्वेन्स पनि प्रस्तुत गरिएका थिए । फेसन शोको प्रारम्भमा लोलिटा फेसनबाट प्रभावित पहिरनले र्याम्पमा अवतरण गरेको थियो । त्यसपछि इन्डो वेस्टर्नको फ्युजन स्वरुपहरुले प्रवेश पायो । जसमा साडीका साथमा फिटेड ज्याकेट, स्लीम फिट ज्याकेट, केप लगायतको सुन्दर कम्बीनेसन देख्न पाइयो । त्यसपछि स्ट्रीट वेयरले आफ्नो प्रभाव देखायो । जसमा क्याजुयल र आरामदायिक मूडलाई प्राथमिकता थियो भने पहिरनहरु मुख्य गरी हेम्प फ्याब्रिकबाट बनेका थिए । नमूना कलेजका संस्थापक प्रिन्सीपल एवं अग्रणी नेपाली फेसन डिजाइनरका रुपमा परिचित ज्ञानी शोभा तुलाधरप्रति समर्पित पहिरनशैलीले कार्यक्रमको मध्य समयमा प्रवेश पायो । ज्ञानी शोभा तुलाधरले आफ्नो समयमा तयार पारेका विविध पहिरन शैलीबाट प्रभावित पहिरनहरुको नमूनालाई यो चरणमा देख्न पाइयो । ब्युटी क्वीन शीर्षक अन्तर्गत प्रस्तुत यी पहिरनहरु मूलतः ढाकाको प्रयोगमा साटन, रअ सिल्क जस्ता फ्याब्रिकमा खेलिएका थिए । जसमा फ्लोर लेन्थ गाउन, प्रिन्सेस लाइन, केप, अफ शोल्डर डिजाइन आदि प्रमुख थिए । रोजिन शाक्यको कोरियोग्राफी रहेको सो फेसन शोमा पाँच जना युवा मोडल सहित तीन दर्जन भन्दा बढी मोडलहरुले र्याम्पमा ओहोर दोहोर गरेका थिए । कार्यक्रमको पाँचौं सिक्वेन्स कर्पोरेट जगतप्रति समर्पित थियो । जसअन्तर्गत मूलतः फिटेड स्कर्ट, पेन्सिल स्कर्ट, शर्ट, टप्स आदि प्रस्तुत गरिएको थियो जुन कर्पोरेट जगतका महिला प्रोफेसनलहरु प्रति केन्दि«त थिए ।

काठमाडौं, भदौं १७ । नेपाली राष्ट्रिय टोलीका मूख्य प्रशिक्षक ग्योतोकु कोजीले ताजिकिस्तानबिरुद्ध आउँदो मंगलबार हुने खेलका लागि २३ सदस्यीय नेपाली टोलीको घोषणा गरेका हुन । नेपाली टोलीमा नियमित कप्तान अनिल गुरुङलाई भने समावेश गरिएको छैन । नियमित कप्तान अनिलको स्थानमा नेपाल आर्मीका स्ट्राइकर जर्ज प्रिन्स कार्कीले राष्ट्रिय टोलीमा पहिलो पटक मौका पाएका छन् । टोलीमा स्ट्राइकरहरु बिमल घर्तीमगर, जर्ज प्रिन्स कार्की, नवयुग श्रेष्ठ र भरत खवासलाई छनौट गरिएको छ । त्यस्तै डिफेण्डहरु बिराज महर्जन, देवेन्द्र तामाङ, अनन्त तामाङ, दिनेश राजवंशी, जितेन्द्र कार्की, आदित्य चौधरी र कमल श्रेष्ठ छन् । त्यसैगरी, मिड फिल्डरहरुमा सुनिल बाल, हेमन गुरुङ, रोहित चन्द, सुमन लामा, अञ्जन विष्ट, बिक्रम लामा, बिशाल लाई, हेमन्त थापामगर र सुजल श्रेष्ठ तथा गोलरक्षकका रुपमा किरणकुमार लिम्बु, बिशाल श्रेष्ठ र बिकेश कुथुलाई छनौट गरिएको छ । एएफसी एसियन कप–२०१९ को छनौट चरण अन्तर्गत आउँदो मंगलबार नेपालले ताजिकिस्तानसँग घरेलु मैदानमा प्रतिस्पर्धा गर्दैछ । खेल एन्फा कम्प्लेक्स सातदोवाटोमा हुनेछ ।

भक्तपुर, भदौं १४ । नेपाल मजदुर किसान पार्टीका अध्यक्ष नारायणमान बिजुक्छेंले ठूला पार्टीका एक तिहाई केन्द्रीय सदस्य बिदेशी एजेन्टको रुपमा काम गरिरहेको आरोप लगाए । अध्यक्ष बिजुक्छेंले नेपालका हरेक निर्णय गर्दा नेपालीले भन्दा पहिले नै बिदेशीहरुले जानकारी पाउनु र पूर्व योजना अनुुसार काम गर्न सफल हुनुमा हरेक ठूला दलहका तिनै एक तिहाई बिदेशी एजेन्टहरुको भूमिका रहेको बताएका हुन् । रफत सञ्चार क्लबले आयोजना गरेको साक्षात्कार कार्यक्रममा बोल्दै उनले प्रधानमन्त्री शेरबहादुर देउवाले भारत भ्रमणमा दिएको अभिब्यक्ति संसदको मर्यादा बिपरित रहेको र के बोल्ने भन्ने बारे जानकारी समेत नरहेको बताए । देउवाले पहिले नै गरेको प्रतिवद्धताको पालना गर्दै भारतका प्रधानमन्त्रीका अघि त्यस्तो अभिब्यक्ति दिएको हुन सक्ने उनले बताए । संसदले नेपाल र भारतको सिमामा बनाएका बिभिन्न बाँधहरु भत्काउने निर्णय गरिसकेता पनि सरकार चुप लागेर बस्नु नै तराईलाई बाढीको चपेटामा पार्ने काम भएको भन्दै उहाँले हाल बाढी पिडित राहत बितरणमा समेत सरकाले पक्षपात गरेको बताए । निर्वाचन आयोगले निर्वाचनका लागि तोकेको समयमै निर्वाचन सम्पन्न हुने भन्दै निर्वाचन आयोगलाई सरकारले प्रभाव र दबावमा पारी मिति परिवर्तन लगायत अन्यका काम गर्नु देशको हितानुकुल नहुने उनले बताए । सिंहदरबारको अधिकार गाउँ गाउँ भन्ने नारा दिएर जनतालाई सरकार र प्रतिपक्षमा रहेको दलका साथै अन्य दलका नेताहरुले भ्रमको खेती गरेको भन्दै उक्त अधिकार सम्बन्धि बिधेयक र कानुनहरु थन्किनु यसको ज्वलन्त उदाहरण रहेको उनले बताए । नेपालका प्रधानमन्त्री र पूर्व उपप्रधानमन्त्रीले कहाँ के बोल्ने बारे थाहा सम्म नभएको पछिल्लो समयमा माधब नेपालको उत्तर कोरीया भ्रमणका बारे गरिएको टिप्पणीलाई लक्षित गर्दै पूर्व उपप्रधानमन्त्री बिमलेन्द्र निधिलाई भारत र बिहार बाहेक अन्य स्थानका बारे थाहा नभएको बिजुक्छेंले आरोप लगाए ।

हातमा केनुला लगाएकै अवस्थामा प्रा डा गोविन्द केसी यहाँको दलित बस्तीका बाढीपीडितलाई शुक्रबार स्वास्थ्य उपचार सेवा दिइरहेका छ्न् । अनुहार र शरीर पसिनाले भरे पनि केसीको अनुहारमा एउटा अनौठो मायालाग्दो भाव देखिन्छ । उनले ११ औं पटकको अनशन २३ औं दिनमा स्थगन गरेपछि ९ दिन मात्र आराम गरेर स्थानीयको उपचारको लागि पुगेका हुन् । कांतिपुर आनलाइन मा अतुल मिश्रले केसीका बारेमा समाचार प्रकाशित गरेको छ । समाचारमा अगाड़ि भनिएको छ: यहाँको स्थानीय पौडा, वान्द्रा खोलाको पानी बस्तीको हरेक घरमा पसेको थियो । हाल स्थिति सामान्यतर्फ फर्कन लागे पनि स्थानीय बाढीको भोगाईले थलिएका छन् । डा केसी बिहीबार यहाँ आएका हुन् । आउनुअघि उनलाई पेट दुखाईको समस्या देखिएपछि केही घन्टाको उपचार विश्रामपछि उनी दिउँसो गन्तव्यतिर लागेका हुन् । समाचारमा राखीएको तसबीरमा ठुलो संख्यामा सर्वसाधारणको उपस्थिति देखिंच । बिहीबार राति कञ्चनरूपको बसाईस्थलमा उनलाई पानि चढ़ाइएपछि शुक्रबार बिहानदेखि स्वास्थ्य उपचारमा लागिपरेका छ्न् । डोम, चमार (राम), सदा, सरदारलगायतको बाहुल्यता रहेको यो बस्तीको जनसंख्या करिब साढे ४ हजार छ । स्थानीय ७४ वर्षीय भोला चौधरी बाढीको समय लडेर खुट्टामा आएको चोट पटकको उपचार गराएर औषधि समेत लिएर फर्के । उनले आफू डा. केसीको नाम पहिलेदेखि नै सुनेको र आज भेट्न पाएको बताए । हाल स्वास्थ्य शिविरमा करिब ५०० जनाको भीड छ । डा केसीले उपचारपछि दलित समुदायका महिला, बालबालिका, बूढापाकाहरूलाई घोती, सारी, लुगाफाटा चकलेट समेत दिने गरेका थिए ।

काठमाडौं, भदौ ७ । नेकपा माओवादी केन्द्रका अध्यक्ष पुष्पकमल दाहालले दोस्रो जनआन्दोलनका उपलब्धिका विरोधीहरु बलियो हुँदै गएको भन्दै प्राप्त उपलब्धि जोगाउन आन्दोलनको लागि तयार हुनुपर्ने बताएका छन् । अध्यक्ष दाहालले संघीयता, गणतन्त्र र समानुपातिक, समावेशी पक्षधर शक्तिहरु पछिल्लो समय कमजोर भएकाले मुलुकको स्थिति भयावह हुनसक्ने आशंका गरे । माओवादी केन्द्रको भ्रातृसंगठन अखिल क्रान्तिकारीको २१औं राष्ट्रिय सम्मेलनको बुधबार काठमाडौंमा उद्घाटन गर्दै अध्यक्ष दाहालले माओवादी केन्द्र कार्यशैलीमा विचलित र सिद्धान्तमा स्खलित भएकै कारण प्रतिक्रिया र यथास्थितिवादीहरु चुनाव जित्ने अवस्थामा पुगेको टिप्पणी गरे । ‘जो हिजो संघीयताका विरुद्ध थिए, जो हिजो गणतन्त्रका विरुद्ध थिए, जो हिजो संविधानसभाका विरुद्ध थिए, आज उनीहरु निर्वाचन जित्ने ठाउँमा आइपुगे, हामी निर्वाचन हार्ने ठाउँमा आइपुग्यौं’–उनले भने–‘हाम्रो टाउकोको मूल्य तोक्नेहरु बलिया हुँदै गए, हामी कमजोरजस्ता हुँदै गयौं ।’ अध्यक्ष दाहालले माओवादी केन्द्रप्रति मधेसी जनताको भरोसा कायमै रहेकाले प्रदेश नम्बर–२ को स्थानीय तह निर्वाचनमा आफ्नो पार्टी पहिलो स्थानमा आउने दाबी पनि गरे । भदौ ११ गतेसम्म चल्ने अखिल क्रान्तिकारीको राष्ट्रिय सम्मेलनमा देशभरिका दुई हजारभन्दा बढी प्रतिनिधि सहभागी छन् । सम्मेलनले दुई वर्षे कार्यकालका लागि नयाँ नेतृत्वसमेत चयन गर्नेछ ।  

काठमाडौं, भदौ ७ । त्रिवि शिक्षण अस्पताल, महाराजगञ्जमा साताको दुई जनाका दरले मात्रै मिर्गाैला प्रत्यारोपण भए साउन मसान्तसम्म ३२ जनाले निःशुल्क सेवा पाइसक्नुपर्ने हो। तर, साउन २३ गते सामाजिक सेवा शाखाको सूचनापाटीमा एकाएक अस्पतालले सूचना टाँस्यो, ‘निःशुल्क मिर्गौला प्रत्यारोपण सेवा सम्बन्धी निर्देशिका, २०७३ लागू नभएकाले सेवा उपलब्ध छैन।’ सरकारले वैशाख १ गतेदेखि मिर्गौला प्रत्यारोपण सेवा निःशुल्क भएको घोषणा गरेको हो। जसका लागि प्रत्यारोपण केन्द्रलाई एक जना बिरामी बराबर चार लाख ५० हजार र बिरामीलाई प्रत्यारोपणपछि औषधि उपचारका लागि थप एक लाख रुपैयाँ सरकारले दिने व्यवस्था छ। तर, नेपालको सबैभन्दा पुरानो र धेरै मिर्गौला प्रत्यारोपण हुने केन्द्र शिक्षण अस्पतालले निःशुल्क सेवा सुरु भएको पाँच महिना पुग्दा पनि कार्यान्वयनमा ल्याउन सकेन। नेपालमा रहेका तीन मिर्गौला प्रत्यारोपण केन्द्रमध्ये मानव अंग प्रत्यारोपण केन्द्र र वीर अस्पतालले भने वैशाखदेखि नै निःशुल्क सेवा दिइरहेको जनाएका छन्। शिक्षण अस्पताललाई निःशुल्क सेवा प्रारम्भ गर्न केले बाधा पार्‍यो त? ‘स्वास्थ्य मन्त्रालयका अधिकारीले निर्देशिका लागू भए पनि कार्यान्वयनमा आईनसकेको बताएपछि सेवा दिन सकिएन,’ अस्पतालका निर्देशक डा दिपक महरा भन्छन्, ‘सरकारले निःशुल्क घोषणा गरेपछि बिरामी सेवा लिन आउँछन्। हामीले पनि पटक–पटक मन्त्रालयमा यसका लागि पहल गरेका छौं, तर अहिलेसम्म कार्यान्वयन गर्ने अनुमति पाएका छैनौं।’ यो कुरालाई मानव अंग प्रत्यारोपण केन्द्रले असार २१ गते शिक्षण अस्पतालका नाममा बैठकका लागि पठाएको पत्रले पनि पुष्टि गर्छ। जहाँ ‘निर्देशिका कार्यान्वयनका लागि बैठक बस्ने’ उल्लेख छ। स्वास्थ्य मन्त्रालय चिकित्सा सेवा महाशाखाका प्रमुख डा भोलाराम श्रेष्ठ पनि शिक्षण अस्पताल निःशुल्क प्रत्यारोपण सेवाका लागि ‘सूचीकृत’ भईनसकेको बताउँछन्। तर, सूचिकृत हुन के प्रक्रिया अपनाउनुपर्छ भन्ने बारे उनले अनविज्ञता प्रकट गरे। अन्य दुई प्रत्यारोपण केन्द्रमा निःशुल्क भइहरेको अवस्थामा शिक्षण अस्पताललाई सेवा दिन रोक्नुको स्पष्ट जफाव मन्त्रालयका अधिकारीसँग छैन। कार्यान्वयनका लागि बसेको बैठकमा विवाद साउन २३ गते मिर्गौला प्रत्यारोपण गरिरहेका अस्पतालका निर्देशक, नेफ्रोलोजी विभाग प्रमुख, लेखा र सामाजिक इकाइमा कार्यरत कर्मचारीहरुकोे बैठक बोलाइएको थियो। बैठकमा मानव अंग प्रत्यारोपण केन्द्रका निर्देशक, मन्त्रालयका पदाधिकारी, वीर र शिक्षण अस्पतालका प्रमुखबीच विवाद भएको बुझिएको छ। ‘बैठकका लागि मन्त्रालयले चिठी पठाउनुपर्नेमा कसरी प्रत्यारोपण केन्द्रले पठायो?’ भन्ने प्रश्न वीर र शिक्षण अस्पतालका सहभागीले उठाएका थिए। स्वास्थ्य सचिव डा किरण रेग्मीको अध्यक्षतामा बैठक बस्ने भनी पत्रमा उल्लेख गरिएका कारण आफूहरु बैठकमा सहभागी भएको शिक्षण अस्पतालका निर्देशक डा महरा बताउँछन्। उनले भने, ‘नेपालमा प्रत्यारोपण सुरु गर्ने र अहिले पनि धेरै प्रत्यारोपण गरिरहेको अस्पताललाई कसरी मानव अंग प्रत्यारोपण केन्द्र अन्तर्गत राख्न खोजियो? भनेर प्रश्न गरेका थियौं।’ मानव अंग प्रत्यारोपण केन्द्रका निर्देशक डा पुकार चन्द्र श्रेष्ठले देखावटीका लागि मात्रै बैठक डाकेको वीर र शिक्षणका प्रतिनिधिले आरोप लगाएका छन्। सहभागीताका लागि वीर र शिक्षणमा दुई दिनअघि नै पत्र पुगे पनि स्वास्थ्य सचिव डा रेग्मीलाई भने ढिलो गरी जानकारी दिइएको थियो। बैठक सुरु हुनुभन्दा २० मिनेटअघि मात्रै जानकारी पाएकी सचिव रेग्मीले बैठकका लागि समय दिन सकिनन्। अर्कै कार्यक्रम तय भइसकेकाले उनी त्यता लागेपछि स्वास्थ्य मन्त्रालयकी प्रमुख विशेषज्ञ डा पुष्पा चौधरीको अध्यक्षतामा बैठक बस्यो। तर, मानव अंगले बैठक किन बोलायो भनेर विवाद भएपछि निर्देशिका कार्यान्वयनको प्रसंगले बैठकमा प्रवेश नै पाएन। निर्देशिका कार्यान्वयन सम्बन्धी निर्णय नभई निःशुल्क प्रत्यारोपणका लागि स्वास्थ्य मन्त्रालयले उपलब्ध गराउने अनुदान नआउने देखिएपछि शिक्षण अस्पतालले निःशुल्क सेवा दिन नसक्ने भनी सूचना टाँसेको हो। शिक्षण अस्पतालका सामाजिक इकाइ प्रमुख कृष्णदेव पन्तले भने, ‘मिर्गौला प्रत्यारोपण निःशुल्क भइसकेको बिरामीलाई थाहा छ। त्यसैले यसका लागि हामीकहाँ आएर गुनासो गर्न थालेपछि सूचना टाँस्न बाध्य भएका हौं।’ (स्वास्थ्यखबरबाट)    

अख्तियारले भ्रष्टाचार न्यूनिरणमा आम सहभागिता जनाउन टोल फ्रि नम्बरको होर्डिङ बोर्ड र स्टिकर सबै सेवाग्राही कार्यालयमा राख्ने भएको छ । आयोगका सचिव राजन खनालका अनुसार, मालपोत कार्यलय, यातायात व्यवस्था विभाग, नापी विभाग, श्रम कार्यालय र नगरपालिकामा सो होडिङबोर्ड र स्टीकर सर्वसाधरणले देख्ने गरी राखिने भएको हो । उक्त टोल फ्री नम्बरमार्फत् भ्रष्टाचारजन्य गतिविधि, अनियमितता र घुसलगायतका गुनासा टिपाउन सर्वासाधरणलाई आग्रह गरिनेछ । बिहीबार राजधानीमा आयोजित पत्रकार सम्मेलनमा आयोगले ६८ ओटा ‘स्टिङ अपरेसन’ गरेर ९१ जना कर्मचारीहरुलाई यो आर्थिक वर्षमा नियन्त्रणमा लिइ कारबाही चलाएको जानकारी पनि दिइयो । जसमा ६ जना उपसचिव, ४० जना नायब सुब्बा रहेका छन् । सबैभन्दा बढी स्टिङ अपरेसन नापी कार्यलयमा गरिएको र २२ ओटा जिल्लामा यस्ता अपरेसन गरिएको पनि आयोगले जनाएको छ ।

काठमाठडौं, साउन २८ । नेकपा माओवादी केन्द्रले वर्षासँगै आएको बाढी पहिरो र डुबानमा परी २५ जनाको मृत्यु र दर्भजनाै‌काे बेपत्ता भएकाेमा गहिरो दुःख व्यक्त गरेको छ । साथै बेपत्ताको खोजी तथा उद्दार र राहतको लागि सरकारसँग जोडदार माग गरेको छ । माओवादी केन्द्रका अध्यक्ष पुष्पकमल दाहाल ‘प्रचण्ड’ले जारी गरेको विज्ञप्तीम भनिएको छ, ‘ बाढी पहिरो र डुबानमा परी मृत्यु भएकाहरुप्रति हार्दिक श्रद्धाजली व्यक्त गर्दै शोक सन्तप्त परिवार जनमा गहिरो सम्वेदना व्यक्त गर्दछ । तत्काल बेपत्ताहरुको खोजी गर्न तथा उद्दार र राहतका लागि सरकारसंग जोडदार माग गर्दछ ।’

फोन न उठाउँ त कुनै महत्वपुर्ण समाचार गुम्ने हो कि भन्ने लाग्छ । अनि मलाई आउने फोन उठाउने नै हो भने अरु काम नगरे भयो । यो अवस्था छ मेरो । दिनमा जसोतसो फोन उठाउँछु तर ईमो , भाईवर र ह्वार्टशप मैले बन्द नै गर्नु पर्ने बाध्यता छ । मेरो सवै भन्दा आरमका् दिन त्यो हो जुन दिन मैले फोन गरेको हुन्छु । मलाई आउने फोनहरु मध्ये आरामै ? खान खानु भयो र मलाई चिन्नु भयो रु के छ खवर रु यस्ता कुराले थप तनाव पुराउँछ । कहिले भुतले छल्यो भनेर रातमा बोलाउँ छन । कहिले बलात्कार भयो भनेर सुईको दिन्छन । कहिले अरु अनेक थरी विषयमा बोलाउँ छन् । यहि क्रममा गए राती सदरमुकामको एक होटलमा बोलाईयो । त्यस होटलमा काम गर्ने एक जना कामदार महिला शौलाय भित्र पसेको झण्डै आधा घण्टासम्म बाहिर न निस्केको र खोल्दा चुक्कुल लगाएको विषयमा हंगामा मच्चिएको रहेछ । निद्रमा थिएँ जुरुक्क उठेर गएको त वोलाउँदा पनि बोल्दीनन । आत्मा हत्या गरेको आंशका जिल्ला प्रहरी कार्यालयबाट आएको प्रहरीले पनि गरे मसहित अर्का पुराना पत्रकार हरिप्रसाद पोखरेलले पनि गरिऔं । हामीले ढोकाको चरबाट फोटो खिच्दा ति महिला शौचालयको चिसो भुँईमा लडेकी थिईन् । त्यो दृश्य देखेपछि पट्रोलिङ्गका प्रहरीको हद भन्दा बाहिरको विषय लागेर मुद्धा फाँटलाई बोलाए । टोली केहि वेरमा आयो । होटलवालाहरुको ओठ मुख सुकेको थियो । जम्मा तीन दिन भएको रहेछ उनी त्यहाँ आएको। वर्षऔंदेखि माईला दाईको चिया पसल भनेर चिनिएका र असाध्धै सोझा माईलादाई फस्ने हुन की भन्ने चिन्ता पनि त्यहाँ गरिदै थियो । एक्कासी ति चिसो भुँईमा लडेकी महिला ढोका खोलेर बाहिर निस्केपछि सदरमुकाममा अर्को भुत निस्कीए जस्तो भयो । किन हो यसरी जम्मा भएको ? यस्तो ठाडो प्रश्न गर्दै ति महिला बाहिर निस्कीईन् । ३/४ चार वटा सन्तानकी आमा ईस्माको दोहली गाउँबाट श्रीमानले होला गरेपछि तम्घासमा जुठा भाँडा माझ्न आएकी उनलाई वेला बेलामा बेहोस हुने रोगले छोएको रहेछ । गाउँमा न्याय पाईन त्यसैले ज्यान पाल्न हिडेकी हुँ भन्ने उनका बारेमा नवनिर्वाचित जनप्रतिनिधीले चासो दिने विषय बनेको छ । फेरी अर्की भुत आईन र भनिन–‘दाई मेरो मन होईन र ? ’ त्यहाँबाट फर्केपछि भर्खर सुत्न के लागेको थिए एउटा फोन आयो । सुरु मै दाई रकर्ड चाँही नगर्नु होला म तपाईसंग भित्रि मनको वह पोख्न चाहन्छु है भनिन् । भन्नु न भने । उनले यसरी आफ्ना वहहरु पोखिन –‘ पक्कै पनि लोग्ने मोन्छे र हामी महिलाको मन एउटै होला । मेरो १८ वर्षको उमेरमा तीन वर्ष अघि विहे भएको हो । प्लस टु पढ्दै थिएँ र कुनै पनि पुरुषसंग मेरो सेक्सुअल सम्वन्ध पनि थिएन । तर जिज्ञाषु मन भने व्याकुल थियो । माग्न आए वाहुने संस्कारमा वावु आमाले दिएपछि नकार्न सकिन । विहे भयो । जन्म घर छाड्नुको रोदनसंगै कौतुहलता पनि हुँदो रहेछ । विहेको पहिलो दिन हामी दुई जना नजिकीने वातवरण पनि थिएन् । दुलहन फर्काए पछिका दिन भने हाम्रा लागि ढुक्क छन भन्ने ठानेकी थिएँ । तर मेरा कल्पना , कल्पना मै सिमित हुने ठानेपछि उनि विेदेश हिड्नुको अघिल्लो दिन राती म आफ्नो लाज पचाउन बाध्य भएँ । उनी जहाँ सुत्छन मैले छाड्ने वाला थिईन । एउटी अनमत्त बैशे उमेरकी केटीलाई श्रीमति बनाएर ल्याई सकेपछि खोई श्रीमानले गर्ने ब्यवहार ? म यहि कुरामा आक्रोषित थिएँ । त्यही आक्रोष र आतुर यौन जिज्ञाषा मेटाउन म उनि लुकेर सुतेको स्थान माथिल्लो तलाको आँटीमा झयालबाट उक्लेर चोर जस्तै गरी पुगे । मस्त निद्रामा रहेछन् । मुहार सुम्सुमाउँदै उठाएँ । मोवाईलको लाईट वालेर मुहार हेरे असाध्धै मन वहकियो । त्यसपछिको समय मेरा लागि निकै पिडादायि रह्यो । दाई उत्ताउँली केटी रहेछ नभन्नु होला । तपाई धेरै महिलाका पिडा लेख्ने भएर म नलजाई भन्दै छु कि म जस्ता चेलीले यस्तो भोग्न नपरोस भन्नका खातिर सवै कुरा भनेकी हुँ । त्यस रात उज्यालो हुने बेलासम्म मेरो तड्पाइ शान्ता पार्नै सकेनन् उनले । मुटु एकनासले भड्की रहेको छ । श्वास प्रश्वासले मलाई थप दवाव दिई रहेको छ । मलाई मेरो मनले दवाव दिए पनि उनको मनले उनलाई दवाव दिन सकेन् । कौतहलतै कौतुहलताको तडपाइका बीच त्यो रात वित्यो । उज्यालो भएको केहि वेर घरयासी काममा लागियो । उनलाई विदाई गर्नु पुर्व नै मैले कसरी विदाईको हात हल्लाउ भन्ने सपनादेखि रहेकी थिए । श्रीमान श्रीमति नातामा सेक्स भन्ने कुरा मात्रै बाधक पनि त्यति वेला मलाई लागेन । उनि हिड्ने भन्ने कुराले नै म एक्ली जस्तै भई सकेकी थिएँ । बरु मलाई केहि नगरोस मात्र मेरो कोखमा लुटपुटिए पनि धन्य हुन्थ्यो जस्तो मलाई लागेको थियो । तर उ एक चोटी विदेश गएर आएको मान्छे जाने नै भयो । घरमा बाबा आमा र वहिनीहरुले टिका टाला गरेसंगै मैले उसलाई अलि परसम्म छोड्न गए । वाक्य फुट्न बढो मुस्कील थियो । दुवै मौन छौं । गर्न त उसले मलाई माया गर्दो रहेछ भन्ने तव थाह पाएँ । मौन हिड्दै गर्दा उसका आँखा रसाएका थिए । मैले पुग्न वित्तिकै फोन गर्नु है भन्न नपाउँदै मुटुमा गाँठो प¥यो । दुवैको अश्रुधारका संगै आँखा जुधाऔं । अंगालो हालेर रुने मन थियो तर बातरवरण नभएर विवस भयौं । उताबाट जिप आयो मेरो उनलाई टिपेर लग्यो । आँखाको दृष्टीले पुग्ने बेला सम्म मैले एकानास उनलाई नियाली रहेकी थिएँ । त्यो सिङ्ग जिप उनकै प्रतिमुर्ति बनेको थियो । यसरी विदा भएका हामीविच वैवाहिक सम्वन्ध सुमधुर हुने कुरामा म ढुक्क थिएँ किन की विदाईको क्षणमा उसका पनि आँशु खसेकोले । उसको फोनको प्रतिक्षमा म निकै दिन तड्पीएँ । एक चोटी सपरिवारलाई फोन गर्ने बेलामा म पनि उस ग वोल्न चाहें । मलाई तँ मन पर्दैन आफ्नो खुशी गर्नु यस्तो भन्यो । भन्नु न दादा भक्कानीदै मलाई कस्तो भए होला । म मेरा बाबु आमाको इज्जतका खातिर उसले त्यो भनेपघि घर गर्न बाध्य छु । त्यसपछिका दिनमा उसको नम्वरमा धेरै चोटी फोन हानें उसले पटक्कै उठाएन । पछि गएर नम्वर चेञ्ज ग¥यो । दिनमा त साथीसंग कुराकानी हुँदा केहि जस्तो लाग्दैन तर दादा म कैयौं रात रोएर बिताएकी छु । २०/२२ उमेरकी मान्छे । पढा लेखा र धेरै केटाहरुले लाईन मार्ने सुन्दरता पनि छ जस्तो लाग्छ । कहिले काँही मन वरालीन्छ पनि तर वावु आमाको ईज्जत मेरा सामु सावाधानीको औला ठडाए उभिन्छ । मलाई थाह छ उ नपुकसक होईन । मैले थाह पाएँ उसले छिमेकी केटीलाई एक चोटी भुँडी बोकाएर फलाएको रहेछ । विहे गरेको १५ दिनसम्मका रात उसले गाउँ घरका केटीहरुसंगै बितायो । अहिले उ मसंग सम्पर्क विहन भए पनि गाउँकी एउटी केटीसंग दिनमा दश पटकसम्म फोन गर्दो रैछ । म अस्ती साउने सक्रान्तिमा माईत गएँ । बुवा आमाले वावुले फोन गर्नु हुन्छ भन्दा मुस्कुराउँदै अघि भर्खर पनि गर्नु भएको थियो, दर्शन भनि दिनु भन्नु भाछ भनेर ईज्जत बँचाएँ । भाईले सधै भन्छ कि भेनालाई झिकाउन भन्नु कि अलिकति पैसा पठाई दिन भन्नु म विदेश जान्छु । हुन्छ नि कुरा गरी दिउँला भन्छु । मलाई घर खर्च गर्ने पैसा त उसले पठाएको छैन भने भाईको त्यो कुरा कसरी सल्टाउन सक्थे र दादा भन्नु त ? एउटा कुरा दादा घरमा बुढा वाआमाले त राती अवेर सम्म टिभीमा फिल्म हेनु हुन्छ तर म हेर्नै सक्दीँन । किन कि हिरो हिरोईनीका रोमान्स देख्दा मेरो मुटु भक्कानिन्छ । कहिले काँही सपनामा उसंग रोमान्समा हुन्हु म । घर त आईज न किन छाडुला र भन्छु । उसको प्रतिक्षाको दियो हरदम वालेकी छु । उ पचासौं वर्ष नआउञ्जेलसम्म कहिल्लै निभ्न सक्दैन र यो जिज्ञाषु मन पनि । उ वाहेक कसै संग डगमगाउन चाहन्न । मनै हो दादा, कहिले काँही उन्मत्त हुन्छ । त्यसलाई मैले एकदम मिठास अनुभुतिका साथ लिने गछु । तपाईले धेरै महिलाले दोस्रो विवाह गरेको न्युज लेख्नु हुन्छ । तर त्यस पछाडीका कारणहरु लेख्नु हुन्न र दुख लाग्छ । होला कोही कोही मात लागेर हिडे होलान तर धेरै जस्ता महिलाहरु श्रीमान नाम मात्रैको भएर हिडेका छन भन्ने मेरै अवस्थाले पनि स्पष्ट पार्छ । म बस्छु उ आउने बेलासम्म । माईतीको ईज्जत पनि जति थामे, थामे । जव उ आएर यस्तै व्यवहार देखायो भने हेर्नु होला म पनि उसको चिल्लीविल्ली पारेर हिड्ने छु । त्यो समाचार लेख्नु भयो भने अहिले मैले गरेका कुरा पनि लेख्नु होला । महिला त्यसै घर छोड्दैनन् । वर्षऔंसम्म उसलाई कुर्ने, उसको घरको गोठालो हुने अनि माया नपाउने ? त्यस कारण क्षतिपुर्ति सहित टाप कस्नु पर्ने बाध्यता छ । उ छोरो मान्छे विदेशमा आफ्नो हात देखि त्यहाँका झारपात सम्मबाट सन्तुष्टी लिने तर हामी घर धान्नेहरुसंग सामान्य मायाको बचनसम्म नदिएपछि छाड्नै परे त्यसै कसले छाड्छ ? दादा डिष्टप गरे यो मध्ये रातमा माईन्ड नगर्नु होला । पोई खोजेकी रहिछ पनि नभुन्नु होला मात्र म जस्ता चेलीहरुको वेदना पोखेकी हुँ मेरो नाम चाही नभनि दिनु होला लेख्न चाँही लेख्दीनु होला । सुत्नु दाई, म पनि सुत्छु एक लोटा पानी खाँदै ।। गलल्ल हाँसो।।। बाई।।। सियु।।।। । वाहिर निस्कीँदा पारी व्रम्हाकुमारी इश्वरीय विश्वविद्यालयमा विहानीको पुजा आरधान चलेको रहेछ । यसर्थ म आज २०७४ , साउन २० गते अनिद्रमा छु ।

भैरहवा, साउन १८ । रुपन्देहीबाट यस वर्ष मुस्लिम समुदायका १ सय ३५ जना हज गर्न साउदी अरेबियाको मक्कामदिना जाने भएका छन् । अरब सरकारले नेपाललाई हजयात्राका लागि १ हजार २ सय कोटा दिएको छ । त्यसका लागि देशभर बाट १ हजार ९ सय १६ जनाले आवेदन दिएका थिए । जसमध्ये ६ सय १५ जना गतवर्ष छनोटमा नपरेकाले यस वर्ष पहिलो प्राथमिकतामा परेका छन् । कोटाभन्दा बढी आवेदन परेकाले केन्द्रीय हज समितिबाट गठित कार्य सम्पादन उपसमितिले जनसंख्या, उमेर, रकम पेश्की भौचर र आवेदन मितिका आधारबाट हजयात्रामा जानेको नाम छनोट गरेको मुस्लिम वेलफेयर सोसाइटीका हज व्यवस्थापन उपसमितिका अध्यक्ष अब्दुल रहमान खाँनले जानकारी दिए । मक्कालाई अल्लाहको घर र मोहम्मदको जन्मथलो मानिन्छ । रुपन्देहीको हज तीर्थयात्रीको टोली साउन २८ र २९ गते त्यसतर्फ प्रस्थान गर्ने बताइएको छ ।

राजविराज,साउन १७ । प्रत्येक वर्ष सप्तरीको तिलाठी, सकरपुरा, लौनियाँलगायतका स्थानमा खाँडो र त्रियुगा नदीको पानीले दुःख दिँदै आएकोप्रति सरोकारवाला निकायले चासो व्यक्त गरेका छन् । सप्तरीको राजविराजमा सोमबार आयोजित समुदायको सहभागितामार्फत जलस्रोत कूटनीति निर्माणका लागि आयोजित जिल्लास्तरीय अन्तरक्रिया कार्यक्रममा वर्षौंदेखि नेपाली भूभाग डुबानमा पर्दा नेपाल र भारत दुवै पक्षले हालसम्म कुनै ठोस कदम चाल्न नसकेको भन्दै दुवै मुलुकको कूटनीतिज्ञ पहल कमजोर रहेकाले यसलाई अब स्थानीयस्तरबाट पनि समाधान गर्नतर्फ लाग्नुपर्नेमा वक्ताहरुले जोड दिएका छन् । सोही कार्यक्रममा बोल्दै प्रोपब्लिक काठमाडौँका वरिष्ठ अधिवक्ता एवं कार्यकारी अध्यक्ष प्रकाशमणि शर्माले जलस्रोतसम्बन्धी दुई देशबीचको झगडाले कसैलाई फाइदा नपुग्ने बताउनुभयो । साथै, उहाँले दुई देशका जनताले झगडा नगरी आपसी समन्वय गरेर भए पनि त्यसको निकासतर्फ उन्मुख भएर आपसी भाइचाराको नाताले सम्बन्ध अझ सुदृढ गर्नुपर्ने उल्लेख गरे । क्रेस नेपाल, राजविराजको आयोजना तथा प्रोपब्लिक, काठमाडौँ र भारतीय वातावरण तथा कानूनी संस्था, नयाँ दिल्ली, भारतको सहयोगमा आयोजित कार्यक्रममा प्रमुख जिल्ला अधिकारी कृष्णबहादुर कटुवाल, स्थानीय विकास अधिकारी सुदेव पोखरेल, महिला तथा बालबालिका कार्यालयका अनिता चौधरी, अधिकारकर्मी आभासेतु सिंहलगायत स्थानीयवासी र सञ्चारकर्मीलगायतको सहभागिता रहेको थियो । यसैबीच, नेपाल–भारत खाँडो त्रियुगा समस्या समाधान नागरिक पहल समितिको पनि गठन गरिएको छ । नेपाली पक्षबाट तिलाठी गाविसका निवर्तमान अध्यक्ष दिनेश्वर मिश्रको संयोजकत्वमा नीरज झा, देवनारायण यादव, अमीर झा, कृपानन्द झा, आभासेतु सिंह, उपेन्द्र साहलगायत १६ सदस्य रहेका छन् । त्यस्तै, भारतीय पक्षबाट रामप्रवेश यादवको संयोजकत्वमा रवीन्द्र कामैत, धीरेन्द्र मेहता, प्रकाशचन्द्र मेहतालगायत १५ सदस्यीय समिति गठन गरिएको बताइएको छ । उहाँले दुई देशका नवगठित समितिले अबका दिनमा खाँडो र त्रियुगा नदीका कारण आउने बाढीको निकासबारे सर्वपक्षीय छलफल गरी ठोस कदम चाल्ने बताइएको छ । ––––––––

रसुवा, असार ११ । प्रत्येक नागरिकलाई सञ्चारको पहुँच पुर्याउने सरकारको नीतिअनुरुप नेपाल टेलिकमले जिल्लाका विभिन्न ठाउँमा रिपिटर टावर जडान कार्य अगाडि बढाएको छ । नेपाल टेलिकम रसुवा शाखाका प्रमुख जनक डाँगीका अनुसार धुन्चे, टिमुरेको खैदी, गोल्जुङ भन्ज्याङ, ठाडे जिवजिवे क्षेत्रमा मोबाइल सेवाका लागि रिपिटर टावर जडान भइसकेको र दुर्गम क्षेत्र यार्सा र डाँडागाउँ ठूलोगाउँका लागि कालिका स्थानमा रिपिटर टावर सञ्चालनमा ल्याइने भएको छ । ठाउँठाउँमा रिपिटर टावर जडान भएका कारण २० हजार रसुवालीले मोबाइल सेवा लिइसकेको नगारिक समाजको अनुमान छ । राष्ट्रिय जनगणनाका आधारमा यहाँको जनसङ्ख्या ४३ हजार छ । गाउँपालिका, स्वास्थ्य संस्था र माध्यमिक विद्यालयलाई निःशुल्क इन्टरनेट उपलब्ध गराउने कार्य पनि अगाडि बढाइएको टेलिकमका प्रमुख डाँगीले जानकारी दिनुभयो । उहाँका अनुसार अप्टिकल फाइबरको व्यवस्था भने धुन्चे सदरमुकामसम्म भइसकेको छ । यस्तै ल्यण्ड लाइन फोन नेपाल–चीनको अन्तर्राष्ट्रिय क्षेत्र टिमुरे सिमाना स्याफ्रुबेसी, धुन्चे, कालिकास्थान र जिवजिवे गरी मुख्य पाँच स्थानमा ९६४ थान उपलब्ध गारइएकामा ३५० वटामा इन्टरनेटकोे सुविधासमेत उपलब्ध गराइएको र यसबाट रु ६० लाख शुल्क उठ्ने गरेको नेपाल टेलिकमले जनाएको छ । सञ्चार सुबिधाले दूरदराजका ग्रामीण बासीमा उमङ्ग छाएको स्थानीय पण्डित टङ्कप्रसाद ढकालले बताउनुभयो ।